Jehovap kiffaa — “ikiligaasoq unioqqutitsinivut pillugit”
Jehovap kiffaa — “ikiligaasoq unioqqutitsinivut pillugit”
‘Ikiligaavoq unioqqutitsinivut pillugit, sequmisitaavoq ajortuliavut pillugit. Ikiilu ajorunnaarutigaavut.’ — ESAJA 53:5.
1. Eqqaaniaalluta nalliuttorsioraangatta suut eqqarsaatigisariaqarpavut, siulittuullu suna tamatumunnga iluaqutigisinnaavarput?
KRISTUSIP toqunera aamma toqunerata makititaaneratalu sunniutai tamaasa eqqaaniarniarlugit eqqaaniaalluta nalliuttorsiortarpugut. Nalliuttorsiorneq tamanna Jehovap kisimi oqartussaanerata qutsissisinneqarnera, aqqata illernarsisinneqarnera, siunertaata naammassineqarnera inuiaallu annaanneqaatissaat pillugit uagutsinnut eqqaasitsissutaavoq. Siulittuut Esaja 53:3-12-imi allanneqarsimasoq Kristusip pilliutaanik pilliutaatalu sunniutaanik ersersitsilluarnerpaannguatsiarpoq. Esajap siulittuutigaa Jehovap kiffaata sunik naalliuuteqarumaarnera, aamma Kristusip toqunera taassumalu qatanngutaasa tanitat ‘savaataasalu allat’ taassuma toqunerata kingunerisaanik pilluaqqussutisiariumaagaat pillugit immikkuualuttortat aalajangersimasut eqqaavai. — Johannesi 10:16.
2. Esajap siulittuutaani suna erserpa, tamatuminngalu misissuinerput uagutsinnut qanoq sunniuteqassava?
2 Jiisusip inunngornera ukiut 700-t missiliorlugit sioqqullugu Jehovap Esaja kiffami qinikkami tamakkiisumik misilinneqaraluaruniluunniit aalajaakkumaarneranik siulittuutiginninnissamut isumassarsisippaa. Tamatumani erserpoq Jehovap ernermi ilumoorumaarneranik qularutiginninngilluinnarnera. Esajap siulittuutaanik misissuinerput tamanna qamuuna qujamasungaalissutigissavarput uppernitsinnullu nakussatsissutigissallugu.
‘Asiginnagaq suutinngisarlu’
3. Sooq juutit Jiisusi tikilluaqqusimasariaqaraluarpaat, qanorli pivaat?
3 Atuaruk Esaja 53:3. Takorlooriaruk Guutip ernitua sunik misigisaqarsimanersoq Ataatami saniani kiffartornerminik nuannaarutigisaminik taamaatitsigami inuiaallu ajortimit toqumillu annaanneqaatissaannik inuunini pilliutiginiarlugu nunarsuarmukarami! (Filippimiut 2:5-8) Taassuma pilliutaanut siunertaasoq tassaavoq inuit isumakkeerfigineqarluinnarsinnaanissaat, Mosesillu inatsisaasa atuunnerisa nalaani pilliutigineqartartut tamatumunnga siumut assersuutaannaapput. (Hebræerit 10:1-4) Juutit, Missiarsip neriorsuutigisap tikiunnissaanik ilimaginnittut, taassuminnga tikilluaqqusillutillu ataqqinninnissaat pissusissamisoorsimassagaluarpoq. (Johannesi 6:14) Kristusili juutinit ‘asiginnagaavoq’, aamma taakkua taanna ‘suutinngilaat’, soorlu Esajap tamanna siuliuttuutigisimagaa. Apustili Johannesi ima allappoq: “Pigisaminut pigaluarpoq, pigisaasali ilassinngilaat.” (Johannesi 1:11) Apustili Petrusi juutit saaffigalugit ima oqarpoq: “Siuaasatta Guutiata, naalannarsisissimavaa kiffani Jiisusi ilissi Pilatusimut killuutigisarsi miserratigisarsilu, naak taanna aalajangereersimagaluartoq iperarumallugu. Ilissili illernartoq iluartorlu miserratigaarsi.” — Apustilit Suliaat 3:13, 14.
