Jehovap qamannga pisumik qinnummut akissutaa

„Paasitserlugu illit kisivit — aqqit tassaasoq Jahve [Jehova, NV] — Qutsinnerussaartuusutit nunarsuarmi tamarmi.“ — TUSSIAAT 83:19.

1, 2. Inuppassuit Guutip atia ilinniaramikku qanoq misigisimappat, qanorlu aperisoqarsinnaava?

UKIUALUIT matuma siorna arnap najugaqarfimmi eqqaani pisimasoq alianaqisoq qamuuna assut aalaterneqaatigaa. Ilaqutariinneersuugami katuuliusuni Romalerisuni palasi najukkaminiittoq ikiortissarsiorfigaa, taassumali taanna oqaloqatigerusunngilaaluunniit. Taava Guutimut ima qinuvoq: „Kinaanersutit naluara . . . nalunngilarali piusutit. Ilinnik ilisarisimannilerniarninni ikiunnga!“ Tamatuma kinguninngua Jehovap Nalunaajaasuinit pulaarneqarpoq, taakkua tuppallersarpaat ikiorlugulu ilisimarusutaanik ilisimasaqalernissaanut. Taassumunnga ilinniartitsissutigisarpassuisa ilagaat Guutip namminerisaminik ateqartoq — tassa Jehova. Tamatuminnga paasinninnini assut killinneqaatigaa. Ima oqarpoq: „Arraa, takuat tassa taanna Guuti meeraallungali ilisarisimalerusutara!“

² Aap, Guutip aqqanik paasinninneq inuppassuit killinneqaatigingaarsimavaat. Amerlanersaasa Jehovap aqqa takoqqaarsimavaat Biibilimi Tussiaat 83:19 atuaramikku. Ny Verden-Oversættelsen-imi versi taanna 18-imiippoq, imaapporlu: „Paaseqqullugu illit, Jehovamik atilik, illit kisivit Qutsinnerussaartutit nunarsuarmi tamarmi.“ Kisianni eqqarsaatiginikuuiuk sooq Tussiaat 83 allanneqarsimanersoq? Pisut suut pissutigalugit Jehovap Guutitut ilumoortutuaanera kikkut tamarmik akuerisariaqalissavaat? Tussiaat taanna ullumikkut sumik ilinniarfigisinnaavarput? Apeqqutit tamakku tassaapput allaaserisami matumani sammisassavut. *

Jehovap innuttaanut perlulioqatigiinniat

3, 4. Tussiaat 83 kimit allanneqarpa, siooranartorlu suna allaatigaa?

³ Tussiaat 83-imi versi 1 naapertorlugu tussiaat taanna ’erinarsugassiaavoq Asafip tussiaasiaa’. Tussiaasiortoq tassaasimagunarpoq Asafip Levikkuusup kinguaava, kunngip Daavip naalakkersuinerata nalaani nipilersortartoq nuimasoq. Tussiaammi tamatumani tussiaasiortup Jehova qinnuigaa akuliuteqqullugu kisimi oqartussaanini qutsissisinniassammagu atinilu ilisimaneqalersinniassammagu. Tussiaat Salomop toqunerata kinguningaatsiaagut tussiaasiarineqarsimassaaq. Sooq? Pissutigalugu Daavip Salomollu naalakkersuinerisa nalaanni Tyrusimi kunngi Israelimut akeraanngimmat. Tussiaatilli 83-ip allanneqarnerata nalaani Tyrusimi innuttaasut Israelimut akerlilersuilersimapput taakkununngalu akeraasut iligilersimallugit.

⁴ Tussiaasiortup inuiaqatigiit qulit, Guutip innuttai piuneerunniarlugit perlulioqatigiinnianik pilersitsisut, eqqaavai. Akeraasut taakkua Israeli tamaat avatangersimavaat ukuullutillu: „Beduiinit Edomimit Moabimillu, Ismaelikkut Hagrikkullu, Gebali, Ammoni Amalekilu, Filistæa Tyrusimiullu. Allaat Assuri taakkununnga ilannguppoq.“ (Tussiaat 83:7-9) Oqaluttuarisaanermi pisimasoq suna tussiaammi pineqarpa? Ilaat isumaqarput tamatumani pineqartoq Josafatip nalaani Ammonikkut, Moabikkut Se’irillu qaqqaaneersut peqatigiillutik Israelimik saassusinerat. (2 Nalunaarsuutit 20:1-26) Allat oqaluttuarisaanerup ingerlanerani Israelip inuiannit eqqaamiuminit  akeqqersimaarfigineqartarnera pineqarsoraat.

