Takuuk, kiffaq Jehovap nuannarisaa!

“Aajuna kiffara, . . . nuannarisara!” — ESAJA 42:1.

1. Ingammik eqqaaniaanissaq qanilliartortillugu Guutip innuttai sunissamut kajumissaarneqarpat, tamatumunngalu suna pissutaava?

MAANNA Kristusip toquneranik eqqaaniaalluni nalliuttorsiornissaq qanillimmat, Guutip innuttaasa apustilip Paulusip ‘Jiisusimik uppernerup aqqutissiuussisuanik naammassisitsisuanillu tunaarinninnissamik’ siunnersuutaa malippassuk pitsaassaaq. Paulusilu ima nangippoq: “Qasuleqqunasi nikalloqqunasilu isiginiarsiuk taanna ajortuliortunit taama assortorneqartigigaluarluni ilalaaginnartoq.” (Hebræerit 12:2, 3) Kristusip aalajaalluni inuuneranik, imminut pilliutigineranik naggaserneqartumik, misissuineq kristumiut tanitat taakkualu suleqataasa, savat allat, Jehovamut aalajaallutik kiffartortuarnissamut ‘nikallornaveersaarnissamullu’ iluaqutigissavaat. — Naleqqiuguk Galatiamiut 6:9.

2. Esajap siulittuutai Guutip erneranut tunngasut sumik ilinniarfigisinnaavavut?

² Jehovap pruffiiti Esaja isumassarsisillugu siulittuuterpaalunnik ernerminut tunngasunik allatsippaa. Siulittuutit taakku ‘uppernerup aqqutissiuussisuanik naammassisitsisuanillu’, Jiisusimik Kristusimik, ‘tunaarinninnissamut’ iluaqutigissavavut. * Taakkunani taassuma inuttut pissusia paasinarsisinneqarpoq, aamma oqaluttuarineqarput naalliuutigiumaagai aamma kunngitut utertitsisutullu qutsissisinneqarumaarnera. Taakku eqqaaniaalluni nalliuttorsiornermik, ukioq manna sisamanngornermi apriilip qulingiluaani seqernup tarrinerata kingorna pisussamik, paasinninnerulissutigissavavut.

 Kiffaq kinaanersoq paasineqarpoq

3, 4. (a) Oqaaseq ‘kiffaq’ Esajap allagaani kikkut pillugit atorneqarpa? (b) ‘Kiffap’ Esajap allagaani kapitalini 42, 49, 50, 52 aamma 53-imi eqqaaneqartup kinaanera Biibilimi qanoq ersersinneqarpa?

³ Oqaaseq ‘kiffaq’ Esajap allagaani arlaleriarluni atorneqarpoq. Oqaaseq taanna ilaannikkut pruffiitimut taassumunnga tunngatillugu atorneqartarpoq. (Esaja 20:3; 44:26) Ilaannikkut Israelikkunnut tamanut, imaluunniit Jaakumut, tunngatillugu atorneqartarpoq. (Esaja 41:8, 9; 44:1, 2, 21) Kiffarmi pillugu siulittuutit maluginiarnartut Esajap allagaani kapitalini 42, 49, 50, 52 aamma 53-imi allassimasut? Kapitalini taakkunani Jehovap kiffaata kinaanera Kristumiut Allagaataanni Grækerisuuni erseqqissumik paasinarsisinneqarpoq. Soqutiginarpoq dronningip atorfilittaata Etiopiamiup Apustilit Suliaanni eqqaaneqartup siulittuutit taakkua ilaannik atuarnera, iivangkiiliumik oqaluussissutiginnittartumit Filipimit anersaamit siulersorneqartumit orninneqarami. Allassimaffiit maanna Esaja 53:7, 8-mi allassimasut atuareerlugit dronningip atorfilittaata Filipi ima aperaa: “Qinnuigaakkit oqarfigeqqullunga kina pruffiitip tassani eqqartoraa. Imminut pinerpoq, allaluunniit pinerpaa?” Filipip ingerlaannaq nassuiarpaa Esajap Missiarsi, Jiisusi, pigaa. — Apustilit Suliaat 8:26-35.

