Jiisusi maligassaq naammalluinnartoq

INUTTUT pitsaanerorusullutillu pilluarnerorusuppit? Apustilip Petrusip nassuiarpaa tamanna qanoq anguneqarsinnaanersoq. Taanna ima allappoq: “Kristusi . . . anniartitaammat ilissi pillusi maligassamillu qimatsivigalusi, tumini atuarlugit malinnaaqqullusi.” (1 Petrusi 2:21) Jiisusi ilinniarfigilluarsinnaavarput, taassumami inuunera immikkorluinnaq ittuusimavoq. Jiisusi pillugu ilinniarutta maligassiaalu malikkutsigu qularnanngitsumik inuttut pitsaanerulissallutalu pilluarnerulissaagut. Inuup asseqanngilluinnartup taassuma pissusiisa ilai misissorneroriartigit, maligassiaanillu malinninneq qanoq iluaqutigisinnaaneripput paasiniarlugu.

Jiisusi oqimaaqatigiissaarisuuvoq. Jiisusi oqarpoq ‘niaqquminut iigarfissaqarnaniluunniit’, imminulli isumakkeerluni inuunngilaq, allallu taamatut inuunissaannut kajumissaanngilai. (Matthæusi 8:20) Assersuutigalugu nalliuttorsiorluni nereqatigiinnernut peqataasarpoq. (Lukasi 5:29) Tupinnartuliorneranit siullermit Biibilimi eqqaaneqartumit — katittorsiorluni nalliuttorsiornermi imermik viinninngortitsineranit — ersersinneqarpoq ilakkuminaatsuunngitsoq imaluunniit imminut naaggaarluinnartutut inuunngitsoq. (Johannesi 2:1-11) Jiisusilli erseqqissarpaa imminut suna pingaarnerpaanersoq. Taanna ima oqarpoq: “Uanga nerisassara tassaavoq aallartitsisima piumasaa malillugu iliornissaq suliassarititaatalu naammassinissaa.” — Johannesi 4:34.

□ Eqqarsaatigisimaviuk pigisat anersaakkullu ittut eqqarsaatigalugit qanoq ilillutit inuuninni oqimaaqatigiissaarisinnaanerlutit?

Jiisusi ilakkuminartuuvoq. Jiisusi angutitut inussiarnersutut asannittutullu Biibilimi allaatigineqarpoq. Inuit ajornartorsiuteqartut ornikkaanganni paasiuminaatsunilluunniit aperigaanganni paamitsaanneq ajorpai. Ilaanni inuppassuarnik unguneqarsimasoq, arnap ajorunnaarnissani neriuutigalugu atisaasigut attorpaa. Ukiut aqqaneq-marluk nappaateqarsimavoq. Arnaq qerlertoruussimassagunarpoq, Jiisusilli ajattunngilaa, inussiarnerlunili ima oqarfigaa: “Panik, uppernerpit annaappaatit.” (Markusi 5:25-34) Meeqqat aamma taassuma ilaginera toqqissisimanartippaat, soqutigineqannginnissartillu annilaangaginngilaat. (Markusi 10:13-16) Ajoqersukkaminullu attaveqarnera ammasumik asannittumillu oqaloqatigiinnermik ilisarnaateqarpoq. Ajoqersukkat qanittumik attaveqarfigeriaannaasarpaat. — Markusi 6:30-32.

□ Allat oqaloqatigiuminartippaatsit?

Misiginneqataasuuvoq. Jiisusip pissusiisa malunnarnerpaat ilagaat allat misigisimasaannik paasinnissinnaaneq, allanik misigeqatiginnissinnaaneq ikiuisinnaanerlu. Apustili Johannesi oqaluttuarpoq Jiisusip Maria qatanngummi Lazarusip toqunera pissutigalugu qiasoq takugamiuk, Jiisusi ‘qamuuna nimaartoq’ (NV) ‘aliatsattorlu’ (1936) aamma ‘qullililersoq’ (1936). Najuuttut malugisinnaalluarpaat Jiisusip ilaqutariit taakku asagai. Taakkununnga misigissutsimi allanit takuneqarnissaat kannguginngilaa. Aamma misiginneqataangaarnini ersersippaa ikinngutimi uummarteqqinneratigut. — Johannesi 11:33-44.

