Jiisusip sumik ilinniartikkaatigut

Guutip naalagaaffia pillugu

Guutip naalagaaffia suua?

Guutip naalagaaffia naalagaaffiuvoq nunarsuarmut tamarmut naalakkersuisussatut Guutimit pilersinneqarsimasoq. Jiisusi ima oqarpoq: “Taamaattumik ilissi ima qinussaasi: . . . Naalagaaffiit tikiulli, piumasat qilammisut nunamissaaq pili.” — Matthæusi 6:9, 10; Danieli 2:44.

Kikkut Guutip naalagaaffiani naalakkersuissappat?

Jiisusi Guutip naalagaaffiani naalakkersuisussatut inunngorpoq. Jiisusip anaanaa inngilip ima oqarfigaa: “Guutillu [Jehovap] tunissavaa ataataata Daavip issiavissaarsuanik; . . . kunngiussaaq.” (Lukasi 1:30-33) Aamma Jiisusip ajoqersukkami ilai naalakkersueqatissamisut toqqarpai. Apustilini ima oqarfigai: “Ilissi uannut najuuttuartuuvusi misilinneqarfigisanni. Soorlu Ataatama naalagaaffik uannut pigitikkaa, taamatut uanga ilissinnut pigitippara.” (Lukasi 22:28, 29; Danieli 7:27) Jiisusip ajoqersugaasa katillutik 144.000-iusut taanna naalakkersueqatigissavaat. — Saqqummersitat 5:9, 10, 1936; 14:1.

Guutip naalagaaffia suminngaanniit naalakkersuissava?

Guutip naalagaaffia qilamminngaanniit naalakkersuissaaq. Jiisusip ajoqersukkani ima oqarfigai: ‘Inissassinnik [qilammi] piareersaakkiartoreerussi tikiuteqqikkumaarpunga uannullu pisikkumaarlusi ilississaaq uanga najugarisanneeqqullusi. Uanga Ataatamut aallassaanga.’ — Johannesi 14:2, 3, 12; Danieli 7:13, 14.

Ajussuseq Guutip naalagaaffianit qanoq iliuuseqarfigineqassava?

Jiisusip nunarsuaq minguiassavaa inunnik ajortunik piiaanermigut. Ima oqarpoq: “Inuup Ernera  [Jiisusi] naalannassutsimini tikiukkuni inngilit tamaasa ilagalugit, taava naalannassutsimi issiavissaarsuanut ingissaaq. Inuiaqatigiillu tamarmik saavanut katersuutissapput, avissaartissavaalu . . . Taakkulu [ajortut] aallarumaarput naassaanngitsumik pillarneqassallutik [uternaveersitaassallutik, NV] iluartulli naassaanngitsumik inuuneqassallutik.” — Matthæusi 25:31-34, 46.

Kikkut Guutip naalagaaffiani innuttaassappat?

Jiisusi ima oqarpoq: “Pilluarput qanilaartut, taakkuami nunarsuaq kingornutissavaat.” (Matthæusi 5:5; Tussiaat 37:29; 72:8) Nunarsuaq inunnik asaqatigiinnermik ilinniartunik ulikkaassaaq. Jiisusip ajoqersukkani ima oqarfigai: “Inassummik nutaamik tunivassi: Asaqatigiissaasi. Soorlu uanga asagissi, taamattaaq ilissi asaqatigiissaasi. Asaqatigiikkussi tamatumuuna tamarmik paasissavaat ajoqersugarigissi.” — Johannesi 13:34, 35.

Guutip naalagaaffia inuit nunarsuarmiittut pillugit sussava?

Jiisusip inuit nappaatinit tamanit ajorunnaarsissavai. Taassuma nunarsuarmiitilluni inuppassuit “Guutip naalagaaffianik oqaluffigai napparsimasortaallu ajorunnaarsillugit”. (Lukasi 9:11) Apustilip Johannesip Jiisusi makititaasimasoq takorruukkami takoreerlugu ima allappoq: “Takuakkalu qilak nutaaq nunalu nutaaq . . . Tusarparalu nipi nipitoqisumik issiavissaarsuarmit tutsiuttoq: Guuti ineqarfeqalerpoq inunni. . . . Qulliillu tamaasa isaannit allarterumaarpai, toqulu peerukkumaarpoq.” — Saqqummersitat 21:1-4.

Guutip naalagaaffiata Paratiisi nunarsuarmi pilerseqqissavaa. Pinerluttoq, Jiisusip toqutaaqataa, ima oqarpoq: “Jiisusi, naalagaaffinnut piguit eqqaaginga.” Jiisusillu ima akivaa: “Ilumut, ullumi oqarfigaakkit: Paratiisimeeqatigiumaarparma.” (NV) — Lukasi 23:42, 43; Esaja 11:4-9. (wp08 05/01-E)

Paasisaqarnerorusukkuit atuakkami Ilisarsineq inuunermut naassaanngitsumut sammisoq-mi kapitali 10 * atuarsinnaavat

[Quppernerup ataani ilanngussaq]