“Eqiinganiaritsi”

“[Tamarmik] naggatissaat qanillivoq. . . . Eqiinganiaritsi qinusarsinnaaqqullusi.” — 1 PETRUSI 4:7.

1. Jiisusip oqaluussinerani suna pingaarnersaava?

JIISUSIP Kristusip nunarsuarmiitilluni oqaluussinerani Guutip naalagaaffia pingaarnersaavoq. Naalagaaffik taanna iluaqutigalugu Jehovap atini illernarsisissavaa aamma qilammi nunamilu kisimi oqartussaanini qutsissisissavaa. Taamaattumik taassuma ajoqersukkat Guutimut ima qinunermik ilinniartippai: “Naalagaaffiit tikiulli, piumasat qilammisut nunamissaaq pili.” (Matthæusi 4:17; 6:9, 10) Naalagaaffik taanna qanittukkut Saatanip silarsuaanik nungutitsissaaq, tamatumalu kingorna Guutip piumasaanik nunarsuarmi tamarmi pititsissaaq. Danielip siulittuineratut Guutip naalagaaffiata “kunngeqarfiit allat [maanna atuuttut] tamaasa aserortissavai suujunnaarsillugillu, namminerli soraajuitsumik atassaaq”. — Danieli 2:44.

2. (a) Jiisusip ajoqersugaasa qanoq ilillutik nalunngissinnaavaat taanna Guutip naalagaaffiani kunngitut pissaaneqarluni najuuttoq? (b) Nalunaaqut aamma sumut ersiutaassava?

² Guutip naalagaaffiata tikiunnissaa Jiisusip ajoqersugaasa pingaarteqigamikku taanna ima oqarfigaat: “Oqarfigitigut . . . [suna] nalunaaqutaassasoq illit tikiunnissannut [najuunnissannut, NV] silarsuullu naggatissaanut.” (Matthæusi 24:3) Nalunaaqut takussaasussaavoq, Kristusimmi Guutip naalagaaffiani kunngitut pissaaneqarluni najuunnera nunarsuarmut inuusunut takussaasussaanngilaq. Aamma nalunaaqutaasussaavoq katitigaq, pisunit assigiinngitsorpassuarnit Biibilimi siulittuutigineqartunit katitigaasussaagami. Jiisusip ajoqersugaasa nalunaaqutit eqquunnerisa nalaanni inuusut nalunaaqut taanna takugunikku paasissavaat Jiisusi qilammi naalakkersuilersimasoq. Aamma tamanna piffissap pissutsit aaqqissuussaanerata ajortup ‘ullussaatut kingullertut’ Biibilimi taaneqartup aallartinneranut ersiutaassaaq. — 2 Timotheusi 3:1-5, 13; Matthæusi 24:7-14.

Ulluni kingullerni eqiingagit

3. Sooq kristumiut eqiingasariaqarpat?

³ Apustili Petrusi ima allappoq: “[Tamarmik] naggatissaat qanillivoq. Taamaattumik silatusaarlusilu eqiinganiaritsi qinusarsinnaaqqullusi.” (1 Petrusi 4:7) Jiisusip ajoqersugai eqiingasariaqarput, silarsuarmimi pisut Kristusip qilammi kunngitut naalakkersuilersimaneranut ersiutaasut eqqumaffigisussaavaat. Aamma  eqiinganissaat suli pisariaqarnerulissaaq pissutsit aaqqissuussaanerata maanna atuuttup naggatissaa qanilliartortillugu. Jiisusip ajoqersukkani ima oqarfigai: “Eqqumagitsi nalugassiuk illup naalagaa [Saatanip silarsuaanut eqqartuussut naammassiniarlugu] qaqugu tikiukkumaarnersoq.” — Markusi 13:35, 36.

4. Inuit Saatanip silarsuaanut ilaasut Jehovallu kiffaasa suna assigiinngissutigaat? (Aamma takuuk ungalusaq).

⁴ Inuit ataatsimut isigalugit Saatanimit sunnersimaneqarput, aamma silarsuarmi pisut qanoq paasisariaqarnerat eqqumaffiginngilaat. Kristusip kunngitut najuunnera paasinngilaat. Kristusilli ajoqersugai ilumoortut eqiingasimapput ukiunilu 100-ni kingullerni pisimasut qanoq paasisariaqarnerat paasisimallugu. 1925-miilli Jehovap Nalunaajaasuisa paasivaat sorsunnersuaq siulleq tamatumalu kingorna pisut Kristusip 1914-imi qilammi kunngitut naalakkersuilluni najuutilersimaneranut nassuitsumik nalunaaqutaasut. Taamaattumik aamma pissutsit aaqqissuussaanerata ajortup Saatanimit aqunneqartup ullussai kingulliit aallartipput. Oqaluttuarisaanermi pisimasunik — tamakkuninnga paasinninngikkaluarlutik — eqqumaffiginnittorpassuit sorsunnersuaq siulleq sioqqullugu tamatumalu kingorna pissutsit assigiinngissutaat takusinnaavaat. — Takuuk ungalusaq “Piffissaq uiverfiusoq”.

