“Qaallutit malinnga”

“Uannik malinnikkumasoq imminut isumakkiissaaq, ullullu tamaasa sanningasulini [nappagaq anniartitaaffini, NV] ersullugu malissavaanga.” — LUKASI 9:23.

1, 2. (a) Jiisusip asannilluni inuit qanoq kajumissaarpai? (b) Taassuma kajumissaarutaa illit qanoq periarfigaajuk?

JIISUSI nunarsuarmi kiffartornermi naajartulernerani Peræami, Jordanip akiatungaaniittumi, Judæap avannaata kangianiittumi, oqaluussivoq. Tassani angummit inuusuttumit, inuunermik naassaanngitsumik kingornussarsiumalluni qanoq iliortariaqarnini pillugu aperisumit, saaffigineqarpoq. Angutip inuusuttup aalajaalluni Mosesip inatsisaanik maleruaanera qulakkeereerlugu Jiisusip taanna asseqanngilluinnartumik periarfissippaa. Ima oqarpoq: “Pigisatit tamaasa akigiartukkit piitsunullu tunniullugit, taava qilammi pisuussuteqalerumaarputit. Qaallutillu malinnga!” (Markusi 10:21) Eqqarsaatigeriaruk — Jiisusimik, Guutip qutsinnerpaap ernituanik, malinninnissamik kajumissaarut!

² Angut inuusuttoq taanna kajumissaarneqarnini malillugu iliunngilaq, allalli taamaaliorput. Siusinnerusukkut Jiisusip Filipi ima oqarfigaa: “Malinnga!” (Johannesi 1:43) Filipi kajumissaarneqarnini malillugu iliorpoq kingusinnerusukkullu apustilinngorluni. Jiisusip Matthæusi aamma taamatut kajumissaarpaa, taannalu aamma malinnippoq. (Matthæusi 9:9; 10:2-4) Jiisusip naapertuilluarnermik nuannarinnittut tamaasa ima kajumissaarpaalusooq: “Uannik malinnikkumasoq imminut isumakkiissaaq, ullullu tamaasa sanningasulini [nappagaq anniartitaaffini, NV] ersullugu malissavaanga.” (Lukasi 9:23) Tassa piumavissut kikkulluunniit Jiisusimik malinnissinnaapput. Illit malinnikkumavit? Amerlanersavut Jiisusip asannilluni kajumissaarutaa malillugu ilioreerput, oqaluussinermilu inuit allat aamma taamatut kajumissaartarpavut.

3. Jiisusimik malinnikkunnaaqqunata qanoq ililluta qimagukkiartornaveersaarsinnaavugut?

 ³ Ajoraluartumilli tusarliussamik Biibilimiittumik soqutiginnittut ilaat atuaqqissaartarunnaarsimapput. Kigaallassimapput ‘qimagukkiartorsimallutillu’ (NV), naggataatigullu Jiisusimik malinnikkunnaarsimapput. (Hebræerit 2:1) Uagut qanoq ililluta taamaalinaveersaarsinnaavugut? Imminut ima aperisinnaavugut: ‘Jiisusimik malinninniarlunga aalajangerninnut sunarpiaruna pissutigigiga? Aamma taassuminnga malinninneq qanoq paasisariaqarpa?’ Apeqqutinut taakkununnga akissutit eqqaamajuarutsigit, tamanna inooriaatsitsinnik pitsaasumik toqqarsimasatsinnik aalajangiusimanninnerulissutigissavarput. Aammattaaq allat Jiisusimik malinninnissamut kajumissaarnissaannut iluaqutigissavarput.

Sooq Jiisusimik malinnissaagut?

4, 5. Sooq Jiisusi uagutsinnik siulersuinissamut piukkunnarpa?