Ilaanni angutip nappaammik amiilaarnartumik nappaatillip, pupissup, Jiisusi ornippaa. Taassuma nappaatini taanna pissutigalugu allanit immikkoortitaalluni inuusup Jiisusi ima kimigiiserfigaa: “Naalagaq, piumaguit mingukkunnaarsissinnaavarma.” Jiisusi killitsinnartumik iliuuseqarpoq: “Jiisusip assani isatsillugu attorpaa oqarfigalugulu: ‘Piumavunga, mingukkunnaarit!’” (Uagut allanneri uingasunngortippavut; Matthæusi 8:2, 3) Jiisusip inuit ajorunnaarsittarpai Biibilimi siulittuutit eqquutinnissaat piinnarnagu. Inuit qulliisa allarternissaat kissaatigaa. Qanoq iliornermini tamani, oqariartaaseq amerlanertigut eqqaamaneqaatigisani inuunermini atorpaa: “Qanoq inunnut iliorfigeqqugussi ilississaaq taamatut iliorfigisigit.” — Lukasi 6:31.

□ Iliuutsikkut misiginneqataanerit ersersittarpiuk?

Jiisusi inunnik allanik paasinnittuuvoq pissutsinillu atugaannik paasinnittuulluni. Jiisusi kukkuneq ajoraluarluni inoqatimi naammalluinnartuunissaat naatsorsuutiginngilaa, iliuuseqaraangamilu tamatigut allanut paasinnittuusarpoq. Allanittaaq  pitsaanerusorinngilaq. Ilaanni arnaq illoqarfimmi inuunerluttuunerminik ilisimaneqaatilik uppernerminik pingaartitsinerminillu ersersitsisimavoq Jiisusip isigaanik qulliminik asaanermigut. Arnap taamaaliornera Jiisusip akueraa, angutip qaaqqusisup tupigutsaatigeqisaanik, taassumami arnaq assuaringaarpaa. Jiisusip paasivaa arnaq ilumoorussisoq taamaattumik ajortuliai pillugit ajattunngilaa. Ima oqarpoq: “Uppernerpit annaappaatit. Eqqissillutit qimagunniarit!” Ilimanarluinnarpoq Jiisusip asannittumik periarnera pissutigalugu arnap inooriaaserisimasani inooriaaseriunnaarsimagaa. — Lukasi 7:37-50.

□ Nersualaaripallattartutut isornartorsiuiumaarnertuutullu ilisimaneqarpit?

Kinaassusersiortuunngilaq allanillu ataqqinnittuulluni. Jiisusip ajoqersugaq Johannesi immikkut ittumik tunniusimaffigaa. Isummakkut assigiinnerat imaluunniit ilaqutariinnerat tamatumunnga nassuiaatissaagunarpoq. * Kinaassusersiunngilarli Johannesilu ajoqersukkanit allanit pingaarnerutinnagu. (Johannesi 13:23) Johannesip taassumalu qatanngutaata Jaakup Guutip naalagaaffiani immikkut inissisimaffeqalernissaminnik qinnuigimmanni Jiisusi ima akivoq: “Talerpimma tungaani saamimmalu tungaani issianissamik uanga aalajangiisussaatitaanngilanga.” — Markusi 10:35-40.

