Jiisusip oqaasii qinnutinnut sunniuteqartittarpigit?
Jiisusip oqaasii qinnutinnut sunniuteqartittarpigit?
‘Jiisusi oqalulluni inermat ajoqersuutaa inuit tupigusuutigingaarpaat.’ — MATTHÆUSI 7:28.
1, 2. Sooq inuppassuit Jiisusip ajoqersueriaasia pillugu uissuummippat?
GUUTIP ernituata oqaaserisimasai akuerisariaqarpavut inuunitsinnilu maleruartariaqarlugit. Inunnik allanik taassumatut oqaluttoqarsimanngisaannarpoq. Aammami inuit taassuma ajoqersueriaasia pillugu uissuummilluinnarput. — Atuaruk Matthæusi 7:28, 29.
2 Guutip ernera allakkanik ilisimasut pisarnerattut ilinniartitsinngilaq, taakkua oqalugiaatitik inuit naammalluinnanngitsut ajoqersuutaannik tunngaveqartittarmatigit. “Naalattariaqartutut” ajoqersuisarpoq, oqaaserisai Guutimeersuugamik. (Johannesi 12:50) Taamaattumik maanna Jiisusip qaqqami oqaluutsimini nangilluni oqaaserisai aamma taakkua qinnutitsinnut qanoq sunniuteqartariaqarnerat misissoriartigit.
Ilumoortuusaartut pisarnerattut qinusaqinasi
3. Jiisusip oqaasii Matthæusi 6:5-imiittut pingaarnersiukkit.
3 Qinuneq pallorfiginninnermut ilumoortumut ilaavoq pingaarutilik, uagullu Jehovamut qinujuartariaqarpugut. Qinnutivulli Jiisusip qaqqami oqaluutsimini oqaaqqissaarutaanut naapertuuttariaqarput, ima oqarami: “Qinugaangassi ilumoortuusaartutut iliussanngilasi; taakkuami synagogini aqqusernillu paarlannerini qeqarlutik qinuneq nuannarillaaraat inunnut malugeqqunermik. Ilumut oqarfigaassi: Taakkua akissarsiassartik pereerpaat.” — Matthæusi 6:5.
4-6. (a) Sooq farisiiarit “synagogini aqqusernillu paarlannerini” qeqarlutik qinuneq nuannaraat? (b) Ilumoortuusaartut taakkua qanoq ilillutik “akissarsiassartik pereerpaat”?
4 Jiisusip ajoqersugai qinugaangamik ‘ilumoortuusaartut’, farisiiarit imminut iluartuutittut, pisarnerattut iliortussaanngillat, taakku upperluartuusaaginnarmata. (Matthæusi 23:13-32) Ilumoortuusaartut taakkua “synagogini aqqusernillu paarlannerini” qeqarlutik qinuneq nuannarisarpaat. Sooq? “Inunnut malugeqqunermik”. Ukiuni hundredelinni siullerni juutit qinusarput katersorsimasuni naalaffimmi ikikkagassanik pilliisoqarnerani (ullaakkut qulingiluat missaanni ualikkullu pingasut missaanni). Jerusalemimi najugallit ilarpassui pallorfiginnittut allat peqatigalugit naalaffiup eqqaani qinusarput. Illoqarfinni allani juutit upperluarniartut synagogini qeqarlutik ullormut marloriarlutik qinusarput. — Naleqqiuguk Lukasi 18:11, 13.
5 Inuit amerlanersaat naalaffimmut synagogimulluunniit qanittumi najugaqannginnamik piffissat taakku nalaanni sumiikkaluarunilluunniit qinusinnaapput. Ilaat qinunissamut piffissanngoraangat ‘aqqusernit paarlanneriniinniartarput’. Saneqquttunut “malugeqqunermik” taamaaliortarput. Farisiiarit iluartuusaartut ‘takoqqusaaginnarlutik’ sivisuumik qinusarput qummut isigineqarniassagamik. (Lukasi 20:47) Soorunami uagut taamatut isiginnittaaseqartussaanngilagut.
6 Jiisusi oqarpoq ilumoortuusaartut taakkua ‘akissarsiassartik pereeraat’. Taakku inunnit allanit ataqqineqarlutillu akuerineqarnissartik kissaatigingaarpaat — allamilli akissarsinavianngillat. “Akissarsiassartik pereerpaat”, Jehovammi taakkua ilumoortuusaarlutik qinnutaat akerusunngilai. Jehovalli Jiisusip ajoqersugaasa ilumoortut qinnutaat akerusuppai, soorlu Jiisusip nangilluni oqaasiini tamanna ersertoq.
