Ataqqinninnermut tunngatillugu maligassiuivit?
Ataqqinninnermut tunngatillugu maligassiuivit?
„Ataqqeqatigiigitsi immissinnut akimorniullusi.“ — ROMAMIUT 12:10.
1. Silarsuarmi sumiiffiit ilarpassuini suna nalinginnaajunnaarsimava?
NUNAT ilaanni meeraaqqat inersimasunik ilaqaraangamik ataqqinningaarlutik seeqqumiartarnerat ileqquuvoq. Taamaalillutik imminnit utoqqaanerusunit issiasunit anginerorpasinneq ajorput. Innuttaaqatigiinni taakkunani aamma meeqqap inersimasoq tunullugu ingerlasarnera ataqqinninnginnertut isigineqartarpoq. Kulturini assigiinngitsuni ataqqinninnermik ersersitseriaatsit Mosesip inatsisaanut peqqussummik matuminnga ilalimmut eqqaanarput: „Qeersuut nikuiffigissavatit utoqqaallu ataqqillugit.“ (3 Mosesi 19:32) Ajoraluartumik sumiiffiit ilarpassuini allanik ataqqinninneq nalinginnaajunnaarsimavoq. Ataqqinninnginneq ulluinnarsiutaavoq.
2. Biibilimi kikkut ataqqeqquneqarpat?
2 Allanik ataqqinninnissaq Biibilimi pingaartinneqartupilussuuvoq. Tassani allassimavoq Jehova Jiisusilu ataqqissagivut. (Johannesi 5:23) Aamma peqquneqarpugut ilaquttavut uppeqativullu aamma ilagiit avataanniittut ataqqissagivut. (Romamiut 12:10; Efesosimiut 6:1, 2; 1 Petrusi 2:17) Qanoq ililluta Jehova ataqqisinnaavarput? Aamma qanoq ililluta qatanngutitsinnik kristumiunik angutinik arnanillu ataqqinningaarsinnaavugut? Apeqqutit taakku taakkununngalu assingusut sammeriartigit.
Jehova taassumalu aqqa ataqqikkit
3. Jehovamik ataqqinneriaaseq pingaarutilik suua?
3 Jehovamik ataqqinneriaaseq pingaarutilik tassaavoq aqqanik ataqqineqarnissaatut ataqqinninneq. Uagummi taassuma aqqa taaguutigaarput. (Apustilit Suliaat 15:14; Romamiut 10:13) Guutip ajugaqanngitsup aqqanik, Jehovamik, taaguuteqarneq ilumut ataqqinaataavoq. Pruffiiti Mika ima allappoq: „Inuiaat allat tamarmik inuupput namminneq guutimik aqqanni; uagulli inuujumavugut [Jehovami] Guutitta aqqani naassaanngilluinnartumik.“ (Mika 4:5) ’Jehovap Guutitta aqqani inuujumavugut’ ullut tamarluinnaasa atermut taaguutigisatsinnut ataqqinaataasumik inuuniarnitsigut. Soorlu Paulusip kristumiut Romamiittut eqqaasikkai, Guutip aqqa ’mitaatigisaalissaaq’, imaluunniit tusaamanerlugaalissaaq, nutaarsiassaq nuannersoq oqaluussissutigisarput naapertorlugu inuunngikkutta. — Romamiut 2:21-24.
4. Jehovamik nalunaajaatiginninnermik immikkut pisinnaatitaaffik illit qanoq isigaajuk?
4 Aamma Jehova ataqqisarparput nalunaajaanitsigut. Itsaq Jehovap Israelikkut imminut nalunaajaasunngoqqullugit kajumissaarpai, akisussaaffitsilli eqqortinngilaat. (Esaja 43:1-12) Jehovamut pikitsitsigajupput ’aliasuutissiortarlugulu’. (Tussiaat 78:40, 1990) Naggataatigut inuiaqatigiit taakku Jehovamit iluarisaajunnaavipput. Ullumikkulli uagut Jehovamut nalunaajaasuunermik aqqanillu nalunaajaatiginninnermik immikkut pisinnaatitaaffik qujamasuutigaarput. Nalunaajaatigisarparput asagatsigu aqqatalu illernarsisinneqarnissaa qilanaarigatsigu. Qanoq ililluta oqaluussinaveersaarsinnaagatta Ataatarput qilammiusoq taassumalu siunertai pillugit sallusuissut nalunngikkutsigu? Apustilip Paulusip misigisimaneratut misigaagut, taanna ima oqarami: „Pinngitsoornanga [tusarliuttussaavara], eqqanarlu uanga iivangkiiliu nalunaajaatiginngikkukku.“ — 1 Korinthimiut 9:16.
