Sooq assuarnaattuartariaqarpit?
Sooq assuarnaattuartariaqarpit?
“[Jehova], eqqartuunnga . . . assuarnaassusera uanniittoq missiliorlugu.” — TUSSIAAT 7:9, 1900.
1, 2. Pissutsinik nalinginnaasunik kristumiup assuarnaassusianut misilinneqaataasinnaasunik eqqaasaqarit.
PISIMASUT pingasut uku takorlooriakkit: Nukappiaraq atuaqatimi ilaannit avatangerneqarsimavoq. Atuaqataasa imminut naalakkersinnaajunnaartinniarsaraat, immaqa oqaasipilutsinniarsaralugu paannitsinniarsaraluguluunniit. Qanoq piva? Akiniaava imminulluunniit noqippa ingerlallunilu? Ataataasoq kisimiilluni angerlarsimavoq internettikkullu misissuilluni. Qarasaasiap skærmiani igalaasaq nuivoq nittartakkamut kinguaassiuutitigut inuunerlunnermut tunngasunik assitalimmut innersuussutitalik. Ussernartorsiulerpa nittartagarlu ammarlugu, imaluunniit taamaaliornaveersaarpa? Arnap kristumiup qatanngutit arnat allat oqaloqatigerujoorpai, oqaloqatigiissutigineqartulli nuanniillipput taakkua qatanngut arnaq ilagiinniittoq ajortumik oqaluuserilermassuk. Taamatut oqalunnerannut ilanngutissava, imaluunniit allanik oqaloqatigiissuteqarniarsarilerpa?
2 Pisimasut pingasut taakku assigiinngillat, assigiissuteqarpulli. Taakku tamarmik kristumiutut assuarnaattuarniarluni akiuunnermut tunngapput. Isumakuluutigisannut, pisariaqartitannut inuunermilu anguniakkannut tunngatillugu assuarnaassutsit eqqarsaatigisarpiuk? Inuit ulluinnarni isikkortik, peqqissusertik, inuussutissaqarniarnerup unamminiarnartui, ikinngutitillu ikinngutigiinnermik qanoq ingerlanerat, immaqalu allaat ajuutigisartik eqqarsaatigisarpaat. Tamakku tamaasa immaqa sammingaatsiartarpavut. Jehovalli uummativut misissuiffigigaangamigit pingaartumik suna soqutigisarpaa? (Tussiaat 139:23, 24) Assuarnaatsuunersugut misissortarpaa!
3. Jehovap immikkut ittumik sumik aalajangigassippaatigut, allaaserisamilu matumani suna sammissavarput?
3 Jehovap, “tunissutit ajunngitsut naammalluinnartuusullu tamarmik” pilerfiata, tamatta tunissutinik assigiinngitsunik tunisimavaatigut. (Jaaku 1:17) Taassumannga timilerneqarsimanerput, silaqassusilerneqarsimanerput assigiinngitsunillu piginnaanilerneqarsimanerput qujamasuutigeqaarput. (1 Korinthimiut 4:7) Assuarnaatsuuniarnerlutali nammineq aalajangigassaraarput. (5 Mosesi 30:19) Taamaattumik assuarnaassuseq qanoq paasisariaqarnersoq misissortariaqarparput, aamma pissuserineqartussap tamatuma nalissaqanngilluinnarneranut pissutaasut pingasut sammissavavut.
Assuarnaassuseq qanoq paasisariaqarpa?
4. Assuarnaassuseq qanoq paasisariaqarpa, uumasunillu pilliutinut tunngatillugu Jehovap inatsisaa sumik ilinniarfigaarput?
