Missiarsi pillugu siulittuutit

INUIAQATIGIIT juutit, Esajap pruffiitillu allat Missiarsi pillugu allagaannik ilisimannittut, qangali taassuma tikiunnissaa qilanaarisimavaat. Jiisusip nalaani juutit amerlasuut Missiarsip qanittukkut tikiunnissaa ilimagilluinnarsimavaat. (Lukasi 3:15) Maluginiarnarpoq Biibilimi siulittuutigineqartut ilaasa Missiarsip inuuneranut tunngasunik sukumiisunik ilaqarnerat. Inuinnaap sukumiisumik tamakku siulittuutigisinnaanngilai Jiisusimulluunniit naleqquttunngortissinnaanngilai.

Missiarsip inunngorneranut tunngasut sukumiisut. Esajap siulittuutigaa Missiarsi, imaluunniit Kristusi, niviarsiamit erniussasoq. Matthæusip Jiisusip inunngornerani pisimasut tupinnartuliat allaaserereerlugit ima nangippoq: “Tamakku tamarmik pipput [Jehovap] pruffiitikkut oqaaserisaa eqquuteqqullugu, oqarmat: ‘Takuat, niviarsiaq naartulissaaq ernertaassallunilu, atsissavaallu Immanuelimik’ — imaappoq: Guuti ilagaarput.” (Matthæusi 1:22, 23; Esaja 7:14) Esajap aamma siulittuutigaa Kristusi Daavip kinguaarissagaa, immikkullu eqqaallugu Isaji, Daavip angutaa. Jiisusimi aamma Daavip kinguaaraa. (Matthæusi 1:6, 16; Lukasi 3:23, 31, 32) Taamaattumik Jiisusi suli inunngunngitsoq inngili Gabrieli Jiisusip arnaanut Mariamut ima oqarpoq: “Guutillu [Jehovap] tunissavaa ataataata Daavip issiavissaarsuanik.” — Lukasi 1:32, 33; Esaja 11:1-5, 10; Romamiut 15:12.

Missiarsip inuuneranut tunngasut sukumiisut. Nazaretimi naalaffimmi Jiisusip inersimasup Esajap siulittuutaaneersut ilaatigut oqaatsit  uku atuarpai: “[Jehovap] anersaavata tikippaanga [Jehovap] tanitarimmanga. Aallartippaanga nalunaarut nuannersoq piitsunut tusarliuteqqullugu.” Siulittuut taanna imminut pilluni atorpaa ima oqarluni: “Oqaatsit allakkaniittut tusakkasi ullumikkut eqquupput.” (Lukasi 4:17-21; Esaja 61:1, 2) Esajap aamma siulittuutigaa Jiisusi inunnut ajorunnaarsinneqarnissamik pisariaqartitsisunut inussiarnersuussasoq, saamasuussasoq anneruniajuitsuussasorlu. Matthæusi ima allappoq: “Inuppassuit malippaat, taakkulu tamaasa ajorunnaarsippai. Kinaaninili oqaatigeqqunngilluinnarpaa, eqquuteqqullugu pruffiitikkut Esajakkut oqaaserisaq imaattoq: . . . ‘Saqitsaassissananilu suaartassanngilaq . . . Sullortooq naffalik napivissanngilaa.’” — Matthæusi 8:16, 17; 12:10-21; Esaja 42:1-4; 53:4, 5.

Missiarsip anniarnissaanut tunngasut sukumiisut. Esajap siulittuutigaa Israelikkut amerlanersaasa Missiarsi akuerissanngikkaat, taakkununngali tassaalerumaartoq “ujarak naakkiuffissaq”. (1 Petrusi 2:6-8; Esaja 8:14, 15) Inuit Jiisusi amerlasuunik tupinnartuliortoq takugaluarlugu, “upperfiginngilaat, pruffiitip Esajap oqaaserisai uku eqquutissammata: [Jehova], kiap upperaa tusarliussarput?” (Johannesi 12:37, 38; Esaja 53:1) Juutit Jiisusimik upperinninnginneranut pissutaaqataasoq isumali nalinginnaasoq paasinerluinerusorlu tassaavoq Missiarsip ingerlaannaq inuiaqatigiinnik Romamiut naalakkersuinerannit aniguisitsinissaa nunarsuarmilu Daavip kunngeqarfianik namminersortumik pilersitseqqinnissaa. Jiisusip anniartitaalluni toqunera pissutigalugu juutit amerlanerit Missiarsitut akueriumanngilaat. Esajalli siulittuutigereersimavaa Missiarsi kunnginngunnginnermini anniartitaassasoq.

