Ataatat qilammiusoq ilisarisimaviuk?

ATAATAT qanoq ilisarisimalluartigaajuk? Ilaqutariinni asannittuni peroriartorsimaguit apeqqut tamanna eqqumiigisinnaavat. Immaqa ima akissaatit: ’Soorunami ilisarisimalluarpara!’ Aap, inuit amerlanersaasa nalunngilaat ataatartik sunik nuannarisaqarnersoq sunillu nuannarinngisaqarnersoq, pissutsini aalajangersimasuni qanoq periartarnersoq ilaquttaminillu qanoq isumaginnittarnersoq.

Taamaakkaluartorli immaqa ilaannikkut tupaallaatigisarpat ataatavit ilimaginngilluinnakkannik periartarnera. Assersuutigalugu, ernerusoq isumaqarsinnaavoq ataatani sallaatsuusoq saamasuusorlu. Taavali ajutoortoqarpoq. Tassanngaannaq ataatani ilaquttaminik illersuiniarluni aalajangeriataallaqqilluni aalajaallunilu iliuuseqartoq takulerpaa.

Pinngortitsisorpummi? Qanoq ilisarisimalluartigaajuk? Taanna pillugu Biibilimi ima allassimasoqarpoq: „Taassumani inuuvugut anersaartorlutalu atallutalu.“ (Apustilit Suliaat 17:28) Inuunerput Guutimit tunissutaavoq; tamanna eqqarsaatigalugu oqartoqarsinnaavoq taanna uumassuseqartunut tamanut Ataataasoq. (Esaja 64:7) Immaqa illit Guuti taamatut isigaat, tamannalu pissusissamisuuginnarpoq. Taannali pillugu paasisaqarnerungaarsinnaavugut — nammineq iluaqutissatsinnik nuannaarutissatsinnillu.

Illit ataatannut nunamiusumut misigissutsinnut ataqqinninninnullu aalajangiisuusoq tassaavoq taassuminnga qanoq ilisarisimannilluartiginerit. Guutimut attaveqarninnut tunngatillugu aamma taamaappoq. Guuti ilisarinerujartortillugu taassumunnga qaninnerujartuinnartumik attaveqalissaatit. Guuti ilisarisimallualerukku taassumalu piumasaatut iliornissaq ilikkarukku, taassuma inuunermi atugarliuutit naammagalugit atornissaannut ikiorsinnaavaatit.

Guuti kinaassusilittut qanoq ittuua? Pissusii taassumunnga misigissutsinnut qanoq sunniuteqartariaqarpat? Taassuminnga ilisarisimanninneq akisussaaffittaqarpa? Apeqqutit tamakku allaaserisami tulliuttumi akineqarput.

[Qupp. 3-mi issuagaq]

Inummik ilisarisimannillualerneq taassumunnga misigissutsinnut sunniuteqartarpoq