7. ‘Ininnguami’ qinusarnissamik peqqussut qanoq paasisariaqarpa?
7 “Illilli qinunialeruit ininnguannut iserit matulu matullugu, Ataatannullu isertortumiittumut qinugit. Ataatavillu isertortumut isigisup akilissavaatit.” (Matthæusi 6:6) Jiisusi matu matullugu ininnguami qinusaqqusimmat imaanngilaq katersorsimasut sinnerlugit qinusoqarsinnaanngitsoq. Tamanna siunnersuutigineqarpoq imminut malugeqquniaannarluni allanillu akuerineqarusuinnarluni qinusoqartaqqunagu. Tamanna eqqaamassavarput allat sinnerlugit qinunermik immikkut pisinnaatitaaffeqassagutta. Qinuneq pillugu Jiisusip nangilluni qanoq oqarnera misissoriartigu.
8. Matthæusi 6:7 naapertorlugu qinunermut tunngatillugu suna pinaveersaarneqassava?
8 ‘Qinusaraangassi Guutimik nalusutut iliortassanngilasi oqaaserpassualiorlusi [oqaatsisi uteqattaartassanngilasi, NV]; taakkumi isumaqartarput oqaatsitik amerlanaarunikkit tusarneqarumaarlutik.’ (Matthæusi 6:7) Jiisusip matumani qinusinnaatitaanermik atornerlueriaaseq alla eqqaavaa — tassa oqaatsinik uteqattaarineq. Qamannga pisumik qinnutinik qujaniutinillu uteqattaarinngisaannarnissarput pinngilaa. Jiisusi unnummi killuutigineqarfimmini Naatsiivimmi Getsemanemi qinugami ataasiarani ‘oqaatsini oqaasereqqippai’. — Markusi 14:32-39.
9, 10. Qinunitsinni uteqattaarisassannginnerput qanoq paasisariaqarpa?
9 Oqaatsinik uteqattaaraluta ‘Guutimik nalusut’ qinoriaasiannik ilaarsinissarput kukkunerussaaq. Taakkua oqaaseqatigiit pisariaqanngitsunik oqaaserpassuartallit alanngaarsinnaalersimasatik uteqattaartarpaat. Ba’alisiortut iluaqutiginngilaat guutipilumminnik torlorfiginnittarnertik “ullaamiit ulloqeqqanut oqarlutik: ‘Ba’ali, akitigut!’” (1 Kunngit 18:26) Ullumikkut inuit millionillit uteqattaarinernik ulikkaartunik sivisuumik qinusarput, isumaqarlutik “tusarneqarumaarlutik”. Qinnutinili takisuuni uteqattaarinertalinni ‘oqaatsinik amerlanaarinerup’ Guutip isaani naleqannginneranik paasinninnissamut Jiisusip ikiorpaatigut. Jiisusi nangilluni ima oqarpoq:
10 “Taakku assiginiaqinasigit. Ataatassimi pisariaqakkasi ilisimareerpai suliluunniit qinnuiginngikkissinni.” (Matthæusi 6:8) Juutit upperisarsiornikkut siuttuisa ilarpassui oqaaserpassualinnik sivisuumik qinusarput taamaalillutillu inuiaat juutiunngitsut qinoriaasiisigut assigilerlugit. Qamannga pisumik qinnutit unnersiutiginninnermik qujaniutinillu ilallit pallorfiginninnerup ilumoortup ilagai pingaarutillit. (Filippimiut 4:6) Kukkussaagulli oqaatsinik uteqattaarigutta isumaqarluta Guuti sunik pisariaqartitsinitsinnik oqaluttuunniarlugu uteqattaarinissaq pisariaqartoq. Qinugaangatta eqqaamasariaqarparput saaffigisatta ‘suliluunniit qinnuiginngikkitsinni pisariaqakkavut ilisimareertarai’.
11. Katersorsimasut sinnerlugit qinunissaq immikkut pisinnaatitaaffigilerutsigu suna eqqaamasariaqarparput?
11 Qinnutit akuersaarneqarsinnaanngitsut pillugit Jiisusip oqaasii Guutip oqaatsinik persuarsiorpaluttunik pisariaqanngitsunillu killinneqaatiginnittannginneranik uagutsinnut eqqaasitsissutaasariaqarput. Aamma paasisariaqarparput katersorsimasuni qinnutigineqartut tusarnaartunik ajasoortitsiniutaanngimmata imaluunniit eqqarsalersitsissanngimmata qaqugu aarmeertoqassanersoq. Aammattaaq qinnut aqqutigalugu nalunaaruteqarneq imaluunniit tusarnaartunut siunnersuineq Jiisusip qaqqami oqaluutsimi oqaasiisa anersaavannut naapertuutinngilaq.