4. Jiisusip nappaatit qanoq ililluni ilisimallualerpai?
4 Esajap aamma siulittuutigaa Jiisusi ‘nappaatinik atuilerumaartoq [ilisimannilerumaartoq, NV]’. Ilumoorpoq Jiisusi kiffartornermini ilaannikkut qasulertartoq, napparsimalersimaneranulli takussutissaqanngilaq. (Johannesi 4:6) Nappaatilli oqaluussiffigisami naalliuutigisaat ilisimallualerpai. Inuit taakku misiginneqatigai amerlasuullu ajorunnaarsillugit. (Markusi 1:32-34) Jiisusip taamaalilluni siulittuut una eqquutitippaa: “Taassuma uagut nappaativut imminiitilerpai, anniaativullu nammappai.” — Esaja 53:4a; Matthæusi 8:16, 17.
‘Guutimit patinneqartutut’ ittoq
5. Juutit ilarpassuisa Jiisusip toqunera qanoq paasivaat, aamma sooq tamanna Jiisusip naalliunnerulissutigaa?
5 Atuaruk Esaja 53:4b. Jiisusip nalaani inuusut ilarpassuisa sooq taanna naalliulluni toqusariaqarnersoq paasinngilaat. Guutimit pillarneqarsoraat. (Matthæusi 27:38-44) Juutit Jiisusi Guutimik mitaatiginnittuunerarlugu unnerluutigaat. (Markusi 14:61-64; Johannesi 10:33) Soorunami Jiisusi ajortuliortuunanilu Guutimik mitaatiginnittuunngilaq. Taassumali Ataataminik qanoq asannitsiginera eqqarsaatigigaanni, Jehovamut kiffaasoq taanna Guutimik mitaatiginnittutut unnerluutigineqarluni toqunissani eqqarsaatigiinnarluguluunniit suli naalliunnerulersimassaaq. Taamaakkaluartorli Jehovap piumasaanut naalatsigitinnissaminut piumassuseqarpoq. — Matthæusi 26:39.
6, 7. Jehovap ernerminik aalajaatsumik ‘sequmisitsinera’ qanoq paasisariaqarpa, aamma sooq tamanna ‘iluaraa’?
6 Esajap siulittuutigaa inuit allat Kristusi ‘Guutimit patinneqarsoriumaaraat’, allarluinnarli manna aamma siulittuutigineqarpoq: ‘Jehovap iluaraa sequmisikkumallugu.’ (Esaja 53:10, 1900) Jehovap aamma ‘kiffaminik qinikkaminik nuannarinninnerarsimanera’ eqqarsaatigalugu, qanoq ililluni ernerminik ‘sequmisitsinini iluarisinnaagamiuk’? (Esaja 42:1) Jehovap tamatuminnga iluarinninnera qanoq paasisariaqarami?
7 Siulittuutip ilaa tamanna paasiumallugu eqqaamasariaqarparput Saatani Jehovap kisimi oqartussaaneranik apeqqusiinermigut Guutip kiffaasa qilammiittut nunarsuarmiittullu tamarmik ilumoornerannik apeqqusiisoq. (Jobi 1:9-11; 2:3-5) Jiisusi toqussi tikillugu ilumoortuarpoq taamaalillunilu Saatanip unammillerneranut naammalluinnartumik akissutaalluni. Tassa Kristusip akeqqaminit toqunneqarnissaa Jehovap akueraa, qularutissaanngilluinnarporli Jehovap kiffami qinikkap toqutaaneranik naalliuutiginnissimanera. Jehovap nuannaarutigisaa tassaavoq ernermi aalajaalluinnarnera. (Ussatit 27:11) Aammattaaq inuit peqqissimillutillu allamik isumataartut ernermi toquneranik iluaqutiginnikkumaarnerannik ilisimanninnini nuannaarutigingaarpaa. — Lukasi 15:7.
“Ikiligaasoq unioqqutitsinivut pillugit”
8, 9. (a) Jiisusi qanoq ililluni ‘unioqqutitsinivut pillugit ikiligaava’? (b) Tamanna Petrusimit qanoq uppernarsarneqarpa?
8 Atuaruk Esaja 53:6. Inuit ajortillit savatut tammarsimasutut angalaaginnarsimapput, nappaatinit toqumillu Adamimit kingornussaminnit aniguisitaaniarsaralutik. (1 Petrusi 2:25) Adamip kinguaavi tamarmik naammalluinnanngitsuugamik, taakkua arlaannaataluunniit Adamip maangaannartitaa pisiaralugu utertissinnaasimanngilaa. (Tussiaat 49:8) Asanningaarninili pissutigalugu ‘uagut ajortuliavut Jehovap taassumunnga’, ernerminut asasaminut kiffaminullu qinikkaminut, “tutsippai”. Kristusip ‘unioqqutitsinivut pillugit ikiligaanissaminut’ ‘ajortuliavullu pillugit sequmisitaanissaminut’ akuersinermigut, ajortuliavut pillugit uagullu pilluta nappakkami anniartitaaffimmi toquvoq.
