Utipallannissaannut ikiukkit!

„Kina ornissagatsigu? Illit oqaatsinik naassaanngitsumik inuussutaasunik pigisaqarputit.“ — JOHANNESI 6:68.

1. Ilaanni ajoqersugarpassuit Jiisusi qimammassuk Petrusi qanoq oqarpa?

ILAANNI Jiisusip ajoqersugarpassuisa taanna qimappaat ajoqersuutit taassuma saqqummiussaasa ilaat nuannarinnginnamikku. Jiisusip apustilini ima aperai: „Aamma ilissi qimanniarpisinga?“ Petrusi ima akivoq: „Naalagaq, kina ornissagatsigu? Illit oqaatsinik naassaanngitsumik inuussutaasunik pigisaqarputit.“ (Johannesi 6:51-69) Allamukkarfissaqanngillat. Taamanikkut juutiussutsimi ’oqaatsit naassaanngitsumik inuussutaasut’ pigineqanngillat, aamma ullumikkut Babylonersuarmi, upperisarsiornerup eqqunngitsup silarsuarmi tamarmi naalagaaffissuani, taakku pigineqanngillat. Guutip savaataanit qimaguttoqarsimaguni, Jehovalli iluarisaanik iliorusukkunik, taava taakku ’iterlutik’ ungalusamut uternissaannut maanna piffissanngorpoq. — Romamiut 13:11.

2. Tamanut oqaatigeqqusaanngitsunut ilagiilluunniit utoqqaanertaqatigiivinit aalajangiiffigineqartariaqartunut tunngatillugu suna eqqaamasariaqarpa?

² Jehovap Israelikkunni savanik tammarsimasunik isumassuinini ersersippaa. (Atuaruk Ezekieli 34:15, 16.) Taamatuttaaq utoqqaanertat kristumiut savanik assersuutaasunik savaatinit qimagussimasunik ikiuinissartik kissaatigalugulu pisussaaffigaat. Oqaluussisartorli unittooqqasumik ikiorneqarusuttumik atuaqatiginnittussanngortinneqarsimasoq qanoq iliussava paasiguniuk unittooqqasoq ingasattumik ajortuliorsimasoq? Allanit paasineqaqqusaanngitsunut tunngatillugu ilagiilluunniit utoqqaanertaqatigiivinit aalajangiiffigineqartariaqartunut tunngatillugu nammineq siunnersuinani, oqaluussisartup unittooqqasoq siunnersortariaqarpaa utoqqaanertanik oqaloqateqaqqullugu. Taamaaliunngippat oqaluussisartup nammineq utoqqaanertat oqaluttuuttariaqarpai. — 3 Mosesi 5:1; Galatiamiut 6:1.

3. Angutip 100-nik savaatillip sava tammarsimasoq nanigamiuk qanoq misigiva?

³ Allaaserisap matuma siuliani Jiisusip angummik 100-nik savaatilimmik assersuusiaa eqqaaneqarpoq. Savat taakkua ilaat ataaseq savaatinit qimagummat, angutip taakku 99-it qimaannarpai sava qimagussimasoq ujarniarlugu. Nanigamiullu nuannaaqaaq! (Lukasi 15:4-7) Tamatumunnga assingusumik nuannaartarpugut sava  Guutip savaataanit qimagussimasoq uteraangat. Qularnanngitsumik utoqqaanertat ilagiinniittullu allat unittooqqasumut asanninnertik kajumississutigalugu taassumunnga pulaartarsimassapput. Aamma taakku unittooqqasoq ungalusamut — Guutimit annertoqqusersorneqarlunilu sernissorneqarlunilu pilluaqquneqarumaarfianut — utertikkusuppaat. (5 Mosesi 33:27; Tussiaat 91:14; Ussatit 10:22) Arlaatigut ikiuinissamut periarfissaqarunik susinnaappat?

