Saqqummersitanit pingaarnersat — imm. 1
Jehovap oqaasia uumavoq
Saqqummersitanit pingaarnersat — imm. 1
APUSTILI Johannesi utoqqalisimasoq qeqertami Patmosimi parnaarussaaqqatilluni 16-inik assigiinngitsunik takorruuisinneqarpoq. Takorruukkani taakkunani Jehova Guuti Jiisusilu Kristusi Naalakkap ulluata ingerlanerani — Guutip naalagaaffiata 1914-imi pilersinneqarneranit Kristusip ukiuni tusindini naalakkersuinerata naanissaata tungaanut — sunik suliaqarnersut takuaa. Saqqummersitani, ukiup 96-ip missaani Johannesimit allagaasuni, takorruukkat taakku pissanganartumik allaaserineqarput.
Saqqummersitat 1:1–12:17-imit pingaarnersat, Johannesip takorruugaanik arfineq-marlunnik siullernik imallit, matumani allaatigineqarput. Takorruukkat taakku uagutsinnut soqutiginaateqarput ullumikkut silarsuarmi pisunut tunngagamik Jehovallu qanittukkut qanoq akuliukkumaarneranik paasinarsisitsigamik. Aap, takorruukkat taakku pillugit oqaluttuanik atuartoq taakkuninngalu upperinnittoq tuppallersarneqarlunilu qiimmassarneqassaaq. — Hebræerit 4:12.
“SAVAAQQAP” NAQISSUTIT ARFINEQ-MARLUK ILAAT ARFINILLIT PEERPAI
Johannesip siullermik Jiisusi Kristusi naalannarsisitaasimasoq takuaa, arlalinnillu tusarlerneqarpoq ‘mappersakkamut allatassaminik ilagiissoqatigiinnullu arfineq-marluusunut nassiussassaminik’. (Saqqummersitat 1:10, 11) Taava issiavissaarsuarmik qilammiittumik takorruugaqarpoq. Issiavissaarsuarmi issiasup talerpimminik tigummivai mappersakkat arfineq-marlunnik naqissusersimasut. ‘Mappersakkanillu taakkuninnga mappiinissamut qinngaqqunnanngitsoq’ allaasinnaanngilaq “løveq Judamit naggueqartoq”, imaluunniit ‘savaaraq arfineq-marlunnik nassulik arfineq-marlunnillu isilik’. — Saqqummersitat 4:2; 5:1, 2, 5, 6.
Takorruukkat pingajuanni “Savaaqqap” naqissutit arfinillit ataasiakkaarlugit piiarmagit qanoq pisoqarnera qulaarneqarpoq. Naqissutit arfernat peerneqarmat nuna sajuttorsuanngorpoq, ullorlu kamangaarfik nalliuppoq. (Saqqummersitat 6:1, 12, 17) Takorruukkamili tulliuttumi Johannesip takuai ‘inngilit sisamat nunarsuup anoraanik sisamanik noqitsisut’ 144.000-inik naqissusiinerup naammassineqarnissaata tungaanut. Naqissuserneqanngitsut ‘amerlangaartut’ ‘issiavissaarsuup sioraani Savaaqqallu saavani qeqarput’. — Saqqummersitat 7:1, 9.
Allassimaffiit pillugit apeqqutinut akissutit:
1:4; 3:1; 4:5; 5:6 — Oqariartaaseq “anersaat arfineq-marluk” qanoq isumaqarpa? Kisitsit 7 Guutip isaani naammalluinnassutsimut assersuutaavoq. Taamaattumik “ilagiissoqatigiinnut arfineq-marluusunut” tusarliussaq pingaarnerpaamik Guutip innuttaanut tamanut nunarsuaq tamakkerlugu ilagiinni 100.000-init amerlanerusuniittunut atuuppoq. (Saqqummersitat 1:11, 20) Jehova naammasserusutaminut naapertuuttumik anersaamik illernartumik tunisisarmat, oqariartaaseq “anersaat arfineq-marluk” anersaap illernartup siulittuummik eqqumaffiginnittunik tamanik paasinnitsitsinissamut pilluaqqusinissamullu sunniuteqaqataalluinnartarneranut nassuiaataavoq. Kisitsit 7 Saqqummersitani pingaaruteqarpasippoq. Kisitsit taanna naammalluinnassutsimut assersuutaavoq, aamma allakkat taakku ‘Guutip anngigisaata naammassineqarneranut’ tunngapput. — Saqqummersitat 10:7.