Jiisusip ilinniartippaatigut qanoq qinussasugut
12. Qinnutip “aqqit illernartitaali”-p isumaa qanoq nassuiassaviuk?
12 Tassa Jiisusip ajoqersukkani qinunermik immikkut pisinnaatitaaffimmik atornerluinerup navianartuinut mianersoqquai, aammali suli allamik iliuuseqarpoq: Aammattaaq oqaluttuuppai qanoq qinusassasut. (Atuaruk Matthæusi 6:9-13). Qinnut taakkununnga ilinniartitsissutigisaa taakkualu najoqqutassatut atorsinnaasaat alanngaagassaananilu uteqattaagassaanngilaq. Uagut nammineq qinnutitsinnut najoqqutassaavoq. Taamaalilluni Jiisusip ersersippaa Guutip salliunneqartussaanera ima aallarniilluni: “Ataatarput qilanniittutit! Aqqit illernartitaali.” (Matthæusi 6:9) Guuti naleqqulluartumik ‘Ataatatsinnik’ taasarparput, taassumami pinngortippaatigut, aamma taannaavoq ‘qilanniittoq’, nunarsuup silaannartaanit ungasissupilussuarmi. (5 Mosesi 32:6; 2 Nalunaarsuutit 6:21; Apustilit Suliaat 17:24, 28) Oqaatsimi uiguut qasseersiutaasoq “-rput” atorneqarmat uppeqatitta aamma Guutimut qanittumik attaveqarnerannik eqqaasinneqarpugut. Oqaatsit “aqqit illernartitaali” Jehovap atermi Edenimi pikitsitsisoqarneraniilli kanngunarsagaaneranik tamarmik piiaanermigut aterminik illernarsisitsiniarluni iliuuseqarnissaanik qinnutaavoq. Qinnummut tamatumunnga akissutitut Jehovap nunarsuarmi ajussuseq tamaat piissavaa taamaalillunilu atini illernarsisillugu. — Ezekieli 36:23.
13. (a) Qinnut “naalagaaffiit tikiulli” qanoq eqquutissava? (b) Qinnut “piumasat qilammisut nunamissaaq pili” ilaatigut qanoq eqquutissava?
13 “Naalagaaffiit tikiulli, piumasat qilammisut nunamissaaq pili.” (Matthæusi 6:10) Qinnummi najoqqutassaasumi qinnutigineqartumut tamatumunnga tunngatillugu eqqaamasariaqarparput ‘Guutip naalagaaffia’ tassaasoq Jiisusip Kristusip ‘illernartortallu’ makititaasimasut taassuminnga ataasioqateqalersimasut qilammit naalakkersuinerat Missiarsikkoortoq. (Danieli 7:13, 14, 18; Esaja 9:5, 6) Guutip naalagaaffiata ‘tikiunnissaa’ qinnutigigaangatsigu tamatuma Guutip naalagaassusianik akerlilersuisunik nunamiusunik tamanik saassussinissaa qinnutigisarparput. Tamanna qanittukkut pissaaq, aamma tamanna silarsuaq tamakkerlugu naapertuilluarfiusumik, eqqissineqarfiusumik atugarissaarfiusumillu paratiiseqalerneranik kinguneqassaaq. (Tussiaat 72:1-15; Danieli 2:44; 2 Petrusi 3:13) Jehovap piumasaa maanna qilammi pivoq, piumasaatalu nunarsuarmi pinissaa qinnutigigaangatsigu Guutip nunarsuarmut siunertaminik naammassinninnissaa qinnutigisarparput, siunertaanullu ilaavoq itsaq iliortarsimanermisut akerlilersortiminik piiaanissaa. — Atuaruk Tussiaat 83:2, 3, 14-19.
14. “Ullormi matumani inuussutissatsinnik” qinnutiginninneq sooq naleqquppa?
14 “Ullormi matumani inuussutissatsinnik tunisigut.” (Matthæusi 6:11, NV) Taamatut qinunitsigut Guuti nerisassanik “ullormi matumani” pisariaqartunik tuneqqulluta qinnuigisarparput. Tamatumani erserpoq qularinngikkipput Guutip ullormut pisariaqartitatsinnik isumaginnissinnaanera. Sinnilimmik pinissamik qinnutaanngilaq. Ullut tamaasa pisariaqartitatsinnik pisarnissatsinnik qinnutaavoq, aamma Guutip mannamik Israelikkut katersueqqugamigit “ullormut pisariaqakkaminnik” katersueqqusinera pillugu uagutsinnut eqqaasitsissutaavoq. — 2 Mosesi 16:4.
