Jehovap oqaasia uumavoq

Saqqummersitanit pingaarnersat — imm. 2

JEHOVAMIK Guutimik pallorfiginnittut pallorfiginninngitsullu tamarmik immikkut qanoq siunissaqarpat? Saatani anersaapiluilu qanoq pineqassappat? Guutimut naalattut Kristusip ukiuni tusindini naalakkersuinerani sunik pilluaqqussutisissappat? Apeqqutinut taakkununnga pingaarutilinnullu allanut akissutit Saqqummersitat 12:18–22:21-miipput. * Kapitalini taakkunani allaaserineqarput apustilip Johannesip ukiut hundredellit siulliit naalerneranni takorruugaasa 16-it ilaat qulingiluat kingulliit.

Johannesi ima allappoq: “Pilluarpoq atuartoq, pilluarputtaaq tusartut siulittuutit oqaasertaannik tassanilu allassimasunik aalajangiussisut.” (Saqqummersitat 1:3; 22:7) Saqqummersitanik atuarneq tamatumanilu allassimasunit ilikkakkatsinnik atuineq uummatitsinnut sunniuteqarsinnaavoq, Guutimut erneranullu, Jiisusimut Kristusimut, uppernitsinnik nakussatsitsisinnaalluni, uatsinnillu siunissamut isumalluarnartumik neriugisaqalersitsisinnaalluni. * — Hebræerit 4:12.

PUUGUTAASAT GUUTIP KAMANNERANIK IMALLIT KUINEQARPUT

(Saqqummersitat 12:18–16:21)

Saqqummersitat 11:18-imi ima allassimavoq: “Inuiaqatigiit kamattunngorput, illillu kamannerit nalliuppoq piffissarlu . . . nunamillu aseruisut aserussallugit.” (1936) Takorruukkat arfineq-pingajuanni sooq Guuti kamannersoq ersersinneqarpoq, ‘nersut qulinik nassoqartoq arfineq-marlunnillu niaqoqartoq’ allaaserineqarmat. — Saqqummersitat 13:1.

Takorruukkat qulingiluaanni Johannesip takuai “Savaaraq qaqqami Zionimi [qeqartoq]” ‘144.000-illu’ ‘inunnit immikkoortinneqarsimasut’ taanna ilagigaat. (Saqqummersitat 14:1, 4) Tamatuma kingorna inngilit tusarliussaqarput. Takorruukkami tulliuttumi Johannesip takuai “inngilit arfineq-marluk perlunnik kingullissanik arfineq-marlunnik nassatallit”. Jehovap namminiunnguatsiartoq inngilit taakkua peqquai ‘puugutaasat Guutip kamanneranik imallit’ Saatanip silarsuaata immikkoortuinut assigiinngitsunut kueqqullugit. Puugutaasat tusarliussassanik eqqartuussutillu Jehovap naammassiumaagai pillugit mianersoqqussutinik imaqarput. (Saqqummersitat 15:1; 16:1) Takorruukkani marlunni taakkunani eqqartuussutit qarlortaatinik supisinerit arfineq-aappassaannut eqqanaarnartullu pingajuannut tunngassuteqartut sukumiinerusumik oqaluttuarineqarput. — Saqqummersitat 11:14, 15.

Allassimaffiit pillugit apeqqutinut akissutit:

13:8 — ‘Inuunerup mappersagaa Savaaqqap pia’ suua? Mappersagaq assersuutaavoq Jiisusimik Kristusimik taassuma naalagaaffiani qilammiusumi naalakkersueqateqartussaannaat aqqinik allattuiffigineqarsimasoq. Ilaatigut tamatumani allattorsimapput kristumiut tanitat suli nunarsuarmiittut qilaliarnissamillu neriugisallit aqqi.

