Inuuneq qanoq erlinnangaartigisoq ilikkarpara

ULLAAJUVOQ APRIILIP 16-IANI 2007. Virginia Polytechnic Institute and State University-mi, Virginia Tech-imik taaneqartartumi, Norris Hall-imi init quleriit sisamaanni allaffiit ilaanni teqeqqumi peqiterpunga. Tamatumanissaaq eqqaasinneqarpunga inuunitsinni ullut tamaasa erlinnangaartut qujamasuutigisassagivut.

Allaffinnit init quleriit pingajuannut allagarsiannik ammut aallileruttorlunga, professorit ilaannit orninneqarpunga taannalu allaffimmini qarasaasiami ajoqutaasa aaqqinnissaanut ikioqquvoq. Allaffianut isileruttorluta init quleriit pingajuanni eqqaassisoqarpalulerpoq. Susoqarnersoq nalugatsigu allaffimmut isipallappugut matulu parnaarlugu, qanorlu pisoqarnissaa ersilluta utaqqillugu. Teqeqqumut qimarnguissarsiorpunga qanorluunniillu pisoqassagaluarpat tamatuma anigorsinnaanissaanut siulersoqqullunga Jehovamut qamannga pisumik qinullunga.

Utaqqitilluta ukiut 15-it matuma sioqqullugu pisimasoq eqqaalerpara. Taamani biilileriffimmi mekanikeritut sulivunga. Suleqatima ilaat benziinaasiveeqqamik aammaannartumik tigummiarpoq, ikummariataarporlu. Uiverluni benziinamik kiinnakkut seqertoorpaanga! Benziinap aalaa ikumasoq najuuppara timimalu ilarujussuatigut uutitingaatsiarlungalu uutiterujussuarpunga. Uutiternikunik suliarinnittarfimmut qulimiguulimmik ingerlanneqarpunga. Qaammatit pingasut affarlu peruluttut inaanni inuuinnarumallunga akiuuppunga. Qaammatit tallimat nakorsartereerlunga sungiusartereerlungalu angerlarpunga. Qujamasuutigaara inuuinnarama. Misigisami tamatumani inuuninni ullut tamaasa erlinnangaartutut isiginissaat ilikkarpara. Misigisara aamma inuunerma inuuninnik tunisisumut, Jehovamut Guutimut, nalunaajaasuatut kiffartornermut atornissaanik aalajangiusimanninnerulissutigaara. — Tussiaat 90:12; Esaja 43:10.

Aqqunartiternikka pissutigalugit mekanikeritut sulisinnaajunnaarpunga. Qarasaasianillu suliaqarnissaq ilinniarpara Virginia Tech-imilu atorfeqalerlunga. Taamaattuminguna ullaaq taanna Norris Hall-imiittunga.

Suli eqqaassisoqarpaluttoq tusaavarput, arlaannattaluunniit naluaa init quleriit ataanni USA-p oqaluttuarisaanerani eqqaassilluni toqoraanerit aassunninnerpaartaat pisoq. Toqoraaneq unippoq aatsaat toqoraasoq imminut aallaammat inuit 32-t pisuussuteqanngitsut toqoreerlugit. Aallartinneraniit minutsit 20-t missaat qaangiummata tusaavarput politiit allaffiup silataaniippaluttut. Qaaqquavut, isumannaatsumullu ingerlappaatigut.

Misigisannit tupannangaartumit ilikkarpara inuuneq qanoq sivikitsigalunilu nalorninartigisoq. (Jaaku 4:14) Aap, Jehovap Guutip, inuunermik tunisisup, tatiginissaa ullullu tamaasa taassumannga tunissutitut erlinnangaartutut isiginissaat pingaaruteqartorujussuuvoq. — Tussiaat 23:4; 91:2. (wp08 09/01-E)

[Qupp. 22-mi issuagaq]

AP Photo/​The Roanoke Times, Alan Kim