⁴ Pruffiiti Jeremia ima allappoq: “Nalunngilara, Jehova, inuup ingerlavissi oqartussaaffiginngikkaa. Ingerlasup alloriartarnini aqussinnaanngilai.” (Jeremia 10:23, NV) Jeremiap oqaasiisa ilumuussusiat oqaluttuarisaanermi uppernarsarneqareerpoq. Aap, inuit naammalluinnanngitsut aqutsisinnaannginnerat erseqqissigaluttuinnarpoq. Jiisusimik malinninnissamik kajumissaarut malillugu iliorpugut paasisimagatsigu taanna uagutsinnik siulersuinissamut inummit allamit kimilluunniit piukkunnarnerpaasoq. Piukkunnaataasa ilaat misissoriartigit.

⁵ Siullermik, Jiisusi Missiarsiusussatut — uagutsinnik siulersuisussatut — Jehovamit namminermit toqqarneqarpoq. Pinngortitsisup allanit tamanit nalunnginneruaa kina uagutsinnut siulersuisussanngortissanerlugu. Aappassaanik, Jiisusi pissuseqarpoq uagut nuannarisatsinnik ilaarsinnaasatsinnillu. (Atuaruk Esaja 11:2, 3). Uagutsinnut maligassaavoq naammalluinnartoq. (1 Petrusi 2:21) Pingajussaanik, Jiisusi imminik malinnittunik ilumoorluni isumassuingaarpoq. Tamanna ersersippaa taakku pillugit inuunini pilliutigigamiuk. (Atuaruk Johannesi 10:14, 15). Taassuma ersersippaa paarsisuulluni isumassuingaartoq inuunermut maanna nuannaarutigisatsinnut pilluaatigisatsinnullu, nuanningaartumik naassaanngitsumillu siunissaqalernermik kinguneqarumaartumut, uagutsinnik siulersuinermigut. (Johannesi 10:10, 11; Saqqummersitat 7:16, 17) Tamakku allarpassuillu pissutigalugit taanna malinniarlugu aalajangeratta silatusaarpugut. Jiisusimilli malinninneq qanoq paasisariaqarpa?

6. Jiisusimik malinninneq qanoq paasisariaqarpa?

⁶ Kristusimik malinnissagaanni imminut kristumiuunerarnissaq naammanngilaq. Ullumikkut inuit 2 milliardit missaanniittut kristumiuunerartuupput, taakkuali suliaat ‘inatsisinik unioqqutitsisuunerannik’ qulaaripput. (Atuaruk Matthæusi 7:21-23). Jiisusimik malinninnissamik kajumissaarummik soqutiginnittoqaraangat taakku nassuiaattarpavut kristumiut ilumoortut inuunertik tamaat Jiisusip ilinniartitsissutigisaanut maligassiaanullu naapertuuttunngortittaraat — ullullu tamarluinnaasa taamatut inuusartut. Tamatuma qanoq paasisariaqarnera paasiniarlugu Jiisusi pillugu ilisimasatta ilaat misissoriartigit.

Ilisimassusermut tunngatillugu Jiisusi ilaaruk

7, 8. (a) Ilisimassuseq suua, aamma sooq Jiisusi taama ilisimassuseqartigaa? (b) Jiisusip ilisimassuseqarnini qanoq ersersippaa, aamma uagut tamatumunnga tunngatillugu taanna qanoq ilaarsinnaavarput?

⁷ Jiisusi pitsaalluinnartunik pissuserpassuaqarpoq, taakkuali ilaat sisamat samminerussavavut: tassa taassuma ilisimassusia, maniguunnera, aallussilluarnera asanninneralu. Siullermik sammissavarput taassuma ilisimassusia — ilisimasanik paasisimasanillu atuisinnaanera. Apustili Paulusi  ima allappoq: ‘Ilisimassutsikkut paasinninnikkullu pisuussutit tamarmik [Jiisusi] isertugaaffigaat.’ (Kolossemiut 2:3) Ilisimassuseq tamanna Jiisusip suminngaanniit pisimavaa? Tamanna nammineq ima oqaluttuara: “Ataatap uannut ajoqersuutaa malillugu oqaluppunga.” (Johannesi 8:28) Ilisimassusia Jehovameersuuvoq. Taamaattumik taama naliliilluarsinnaassuseqartigimmat tupinnanngilaq.

