Jehovap „isigernata“ inuit tamaasa misissuiffigeqqissaartarpai

„[Jehovap] isigernata inuit misissuiffigai.“ — TUSSIAAT 11:4.

1. Inuit qanoq ittut kajungerisarpavut?

ILUMOORLUTIK ilinnik soqutiginnittut — isummaminnik unneqqarillutik oqaatiginnittartut, ikiorneqartariaqaraangavit piareersimajuaannartut pisariaqartitsigaangavillu asannillutik ilinnik siunnersuisartut — qanoq isumaqarfigaagit? (Galatiamiut 6:1) Inuit taamaattut kajungerisarpatit, ilaa? Jehova taassumalu ernera taamatorpiaq pissuseqarput. Aap, inunnit kikkunnilluunniit ilinnik soqutiginninnerungaarput namminissarsiunngilluinnartumillu pissutiginiagaqarlutik; inuunivimmik ’tigulluartitaarinissannut’ (NV) ikiorusuppaatsit. — 1 Timotheusi 6:19; Saqqummersitat 3:19.

2. Jehovap kiffani qanoq soqutigitigai?

² Tussiaasiortup Daavip Jehovap uagutsinnik soqutiginningaarnera oqaluttuaraa ima oqarami: „[Jehovap] isai nakkutilliipput, isigernata inuit misissuiffigai.“ (Tussiaat 11:4) Aap, Jehovap isigiinnarnata misissuiffigisarpaatigut, imaluunniit misissuiffigeqqissaartarpaatigut. Daavi aamma ima allappoq: „Uummatiga misiliguk, paasisassarsiorfigiuk unnuakkut . . . maajunnartumik uanni nassaassaqassanngilatit [paasissavat ajortumik pilersaaruteqanngitsunga, NV].“ (Tussiaat 17:3) Daavip nalunngilaa Jehovap soqutigingaaraani. Nalunngilaa Jehova aliasutsissallugu taassumanngalu iluarisaajunnaassalluni eqqarsaatipalaaqaruni ajortumilluunniit pilersaaruteqaruni. Jehovap Daavimut piviusuutigineratut Jehova ilinnut piviusuutigaa?

Jehovap uummat isigisarpaa

3. Jehovap qanoq ersersippaa naammalluinnanngissutitsinnut oqimaaqatigiissumik isiginnittaaseqarnini?

³ Jehovap pingaarnerpaamik soqutigaa inuup ilorlikkut pissusia — tassa qanorpiaq ittuunerput. (Tussiaat 19:15; 26:2) Kukkulaarnerit asannilluni isumakkeerfigisarpai. Assersuutigalugu Aaperaap nulia, Sara, ilumoortumik oqalunngilaq inngili inuttut timeqalersimasoq oqaluukkamiuk, inngililli taassuma annilaangallunilu peqqusiileqinera paasisimannguatsiarpaa taamaattumillu saamasumik naqqiinnarlugu. (1 Mosesi 18:12-15) Ataataanerpaaq Jobi „Guutiminngarnit iluartuunerutinniarmat“, Jehovap taanna pilluaqqunngitsuunngilaa nalunnginnamiuk Jobi Saatanimit qanoq naalliutsinneqartigisoq. (Jobi 32:2; 42:12) Aamma uillarnerup Sareptamiup pruffiitimut Eliamut oqaasii sakkortuut Jehovap mamiatsaatiginngilai. Guutip paasivaa taanna meeratuaminik annaasaqarnerminik isumatsassimasoq. — 1 Kunngit 17:8-24.

4, 5. Jehovap Abimeleki qanoq nallittorpaa?

⁴ Jehovap uummat misissuiffigeqqissaartaramiuk ilaannikkut allaat imminut kiffartunngitsut innimigisarpai. Maluginiaruk Abimeleki, filisterit illoqarfiannut Gerarimut kunngiusoq, qanoq pineraa. Abimelekip, Aaperaap Sarallu aappariinnerannik ilisimanninngitsup, Sara aatippaa nuliartaariniassagamiuk. Abimelekilli taanna suli attunngikkaa Jehovap sinnattukkut ima oqarfigaa: „Ilisimavara ajortumik siunertaqarnak [uummatikkut ilumoorlutit, 1900] taamaaliortutit, uangamiuna aamma illit uannut ajortuliutsaaligikkit; taamaattumik ilinnut attortinnaveersaarpara. Maannali arnaq taanna uianut utertinniaruk; uiata pruffiitiugami qinnukkumaarpaatit inuuginnaqqullutit.“ — 1 Mosesi 20:1-7.