5. Jehovamik upperinninneq taassuminnga ataqqinninnermut qanoq attuumassuteqarpa?
5 Tussiaasiortoq Daavi ima oqarpoq: „Ilisimannittut tatigaatsit, qimannaviannginnakkit ilinnik ujarlersut, [Jehova].“ (Tussiaat 9:11) Jehova ilisarisimalluarutsigu aqqanillu ataqqinnikkutta, tatigissavarput itsaq taassuma kiffaasa aalajaatsut taassuminnga tatiginnissimanerattut. Jehovamik taamatut tatiginnillunilu upperinninneq taassuminnga ataqqinneriaasiuvoq suli alla. Maluginiaruk Jehovamik tatiginninnerup taassuminngalu ataqqinninnerup Guutip oqaasiani imminnut atassuserneqarnerat. Itsaq Israelikkut tatiginngimmanni Jehovap Mosesi aperaa inuiaqatigiit taakkua qanoq sivisutigisumik asiginnassaneraanni, imaluunniit ataqqinninngitsumik pissaneraanni, aamma ’qanoq sivisutigisumik upperiumassannginneraanni uffa taama amerlatigisunik nalunaaqutiliorfigisimagitsik?’ (4 Mosesi 14:11) Uagulli Jehovap sernissuiumaarneranik annikilliornitsinnilu napatitsiumaarneranik qularutiginninnginnitsigut ersersissavarput taassuminnga ataqqinnilluta.
6. Suna Jehovamik ataqqinningaarnissamut kajumississutigisarparput?
6 Jiisusip ersersippaa Jehovamik ataqqinninneq qamannga pisuusariaqartoq. Jiisusip Jehovamik pallorfiginninnerminni ilumuunngitsut saaffigalugit Jehovap ima oqarsimanera issuarpaa: „Inuiaat ukua qarluinnarminnik ataqqivaannga, uummataalli uannit ungaseqaat.“ (Matthæusi 15:8) Jehovamik ilumoorluni ataqqinninneq taassuminnga qamannga pisumik asanninnermit aallaaveqarpoq. (1 Johannesi 5:3) Aamma Jehovap neriorsuutaa una eqqaamavarput: „Ataqqinnitsikka . . . ataqqissavakka.“ — 1 Samueli 2:30.
Ilagiinni siuttuusut allanik ataqqinnittarput
7. (a) Sooq qatanngutit angutit akisussaaffillit nakkutilliisuuffigisaminnik ataqqinnittariaqarpat? (b) Paulusip uppeqatini qanoq ililluni ataqqivai?
7 Apustilip Paulusip uppeqatini ima kajumissaarpai: „Ataqqeqatigiigitsi immissinnut akimorniullusi.“ (Romamiut 12:10) Qatanngutit angutit ilagiinni akisussaaffeqartut nakkutilliisuuffigisaminnik ataqqinninnermut tunngatillugu maligassaalluartariaqarput. Tamatumunnga tunngatillugu Paulusip maligassiaa malikkunikku silatusaassapput. (Atuaruk 1 Thessalonikamiut 2:7, 8.) Qatanngutit ilagiinni Paulusip tikeraagaaniittut nalunngilaat taassuma nammineq iliuusererusunngisaminik ilioqqullutik qinnuiginavianngikkaatik. Paulusip uppeqatini ataqqivai, uppeqataasalu aamma taanna ataqqivaat. Ilaanni ima oqarpoq: „Taamaattumik ima oqaaqqissaarpassi: Assiginiarniarsinga.“ Taama oqarmat qularutiginngilluinnarsinnaavarput ilarpassui kajumissaarut tamanna malillugu iliortut maligassiuilluarsimanera pissutigalugu. — 1 Korinthimiut 4:16.