4. Galatiamiut 6:2, 5 naapertorlugit suna paasivarput?

⁴ Immaqa ilagiinnut uternissaanut kajumissaarsinnaavaat inussiarnersumik nassuiaallugu Jehovap savaatini asagai aamma taamaallaat pisinnaasavut naapertorlugit piumaffigisaraatigut. Ilaatigut Jehovap piumasaraa Biibilimik atuartarnissarput, kristumiut ataatsimiinnerinut ataatsimiigiartarnissarput Guutillu naalagaaffianik oqaluussissutiginnittarnissarput. Immaqa Galatiamiut 6:2, 5-ip atuarnissaa kristumiullu nanertuutigisaminnik ersoqatigiissinnaanerata eqqaanissaa naleqqutissaaq. Tamattali immikkut ’nammagassavut’, tassa imaappoq Guutimut anersaakkut akisussaaffivut, ’nammineq nammattariaqarpavut’. Allat Guutimut aalajaassussinnaanngilaatigut.

’Inuunerup matuma piinik isumakuluutit’ pissutigalugit unittooqqappat?

5, 6. (a) Sooq uppeqativit unittooqqasup ammarfigippatit tusarnaaqqissaarnissat pingaaruteqarpa? (b) Unittooqqasut qanoq ililluni paasitinneqarsinnaappat ataatsimiigiartarunnaarneq ajornartorsiutaannut aaqqissuutaanngitsoq?

⁵ Utoqqaanertat oqaluussisartullu inersimalluartut allat qanoq ikiuisariaqarnerlutik paasisinnaajumallugu, uppeqatip unittooqqasup misigissutsini eqqarsaatinilu oqaluttuarigaangagit tusarnaaqqissaartariaqarput. Oqariarta utoqqaanertaasutit aappariinnut ’inuunerup matuma piinik isumakuluutiginnippallaarnertik’ pissutigalugu ilagiinnut orniguttarunnaarsimasunut pulaartoq. (Lukasi 21:34) Imaassinnaavoq aningaasatigut ajornartorsiutit ilaquttanulluunniit tunngasunik akisussaaffeqarnerulerneq pissutigalugit ilagiinni unittooriartuaarsimasut. Immaqa oqarput ’unikkallarnissartik’ pisariaqartillugu, illilli immaqa immikkoorniarnerup ajornartorsiummut aaqqiissutaannginnera uparuarsinnaavat. (Atuaruk Ussatit 18:1.) Periaaserillutit ima aperisinnaavutit: „Ataatsimiigiartarunnaarnissi kingorna pilluarnerulerpisi? Ilaqutariittut inuunersi pitsaanerulerpa? Jehovamik tatiginninnersi suli nuannaarutigisarpisiuk?“ — Nehemia 8:10.

⁶ Apeqqutit taamaattut iluaqutigalugit unittooqqasut immaqa paasisinnaavaat ilagiinnut orniguttarunnaarnermik kingorna anersaakkut ittunik pingaartitserpiarunnaarsimallutik pilluarpiarunnaarsimallutillu. (Matthæusi 5:3, NV; Hebræerit 10:24, 25) Immaqa taakkua iluaqutigalugit paasisinnaavaat nutaarsiassamik nuannersumik oqaluussissutiginnittarunnaarnermik kingorna nuannaarpiarunnaarsimallutik. (Matthæusi 28:19, 20) Taamaattumik qanoq iliorunik silatusaassappat?

7. Savaatinit qimagussimasut soqqullugit kajumissaarsinnaavavut?

⁷ Jiisusi ima oqarpoq: „Mianersoritsi uummatisi malussarlersitaaqqunagit aalakoornermit  imerajunnermillu inuunerullu matuma piinik isumakuluutinit . . . Eqqumajuarniaritsi, qinugitsilu nukissaqartitaaqqullusi pisussat suut tamaasa qimarratigisinnaaqqullugit.“ (Lukasi 21:34-36) Savaatinit qimagussimasut, kisianni siornatigutut nuannaaleqqikkusuttut, Guutip anersaavanik illernartumik, Guutimit ikiorneqarnissaminnik aamma qinnutitik naapertorlugit iliuuseqarnissaminnik qinnutiginneqqullugit kajumissaarneqarsinnaapput. — Lukasi 11:13.