⁴ Jiisusi suli naalungiarsuutillugu angutip naapertuilluartup Simeonimik atillip anersaamit illernartumit sunnerneqarluni nalunaarutigaa ‘meeraq Jiisusi’ tassaalerumaartoq “qaammaqqut Guutimik nalusunut saqqummersinneqartussaq”, soorlu tamanna Esaja 42:6-imi aamma 49:6-imi siulittuutigineqartoq. (Lukasi 2:25-32) Aamma Jiisusip unnummi killisiorneqarfimmini nikanarsarneqarnera Esaja 50:6-9-mi siulittuummi eqqaaneqarpoq. (Matthæusi 26:67; Lukasi 22:63) Ukiumi 33-mi piinsip ulluata kingorna apustilip Petrusip Jiisusip Jehovamut ‘kiffaanera’ erseqqissumik oqaatigaa. (Esaja 52:13; 53:11; atuaruk Apustilit Suliaat 3:13, 26). Missiarsi pillugu siulittuutit taakku sumik ilinniarfigisinnaavavut?

Jehovap kiffani ilinniartippaa

5. Kiffaq qanoq ilinniartinneqarpa?

⁵ Guutip kiffaa pillugu Esajap siulittuutaasa ilaat Jehovap angajulliliaatalu, taanna inuttut inunngunngikkallarmat, qanittumik imminnut attaveqarnerannik paasinarsisitsivoq. (Atuaruk Esaja 50:4-9). Kiffap nammineq ersersippaa suli Jehovamit ilinniartinneqarluni, ima oqarami: “Siutiga itersartarpaa ajoqersukkap pisarneratut tusarnaaqqullunga.” (Esaja 50:4) Piffissap sivisoqisup tamatuma ingerlanerani kiffap taassuma Ataatani tusarnaartarpaa ajoqersukkatullu naalalluni ilinniarfigisarlugu. Qilammik nunarsuarmillu Pinngortitsisumit ilinniartinneqarnermik immikkut pisinnaatitaaffiup asseqanngilluinnassusia!

6. Kiffap Ataataminut naalatsigitilluinnarnera sumit erserpa?

⁶ Siulittuummi tamatumani kiffap Ataatani ‘Guutitut Naalakkatut’ eqqartorpaa. Siulittuutilli tamatuma allassimaqqaarfiani oqaaseq atorneqartoq Jehovap naalakkatut qutsinnerpaatut inissisimaffeqarneranik ersersitsivoq. Tamatumani erserpoq kiffaq Jehovap qilammi nunarsuarmilu kisimi oqartussaanera pillugu sallusuissummik tunngaviusumik paasinnillunilu akuerinnissimasoq. Taanna Ataataminut naalatsigitilluinnarnerminut ersiutaasumik ima oqarpoq: “Guutip Naalakkap siutiga ammarpaa. Naalasseriinngilanga tunuarnangalu.” (Esaja 50:5) Taanna Jehovap saniani avataarsuanik nunarsuarmillu inummillu pinngortitsinermi ‘suliortuuvoq’ (1900). Jehovap kiinaata saani nuannaarpoq, nunarsuarmilu taassuma pigisaani nuna naggorissoq inuillu nuannaarutigalugit. — Ussatit 8:22-31.

7. Kiffap annikilliornermini Ataataminit annertoqqusersorneqarnissaminik qularutiginninnginnera sumit erserpa?

⁷ Kiffap ilinniartinneqarnini inunnillu asanninnini nunarsuarmut pigami sakkortuumik akerlilersorneqalerami iluaqutigai. Aamma taamatut akerlilersorneqaraluarluni Ataatami piumasaatut iliornini nuannaarutigiuarpaa. (Tussiaat 40:9; Matthæusi 26:42; Johannesi 6:38) Nunarsuarmi annikilliornermini tamani Jiisusip qularutiginngilaa Ataataminit akuerineqarlunilu annertoqqusersorneqarnini. Esajap siulittuineratut Jiisusi ima oqarsinnaasimavoq: “Pinngitsuutitsisissara qanippoq; . . . Uannik saqitsaassiniartoqaruni taanna sassarli! Guutip Naalakkap ikiormanga kia pisuutissavaanga?” (Esaja 50:8, 9) Jehovap kiffani aalajaatsoq nunarsuarmi kiffartornerani ikiorsimagaa qularnanngivippoq, soorlu Esajap siulittuutaasa ilaanni allami tamanna ersertoq.

