Peqqissaartumik nalunaajaanissamik aalajangiusimanninneq

“Peqquaatigut inunnut oqaluussissutigeqqullugu nalunaajaatigeqqullugulu [peqqissaartumillu nalunaajaaqqulluta, NV] taannaasoq Guutip inuusunik toqusimasunillu eqqartuussisussanngortitaa.” — APUSTILIT SULIAAT 10:42.

1. Peqqussut suna Petrusip Corneliusimut oqaluttuaraa?

SAKKUTUUT naalagaata Italiamiup ikinngutini ilaquttanilu katersortippai, tamatumalu kingorna pingaaruteqarluinnartumik pisoqarpoq. Angut Guutimik mianerinnittoq taanna tassaavoq Corneliusi. Apustilip Petrusip katersorsimasut oqarfigai apustilit Jiisusi pillugu inunnut oqaluusseqquneqarsimallutillu ‘peqqissaartumik nalunaajaaqquneqarsimasut’. Petrusip nalunaajaanera nuannersumik kinguneqarpoq. Juutiunngitsut kipineqanngitsut Guutip anersaavanik tunineqarput, kuisillutik qilammilu Jiisusimik kunngioqateqarnissamik neriuuteqalerlutik. Petrusip peqqissaartumik nalunaajaanera kinguneqarluangaarami! — Apustilit Suliaat 10:22, 34-48.

2. Qanoq ililluta nalunngilarput nalunaajaaqqusissut apustilinut aqqaneq-marlunnuinnaanngitsoq peqqussutaasoq?

² Tamanna ukiumi 36-mi pivoq. Ukiut marluk missiliorlugit tamatuma siorna kristumiussutsimik akerlilersuisoq peqqarniitsoq inuunerminik allannguilluinnassutigisaminik misigisaqarsimavoq. Saulusi Tarsusimiu Damaskusiliarpoq Jiisusip saqqummerfigimmani imalu oqarfigimmani: “Illoqarfimmut iseriartorit, taava tassani qanoq iliornissannik ilisimatinneqassaatit.” Jiisusip ajoqersugaq Anania uppernarsaavigaa Saulusip ‘Guutimik nalusunut, kunnginut Israelillu kinguaavinut’ nalunaajaajumaarneranik. (Atuaruk Apustilit Suliaat 9:3-6, 13-20). Naapikkamik Anania ima oqarpoq: “Siuaasatta Guutiata qinersimavaatit. . . . Inunnummi tamanut taassuma nalunaajaasigissavaatit.” (Apustilit Suliaat 22:12-16) Saulusip, kingusinnerusukkut Paulusitut ilisimaneqalersup, nalunaajaanissamik suliassiissut qanoq pimoorutsigaa?

Peqqissaartumik nalunaajaavoq!

3. (a) Oqaluttuaq aalajangersimasoq suna misissussavarput? (b) Utoqqaanertat Efesosimiittut Paulusimit oqariartortitsivigineqaramik qanoq periarpat, tamatumanilu taakku uagutsinnut qanoq maligassaalluarpat?

³ Tamatuma kingorna Paulusip suliarisimasaanik tamanik sukumiisumik misissuinissaq assut soqutiginassagaluarpoq, maannali ukiup 56-ip missaani taassuma oqalugiaatigisimasaa, Apustilit Suliaanni kapitali 20-mi allaatigineqartoq, sukumiisumik sammissavarput. Paulusip taanna oqalugiaatigaa pingajussaanik ajoqersuiartortitatut angalanermi naggataatungaani. Miletimi, illoqarfimmi umiarsualivilimmi Ægæerit Imartaanniittumi, niusimavoq utoqqaanertallu Efesosimi ilagiinniittut oqariartortitsivigisimallugit. Efesosi Miletimiit toqqaannavillugu 50 kilometerisut ungasitsigaaq, tappavungali aqqutaa sangujoraarmat takineruvoq. Takorloorsinnaavat utoqqaanertat Efesosimiut Paulusip  nalunaarutaa tusaramikku qanoq nuannaartigisimassasut. (Naleqqiuguk Ussatit 10:28). Miletimukannginnerminnili isumagisassaminnik isumaginneqqaartariaqarput. Immaqa taakkua ilaat sulinngikkallartariaqarsimapput imaluunniit niuertarfiutiminnik matusigallartariaqarsimapput. Ullumikkut kristumiorpassuit taamaaliortarput ukiumoortumik ataatsimeersuarnermi saqqummiunneqartut ilaat ataasinnguarluunniit malinnaaviginngitsoorumanagu.

