Naassaanngitsumik inuusinnaajumallutit suna pilliutigiumassaviuk?
Naassaanngitsumik inuusinnaajumallutit suna pilliutigiumassaviuk?
„Inuup inuunerminut suna akiliutigisinnaavaa?“ — MATTHÆUSI 16:26.
1. Sooq Petrusip naqqiinera Jiisusip akuersaanngilaa?
APUSTILIP Petrusip tusakkani tupaallaatigeqai. Siulersortaata asasaata, Jiisusip Kristusip, „isertuarani“ oqaatigaa qanittukkut naalliutsitaassalluni toqussallunilu! Petrusip — qularnanngitsumik ajunnginnerpaamik siunertaqarluni — Jiisusi naqqippaa imalu oqarluni: „Imminut ajunngisaarfiginiarit, Naalagaq; taama pineqanngisaannassaatit.“ Jiisusip Petrusi tunuppaa ajoqersukkallu allat qiviarlugit. Taakkua aamma taamatut kukkusumik isumaqarsimagunarput. Taava Jiisusip Petrusi oqarfigaa: „Tununnut nigorit, Saatani! Uannut naakkiuffissiaavutit, Guutip eqqarsaatai pinnagit inuilli eqqarsaataannik eqqarsaravit.“ — Matthæusi 16:21-23, NV; Markusi 8:32, 33.
2. Ajoqersukkanut ilumoortunut piumasaqaatit Jiisusip qanoq nassuiarpai?
2 Jiisusip oqaasii tulliuttut Petrusip sooq Jiisusip naqqiissutiminut taama sakkortutigisumik periarneranik paasinninnissamut iluaqutigisimasinnaavai. Jiisusip „inuit ajoqersukkanilu qaaqquai“ imalu oqarluni: „Uannik malinnikkumasoq imminut isumakkiissaaq, sanningasulinilu [nappagarlu anniartitaaffini, NV] ersussavaa malissallungalu. Inuunerminimmi annatsitsiumasup inuunini annaassavaa; uangali pillunga iivangkiiliulu pillugu inuunerminik annaasaqartup inuunini annatsissavaa.“ (Markusi 8:34, 35) Tassa inuunerminik pilliutiginnittussaaginnarani, aamma imminik malinnittut Guutimut kiffartornerminni inuunerminnik pilliutiginninnissamut piareersimanissaat piumasaraa. Taamaaliorunik akissarsingaassapput. — Atuaruk Matthæusi 16:27.
3. (a) Jiisusip tusarnaartuni qanoq aperai? (b) Jiisusip apeqqutaasa aappaat tusarnaartuisa sumut eqqaanartissimasinnaavaat?
3 Pisumi tamatumani Jiisusi eqqarsalernartunik marlunnik apeqquteqarpoq: „Inummummi sumut iluaqutaassava silarsuaq tamaat pigileraluaruniuk inuuninili akigalugu?“, aamma „Inuummi inuunerminut suna akiliutigisinnaavaa?“ (Markusi 8:36, 37) Apeqqummut siullermut akissut inuit isiginnittaasiannit isigalugu erseqqippoq. Inuuneq annaagaanni silarsuarmik tamarmik piginnilerneq iluaqutaanngilaq. Pigisat taamaallaat inuutilluni taakkuninngalu nuannaarutiginnissinnaatilluni naleqartarput. Jiisusip apeqqutaata aappaa: „Inuummi inuunerminut suna akiliutigisinnaavaa?“ tusarnaartuisa Jobip ulluini Saatanip oqaasiinut ukununnga eqqaanartissimasinnaavaat: „Inuummi pigisani tamaasa akigeriaannaasarpai inuunini annaajumanagu.“ (Jobi 2:4) Saatanip oqaasii Jehovamut kiffartunngitsunut immaqa ilumoorsinnaapput. Inuppassuit inuuinnarumanertik piinnarlugu qanorluunniit iliorumasarlutillu najoqqutassianik sunilluunniit unioqqutitsiumasarput. Kristumiulli allatut isiginnittaaseqarput.