Kiffap nunarsuarmi kiffartornera

8. Jiisusip Esaja 42:1-imi siulittuutigineqartutut Jehovamit ‘qinigaanera’ sumit erserpa?

⁸ Biibilimi oqaluttuarineqarpoq Jiisusi ukiumi  29-mi kuisimmat qanoq pisoqarnersoq: ‘Anersaap Illernartup aqqarfigaa; nipilu qilammit tutsiuppoq: “Illit tassaavutit ernera asasara, nuannarisaraakkit.”’ (Lukasi 3:21, 22) Jehovap taamaalilluni paasitippaa ‘qinikkani’, Esajap siulittuutaani eqqaaneqartoq, kinaanersoq. (Atuaruk Esaja 42:1-7). Siulittuut tamanna Jiisusip nunarsuarmi kiffartornermini maluginiarnartumik eqquutitippaa. Matthæusip iivangkiiliumini Esaja 42:1-4-mi allassimasut issuarpai Jiisusimullu tunngatillugu atorlugit. — Matthæusi 12:15-21.

9, 10. (a) Jiisusip nunarsuarmi kiffartornermini Esaja 42:3 qanoq eqquutitippaa? (b) Jiisusi nunarsuarmiitilluni ‘iluarnermik’ qanoq ililluni ajugaatitsiva, qaqugulu ‘iluarnermik nunami atortuulersitsissava’?

⁹ Juutit upperisarsiornikkut siuttuisa inuinnaat asissorpaat. (Johannesi 7:47-49) Inuinnaat ajortumik pineqartarput ‘ipeqqamullu qamilersumut’ (1990) ‘sullortuumullu naffalimmut’ assersuunneqarsinnaallutik. Jiisusilli piitsunik annikilliortunillu misigeqatiginninnini ersersippaa. (Matthæusi 9:35, 36) Inussiarnerluni ima kajumissaarpai: “Ornissinga tamassi suleruluttusi nanertugaasusilu, qasuertissavassi.” (Matthæusi 11:28) Jiisusip “iluarneq ajugaatippaa” Jehovap eqqortut eqqunngitsullu pillugit najoqqutassiaanik taakku ilinniartillugit. (Esaja 42:3) Aamma ersersippaa Mosesip inatsisaanik maleruaanermi ingasaassinianngitsuusariaqarlunilu nallittuisuusariaqarneq. (Matthæusi 23:23) Aamma suut eqqortuunerat ersersippaa, paqumisunnani pisuunut piitsunullu oqaluussinermigut. — Matthæusi 11:5; Lukasi 18:18-23.

¹⁰ Esajap aamma siulittuutigaa Jehovap ‘qinigaata’ ‘iluarnermik nunami atortuulersitsiumaarnera’. (Esaja 42:4) Taanna taamaaliorumaarpoq naalagaaffimmi Missiarsikkoortumi kunngisut naalagaaffiit nunarsuarmiittut tamaasa qanittukkut suujunnaarsikkunigit taakkununngalu taarsiullugu nammineq naapertuilluartumik naalakkersuileruni. Silarsuaq nutaaq ‘iluassutsip najugarisassaa’ atulersissavaa. — 2 Petrusi 3:13; Danieli 2:44.

‘Qaammaqqut’ aamma ‘angerutaasoq’

11. Jiisusip ukiuni hundredelinni siullerni ‘inuiannut qaammaqqutaanera’ qanoq paasisariaqarpa, ullutsinnilu aamma qanoq ‘qaammaqqutaava’?

¹¹ Esaja 42:6 eqquutitillugu Jiisusi ilumut tassaavoq ‘inuiannut qaammaqqutaasoq’. Nunarsuarmi kiffartornermini siullermik juutinut anersaakkut qaammaqqutaavoq. (Matthæusi 15:24; Apustilit Suliaat 3:26) Jiisusili aamma ima oqarpoq: “Uanga silarsuarmut qaammaqqutaavunga.” (Johannesi 8:12) Juutinut inuiannullu qaammaqqutaalerpoq, anersaakkut qaammarsaannarnagit, aammali inuunini naammalluinnartoq akissatut tunniullugu inuit tamarmik utertinneqaatissaattut. (Matthæusi 20:28) Makititaanermi kingorna ajoqersukkani imminik pilluni nalunaajaaqquai ‘nunarsuup isua tikillugu allaat’. (Apustilit Suliaat 1:8) Paulusip Barnaballu kiffartornerminni oqariartaaseq “inuiannut qaammaqqutinngortippakkit” issuarpaat taannalu juutiunngitsunut oqaluussinerminnut tunngatillugu. (Apustilit Suliaat 13:46-48; naleqqiuguk Esaja 49:6). Oqaluussineq tamanna suli ingerlavoq, Jiisusimmi qatanngutai tanitat nunarsuarmiittut taakkualu suleqataat anersaakkut qaammarsaapput inuillu Jiisusimik, ‘inuiannut qaammaqqutaasumik’, upperinnilernissaannut ikiorlugit.