Mamiatsassimappat?

8, 9. Utoqqaanertap mamiatsassimasoq eqqarsalersinniarlugu qanoq oqaloqatigisinnaavaa?

⁸ Naammalluinnanngitsuugatta inuttut isumaqatigiinngitsoqalersinnaavoq, tamannalu mamiatsassutaasinnaavoq. Ilaat mamiatsassimapput ilagiinni ataqqisaasoq najoqqutassianut Biibilimeersunut akerliusumik iliuuseqarsimammat. Unittooqqasoq tamanna pissutigalugu mamiatsassimappat, utoqqaanertap taassumunnga pulaartup erseqqissarsinnaavaa Jehovap mamiatsattoqartarneranut pisuusannginnera. Taava sooq Taassumunnga innuttaanullu attaveqarunnaartoqassava? ’Nunarsuarmik tamarmik eqqartuussisuusup’ qanoq pisoqarsimaneranik ilisimanninnera pisimasumillu eqqortumik iliuuseqarfiginnikkumaarnera qularutiginagu Guuti kiffartorfigiuartariaqannginnerparput? (1 Mosesi 18:25; Kolossemiut 3:23-25) Inuk naalluni orlugaangami nikuinniarsarinani piaaraluni pallungaannarneq ajorpoq, ilaa?

⁹ Utoqqaanertap aamma eqqaasinnaavaa ilaasa piffissap ingerlanerani paasisaraat mamiatsaatigisartik aamma taama pingaaruteqartiginngitsoq. Aap, immaqa mamiatsaatissaarussimavoq. Unittooqqasoq perorsaatissinneqarsimanini pissutigalugu mamiatsassimaguni, qinunerup eqqarsaatiginninnerullu kingunerisaanik immaqa isummissaaq perorsaatissinneqarnini ilaatigut nammineq pisuussutigalugu taamaattumillu mamiatsassimasariaqanngikkaluarluni. — Tussiaat 119:165; Hebræerit 12:5-13.

Ajoqersuut pissutaava?

10, 11. Ajoqersuummik Biibilimeersumik allatut paasinnissimasoq eqqarsalersinniarlugu qanoq oqaloqatigineqarsinnaava?

¹⁰ Ilaat immaqa Guutip savaataanit qimagussimapput ajoqersuummik aalajangersimasumik paasinnittaaseq akueriumannginnamikku. Israelikkut Egyptenimi inussiaataanermit aniguisitaasimasut Guutip nammineq pillutik ’naammassisai puiorpaat ilitsersuutaalu utaqqiumanagu’. (Tussiaat 106:13) Iluaqutaasinnaavoq unittooqqasoq eqqaasissallugu ’inussiap aalajaallunilu silatuup’ (NV) anersaakkut inuussutissanik pikkunartunik tunioraasarneranik. (Matthæusi 24:45) Taamaalillunimi sallusuissut taamanikkut ilinniarpaa. Soormi sallusuissutip aqqutaatigut ingerlajuaruni? — 2 Johannesi 4.

¹¹ Utoqqaanertap Guutip savaataanit qimagussimasunik ikiuiniarnermini ajoqersukkat Jiisusip nuannarinngisaminnik ajoqersuuteqarsimanera pissutigalugu taassuminnga qimatsisut innersuussutigisinnaavai. (Johannesi 6:53, 66) Jiisusimut taassumalu ajoqersugaanut aalajaatsunut attaveqarunnaarnermikkut anersaakkut ittunik pingaartitsiunnaarlutillu nuannaarunnaarput. Ilagiinnut kristumiunut orniguttarunnaarsimasut sumiiffimmik anersaakkut taama inuussutissaqartigisumik allamik nassaarsimappat? Naagga, allami tamakkuninnga nassaartoqarsinnaanngilaq!