Jiisusi tamatigut allanut ataqqinningaartuuvoq. Nalimini inuusut pigiliutiinnakkaminnik isumaqarneratut isumaqanngilaq. Assersuutigalugu nalinginnaavoq arnat angutinit nikanarnerusutut iliorfigineqartarnerat. Taamaakkaluartoq Jiisusip arnat ataqqineqartariaqarneratut ataqqivai. Missiarsiunerminik oqaluttuussaa siulleq Samariamiuuvoq arnaq juutiunngitsoq. Juutit Samariamiunik ammut isiginninnerat nalinginnaavoq, ilasserusunngivittarpaallu. (Johannesi 4:7-26) Aammattaaq Jiisusip arnat arlallit toqusunit makititaanerminik takunnittooqqaarnissamut immikkut pisinnaatitaaffilerpai. — Matthæusi 28:9, 10.

□ Illit naapitannut qanoq naggueqaraluarpata, angutaagaluarpata arnaagaluarpataluunniit, qanoq oqaaseqaraluarpata aamma qanoq inuiaassuseqaraluarpataluunniit paqumisunneq ajorpit?

Erneruvoq qatanngutaallunilu pisussaassuserminik pingaartitsisoq. Jiisusip angutisiaa Josefi toqusimagunarpoq Jiisusi suli inuusuttuutillugu. Ilimanarluinnarpoq Jiisusi anaanaminut qatanngutiminullu nukarlernut sanasuulluni pilersuisuusimasoq. (Markusi 6:3) Jiisusip toqunngitsiarluni ajoqersukkani Johannesi oqarfigaa anaanani Maria isumageqqullugu. — Johannesi 19:26, 27.

□ Jiisusip ilaquttaminik isumassuisimaneratut ilaquttatit isumassortarpigit?

Jiisusi ikinngutaavoq ilumoortoq. Ikinngutitut Jiisusi asseqanngilluinnarpoq. Qanoq ililluni? Ikinngutini kukkugaangata, allaat arlaleriarlutik, piluarineq ajorpai. Ikinngutai tamatiguunngitsoq piumasaa malillugu iliortarput. Taakkununngali ikinngutaavoq pissusii ajunngitsut pingaarnerutikkamigit ajortunillu pissuteqarnerannginnamigit. (Markusi 9:33-35; Lukasi 22:24-27) Nammineq isummaminik sunnerniartanngilai, kajumissaartarpaali oqaannartaqqullugit. — Matthæusi 16:13-15.

Pingaarnerpaamilli Jiisusip ikinngutini asavai. (Johannesi 13:1) Qanoq asatigai? Ima oqarpoq: “Annerusumik asanninneqanngilaq ikinngutini  pillugit inuunerminik akiginnittup asanninneranit.” (Johannesi 15:13) Nammineq inuunermit naleqarnerusumik ikinngutinut neqeroortoqarsinnaava?

□ Ilinnik paamisaarisut ajuallatsitsisulluunniit ikinngutigiinnartarpigit?

Sapiitsuuvoq angutivittullu iliortarluni. Jiisusi eqqumiitsuliortut ilaasa taassuminnga angutitut sanngiitsutut susinnaanngitsutut titartaasarnerannit allaanerulluinnarpoq. Iivangkiiliuni taanna angutitut nukittuutut piumassuseqqortuutut saqqummiunneqarpoq. Marloriarluni naalaffimmi tuniniaasut tuniniagaat ilanngullugit anisippai. (Markusi 11:15-17; Johannesi 2:14-17) Inupalaat tigusarinnikkiartorlutik takkummata “Jiisusi Nazaretimioq” qununani sassarpoq ilisaritillunilu, ajoqersukkanittaaq illersorniarlugit aalajaalluni ima oqarpoq: “Uangaavunga; taamammi oqarfigereerpassi, uangalu ujagarigassinga taava ilakka uku qimagutitiinnarsigit.” (Johannesi 18:4-9) Paasinarpoq Jiisusi tigusaaqqatillugu anniartitaatillugulu sapiissusia takugamiuk Pontiusi-Pilatusi ima nalunaarmat: “Takussagissi inuk!” — Johannesi 19:4, 5.

□ Iliuusissaq eqqortoq sunaasoq nalunngikkaangakku aalajangersimalluinnarlutit sapiillutillu iliuuseqartarpit?

