‘Savaaraq malittuarpaat’

“Savaaraq sumulluunniit aallaraangat malittarpaat [malittuarpaat, NV].” — SAQQUMMERSITAT 14:4.

1. Jiisusip ajoqersugaasa ilumoortut taassuminnga malinninnertik qanoq isumaqarfigaat?

JIISUSI kiffartulernermi kingorna ukiut marluk affarlu missiliorlugit qaangiuttut ‘synagogimi Kapernaumimiittumi ajoqersuivoq’. Ajoqersugaasa ilarpassuisa taassuma oqalugiaataa mamiatsaatigaat, taannalu “qimappaat angalaqatigiunnaarlugulu”. Jiisusip ajoqersukkani aqqaneq-marluk aamma qimanniarneraanni aperimmagit Siimuut-Petrusi ima akivoq: “Naalagaq, kina ornissagatsigu? Illit oqaatsinik naassaanngitsumik inuussutaasunik pigisaqarputit, upperpugullu nalunagulu illit tassaasutit Guutip illernartua.” (Johannesi 6:48, 59, 60, 66-69) Jiisusip ajoqersugaasa ilumoortut taanna malikkunnaarusunngilaat. Anersaamik illernartumik taninneqareerlutik Jiisusip siulersuineranut naalatsigitittuarput. — Apustilit Suliaat 16:7-10.

2. (a)  “Inussiaq aalajaallunilu silatooq” imaluunniit ‘illumi pisortaq aalajaatsoq’ kinaava? (b) ‘Savaaqqamik malinninneq’ eqqarsaatigalugu inussiaq qanoq maligassiuilluarpa?

² Ullumikkut kristumiut tanitat pillugit qanoq oqartoqarsinnaava? Jiisusip ‘najuunnissaminut pissutsillu aaqqissuussaanerata naggataatungaanut nalunaaqqutit’ pillugit siulittuummini ajoqersukkani tanitat nunarsuarmiittut eqimattatut isigalugit ‘inussiatut aalajaallunilu silatuutut’ ‘illumilu pisortatut aalajaatsutut’ eqqartorpai. (Matthæusi 24:3, 45, NV; Lukasi 12:42, NV) Inussiaqatigiit eqimattatut isigalugit ‘Savaaqqamik sumulluunniit aallaraangat malinninnermut’ tunngatillugu maligassiuilluarnerpaapput. (Atuaruk Saqqummersitat 14:4, 5). Inussiaqatigiinnut ilaasortaasut anersaakkut ittumik niviarsiaajuarput ajoqersuutinit ileqqunillu ‘Babylonersuarmeersunik’, upperisarsiornerup eqqunngitsup silarsuarmi tamarmi naalagaaffissuaneersunik, mingutsinnginnermikkut. (Saqqummersitat 17:5) Ajoqersuinerluutinik “qanermiugisaqanngillat ippinnaateqarnatillu”, aamma Saatanip silarsuaanit mingutsinneqanngillat. (Johannesi 15:19) Siunissami tanitat kinguleruttut nunarsuarmiittut ‘Savaaraq’ qilammut ‘malikkumaarpaat’. — Johannesi 13:36.

3. Sooq inussiaqatigiinnik tatiginninnissarput pingaaruteqarpa?

³ Jiisusip inussiaq aalajaallunilu silatooq “inoqutiminut” — tassa inussiaqatigiinnut ilaasortaasunut tamanut — paarsisussanngortippaa taakkua ‘piffissaq eqqorlugu nerisassanik tunisaqqullugit’. Aamma inussiaq “pigisaminut tamanut” paarsisunngortippaa. (Matthæusi 24:45-47) ‘Pigisaanut’ ilaapput ‘savat allat’ ‘amerlangaartut’ amerliartortut. (Saqqummersitat 7:9; Johannesi 10:16) Tanitat tamarmik immikkut ‘savallu allat’ inussiaq imminnik paarsisussanngortitaasoq tatigisariaqannginnerpaat? Inussiaqatigiit uagutsinnit tatigineqartariaqarnerannut pissutissarpassuaqarpoq. Pissutaasut maluginiarnartut marluk ukuupput: (1) Jehovap inussiaqatigiit tatigai. (2) Jiisusittaaq inussiaq tatigaa. Taamaanneranut takussutissaasut misissoriartigit.