13:11-13 — Nersut marlunnik nassulik qanoq uumasorujuttut pissusilersorpa, qanorlu ililluni innermik qilammit nakkartitsiva? Nersutip marlunnik nassullip — tuluit Amerikamiullu naalagaaffissuata — uumasorujuttut oqalunnerani erserpoq taassuma naalakkersueriaatsiminik pinngitsaaliilluni allanik akuerinnitsitsiniaanermini tatisisarlunilu sioorasaarisarlunilu nakuusertarnera. Innermik qilammit nakkartitsivoq, ima paasillugu sorsunnersuarni marlunni ajussutsip pissaaneranik kommunismemillu ajugaaffiginninnerarnermigut pruffiitiusuusaartoq ilumoortoq.

16:17 — Puuguttat arfineq-aappaata “silaannarmut” kuineqarnera qanoq paasisariaqarpa? ‘Silaannaq’ eqqarsartaatsimut Saatanip sunniuteqarfigisaanut, ‘anersaamut [taamatut eqqarsartaaseqaqqajaasarnermut] naalasseriinnerup qitornaani  maanna sunniisumut’, assersuutaavoq. Silaannaq toqunartoq taanna Saatanip pissutsinik aaqqissuussaata ajortup immikkoortuinik tamanik sunniivoq. — Efesosimiut 2:2, 1936.

Ilinniarfigisinnaasavut:

13:1-4, 18.  “Nersut” naalakkersuisunut nunamiusunut assersuutaasoq “immamit”, tassa inuiappassuarnit eqqissiveqanngitsunit, qaqivoq. (Esaja 17:12, 13; Danieli 7:2-8, 17) Nersutip taassuma, Saatanimit pilersinneqarlunilu pissaanilerneqartup, kisitsisigaa 666, taassuma qanoq naammalluinnanngitsigineranut erseqqissaataasoq. Nersutip tamatuma suuneranik paasinninnerput inuiaat ataatsimut isigalugit iliuuserisaannik alutorinnilluta malinninnginnissamut imaluunniit pallorfiginninnginnissamut iluaqutigaarput. — Johannesi 12:31; 15:19.

13:16, 17. Ulluinnarni suliassanut, soorlu ‘pisinermut tuniniaanermulluunniit’, tunngatillugu ajornartorsiuteqartaraluarluta inuunerput nersummit tatineqarluta aqunneqartissanngilarput. Nersutip nalunaaqutaanik ‘talerpitsigut qaatsigulluunniit’ nalunaaqutserneqarnermik akuerinninnerup assigiinnarpaa iliuutsitta nersummit aqunneqarnissaannik eqqarsartaatsittalu taassumannga sunnerneqarnissaannik akuerinninneq.

14:6, 7. Inngilip nalunaarutaani erserpoq Guutip naalagaaffia pilersinneqareersoq pillugu nutaarsiassaq nuannersoq ilungersorluta oqaluussissutigisariaqaripput. Biibilimik atuaqqissaaqatigisartakkavut iluaqutaasumik Guutimik mianerinninnermik ineriartortitsinissaannut taassuminngalu ataqqinninnissaannut ikiortariaqarpavut.

14:14-20.  “Nunarsuarmi katersugassat” katersorneqarnerat, tassa annaanneqartussanik katersuineq, naammassippat inngilip ‘nunami viinnissat paarmaqarfiinik Guutip uumitsannerata tunguiaaffissuanut’ kuisinissaanut piffissanngussaaq. Taava viinnissat paarmaqarfii taakku — Saatanip nunarsuarmi naalakkersuinermik aaqqissuussaa ajortunngorsimallunilu takussaasoq tamatumalu ‘viinnequtitai tigumasut’ inerititat ajortut — ataavartumik suujunnaarsinneqassapput. ‘Nunami viinnissat paarmaqarfiinit’ sunnertinnginnissarput aalajangiusimasariaqarparput.

16:13-16.  “Anersaat minguttuut [Oqaaserineqartut isumassarsiarititaasut minguttuut, NV]” anersaapiluit ikiortigalugit sunniiniarnermut, nunarsuup kunngiisa puugutaasat arfineq-marluk Guutip kamanneranik imallit kuineqarnerannit sunnertinnginnissaannik Jehovamillu akerlilersuilernissaannik qulakkeerisussamut, assersuutaapput. — Matthæusi 24:42, 44.