⁸ Assersuutigalugu Jiisusip naliliilluarsinnaanini ersersippaa aalajangerami qanoq inooriaaseqarniarnerluni. Aalajangerpoq pilimanianngitsumik inuuniarluni ataatsimik matuminnga pingaarnerpaatitsilluni: Guutip piumasaanik iliornissamik. Piffissani nukinilu Guutip naalagaaffiata soqutigisaanik siuarsaanermut atoramigit isumatusaarpoq. Uaguttaaq pilimanianngitsumik inuunitsigut — ‘isitta tappissuutinneratigut’ — Jiisusimik malinnissinnaavugut, taamaalillutalu pisariaqanngitsunik qasusaataaginnarlutillu piffissaajaataasunik nanertuuteqalernaveersaassaagut. (Matthæusi 6:22, NV) Kristumiorpassuit inuunerminni allannguisimapput kristumiutut kiffartornermi iliuuseqarnerusinnaaniassagamik. Ilaat pionerinngorsinnaasimapput. Taakku ilagippatsit nersortariaqarputit. ‘Guutip naalagaaffianik ujaaseqqaarneq’ nuannaarutissiingaartarlunilu nalerisimaarnangaarpoq. — Matthæusi 6:33.

Jiisusip maniguunnera ilaaruk

9, 10. Jiisusip maniguunnera qanoq erserpa?

⁹ Jiisusip pissusiisa ilaat alla sammisassarput tassaavoq maniguunnera. Inuit naammalluinnanngitsut pissaaneqalerlutilluunniit oqartussaassuseqaleraangamik amerlanertigut imminut sorsuartut isigilertarput. Jiisusili taamaanngilluinnarpoq! Jehovap siunertaanik naammassinninnermi pingaaruteqarluinnartumik inissisimaffeqaraluarluni immannguarluunniit makitanngilaq. Uagullu tamatumunnga tunngatillugu taassuma ilaarnissaanut kajumissaarneqarpugut. Apustili Paulusi ima allappoq: “Ilasi allat pillugit isumaliortaritsi Kristusi-Jiisusimiittutut. Taassuma Guutisut isikkoqartup ujajakkatut naatsorsuutinngilaa Guutip naliginera; iperarpaali kiffap isikkua atillugu inuillu assigilerlugit.” (Filippimiut 2:5-7) Tamanna qanoq paasisariaqarpa?

¹⁰ Jiisusip qilammi Ataataminik najuinermik immikkut pisinnaatitaaffik alutornangaartoq nuannaarutigaa, qilammili naalannassutsimi anersaajunermilu ‘iperarnissaannut’ piumassuseqarpoq. Inuunera arnap juutiusup illiaanut nuunneqarpoq. Tassani naartutut qaammatini qulingiluani alliartorpoq, sanasup nuimaniartuunngitsup angerlarsimaffiani naalungissatut susinnaanngitsutut inunngornissani tikillugu. Jiisusi Josefip illuani peroriartorpoq. Ajorteqanngilaq, taamaakkaluartorli peroriartornini tamaat angajoqqaaminut, naammalluinnanngitsuullutik ajortiliusunut, naalattuarpoq. (Lukasi 2:51, 52) Maniguunnerata asseqanngilluinnassusia!