4 Inuppassuit isumaqarput assuarnaassuseq unneqqarissusermik isumaqartoq. Unneqqarissuseq pingaaruteqarpoq, pissuserli taanna pissuserineqartussanut assuarnaassutsimut tunngasunut ilaaginnarpoq. Biibilimi oqaatsit ‘assuarnaassuseq’-mik nutserneqartut ileqqussanut tunngatillugu ‘tamarmiussusermik’ isumaqarput. Oqaaseq hebræerisooq taanna aamma ‘peqqissumik, tamarmiusumik, innarluuteqanngitsumillu’ isumaqarpoq, oqaatsillu taakkua ilaat Jehovamut pilliutigineqartut pillugit atorneqartarsimavoq. Uumasoq pilliutigineqartoq aatsaat peqqissuullunilu innarluuteqanngikkaangat Guutip akuerisarsimavaa. (Atuaruk 3 Mosesi 22:19, 20). Jehovap uumasunik tusiattunik, innarluutilinnik tappiitsunilluunniit pilliuteqarnermikkut peqqussutiminik tamatuminnga piaaralutik sumiginnaasut sukannersumik naqqittarpai. — Malaki 1:6-8.
5, 6. (a) Assersuutini suni erserpa ilaannakuunngitsunik tamarmiusunillu pingaartitsigajuttartugut? (b) Assuarnaatsuujumalluni naammalluinnartuusariaqarpa? Nassuiaruk.
5 Inuit ilaannakuunngitsunik, ilivitsunik tamarmiusunillu ujaasillutillu pingaartitsisarnerat qaqutigoortuunngilaq. Takorlooriaruk atuakkanik katersuisartoq sivisuumik ujaasereerluni atuakkamik akisuumik nanisisoq, paasilerpaali atuakkami quppernerit pingaarutillit arlallit amigaataasut. Pikkunaatsoorluni atuagaq ilitsivimmut ileqqippaa. Imaluunniit takorlooriaruk arnaq sissaq sinerlugu pisuttuartoq, uillut qaleruaannik mallit sissamut tipitissimasaannik katersuiitigaluni. Pinngortitat taakku alutoralugit peqillattaavoq katersorniarlugit misissorniarlugillu. Sorliit pigiinnassavai? Kusanarnerit ilivitsullu. Taamatuttaaq Guuti inunnik tamarmiusunillusooq — uummatikkut iluunngarlutik imminik asannittunik — ujaasisarpoq. — 2 Nalunaarsuutit 16:9.
6 Immaqa illit eqqarsarputit assuarnaatsuujumalluni naammalluinnartuusariaqarnersoq. Ajorti naammalluinnanngissuserlu pissutigalugit immaqa atuakkamut quppernernik amigaateqartumut uillulluunniit qaleruaanut innarlerneqarsimasumut eqqaanapajaartutut imminut isigeqqajaasarpugut. Illit ilaannikkut taama misigisarpit? Qularutigissanngilat Jehovap tamakkiisumik naammalluinnarnissat piumasarinngikkaa. Sapikkatsinnik piumaffiginngisaannarpaatigut. * (Tussiaat 103:14; Jaaku 3:2) Assuarnaattuarnissarpulli piumasaraa. Naammalluinnartuuneq assuarnaattuunerlu assigiinngissuteqaramik? Aap. Assersuuteqariarta: Angutip inuusuttup arnaq inuusuttoq katitassani asavaa. Naammalluinnartuunissaa piumasariguniuk sianiilliussaaq. Silatusaassaarli taassuma imminik uummatikkut iluunngarluni asanninnissaa, tassa imminerminiinnaq aappassamisut asanninnissaa, piumasariguniuk. Tamatumunnga assingusumik Jehova ‘Guutiuvoq tunniusimalluinnarfigineqarnissaminik piumasarinnittoq’. (2 Mosesi 20:5, NV) Piumasarinngilaa naammalluinnartuunissarput, piumasaraali uummatikkut iluunngarluta asassagitsinni kisimilu pallorfigissagitsinni.
7, 8. (a) Assuarnaatsuunermut tunngatillugu Jiisusi qanoq maligassiuiva? (b) Assuarnaattuarneq Biibili naapertorlugu qanorpiaq paasisariaqarpa?
