Erlinnangaartutut isigaatigut
Guutimut palligunniarit
Erlinnangaartutut isigaatigut
UUMMATITTA ilaannikkut imminut isornartorsiungaartitsisinnaanera Biibilimi miserratigineqanngilaq, ima allassimasoqarami: „Uummatitta qanoq-ittumilluunniit pillagassaatikkaluarpatigut.“ Aap, tamanna Guutimit asaneqarnissamut isumassorneqarnissamullu naleqqutinngilluinnartutut misigilissutigisinnaavarput. Biibilimili ima neriorsoqqissaarneqarpugut: „Guuti uummatitsinnit anneruvoq suullu tamaasa ilisimallugit.“ (1 Johannesi 3:19, 20) Guutip uagutsinnit nalunnginneruaatigut. Guutip uagutsinnik isiginninnera uagut imminut qanoq isiginitsinnit allaanerujussuusinnaavoq. Jehovammi Guutip isumaa pingaarnerpaappat taava uagut taassuma isaani qanoq pingaaruteqartigaagut? Tamanna akineqarpoq pisimasuni marlunni Jiisusi killitsinnartunik assersuusiormat.
Ilaanni Jiisusi ima oqarpoq: „Qupaloraarsuit marluk skillingimik [aningaasat minnertaannik, 1936] akilersillugit tunineqartannginnerpat?“ (Matthæusi 10:29, 31) Lukasi 12:6, 7 naapertorlugit Jiisusi aamma ima oqarpoq: „Qupaloraarsuit tallimat skillinginik [aningaasat minnertaannik, 1936] marlunnik akilersillugit tunineqartannginnerpat? Taamaattorli taakkua ilaat ataaserluunniit Guutimit puiorneqanngilaq. . . . Erseqinasi, qupaloraarsuppassuarnit pingaarneruvusi.“ Assersuusiaq tamanna paasiuminartoq imaqangaartorlu iluaqutigalugu paasisinnaavarput Jehovap kiffani tamaviisa immikkut qanoq isigigai.
Qupaloraarsuit timmissat nerineqarsinnaasut akikinnersaasa ilagaat. Qularnanngitsumik Jiisusip maluginiarsimavai arnat piitsut — immaqa allaat nammineq anaanani — timmiaaqqat taakku ilaquttamik nerisassaattut niueriartortarfimmi pisiarisaraat. Pisiniartup assarionimik ataatsimik, aningaasamik ullumikkut 25 ørit inorlugit naleqartumik, akiliilluni qupaloraarsuit marluk pisiarisinnaavai. Timmissat taakku ima akikitsigipput aningaasanik marlunnik akiliigaanni, qupaloraarsunnik sisamaannaanngitsunik tallimanilli pisoqartarluni; tallimaat akeqarnani.
Jiisusi nassuiaavoq qupaloraarsuk ataasinnguarluunniit ’Guutimit puiorneqanngitsoq’ aamma ’nunamut nakkarnavianngitsoq Ataataq najortiginagu’. (Matthæusi 10:29) Qupaloraarsuk nunamut nakkaraangat, immaqa ikilerneqarluni nerisassarsiorluniluunniit nunamut mikkaangat, Jehovap maluginngitsuunngisaannarpaa. Timmissat taakku pingaaruteqanngissorinartut Jehovamit pinngortinneqarnissaminnut mikivallaanngillat, taamaattumik aamma Jehovamit eqqaamaneqarnissaminnut mikivallaanngillat. Jehovap allaat pingaartippai pinngortitaammata erlinnartut. Jiisusip assersuusiaa taanna qanoq ilinniarfigisinnaaviuk?
Jiisusip ilinniartitsinermini pingaaruteqannginnerusut pingaaruteqarnerusunut sanilliuttarpai. Assersuutigalugu aamma ima oqarpoq: „Tulukkat . . . siaruarterinatillu katersuinngillat, pissamaasiveqaratillu queqanngillat, Guutillu nerisassittarpai. Ilissi timmissanit pingaarnerungaarpusi!“ (Lukasi 12:24) Maanna Jiisusip qupaloraarsuit pillugit oqaasii paasinarsipput: Jehovap timmiaaqqat taakku isumassorunigit, qanorli inuit imminut asannittut kiffartortullu isumassornerutigissavai!
Jiisusip oqaasii naapertorlugit pissutissaqanngilagut pingaaruteqanngitsutut Guutimillu malugineqarneq ajortutut asaneqanngitsutullu misiginissamut, ’Guutimi uummatitsinnit anneruvoq’. Ilaa tuppallernarpoq paasillugu uagut imminut pingaartinngikkaluartugut Pinngortitsisup pingaartikkaatigut! (wp08 04/01-E)
[Qupp. 9-mi suminngaanneernera]
Qupaloraarsuit: © ARCO/D. Usher/age fotostock