Jehovap inussiaq tatigaa

4. Sooq anersaakkut inuussutissat inussiap aalajaallunilu silatuup sassaalliutigisartagai tutsuigisinnaavavut?

⁴ Eqqarsaatigeriaruk inussiap aalajaallunilu silatuup suna anersaakkut inuussutissanik peqqinnartunik piffissaq eqqorlugu tunisisinnaannguutigineraa. Jehova ima oqarpoq: “Ilinniartissavakkit ilitsersorlutillu ingerlavissannik.” Imalu nangippoq: “Siunnersussavakkit, isigiuassavakkillu.” (Tussiaat 32:8) Aap, Jehovap inussiaatimi aqqutikkut eqqortukkut siulersorneqarnissaa isumagisarpaa. Taamaattumik Biibilip imarisaanik paasinninneq aamma paasinnittaatsit siunnersuutillu Biibilimik tunngavillit inussiap uagutsinnut ingerlateqqittagai tutsuigilluinnarsinnaavavut.

5. Sumit erserpa Guutip anersaava inussiaqatigiinnik nukissaqalersitsisuusoq?

⁵ Aamma Jehovap inussiaqatigiit anersaaminik  illernartumik pilluaqqusarpai. Jehovap anersaava takussaanngilaq, tamatumali sunniuteqarfigisamini ineriartortitai erseqqittarput. Eqqarsaatigeriaruk inussiap aalajaallunilu silatuup silarsuarmi tamarmi Jehova, taassuma ernera Guutillu naalagaaffia pillugu nalunaajaanermut tunngatillugu sunik naammassisaqarsimanera. Jehovap kiffaasa Guutip naalagaaffianik tusarliussaq nunani aamma qeqertani 230-nit amerlanerusuni oqaluussissutigaat. Tamanna Guutip anersaavata inussiaqatigiinnik nukissaqalersitsisarneranut uppernarsaataalluarpoq, ilaa? (Atuaruk Apustilit Suliaat 1:8). Silarsuaq tamakkerlugu Jehovap innuttai anersaakkut inuussutissanik pilersorsinnaajumallugit inussiaqatigiit pingaarutilinnik aalajangiisariaqartarput. Taamatut aalajangigaqaraangamik asanninnermik, saamanermik anersaallu inerititaanut attuumassuteqartunik allanik ersersitsisarput. — Galatiamiut 5:22, 23, NV.

6, 7. Jehovap inussiaq aalajaatsoq qanoq tatigitigaa?

⁶ Jehovap inussiaqatigiinnik aalajaatsunik qanoq tatiginnitsigineranik paasinninnissamut iluaqutigisinnaavarput taassuma inussiaqatigiinnut ilaasortaasunut neriorsuutaanik eqqarsaatiginninneq. Apustili Paulusi ima allappoq: ‘Qarlortaassuaq tutsiukkumaarpoq, toqusullu aserujuitsunngorlutik makikkumaarput, uagullu allanngortitaajumaarpugut. Aserujasorli taanna aserujuitsumik atisitinneqassaaq, toqujasorlu manna toqujuissusermik atisitinneqassaaq.’ (1 Korinthimiut 15:52, 53) Kristusip ajoqersugai tanitat aalajaallutik Guutimut kiffartornerminni inuit timaannik aserujasunik timeqarlutik toqusut pinngortitatut anersaatut inuunermut naassaanngitsumut makititaaginnanngillat. Toqujuissusermik — inuunermik killeqanngitsumik unitsinneqarsinnaanngitsumillu — tunineqarput. Tamatuma saniatigut aserujuissusermik tunineqarput, timimik qajannarsisinneqarsinnaanngitsumik tunineqarlutik, nukimmik allameersumik tunineqartariaarullutik. Saqqummersitat 4:4-mi makititaasimasut taakku kuultiusunik niaqoruteqarlutik issiavissaarsuarni issiasutut allaaserineqarput. Kristumiut tanitat siunissami kunngitut ataqqinassuseqassapput. Tamannaannaanngilarli.

⁷ Saqqummersitat 19:7, 8-mi ima allassimavoq: “Tipaatsullutalu qiimasutta unnersiutigalugulu Savaaraq katittussanngormat, nuliassaalu piareersareermat atisassinneqarlunilu ilupaassiamik qaallorissumik minguitsumik — ilupaassiamimmi atisassiat tassaammata illernartut suliaat iluartut.” Jehovap kristumiut tanitat ernermi nuliassaatut toqqarsimavai. Aserujuissuseq, toqujuissuseq, kunngitut ataqqinassuseq, Savaaqqamut katinneq — ila mianernangaassusiat! Tamakku Guutip tanitanik, ‘Savaaqqamik sumulluunniit aallaraangat malinnittuartunik’, tatiginninneranut takussutissaapput alutornartut.