⁵ Jehovap Abimeleki guutipilussiortoq nallittunngitsuuinnarsimasinnaagaluarpaa. Guutilli takuaa angut taanna matumani ajunngitsumik isumaqarluni iliuuseqartoq. Jehova nallittuilluni taanna eqqarsaatigalugu iliuuseqarpoq, kunngi nalunaarfigalugu isumakkeerfigineqarumalluni qanoq iliorsinnaasoq qanorlu ’inuuginnarsinnaasoq’. Illit Guuti taama ittoq pallorfigerusuppat, ilaa?

6. Jiisusip Ataatani qanoq ilaarpaa?

⁶ Jiisusip Ataatani naammalluinnartumik ilaartarpaa;  ajoqersukkami pissusii ajunngitsut isiginiarnerusarpai kukkugaangatalu isumakkeerfigeriaannaasarlugit. (Markusi 10:35-45; 14:66-72; Lukasi 22:31, 32; Johannesi 15:15) Jiisusip isiginnittaasia oqaasiinut Johannesi 3:17-imi allassimasunut ukununnga naapertuupput: „Guutip ernini silarsuarmut aallartinngilaa silarsuaq eqqartuukkiartortillugu, kisianni taassumuuna annaanneqaqqullugu.“ Aap, Jehovap Jiisusillu uagutsinnut asanningaarnerat allanngujuippoq. Tamanna taakkua inuuinnarnissatsinnik kissaataannit erserpoq. (Johannesi 3:16) Taamatut asanninnerannit erserpoq Jehovap sooq misissuiffigeqqissaartarneraatigut, qanoq isigineraatigut aamma takusani tunngavigalugit qanoq iliuuseqartarnersoq. — Atuaruk 1 Johannesi 4:8, 19.

Asannilluni misissueqqissaarneq

7. Jehovap uagutsinnik misissueqqissaarnissaminut suna pissutigisarpaa?

⁷ Jehova politiitut ajortuliorniariartugut pakasarniarluta qilammit alapernaarsuisutut takorluussallugu kukkunerungaassaaq. Saatanili taannaavoq naakkittaatsumik pasilleerpasissumillu uagutsinnik isiginnittoq. (Saqqummersitat 12:10) Allaat inuit pisuussuteqanngitsut ajortunik pissutiginiagaqarnerartarpai. (Jobi 1:9-11; 2:4, 5) Tussiaasiortoq Guuti pillugu ima allappoq: „Illit [Jehova], ajortuliat naatsorsuutigissagaluarukkit kina atassagaluarpa taava, [Jehova]?“ (Tussiaat 130:3) Tamanna ima paasisariaqarpoq: Atasoqarsinnaassanngikkaluarpoq! (Oqaluussisartup oqaasii 7:20) Jehovalli nallittuilluni inussiarnerlunilu isigaatigut, ataataasup isumassuisup meeqqani asasani naalliunnginniassammata taakkuninnga sernissuerusuttup pisarneratut. Naammalluinnanngissutitsinnik sanngiissutitsinnillu eqqaasikkajuttarpaatigut imminut ajoqusinnginniassagatta. — Tussiaat 103:10-14; Matthæusi 26:41.

8. Jehovap kiffani qanoq ilinniartillugillu perorsaatissittarpai?

⁸ Guutip asanninnera perorsaatissiissutini ilinniartitsissutinilu, Biibili anersaakkullu inuussutissat ’inussiamit aalajaallunilu silatuumeersuut’ aqqutigalugit uagutsinnut tunniuttagaani, ersertarpoq. (Matthæusi 24:45, NV; Hebræerit 12:5, 6) Aamma Jehova ikiuisarpoq ilagiit kristumiut ’inuillu tunissutaasut’ taakkunaniittut aqqutigalugit. (Efesosimiut 4:8, NV) Aammattaaq Jehovap qimerloortarpaatigut takuniarlugu ataatatut ilinniartitsinini malillugu kajumilluta iliornersugut, tamatumalu kingorna suli allatigut ikiortarpaatigut. Tussiaat 32:8-mi ima allassimavoq: „Ilinniartissavakkit ilitsersorlutillu ingerlavissannik. Siunnersussavakkit, isigiuassavakkillu.“ Taamaattumik Jehovamut tusarnaartuaannarnissarput pingaaruteqarpoq. Maniguuffigisariaqarparput miserratiginagu taanna tassaasoq Ajoqersuisorput Ataatarpullu asannittoq. — Atuaruk Matthæusi 18:4.