4. Sooq Jiisusip apeqqutigisai kristumiunut isumaqarneruppat?
4 Nalunngilarput Jiisusi peqqissisinniarluta, aningaasarpassuarnik tuniniarluta silarsuarmilu matumani sivisuumik inuutinniarluta nunarsuarmukanngitsoq. Nunarsuarmukarpoq silarsuassami nutaami naassaanngitsumik inuunissamut periarfissinniarluta, taamatullu inuunissamik neriuut uagut pingaartingaarparput. (Johannesi 3:16) Kristumiup Jiisusip apeqqutaa siulleq ima paasissavaa: „Inummummi sumut iluaqutaassava silarsuaq tamaat pigileraluaruniuk inuunermillu naassaanngitsumik neriuutini annaallugu?“ Apeqqummut tamatumunnga akissut tassa: sumulluunniit iluaqutaanngilaq. (1 Johannesi 2:15-17) Jiisusip apeqqutaasa aappaata akinissaanut iluaqutissatut imminut ima aperisinnaavugut: ’Silarsuassami nutaami inuunissannik neriuutiga piviusunngorsinnaaqqullugu maanna qanoq pilliuteqarumatigaanga?’ Apeqqummut tamatumunnga akissummi, inooriaatsitsinnit ersersinneqartumit, neriuutip tamatuma uummatitsinni qanoq sakkortutiginera paasinarsissaaq. — Naleqqiuguk Johannesi 12:25.
5. Inuunermik naassaanngitsumik tunissut qanoq ililluta pisinnaavarput?
5 Soorunami Jiisusi oqanngilaq inuuneq naassaanngitsoq nammineq iliuuseqarnikkut pissarsiarineqarsinnaasoq. Inuuneq — allaat pissutsit aaqqissuussaaneranni matumani inuunerput sivikikujuttoq — tunissutaavoq. Pisiarisinnaanagulu arlaatigulluunniit nammineq iliuuseqarnikkut pisinnaanngilarput. Inuunermik naassaanngitsumik tunissut taamaallaat pisinnaavarput „Jiisusi-Kristusimut“ Jehovamullu, ’ujarlersiminik akissarsisitsisartumut’, „uppernikkut“. (Galatiamiut 2:16; Hebræerit 11:6) Uppernerli iliuutsikkut ersersinneqartariaqarpoq, „uppernermi sulianik ilaqanngitsoq toqungavoq“. (Jaaku 2:26) Tassa Jiisusip apeqqutaa pissutsit aaqqissuussaaneranni matumani qanoq isumakkiigaqarumatiginitta uppernittalu ilumut uummaarinnera ersersinniarlugu Jehovamut kiffartornermi suut iliuuserinissaannut piumassuseqarnersugut eqqarsaatiginissaannut kajumississutigisariaqarparput.
’Kristusi imminuinnaq eqqarsaatiginngilaq’
6. Jiisusimut suna pingaarnerpaava?
6 Jiisusip silarsuup nalimini neqeroorutigisinnaasai eqqarsaatiginngilai, pingaaruteqartulli pingaarnerutippai pigisanillu inuunermik ilorrisimaarnarnerulersitsisinnaasunik katersuinissaq ussernartorsiorfigiumanngilaa. Guutimut naalalluni imminut pilliutigeriaannaalluni inuuvoq. Nammineq iluarisaminik iliortanngilaq, imali oqarpoq: ’Tamatigut Guutip iluarisaanik iliortarama.’ (Johannesi 8:29) Jiisusi Guuti nuannaartinniarlugu qanoq iliuuseqarumatigiva?
7, 8. (a) Jiisusip suna pilliutigaa, qanorlu akissarsisinneqarpa? (b) Imminut qanoq aperisariaqarpugut?
7 Ilaanni Jiisusip ajoqersukkani ima oqarfigai: „Inuup Ernera [tikiutinngilaq] kiffartorfigeqqulluni, namminerli kiffartussalluni inuuninilu akissatut tunniutissallugu amerlasuut utertinneqaatissaattut.“ (Matthæusi 20:28) Siusinnerusukkut, Jiisusip ajoqersukkani nassuiaatilermagit qanittukkut ’inuunini tunniukkumaarlugu’, Petrusip taanna siunnersorpaa imminut ajunngisaarfigeqqullugu. Taamaakkaluartorli Jiisusi aalajaattuarpoq. Naammalluinnarluni inuttut inuunini inuiaat iluaqutissaannut kajumilluni tunniuppaa. Jiisusip namminissarsiorani iliuusia siunissaanut qulakkeerutaavoq. Toqusunit makititaavoq ’Guutillu talerpianut qutsissisitaalluni’. (Apustilit Suliaat 2:32, 33) Taamaalilluni uagutsinnut maligassanngorpoq asseqanngitsoq.
8 Apustilip Paulusip kristumiut Romamiittut siunnersorpai ’imminuinnaq eqqarsaatigeqqunagit’ eqqaasillugillu ’Kristusiluunniit imminuinnaq eqqarsaatiginngitsoq’. (Romamiut 15:1-3) Paulusip siunnersuutaa tamanna sutigut malissavarput aamma Missiarsi ilaarlugu qanoq pilliuteqartigiumavugut?
