Ajoqersuganngortitsiortorneq nuannaarutigiuk

‘Taamaattumik aallaritsi ajoqersuganngortitsigitsilu.’ — MATTHÆUSI 28:19, NV.

1-3. (a) Biibilimik atuaqqissaaqatigisartagaqarnermut atatillugu inuppassuit qanoq misigisarpat? (b) Apeqqutit suut sammissavavut?

QATANNGUT arnaq USA-mi gruppimi hindisut oqaluttuniittoq ima allappoq: “Sapaatip-akunnerini aqqanilinni kingullerni ilaqutariit Pakistanimiut atuaqqissaaqatigaakka.” Imalu nangippoq: “Soorunami ikinngutigiillualerpugut. Ilaqutariit taakku qanittukkut Pakistanimut uternissaat eqqarsaatigileraangakku qullilisarpunga. Taakkua ilagisarunnaarnissaannik aliasuutiginninnera qullilininnut kisimi pissutaanngilaq, aammali pissutaavoq Jehova pillugu taakkuninnga ilinniartitsininnik assut nuannaarutiginninnera.”

² Illit inummik allamik Biibilimik atuaqqissaaqateqarnerup nuannersortaa misiginikuuiuk, soorlu qatanngutip arnap taassuma misigisimagaa? Ukiuni hundredelinni siullerni Jiisusip taassumalu malittaasa ajoqersuganngortitsiortorneq nuannaarutigingaarpaat. Jiisusi “Anersaamit Illernartumit sunnigaalluni qiimmattarpoq” ajoqersukkat ‘70-it’ (1936), nammineq ilinniartillugillu aallartissimasani, utermata nuannersunik nalunaarutissaqarlutik. (Lukasi 10:17-21) Ullumikkuttaaq inuppassuit taamatut suliaqarneq nalerisimaarnangaartutut isigaat. 2007-imi silarsuaq tamakkerlugu oqaluussisartut qaammatit tamaasa agguaqatigiissillugu 6,5 millioninik Biibilimik atuaqqissaaqateqartarnertik nuannaarutigaat.

³ Oqaluussisartulli ilaasa Biibilimik atuaqqissaaqateqartarnerup nuannaarutissiisarnera suli misigisimanngilaat. Allat immaqa ukiuni kingulliunerusuni atuaqqissaaqatigisartagaqarsimanngillat. Biibilimik atuaqqissaaqateqarniarnitsinni unamminiarnartunik sunik nalaataqarsinnaavugut? Unamminiarnartut taakku qanoq ajugaaffigisinnaavavut? Sunalu akissarsiarisarparput Jiisusip peqqussutaa una naalanniarlugu sapinngisatsinnik ilioraangatta: ‘Taamaattumik aallaritsi ajoqersuganngortitsigitsilu’? — Matthæusi 28:19, NV.

Nuannaarunnaassutigisinnaasavut

4, 5. (a) Inuppassuit nunat ilaanni qanoq periartarpat? (b) Sumiiffinni allani oqaluussisartut sunik unamminiagaqartarpat?

⁴ Nunat ilaanni inuit atuagaatitsinnik atuagassiaatitsinnillu piumasupilussuusarput uagutsinnillu Biibilimik atuaqqissaaqatigineqarusussuataartarlutik. Aappariit Australiamiut piffissami sivikitsumi Zambiami kiffartortut ima allapput: “Tusaamasavut uppernarsivavut. Oqaluussineq eqqarsaatigalugu Zambia paratiisiuvoq. Aqqusinermi oqaluussilluni misigisaqarnartaqaaq! Inuit namminneq ornittarpaatigut, allaallu ilaat atuagassianik aalajangersimasunik piumasarput.” Siornaakkunni qatanngutit Zambiamiittut 200.000-init amerlanerusunik Biibilimik atuaqqissaaqateqartarput — tassa oqaluussisartoq ataaseq agguaqatigiissillugu ataatsimit amerlanerusunik atuaqqissaaqateqartarpoq.

⁵ Sumiiffinnili allani atuakkanik atuagassianilluunniit tunniussinissaq aalajangersimasumillu Biibilimik atuaqqissaaqateqarnissaq oqaluussisartunut imaannaasanngilaq. Suna pissutaava? Amerlanertigut inuit angerlarsimaffiini naapikkuminaattarput, angerlarsimasullu immaqa upperisarsiornermik soqutiginninngillat. Taakku immaqa ilaqutariinni upperisarsiornermik pingaartitsiffiunngitsumi peroriartorsimapput, imaluunniit upperisarsiornermi eqqunngitsumi erseqqissumik pisuusaartoqarnera nuannarinngilaat. Paarsisut ilumuunngitsut siulersuinerlunnerannit inuppassuit anersaakkut ajoquserneqarsimapput — aap, ‘paarinerlugaallutillu naakkinarsisimapput’. (Matthæusi 9:36) Paasinarluinnarpoq Biibilimut tunngasunik oqaloqatigiissuteqarnissamut tunuarsimaarsinnaasarmata.