9. Suut pissuserinaveersaassavavut, aamma sooq?

⁹ Tamatumali paarlattuanik uagut makitassusermit, uppernikinnermit ’ajortilluunniit salloqittaaneranit’ manngertitinneqanngisaannarta. (Hebræerit 3:13; Jaaku 4:6) Amerlanertigut tamakkua pissuserineqalertarput ajortunik eqqarsaateqalerluniluunniit kissaateqaleraanni. Immaqa naggataatigut allaat siunnersuutit Biibilimik tunngavillit naleqquttut itigartinneqartarput. Sulilu ajornerusumik, immaqa isiginnittaaserisaq pissuserluunniit ajortoq ima manngertitsigissaaq Guutimut imminut akeranngortilluni — tamanna ilumut annilaarnassagaluarpoq! (Ussatit 1:22-31) Adamip Evallu angajulliliaat Kaini qanoq pisimanersoq misissoriartigu.

 Jehovap suut tamaasa takusinnaavai takusinnaasanilu malillugit iliuuseqartarluni

10. Sooq Kainip pilliutaa Jehovap akuerinngilaa, Kainilu qanoq periarpa?

¹⁰ Kaini Abelilu tamarmik immikkut Imminut pilliuteqarmata Jehovap tunissutaat kisiisa maluginianngilai, aammali pissutiginiagaat maluginiarpai. Tamanna Abelip pilliutaanik, uppernikkut pilliutigineqartumik, akuerinninneranik kinguneqarpoq, Kainilli, arlaatigut uppernikinnerminik ersersitsisup, pilliutaa akuerinngilaa. (1 Mosesi 4:4, 5; Hebræerit 11:4) Kainip pisimasoq ilinniutiginagu isiginnittaatsiminillu allanngortitsinani nukkani kamaatilerpaa. — 1 Mosesi 4:6.

11. Kainip qanoq ililluni ersersippaa tatigisassaanngitsumik uummateqarluni, tamannalu qanoq ilinniutigisinnaavarput?

¹¹ Jehovap Kainip pissusia ulorianartoq malugaa, taannalu isumassorpaa ajunngitsulioruni ’niaqquni makitissimalerumaaraa’ oqaluttuullugu. Ajoraluartumilli Pinngortitsisup siunnersuutaa Kainip sumiginnarpaa qatanngutinilu toqullugu. Kainip uummammigut pissusiata ajortuunera ersersinneqaqqippoq sorraatsumik akimmat Guutip apeqqutaanut matumunnga: „Naak nukkat Abeli?“ Kainilu sukannersumik ima akivoq: „Naluara, nukara paarisassarinerpara?“ (1 Mosesi 4:7-9) Uummatip ila tatigisassaanngissinnaassusia — allaat ima tatigisassaanngitsigaluni Guutip toqqaannartumik siunnersuinera sumiginnarluinnarsinnaallugu! (Jeremia 17:9) Taamaattumik oqaluttuat tamakkua ilinniutigisigit eqqarsaatipalaat kissaatipalaallu itigartipallattarlugit. (Atuaruk Jaaku 1:14, 15.) Biibilimik tunngavilimmik siunnersorneqarutta, taava tamanna qujamasuutigisigu Jehovallu asanninneranut ersiutitut isigalugu.

Ajortuliat suulluunniit isertorneqarsinnaanngillat

12. Jehovap ajortuliorneq qanoq isigaa?

¹² Inuit ilaat isumaqarput eqqunngitsuliornertik takuneqanngippat pillarneqanngitsoorsinnaallutik. (Tussiaat 19:13) Ilumoortorli mannaavoq: Ajortuliat suulluunniit isertorneqarsinnaanngillat. „Suut tamarmik [taassuma] isaanut uleersimallutillu saqqumipput. Taannaavorlu iliornivut pillugit akisussaaffigisassarput.“ (Hebræerit 4:13) Jehova eqqartuussisuuvoq pissutiginiakkatsinnik ilorlerpaanik misissuisartoq, aamma taassuma ajortuliornermut isiginnittaasia naapertuilluarluinnarpoq. Taanna tassaavoq „Guuti nallittuisoq saammaasorlu, kamajaatsoq ilumoornermik sallusuissummillu peqangaartoq“. Peqqissiminngitsulli ’pillanngitsoornavianngilai’ ’piaaralutik ajortuliorpata’, unneqqaserluppata peqqusersusaarpataluunniit. (2 Mosesi 34:6, 7; Hebræerit 10:26) Taamaannera Jehovap Akanimik, Ananiamik Safiramillu pinninneranit erserpoq.