1:8, 17 — Taaguutit “Alfa aamma Omega” aamma “siulliullunilu kingulliusoq” kikkunnut tunngappat? Alfa grækerit naqinnerisa tulleriinneranni naqinnerit siullersaraat Omegalu kingullersaralugu. Taaguut “Alfa aamma Omega” Jehovamut tunngavoq, taassumalu siornatigut ajugaqanngitsumik Guuteqarsimannginneranut aamma taassuma kingornatigut ajugaqanngitsumik Guuteqarnaviannginneranut erseqqissaataavoq. Taanna ‘aallaqqaataallunilu naggataavoq’. (Saqqummersitat 21:6; 22:13) Jehova siuleqaranilu kinguleqannginnera pissutigalugu Saqqummersitat 22:13-imi ‘siulliullunilu kingulliusutut’ eqqartorneqaraluartoq, Saqqummersitani kapitalimi siullermi versit ataqatigiinnerini erserpoq matumani taaguut “siulliullunilu kingulliusoq” Jiisusi Kristusi pillugu atorneqartoq. Taanna tassaavoq inuk toqujuilluni anersaatut inuunermut makititaaqqaartoq Jehovallu nammineq makititaa kingulleq. — Kolossemiut 1:18.
2:7 — ‘Guutip Paratiisia’ suua? Oqaatsit taakku kristumiunut tanitanut tunngagaluartut, paratiisi matumani eqqartorneqartoq silarsuarmut paratiisiusumut qilammiittumut — Jehovap eqqaaniittumut — innersuussutaavoq. Tanitat aalajaatsut “orpimmit inuunartumit” nerineq akissarsiarissavaat. Toqujuissusermik tunineqassapput. — 1 Korinthimiut 15:53.
3:7 — ‘Daavip matuersaataa’ Jiisusip qanga pivaa, matuersaallu qanoq atorpaa? Jiisusi ukiumi 29-mi kuisinnermini Daavip kinguaavini kunnginngortussatut toqqarneqarpoq. Aatsaalli ukiumi 33-mi taassuma ‘Daavip matuersaataa’ pivaa qilammi Guutip talerpiata tungaanut qutsissisinneqarami. Tassani pisinnaatitaaffiit Daavip naalagaaffianut attuumassuteqartut tamaasa kingornuppai. Taamanimiilli Jiisusip matuersaat Guutip naalagaaffianut tunngatillugu periarfissanik immikkullu pisinnaatitaaffinnik ammaanermut atortarpaa. 1919-imi Jiisusip “inussiaq aalajaallunilu silatooq” (NV) ‘Daavip illuata matuersaataanik’ isumaginnittussanngortippaa, inussiaqatigiit taakkua “pigisaminut tamanut” paarsisunngortinnerisigut. — Esaja 22:22; Matthæusi 24:45, 47.
3:12 — Jiisusip ‘atia nutaaq’ suua? Ateq taanna Jiisusip atorfianut nutaamut immikkullu pisinnaatitaaffiinut nutaanut tunngassuteqarpoq. (Filippimiut 2:9-11) Jiisusip atermik tamatuminnga ilinniarneratut ilinniartoqanngilaq, taassumali ateq taanna qatanngutiminut aalajaatsunut qilammiittunut allappaa, taamaalillutillu taakku taassumunnga qanittumik attaveqalerlutik. (Saqqummersitat 19:12) Allaat Jiisusip taakku immikkut pisinnaatitaaffigisaminik ilangiisippai.
Ilinniarfigisinnaasavut:
1:3. ‘Piffissaq [Guutip Saatanip silarsuaanut eqqartuussutaasa naammassineqarfissaat] qanimmat’, tusarliussamik Saqqummersitaniittumik paasinninnissaq taannalu malillugu iliornissaq nukinginnarpoq.
3:17, 18. Anersaakkut pisuujusinnaajumalluta Jiisusi “kuultimik innermik akuiakkamik” pisiffigisariaqarparput. Taamaaliorsinnaavugut ajunngitsulianik pisuussuteqarniarluta ilungersornitsigut. (1 Timotheusi 6:17-19) “Atisassanik qaqortunik” Jiisusimut Kristusimut ajoqersugaanitsinnut ilisarnaataasunik atisisariaqarpugut ‘isinullu tarnutissaq’ atortariaqarlugu, soorlu Napasuliaq Alapernaarsuiffik-mi siunnersuutigineqartut atorlugit, taamaalillutalu anersaakkut naliliilluarsinnaassuseqalerluta. — Saqqummersitat 19:8.