5. Ullumikkut kristumiut Tussiaat 83 qanoq iluaqutigisinnaavaat?

⁵ Qanorluunniit pisoqaraluarpat erseqqippoq Jehova Guuti innuttami navianartorsiornerisa nalaani tussiaatip tamatuma qinnutitut ittup allanneqarnissaanut isumassarsisitsisuusoq. Tussiaat aamma ullumikkut Guutip kiffaanut, ulloq manna tikillugu akeraasunit taakkuninnga piuneerutitsinissamik aalajangiusimannilluinnartunit saassunneqartuartunut, qiimmassaataavoq. Qularnanngitsumillu Gogip Magogimeersup anersaakkut ilumoornikkullu Guutimik pallorfiginnittunik tamanik naggammik piuneerutitseriaraluarniarluni qanittukkut sakkutuuni katersorpagit tussiaat taanna uagutsinnut nakussatsissutaassaaq. — Atuaruk Ezekieli 38:2, 8, 9, 16.

Tussiaasiortup isumakuluutiginerpaasaa

6, 7. (a) Tussiaatip 83-ip aallaqqaataani tussiaasiortup suna qinnutigaa? (b) Tussiaasiortup isumakuluutiginerpaasaa suua?

⁶ Tussiaasiortup qinnummi misigissutsini aniatippai ima allalluni: „Guuti, nipangersimaqinak, oqajuersimaqinak nipaatsuunallu, Guuti! Takuat, akeqqatit nipiliortorsuupput, akerartortivillu niaqqutik massitippaat. Peqqusersiorlutik pilersaaruteqarput innuttannut . . . Pilersaarusiorput isumaqatigiillutik. Angerfigeqatigiipput assortorniarlutit.“ — Tussiaat 83:2-4, 6.

⁷ Tussiaasiortup isumakuluutiginerpaasaa suua? Soorunami nammineq inuunini ilaquttamilu inuunerat isumakuluutigingaarsimassavai. Qinnumminili isumakuluutiginerpaasai tassaapput Jehovap aqqata kanngunarsagaanissaa, aqqanillu taaguutillit sioorasaarneqarnerat. Qanortoq tamatta tamatumunnga assingusumik, oqimaaqatigiissumik isiginnittaaseqartuarta pissutsit aaqqissuussaanerata maanna atuuttup ulluini kingullerni anigoruminaatsuni pinertusaartilluta. — Atuaruk Matthæusi 6:9, 10.

8. Inuiaat Israelikkut eqqaamiui Israelikkunnut perlulioqatigiinnissamut sunik pissutiginiagaqarpat?

⁸ Tussiaasiortup Israelikkunnut akeraasut ima oqarnerarpai: „Nungutitsigit inuiaajunnaarsillugit, Israelip aqqa taaneqartussaajunnaarsillugu.“ (Tussiaat 83:5) Aap, inuiaat taakkua Guutip innuttamisut toqqagaanik uumissuingaarput! Taakkununngali perlulioqatigiinnissamut suli allamik pissutiginiagaqarput. Israelikkut nunaat pilerigaat makitallutillu ima oqarlutik: „Guutip ivigartorfiutai tiguassavavut pigisassatsitut.“ (Tussiaat 83:13) Ullutsinni aamma taamatut pisoqarsimava? Aap, taama pisoqarsimavoq!

’Init illernartoq’

9, 10. (a) Guutip inaa illernartoq itsaq suua? (b) Tanitat kinguleruttut ’savallu allat’ pilluaqqussutit suut ullumikkut nuannaarutigaat?

⁹ Itsaq nuna neriorsuutigisaq Guutip inaatut illernartutut eqqartorneqartarpoq. Eqqarsaatigeriaruk Israelikkut Egyptenimit aniguisitaanermik kingorna ajugaanersiutitut erinarsuutaat una: „Inuiaqatigiit aniguisitatit tasiorpatit unneqqarissutsikkut, ininnut illernartumut ingerlappatit pissaanikkut.“ (2 Mosesi 15:13) Kingusinnerusukkut ’inimut illernartumut’ tamatumunnga ilaalerput naalaffik tamatumalu palaseqatigiivi illoqarfillu pingaarnersaq, Jerusalemi, tamatumanilu kunngiusut arlallit Daavimut kinguaajusut Jehovallu issiavissaarsuani issiasut. (1 Nalunaarsuutit 29:23) Jiisusip pissutissaqarluarluni Jerusalemi ’kungersuup illoqarfianik’ taavaa. — Matthæusi 5:35.