Ingasattumik ajortuliorsimaneq pissutaava?

12, 13. Savaatinit qimagussimasoq ingasattumik ajortuliorsimanerminik nassuerutiginnippat qanoq ikiorneqarsinnaava?

¹² Ilaat oqaluussisarunnaartarlutillu ataatsimiigiartarunnaartarput ingasattumik ajortuliorsimanertik pissutigalugu. Immaqa isumaqarput ilagiinnut ilaajunnaarsitaassallutik ajortuliorsimanertik utoqqaanertanut nassuerutigigunikku. Ilagiinnulli ilaajunnaarsitaanavianngillat iliuuseq Biibilimut naapertuutinngitsoq iliuuserisarunnaarsimagunikku kukkunerminnillu aaqqeerusullutik ilumoorlutik peqqissimigunik. (2 Korinthimiut 7:10) Tikilluaqquneqassappulli, pisariaqartitaminnillu utoqqaanertanit anersaakkut ikiorneqassapput.

¹³ Oqaluussisartuuguit inersimalluartoq unittooqqasumik atuaqatiginnittussanngorsimasoq, unittooqqasullu ingasattumik ajortuliorsimanerminik oqaluttuuppatit, qanoq iliussavit? Eqqaaneqareersutut nammineq akuliunnak, taanna utoqqaanertanut saaffiginneqqullugu kajumissaassavat. Taamaaliorumanngippat, ersersittariaqarpat  Jehovap aqqa ilagiillu atugarissaarnissaat ilinnut ima pingaaruteqartigisut siunnersuutit Biibilimiittut pissutsinut taama ittunut tunngasut naapertorlugit iliorniarlutit. (Atuaruk 3 Mosesi 5:1.) Utoqqaanertat nalunngilaat uterumasoq Guutillu piumasaa naapertorlugu inuujumasoq qanoq ikiussanerlugu. Imaassinnaavoq asannittumik perorsaatissiisoqartariaqartoq. (Hebræerit 12:7-11) Unittooqqasup Guutimut ajortuliorsimanini nassuerutigiguniuk, ajortuliortarunnaarlunilu peqqissimiguni, utoqqaanertanit ikiorneqassaaq, Jehovamillu isumakkeerfigineqassaaq. — Esaja 1:18; 55:7; Jaaku 5:13-16.

Ernerup uternera nuannaarutaasarpoq

14. Ernermik tammaraluartumik assersuusiaq nammineq oqaatsitit atorlugit oqaluttuariuk.

¹⁴ Savamik savaatinit qimagussimasumik ikiuisussanngortinneqartup innersuussutigisinnaavaa Jiisusip assersuusiaa Lukasi 15:11-24-miittoq. Assersuusiami tamatumani angutip inuusuttup kingornussarsiani inuunerlunnermigut nungulussinnarpai. Naggataatigut taamatut inuunini avaanngugilerpaa. Kaappoq, angerlarserpoq, maannalu aalajangersimavoq angerlarniarluni! Suli ungasissumiitillugu ataataata ernini takuaa, arpalluni parsiarpaa, eqitaarpaa kunillugulu. Ataataasoq nuannaangaarpoq. Savaatinit qimagussimasoq assersuusiamik tamatuminnga eqqarsaatiginninnermigut immaqa uternissamut kajumissisinnaavoq. Pissutsit aaqqissuussaanerat maanna atuuttoq suujunnaarsinneqangajalermat ’angerlapallattariaqarpoq’.