7 Jiisusip Mosesip inatsisaani suna pingaaruteqarnerpaanersoq aperineqarami akissutaa immaqa eqqaavarput. (Atuaruk Markusi 12:28-30). Jiisusip apeqqut akiinnarnagu aammattaaq oqaaserisani malillugit inuuvoq. Isumakkut, uummatikkut tarnikkullu iluunngarluni nukiillu tamakkerlugit Jehovamik asanninnermut tunngatillugu taanna maligassiuilluarnerpaavoq. Ersersippaa assuarnaassutsip oqaatsitiguinnaanngitsoq aammali minguitsumik pissutiginiagaqarluni ajunngitsumik iliuuseqarnikkut ersersinneqartarnera. Assuarnaattuassagutta Jiisusip tumaanik atuaanissarput pisariaqarpoq. — 1 Petrusi 2:21.
8 Tassa assuarnaassutsip Biibili naapertorlugu isumarpiaa tassaavoq: Kinaassusilimmut qilammiittumut ataasiinnarmut, Jehovamut Guutimut taassumalu piumasaanut siunertaanullu uummatikkut iluunngarluni tunniusimaneq. Assuarnaattuarneq ulluinnarni inuunitsinni pingaarnerpaamik Jehovamit Guutimit iluarisaaniarnertut paasisariaqarpoq. Taassuma pingaarnerutitai inuunitsinni pingaarnerpaassapput. Tamatuma taama pingaaruteqartigineranut pissutaasut pingasut misissoriartigit.
1. Assuarnaassuserput Jehovallu kisimi oqartussaanera pillugu akerleriissut
9. Uagut nammineq assuarnaassuserput Jehovallu qilammi nunamilu kisimi oqartussaanera pillugu akerleriissut qanoq imminnut attuumassuteqarpat?
9 Uagut assuarnaassuserput Jehovap kisimi oqartussaassusianut, naalakkersuisinnaatitaaneranut, aalajangiisuunngilaq. Taanna eqqortumik kisimi oqartussaavoq; naassaanngitsumik qilammi nunamilu kisimiilluni oqartussaasuuvoq. Taamaattuassaaq, pinngortitat suulluunniit qanorluunniit oqaraluarpata ilioraluarpatalu. Kisimili oqartussaanera qilammi nunarsuarmilu sorraannerpaamik apeqquserneqarpoq. Taamaattumik naalagaassusia pinngortitat sianissusillit tamarmik takkuanni qutsissisinneqartariaqarpoq — naapertuilluartutut, naleqquttutut asanninnermullu ersiutaasutut aalajangersarneqarluni. Jehovamut nalunaajaasuugatta tusarnaarusuttunik tamanik Guutip qilammi nunamilu kisimi oqartussaanera pillugu oqaloqateqarneq nuannaraarput. Akerleriissumili tamatumani uagut nammineq qanoq isummersinnaavugut? Qanoq ililluta ersersissinnaavarput Jehova uagutsinnut kisimi oqartussaalluni Naalagaasutut toqqarlutigu? Assuarnaattuarnitsigut!
10. Saatani inuit assuarnaassusiannut tunngatillugu qanoq unnerluutiginnissuteqarpa, unnerluutiginnissutaalu qanoq akerusuppiuk?