11. Jiisusip maniguunnera qanoq ililluta ilaarsinnaavarput?

 ¹¹ Jiisusip maniguunnera ilaartarparput suliassanik nikanarsaataasutut isigineqarsinnaasunik suliaqarumagaangatta. Assersuutigeriartigu nutaarsiassamik nuannersumik oqaluussissutiginninneq. Tamatuminnga suliaqarneq nikanarsaataasutut isigineqarsinnaavoq, ingammik inuit soqutiginninngikkaangata, mitaatiginnikkaangata imaluunniit allaat akeqqersimaaraangata. Oqaluussinermili pinertusaaraangatta, allat Jiisusip imminik malinninnissamik kajumissaarutaa malillugu iliornissamut ikiortarpavut. Tassa allat inuunerannik annaassiniaqataasarpugut. (Atuaruk 2 Timotheusi 4:1-5). Assersuutigisinnaasarput alla tassaavoq naalagaaffilersaarfimmik aserfallatsaaliuineq. Tamatumunnga ilaapput eqqaavilerineq, naternik asaaneq anartarfinnillu eqqiaaneq, suliassat inuppassuarnit nikanarsaataasutut isigineqartartut. Nalunngilarpulli naalagaaffilersaarfimmik — najukkanni pallorfiginninnermut ilumoortumut qitiusumik — aserfallatsaaliuineq illernartumik kiffartornitsinnut ilaasoq. Suliassanik inuppassuarnit pingaaruteqannginnerusutut isigineqartartunik kajumilluta suliarinninnikkut ersersittarparput maniguuttuulluta Jiisusillu tumaanik malinnilluta.

Jiisusip aallussilluarnera ilaaruk

12, 13. (a) Jiisusip aallussilluarnini qanoq ersersippaa, sunalu kajumississutigaa? (b) Oqaluussinermi aallussilluarnissamut suna kajumississutigissavarput?

¹² Maanna Jiisusip oqaluussinermi aallussilluarnera eqqarsaatigeriartigu. Jiisusi nunarsuarmiikkami suliarpassuaqarpoq. Inuusuttuulluni ataatarsiani Josefi sanasutut suleqatigisimagunarpaa. Kiffartornermini tupinnartuliortarpoq, napparsimasunik ajorunnaarsitsisarluni toqusimasunillu makititsisarluni. Suliaasali pingaarnerpaartaat tassaavoq nutaarsiassamik nuannersumik oqaluussissutiginninnera tusarnaarusuttunillu ilinniartitsinera. (Matthæusi 4:23) Uagut taassuminnga malinnikkusuttugut, tamannattaaq suliassaraarput. Tamatumunnga tunngatillugu Jiisusi qanoq ililluta ilaarsinnaagatsigu? Ilaatigut Jiisusip pissutiginiagaata assinganik pissutiginiagaqarnissarput sulissutigisinnaavarput.

¹³ Pingaarnerpaamik Guutimik asanninneq Jiisusip oqaluussinissamut ilinniartitsinissamullu kajumississutigaa. Aammali sallusuissutinik ilinniartitsissutigisaminik nuannarinninneq kajumississutigaa. Jiisusip sallusuissutit taakku erlinnartuutitut naleqangaartutut isigai, taakkuninngalu avitseqateqarnissamut piumassuseqarpoq. Uaguttaaq ilinniartitsisutut taamatut misigivugut. Eqqarsaatigeriakkit paasissutissat pingaaruteqangaartut Guutip oqaasiani paasisimasavut! Paasisimavarput qilammi nunamilu akerleriissut suunersoq aamma qanoq aalajangerneqassanersoq. Toqusimasut silarsuassamilu nutaami Guutip naalagaaffiata pilluaqqussutissiissutigiumaagai pillugit Biibilimi qanoq allassimasoqarnersoq nalunngilluarparput. Tamakkuninnga paasinninnerput qanittukkuuppat qangaliugaluarpalluunniit, paasisavut taakku pingaaruteqarunnaanngisaannassapput. Nutaajugaluarunik pisoqaagaluarunilluunniit — erlinnartuujuassapput. (Atuaruk Matthæusi 13:52) *. Angorniorluta oqaluussigaangatta Jehovamit paasisimasatsinnik nuannarinninnerput allanut ingerlateqqittarparpullusooq, soorlu Jiisusi taamaaliortarsimasoq.