 Jiisusip inussiaqatigiit tatigai

8. Jiisusip qanoq ililluni ersersippaa ajoqersukkani anersaamik taninneqarsimasut tatigalugit?

⁸ Jiisusittaaq ajoqersukkanik anersaamik taninneqarsimasunik tatiginnilluinnarneranut sunik takussutissaqarpa? Jiisusi nunarsuarmi inuunermini unnummi kingullermi ajoqersukkaminut aalajaatsunut aqqanilinnut neriorsuuteqarpoq. Taakku ima oqarfigai: “Ilissi uannut najuuttuartuuvusi misilinneqarfigisanni. Soorlu Ataatama naalagaaffik uannut pigitikkaa, taamatut uanga ilissinnut pigitippara [angerfigeqatigaassilu, soorlu Ataatama uanga angerfigeqatigigaanga, naalagaaffik pillugu, NV] uanga nerrivinni nerillusilu imersinnaaqqullusi naalagaaffinni issiavissaarsuarnilu issiaqqullusi Israelip naggueqatigiissortai aqqaneq-marluk eqqartuutissallugit.” (Lukasi 22:28-30) Angeruseq Jiisusip taamanikkut aqqanilinnut taakkununnga angeruserisaa kristumiunut tanitanut 144.000-inut tamanut atuutilerumaarpoq. (Lukasi 12:32; Saqqummersitat 5:9, 10; 14:1) Jiisusip taakku tatigisimanngitsuugunigit Guutip naalagaaffiani kunngisut taakku pissaaneqaqatiginiarlugit angerfigeqatigisimassanngikkaluarpai.

9. Kristusip ‘pigisaanut tamanut’ suut ilaappat?

⁹ Aammattaaq Jiisusip Kristusip inussiaq aalajaallunilu silatooq “pigisaminut tamanut” — Guutip naalagaaffiata soqutigisaanut nunarsuarmiittunut tamanut — paarsisussanngortippaa. (Matthæusi 24:47) Jiisusip pigisaanut ilaapput Jehovap Nalunaajaasuisa qullersaqarfiat, nunani arlalinni immikkoortortaqarfiit aamma silarsuaq tamakkerlugu ataatsimeersuartarfiit naalagaaffilersaarfiillu. Taakkununnga ilaapput Guutip naalagaaffianik oqaluussissutiginninneq ajoqersuganngortitsiortornerlu. Jiisusip tatiginngisani pigisaminik naleqangaartunik isumaginnittussanngortillugulu ingerlatsisussanngortissagaluarpaa?

10. Jiisusip Kristusip ajoqersukkaminik tanitanik najuinera sumit erserpa?

¹⁰ Jiisusi makititaasimasoq qilalianngitsiarluni ajoqersukkaminut aalajaatsunut saqqummerpoq neriorsorlugillu. Ima oqarpoq: ‘Takuat, ullut tamaasa najorpassi silarsuup naggatissaanut allaat.’ (Matthæusi 28:20) Jiisusip neriorsuutini eqqortippaa? Ukiuni 15-ini kingullerni Jehovap Nalunaajaasuisa ilagiivi silarsuaq tamakkerlugu 70.000-iniit 100.000-init amerlanerusunut amerleriarsimapput — 40 procenti sinnerlugu amerleriarlutik. Qanormi amerlatigisunik ajoqersuganngortoqarsimava? Inuit 4,5 millioningajaat ukiuni 15-ini kingullerni kuisissimapput — agguaqatigiissillugu ullormut 800-nit amerlanerusut. Taamatut maluginiarnartumik amerliartortoqarsimanera Kristusip ajoqersukkaminik tanitanik ilagiittut ataatsimiinneranni siulersuisarneranut ajoqersuganngortitsiortornerannilu tapersersuisarneranut uppernarsaataalluarpoq.

Inussiaq aalajaallunilu silatuvoq

11, 12. Inussiap aalajaallunilu silatunera qanoq erserpa?

¹¹ Jehova Guuti Jiisusilu Kristusi inussiamik aalajaallunilu silatuumik tatiginnilluinnarpata, uaguttaaq taakku tatigilluinnartariaqarpavut, ilaa? Inussiarmi imminut suliassiissutigineqartumik suliarinninnermini aalajaassimavoq. Assersuutigalugu atuagassiaq The Watchtower * ukiut 130-t missaanni saqqummersinneqartarsimavoq. Jehovap Nalunaajaasuisa ataatsimiittarneri, ataatsimeersuaarartarneri ataatsimeersuartarnerilu suli anersaakkut ineriartuutigaavut.