10 Eqqarsaatigeriaruk illit nammineq assuarnaassutsit matumani qanoq akuliunneqarnersoq. Saatani Jehovap kisimi oqartussaaneranik illersuiumasunik, namminissarsiornani asanninneq kajumississutigalugu taassumunnga kiffartorumasunik inoqannginneraavoq. Diaavulup pinngortitarpassuit anersaajusut katersorsimasut tusaatillugit Jehova ima oqarfigaa: “Ameq amermik naleqararaaq! Inuummi pigisani tamaasa akigeriaannaasarpai inuunini annaajumanagu.” (Jobi 2:4) Maluginiaruk Saatanip oqaatsini asissuerpaluttut angummut naapertuilluartumut Jobimuinnaanngitsoq, inunnulli tamanut, tunngatikkai. Taamaattumik Saatani ‘qatanngutitta unnerluutiginnittaattut’ Biibilimi taaneqarpoq. (Saqqummersitat 12:10) Taassuma Jehova mitaatigaa aalajaattuarumasunik kristumioqannginnerarlugu — tassa aamma illit aalajaattuarumannginnerarlutit. Saatanip illit imminut annaakkumallutit Jehovamik qimatsissanerarpaatit. Taamatut unnerluutigineqarnerit qanoq isumaqarfigaajuk? Saatanip sallutunerata uppernarsarnissaanut periarfissaqarusupputit, ilaa? Assuarnaattuarnikkut tamatumunnga periarfissaqalersinnaavutit!
11, 12. (a) Assersuutini suni erserpa ulluinnarni aalajangikkavut assuarnaassutsitsinnut atassuteqartut? (b) Sooq assuarnaattuarnissaq immikkut pisinnaatitaaffiua?
11 Assuarnaattuarumanerput apeqquserneqarmat ulluinnarni pissusilersornerput aalajangigassavullu taamaalillutik pingaaruteqalerput. Allaaserisap matuma aallaqqaataani oqaluttuarineqartut pingasut eqqarsaatigeqqeriakkit. Inuit pingasut taakku assuarnaattuarumagunik qanoq pissappat? Nukappiaraq atuaqatiminit qinngasaarneqartoq taakkua saapiloornissaannut ussernartorsiorsuataarpoq, oqaaqqissaarulli manna eqqaamavaa: “Nammineerlusi akiniaaqinasi, asasakka, Guutilli kamaassinera periarfississiuk — allassimasoqarmat: ‘Akiniut pigaara, uanga akiliiumaarpunga,’ oqarpoq [Jehova].” (Romamiut 12:19) Taamaattumik taakku qimappai. Uiusoq qarasaasiap saavani issiasoq atoqatigiinnermut tunngasunik isiginnaarsinnaagaluarpoq, najoqqutassiarli Jobip ima oqaatigisaa eqqaamavaa: “Isikka isumaqatigiissuteqarfigisimavakka niviarsiaq pileritsaallugu isigiumanagu.” (Jobi 31:1) Taamaammat assinik ileqqussatigut mamianartunik isiginnaarusunngilaq, taakkuli toqunartutullusooq isigalugit nigorsimaniarpai. Arnaq issiaqatimi akornanni oqaluuserinerluisumik tusagaqartoq imminut noqippoq kajumissaarut una eqqaallugu: “Tamatta immikkut eqqarsaatigissavavut tullitta iluaqutissaat ineriartornissaallu.” (Romamiut 15:2) Oqaluuserinerluisunut ilanngutiinnaruni tamanna ineriartuutaassanngikkaluarpoq. Qatanngutaa arnaq kristumiu tusaamanerlugaalissagaluarpoq, aamma Ataataata qilammiusup oqaluuserinerluisunut peqataanera iluarinavianngikkaluarpaa. Taamaattumik imminut naalakkerpoq allanullu tunngasunut saalluni.
12 Pisimasuni pingasuni taakkunani kristumiu ima aalajangerporlusooq: ‘Jehova Naalagaraara. Taassuma iluarisaanik iliorniarpunga.’ Aalajangerniarninni aamma illit Jehovamut iluarisaaniartarpit? Taamaaliortaruit kajumissaarut Ussatit 27:11-miittoq una ilumut naalassimassavat: “Ernera, ilisimasuuniarit taamalu uummatiga nuannaartillugu, mitallersikka akisinnaaniassavakka.” Jehovap uummataanik nuannaartitsisinnaaneq immikkut pisinnaatitaaffigaarput. Assuarnaattuarnissarput imminut akilersinnaalluarpoq, ilaa?