4. Paulusi siusinnerusukkut ukiualunni Efesosimiikkami sulerisimava?

⁴ Paulusi utoqqaanertat tikinnginneranni ulluni pingasuni sisamaniluunniit Miletimi sulerisimassasoraajuk? Illit ullut taakku qanoq atussagaluarpigit? (Naleqqiuguk Apustilit Suliaat 17:16, 17). Paulusip utoqqaanertanut Efesosimiunut oqaasii sulerisimaneranik paasisaqarfigilaarsinnaavavut. Taassuma oqaluttuaraa ukiut ingerlaneranni oqaluussisarnini, aamma siusinnerusukkut Efesosimiikkami sulerisarsimanini. (Atuaruk Apustilit Suliaat 20:18-21). Nalunagu akerlilerneqarnaviarani ima oqarpoq: ‘Nalunngilarsi nunap immikkoortuanut Asiamut peqqaarfinniilli nalunaajaasunga [peqqissaartumik nalunaajaasunga, NV].’ Aap, Jiisusip imminut suliassiissutigisaata suliarinissaa aalajangiusimavaa. Efesosimiitilluni tamanna qanoq suliaraa? Ilaatigut juutinut oqaluussinermigut, taakkua ilarpassuisa ornigartagaannukarluni. Lukasi allappoq Paulusip, ukiup 52-55-ip missaani Efesosimiikkami, inuit synagogimi ‘oqaloqatigisarai qularunnaarsillugit’. Juutit “upperumanatik manngertimmata” Paulusip inuit allat saaffigai; illoqarfimmi sumiiffimmut allamukarpoq, oqaluussiuarporli. Taamaalilluni illoqarfissuarmi tamatumani juutinut grækerinullu nalunaajaavoq. — Apustilit Suliaat 19:1, 8, 9.

5, 6. Qanoq ililluta nalunngilarput Paulusip allamik upperisallit illumit illumut oqaluussiffigigai?

⁵ Kristumiunngortut ilaat kingusinnerusukkut utoqqaanertanngornissamut piumasaqaatinik eqqortitsipput, taakkulu Paulusip Miletimi oqaluffigai. Paulusip periaaserisimasani pillugu taakku ima eqqaasippai: ‘Ilissinnut ikiuutaasinnaasunik nipangiussaqarsimanngilanga ilissinnulli nalunaajaasimavunga ajoqersorlusilu tamanut saqqumisumik illunilu [illumillu illumut, NV].’ Ullumikkut inuit ilaasa Paulusi matumani uppertunut paarsisutut pulaarnermik eqqartuiinnarnerarpaat. Taamaanngilarli. Oqariartaatsimi ‘tamanut saqqumisumik illumillu illumut’-mi pingaartumik allamik upperisalinnut oqaluussineq pineqarpoq. Tamanna taassuma oqaasiini tulliuttuni erseqqippoq. Paulusi oqarpoq “juutinut grækerinullu [nalunaajaalluni] Guutimut allamik isumataarnissamik Naalakkatsinnullu Jiisusimut uppernissamik”. Erseqqippoq Paulusi allamik upperisalinnut, allamik isumataartariaqarlutillu Jiisusimut uppilertariaqartunut, nalunaajaasimasoq. — Apustilit Suliaat 20:20, 21.