6. Oqaluussisartut ilaasa suut ajornartorsiutigisinnaavaat?

⁶ Oqaluussisartut aalajaatsut ilaat nuannaarunnaassutigisinnaasaminnik allamik unamminiagaqartarput. Taakku ajoqersuganngortitsiortornermi suliniuteqartupilussuusimagaluarlutik maanna peqqiilliornertik utoqqalinertilluunniit akornutigilersimavaat. Aamma eqqumaffigisariaqarparput imminut akornutissioqqajaasinnaasarnerput. Immaqa Biibilimik atuaqqissaaqateqarnissamut piukkunnanngitsutut misigivugut. Immaqa Mosesitut misigivugut, Jehovap taanna Faraomut oqaloqqummagu. Mosesi ima oqarpoq: “[Jehova], tusannga. Uanga oqallorissuusimanngisaannarpunga.”  (2 Mosesi 4:10) Aamma kukkunissamik annilaangaginninneq sapiunnermut attuumassuteqarluinnarpoq. Immaqa isumaqarpugut ilinniartitsisutut piginnaanikinnerput atuaqqissaaqatitta sallusuissummiilernissaanut akornutaasinnaasoq. Taama pisoqaqqunagu immaqa aalajangerpugut Biibilimik atuaqqissaaqateqarniarnata. Unamminiarnartut tamakku qanoq anigorsinnaavavut?

Uummatit piareersaruk

7. Jiisusip kiffartornermini suna kajumississutigaa?

⁷ Siullermik uummat piareersarneqarsinnaavoq. Jiisusi ima oqarpoq: “Uummatip ulikkaarutaanik qaneq oqaluttaraaq.” (Lukasi 6:45) Jiisusip oqaluussinermini kajumississutigisaa tassaavoq allat qanoq atugaqarnerannik ilumoorluni soqutiginninneq. Nunaqqatimi juutit anersaakkut alianartunik atugaqarnerat malugigamiuk “nalligingaalerpai”. Ajoqersukkani ima oqarfigai: “Katersugassat amerlaqaat . . . Taamaattumik katersuinermi naalagaasoq qinnuigisiuk katersuisussanik aallartitseqqullugu.” — Matthæusi 9:36-38.

8. (a) Suut eqqarsaatigigutsigit silatusaassaagut? (b) Uagutsinnit Biibilimik atuaqqissaaqatigineqartartup oqaaseqaataa sumik ilinniarfigisinnaavarput?

⁸ Ajoqersuganngortitsiortoqataagaangatta pitsaasassaaq eqqarsaatigeqqissaartarutsigu allat uagutsinnik Biibilimik atuaqqissaaqateqarnissamut piffissaqarfiginnissimanerat qanoq iluaqutigitigisimanerlugu. Aamma inuit oqaluussinermi naapittakkavut taakkualu tusarliussatsinnik qanoq iluaqutiginnissinnaanerat eqqarsaatigisakkit. Arnaq immikkoortortaqarfiit ilaannut ima allappoq: “Ilissinnut paasitikkusuppara Jehovap Nalunaajaasui angerlarsimaffinni uannik ilinniartitsiartortartut assut qujamasuutigalugit. Nalunngilara taama apeqqutissaqartiginera ilimagisaminnillu sivisunerusumik isersimasariaqartarnertik ilaannikkut nukillalaarnarisassagaat. Naammagittarfigisarpaanngali namminnerlu paasisimasatik pillugit uannik ilinniartitsinissaminnut pilerisarlutik. Jehova Jiisusilu qutsavigaakka inuit taakku inuuninnut akuulersimammata.”

9. Jiisusip suut isiginiarneruai, qanorlu ililluta taassuma maligassiaa malissinnaavarput?

⁹ Soorunami inuit tamarmiunngitsoq Jiisusip  ikiuiniarluni iliuuseqarneranut ajunngitsumik periarput. (Matthæusi 23:37) Ilaat piffissap ilaani taassuminnga malinnipput, taavali ajoqersuutaa akerlilerpaat “angalaqatigiunnaarlugulu”. (Johannesi 6:66) Inuilli ilaasa akuersaannginnerat pissutigalugu Jiisusi misigilinngilaq tusarliussani pingaaruteqanngitsoq. Naatsiiassat Jiisusip siaruartigaasa ilarpassui inerititaqanngillat, taassumali iliuuserisani ajunngitsut isiginiarneruai. Narsaatit katersuiffigeriaannanngorsimanerat takuaa, katersueqataaninilu nuannaarutigingaarpaa. (Atuaruk Johannesi 4:35, 36). Uagut taamatuttaaq — inerititaqarfiunngitsuinnaat maluginiarnagit — katersueqataanissaq pingaarnerutissinnaavarput inerititaqartoqarnissaalu ilimagalugu? Qanoq ililluta taamatut isumalluartuujuarsinnaanersugut misissoriartigu.