5. Sooq eqiingajuarnissarput pingaaruteqarpa?

⁵ Maanna ukiuni 100-ngajanni silarsuarmi pisimasut tataannartut ulluni kingullerni inuunitsinnut uppernarsaataapput. Qanittuararsuakkut Jehovap Kristusi peqqussavaa sakkutuunut qilammiusunut siuttooqqullugu Saatanip silarsuaanut sorsunnissami. (Saqqummersitat 19:11-21) Kristumiut ilumoortut eqqumaqquneqarput, sulilu eqiinganerusariaqassapput naggatissaq qanilliartortillugu. (Matthæusi 24:42) Eqiingajuartariaqarpugut aamma Kristusip siulersuineratigut nunarsuaq tamakkerlugu suliarineqartoq naammassisariaqarparput.

Silarsuaq tamakkerlugu suliarineqartoq

6, 7. Ulluni kingullerni oqaluussinermi qanoq siumukartoqarsimava?

⁶ Jehovap kiffaasa suliassaat pissutsit aaqqissuussaanerata ajortup maanna atuuttup ullussaani kingullerni inuunitsinnut nalunaaqummut siulittuutaasumut ilaavoq. Jiisusip silarsuaq tamakkerlugu suliarineqartoq tamanna oqaluttuaraa  naggatissap nalaani pisussat assigiinngitsut taagoramigit. Ilaatigut ima oqarpoq: “[Naalagaaffimmik] iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.” — Matthæusi 24:14.

⁷ Kisitsisit Jiisusip siulittuutaata immikkoortuanut tamatumunnga tunngassuteqartut eqqarsaatigeriakkit. Iivangkiiliumik, imaluunniit nutaarsiassamik nuannersumik, oqaluussissutiginnittut ullut kingulliit 1914-imi aallartinneranni ikittuararsuupput, maannali amerlanipilussuupput. Maanna Jehovap Nalunaajaasui nunarsuaq tamakkerlugu 7 millioninit amerlanerupput, ilagiinnut 100.000-init amerlanerusunut aaqqissuussaallutik. Suli 10 millionit allat Kristusip toquneranik eqqaaniaalluni nalliuttorsiornermi 2008-mi Jehovap Nalunaajaasuinik katersuuteqateqarput. Siornaak najuuttunut naleqqiullugit amerlanipilussuupput.

8. Sooq akerlilersuisoqaraluartoq oqaluussineq siumukartuarsinnaasimava?

⁸ Taamaalilluni pissutsit aaqqissuussaanerata maanna atuuttup naggatissaa sioqqullugu nunani tamani Guutip naalagaaffia peqqissaartumik nalunaajaatigineqarpoq. Taamaaliortoqarporlu uffa Saatani ‘silarsuup matuma guutigigaluaraa’! (2 Korinthimiut 4:4) Silarsuarmi matumani naalakkersuinikkut, upperisarsiornikkut niuernikkullu oqartussaasut taakkualu sunniiniutigisartagaat taassumannga sunnersimaneqarput. Soormiuna oqaluussinermi uissuumminartumik siumukartoqartoq? Jehovap annertoqqusersuinera pissutaasimassaaq. Saatani unitsitsiniarsarigaluartoq oqaluussineq siumukarpoq.

9. Sooq siumukarnerput anersaakkullu pigissaarnerput tupinnartuliatut oqaatigineqarsinnaappat?

⁹ Guutip naalagaaffianik tusarliussamik siaruarterineq Jehovallu innuttaasa amerliartornerat anersaakkullu siumukarneq tupinnartuliatut oqaatigineqarsinnaapput. Jehova annertoqqusersuinanilu siulersuinanilu sernissuisimanngitsuuppat oqaluussisoqarsinnaasimassanngikkaluarpoq. (Atuaruk Matthæusi 19:26). Qularutiginngilluinnarsinnaavarput Guutip anersaava oqaluussisartunut eqiingasunut kiffartorumasunut sunniuteqaraangat oqaluussinerup ingerlajuarnissaa iluatsilluarnissaalu, “taavalu naggatissaq nalliutissaaq”. Tamannalu qanilliartupallappoq.