14. Jiisusip ilinniartitseriaasia qanoq ilaarsinnaavarput?

¹⁴ Maluginiaruttaaq Jiisusi qanoq ilinniartitsinersoq. Tusarnaartuni Allakkanut innersuuttuaannarpai. Pingaarutilinnik oqaaseqarniaraangami ima aallarniigajuppoq: “Allassimavoq.” (Matthæusi 4:4; 21:13) Toqqaannartumik toqqaannanngitsumilluunniit allakkanut Allakkani Hebræerisuuniittunut  19-inut innersuussivoq. Jiisusip pisimaneratut oqaluussinitsinni Biibili pingaarnerutittarparput, sapinngisamillu tamatigut atorniartarparput. Tamanna eqqortuliorusuttut ajoqersuutigisatta uatsinnit pinnatik Guutimit pisuunerannik takunninnissamut periarfissaqalissutigisarpaat. Allassimaffimmik atuarnissamut tamatumalu qanoq pingaaruteqarneranik oqaloqatigiissutiginninnissamut akuersisoqaraangat, tamanna nuannaarutigisarparput. Jiisusimillu malinninnissamik kajumissaarut malillugu iliortoqaraangat nuannaarnerput nalissaqanngivittarpoq.

Jiisusimik malinninneq tullermik asanninnermut attuumassuteqarpoq

15. Jiisusip pissusia maluginiarnartoq suua, tamatuminngalu eqqarsaatiginninnerput sunissamut kajumississutigisinnaavarput?

¹⁵ Jiisusip pissusiisa sammisassatta ilaat kingulleq qamuuna attortinnarpoq. Tassa tullermik asanninnera. Apustili Paulusi ima allappoq: “Kristusip asanninnerata pinngitsaalivaatigut.” (2 Korinthimiut 5:14) Jiisusip inuiannik tamanik uagutsinnillu inunnik ataasiakkaanik asanninnera eqqarsaatigigaangatsigu qamuuna killinneqaatigisarparput — aammattaaq taassuma maligassiaanik malinninnissamut kajumississutigisarparput.

16, 17. Jiisusi tullerminut qanoq asannittuliortarpa?

¹⁶ Jiisusi qanoq ililluni tullermut asannittuliorpa? Soorunami inuiaat pillugit inuunerminik akiginnikkumanera asanninneranut ersiutaavoq pingaarnerpaaq. (Johannesi 15:13) Kiffartornerminili aamma allatigut asannittuliorpoq. Assersuutigalugu naalliuttut misiginneqatigai. Takugamiuk Maria ilaalu Lazarusip toquneranik aliasuutiginnittut, aliasunnerat assut attortissutigaa. Nalunngikkaluarlugu Lazarusi makitikkumaarlugu, ima killitsisimatigaaq ‘qullililluni’ (1936). — Johannesi 11:32-35.

¹⁷ Jiisusi nunarsuarmi kiffartornermini siusissukkut pupissumit orninneqarpoq ima oqartumit: “Piumaguit mingukkunnaarsissinnaavarma.” Jiisusi qanoq piva? Oqaluttuarineqarpoq ‘naakkitsaateqigaa’. Taava nalinginnaanngilluinnartumik iliuuseqarpoq. “Assani isatsillugu attorpaa oqarfigalugulu: ‘Piumavunga, mingukkunnaarit!’ Erniinnarlu pupinnerata qimappaa, mingukkunnaarporlu.” Mosesip inatsisai naapertorlugit pupissut minguttuujupput, Jiisusillu angut taanna attornagu ajorunnaarseriaannaagaluarpaa. Taamaakkaluartoq Jiisusip pupissoq ajorunnaarsikkamiuk attorpaa. Immaqa taanna ukiorpassuarni attorneqarsimanani inummit allamit aatsaat attorneqarpoq. Jiisusi matumani asannillunilu misiginneqataangaarami! — Markusi 1:40-42.