7:13, 14. Utoqqaanertat 24-t 144.000-inut qilammi naalannassuseqartunut assersuutaapput, qilammilu kunngiuinnaratik aamma palasiupput. Itsaq Israelimi palasit, kunngip Daavip nikittaattartoqatigiinnut 24-nut aaqqissugai, utoqqaanertanut 24-nut assersuutaapput. Utoqqaanertat ilaata Johannesi paasitippaa amerlangaartut kikkuunerat pillugu. Taamaattumik kristumiunik tanitanik makititsineq 1935 sioqqullugu aallartissimassaaq. Sooq? Amerlangaartut kinaassusiviat ukioq taanna Guutip kiffaanut tanitanut saqqummiunneqarmat. — Lukasi 22:28-30; Saqqummersitat 4:4; 7:9.
NAQISSUTIT ARFINEQ-AAPPAAT PEERNEQARPOQ KINGORNALU QARLORTAATIT ARFINEQ-MARLUK SUPINEQARLUTIK
Savaaqqap naqissutit arfineq-aappassaat peerpaa. Qarlortaatit arfineq-marluk inngilinut arfineq-marlunnut tunniunneqarput. Inngilit taakkua ilaasa arfinillit qarlortaatitik supivaat inuiaat ‘pingajorarterutaannut’ — kristumiuunerartunut — eqqartuussutit nalunaarutiginiarlugit. (Saqqummersitat 8:1, 2, 7-12; 9:15, 18) Tassa Johannesip takorruugaasa tallimaat. Takorruukkami tulliuttumi nammineq peqataavoq, takorruukkami mappersakkamik nerilluni naalaffillu uuttortarlugu. Qarlortaatit arfineq-aappaat supineqarmat nipitoqisumik ima nalunaartoqarpoq: “Silarsuarmi naalagaassuseq Naalakkatta tanitaatalu maanna pigilerpaat.” — Saqqummersitat 10:10; 11:1, 15.
Takorruukkat arfineq-aappassaanni Saqqummersitat 11:15, 17-imi allassimasut annertunerusumik nassuiarneqarput. Nalunaaqut angisooq qilammi takussaavoq. Arnaq qilammiusoq ernertaarpoq. Diaavulu qilammit anisitaavoq. Taassuma arnaq kamaappaa taamaattumillu qimagulluni ‘qitornai allat sorsuffiginiarlugit’. — Saqqummersitat 12:1, 5, 9, 17.
Allassimaffiit pillugit apeqqutinut akissutit:
8:1-5 — Sooq qilammi nipaalliva, tamatumalu kingorna suna nunarsuarmut iginneqarpa? Assersuutaasumik qilammi nipaallivoq nunarsuarmi ‘illernartut qinnutaat’ tusarneqarsinnaaniassammata. Tamanna pivoq sorsunnersuup siulliup naalernerani. Kristumiut tanitat guutimik nalusut ullussaasa naalerneranni qilalianngillat, soorlu taakkua ilarpassuisa tamanna naatsorsuutigisimagaluaraat. Sorsunnerup nalaani erloqinartorsiorput. Taamaattumik Guuti qamannga pisumik qinnuigaat siulersoqqullutik. Qinnutaannut akissutitut inngilip inneq assersuutaasoq nunarsuarmut igippaa, tanitallu tamanna anersaakkut kajumississutigaat. Ikittuaraannaapput, Guutilli naalagaaffia pillugu akerleriissutaangaalersumik silarsuaq tamakkerlugu oqaluussinermik immikkut suliniuteqalerput taamaalillutillu kristumiuuneraqatigiinni ‘ikuallatsitsilerlutik’, imaluunniit akerleriissitsingaalerlutik. Kallerpalunnertut ittunik Biibilimeersunik mianersoqqussuteqarpoq, sallusuissutit Biibilimeersut innaallannertut ittut nalunaarutigineqarput, upperisarsiornerit eqqunngitsut tunngavimmikkut sajutsinneqarpullusooq, soorlu illut nunap sajunneranit sajutsinneqartartut.