15. Qinnut ‘akiitsukkatsinnik isumakkeerfigitigut, soorlu uaguttaaq akiitsortivut isumakkeerfigigivut’ qanoq paasisariaqarnersoq nassuiaruk.
15 Qinnutigineqartumi tulliuttumi qinnummi najoqqutassaasumiittumi uagut iliuuserisassarput saqqummiunneqarpoq. Jiisusi ima oqarpoq: ‘Akiitsukkatsinnik isumakkeerfigitigut, soorlu uaguttaaq akiitsortivut isumakkeerfigigivut.’ (Matthæusi 6:12) Lukasip iivangkiiliuani ersersinneqarpoq ‘akiitsukkat’ eqqartorneqartut tassaasut ‘ajortivut’. (Lukasi 11:4) Aatsaat uagutsinnut ajortuliorsimasut isumakkeerfigereerutsigit Jehovamit isumakkeerfigineqarnissarput ilimagisinnaavarput. (Atuaruk Matthæusi 6:14, 15). Allanik isumakkeerfiginneriaannaasariaqarpugut. — Efesosimiut 4:32; Kolossemiut 3:13.
16. Usserneqannginnissamik ajortumillu annaanneqarnissamik qinnutit qanoq paasisariaqarpat?
16 ‘Ussernartumut pisinnata, ajortumilli annaatsigut.’ (Matthæusi 6:13) Qinnutigineqartut imminnut atassuteqartut Jiisusip qinunermut najoqqutassiaaniittut taakku marluk qanoq paasissavavut? Manna qularnaappoq: Jehovap ajortuliornissamut usserneq ajorpaatigut. (Atuaruk Jaaku 1:13). Saatani — ‘ajortoq’ — taannaavoq ‘Ussiisuusoq’. (Matthæusi 4:3) Biibilimi Guuti eqqartorneqartarpoq arlaannik iliuuseqartutut, naak pisup pinissaanik akuerinniinnaraluartoq. (Ruthi 1:20, 21; Oqaluussisartup oqaasii 11:5) Taamaammat qinugaangatta ‘ussernartumut piseqqunata’ Jehova qinnuigisarparput taassumunnga naalannginnissamut usserniarneqarutta nakkaannarnissarput akuereqqunagu. Kiisalu ‘ajortumit annaanneqarnissarput’ qinnutigigaangatsigu Jehova qinnuigisarparput Saatanimit qoqassineqarnissarput akuereqqunagu. Aamma qularutiginngilluinnarsinnaavarput ‘Guutip artukkatsinnik usserneqarnissarput akuerinavianngikkaa’. — Atuaruk 1 Korinthimiut 10:13.
‘Qinujuarlusilu ujarlertuarlusilu kasuttortuaritsi’
17, 18. ‘Qinujuarnissaq, ujarlertuarnissaq kasuttortuarnissarlu’ qanoq paasisariaqaramik?
17 Apustilip Paulusip kristumioqatini kajumissaarpai ‘qinunerminni qasusueqqullugit’. (Romamiut 12:12) Jiisusi tamatumunnga assingusumik kajumissaarivoq ima oqarami: “Qinugitsi [Qinujuaritsi, NV], tunineqassaasi taava; ujarleritsi [ujarlertuaritsi, NV], nanisissaasi taava; kasuttoritsi [kasuttortuaritsi, NV], mappiunneqassaasi taava. Kinaluunniimmi qinusoq pissarsisarpoq, ujarlersorlu nanisisarpoq, kasuttortorlu mappiunneqartarpoq.” (Matthæusi 7:7, 8) Guutip piumasaanut naapertuuttumik ‘qinujuarneq’ naleqquppoq. Tamatumunnga naapertuuttumik apustili Johannesi ima allappoq: ‘Mannaavoq [Guutip] saavani nakimanngissutigisarput: Piumasaminut naapertuuttumik qinnuigigutsinni tusarumaaraatigut.’ — 1 Johannesi 5:14.