2. Guutip eqqartuussutaanut tunngaviusartut
13. Jobip Daavillu oqaasiini qanoq erserpa Jehova assuarnaassuseq tunngavigalugu uagutsinnik eqqartuussisartoq?
13 Tassa paasivarput assuarnaassuseq pissutigalugu Jehovap kisimi oqartussaassusianik tapersersuisinnaanngortartugut. Taamaammallu assuarnaassuserput Guutip uagutsinnik eqqartuussisinnaaneranut tunngaviuvoq. Jobip tamanna paasivaa. (Atuaruk Jobi 31:6). Jobip nalunngilaa Guutip inuit tamaasa “oqimaalutaavinni eqqortuni” oqimaalutartaraalusooq, naapertuilluarnermut najoqqutassiani naammalluinnartoq assuarnaassutsitsinnut uuttortaatigalugu. Daavi tamatumunnga assingusumik ima allappoq: “[Jehovap] inuiaqatigiit eqqartuussavai; [Jehova], eqqartuunnga iluarsusera missiliorlugu assuarnaassuseralu uanniittoq missiliorlugu. . . . Illit uummatinik tartunillu misiliisutit, Guutiusutit naapertuilluartoq.” (Tussiaat 7:9, 10, 1900) Nalunngilarput Guutip inuup ilorpiaaniittut takusinnaagai; “uummatinik tartunillu” misissueqqissaartarporlusooq. Eqqaamasariaqarparpulli suut maluginiartarnerai. Soorlu Daavi allattoq, Jehovap assuarnaassuserput naapertorlugu eqqartuuttarpaatigut.
14. Sooq isumaqanngisaannassaagut inunnguuserisatsinnik naammalluinnanngitsuullutalu ajortiliunerput assuarnaattuarnissatsinnut akornutigissallutigu?
14 Takorlooriaruk ullumikkut Jehova Guuti inuit uummataannik milliardilinnik misissuisartoq. (1 Nalunaarsuutit 28:9) Inummik kristumiutut assuarnaattuartumik qanoq akulikitsigisumik nanisisarpa? Qaqutigoortumik. Isumaqassanngilagulli naammalluinnanngissuserput assuarnaattuarsinnaanissatsinnut akornutaasoq. Daavilli Jobillu pisimanerattut, naammalluinnanngitsuugaluarluta Jehovap assuarnaattuarnitsinnik takunnittarnerata upperinissaanut pissutissaqarluarpugut. Eqqaamajuk naammalluinnassutsip assuarnaattuarnissatsinnut qulakkeerutaannginnera. Inuit naammalluinnartut pingasuinnaat nunarsuarmi maani inuusimapput, taakkualu ilaat marluk, Adami Evalu, assuarnaattuanngillat. Inuilli naammalluinnanngitsut millionillit assuarnaattuarsimapput. Aamma illit assuarnaattuarsinnaavutit!
3. Siunissamut neriuutitsinnut pingaarutilik
15. Daavip assuarnaattuarnissatta siunissamut neriuutitsinnut pingaaruteqartorujussuunera qanoq ililluni ersersippaa?
15 Assuarnaassuserput Jehovap eqqartuussutigiumaagaanut tunngaviusussaammat, assuarnaattuarnissarput siunissamut neriuutitsinnut pingaaruteqartorujussuuvoq. Daavip tamanna nalunngilaa. (Atuaruk Tussiaat 41:13). * Guutimit naassaanngitsumik iluarisaallunilu isumassorneqarnissani neriuutigaa. Ullumikkut kristumiut ilumoortut pinerattut, Daavip naassaanngitsumik inuunissani Jehovamullu kiffartornermini taassumunnga qanilliartuinnarnissani neriuutigaa. Daavip neriuutimi eqquunnera misigissaguniuk assuarnaattuarnissami pingaaruteqassusia paasivaa. Taamatuttaaq assuarnaattuartilluta Jehovap napatittarlutalu ilinniartittarlutalu siulersortarlutalu pilluaqqusarpaatigut.