Katersuiumagaanni siaruarterisariaqarpoq

10, 11. Nuannaartuarumallutit qanoq iliorsinnaavit?

¹⁰ Naasorissaasoq naatsiiassanik siaruarterisarpoq kingusinnerusukkut katersuiumalluni. Tamatumunnga assingusumik uagut oqaluussisarpugut kingusinnerusukkut Biibilimik atuaqqissaaqateqartalernissaq neriuutigalugu. Taavami piffissamik oqaluussinermi atuisarutta, ikittuinnarnilli naapitaqartarluta naaperiikkavullu naapeqqikkuminaatsittarlugit? Tamanna nukillalaarnartupilussuusinnaavoq. Taava imaappa illumit illumut angalaartarunnaassasugut? Naamerluinnaq! Suli inuppassuaqarpoq periaaseq atorluarneqareersoq taanna aqqutigalugu sallusuissut pillugu paasisaqaqqaartartunik.

¹¹ Immaqa aamma illit — kiffartorneq nuannaarutigiuarsinnaajumallugu — oqaluusseriaatsit allat atortalersinnaavatit inuit tusarlersinnaajumallugit. Assersuutigalugu aqqusinermi oqaluussinikuuit imaluunniit inuit suliffiini oqaluussiffiginikuuigit? Oqarasuaatikkut oqaluussinissamut imaluunniit oqaluussiffigeriikkavit telefonnormuisa piniarnissaannut periarfissaqarpit, taakkua attaveqarfigiuarsinnaaniassagakkit? Kiffartornermi pinertusaaruit naleqqussallaqqikkuillu Guutip naalagaaffia pillugu tusarliussamut ajunngitsumik periartunik naapitaqarnerup nuannersua misigissavat.

Soqutigisaqanngissuseq uniffigeqinagu

12. Angalaarfigisartakkatsinniittut ilarpassui soqutiginnippasinngippata qanoq iliorsinnaavugut?

¹² Taavami angalaarfigisartakkatsinniittut ilarpassui upperisarsiornermik soqutiginninngippata? Aallarneeriaaseq naleqqussarneqarsinnaava taakku soqutiginnilersillugit? Apustilip Paulusip uppeqatini Korinthimiittut ima allaffigai: “Juutinut juutiusutut ilerpunga . . . Inatsiseqanngitsunut inatsiseqanngitsutut ilerpunga inatsiseqanngitsut ilataariumallugit — imaanngikkaluartoq Guutimi inatsiseqannginnama.” Taassuma suna kajumississutigaa? Nammineq ima akivoq: “Kikkut tamaasa peqatiginiartarsimavakka ilaannaannilluunniit annaassaqarumagaluarlunga.” (1 Korinthimiut 9:20-22) Uagut tamatumunnga assingusumik angalaarfigisartakkatsinni oqaluussigaangatta, tamatta isumaqatigiissutigisinnaasatsinnik aallarniuteqarsinnaavugut? Inuit upperisamik soqutigisaqanngitsut ilarpassui ilaqutariittut ingerlalluarnerorusupput. Aamma imaassinnaavoq inuunerup siunertaa paaserusukkaat. Guutip naalagaaffia pillugu tusarliussaq inunnut taamaattunut kajumissinartumik saqqummiussinnaavarput?

13, 14. Ajoqersuganngortitsiortoqataaneq qanoq ililluta nuannaarutiginerulersinnaavarput?

¹³ Sumiiffinni upperisarsiornermik soqutiginninngitsut amerlanerussuteqarpasiffigisaraluanni oqaluussisartut amerliartuinnartut ajoqersuganngortitsiortornermik nuannaarutiginninnerulersimapput. Qanoq ilillutik? Allamiut oqaasiinik ilinniarnermikkut. Aappariit 60-it sinnerlugit ukiullit paasisimavaat ilinniagaqartut Kinamiut tusindillit ilaquttatillu ilagiit angalaarfigisartagaanni najugaqartut. Uiusoq ima oqaluttuarpoq: “Tamanna Kinamiusut ilinniarnissamut kajumississutigaarput. Tamanna pissutigalugu ullut tamaasa oqaatsit taakku pillugit atuaqqissaarnissaq piffissaqarfigisariaqarparput, tamannali najukkatsinni Kinamiorpassuarnik atuaqqissaaqateqartalernitsinnik kinguneqarpoq.”