Jehovap kissaatigaa pitsaanerpaamik tunissagitsinni
9. Kristumiu Guutimut tunniulluinnaraangami ilumoortumik susarpa?
9 Itsaq Israelimi Mosesip inatsisaani peqqussutigineqarpoq inussiat hebræeriusut ukiut kiffartorfiisa arfineq-aappassaanni inussiaajunnaarsinneqartassasut. Allamilli aamma periarfissaqarput. Inussiaq piginnitsiminik nuannarinnilersimaguni, inuunermi sinnerani inoqutigiinni taakkunani inussiaajuarniarluni aalajangersinnaavoq. (Atuaruk 5 Mosesi 15:12, 16, 17.) Guutimut tunniulluinnaraangatta tamatumunnga assingusumik aalajangigaqartarpugut. Nammineq kajumissutsitsinnik Guutip piumasaatut iliornissarput namminerlu piumasatsitut iliunnginnissarput akuerisarparput. Taamaaliornitsigut ersersittarparput Jehovamik asanningaarluta naassaanngitsumillu taanna kiffartorfigerusullugu.
10. Guutimit pigineqarnerput qanoq paasisariaqarpa, tamannalu eqqarsaatitsinnut iliuutsitsinnullu qanoq sunniuteqartariaqarpa?
10 Illit maanna Jehovap Nalunaajaasuinit Biibilimik atuaqqissaaqatigineqartaruit, nutaarsiassaq nuannersoq oqaluussissutigisarukku kristumiullu ataatsimiinnerinut najuuttaruit nersortariaqarputit. Neriuppugut qanittukkut Jehovamut tunniulluinnarnissannut killinneqassasutit Etiopiamiullu Filipimut aperisimaneratut ima aperiumaartutit: „Suna akornutaassava kuineqarnissannut?“ (Apustilit Suliaat 8:35, 36) Kuisikkuit, Guutimut attaveqarnerit kristumiut Korinthimiittut Guutimut attaveqarnerattut ilissaaq. Taakku Paulusip ima allaffigai: „Immissinnik piginngilasi, pisiarineqarpusimi akisuumik.“ (1 Korinthimiut 6:19, 20) Qilaliarnissamik neriugisaqaraluarutta nunarsuarmiluunniit inuunissamik neriugisaqaraluarutta, Jehovamut tunniulluinnarsimagutta taanna Piginnitsigaarput. Taamaattumik namminissarsiortunik kissaateqarnaveersaarnissarput ’inunnullu inussiaataajunnaarnissarput’ pingaaruteqarpoq. (1 Korinthimiut 7:23) Jehovap nammineq piumasamisut atorsinnaasaatut ilumoorfiginnilluni taassumunnga kiffaaneq immikkut pisinnaatitaaffiuvoq angingaartoq!
11. Kristumiut sumik pilliuteqaqqullugit kajumissaarneqarpat, tamannalu qanoq isumaqavippa?
11 Paulusip uppeqatini ima kajumissaarpai: „Timisi [sassaassigit] pilliutitut uumasutut illernartutullu Guutip iluarinartitaatut, tamanna tassaassaaq anersaakkut guutisiornersi [siuneqartutut Guutimut kiffartuutersi, 1936].“ (Romamiut 12:1) Oqaatsit taakkua kristumiut juutiusut Jiisusimut ajoqersuganngunnginnerminni pallorfiginninnerminnut atatillugu pilliutigisartakkaminnut eqqaanartissimasinnaavaat. Nalunngilaat uumasut Mosesip inatsisaasa atuunnerisa nalaani Jehovamut pilliutigineqartut pilliutigisinnaasat pitsaanerpaartarissagaat. Allat tamarmik Guutimit akuerineqarsinnaanngillat. (Malaki 1:8, 13) Timerput „pilliutitut uumasutut“ sassaakkaangatsigu aamma taamaattarpoq. Jehova pigisatsinnik pitsaanerpaanik tunisarparput, nammineq inuttut kissaatigisatsinnik piviusunngortitsinitta kingorna sinneruttuinnarnik tuninagu. Guutimut tunniulluinnaraangatta inuunerput ’tarnikkut iluunngarluta’ — nukivut, pigisavut piginnaasavullu ilanngullugit — tunniuttarparput. (Markusi 12:30) Tamanna qanoq paasisariaqarpa?