⁶ Kristumiut Allagaataannik Grækerisuunik misissueqqissaarnermi misissueqqissaartut ilaat Apustilit Suliaat 20:20 pillugu ima oqarpoq: “Paulusi ukiuni pingasuni Efesosimiissimavoq. Illunut tamarluinnarnut pulaarsimavoq, imaluunniit minnerpaamik innuttaasunut tamanut oqaluussisimavoq (versi 26). Tassa taanna illumit illumut oqaluussisarnermut aammattaaq ataatsimiinnerni tamanut ammasuni iivangkiiliumik siaruarterisarnermut tunngaviuvoq Biibilimeersoq.” Biibilimik  misissueqqissaartartoq taanna Paulusimik illunut tamanut pulaarsimasorinninnermini ilumooraluarpat ilumuunngikkaluarpalluunniit, Paulusip utoqqaanertat Efesosimeersut qanoq nalunaajaasimanerminik tamatumalu qanoq sunniuteqarsimaneranik puiuinnginnissaat kissaatigisimavaa. Lukasi ima oqaluttuarpoq: “Naalakkap oqaasia [tusartippaa] nunap immikkoortuani Asiami najugaqartunut tamanut — juutinut grækerinullu.” (Apustilit Suliaat 19:10) Qanorli ilillutik Asiamiittut ‘tamarmik’ tusarliussaq tusarsinnaagamikku, oqaluussinitsinnullu tunngatillugu tamanna qanoq ilinniarfigisinnaavarput?

7. Paulusip tusarliussaa taassuma toqqarlugit oqaluussiffigisaanuinnaanngitsoq qanoq ililluni anngussimasinnaava?

⁷ Inuppassuit Paulusip tusarliussaa tusartarpaat, taanna sumiiffinni tamanut ammasuni illumillu illumut oqaluussigaangat. Taassuminnga tusarnaartut tamarluinnarmik Efesosimiiginnarnissaat, taakkualu arlaata niuerniarnissaq, ilaquttanut qaninnerusumi najugaqalernissaq illoqarfissuarmilluunniit ulapaarfioqisumit qimagunnissaq siunertaralugu allamut nuunnginnissaat ilimanarsoraajuk? Ilimananngilaq, ilaa? Ullumikkut inuppassuit tamakkununnga assingusunik pissuteqarlutik nuussimapput, immaqa aamma illit. Aamma Efesosi inuppassuarnit aqqusaartorneqartarpoq, ilaatigut qassimiuaarniartunit niuerniartunilluunniit. Illoqarfimmiinnerminni immaqa Paulusi naapippaat imaluunniit oqaluussisoq tusarnaarpaat. Angerlarunik taava sussappat? Sallusuissummik pigiliussisut nalunaajaassapput. Allat immaqa uppertunngunngillat, Efesosimiitillutilli tusarsimasatik allanut oqaluttuareqqippaat. Tamatuma kingunerisaanik eqqarliisa, eqqaamiuisa sullitaasaluunniit sallusuissut tusarsimavaat, taakkualu ilaasa immaqa pigiliuppaat. (Naleqqiuguk Markusi 5:14). Nalunaajaanitta qanoq kinguneqarsinnaanera pillugu matumani suna paasivarput?

8. Asiamiut qanoq ilillutik sallusuissut pillugu tusagaqarsimasinnaappat?

⁸ Siusinnerusukkut Efesosimi kiffartornini pillugu Paulusi allappoq ‘sulilluarnissamut ammaanneqarluni periarfissaqarluarlunilu’. (1 Korinthimiut 16:8, 9) Sumununa ammaanneqartoq? Paulusip Efesosimi kiffartornerminik ingerlatsiinnarnera nutaarsiassap nuannersup siaruarterneqarneranik kinguneqarpoq. Eqqarsaatigeriakkit Kolosse, Laodikea Hierapolisilu, illoqarfiit pingasut Efesosimit tiffasinnerusut. Paulusi illoqarfinnut taakkununnga tikeraarsimanngilaq, nutaarsiassarli nuannersoq illoqarfinnut taakkununnga annguppoq. Epafrasi taavanimiuuvoq. (Kolossemiut 2:1; 4:12, 13) Epafrasi Paulusip Efesosimi oqaluussinera tusarnaareerlugu kristumiunngorpa? Biibilimi tamanna allaatigineqanngilaq. Epafrasilli nunamini sallusuissut siaruarteramiuk, Paulusimit tusakkani ingerlateqqissimagunarpai. (Kolossemiut 1:7) Aamma kristumiut tusarliussaat ukiuni Paulusip Efesosimi nalunaajaaffigisaani  illoqarfinnut soorlu Filadelfiamut, Sardesimut Thyatiramullu anngussimasinnaavoq.