12. Jehovap kiffani qanoq ililluni ‘innuttaminut angerutaalersippaa’?

¹² Siulittuummi tamatumani Jehovap kiffani qinikkani ima oqarfigaa: “Piliaraakkit angerutaalersillutillu innuttannut.” (Esaja 42:6) Saatani ilungersorpoq Jiisusi suujunnaarsinniarlugu akornuserniarlugulu nunarsuarmi kiffartornerminik  naammassinninniarnerani, Jehovalli taanna piffissaq toquffissaa tikillugu sernissorpaa. (Matthæusi 2:13; Johannesi 7:30) Taava Jehovap Jiisusi makitippaa inunnullu nunarsuarmiittunut ‘angerutaasutut’, imaluunniit qularnaveeqqutitut, tunniullugu. Angerutaasoq taanna, pingaartorsiorluni neriorsuut tamanna, Guutip kiffaata aalajaatsup anersaakkut taarsiortunik aniguisitsisarluni ‘inuiannut qaammaqqutaajuarnissaanut’ qularnaveeqqutaavoq. — Atuaruk Esaja 49:8, 9. *

13. Jiisusi nunarsuarmi kiffartornermini ‘taarmiusunik’ qanoq aniguisitsiva, qanorlu ililluni ullumikkut suli taamaaliortarpa?

¹³ Neriorsuummut tamatumunnga naapertuuttumik Jehovap kiffaa qinigaq ‘tappiitsut isaannik uisitsissaaq’, ‘parnaarussat parnaarussivimmit anisissavai’ “taarmiusullu” aniguisillugit. (Esaja 42:7) Jiisusi nunarsuarmi kiffartornermini taamaaliorpoq upperisarsiornikkut ileqqutoqqat eqqunngitsut qulaarnerisigut Guutillu naalagaaffia pillugu nutaarsiassamik nuannersumik oqaluussissutiginninnermigut. (Matthæusi 15:3; Lukasi 8:1) Taamaalilluni juutit imminut ajoqersuganngortut upperisarsiornikkut inussiaanermit aniguisippai. (Johannesi 8:31, 32) Taamatuttaaq aamma juutiunngitsut millionillit anersaakkut aniguisinneqarnissaannut ammaassivoq. Ajoqersukkani ‘aallaqquai inunnillu inuiannit tamaneersunik ajoqersuganngortitsiortoqqullugit’ neriorsorlugillu “pissutsit aaqqissuussaanerata naggatissaanut allaat” najorumaarlugit. (Matthæusi 28:19, 20, NV) Kristusi Jiisusi silarsuaq tamakkerlugu oqaluussinermik tamatuminnga qilammiit nakkutilliivoq.

Jehovap kiffaq qutsissisippaa

14, 15. Sooq aamma qanoq Jehovap kiffani qutsissisippaa?

¹⁴ Kiffaq Missiarsiusoq pillugu siulittuummi allami Jehova ima oqarpoq: “Takuat, kiffara iluanaarumaarpoq, qullartitaassaaq akitsisitaallunilu qutsissisitaangaarlunilu.” (Esaja 52:13) Erneq Jehovap kisimi oqartussaaneranut ilumoorfiginnilluni naalatsigitikkami sakkortunerpaamillu misilinneqarnermini aalajaattuarami Jehovamit qutsissisinneqarpoq.