13. Akanip ajortumik eqqarsartaaseqarnera qanoq kinguneqarpa?

¹³ Akani Guutip peqqussutaanik unioqqutitsilluni illoqarfimmit Jerikomit tiguakkat ilaannik tigusivoq tuperminilu toqqorlugit, qularnanngitsumik ilaquttani ikiortigalugit. Akanip ajortuliani qulaarneqarmat iliuuserisimasami ilungersunassusia erseqqissumik nassuerutigaa, imami oqarpoq: „[Jehova] . . . ajortuliorfigisimavara.“ (Josva 7:20) Kainip pisimaneratut Akani ajortumik uummateqalersimavoq. Akanimut tunngatillugu ingammik piumatunera tamatumunnga pissutaavoq, taamatullu piumatunera ilumoorunnaarneranik kinguneqarpoq. Jerikomi tiguakkat Jehovap pigai, taava Akani ilumoortumik Jehovap pigisaanik tillippoq, tamannalu taassuma nammineq ilaqutaasalu assut ajunaarutigaat. — Josva 7:25.

14, 15. Sooq Anania Safiralu Guutimit iluarisaajunnaarpat, tamannalu qanoq ilinniutigisinnaavarput?

¹⁴ Anania nulialu Safira ilagiinnut kristumiunut siullernut Jerusalemimiittunut ilaapput. Ukiumi 33-mi piinsip ulluata kingorna aningaasanik katersuiniaqatigiittoqalerpoq, uppertunngorlaat  nunanit ungasissuneersut suli Jerusalemimiittut timikkut pisariaqartitaat matussuserniarlugit. Nammineq kajumissutsimit tunissuteqartoqartarneratigut katersuiniaqatigiiffik ingerlaannarpoq. Ananiap nunaatimi ilaa tunivaa aningaasallu pissarsiami ilaat katersuiniaqatigiinnut tunniuppai. Nuliamili ilisimalluinnagaanik isertitani tamaasa tunissutiginerarpai. Qularnanngitsumik aappariit taakkua ilagiinni immikkut ataqqineqarnissartik kissaatigaat. Peqquserluttuliorpulli. Jehovap taakkua peqquserlunnerat tupinnartuliornikkut apustilimut Petrusimut paasitippaa, taassumalu Anania aperaa sooq peqquserlunnersoq. Anania ingerlaannaq uppippoq anerningerlunilu. Tamatuma kinguninngua Safira aamma toquvoq. — Apustilit Suliaat 5:1-11.

¹⁵ Anania Safiralu sanngiilliutsiaannanngillat. Suut tamaasa pilersaarusioreersimavaat sallullutillu apustilit nakuteriaraluarlugit. Sulilu ajornerusumik: ’Anersaamut Illernartumut sallupput’. Jehovap akuliunnerani erseqqilluinnarpoq ilagiit ilumoortuusaartunut illersornissaat piareersimaffigigaa. Aap, „Guutip uumasup assaanut tigusaritinnissaq [nakkassalluni, NV] amiilaarnaqaaq“! — Hebræerit 10:31.

Sukkulluunniit assuarnaattuarit

16. (a) Saatani Guutip innuttaanik qanoq ililluni ajortunngortitsiniarsariva? (b) Diaavulup illit najukkanni inunnik ajortunngortitsiniarluni periaatsit suut atortarpai?

¹⁶ Saatani ajortunngortinniarluta Jehovamillu akuerisaajunnaartinniarluta sapinngisani tamaat iliorpoq. (Saqqummersitat 12:12, 17) Diaavulup siunertai ajortut silarsuarmi, nakuuserfiullunilu kinguaassiuutitigut ileqqorluffiusumi, erseqqipput. Ullumikkut qarasaasiat atortullu elektroniskiusut allat atorlugit pornografiimik isiginnaartoqariaannaavoq. Qanortoq Saatanip saassussinerinut nakkaannanngisaannarisa! Qanortorli Daavip misigisimaneratut misigigisa, taanna ima allammat: „Aqqut isornaalluinnartoq atuaqqissaarniarpara. . . . Uummatikkut assuarnaallunga inuujumavunga uanga illunni.“ — Tussiaat 101:2.

17. (a) Sooq Jehovap isertorluni ajortuliat naggataatigut qulaartarpai? (b) Suna aalajangiusimasariaqarparput?