18. Qanoq ililluta ‘misiginneqataasinnaavugut’?

¹⁸ Uagut Kristusimik malinnikkumasugut asannittuliortariaqarpugut allanik ‘misiginneqatiginninnitsigut’. (1 Petrusi 3:8) Uppeqat anigorsinnaanngisaminik nappaateqarpat imaluunniit isumatsarujussuaqqappat, taassuma qanoq misigisimaneranik paasinninnissaq immaqa imaannaanngilaq — ingammik nammineq taamatut misigisaqarsimanngikkaanni. Jiisusilli nammineq napparsimanikuunngikkaluarluni allat misiginneqatigisarpai. Qanoq ililluta uagut taamatut misiginneqatiginninnermik ineriartortitsisinnaavugut? Naalliuttut ammarlutik oqaluttualeraangata naammagittarluta tusarnaartarnitsigut. Imminut ima aperisoqarsinnaavoq: ‘Uanga taamatut atugaqartuuguma qanoq misigissagaluarpunga?’ Allat qanoq misiginerannik misikkarinnerunissarput suliniutigigutsigu ‘nikallortunik tuppallersaasinnaanerungaassaagut’. (1 Thessalonikamiut 5:14, 1936) Taamaalilluta Jiisusi malissavarput.

19. Jiisusip maligassiaanik eqqarsaatiginninneq sunissamut kajumississutigaarput?

¹⁹ Jiisusip oqaaserisimasaanik iliuuserisimasaanillu misissuineq tiguartinnangaarami! Taanna pillugu paasisaqarnerujartortilluta taassumatut innissarput kajumiginerujartuinnartarparput — aamma allat taamatut misigilernissaannut ikiuinissarput kissaatiginerujartuinnartarparput. Taamaattumik kunngimik Missiarsiusumik malinninnerput — maanna naassaanngitsumillu — nuannaarutigisigu!

[Quppernerup ataani ilanngussaq]

Uku nassuiarsinnaavigit?

• Jiisusip pisimaneratut qanoq ililluta silatusaarsinnaavugut?

• Qanoq ililluta maniguussinnaavugut?

• Qanoq ililluta oqaluussinermi aallussilluarnerulersinnaavugut?

• Tullermik asanninnermut tunngatillugu Jiisusi qanoq ilaarsinnaavarput?

[Atuaqqissaarnermi apeqqutit]

[Qupp. 9-mi ungalusaq/​assiliartaq]

ATUAGAQ KRISTUSIMIK ILAARSINISSAMUT ILUAQUTISSARPUT

2007-imi ataatsimeersuarnermi atuagaq 192-inik quppernilik ima qulequtaqartoq saqqummersinneqarpoq: ‘Kom og følg mig’. * Atuagaq taanna Jiisusi, taassuma pissusii suliaalu pillugit misissueqqissaarnissamut iluaqutissatut naatsorsuussaavoq. Kapitalit aallarniutaasut marluk kingorna immikkoortut pingaarnerit siullianni sammineqarput Jiisusip pissusii — maniguunnera, sapiissusia, ilisimassusia, naalannera pinertusaarneralu.

Tullinnguuppoq immikkoortut pingaarnerit aappaat, Jiisusip ilinniartitsisutut nutaarsiassamillu nuannersumik oqaluussissutiginnittutut suliaanut tunngasoq. Immikkoortut pingaarnerit pingajuanni asanningaarsusersuata qanoq ersersinneqarnera sammineqarpoq. Atuakkami kristumiut Jiisusimik ilaarsinissamut iluaqutigisinnaasaannik paasissutissarpassuaqarpoq.

Qularutiginngilarput atuagaq taanna tamatta kajumississutigissagipput imminut misissornissamut imminullu ima aperinissamut: ‘Ilumut Jiisusimik malinnippunga? Qanoq ilillunga malilluarnerusinnaavara?’ Aamma “inuunermik naassaanngitsumik eqqortumik isumaqarfiginnittut tamarmik” Kristusimut ajoqersuganngornissaminnut iluaqutigissavaat. — Apustilit Suliaat 13:48, NV.

[Quppernerup ataani ilanngussaq]

[Qupp. 8-mi assiliartaq]

Jiisusi nunarsuarmukarnissaminut naalungissatullu susinnaanngitsutut inunngornissaminut akuersivoq. Taamaaliorsinnaajumalluni suna pissuserisariaqarpaa?

[Qupp. 10-mi assiliartaq]

Oqaluussinermi aallussilluarnissamut suna kajumississutigisinnaavarput?