9 Apustili Petrusi ima allappoq: “Tamatumunngami qaaqqusaavusi Kristusi aamma anniartitaammat ilissi pillusi maligassamillu qimatsivigalusi, tumini atuarlugit malinnaaqqullusi. Taassuma ajortivut timiminiitillugit sanningasulimmut [nappakkamut, NV] qangattaappai, uagut ajortimit toqulluta inuujunnaarluta iluartumik inuusinnaaqqulluta.” Taava Esajap siulittuutaa ima issuarpaa: “Taassuma ikii ajorunnaarutigaasi.” (1 Petrusi 2:21, 24; Esaja 53:5) Tamanna ajortuliortut Guutimit saammaanneqarnissaminnut periarfissaqalissutigaat, soorlu Petrusi ima allattoq: “Kristusilumi ataasiaammik inuit ajortaat pillugit anniarpoq; iluartuulluni iluaatsut pillugit anniarpoq Guutimut pisikkumallusi.” — 1 Petrusi 3:18.
“Soorlu savaaraq toqukkiartorneqartoq”
10. (a) Johannesip Kuisisup Jiisusi qanoq eqqartorpaa? (b) Johannesip oqaasii sooq Jiisusimut naleqquppat?
10 Atuaruk Esaja 53:7, 8. Johannesip Kuisisup Jiisusi tungiminukartoq takugamiuk ima oqarpoq: “Aajuna Guutip savaaraa silarsuup ajortaanik nammattoq.” (Johannesi 1:29) Johannesip oqaaseq savaaraq atoramiuk immaqa Esajap allagai uku eqqarsaatigai: “Soorlu savaaraq toqukkiartorneqartoq.” (Esaja 53:7) Esaja ima siulittuivoq: ‘Inuunini toqumut tunniuppaa.’ (Esaja 53:12) Soqutiginarpoq unnummi Jiisusip toqunini pillugu eqqaaniaalluni nalliuttorsiortarnissamik pilersitsiffimmini ermutsimik viinnimik imalimmik apustilinut aqqanilinnut aalajaatsunut tunniussinera imalu oqarnera: “Taanna tassa aaga, angerutsip aava, amerlasuut pillugit kuineqartussaq ajortit isumakkeerneqaatissaannik.” — Matthæusi 26:28.
11, 12. (a) Iisaap pilliutigineqarnissaminut piumassuseqarnera Kristusip pilliutaanut tunngatillugu sumut erseqqissaataava? (b) Eqqaaniaalluni nalliuttorsiornermut najuunnitsinni Aaperaamut annermut, Jehovamut, tunngatillugu suna eqqarsaatigisariaqarparput?
11 Jiisusi pilliutigineqarnissaminut piumassuseqarpoq, soorlu Iisaaq itsaq taamaassimasoq. (1 Mosesi 22:1, 2, 9-13; Hebræerit 10:5-10) Iisaaq pilliutaanissaminut akuersivoq, pilleeriaraluartorli tassaavoq Aaperaat. (Hebræerit 11:17) Tamatumunnga assingusumik Jiisusi toqunissaminut akuersivoq, Jehovali taannaavoq utertitsissutissamik aaqqissuussamik pilersitsisoq. Guutip ernerminik pilliutiginninnera inunnik asanningaarneranut ersiutaavoq.
12 Jiisusi nammineq ima oqarpoq: ‘Guutip silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.’ (Johannesi 3:16) Apustili Paulusi ima allappoq: ‘Guutip uagutsinnut asanninnini takutippaa ajortiliugallartilluta Kristusip pilluta toquneratigut.’ (Romamiut 5:8) Taamaattumik Kristusi ataqqisarparput toquneranik eqqaaniaanitsigut, puiunngisaannartariaqarparpulli pilliummik tamatuminnga pilliutiginnissinnaalersitsisoq tassaammat Aaperaat anneq, Jehova. Taanna nersorniarlugu eqqaaniaalluni nalliuttorsiornermut peqataasarpugut.