8:6-12; 9:1, 13; 11:15 — Inngilit arfineq-marluk qarlortarnissaminnut qanoq piareersarpat, aamma qanga qanorlu qarlortaatitik supivaat? Inngilit qarlortaatinik arfineq-marlunnik qarlortarnissamut piareersarnerannut ilaavoq katersanut Johannesitut ittunut inuummarissiteqqinneqarsimasunut ilaasortaasunik 1919-imiit 1922-mut nunarsuarmiittunik siunnersuineq. Tanitat taakkua tamanut kiffartuuteqarnermik aaqqissuusseqqinneq naqiterisarfimmillu ineriartortitsineq ulapputigaat. (Saqqummersitat 12:13, 14) Qarlortaatinik supisisoqarnera Guutip innuttaasa inngilinik suleqateqarlutik Jehovap Saatanip silarsuaanut eqqartuussutaanik siooranatik oqaluussissutiginninnerannut assersuutaavoq. Pingaartumik 1922-mi Cedar Pointimi Ohiomiittumi ataatsimeersuartoqarneraniilli oqaluussisoqartalerpoq, oqaluussinerlu annikilliornartussarsuup tungaanut ingerlaannassaaq.
8:13; 9:12; 11:14 — Qarlortaatinik supisinerit kingulliit pingasut ‘eqqanaartuutinut’ imaluunniit ‘eqqanaarnartunut’ (1936) qanoq attuumassuteqarpat? Qarlortaatinik supisinerit sisamat siulliit kristumiuunerartut anersaakkut toqunganerannik qulaarinerusut, qarlortaatinik supisinerit pingasut kingulliit eqqanaarnartunut attuumassuteqarput pisimasunut aalajangersimasunut tunngassuteqaramik. Qarlortaammik supisinerit tallimaat Guutip innuttaasa 1919-imi susinnaajunnaarnerup ‘itinersuanit’ annaanneqarnerannut oqaluussiuarnerannullu kristumiuunerartunut anniaataangaartutut ittumut attuumassuteqarpoq. (Saqqummersitat 9:1) Arfernat oqaluttuarisaanermi hesterluni saassussinerit sakkortunersaannut silarsuarlu tamakkerlugu oqaluussinermi immikkut suliniuteqarnermut 1922-mi aallartinneqartumut tunngassuteqarpoq. Qarlortaammik supisinerit kingullersaat naalagaaffiup Missiarsikkoortup pilersinneqarneranut tunngassuteqarpoq.
Ilinniarfigisinnaasavut:
9:10, 19. Atuakkat atuagassiallu Biibilimik tunngaveqartut ‘inussiap aalajaallunilu silatuup’ saqqummersittagai oqaaseqaatinik naalattarialinnik imaqarput kapinartunillusooq tusarliussartaqarlutik. (Matthæusi 24:45, NV) Tusarliussaq tamanna pillertanut ‘skorpionitut iguutilinnik’ pamiulinnut saassussisullu hestiinut ‘pulateriaarsuit assinginik pamiulinnut’ assinguvoq. Sooq? Atuakkani atuagassianilu taakkunani “ulloq [Jehovap] akiniaaffia” pillugu mianersoqqussuteqarmat. (Esaja 61:2) Sapiilluta aallussilluarlutalu tamakkuninnga agguaajuarta.
9:20, 21. Inuppassuit qanilaartut inuiaqatigiinni kristumiuunngitsunik taaneqartartuni inuusut tusarliussamut oqaluussissutigisatsinnut ajunngitsumik periartarput. Inuilli inuiaqatigiinnit kristumiuuneraqatigiit sunniuteqarfigisaannit pinngitsut, tassa “inuit amiakkuusut”, amerlasoorsuit isumataarnissaat naatsorsuutiginngilarput. Taamaakkaluartorli kiffartornermi pinertusaarpugut.
12:15, 16. “Nunap” — tassa Saatanip nammineq pissutsinik aaqqiissuussaaneranut ilaasut imaluunniit nunani assigiinngitsuni naalakkersuisut pissaanillit — upperisarsiornikkut kiffaanngissuseq illersorsimavaa. Pissaanillit taakkua 1940-kkunniilli “kuussuaq [tassa malersuineq] pulateriaarsuup qanerminit tissalutsitaa” ‘iisimavaat’. Jehovap, qaquguluunniit piumalleruni, naalakkersuisut oqartussaasullu sunnersinnaavai piumasaminik naammassinnitsillugit. Ussatit 21:1-imi naleqqulluartumik ima allassimasoqarpoq: “Kuunnguatut ippoq kunngip uummataa [Jehovap] assaani; piumasani malillugu aalajangertarpaa ingerlavissaa.” Tamanna Guutimut uppernitsinnut nakussatsissutaasariaqarpoq. (w09 01/15-E)