¹⁰ Ullumikkummi? Ukiumi 33-mi inuiaqatigiit nutaat, „Israeli Guutip pigisaa“, pilersinneqarput. (Galatiamiut 6:16) Inuiaqatigiit taakkua, tassa Jiisusip Kristusip qatanngutaasa tanitat, uinikkut Israelikkut suliarinngitsuugaat suliaraat — Guutip aqqanik nalunaajaaneq. (Esaja 43:10; 1 Petrusi 2:9) Jehovap inuiaqatigiit taakku itsaq Israelikkunnut neriorsuutigisimasaminik ima neriorsorpai: „Guutigissavaannga, taakkulu innuttarissavakka.“ (2 Korinthimiut 6:16; 3 Mosesi 26:12) 1919-imi ’Israelimut Guutip pigisaanut’ ilaasortaasut kinguleruttut Jehovamit immikkut pilluaqqusaapput, ’nunamillu’ pigisaqalerput, nunamik anersaakkut ittumik sunniuteqarfigisinnaasaminik anersaakkullu paratiisimik nuannaarutiginniffigisinnaasaminik. (Esaja 66:8) 1930-ikkunniilli ’savat allat’ millionillit taakkununnga ilaliupput. (Johannesi 10:16) Ullumikkut kristumiuusut taakkua nuannaarnerat anersaakkullu pigissaarnerat Jehovap eqqortumik kisimi oqartussaaneranut uppernarsaataavoq kimittooq. (Atuaruk Tussiaat 91:1, 2.) Tamanna Saatanip kamangaarutigaa!

11. Guutimut akeraasut suna pingaarnertut anguniagariuarpaat?

¹¹ Naggatissap nalaani Saatanip nunarsuarmi ikiortini kajumissaarpai tanitanik kinguleruttunik taakkualu suleqataannik, savanik allanik,  akerlilersueqqullugit. Europap Kippasissuani nazistit naalakkersuineranni Europallu Kangisissuani Sovjetunionimi kommunistit naalakkersuineranni taamatut akerlilersuisoqarpoq. Aamma nunani allarpassuarni taamatut akerlilersuisoqarsimavoq, aamma taamatut akerlilersuisoqaqqikkumaarpoq, ingammik Gogip Magogimeersup naggammik saassussinerani. Saassussinerup tamatuma nalaani akerlilersuisut immaqa piumatullutik Jehovap innuttaasa pigisaat arsaarinnissutigissavaat, soorlu itsaq akeraasut taamaaliortarsimasut. Saatanilli anguniagaa pingaarneq tassaajuarsimavoq uagutsinnik inuiaqatigiittut aserorterinissani, ateq taaguutigisarput puiorneqarniassammat. Jehova kisimi oqartussaassutsini taamatut unammillerneqarpat qanoq iliussava? Tussiaasiortup oqaasii uterfigeqqeriartigit.

Jehova ajugaasartoq

12-14. Illoqarfiup Megiddop eqqaani ajugaanerit pisimasuiit marluk suut tussiaasiortup allaatigai?

¹² Maluginiaruk Jehovap inuiaat akeqqersimaartut pilersaarutaannik akornusiisinnaassuseqarneranik tussiaasiortup upperinnilluinnarnera. Israelikkut itsaq illoqarfiup Megiddop, qooqqup aamma taamatut taaguutillip eqqaaniittup, qanittuani imminnut akeraasunut saassussinerminni ajugaaneri marluk eqqaavai. Aasakkut kuussuup Kishonip paqqersimasup qooqqumi sangujoraarnera takuneqarsinnaasarpoq. Ukiukkut sialussuaraangat Kishoni qarsutsisisarpoq narsaq masarsunngorluni. Tamanna immaqa pissutigalugu kuussuaq aamma ’Megiddop kuui’-nik taaneqartarpoq. — Eqqartuussisut 4:13; 5:19.

¹³ Megiddomit 15 kilometerit missiliorlugit ungasitsigisumiittumi qooqqup illuatungaani ippoq qattuneq More, Midjanikkut, Amalekikkut Kangiamiullu tamarmik sakkutuuisa peqatigiissut Israelikkunnut akiuunniarlutik katersuuffigisaat. (Eqqartuussisut 7:1, 12) Gideonip sakkutuui ikittut naggataatigut 300-iinnaapput, Jehovalli ikiuineratigut akeraasut sakkutoorpassui ajugaaffigaat. Qanoq ilillutik? Guutip unnersuussutai malillugit akeraasut tammaarfiat unnukkut unguaat, tigummivaallu qummuattat nanerussanut ikualasunut assiaqutaasut. Gideoni kalerriimmat angutitaasa qummuattat sequmippaat nanerussat asserneqarsimasut takuneqarsinnaaleriasaartillugit. Taakkua sequmiitigalugit angutit sulluartaatiminnik qarlortarput ima suaarlutik: „Panasi silutsissigit [Jehova] pillugu Gideonilu pillugu!“ Tamanna akeraasunik paatsiveerutitsilluinnarpoq, taakkualu imminnut toqoraatilerput; aniguisut kuussuup Jordanip illuatungaanut qimaapput. Taamatut pisoqartillugu Israelikkut amerlanerusut akeraasunik malersueqataalerput. Katillugit sakkutuut akeqqersimaartut 120.000-it toqutaapput. — Eqqartuussisut 7:19-25; 8:10.