Kiffap “inuppassuit naapertuilluartutut isigineqalernissaannut ikiussavai”
13, 14. Jehovap kiffaata qanoq ililluni ‘inuppassuit naapertuilluartutut isigineqalernissaannut ikiorpai’?
13 Atuaruk Esaja 53:11, 12. Jehova kiffani qinikkani pillugu ima oqarpoq: “Kiffama amerlasuut iluartuutissavai [inuppassuit naapertuilluartutut isigineqalernissaannut ikiussavai, NV].” Qanoq ililluni? Tamanna pillugu paasitinneqamisaarpugut versip 12-ip naanerani: “Ajortuliortullu sinnerlugit pineqarluni.” Adamip kinguaavi tamarmik ‘ajortuliortuullutik’ inunngorput, taamaattumillu “ajortip akissarsiarititaa”, toqu, pisarpaat. (Romamiut 5:12; 6:23) Jehovap inuillu ajortillit saammaateqatigiinnissaat pisariaqarpoq. Esajap siulittuutaani kapitali 53-imi Jiisusip inuiannik ajortilinnik ikiuinera kusanartumik ima oqaluttuarineqarpoq: “Pillaat taassumunnga tuttoq eqqississutigaarput, ikiilu ajorunnaarutigaavut.” — Esaja 53:5.
14 Ajortitsinnik imminut pisitsinermigut uagullu pilluta toqunermigut Kristusip ‘inuppassuit naapertuilluartutut isigineqalernissaannut ikiorpai’. Paulusi ima allappoq: ‘Guutip iluarisaa tassaavoq tamarmiussuseq iluunngarmi taassumani [Kristusimi] ineqassasoq, taassumuuna suut tamaasa imminut saammaannartikkumagamigit, nunamiittullu qilammiittullu, sanningasulimmi [nappakkami anniartitaaffimmi, NV] aagut eqqissivissiorluni.’ — Kolossemiut 1:19, 20, 1936.
15. (a) “Qilanniittut” Paulusip eqqaasai kikkuuppat? (b) Kikkut eqqaaniaalluni nalliuttorsiornermi assersuutinik ilangiisinnaatitaasutuaappat, aamma sooq?
15 “Qilanniittut” Kristusip aavatigut kuisakkut Jehovamut saammaannarsisut tassaapput kristumiut tanitat Kristusip naalakkersueqatissaasut qaaqqusaasut. Kristumiut ‘qilammit qaaqqussummik pisimasut’, ‘inuusussatut naapertuilluartuutitaapput’ (NV). (Hebræerit 3:1; Romamiut 5:1, 18) Tamatuma kingorna Jehovap taakku anersaakkut qitornamisut akuerisarpai. Anersaaq illernartoq ‘Kristusimut kingornussisussaaqataanerat’, taassuma naalagaaffiani qilammiittumi kunngioqataasussatut palasioqataasussatullu qaaqqusaanerat, pillugu taakkununnga nalunaajaasarpoq. (Romamiut 8:15-17; Saqqummersitat 5:9, 10) Anersaakkut Israelimut, ‘Israelimut Guutip pigisaanut’, ilaalertarput ‘nutaamillu angerfigeqatigineqartarlutik’. (Jeremia 31:31-34; Galatiamiut 6:16) Angerutsimut nutaamut peqataagamik eqqaaniaalluni nalliuttorsiornermi assersuutinik, ilaatigut ‘ermusermik viinnimik imalimmik’, ilangiisinnaatitaapput. Ermuseq viinnimik imalik pillugu Jiisusi ima oqarpoq: “Ermuseq manna tassa angerusisaaq uanga aakkut pillusi kuineqartukkut.” — Lukasi 22:20.
16. “Nunamiittut” kikkuuppat, qanorlu ilillutik Jehovamit naapertuilluartutut isigineqalertarpat?
16 “Nunamiittut” tassaapput Kristusip savaatai allat, nunarsuarmi naassaanngitsumik inuunissamik neriugisallit. Aamma taakku Jehovap kiffaata qinikkap Jehovamit naapertuilluartutut isigineqalersissavai. Kristusip utertitsissutitut pilliutaa upperimmassuk taamaalillutillu ‘atisatik qaqortitillugit Savaaqqap aavanut eqqiarmatigit’ Jehovap anersaakkut ernermisuunngitsoq, kisianni ikinngutimisut naapertuilluartuutippai, taakkualu taamaalillutik “annikilliortitaangaarnermit” aniguinissamik nuanningaartumik neriuuteqalerput. (Saqqummersitat 7:9, 10, 14; Jaaku 2:23) Savat allat taakku angerutsimut nutaamut ilaannginnamik taamaattumillu qilaliarnissamik neriugisaqannginnamik, eqqaaniaalluni nalliuttorsiornermi assersuutinik ilangiineq ajorput, ataqqinnittumilli isiginnaartuullutik najuuttarput.