8. (a) Jiisusip ajoqersukkani pingaarutilimmik qanoq ataqqinninnermik ersersitsivigai? (b) Ullumikkut nakkutilliisut Jiisusip maligassiaa qanoq malissinnaavaat?
8 Aamma qatanngutip angutip akisussaaffillip nakkutilliisuuffigisani ataqqisarpai, arlaannik piumaffigigaangamigit imaluunniit siunnersoraangamigit sooq taamaaliornerminik oqaluttuunnerisigut. Taamaalilluni Jiisusi ilaassavaa. Assersuutigalugu Jiisusip ajoqersukkani peqqugamigit katersuinermi sulisussanik amerlanerusunik aallartitseqqullugu Guuti qinnuigissagaat, oqaluttuuppai sooq taamaaliussasut. Ima oqarpoq: „Katersugassat amerlaqaat sulisussalli ikittuinnaallutik. Taamaattumik katersuinermi naalagaasoq qinnuigisiuk katersuisussanik aallartitseqqullugu.“ (Matthæusi 9:37, 38) Aamma ajoqersukkani ’eqqumaqqugamigit’, taamatuttaaq tunngavilersuivoq. Ima oqarpoq: „Naluarsimi ulloq Naalakkassi tikiuffissaa.“ (Matthæusi 24:42) Jiisusip ajoqersukkani iliuuseqaqqullugit oqarfigisaqattaaginnanngilai, aammali oqaluttuuppai sooq taamaaliussasut. Taamaalilluni ataqqillugillu ataqqinnittumik pissuseqarfigai. Nakkutilliisunut kristumiunut maligassiuilluarpoq!
Jehovap ilagiissai ilagiillu siulersorneqarnerat ataqqikkit
9. Nunarsuaq tamakkerlugu ilagiinnik kristumiunik akisussaaffilerneqarsimasunillu ataqqinninneq sumut ersiutaava? Nassuiaruk.
9 Jehova ataqqiumallugu aamma nunarsuaq tamakkerlugu ilagiit kristumiut taakkununngalu sinniisuusut ataqqisariaqarpavut. Inussiaq aalajaatsoq aqqutigalugu uagutsinnut siunnersuutigineqartut Biibilimik tunngavillit malikkaangatsigit Jehovap aaqqissuussaanik ataqqinnittarpugut. Ilagiinni kristumiuni siullerni apustilip Johannesip paasivaa Guutip toqqagaanik ataqqinninngitsunik naqqissuisoqartariaqartoq. (Atuaruk 3 Johannesi 9-11.) Johannesip allagaani erserpoq ataqqineqanngitsut tassaaginnanngitsut nakkutilliisut, aammali tassaasut taakku ilinniartitsinerat siunnersuutaallu. Qujanartumik ataqqinninngitsut ikittuinnaapput. Apustilit inuutillugit qatanngutigiissuit amerlanerpaartaasa siuttuusunik ataqqinningaarnerat erseqqippoq. — Filippimiut 2:12.
10, 11. Biibili atorlugu nassuiaruk sooq ilagiinni kristumiuni ilaasa oqartussaassuseqartitaanerat naleqqunnersoq.
10 Ilaat isumaqarsimapput Jiisusip ajoqersukkani ’tamarmik qatanngutigiinnerarmagit’, ilagiinni kristumiuni allanut oqartussaassuseqartoqartariaqanngikkaluartoq. (Matthæusi 23:8) Allakkanili Hebræerisuuni Grækerisuunilu angutinik oqartussaassutsimik Guutimit tunniunneqarsimasumik atuisartunik assersuutissarpaaloqarpoq. Hebræerit akornanni ataataanerpaanik, eqqartuussisunik kunnginillu oqaluttuat Jehovap maani nunarsuarmi sinniisini aqqutigalugit inunnik siunnersuisarneranut uppernarsaaterpassuaqarpoq. Israelikkut Guutip toqqagaanik ataqqinnittariaqarnermissut ataqqinninngikkaangamik, taassumannga perorsaatissinneqartarput. — 2 Kunngit 1:2-17; 2:19, 23, 24.