¹² Inussiaq aalajaatsoq aamma silatuvoq ima paasillugu nammineq piumasaannarminik iliunngisaannartoq, Jehova erseqqissumik suli siunnersuuteqanngitsoq iliuuseqarnermigut imaluunniit taassuma siunnersuutaa erseqqikkaluartoq iliuuseqannginnermigut. Assersuutigalugu upperisarsiornermi eqqunngitsumi siuttuusut silarsuarmi inuit ileqquinik namminissarsiortunik guutiitsoorpaluttunillu nipangiussiinnarlutik akuerinnittut imaluunniit allaat erseqqissumik akuersaarisut, inussiaq napiaaniutinut Saatanip silarsuaaniittunut mianersoqqusivoq. Inussiaq piffissaasukkut mianersoqqusilluarsinnaavoq Jehovamit Guutimit Jiisusimillu Kristusimit pilluaqquneqarami, taamaattumillu uagut taanna tatigilluinnartariaqarparput. Qanorli ililluta inussiamik aalajaallunilu silatuumik tatiginninnerput ersersissinnaavarput?

 Tanitat Savaaqqamik malinnittut ‘ingerlaqatigisigit’

13. Zakariap siulittuutaa naapertorlugu inussiamik aalajaallunilu silatuumik tatiginninneq qanoq ersersinneqarsinnaava?

¹³ Zakariap allagaani Biibilip ilaaniittumi ‘angutit qulit’ ‘Judakkuusumut’ ima oqartut eqqartorneqarput: “Ingerlaqatigissavassi.” (Atuaruk Zakaria 8:23). Oqaaseq “ingerlaqatigissavassi” atorlugu “Judakkuusoq” inuttut ataasiinnaanngitsutut saaffigineqarmat inunnut eqimattanut assersuutaavoq. Ullumikkut taanna tanitanut kristumiunut kinguleruttunut — ‘Israelimut Guutip pigisaanut’ ilaasunut — assersuutaavoq. (Galatiamiut 6:16) ‘Inuiaat assigiinngitsut tamarmik angutitaasa ilaat qulit’ savanut allanut amerlangaartunut assersuutaapput. Soorlu kristumiut tanitat Jiisusi sumunnaraluaraangalluunniit malittaraat, taamatuttaaq amerlangaartut inussiaq aalajaallunilu silatooq ingerlaqatigisarpaat, imaluunniit malittarpaat. Amerlangaartunut ilaasut ‘qilammit qaaqqussummik pisimasunut’ suleqataasutut ilisimaneqarnertik kanngusuutiginngisaannartariaqarpaat. (Hebræerit 3:1) Jiisusip tanitat “qatanngutiminik” taassallugit kannguginngilaa. — Hebræerit 2:11.

14. Kristusip qatanngutai ilumoorfiginnilluni qanoq tapersersorneqarsinnaappat?

¹⁴ Jiisusip Kristusip qatanngutiminik ilumoorfiginnilluni tapersersuineq imminik tapersersuinertut isigaa. (Atuaruk Matthæusi 25:40). Nunarsuarmi inuunissamik neriugisallit Kristusip qatanngutaanik anersaamik taninneqarsimasunik qanoq ilillutik tapersersuisaramik? Pingaartumik Guutip naalagaaffianik oqaluussissutiginninneranni ikiornerisigut. (Matthæusi 24:14; Johannesi 14:12) Ukiut qulikkuutaat ingerlaneranni tanitat nunarsuarmiittut ikiliartortut, savat allat amerliartorput. Nunarsuarmi inuunissamik neriugisallit, immaqa piffissaq tamaat oqaluussisartutut, oqaluusseqataagaangamik qatanngutitik tanitat ajoqersuganngortitsiortorneranni ikiortarpaat. (Matthæusi 28:19, 20) Aamma puiussanngilarput aningaasanik tunissuteqarnikkut suliamik tamatuminnga assigiinngitsutigut tapersersuisoqarsinnaanera.

15. Anersaakkut inuussutissat inussiap tunniuttagai inussiallu aalajangigai peqatigiissortanut tunngasut kristumiut tamarmik immikkut qanoq periarfigisariaqarpaat?

¹⁵ Anersaakkut inuussutissat inussiap aalajaatsup kristumiut ataatsimiinneri atuakkallu atuagassiallu Biibililersaarutit aqqutigalugit piffissaq eqqorlugu agguaattagai uagut kristumiut tamatta immikkut qanoq isigaavut? Qujamasulluta anersaakkut inuussutissanik ilangiisarpugut, aamma ilikkakkavut nuannaarluta atortarpavut? Inussiap aalajangigai peqatigiissortanut tunngasut qanoq periarfigisarpavut? Uagutsinnut  unnersuussutigineqartunut kajumilluta naalattarnerput Jehovap aaqqissuussaanik tutsuiginninnitsinnut ersiutaavoq. — Jaaku 3:17.