¹⁴ Qattorngup Morep tunuani 6 kilometerit missiliorlugit ungasitsigisumi, Megiddop qooruata illuatungaani, qaqqaq Tabori ippoq. Tassani eqqartuussisoq Baraki siusinnerusukkut sorsuttartunik Israelikkuusunik 10.000-inik Hasorimi kunngip Jabinip sakkutuuinut, sakkutuut naalagaannit Siseramit siulersorneqartunut, akiuuttussanik katersuivoq. Sakkutuut Kana’animiut taakkua 900-nik sorsuutinik qamuteqarput saviminernik takisuunik toqussutaasinnaasunik aserorterutitalinnik assakaasunut atasunik. Israelikkut angutitaasa sakkoqarpianngitsut qaqqamut Taborimut katersuunneranni Siserap sakkutuui isumalluarlutik qooqqumukarput. Tassani „[Jehovap] Siserap qamutaani sorsuutini tamani sakkutuuisalu tamarmik akornanni ularussineqartippaa“. Kishoni sialussualeriataarneranit qarsutsisinneqalersimagunarpoq, qamutillu marallummut kivipput. Sakkutuut taakkua tamarmik Israelikkunnit ajugaaffigineqarput. — Eqqartuussisut 4:13-16; 5:19-21.

15. (a) Tussiaasiortup Jehova soqqullugu qinnuigaa? (b) Guutip naggammik sorsunnissaata taaguutaa uagutsinnut qanoq eqqaasitsiva?

¹⁵ Tussiaasiortup Jehova ilungersorluni qinnuigaa inuiannut nalimini Israelimik piuneerussiniarlutik aarlerisaarisut tamatumunnga assingusumik iliuuseqarfigeqqullugit. Ima qinuvoq: „Iliorfigikkit Midjanitut, Siseratut Jabinitullu kuunnguup Kishonip sinaani, taakku nungutitaasut En-Dorimi, narsanullu naggorissaatinngorlutik.“ (Tussiaat 83:10, 11) Maluginiarnarpoq Guutip Saatanip silarsuaanut naggammik sorsunnera Harmagedonimik  („Megiddop qaqqaa“-nik isumaqartumik) taaneqarmat. Taaguut taanna sorsuunnerit pingaarutillit Megiddop eqqaani pisut pillugit eqqaasitsissutaavoq. Jehovap itsaq sorsunnerni taakkunani ajugaasarnera qularunnaarutigaarput Harmagedonimi sorsunnissami qularnanngilluinnartumik ajugaajumaarneranut. — Saqqummersitat 16:13-16.

Jehovap kisimi oqartussaassusiata qutsissisinneqarnissaa qinnutigiuk

16. Ullumikkut akerlilersuisut qanoq ’peqqaannagit kanngunarsarneqarsimappat’?

¹⁶ „Ullussani kingullerni“ makkunani Jehovap innuttaminik nungutitseriaraluarnerit tamaasa akornusersimavai. (2 Timotheusi 3:1) Taamaattumik akerlilersuisut kanngunarsarneqarsimapput. Tamanna Tussiaat 83:17-imi ima siulittuutigineqarpoq: „Peqqaannagit kanngunarsisikkit ujarserlugu aqqit, [Jehova].“ Nunarpassuarni akerlilersuisut Jehovap Nalunaajaasuinik nipangersitseriaraluarneri iluatsinngilluinnarsimapput. Nunani taakkunani oqaluussisartut aalajaallutillu pinertusaarnerat eqqortuliorusuttunut nalunaajaataasimavoq, inuppassuillu ’Jehovap aqqa ujalersimavaat’. Nunat ilaanni Jehovap Nalunaajaasuinik peqqarniitsumik malersuiffiusimasuni maanna titusindilinnik, allaat hundredetusindilinnik, nuannaarlutik Jehovamik unnersiutiginnittoqarpoq. Jehovap ajugaanera angingaarami! Taassumalu akeraanut kanngunassusia! — Atuaruk Jeremia 1:19.