11 Ukiuni hundredelinni siullerni apustilit oqartussaassuseqarnerat kristumiut akueraat. (Apustilit Suliaat 2:42) Assersuutigalugu Paulusip qatanngutini maleruagassittarpai. (1 Korinthimiut 16:1; 1 Thessalonikamiut 4:2) Tamannali ilutigalugu aamma imminut oqartussaassuseqartunut kajumilluni naalatsigitittarpoq. (Apustilit Suliaat 15:22; Galatiamiut 2:9, 10) Aap, Paulusi ilagiinni kristumiuni oqartussaassutsimut eqqortumik isiginnittaaseqarpoq.
12. Biibilimi oqaluttuat oqartussaassuseq pillugu sunik marlunnik ilinniarfigisinnaavavut?
12 Tamanna marlunnik ilinniarfigisinnaavarput. Siullermik, Biibilimi ilinniartitsissutigineqartunut naapertuuppoq ’inussiap aalajaallunilu silatuup’ (NV) Siulersuisoqatigiit aqqutigalugit angutinik akisussaaffeqartussanik toqqaasarnera, aamma angutit ilaasa ilagiinni angutinut toqqakkanut allanut oqartussaassutsimik atuinissaannut toqqarneqartarnerat. (Matthæusi 24:45-47; 1 Petrusi 5:1-3) Aappassaanik, tamatta, aamma kiffartortut toqqakkat, uagutsinnut oqartussaassuseqartut ataqqisariaqarpavut. Qanormi ililluta silarsuaq tamakkerlugu ilagiinni kristumiuni akisussaaffillit ataqqisinnaavavut?
Nakkutilliisut angalasartut ataqqikkit
13. Ullumikkut ilagiinnut kristumiunut sinniisuusut qanoq ililluta ataqqisinnaavavut?
13 Paulusi ima allappoq: „Qinnuigaassi, qatanngutit, ilungersorlutik akornassinni sulisut Naalakkamilu akornassinni siulersuisut ilitsersuisuusullu qujamasuutigeqqullugit. Taakku suliaat pillugit asangaarniarsigit [ataqqingaarlugit asaqqullusigik, 1936]. Eqqisseqatigiigitsi!“ (1 Thessalonikamiut 5:12, 13) Nakkutilliisut angalasartut ’ilungersorlutik sulisunut’ ilaalluinnarput. Taamaattumik ’ataqqingaartigit’. Ilaatigut taamaaliorsinnaavugut siunnersuutaat kajumissaarutaallu uummatikkut iluunngarluta malillugit. Nakkutilliisup angalasartup inussiamit aalajaatsumeersunik siunnersoraangatigut, „ilisimassuseq pavannga pisoq“ kajumississutigalugu ’naalakkumasassaagut’ (NV). — Jaaku 3:17.
14. Ilagiit nakkutilliisunik angalasartunik ataqqinnivinnerminnik qanoq ersersitsisarpat, tamannalu qanoq kinguneqartarpa?
14 Taavami sungiusimasatsinnit allaanerusumik ilioqqulluta unnersuunneqarutta? Ataqqinnissagaanni ilaannikkut pisariaqarsinnaavoq soorlu imatut akerlileerusussuseqarnermik akiuinissaq: „Uagut tamaani taamaaliorneq ajorpugut,“ imaluunniit „Sumiiffinni allani immaqa tamanna atorneqarsinnaavoq, kisianni ilagiitsinniunngitsoq.“ Taamatut oqaaseqarnata siunnersuutigineqartut malinniartarpavut. Jehovap ilagiinnik piginninnera Jiisusillu taakkununnga Niaquunera eqqaamagatsigu, tamanna iluaqutigissavarput. Ilagiit nakkutilliisup angalasartup siunnersuutaanik nuannaarlutik akuerinninnerat malinninnerallu ataqqinnivinnerannut uppernarsaataavoq. Apustilip Paulusip qatanngutit Korinthimiittut utoqqaanertap ilagiimminnut tikeraartup, Titusip, siunnersuutaanut naalannerat pillugu nersualaarpai. (2 Korinthimiut 7:13-16) Ullumikkuttaaq qularutiginngilluinnarsinnaavarput oqaluussinermi nuannaarnerulissalluta nakkutilliisut angalasartut unnersuussutaat kajumilluta malikkutsigit. — Atuaruk 2 Korinthimiut 13:11.