¹⁴ Allamiut oqaasiinik ilinniarnissamut periarfissaqanngikkaluarlutit allamiutut oqaluttunik naapitaqaraangavit atuagassiaaraq Godt nyt til folk af alle nationer atortarsinnaavat. Amerlanertigut atuakkanik atuagassianilluunniit pulaakkap nammineq oqaatsini atorlugit atuarsinnaasaanik pissarsisinnaasassaatit. Miserratigineqarsinnaanngilaq inunnut allatut oqaasilinnut allamillu kulturilinnut attaveqarniarnerup piffissartornarnerullunilu suliniuteqarnarnerunera. Najoqqutassiarli Biibilimiittoq una eqqaamajuk: ‘Naammangaartunik siaruarterisoq aamma naammangaartunik katersuiumaarpoq.’ — 2 Korinthimiut 9:6.

Ilagiinniittunut tamanut suliassaq

15, 16. (a) Sooq ajoqersuganngortitsiortorneq ilagiinniittut tamarmik sunniuteqarfigisarpaat? (b) Utoqqaat tamatumunnga tunngatillugu qanoq pingaaruteqarpat?

¹⁵ Inuulli ataasiinnaap iliuuseqarnera ajoqersuganngortitsiortornermi  iluatsilluarnermut aalajangiisuuneq ajorpoq. Ilagiinniittut tamarmik sunniuteqaqataasarput. Sooq? Jiisusi ima oqarpoq: “Asaqatigiikkussi tamatumuuna tamarmik paasissavaat ajoqersugarigissi.” (Johannesi 13:35) Jehovap Nalunaajaasuinit Biibilimik atuaqqissaaqatigineqartarsimasoq ima allappoq: “Taakkua ataatsimiinnerinut najuuttarnera nuannareqaara. Tikilluaqqusaasutut assut misiginartarpoq!” Jiisusi oqarpoq imminut ajoqersuganngortut ilaquttaminnit akerlilersorneqarsinnaasut. (Atuaruk Matthæusi 10:35-37). Aammali neriorsuivoq ilagiinni anersaakkut amerlasuunik ‘qatannguteqalissasut angutinik arnanillu anaanaqalerlutillu qitornaqalerlutillu’. — Markusi 10:30.

¹⁶ Biibilimik atuaqqissaaqatigineqartartut siumukarnerannut qatanngutit utoqqaat pingaaruteqarput. Qanoq? Aap, utoqqaat immaqa namminneq atuaqqissaaqateqarsinnaajunnaarsimapput, ataatsimiinnernili akissutaat ineriartornartut tusarnaartunut tamanut nakussatsissutaasarput. ‘Iluarnerup aqqutaani’ saqisutut tusaamaneqarnerat ilagiinnik nuannerunarsisitseqataasarpoq, aamma inuit eqqortuliorusuttut Guutip peqatigiissortaanut kajungilissutigisarpaat. — Ussatit 16:31.

Isumakuluutit ajugaaffigikkit

17. Sapiukkunnaarniarlutit qanoq iliorsinnaavit?

¹⁷ Sapiukkuit qanoq iliorsinnaavit? Eqqaamajuk Jehovap Mosesi ikioraa anersaamik illernartumik tunineratigut Aronimillu, qatanngutaanik, ikiorteqartinneratigut. (2 Mosesi 4:10-17) Jiisusi neriorsuivoq nalunaajaanitsinni Guutip anersaaminik illernartumik ikiortarumaaraatigut. (Apustilit Suliaat 1:8) Aammattaaq taassuma oqaluussisartut marlukkuutaarlugit aallartippai. (Lukasi 10:1) Taamaattumik Biibilimik atuaqqissaaqateqartarneq unamminiarnartutut isigigukku Guuti qinnuigisariaqarpat anersaani illernartoq iluaqutigalugu ilisimassusermik tuneqqullutit. Taava oqaluusseqatigisartagassarsiussaatit ilinnik imminut tatigilersitsisinnaasumik aamma illit iluaqutigisinnaasannik misilittagalimmik. Uppernikkut nakussatsinnarpoq eqqaamallugu Jehova suliassamik immikkorluinnaq ittumik suliarinninnermi inuit nalinginnaalluinnartut — silarsuarmi ‘sanngiitsut’ (1936) — atorniarlugit aalajangersimasoq. — 1 Korinthimiut 1:26-29.