Piffissaq silatusaartumik atortaruk
12, 13. Ilaatigut qanoq Jehova pitsaanerpaamik tunisinnaavarput?
12 Jehova pitsaanerpaamik tunisinnaavarput ilaatigut piffissap silatusaartumik atorneratigut. (Atuaruk Efesosimiut 5:15, 16.) Piffissaq silatusaartumik atussagutsigu imminut naalakkersinnaanissaq pisariaqarpoq. Silarsuarmit sunnerneqarnerput naammalluinnanngissuserpullu kingornussarput pissutigalugit piffissamik ilorrisimaarnermuinnaq uagutsinnulluunniit iluaqutaasunuinnaq atueqqajaasarpugut. Ilumoorpoq „suut tamarmik aalajangersimasumik [piffissaligaasut]“, aamma qasuersaarfissaqartoq, sulinissamullu piffissaqartoq kristumiutut pisussaaffivut naammassisinnaaqqullugit. (Oqaluussisartup oqaasii 3:1) Kristumiuli tunniulluinnarsimasoq oqimaaqatigiissaarisinnaajuartariaqarlunilu piffissaminik silatusaartumik atuisariaqarpoq.
13 Paulusip Athenimut tikeraarami maluginiarpaa „Athenimiut nunasisullu piffissartik allamut pinnagu kisianni oqaluttuarnermut nutaarsiassanilluunniit tusarniaanermut [atortaraat]“. (Apustilit Suliaat 17:21) Ullumikkut inuppassuit taamatulli piffissartik maangaannartittarpaat. Allamut saassutigineqarsinnaasut ilaat tassaapput fjernsynerneq, qarasaasiami pinnguaatit interneternerlu. Allamut saassutigisinnaasavut amerligaluttuinnarput. Tamakku sammivallaalerutsigit anersaakkut pisariaqartitavut isumaginngitsoorsinnaavavut. Naggataatigut allaat isumaqalersinnaavugut ’pingaaruteqarnerusut’ — Jehovamut kiffartornermut tunngassuteqartut — piffissaqarfiginissaannut ulapippallaarluta. — Filippimiut 1:9, 10.
14. Apeqqutit suut eqqarsaatigeqqissaartariaqarpavut?
14 Taamaattumik Jehovamut kiffaasutut tunniulluinnarsimasutut illit imminut ima aperisariaqarputit: ’Ullormut pilersaarusianni Biibilimik atuarnissamut, eqqarsaatiginninnissamut qinunissamut piffissamik immikkoortitsisarpunga?’ (Tussiaat 77:13; 119:97; 1 Thessalonikamiut 5:17) ’Kristumiut ataatsimiinnerinut piareersarnissamut piffissamik immikkoortitsisarpunga? Ataatsimiinnerni akisarnikkut allanik qiimmassaasarpunga?’ (Tussiaat 122:1; Hebræerit 2:12) Guutip oqaasiani allassimavoq Paulusi Barnabalu ’sivisuumik nakimanatik nalunaajaasut Jehova tatigalugu’. (Apustilit Suliaat 14:3) Atukkatit naleqqussarsinnaavigit — immaqa pioneritut kiffartornikkut — oqaluussinissaq piffissaqarfiginerusinnaaniassagakku, imaluunniit piffissaqarfiginerungaatsiarsinnaaniassagakku? — Atuaruk Hebræerit 13:15.
15. Utoqqaanertat piffissartik silatusaartumik qanoq atortarpaat?
15 Apustilip Paulusip Barnaballu ilagiit kristumiut Antiokiamiittut kajumissaarniarlugit tikeraaramikkit „sivikinngitsumik ajoqersukkat tassani uninngavigaat“. (Apustilit Suliaat 14:28) Taamatuttaaq ullumikkut utoqqaanertat asannittut piffissamik ilarujussua allanik nakussatsitsinermut atortarpaat. Oqaluussisarnermik saniatigut savaatinut paarsisuusutut tamaviaarput, savanik tammarsimasunik ujaasisarput, napparsimasunik ikiuisarput ilagiinnilu allarpassuarnik akisussaaffeqarlutik. Qatanngutaaguit angut kuisimasoq, kiffartornermi immikkut pisinnaatitaaffiit suli allat taakku anguniarnissaannut periarfissaqarpit?