15. Ilaasa ilagiinnit qimagukkiartortarnerannut suut pissutaasinnaappat?

¹⁵ Ilagiinnit qimaguttut soorunami tamarmiunngitsoq ernermut tammaraluartumut assersuunneqarsinnaapput. Ilaat qimagukkiartuaartarput, soorlu umiatsiaq saavittoq sineriammit ungasilliartuaartartoq. Allat ulluinnarni isumakuluutit ima nanertuutigitigilertarpaat inuunermi anersaakkut ittut sumiginnalerlugit. Allallu ilagiinniittut mamiatsaatigisarpaat, imaluunniit ilagiinnit qimaguttarput ajoqersuummik Biibilimeersumik allatut paasinnittaaseqaramik. Ilaat ikittunnguit ingasattumik ajortuliortarput. Matumanili siunnersuutigineqartuni erserpoq savaatinit qimagussimasoq kingusinaartinnagu uternissaanut ikiorniarlugu pissutsini ataasiakkaani qanoq iliortoqarsinnaanersoq.

„Ernera, tikilluarit!“

16-18. (a) Ukiorpassuarni unittooqqasimasoq utoqqaanertamit qanoq ikiorneqarpa? (b) Sooq qatanngut unittoorsimava, qanoq ikiorneqarpa, ilagiinnillu qanoq pineqarpa?

¹⁶ Ilagiit ilaanni utoqqaanertaq ima oqaluttuarpoq: „Utoqqaanertaqatigiit ilagiitsinniittut unittooqqasunut pulaartarnissartik sulissutigaat. Eqqaagigaana qatanngut angut atuaqatigisarnikuusara sallusuissummillu paasinninnissaanut ikiornikuusara. Tamatuma kingorna ukiut 25-t missiliorlugit unittooqqavoq ajornartorsiulersimallunilu. Nassuiaappara najoqqutassianik Biibilimiittunik maleruaanini qanoq iluaqutigissaneraa. Kingusinnerusukkut naalagaaffilersaarfimmut aggertaleqqippoq ilagiinnullu uternissaminik aalajangiusimanninnerulissutigisinnaasaminik Biibilimik atuaqqissaaqatigineqarnissaminut akuersilluni.“

 ¹⁷ Sooq qatanngut taanna unittoorsimava? Nammineq ima oqaluttuarpoq: „Anersaakkut ittunut tunngassuteqanngitsut samminerulerpakka. Taava atuaqqissaartarunnaarpunga, oqaluusseqataasarunnaarlunga ataatsimiigiartarunnaarlungalu. Pileriallarpunga ilagiinnit kristumiunit avissaarsimallunga. Uternissannut iluaqutigisara tassaavoq utoqqaanertap uannik inuttut ilumoorluni soqutiginninnera.“ Qatanngutip taassuma ajornartorsiutai Biibilimik atuaqqissaaqatigineqartalernerata kingorna annikilliartorput. Ima oqarpoq: „Paasivara Jehovap taassumalu peqatigiissortaasa asanninnerat siulersuinerallu siornatigut misigisimasakka inuuninni amigaatigalugit.“

¹⁸ Ilagiinnit qanoq pineqarpa? Ima oqaluttuarpoq: „Ernertut tammaraluartutut Jiisusip assersuusiaani oqaluttuarineqartutut misigaanga. Qatanngutit arnat ilaata ukiut 30-t matuma siorna aamma ilagiinniittup sulilu aalajaalluni Jehovamut kiffartortup ima oqarfigaanga: ’Ernera, tikilluarit!’ Tamanna qamuuna attortissutigaara. Ilumut angerlarsimaqqilerpunga. Aamma utoqqaanertap ilagiinniittullu tamarmik uannik asannillutillu isumassuillutillu soqutiginnillutillu naammagittarfiginninnerannik qujamasuutiginninnera oqaatigerusuppara. Taakkua Jehovamik tullerminnillu asanninnerat savaatinut uternissannut iluaqutigaara.“

Iliuuseqapallaqqullugit kajumissaakkit

19, 20. Unittooqqasut sunissamut kajumissaarneqartariaqarpat, qanorlu ililluni oqaluttuunneqarsinnaappat Jehovap sapikkatsinnik piumaffigisanngikkaatigut?