„Inuit assigiinngitsut tamaasa ataqqisigit“
15. Uppeqatitsinnik qanoq ililluta ataqqinnissinnaavugut?
15 Paulusi ima allappoq: „Angut utoqqaq sukannersumik oqaluffigissanngilat, oqaaqqissaassavat ataatagisutut angutillu inuusuttut qatanngutigisutut oqaaqqissaassavatit, arnat utoqqaat anaanagisutut arnallu inuusuttut qatanngutigisutut — tamatigut minguitsuullutit. Uillarnerit kisimiivissut ataqqissavatit.“ (1 Timotheusi 5:1-3) Aap, Guutip oqaasiani kajumissaarneqarpugut ilagiinni kristumiuniittut tamaasa ataqqissagivut. Taavami illit qatanngutillu angutip arnalluunniit akornassinni isumaqatigiinngissuteqalerpat? Tamanna uppeqatinnik kristumiumik ataqqinninnissamik pisussaaffinnik naammassinninnissamut akornutigissaviuk? Imaluunniit isiginnittaatsit allanngortissinnaaviuk Guutimut kiffaasup taassuma anersaakkut pissusiisa nersornartinnerisigut? Ingammik oqartussaassusillit qatanngutiminnut ataqqinnilluinnartuusariaqarput — ’savaatinut naalagaanianngisaannarniassagamik’. (1 Petrusi 5:3) Ilagiinni kristumiuni, ilaasortaasut akornanni qamannga pisumik asanninnermik ilisarnaatilinni, ataqqeqatigiinnissamut periarfissarpassuaqarpugut. — Atuaruk Johannesi 13:34, 35.
16, 17. (a) Sooq oqaluussiffigisatsinnuinnaanngitsoq aammali akerlilersuisunik ataqqinninnissarput pingaaruteqarpa? (b) Qanoq ililluta ’inuit assigiinngitsut tamaasa ataqqisinnaavavut’?
16 Soorunami ilagiinnut kristumiunut ilaasut kisiisaanngitsoq ataqqisarpavut. Paulusip kristumiut nalimini inuusut ilaat ima allaffigai: „Piffissaqarallartilluta tamanut ajunngitsuliorniarta, pingaartumik uppeqatitsinnut.“ (Galatiamiut 6:10) Nassuerutigisariaqarpoq najoqqutassiamik tamatuminnga malinninnissaq unamminiarnarsinnaasoq suleqatitta atuaqatittaluunniit inussiarniiffigippatigut. Taamaattoqartillugu oqaatsit uku eqqaamasariaqarpavut: „Kamassaatigeqinagit pinerluttut.“ (Tussiaat 37:1) Siunnersuummik tamatuminnga malinninneq akerlilersuisuugaluartunulluunniit ataqqinnilluinnartumik pissusilersornissamut iluaqutigissavarput. Taamatuttaaq tamanut oqaluusseqataagaangatta maniguuttumik imminut isiginissarput kikkut tamaasa ’saamalluta ataqqinnilluinnarlutalu’ akinissaannut iluaqutigissavarput. (1 Petrusi 3:15, NV) Allaat isikkorput atisalersoriaaserpullu oqaluussiffigisatsinnik ataqqinninnitsinnut ersiutaasinnaapput.
17 Aap, attavigisavut uppeqatigisarigaluarutsigik ilagiilluunniit avataanniittuugaluarpata kajumissaarut manna malillugu iliorusuppugut: „Inuit assigiinngitsut tamaasa ataqqisigik, qatanngutigiissuit tamaasa asasigik, Guuti mianerisiuk, kunngi ataqqisiuk.“ — 1 Petrusi 2:17, NV.
Qanoq akissavit?
Qanoq ilillutit uku ataqqisinnaavigit:
• Jehova?
• ilagiinni utoqqaanertat nakkutilliisullu angalasartut?
• ilagiinniittut tamaasa immikkut?
• oqaluussiffigisatit?
[Atuaqqissaarnermi apeqqutit]
[Qupp. 26-mi assiliartaq]
Ukiuni hundredelinni siullerni kristumiut Siulersuisoqatigiit siulersuinerat ataqqivaat
[Qupp. 27-mi assiliartaq]
Nunani tamani utoqqaanertat nakkutilliisunik angalasartunik, Siulersuisoqatigiinnit toqqagaasunik, ataqqinnipput