 ‘Annikilliortitaangaarneq’

10. Jiisusip annikilliornartussarsuaq qanoq oqaluttuaraa?

¹⁰ Pissutsit aaqqissuussaanerata ajortup maanna atuuttup naggatissaa ‘annikilliortitaangaarnermik’ taaneqartup nalaani nalliutissaaq. (Saqqummersitat 7:14) Annikilliortitaangaarfiup qanoq sivisutigissanera Biibilimi eqqaaneqanngilaq, Jiisusili ima oqarpoq: “Naalliunnartoqangaassaaq silarsuup pileqqaarneraniit maannamut asseqanngitsumik nalliuteqqinngisaannassasumillu.” (Matthæusi 24:21) Silarsuaq annikillioreersimavoq, assersuutigalugu sorsunnersuit aappaanni missiliuunneqarpoq inuit 50-60 millionit toqusimanissaat. Tamakku eqqarsaatigalugit annikilliornartussaq ilumut annikilliornassaqaaq. Tamatuma ajornerpaaffissarissavaa Harmagedonimi sorsunneq, tassanilu Jehovap sakkutuuni nunarsuup pissutsinik aaqqissuussineranik Saatanimit naalakkersorneqartumik takussaasunik piuneerussilluinnartissavai. — Saqqummersitat 16:14, 16.

11, 12. Pisut suut annikilliornartussarsuup aallartinneranut nalunaaqutaassappat?

¹¹ Annikilliornartorsuup immikkoortua siulleq qaqugu aallartissanersoq Biibilimi allaatigineqanngilaq, aallartinneranulli pisussaq maluginiarnartoq suna nalunaaqutaassanersoq allassimavoq. Pisussaq tamanna tassaassaaq upperisarsiornerup eqqunngitsup politikkikkut pissaanilinnit piuneerunneqarnera. Saqqummersitani kapitali 17-imi 18-imilu upperisarsiorneq eqqunngitsoq arnamut atortittartumut, nunarsuarmi politikkikkut aaqqissuussinernik kinguaassiuutitigut inuunerloqateqartumut, assersuunneqarpoq. Saqqummersitat 17:16-imi ersersinneqarpoq piffissaq naalakkersuinikkut oqartussaasut ‘arnamik atortittartumik uumissuiffissaat suerullugulu tamataarutititsiffissaat neqaanillu nerillutillu ikuallaaffissaat’ qanillisoq.

¹² Taamatut pisoqarfissaa nalliuppat Guutip “nammineq piumasani”, tassa upperisarsiornernik eqqunngitsunik tamanik piuneerutitsinissaq, ‘taakkununnga [politikkikkut naalakkersuisunut] naammassitissavaa’. (Saqqummersitat 17:17) Taamaattumik oqartoqarsinnaavoq piuneerutitsisussaq tassaasoq Guuti. Tamanna taassuma ilumoortuusaarlutik upperisarsiortunut, ajoqersuutinik Guutip piumasaanut akerliusunik sivisoqisumik siaruarterisimasunut kiffaanillu malersuisimasunut, eqqartuussutigaa. Silarsuarmiut amerlanersaasa upperisarsiornernik eqqunngitsunik tamanik piuneerussinissaq tamanna ilimaginngilaat. Jehovalli kiffaasa aalajaatsut tamanna ilimagaat, inunnullu tamanna oqaluttuarisarsimavaat ullut kingulliit atuutilermatali.

13. Sumit erserpa upperisarsiornerup eqqunngitsup piuneerunneqarnera sukkasuumik pissasoq?

¹³ Upperisarsiornerup eqqunngitsup piuneerunneqarnera inunnut annilaarutaangaassaaq. Biibilimi allassimavoq tamatuma piuneerunneqarnerani allaat ‘nunarsuarmi kunngit’ ilaat ima oqarumaartut: “Eqqanaq, eqqanaq . . . Eqqartuunneqarnerit nalunaaquttap-akunnerani ataasiinnarmi pivoq!” (Saqqummersitat 18:9, 10, 16, 19) Oqariartaatsimit “nalunaaquttap-akunnerani ataasiinnarmi”-mit erserpoq tamanna sukkasuumik pissasoq.

14. Jehova akeqqani naggammik kiffaminut saassussippata qanoq iliuuseqassava?

¹⁴ Paasivarput upperisarsiornerup eqqunngitsup piuneerunneqarnerata kingornagut Jehovap kiffai, taassuma eqqartuussutaanik oqaluussissutiginnissimasut, saassunneqarumaartut. (Ezekieli 38:14-16) Saassussineq aallartippat saassussisut Jehova, innuttaminik aalajaatsunik sernissuinissaminik neriorsuisimasoq, saangissavaallusooq. Jehova ima oqarpoq: “Ilungersorninni kamangaarninnilu oqarpunga . . . paasissavaat uanga tassaasunga [Jehova].” (Atuaruk Ezekieli 38:18-23).  Aamma ima oqarsimavoq: “Ilissinnik [kiffaanik aalajaatsunik] attuisut isima tappiutaat attorpaat.” (Zakaria 2:12) Taamaammat Jehovamut akeraasut taassuma kiffaanik nunarsuaq tamakkerlugu saassussippata, taanna iliuuseqassaaq annikilliornartorsuup immikkoortuanik kingullermik — Harmagedonimik — kinguneqartussamik. Kristusip siulersuineratigut sakkutuut qilammiut pissaaneqangaartut Jehovap Saatanip silarsuaanut eqqartuussutaanik naammassinnissapput.