17. Akerlilersuisut suna misigissavaat, oqaatsillu suut qanittukkut eqqaassavavut?

¹⁷ Soorunami nalunngilarput akiuunneq suli qaangiutinngitsoq. Aamma nutaarsiassamik nuannersumik oqaluussinerput — aamma akerlilersuisunut — ingerlatiinnarparput. (Matthæusi 24:14, 21) Akerlilersuisut allamik isumataarnissamut annaanneqarsinnaalernissamullu maannakkut periarfissaqarput, periarfissarli tamanna qanittukkut qaangiutissaaq. Jehovap aqqanik illernarsisitsinissaq inuit annaanneqarnissaanninngarnit pingaaruteqarnerungaarpoq. (Atuaruk Ezekieli 38:23.) Inuiaqatigiit isumaqatigiillutik siulittuutigineqartutut Guutip innuttaanik piuneerutitseriaraluarpata tussiaasiortup qinnutaaniittut oqaatsit uku eqqaassavavut: „Kipisuitsumik pakatsissapput annilaartitaallutillu, kanngutsisitaallutik nungutitaallutillu.“ — Tussiaat 83:18.

18, 19. (a) Jehovap kisimi oqartussaassusianik akerlilersuinerminnik aalajangiusimannittut qanoq pineqassappat? (b) Jehovap kisimi oqartussaassutsiminik qanittukkut inaarutaasumik qutsissisitsiumaarnera illit qanoq sunnerneqaatigaajuk?

¹⁸ Jehovap kisimi oqartussaassusianik akerlilersuinerminnik aalajangiusimannittut nikanarsaataasumik piuneerunneqassapput. Guutip oqaasiani erserpoq ’iivangkiiliumut naalakkumanngitsut’ — taamaattumillu Harmagedonimi nungutitaasussat — ‘naassaanngitsumik peersitaassasut’. (2 Thessalonikamiut 1:7-9) Taakkua piuneerussaanerat ilumoornikkullu Jehovamik pallorfiginnittut inuuinnarnerat Jehovap Guutitut ilumoortutuaaneranut uppernarsaataapput qularunnaarnartut. Ajugaanissarsuaq tamanna silarsuassami nutaami eqqaamaneqartuassaaq. ’Iluartunik iluaatsunillu makititsinermi’ inuuleqqittut Jehovap tupinnangaartuliai pillugit ilinniartinneqassapput. (Apustilit Suliaat 24:15) Jehovap kisimi oqartussaalluni naalakkersuineranut naalatsigitinnerup silatusaarnerussusianut uppernarsaatit qularunnaarnartut silarsuassami nutaami takussavaat. Taakkualu qanilaartortaasa Jehovap Guutitut ilumoortutuaanera erniinnaq qularutigiunnaassavaat.

¹⁹ Ataatatta qilammiusup asannittup kiffaminut aalajaatsunut neriuutissiissutaa nuanningaarami! Qularnanngitsumik illit killinneqarputit tussiaasiortup qinnutaanik Jehovap qanittukkut inaarutaasumik akiseqqullugu qinnuiginissaanut: „[Akeqqatit] kipisuitsumik pakatsissapput [pakatsilit, NV] annilaartitaallutillu, kanngutsisitaallutik nungutitaallutillu, paasitserlugu illit kisivit — aqqit tassaasoq Jahve [Jehova, NV] — Qutsinnerussaartuusutit nunarsuarmi tamarmi.“ — Tussiaat 83:18, 19.

[Quppernerup ataani ilanngussaq]

Uku nassuiarsinnaavigit?

• Tussiaat 83 allanneqarmat Israelikkut qanoq atugaqarpat?

• Tussiaat 83-imik allattup suna isumakuluutiginerpaavaa?

• Ullumikkut kikkut Saatanimit uumissorneqarpat?

• Qinnut Tussiaat 83:19-imiittoq Jehovap naggataatigut qanoq akissavaa?

[Atuaqqissaarnermi apeqqutit]

[Qupp. 23-mi nunap assinga]

(Allassimasut qanoq inissisimanersut naqitami takuneqarsinnaavoq)

Itsaq Megiddop eqqaani sorsunnerit siunissatsinnut qanoq attuumassuteqarpat?

Kuussuaq Kishoni

Hajoshet-ha-Gojimi

Qaqqaq Karmeli

Jisre’elip narsartaa

Megiddo

Ta’anaki

Gilboap qaqqaa

Puilasoq Harodi

Qattuneq More

En-Dori

Qaqqaq Tabori

Galilæap Tasersua

Kuussuaq Jordani

[Qupp. 20-mi assiliartaq]

Suna pissutigalugu tussiaasiortup qamannga pisumik qinnut allappaa?