16:21. Pissutsit aaqqissuussaanerata matuma naggatissaa sioqqutitsiarlugu Saatanip silarsuarmik aaqqissuussineranut ajortumut Jehovap eqqartuussutaanik nalunaarutiginninnermut immaqa ilaassapput imertut qerisutut eqqartorneqarunartut, tassa Guutip eqqartuussutaanik toqqaannartumik oqaatiginninnerit sakkortuut. Inuilli amerlanersaat Guutimik mitalliiginnassapput.

KUNNGI AJUGAASOQ NAALAKKERSUIVOQ

(Saqqummersitat 17:1–22:21)

“Babylonersuaq”, upperisarsiornerup eqqunngitsup silarsuarmi tamarmi naalagaaffissua, Saatanip silarsuaata ajortunngorsimasup ilagaa maajunnartoq. Taanna takorruukkat aqqarnganni ‘arnarsuartut atortittartutut’ — arnatut kinguaassiuutitigut inuunerluttutut — “nersummi annoraassatut aappallarissutut aappalutsigisumi” issiasutut oqaluttuarineqarpoq. ‘Nassunnit qulinit’ nersutip issiaffigisaata niaquaniittunit suujunnaarsinneqarluinnassaaq. (Saqqummersitat 17:1, 3, 5, 16) Takorruukkami tulliuttumi, arnap atortittartup ‘illoqarfissuarmut’ assersuunneqarfigisaani, taassuma uppisitaanera nalunaarutigineqarpoq, Guutillu kiffai taanna ‘qimallugu aninissamut’ sakkortuumik kajumissaarneqarput. Illoqarfissuup aserorneqarnera inuppassuarnit qissatigineqarpoq. ‘Savaaqqalli  katinnera’ qilammi nuannaarutigineqangaarpoq. (Saqqummersitat 18:4, 9, 10, 15-19; 19:7) Takorruukkat 13-ianni ‘hestimik qaqortumik’ hestersoq inuiannut sorsukkiartorpoq. Taassuma Saatanip silarsuaa ajortoq piuneeruppaa. — Saqqummersitat 19:11-16.

“Pulateriaarsutoqaq, tassaasoq Diaavulu Saatanilu” qanoq pineqassava? Qaqugu ‘tatsimut innerusumut igitaassava’? Tamanna takorruukkat 14-ianni ilaatigut sammineqarpoq. (Saqqummersitat 20:2, 10) Takorruukkat kingulliit marluk Kristusip ukiuni tusindini naalakkersuinerani inuunissamut qilanaartuutaapput. ‘Saqqummersitat’ naalerneranni Johannesip takuaa ‘kuussuaq imermik inuussutaasumik imilik’ aqqusernup nerutuup qeqqatigut kuuttoq, ‘imerusuttullu’ tamarmik nuanningaartumik qaaqquneqarput. — Saqqummersitat 1:1; 22:1, 2, 17.

Allassimaffiit pillugit apeqqutinut akissutit:

17:16; 18:9, 10 — Sooq ‘nunarsuarmi kunngit’ peqatigiiffik namminneq suujunnaarsitartik aliasuutigaat? Aliasupput namminissarsiornertik pissutigalugu. Babylonersuup aserugaanerata kingorna kunngit paasissagunarpaat taanna imminnut qanoq iluaqutaatigisimasoq. Naqisimanninniarneri taassuma upperisarsiornikkut akuerineqarsinnaasutut isigineqalersippai. Aamma Babylonersuup taakku inuusuttunik sakkutuussarsiorneranni ikiorpai. Aammattaaq inunnik naqisimanneqataalluinnarpoq.

19:12 — Jiisusip nammineq kisimi ilisimasaminik ateqarnera qanoq paasisariaqarpa? Ateq taanna Naalakkap ulluani Jiisusip inissisimaffigisaanut immikkullu pisinnaatitaaffiinut — soorlu Esaja 9:5-imi eqqaaneqartunut — assersuutaasorinarpoq. Jiisusip kisimi ateq taanna nalunngilaa, ima paasillugu immikkut pisinnaatitaaffini immikkorluinnaq ittuusut aamma nammineq kisimi taama qaffasitsigisumik inissisimaffeqarnerup qanoq paasisariaqarnera nalunngikkaa. Jiisusilli immikkut pisinnaatitaaffimmi taakkua ilaat nuliassaqatigiinnut ilaasortanut agguaappai ‘atini nutaaq’ taakkununnga allallugulusooq. — Saqqummersitat 3:12.

