Kia siunissaq ilisimasinnaavaa?

“Uangami Guutiuvunga . . . Pileqqaarnerannit qanoq pisoqarnissaa nalunaarutigaara, itsaanilli suli pinngitsut oqaatigaakka.” — Esaja 46:9, 10.

PIFFISSAMI nalorninartumi matumani politikki, aningaasaqarneq inuillu atugaat pillugit misissueqqissaartartut oqaluttuarisaaneq ullumikkullu pissutsit misissortarpaat siunissaq siulittuutigisinnaajumallugu. Allat ulloriarsiornermut imaluunniit anersaarsiornermut saattarput apeqqutitik akissutissaarutivikkaangamikkik. Amerlanertigut pakatsiinnartarput. Silarsuarmi qanoq pisoqarnissaata nammineq ilaquttallu qanoq pinissaasa ilisimanissaat ajornarluinnarpa? Siunissaq siulittuutigineqarsinnaava?

Guuti Ajugaqanngitsoq, Jehova, pruffiiti Esaja saaffigigamiuk, qulaani issuarneqartumi, nammineq siunissamik siulittuutiginnissinnaanerarpoq. Guutip Esaja aqqutigalugu siulittuutigaa itsaq Israelikkut Babylonimut aallarussaaqqanerminnit aniguisitaassasut utissasullu Jerusalemi naalaffillu qarmaqqikkiartorlugit. Siulittuut taanna qanoq eqqoqqissaartigisumik eqquuppa? Ukiut 200-t missaat sioqqullugu Esajap Babylonimik tiguaasussap aqqa Kyrosiussasoq siulittuutigisimavaa. Aammattaaq Esajap Kyrosip periuseq suna atussaneraa eqqorluartumik allaatigaa — taassuma kuussuup Eufratip illoqarfimmut illersuutaagaluartup kuunnera allamut sangutissagaa. Allaat siulittuutigaa illoqarfiup matorsui qajannaatsut arlariit mianersuaalliorneq pissutaalluni ammaannassasut Kyrosimut Babyloni tiguaruminarsisillugu. — Esaja 44:24–45:7.

Inuit Guutip siunissamik ilisimannissinnaaneratut ilisimannissinnaanngillat. Kunngi Salomo silatooq ima allappoq: “Usorsitsaarniaqinak aqagussaq eqqarsaatigalugu, naluammi ulloq taanna sumik nassataqarumaarnersoq.” (Ussatit 27:1) Oqaatsit taakku suli ilumoorput. Inuummi kialuunniit siunissani siulittuutigisinnaanngilaa. Sooq Guuti siulittuisinnaava? Pinngortitani tamaasa nalunngilluinnarpai, taakkununnga ilaallutik inuit pissusii iliuusereqqajaasaallu. Guutip eqqorluartumik siulittuutigisinnaavaa inuit ataasiakkaat inuiakkuutaallu qanoq iliorumaarnissaat, taamaaliorniarluni aalajangeruni. Taakkununngalu ilaavoq pisunik aqutsisinnaanera killeqanngitsoq. Jehova pruffiitini aqqutigalugit pisussanik siulittuigaangami, taannaavoq ‘kiffami oqaasiinik aalajangersaasartoq nalunaariartortitamilu pilersaarutaannik naammassinnittoq’. (Esaja 44:26) Jehova imminut pilluni eqqortumik taamatut kisimi oqarsinnaavoq.

Jiisusi, Missiarsi, ukiunik 700-nik amerlanerusunik sioqqullugu Esaja inuuvoq. Taamaakkaluartoq Esajap Missiarsi tikiuttussaq siulittuutigaa. Pingaartumilli 1700-kkut ingerlaneranni tamatumalu kingorna Biibilimik isornartorsiuisartut Esajap allagaasa tatigineqarsinnaanera qularisimavaat. Taakkua Esajap siulittuutai siulittuutiviunnginnerarpaat, pisimasulli pereernerisa kingorna atuakkiortumit allamit allagaanerarlugit. Ilumoorpa? 1947-mi qaarusummi Immap Uumaatsup eqqaani allakkat imusat pisoqqat nassaarineqarput, taakkununngalu ilaavoq Esajap allagaanik assiliilluni allagaq. Biibilimik misissueqqissaartartut assiliilluni allagaq taanna Missiarsip tikiuttussap, imaluunniit Kristusip inunngornissaa ukiunik hundredinik  amerlanerusunik sioqqullugu allagaasoraat. Biibilimi siunissaq qulaarneqarpoq.

Esaja Biibilimillu allattut allat namminneq paasisimasaqassusertik tunngavigalugu pisussanik siulittuisinnaasimanavianngillat. Aap, taakku “Anersaamit Illernartumit sunnertillutik inuit Guutimit pisumik oqaaseqartarput”. (2 Petrusi 1:21) Allaaserisani tulliuttuni Jiisusip inuunera pillugu siulittuutit sukumiinerusut Esajap allagaaniittut, tamatumalu kingorna Jiisusip taassumalu ajoqersugaasa nalitsinni siunissamilu pisussanik siulittuutaat, sammineqassapput.