9. (a) Paulusip suna kissaatigingaarpaa? (b) Ukiumut 2009-mut allassimaffik suussava?

⁹ Taamaattumik utoqqaanertat Efesosimeersut Paulusip oqaasiisa ukua ilumoornerat uppernarsarsinnaavaat: “Uanga nammineq inuunera pingaartinngilara naammagalugu naammassisinnaagukkit arpannera kiffartuullu Naalakkamit Jiisusimit pisara, tassa Guutip saammaanneranik iivangkiiliumik nalunaajaatiginninneq [nutaarsiassamik nuannersumik peqqissaartumik nalunaajaatiginninneq, NV].” Versimi tamatumaniippoq ukiumut 2009-mut allassimaffik kaammattuutaallunilu kajumissinartoq una: ‘Nutaarsiassaq nuannersoq peqqissaartumik nalunaajaatigisiuk.’ — Apustilit Suliaat 20:24, NV.

Ullumikkut peqqissaartumik nalunaajaasoqarpoq

10. Qanoq ililluta nalunngilarput uagut peqqissaartumik nalunaajaasussaalluta?

¹⁰ Inunnut oqaluusseqqusissut ‘peqqissaartumillu nalunaajaaqqusissut’ apustilinuinnaanngitsoq peqqussutaavoq. Jiisusip makititaasimasup ajoqersukkat Galilæami katersorsimasut, 500-ugunartut, oqaluffigigamigit ima peqquai: “Taamaattumik aallaritsi inunnillu inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqani kuillugit, ajoqersorlugillu ilissinnut peqqussutikka tamaasa maleruaqqullugit.” Peqqussut tamanna kristumiunut ilumoortunut tamanut atuuppoq, soorlu Jiisusip oqaasiini ukunani ersertoq: “Ata, ullut tamaasa najorpassi pissutsit aaqqissuussaanerata naggatissaanut allaat.” — Matthæusi 28:19, 20, NV.

11. Suliaq pingaarutilik suna Jehovap Nalunaajaasuisa ilisimaneqaatigaat?

¹¹ Kristumiut aallussilluartut peqqussut tamanna naalattuarpaat; ‘nutaarsiassamik nuannersumik peqqissaartumik nalunaajaatiginninnissartik’ ilungersuutigaat. Tamatuminnga nalunaajaatiginneriaaseq pingaarneq tassaavoq Paulusip utoqqaanertanut Efesosimiunut eqqaasaa — illumit illumut oqaluussineq. Atuakkami 2007-imeersumi ajoqersuiartortitatut sunniuteqarluartumik suliaqarnermut tunngasumi David G. Stewart, inuusunneq, ima oqarpoq: “Jehovap Nalunaajaasuisa atoriaannaasumik aalajangersimasumillu ilinniartinneqartarnerat ilagiinnut ilaasortaasut ajoqersuiartortitatut suleqataanissamut kaammattornissaannut [oqaluffimmi oqaluttarfimmiit kajumissaarutininngarnit] timitalerneqanngitsunit eqqarsaatersuutaannaasunillu sunniuteqarnerungaarsimavoq. Jehovap Nalunaajaasuisa ilarpassuisa upperisartik pillugu allanut oqaluttuarneq nuannarinerpaasaasa ilagaat.” Tamanna qanoq kinguneqarsimava? Atuakkiortoq ima oqaluttuarpoq: “1999-imi illoqarfiit pingaarnersaanni marlunni Europap Kangisissuaniittuni apersukkama 2-4 procentiinnaat ajoqersuiartortitanit ‘mormonininngaanneersunit’ pulaarneqarsimanerarput. Taakkua 70 procentii sinnerlugit Jehovap Nalunaajaasuisa ilaannit, allaat arlaleriarlutik, saaffigineqarsimanerarput.”