¹⁹ Ulluni kingullerni inuuvugut, pissutsillu aaqqissuussaanerata maanna atuuttup naggatissaa qanillivoq. Taamaattumik unittooqqasut kajumissaakkit ilagiit ataatsimiinnerinut ataatsimiigiartaqqullugit. Oqarfigikkit maannakkorpiaq aggertaleqqullugit. Eqqaasikkit Saatanip taakkua Guutimut attaveqarnerat ajoquserniarsarigaa aamma isumaqalersinniarsarigai pallorfiginninnermik ilumoortumik tunussineq inuunermi nammagassaqarnanngitsuusoq. Neriorsoqqissaarsinnaavatit aatsaat aalajaalluni Jiisusimut ajoqersugaagaanni piviusumik nukissaqalertoqarsinnaasoq. — Atuaruk Matthæusi 11:28-30. *

²⁰ Unittooqqasut eqqaasikkit Guutip sapinngisavut kisiisa naapertorlugit piumaffigisaraatigut. Lazarusip qatanngutaa Maria uuliamik tipigissumik akisoorujussuarmik Jiisusip niaquanut kuisinini pillugu isornartorsiorneqarmat Jiisusi ima oqarpoq: „Ilaginnarsiuk. . . . Pisinnaanini naapertorlugu iliorpoq.“ (Markusi 14:6-8) Jiisusip uillarneq piitsoq naalaffiup aningaasanik nakkartitsivianut aningaasannguanik marlunnik nakkartitsisoq nersorpaa. Aamma taanna pisinnaasani naapertorlugu iliorpoq. (Lukasi 21:1-4) Amerlanersavut ilagiit ataatsimiinnerinut ataatsimiigiarsinnaapput aamma oqaluusseqataasinnaapput. Jehovap ikiuineratigut maanna unittooqqasut ilarpassui aamma taamaaliorsinnaassapput.

21, 22. Jehovamut utertut qanoq neriorsoqqissaarneqarsinnaappat?

²¹ Ilagiinnit qimagussimasoq qatanngutimi naapeqqinnissaannut nangaappat, erneq tammaraluartoq angerlarmat nuannaangaartoqarnera pillugu eqqaasinneqarsinnaavoq. Ilagiinnut utertut tamatumunnga assingusumik nuannaarutaassapput. Kajumissaakkit maannakkut iliuuseqaqqullugit, Diaavulumik akiueqqullugit Guutimullu qanilleqqullugit. — Jaaku 4:7, 8.

²² Jehovamut utertut tikilluaqqusaangaarumaarput. (Upputit 3:40) Taassumunnga kiffartornerminni siornatigut nuannaarutigisimasatik qularnanngitsumik eqqaamavaat. Savaatinut utipallattut nuannaarutissarpassuaqaqqilerlutillu pilluaqqussutisiassarpassuaqaqqilerumaarput.

[Quppernerup ataani ilanngussaq]

Qanoq akissavit?

• Mamiatsassimanini pissutigalugu unittooqqasoq qanoq ikiorneqarsinnaava?

• Ajoqersuummik aalajangersimasumik nammineq paasinnittaaseqarnini pissutigalugu ilagiinnit qimagussimasoq eqqarsalersinniarlugu qanoq oqaloqatigineqarsinnaava?

• Ilagiinnut uternissaminut nangaasoq qanoq ikiorneqarsinnaava?

[Atuaqqissaarnermi apeqqutit]

[Qupp. 15-mi assiliartaq]

Unittooqqasup ammarfigippatit tusarnaaqqissaaruk

[Qupp. 17-mi assiliartat]

Jiisusip ernermik tammaraluartumik assersuusiaa inuit ilaasa ilagiinnut utissutigisinnaavaat