18 Jiisusip ‘qinujuarnissaq ujarlertuarnissarlu’ pillugit oqaasii imatut paasisariaqarput: Ilumoorullugu qinusassasugut ingerlaannarlu akineqanngikkaluarluta qinusarunnaassanngitsugut. Aamma Guutip naalagaaffiata pilluaqqussutissartai misigiumallugit ‘kasuttortuartariaqarpugut’. Guutilli qinnutitsinnik akisinissaa qularutiginngilluinnarsinnaavarput? Aap, Jehovamut ilumoortuarutta. Jiisusimi ima oqarpoq: “Kinaluunniimmi qinusoq pissarsisarpoq, ujarlersorlu nanisisarpoq, kasuttortorlu mappiunneqartarpoq.” Jehovamut kiffaasut ilarpassuisa Guutip ilumut ‘qinnutinik tusartartuunera’ misigisimavaat. — Tussiaat 65:3.
19, 20. Matthæusi 7:9-11-mi allassimasut eqqarsaatigalugit Jehova ataatamut nunamiusumut asannittumut qanoq assersuunneqarsinnaava?
19 Jiisusip Guuti ataatamut asannittumut meeqqaminut ajunngitsunik tunissuteqartartumut assersuuppaa. Takorlooriaruk Jiisusip qaqqami oqalugiarnerani najuuttutit imalu oqarnera tusarit: ‘Kia arlassi ernermi timiusamik qinnuigippani ujaqqamik tunissanerpaa aalisakkamilluunniit qinnuigippani pulateriaarsummik tunillugu? Ilissimi ajortuususi qitornasi tunissutinik ajunngitsunik tunisinnaagassigit, taava qularnannginnerungaarpoq Ataatassi qilanniittup imminut qinusut ajunngitsunik tuniumaarai.’ — Matthæusi 7:9-11.
20 Ataataasoq nunamiusoq ajorti kingornussani pissutigalugu ilaatigut ‘ajortuugaluarluni’ ernerminut pissusissamisoortumik tunniusimasarpoq. Ataataasup ernini salloqittarnavianngilaa, ‘tunissutinilli ajunngitsunik’ tuninissaa ilungersuutigissavaa. Guuti Ataataagami qilammiusoq asannittoq ‘ajunngitsunik’, soorlu anersaaminik illernartumik, ‘tunisassavaatigut’. (Lukasi 11:13) Tamanna akuerineqarsinnaasumik Jehovamut kiffartornissamut nukissaqalissutigissavarput, ‘tunissutimmi ajunngitsut naammalluinnartuusullu tamarmik’ taassumannga pisarput. — Jaaku 1:17.
Jiisusip oqaasii iluaqutigiuakkit
21, 22. Qaqqami oqaluutsip suut maluginiarnaqutigai, Jiisusillu tamatumani oqaasii ilinnut qanoq sunniuteqarpat?
21 Qaqqami oqaluuseq ilumut tassaavoq nunarsuarmi oqalugiaatigineqarsimasut pingaaruteqarnerpaartaat. Tamatuma maluginiarnaqutigai anersaakkut imaqarluarnini paasiuminarninilu. Tamatumani siunnersuutigineqartunik malinninnerput iluaqutigingaarsinnaavarput, soorlu allaaserisani ataqatigiinni atuareersimalikkatsinni tamanna ersertoq. Jiisusip oqaasii taakkua maanna inuunitsinnut iluaqutaasinnaapput aamma siunissamik pilluarnartumik neriuuteqalissutigisinnaavavut.
22 Allaaserisani sammisatsinni qaqqami oqaluutsimi oqaaserineqartut pingaaruteqangaartut ilaannaat misissorpavut. Tupinnanngilaq Jiisusimik tusarnaartut taassuma ‘ajoqersuutaa tupigusuutigingaaraat’. (Matthæusi 7:28) Qularnanngitsumik aamma uagutsinnut taamatut sunniuteqassaaq Ajoqersuisorsuup, Jiisusip Kristusip, oqaasiinik nalissaqanngitsunik taakkuninnga allanillu isumarput uummaterpullu immersortarutsigit. (w09 02/15-E)
Qanoq akissavit?
• Jiisusi ilumoortuusaartut qinnutaat pillugit qanoq oqarpa?
• Sooq qinugaangatta oqaatsivut uteqattaarnaveersaartariaqarpavut?
• Jiisusip qinunermut najoqqutassiaani suut qinnutigineqarpat?
• Qanoq ililluta qinujuarlutalu ujarlertuarlutalu kasuttortuarsinnaavugut?
[Atuaqqissaarnermi apeqqutit]
[Qupp. 21-mi assiliartaq]
Ilumoortuusaartut qinugaangamik takoqqusaarlutillu tusaaqqusaaginnartartut Jiisusip assuarai
[Qupp. 23-mi assiliartaq]
Nalunngiliuk sooq ullormut inuussutissanik qinnutiginninneq naleqqunnersoq?