12. (a) Sooq inuit angalaarfigisartakkatsinniittut ‘arlaleriarluta’ kasuttorfigisarpavut? (b) Tusarliussatsinnut isiginnittaatsiminnik allannguisimasumik oqaluttuarisaqarsinnaavit?

¹² Immaqa aamma inuit illit najukkanni taama misigisaqarsimassapput. Qularnanngitsumillu illit taamatut ‘saaffiginnittartunut’ ilaavutit. Illit illumit illumut kiffartorninni inuit ‘saaffigigaangakkit’ angutit, arnat inuusuttullu matuisa silataanni oqaloqatigisarpatit. Ilaat “arlaleriarlutik” kasuttorfigineqaraluarlutik tusarnaarneq ajorput. Allat immaqa illit allassimaffimmik atuffassininni Biibilimulluunniit tunngasunik nassuiaaninni tusarnaarluarneq ajorput. Allalli nalunaajaaffigilluarsinnaasimavatit, taakkualu tusarliussaq pigiliuppaat. Tamakku tamarmik pisinnaasarput ‘nutaarsiassaq nuannersoq peqqissaartumik nalunaajaatigigaangatsigu’. Soorlu nalugunanngikkit, inuppassuaqarpoq “arlaleriarlutik” kasuttorfigineqartaraluarlutik soqutiginnippiarneq ajortunik, taavali allanngortoqariataartarpoq. Immaqa taakkununnga imaluunniit asasaannut arlaannik pisoqarsimavoq isumamikkut uummatimikkullu sallusuissummut ammassutigisaannik. Maannalu taakku qatanngutigaavut. Taamaattumik uniinnaqinak, aamma kingullertigut  tusarnaarusuttunik ikittuinnarnik naapitaqarsimagaluaruit. Kikkut tamarmik sallusuissummiilernissaat naatsorsuutiginngilarput. Guutilli piumasaraa eqiasuilluta ilungersorlutalu peqqissaartumik nalunaajaatiginnittuarnissarput.

Kingunerit immaqa ilisimasaqarfiginngisavut

13. Nalunaajaanerput ilisimasaqarfiginngisatsinnik qanoq kinguneqarsinnaava?

¹³ Paulusip oqaluussinera inunnut kristumiunngornissamut ikiorsimasaanuinnaanngitsoq iluaqutaavoq; aamma uagut oqaluussinerput eqqarsaatigalugu taamaappoq. Illumit illumut oqaluusseqataajuarnissarput sapinngisamillu inunnut amerlanerpaanut peqqissaartumik nalunaajaanissarput pingaartipparput. Sanilivut, suleqativut, atuaqativut ilaquttavullu nutaarsiassaq nuannersoq pillugu oqaluttuuttarpavut. Qanoq kinguneqarumaarnera naluneq ajorparput? Allanik oqaloqatiginninnitta ilaat immaqa ingerlaannaq kinguneqarluartarput. Aamma imaassinnaavoq sallusuissutip naatsiiassartaa uninngagallartoq, taavali inuup uummataani sorlanittarpoq naajartulerlunilu. Taamatut pisoqanngikkaluarpalluunniit imaassinnaavoq oqaloqatigisatta ilaasa oqaaserisimasavut, upperisarput qanorlu pissusilersornerput allanut oqaluttuarigaat. Aap, immaqa sianiginagu naatsiiassanik taakkuninnga allami naajartortoqalernissaanut periarfisseeqataasarput.

14, 15. Qatanngutip angutip oqaluussinera qanoq kinguneqarpa?

¹⁴ Ryanip nuliatalu, Mandip, Floridami USA-miittumi najugallit, qanoq misigisaqarsimanerat eqqarsaatigeriaruk. Ryanip suliffimmini suleqatimi ilaat torrutiinnarlugu oqaluussiffigaa. Angutip taassuma, hindusiortutut peroriartorsimasup, Ryanip atisalersoriaasia oqaloriaasialu ajasoorutigai. Ryanip makititaanissaq toqusullu qanoq pisarnerat ilaatigut oqaluuserai. Januaarimi unnuit ilaanni angutip nuliani, Jodi, aperaa Jehovap Nalunaajaasui pillugit sunik ilisimasaqarnersoq. Taanna katuuliuvoq, oqarporlu Jehovap Nalunaajaasui pillugit ilisimasatuani tassaasoq “matumiit matumut oqaluussisarnerat”. Taava Jodip “Jehovap Nalunaajaasui” internettikkut ujarliummut allappaa, nittartagarpullu www.watchtower.org nanivaa. Jodi qaammatini arlalinni nittartakkami tassani atuagassanik atuartarpoq, ilaatigut Biibilimik allaaserisanillu soqutiginartitaminik.