16. Qanoq ililluta ’uppeqatitsinnut ajunngitsuliorsinnaavugut’?
16 Pinngortitami ajunaarnersuit ajunaarnersuilluunniit inuit pilersitaat pissutigalugit annaasaqarsimasunik ikiuiniaqataanertik amerlasuut nuannaarutigisimavaat. Assersuutigalugu qatanngut arnaq 60-it sinnerlugit ukiulik Betelimi kiffartortoq ungasissumut angalasarsimavoq nammineq piumassutsiminik ikiuiniaqataaniarluni. Sooq sulinngiffini taamatut atortarpaa? Ima oqaluttuarpoq: „Immikkut pikkoriffeqanngikkaluarlunga pisariaqartinneqartunik ikiuutaaneq immikkut pisinnaatitaaffiuvoq. Qatanngutit angutit arnallu pigisaminnik annaasaqangaatsiarsimasut upperluarnerat qiimmassaatigeqaara.“ Aammattaaq silarsuaq tamakkerlugu qatanngutit tusindillit naalagaaffilersaarfiliornerni ataatsimeersuartarfiliornernilu ikiuutaasarput. Taamatut suleqataagaangatta namminissarsiornata ’uppeqatitsinnut ajunngitsuliortarpugut’. — Galatiamiut 6:10.
„Ullut tamaasa najorpassi“
17. Inuuneq naassaanngitsoq anguniarlugu suna pilliutigiumassaviuk?
17 Inuiaat Guutimit ungasillisimasut peerutingajalerput. Naluarput qaqugorpiaq tamanna pissanersoq. Nalunngilarpulli ’piffissaq sivikilleqisoq’ aamma ’silarsuup matuma pissusia nikittartoq’ (NV). (1 Korinthimiut 7:29-31) Tamatuminnga ilisimaarinninneq Jiisusip apeqqutaata pingaaruteqassusianut erseqqissaataavoq: „Inuummi inuunerminut suna akiliutigisinnaavaa?“ Uagut qularnanngilluinnartumik Jehovap pilliutigeqqusaanik suugaluartumilluunniit pilliuteqassaagut „inuunivik“ anguniarlugu. (1 Timotheusi 6:19) Jiisusip imminik ’malinnittuarnissamik’ ’Guutillu naalagaaffianik ujaaseqqaarnissamik’ kajumissaarutaa malillugu iliornissaq pisariaqarluinnarpoq. — Matthæusi 6:31-33; 24:13.
18. Suna qularutiginngilluinnarsinnaavarput, aamma sooq?
18 Nassuerutigisariaqarpoq Jiisusimik malinninnissaq ajornaatsuujuaannanngimmat, inuillu ilaat pissutsit aaqqissuussaaneranni matumani allaat inuunerminnik pilliuteqartariaqarsimapput, soorlu Jiisusip tamanna mianersoqqussutigigaa. Taamaakkaluartorli Jiisusip pisimaneratut ’imminut ajunngisaarfiginissaq’ ussernartorsiorfigiumanngilarput. Taassuma ukiuni hundredelinni siullerni ajoqersukkaminut tanitanut neriorsuutaa upperaarput: „Ullut tamaasa najorpassi silarsuup naggatissaanut allaat.“ (Matthæusi 28:20) Taamaammat sapinngisamik annerpaamik piffissarput piginnaanivullu illernartumik kiffartornermi atortigik taamaalillutalu ersersillugu Jehovap annikilliornartussarsuarmi uagutsinnik annertoqqusersuiumaarneranik silarsuassamiluunniit nutaami uagutsinnik makititsiumaarneranik qularutiginninnginnerput. (Hebræerit 6:10) Taava inuuneq tunissutaasoq qanoq pingaartitsigalugu ersersissavarput. (w08 10/15-E)
Qanoq akissavit?
• Jiisusip Guutimut inunnullu kiffartornissamut piumassuseqarnini asseqanngitsoq qanoq ililluni ersersippaa?
• Sooq imminut naaggaarnissaq pisariaqarpa, qanorlu ililluni taamaaliortoqartarpa?
• Itsaq Israelimi pilliutissat qanoq ittut Jehovamit akuerineqarsinnaasutuaappat, ullumikkullu tamanna qanoq ilinniarfigisinnaavarput?
• Qanoq ililluta piffissarput silatusaartumik atorsinnaavarput?
[Atuaqqissaarnermi apeqqutit]
[Qupp. 29-mi assiliartat]
Jiisusi Guutip iluarisaanik iliortuaannarpoq
[Qupp. 31-mi assiliartaq]
Israelikkut qujamasuttut pallorfiginninneq ilumoortoq tapersersorniarlugu pilliutigisinnaasatik pitsaanerpaat pilliutigisarpaat
[Qupp. 32-mi assiliartat]
Piffissaq silatusaartumik atoraangatsigu Guuti nuannaartittarparput