16. Sooq kristumiut tamarmik Kristusip qatanngutai naalattariaqarpaat?

¹⁶ Jiisusi ima oqarpoq: “Savaatima nipiga tusartarpaat, uangalu ilisimavakka, malittarpaanngalu.” (Johannesi 10:27) Tamanna kristumiunut tanitanut atuuppoq. Taavami taakkununnga ‘ingerlaqataasut’? Taakku Jiisusi tusarnaartariaqarpaat, imaluunniit naalattariaqarpaat. Aamma taassuma qatanngutai naalattariaqarpaat. Ilumoortumimmi oqaatigalugu Jiisusip qatanngutai Guutip innuttaanik anersaakkut atugarissaartitsinissamut akisussaanerpaatitaapput. Kristusip qatanngutaasa nipaannik tusarnaarnermut, imaluunniit taakkununnga naalannermut, suut ilaappat?

17. Inussiaqatigiinnut naalanneq qanoq paasisariaqarpa?

¹⁷ Inussiap aalajaallunilu silatuup ullumikkut Siulersuisoqatigiit, siuttuullutik nunarsuaq tamakkerlugu oqaluussinermik siulersuisut, sinniisigai. Siulersuisoqatigiinnut ilaasortaasut utoqqaanertaapput tanitat misilittagaqarluartut. Pingaartumik taakku pillugit oqartoqarsinnaavoq uagut ‘siulersortigigivut’. (Hebræerit 13:7) Nakkutilliisut tanitat taakku Guutip naalagaaffia pillugu oqaluussisartunik 7 millionit sinnerlugit amerlassusilinnik, silarsuarmi tamarmi ilagiinni 100.000-init amerlanerusuniittunik, isumassuinermut tunngatillugu ‘tamaviaarlutik Naalagaq kiffartuuppaat’. (1 Korinthimiut 15:58) Inussiaqatigiinnut naalanneq taakkua Siulersuisoqatigiivinik tamakkiisumik suleqatiginninnertut paasisariaqarpoq.

Inussiaqatigiinnut naalattut pilluaqquneqartarput

18, 19. (a) Inussiamut aalajaallunilu silatuumut naalattut qanoq pilluaqquneqarpat? (b) Suna aalajangiusimasariaqarparput?

¹⁸ Inussiaq aalajaallunilu silatooq toqqarneqarnermi kingorna ‘amerlasuunik iluarnermut unnersuussisimavoq’. (Danieli 12:3) Amerlasuunut taakkununnga ilaapput pissutsit aaqqissuussaanerata ajortup maanna atuuttup aserorneqarnissaanit aniguinissamik neriugisallit. Taamatut Guutimit iluartutut, imaluunniit naapertuilluartutut, isigineqarneq pilluaqqussutaangaarpoq!

¹⁹ Inussiamut naalattut sunik misigisaqassappat siunissami takugunikku ‘illoqarfik illernartoq, Jerusalemi nutaaq [144.000-inik inulik], qilammit Guutimit aqqartoq nuliassatut uissaminut assukkersorsimasutut piareersimalluni’? Biibilimi ima allassimavoq: “[Guuti] nammineq taakkunaniikkumaarpoq. Qulliillu tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.” (Saqqummersitat 21:2-4) Aap, Kristusimut taassumalu qatanngutaanut tanitanut tatiginartunut naalannissamut pissutissarpassuaqarpugut! (w09 02/15-E)

[Quppernerup ataani ilanngussaq]

Suna ilikkarpiuk?

• Jehovap inussiamik aalajaallunilu silatuumik tatiginninneranut sunik takussutissaqarpa?

• Sumit erserpa Jiisusip Kristusip inussiaqatigiit tatigilluinnarai?

• Sooq uagut illumi pisortaatitaq aalajaatsoq tatigisariaqarparput?

• Inussiamik tatiginninnerput qanoq ersersittarparput?

[Atuaqqissaarnermi apeqqutit]

[Qupp. 29-mi assiliartaq]

Nalunngiliuk kikkut Jehovap ernermi nuliassaatut toqqarsimanerai?

[Qupp. 31-mi assiliartat]

Jiisusip Kristusip inussiaq aalajaallunilu silatooq “pigisaminut tamanut” paarsisussanngortippaa

[Qupp. 32-mi assiliartaq]

Oqaluusseqataagaangatta tanitat tapersersortarpavut