¹⁵ Ilaanni Jodi Mandilu imminnut naapipput, marluullutik peqqissaasuugamik. Mandip Jodip apeqqutaanik akisinini nuannaarutigaa. Tamatuma kingunerileraa Jodi Mandilu Biibilimut tunngasunik oqaloqatigiissuataarput. Jodi Biibilimik atuaqqissaaqatigineqarnissamik neqeroorummut akuersivoq. Sivitsunngitsoq naalagaaffilersaarfimmukartalerpoq. Oktobarimi Jodi oqaluussisartunngorpoq kuisimanngitsoq, februaarimilu kuisippoq. Ima allappoq: “Maanna sallusuissut paasereerlugu inuunera nuannersisupilussuullunilu imaqarlualerpoq.”

16. Qatanngutip Floridamiup misigisimasaa peqqissaartumik nalunaajaanitta kingunerisinnaasai pillugit sumik paasisaqarfigaarput?

¹⁶ Ryanip naluaa allamut oqaluussinini allap sallusuissummik paasinninneranik kinguneqarumaartoq. Taassumali soorunami paasivaa ‘peqqissaartumik nalunaajaanissaminik’ aalajangiusimanninnini qanoq kinguneqarnersoq. Imaassinnaavorli illit matup silataani, suliffimmi, atuarfimmi torrutiinnarluguluunniit oqaluussisutit, taamaalillunilu sallusuissut illit nalulluinnakkannik inunnut allanut annguttoq. Soorlu Paulusip ‘nunap immikkoortuani Asiami’ oqaluussinermi qanoq inerititaqartiginera nalugaa, illittaaq peqqissaartumik nalunaajaanerit kinguneqarluassanersoq ilisimajuaannarsinnaanngilat. (Atuakkit Apustilit Suliaat 23:11; 28:23). Peqqissaartumilli nalunaajaajuarnissat pingaaruteqaqaaq!

17. 2009-mi sunissat aalajangiusimaviuk?

¹⁷ Qanortoq tamatta 2009-mi illumit illumut allatigullu oqaluussineq eqqarsaatigalugu uagutsinnut suliassiissutigineqartoq pimoorukkisigu. Taava Paulusitut ima oqarsinnaassagaluarpugut: “Uanga nammineq inuunera pingaartinngilara naammagalugu naammassisinnaagukkit arpannera kiffartuullu Naalakkamit Jiisusimit pisara, tassa Guutip saammaanneranik iivangkiiliumik nalunaajaatiginninneq [nutaarsiassamik nuannersumik peqqissaartumik nalunaajaatiginninneq, NV].” (w08 12/15-E)

Qanoq akissavit?

• Ukiuni hundredelinni siullerni apustilit Petrusi Paulusilu allallu peqqissaartumik qanoq nalunaajaasarpat?

• Sooq oqaluussinerput ilimagisatsinnit sunniuteqarnerungaarsinnaava?

• Ukiumut 2009-mut allassimaffik suua, aamma sooq naleqqussoraajuk?

[Atuaqqissaarnermi apeqqutit]

[Qupp. 27-mi issuagaq]

Ukiumut 2009-mut allassimaffik imaappoq: ’Nutaarsiassaq nuannersoq peqqissaartumik nalunaajaatigisiuk.’ — Apustilit Suliaat 20:24, NV.

[Qupp. 25-mi assiliartaq]

Utoqqaanertat Efesosimiut nalunngilaat Paulusi illumit illumut oqaluussisartoq

[Qupp. 26-mi assiliartaq]

Illit peqqissaartumik nalunaajaanerit qanoq sunniuteqartigissava?