19:14 — Harmagedonimi sorsunnermut kikkut Jiisusi hesteqatigaat? Sakkutuunut qilammiusunut Guutip sorsunnerani Jiisusimik ingerlaqateqartunut ilaassapput inngilit aammalu ajugaasut tanitat qilammi akissarsisinneqareersut. — Matthæusi 25:31, 32; Saqqummersitat 2:26, 27.

20:11-15 — Kikkut aqqi ‘inuunerup mappersagaani’ allassimappat? Mappersakkami tamatumani allassimapput inuunermik naassaanngitsumik tunineqarumaartut — kristumiut tanitat, amerlangaartunut ilaasut Guutimullu kiffaasut aalajaatsut ‘iluartut makititaaneranni’ inuuleqqittussat — aqqi tamarmik. (Apustilit Suliaat 24:15; Saqqummersitat 2:10; 7:9) ‘Iluaatsut makititaaneranni’ inuunermut makititaasut aqqi ‘inuunerup mappersagaani’ allanneqassapput aatsaat ‘mappersakkani’ ilitsersuussutitalinni Kristusip ukiuni tusindini naalakkersuinerani ammarneqartuni ‘allassimasut malillugit’ iliorunik. Atilli allanneqarsimasut peerneqarsinnaapput. Tanitat aqqi, taakku toqumut allaat aalajaassimappata, allassimajuartussanngorlugit allanneqassapput. (Saqqummersitat 3:5) Nunarsuarmi inuunermik tunineqarnissamik neriugisallit aqqi allassimajuartussanngorlugit allanneqassapput ukiut tusindit naalerneranni naggammik misilinneqarnertik anigorsimagunikku. — Saqqummersitat 20:7, 8.

Ilinniarfigisinnaasavut:

17:3, 5, 7, 16. ‘Ilisimassuseq pavannga pisoq’ “arnap taassuma nersutillu issiaffigisaata . . . anngigisartaannik” paasinnissinnaannguutigaarput. (Jaaku 3:17) Nersut assersuutaasoq annoraassatut aappallarissutut aappalutsigisoq siullermik Folkeforbund-itut saqqummerpoq kingusinnerusukkullu Naalagaaffiit Peqatigiit-tut saqqummeqqilluni. Anngigisap, imaluunniit isertukkap, tamatuma qulaarneqarnera Guutip naalagaaffia pillugu nutaarsiassamik nuannersumik aallussilluarluta oqaluusserusulissutigalugulu ulloq Jehovap eqqartuussiffissaa pillugu mianersoqquserusulissutigaarput, ilaa?

21:1-6. Guutip naalagaaffiata aqutsinerani pilluaqqussutit siulittuutigineqartut piviusunngorumaarnerat qularutiginngilluinnarsinnaavarput. Sooq? Pilluaqqussutit taakku pillugit ima allassimasoqarmat: ‘Pisussat pereerput!’

22:1, 17. ‘Kuussuaq imermik inuussutaasumik imilik’ Jehovap inuit naalattut ajortimit toqumillu annaanneqarsinnaaqqullugit aaqqissuussaanut assersuutaavoq. Erngup tamatuma ilaa maannangaaq pineqarsinnaavoq. ‘Imermik inuussutaasumik akeqanngitsumik’ pinissamut kajumissaarut qujamasuutigiinnassanngilarput, aammali allat pileraluta taamatut kajumissaassavavut! (w09 02/15-E)

[Quppernerup ataani ilanngussat]

[Qupp. 31-mi assiliartaq]

Guutimut naalattut Guutip naalagaaffiata naalakkersuinerani pilluaqqussutit nalissaqanngitsut misigissavaat!