Taamatut allanillu nalissaqanngilluinnartunik pissuseqarnerata Jiisusi uatsinnut maligassaalersippaa naammalluinnartoq. Taassuma pissusiinit sunnerneqartikkutta, inuulissaagut pitsaanerusut pilluarnerusullu. Taannaana pissutigalugu apustilip Petrusip kristumiut kajumissaarai taassuma tumai peqqissaartumik atuaqqullugit. Jiisusip tumai peqqissaartumik atuarniarlugit sapinngisat tamaat iliortarpit?

Maligassaaginnanngitsoq

Jiisusi maligassaaginnanngilaq malittariaqartoq. Taanna ima oqarpoq: “Uanga aqqutaavunga sallusuissutaallungalu inuussutaallungalu; uakkuinnaq  Ataatamut pisoqarsinnaavoq.” (Johannesi 14:6) Guuti pillugu sallusuissummik ilisimasaqalersitsinermi taamaalillunilu inunnik Guutimut qanillisinnaalersitsinermi saniatigut, Jiisusi inunnik uppertunik naassaanngitsumik inuusinnaalersitsivoq. — Johannesi 3:16.

Naassaanngitsumik inuulernissamut periarfissaq tamanna pillugu Jiisusi ima oqarpoq: “Inuup Ernera [tikiutinngilaq] kiffartorfigeqqulluni, namminerli kiffartussalluni inuuninilu akissatut tunniutissallugu amerlasuut utertinneqaatissaattut.” (Matthæusi 20:28) Jiisusi inuunerminik pilliutiginninnermigut inuit naassaanngitsumik inuunissaannut tunngaviliivoq. Tunissut tamanna iluaqutiginiarlugu tamatta immikkut qanoq iliortariaqarpugut? Jiisusi ima nassuiaavoq: “Inuuneq naassaanngitsoq tassaavoq: ilinnik, Guutimik ilumoortutuamik, aallartitannillu, Jiisusimik Kristusimik, ilisarisimannilerniartuarnerat.” — Johannesi 17:3, NV.

Aap, naassaanngitsumik inuulerniaraanni Jiisusi ilisarisimalerniarneqartariaqarpoq, inooriaasia ilaarneqartariaqarluni pilliutaalu upperineqartariaqarluni. Kajumissaarumavatsigit Biibilimik atuaqqissaarnissamut piffissaqartaqqullutit taannalu atorlugu Guuti Jiisusilu ilisarisimalerniaqqullugit Biibilimilu ilinniartitsissutigineqartut maleruartaqqullugit, soorlu Jiisusi taamaaliorsimasoq. *

Jiisusip inuuneranit maligassaalluartumit ilikkarparput inuttut qanoq ittuusariaqarluta. Taassuma pilliutitut toqunera pissutigalugu, ajortimit tamatumalu akissarsiarititaanit toqumit, annaanneqarsinnaavugut. (Romamiut 6:23) Jiisusi Kristusi sunniuteqangaarsimanngitsuuppat uagutsinnut alianartumik pisoqarsimassagaluarpoq. Pingaaruteqannginnerusunit inuunermilu ulluinnarni isumakuluutinit inuit inuusimasut pingaarnerpaartaata — Jiisusip Kristusip — ilinniarnerunissaanut maligassiaatalu malinnissaanut periarfissaarutsinneqarnissat akuereqinagu. (wp08 12/01-E)

[Quppernerup ataani ilanngussat]

[Qupp. 6-mi ungalusaq/​assiliartat]

▪ Jiisusi tamanut kinaassusersiortuunanilu ataqqinnittuuvoq

▪ Naggatissani tikillugu ikinngutaavoq ilumoortoq

▪ Sapiitsuuvoq

Jiisusip tumai peqqissaartumik atuarniarlugit sapinngisat tamaat iliuuseqarpit?

[Qupp. 5-mi assiliartat]

Oqimaaqatigiissaarisuuvoq . . .

. . . ilakkuminartuuvoq

. . . misiginneqataasarpoq