18. Iluatsinngitsoornissamik isumakuluutiginninneq qanoq ililluta ajugaaffigisinnaavarput?

¹⁸ Iluatsinngitsoornissamik isumakuluutiginninneq qanoq ajugaaffigisinnaavarput? Silatusaassaagut eqqaamagutsigu inummik Kristusimut ajoqersuganngortitsineq nerisassiornermut assersuunneqarsinnaanngimmat, tassami nerisassiap iluatsilluarneranut iluatsilluannginneranulluunniit inuk ataaseq — tassa igasoq — aalajangiisuusarpoq. Oqaluussinermili kinguneqarluartoqarneranut minnerpaamik pingasut aalajangiisooqataasarput. Jehovap suliap pingaarnerpaartaa suliarisarpaa inuk imminut kajungilersillugu. (Johannesi 6:44) Uagut nammineq ilagiinniittullu allat ilinniartoq siumukarnissaanut ikiorniarlugu ilinniartitsillaqqissuuniarluta sapinngisarput tamaat iliuuseqartarpugut. (Atuaruk 2 Timotheusi 2:15). Kiisalu ilinniartoq nammineq ilikkakkani naapertorlugit iliuuseqartariaqarpoq. (Matthæusi 7:24-27) Ilinniartoq Biibilimik atuaqqissaartarnerminik unitsitsippat pakatsisinnaavugut. Soorunami neriuutigaarput ilinniartitavut eqqortumik aalajangissasut, “tamattali immikkut Guutimut nassuertussaavugut”. — Romamiut 14:12.

Suna akissarsiarineqartarpa?

19-21. (a) Biibilimik atuaqqissaaqateqartarnitsigut suna akissarsiarisinnaavarput? (b) Jehovap oqaluusseqataasartut tamaasa qanoq isigai?

¹⁹ Biibilimik atuaqqissaaqateqartarneq Guutip naalagaaffianik ujaaseqqaarnissamut iluaqutigisarparput. Aamma atuaqqissaaqateqaraangatta sallusuissut Guutip oqaasianiittoq puiuikkiunnerusarlugulu uummammiuliunnerusarparput. Qanoq ililluta? Pioneri Barakimik atilik ima nassuiaavoq: “Biibilimik atuaqqissaaqateqartaraanni Guutip oqaasianik suli peqqissaarnerusumik nammineq atuaqqissaartarnissaq pisariaqartarpoq. Allat naammaginartumik ilinniartissagukkit uanga nammineq uppernera nakussatseqqaartariaqarpara.”

²⁰ Kiffartornerput aatsaat Biibilimik atuaqqissaaqateqartarutta  Guutip isaani naleqassava? Soorunami naamik! Jehovap imminik unnersiutiginninniarluta ilungersuutigisavut pingaartingaarpai. Oqaluusseqataasartut tamarmik tassaapput “Guutip suleqatai”. (1 Korinthimiut 3:6, 9) Amy, pioneriusoq, ima oqarpoq: “Atuaqqissaaqatigisartagaq siumukaraangat Jehovamut qujamasunnartorujussuusarpoq. Inummut allamut taama nuannertigisumik tunissuteqarnissamut — Jehovamik ilisarisimannilernissamut naassaanngitsumillu inuulernissamut periarfissiinermut — taassumannga atorneqarnerput immikkut pisinnaatitaaffiuvoq.”

²¹ Biibilimik atuaqqissaaqateqartalerniarluta aamma atuaqqissaaqateqartarniarluta sapinngisatsinnik iliuuseqarutta maanna Guutimut kiffartornissamik salliutitsinerusinnaassaagut, aamma aniguinissamik silarsuassamullu nutaamut isernissamik neriuuterput nakussatsinneqassaaq. Aamma Jehovap ikiuineratigut uagutsinnik tusarnaartunik annaasseqataasinnaavugut. (Atuaruk 1 Timotheusi 4:16). Tamanna qanoq nuannaarutigitigissavarput!

Eqqaamavigit?

• Unamminiarnartut suut ilaasa Biibilimik atuaqqissaaqateqarnissamut immaqa akornutigisarpaat?

• Angalaarfigisartakkatsinniittut ilarpassui soqutiginnippasinngippata qanoq iliorsinnaavugut?

• Biibilimik atuaqqissaaqateqartarnitsigut suna akissarsiarisinnaavarput?

[Atuaqqissaarnermi apeqqutit]

[Qupp. 13-mi assiliartat]

Eqqortuliorusuttut naniumallugit oqaluusseriaatsit assigiinngitsut atortarpigit?