¹⁷ Ullumikkut Jehova salloqittaagajuttunik ajortulianillu ingasattunik tupinnartuliornikkut qulaarineq ajorpoq, soorlu itsaq ilaannikkut taamaaliortarsimasoq. Sunilli tamanik suli takunnissinnaavoq, piffissarlu aalajangikkani nalliuppat nammineq periaatsini atorlugu isertukkanik qulaariumaarpoq. Paulusi ima allappoq: „Inuit ilaasa ajortuliaat tamanit ilisimaneqarput, ingerlaannartumillu eqqartuunneqarput; ilaasali ajortuliaat kingusinnerusukkut aatsaat paasineqarumaarput.“ (1 Timotheusi 5:24, NV) Jehovap ajortulianik qulaarinissamut pissutigisaa pingaarnerpaaq tassaavoq asanninneq. Ilagiit asavai taakkualu minguissusiat illersorusullugu. Aamma ajortimut nakkaannarsimasut, maannali peqqissimivillutillu allamik isumataartut, nallittortarpai. (Ussatit 28:13) Taamaattumik ilungersuutigisigu Guutimut uummatikkut  iluunngarluta kiffartornissarput aamma sunniinernik ajortunik tamanik itigartitsinissarput.

Uummatikkut iluunngarlutit Jehova kiffartorfigiuk

18. Kunngip Daavip ernermi Guutimik qanoq isiginninnissaa kissaatigaa?

¹⁸ Kunngip Daavip ernini Salomo ima oqarfigaa: „Ataatavit Guutia ilisariniaruk, kiffartorfiginiaruk uummatikkut iluunngarlutit nuannaarlutillu, uummatit tamaasa misissuiffigeqqissaartarpai inuillu piumasaat pilersaarutaallu tamaasa paasisimallugit.“ (1 Nalunaarsuutit 28:9) Daavip kissaatigaa ernini Guutimik upperinniinnassanngitsoq. Kissaatigaa Salomop aamma ilisimassagaa qujamasuutigissallugulu Jehovap kiffaminik soqutiginningaarnera. Aamma taamatut illit Jehova qujamasuffigaajuk?

19, 20. Tussiaat 19:8-12 naapertorlugu Daavip Guutimut qanillinissaminut suna iluaqutigaa, Daavilu qanoq ilaarsinnaavarput?

¹⁹ Jehovap nalunngilaa inuit eqqortumik isiginnittaasillit imminut kajungerumaartut aamma pissusiminik nuannersunik ilinniarnertik qamuuna nuannaajallaatigiumaaraat. Taamaattumik Jehovap kissaatigaa ilisarisimalerniassagitsinni pissutsinilu nuannersut pillugit ilinniassasugut. Qanoq ililluta taamaaliorsinnaavugut? Oqaasiinik atuaqqissaarnitsigut aamma inuunitsinni pilluaqqusisarnerata misigineratigut. — Ussatit 10:22; Johannesi 14:9.

²⁰ Qujamasullutit qinunermillu pingaartitsillutit ullut tamaasa Guutip oqaasianik atuartarpit? Najoqqutassiat Biibilimiittut malillugit inuunerup pingaaruteqassusia paasiviuk? (Atuaruk Tussiaat 19:8-12.) Taamaappat Jehovamut uppernerujartuinnassallutillu taassuminnga asanninnerujartuinnassaatit. Taanna akisilluni ilinnut qanilliartortuassaaq tasiorlutillusooq ingerlaqatigissallutit. (Esaja 42:6; Jaaku 4:8) Aap, Jehovap ilinnut asanninnini uppernarsassavaa ilinnik pilluaqqusinermigut aqqutikkullu amitsukkut inuunermut sammisukkut ingerlaninni anersaakkut ilinnik illersuinermigut. — Tussiaat 91:1, 2; Matthæusi 7:13, 14.

Qanoq akissavit?

• Sooq Jehovap misissoqqissaartarpaatigut?

• Inuit ilaasa suut Guutimut akeranngussutigaat?

• Jehovap uagutsinnut piviusuunera qanoq ililluta ersersissinnaavarput?

• Qanoq ililluta Guuti uummatikkut iluunngarluta kiffartorfigiuarsinnaavarput?

[Atuaqqissaarnermi apeqqutit]

[Qupp. 12-mi assiliartaq]

Jehovap ataatatut isumassuisutut qanoq pigaattarpaatigut?

[Qupp. 13-mi assiliartaq]

Anania qanoq ilinniutigisinnaavarput?

[Qupp. 14-mi assiliartaq]

Jehovamut uummatikkut iluunngarluta kiffartortuarnissamut suna iluaqutigissavarput?