16, 17. (a) Sooq assuarnaattuarnissat aalajangiusimaviuk? (b) Apeqqutit suut allaaserisami tulliuttumi sammineqassappat?
16 Aamma neriuut maanna nuannaarnissatsinnut pilluarnissatsinnullu pingaaruteqarpoq. Neriuuteqarnerput pissutigalugu nuannaarsinnaavugut, tamannalu ullut artornartorsiorfiusut naammagalugit atorsinnaanissaannut pisariaqartipparput. Aamma neriuut eqqarsaatitsinnut illersuutaasinnaavoq. Soorlu eqqaamagipput, neriuut Biibilimi niaqorornaveeqqummut assersuunneqarpoq. (1 Thessalonikamiut 5:8) Soorlu niaqorornaveeqqut sakkutuup niaquanut sorsunnermi illersuutaasartoq, taamatuttaaq neriuut isummatsigut ajortumik isumalluarnanngitsumillu eqqarsartaaseqalinnginnissamut illersuutigissavarput, naak taamatut eqqarsartaaseqarneq Saatanip silarsuatoqqami nungujartortumi matumani siuarsaraluaraa. Neriuuteqanngikkutta inuuneq siunertaqarnavianngilaq. Unneqqarilluta imminut misissoqqissaartariaqarpugut, assuarnaassuserput nalilersoqqissaartariaqarlugu neriuullu assuarnaassutsitsinnut tunngassuteqartoq eqqarsaatigeqqissaarlugu. Puioqinagu assuarnaattuarnikkut Jehovap kisimi oqartussaanera tapersersussagakku siunissamullu neriuutit erlinnartoq illersussagakku. Qanortoq assuarnaattuarit!
17 Assuarnaassuseq pingaaruteqaqimmat apeqqutit suli allat misissortariaqarpavut. Assuarnaassuseq qanoq ineriartortinneqartarpa? Qanoq assuarnaattuartoqartarpa? Piffissap ilaani assuarnaakkunnaartoqarpat qanoq iliortoqarsinnaava? Apeqqutit taakku allaaserisami tulliuttumi sammineqassapput.
[Quppernerup ataani ilanngussat]
^ imm. 6 Ilumoorpoq Jiisusi ima oqartoq: “Taamaattumik ilissi iluarluinnaritsi, soorlu Ataatarsi qilammiittoq iluarluinnartuusoq.” (Matthæusi 5:48) Taassuma paasisimannguatsiarpaa inuit naammalluinnanngitsuugaluartulluunniit killilimmik tamarmiusinnaasullusooq, imaluunniit killilimmik naammalluinnartuusinnaasut. Tukkorluta allanik asanninnissamik peqqussut eqqortissinnaavarput taamaalillutalu Guutimit iluarisaalluta. Jehovali tamakkiisumik naammalluinnartuuvoq. Taanna pillugu oqaaseq “assuarnaassuseq” atorneqaraangat aamma naammalluinnassusermik isumaqartarpoq. — 5 Mosesi 32:4.
^ imm. 15 Tussiaat 41:13, NV: “Uangami napatipparma — assuarnaassusera pissutigalugu — kiinnavillu saaniitipparma naassaanngitsumik.”
Qanoq akissavit?
• Assuarnaassuseq qanoq paasisariaqarpa?
• Assuarnaassuserput Jehovallu qilammi nunamilu kisimi oqartussaanera pillugu akerleriissut qanoq imminnut attuumassuteqarpat?
• Assuarnaassuserput neriuutitsinnut qanoq tunngaviua?
[Atuaqqissaarnermi apeqqutit]
[Qupp. 13-mi assiliartat]
Ulluinnarni assuarnaassuserput assigiinngitsorpassuartigut misilinneqarsinnaavoq