¹⁵ Apustilip Petrusip Jiisusi ima allaatigaa: “Taanna qilaliarpoq Guutillu talerpiata tungaani issialluni, inngilit oqartussaatitaasullu pissaanerillu imminut naalatsigititaareermata.” (1 Petrusi 3:22) Tamatumunnga assingusumik apustili Paulusi ima allappoq: “Nikanartippoq naalalluni toqumut, sanningasulimmi [nappakkami anniartitaaffimmi, NV]  toqumut allaat. Taamaattumik akitsingaartippaa Guutip tunillugu atermik akimuisumik tamanik, Jiisusip aqqani seeqqummissammata tamarmik qilammiittut nunamiittullu nunallu ataaniittut, tamarmillu oqqat nassuissallutik: Jiisusi-Kristusi tassaavoq Naalagaq, Guutip Ataatap ataqqinaatissaanik.” — Filippimiut 2:8-11.

16. Jiisusi 1914-imi qanoq suli qutsissisinneqarneroqqippa, taamanimiillu sunik naammassisaqarpa?

¹⁶ 1914-imi Jehovap Jiisusi suli qutsissisinneroqqippaa. Taanna ‘qutsissisitaangaarpoq’ Jehovap naalagaaffimmi Missiarsikkoortumi kunnginngortimmani. (Tussiaat 2:6; Danieli 7:13, 14) Taamanimiilli ‘akeqqami akornanni naalagaalerpoq’. (Tussiaat 110:2) Siullermik Saatani taassumalu anersaapilui ajugaaffigai, nunarsuup eqqaanut igillugit. (Saqqummersitat 12:7-12) Taava Kyrositut annertut qatanngutini tanitat nunarsuarmiittut kinguleruttut ‘Babylonersuarmit’ aniguisippai. (Saqqummersitat 18:2; Esaja 44:28) Silarsuaq tamakkerlugu oqaluussinermi siuttuuvoq, tamannalu anersaakkut qatanngutaasa “allat” kingusinnerusukkullu ‘savat allat’ millionillit, ilumoorfiginnillutik ‘savarpannguanik’ suleqateqartut, katersorneqarnerannik kinguneqarpoq. — Saqqummersitat 12:17; Johannesi 10:16; Lukasi 12:32.

17. Jehovap ‘kiffaa’ pillugu Esajap siulittuutaanik atuaqqissaarnitsigut maannamut suut paasivavut?

¹⁷ Siulittuutinik maluginiarnartunik Esajap allagaaniittunik taakkuninnga misissuineq Kunngitsinnik Utertitsisitsinnillu, Jiisusimik Kristusimik, ilumut pingaartitsinerulissutigaarput. Taassuma nunarsuarmi kiffartornermini ernerusutut Jehovamut naalatsigitinnera, nunarsuarmukanngikkallaramili Ataataminit ilinniartinneqarsimaneranik ersersitsivoq. ‘Inuiannut qaammaqqutaavoq’ nammineq oqaluussinermigut aamma oqaluussinermik ullumikkumut siulersuinermigut. Soorlu allaaserisami tulliuttumi misissussagipput, kiffaq Missiarsiusoq pillugu siulittuummi allami paasinarsisinneqarpoq taanna uagut iluaqutissatsinnut naalliullunilu toqujumaartoq, uagullu tamannattaaq ‘isiginiartariaqarparput’, maanna taassuma toquneranik eqqaaniaalluni nalliuttorsiornissaq qanillimmat. — Hebræerit 12:2, 3.

[Quppernerup ataani ilanngussat]

Uteqqiineq

• ‘Kiffaq’ Esajap siulittuutaani eqqaaneqartoq kinaava, qanorlu ililluta tamanna nalunngilarput?

• Kiffaq Jehovamit qanoq ilinniartinneqarpa?

• Jiisusi qanoq ililluni ‘inuiannut qaammaqqutaava’?

• Kiffaq qanoq qutsissisinneqarpa?

[Atuaqqissaarnermi apeqqutit]

[Qupp. 21-mi assiliartaq]

Filipip dronningip atorfilittaa Etiopiamiu nassuiaappaa ‘kiffaq’ Esajami eqqartorneqartoq Jiisusiusoq Missiarsi

[Qupp. 23-mi assiliartaq]

Jiisusip Jehovamut kiffaagami qinigaq piitsut annikilliortullu misiginneqatigingaartarpai

[Qupp. 24-mi assiliartaq]

Jiisusi Ataataminit qutsissisinneqarpoq naalagaaffimmilu Missiarsikkoortumi kunnginngortinneqarluni