Jehova kiffaalu nuannarisaa qutsavigingaartigit!
17. Esajap kiffaq pillugu siulittuutaanik misissuineq eqqaaniaalluni nalliuttorsiornissamut isumatsinnut qanoq ililluni piareersaataava?
17 Esajap kiffaq pillugu siulittuutaanik misissuinerput Kristusip toquneranik eqqaaniaalluni nalliuttorsiornissamut isumatsinnut piareersaataalluarpoq. ‘Uppernerup aqqutissiuussisuanik’ tunaarinnittuarsinnaanngussutigaarput. (Hebræerit 12:2) Paasivarput Guutip ernera pikitsitsiumatuujunngitsoq. Saatanitut pinnani, Jehovamit ilinniartinneqarnini nuannaarutigaa taannalu Naalakkatut kisimi oqartussaasutut akueralugu. Paasivarput Jiisusip nunarsuarmi kiffartornermini inuit oqaluussiffigisani misiginneqatigisarai, taakkualu ilarpassui timikkut anersaakkullu ajorunnaarsikkai. Taamaalilluni ersersippaa silarsuassami nutaami kunngitut Missiarsiusutut ‘iluarneq nunami atortuulersikkuniuk’ sujumaarnerluni. (Esaja 42:4) Jiisusip ‘inuiannut qaammaqqutaalluni’ aallussilluarluni Guutip naalagaaffianik oqaluussissutiginninnera, nunarsuaq tamakkerlugu nutaarsiassamik nuannersumik aallussilluarluni oqaluussissutiginninnissamik ajoqersugaanut eqqaasitsissutaavoq. — Esaja 42:6.
18. Sooq Esajap siulittuutaanik atuarnerput Jehovamut kiffaanullu aalajaatsumut qujamasungaalissutigaarput?
18 Aamma Esajap siulittuutaa Jehovap ernerminik uagut pilluta naalliuttussanngortitsilluni toqusussanngortitsillunilu nunarsuarmut aallartitsinermigut pilliutaanik angingaartumik paasinninnerulissutigaarput. Jehovap ernermi naalliunnera nuannaarutiginngilaa, nuannaarutigaali taassuma toqumut allaat aalajaalluinnarnera. Jehova nuannaaqatigisariaqarparput, Jiisusip Saatanip sallutuneranik uppernarsaaniarluni Jehovallu aqqanik illernarsisitsiniarluni iliuuserisimasai tamaasa qujamasuutigalugit, taamaalillunimi uppernarsarmagu Jehova eqqortumik kisimi oqartussaalluni naalagaasoq. Aammattaaq Jiisusip uagut ajortuliavut imminut pisippai uagullu pilluta toqulluni. Taamaalilluni savarpannguit kristumiut tanitat savallu allat Jehovamit naapertuilluartutut isigineqarsinnaalersippai. Qanortoq eqqaaniaalluni nalliuttorsiornermut katersuukkutta Jehovamut kiffaanullu aalajaatsumut qujamasungaarisa. (w09 01/15-E)
Uteqqiineq
• Jehovap ernermi ‘sequmisinneqarneranik iluarinninnera’ qanoq paasisariaqarpa?
• Jiisusi qanoq ililluni ‘unioqqutitsinivut pillugit ikiligaava’?
• Kiffap qanoq ililluni ‘inuppassuit naapertuilluartutut isigineqalernissaannut ikiorpai’?
• Kiffaq pillugu siulittuutinik misissuineq eqqaaniaalluni nalliuttorsiornissamut isumatsinnut uummatitsinnullu qanoq piareersaataava?
[Atuaqqissaarnermi apeqqutit]
[Qupp. 26-mi assiliartaq]
“Asiginnagaq, suutinngisarput”
[Qupp. 28-mi assiliartaq]
‘Inuunini toqumut tunniuppaa’
[Qupp. 29-mi assiliartaq]
‘Savat allat’ ataqqinnittumik isiginnaartuullutik eqqaaniaalluni nalliuttorsiornermut najuuttarput