Esajap allagaani Missiarsi ima siulittuutigineqarpoq: “Qatigaga manivara anaalerisunut . . . kiinara assinngilara asissuisunut qitseraasunullu.” Jiisusi misilinneqarmat qanoq pisoqarnera Matthæusip ima allaatigaa: “Taava kiinaagut qitserarpaat tilluarlugulu, ilaasalu anaalerpaat.” (Esaja 50:6; Matthæusi 26:67) Esaja ima allappoq: ‘Naalliutsitaavoq, qaninili ammanngilaa.’ Pilatusip juutit unnerluutiginnissutaat pillugit killisiormani “oqaatsimik ataatsimilluunniit [Jiisusip] akinngilaa naalagaatitaq tupigusungaalersillugu”. — Esaja 53:7; Matthæusi 27:12-14; Apustilit Suliaat 8:28, 32-35.

Missiarsip toquneranut tunngasut sukumiisut. Taamatuttaaq Esajap Jiisusip toquneranik kingornalu pisunik siulittuutaa eqquuppoq. Esaja ima allappoq: “Pinerluttut akornanni ilivissippaat, pisuut akornanni ilineqarfissillugu.” (Esaja 53:9) Siulittuutit imminnut assigiinngilluinnarpasissut qanoq ilillutik eqquussinnaagamik? Jiisusi toqugami piiaasut marluk akornanni qisummut nappakkamut kikiattorneqarpoq. (Matthæusi 27:38) Kingusinnerusukkulli Josefip Arimatæamiup pisuup Jiisusip timaa nammineq ilivissaminut ilullineqaqqammersimasumut ilivaa. (Matthæusi 27:57-60) Naggataatigut Jiisusip toqunera Esajap siulittuutaasa eqquuttut pingaarnerit ilagilerpaat. Missiarsi pillugu Esaja ima oqarsimavoq: “Kiffama amerlasuut iluartuutissavai ajortuliaallu ersussavai.” Aap, Jiisusip toquneratigut utertitsissut pilersinneqarpoq taamaalilluni ajorti uppertunut tamanut nanertuutaajunnaarsinnaaniassammat. — Esaja 53:8, 11; Romamiut 4:25.

Siulittuutit eqquukkumaartut

Jiisusip ajoqersugaasalu allakkat atorlugit Missiarsip kinaanera takutinniaraangamikku Biibilip atuagartaanit allanit Esajap allagai issuaavigikulanerusarpaat. Siunissarli pillugu Esajap allagaaniinnaanngitsoq atuarsinnaavugut. Hebræerisut allakkani siulittuutigineqartorpassuit allat  Jiisusimut, taassuma naalagaaffianut, Naalagaaffiullu tamatuma siunissami pilersitassaanut ajunngitsorpassuarnut tunngatillugu aamma eqquukkumaarput. * (Apustilit Suliaat 28:23; Saqqummersitat 19:10) Siulittuutilli taakku eqquunnissaat qanoq qularnaatsigiva? Jiisusi juutinut tusarnaartunut ima oqarpoq: “Isumaqaqinasi inatsisit pruffiitilluunniit atorunnaarsikkiartorlugit tikiuttunga. Tikiutinngilanga atorunnaarsitsiartorlunga, naammassisitsiartorlungali. Ilumut oqarfigaassi: Qilak nunalu nungutsinnagit allanneq minnerpaaq titarninnguarluunniit ataaseq inatsisinit peerneqassanngilaq, pisussat tamarmik pereersinnagit.” — Matthæusi 5:17, 18.

Jiisusip aamma nalimini pisut siunissamilu pisussat eqqartoramigit Biibilimi siulittuutit eqquunneri eqqartorpai. (Danieli 9:27; Matthæusi 15:7-9; 24:15) Aammattaaq Jiisusip ajoqersugaasalu namminneq siulittuutigaat kingusinnerusukkut pisussat, soorlu pisorpassuit ullumikkut takusartakkavut. Allaaserisami tulliuttumi Biibilimi siulittuutit taakku qanoq eqquutissanersut siulittuutillu allat siunissami eqquuttussat sammineqassapput.

[Quppernerup ataani ilanngussaq]

[Qupp. 4-mi assiliartaq]

‘Niviarsiaq ernertaassaaq’

[Qupp. 5-mi assiliartaq]

“Kiinara assinngilara asissuisunut”