Tamanna uagutsinnut qanoq sunniuteqartariaqarpa?

15. Pissutsit aaqqissuussaanerata matuma naggatissaata qanilliartupallanneranik ilisimanninnerput uatsinnut qanoq sunniuteqartariaqarpa?

¹⁵ Pissutsit aaqqissuussaanerata ajortup naggatissaata qanilliartupallanneranik ilisimanninnerput uatsinnut qanoq sunniuteqartariaqarpa? Apustili Petrusi ima allappoq: “Tamakku tamarmik suujunnaartussaammata taava inuttut qanoq ittuusariaqannginnerpisi iluartumik ileqqoqarnermut Guutimullu tunniusimanermut naapertuuttunik iliuuseqarlusi.” (2 Petrusi 3:11, NV) Oqaatsini taakkunani erseqqissarneqarpoq eqqumanissatta, ileqqutta Guutip piumasaqaataanut naapertuunneranik qulakkeerinissatta iliuutsittalu Guutimut tunniusimanermut Jehovamillu asanninnermut ersiutaanissaasa qanoq pingaaruteqartiginerat. Ilaatigut tamatumunnga ilaavoq naggatissaq nalliutsinnagu Guutip naalagaaffia oqaluussissutiginiarlugu sapinngisatsinnik iliornissarput. Petrusi aamma ima allappoq: “[Tamarmik] naggatissaat qanillivoq. . . . Eqiinganiaritsi qinusarsinnaaqqullusi.” (1 Petrusi 4:7) Jehovamut qanillissaagut taassumunngalu asanninnerput ersersissallugu taassumunnga qinunikkut saaffiginninnitsigut, qinnuigalugu anersaani illernartoq atorlugu silarsuarlu tamakkerlugu ilagiit aqqutigalugit siulersoqqulluta.

16. Sooq Guutip siunnersuutai eqqumaffigeqqissaartariaqarpavut?

¹⁶ Ulluni navianartoqaqisuni makkunani siunnersuummik Guutip oqaasianiittumik matuminnga eqqumaffiginninnissarput pingaaruteqarpoq: “Sianiginiarsiuk qanoq inuunersusi, siuneqanngitsutut pinnasi, siuneqartutulli iliorlusi. Piffissaqqissoq atorniarsiuk, ullut ajortuummata.” (Efesosimiut 5:15, 16) Silarsuarmi aatsaat taama ajussuseqartigaaq. Saatani inuit Jehovap piumasaatut iliornissamut akornutissaannik, imaluunniit allamut saasaatissaannik, isumassarsiarpassuaqarpoq. Uagut Guutimut kiffaagatta tamanna nalunngilarput, Guutimullu ilumoorfiginninnerput sumilluunniit akornuserneqartikkusunngilarput. Nalunngilarputtaaq qanittukkut qanoq pisoqarumaartoq, aamma Jehova taassumalu siunertai tutsuigilluinnarpavut. — Atuaruk 1 Johannesi 2:15-17.

17. Makititsisoqalerpat Harmagedonimi aniguisimasunut qanoq sunniuteqarumaarnera oqaluttuariuk.

¹⁷ Toqusimasut inuuleqqinnissaat pillugu neriorsuut nuannerluinnartoq taamanikkussamut eqquutissaaq, allassimavormi “toqusut makikkumaartut — iluartut iluaatsullu”. (Apustilit Suliaat 24:15) Maluginiariaruk Paulusip qanoq qulanngitsiginera ima oqarami: ‘Toqusut makikkumaarput’! Tamanna qularnanngilluinnarpoq, Jehovammi neriorsuutigaa! Esaja 26:19-imi ima allassimavoq: “Toqusortatit uummassapput; . . . issumi sinippaartusi itissaasi qiimmattassallusilu, . . . nunallu toqungasut inuunermut utertissavai.” Oqaatsit taakku eqquuteqqaarput itsaq Guutip innuttai nunaminni assersuutaasumik makeqqitsitaammata, tamannalu siulittuutip silarsuassami nutaami eqquutivinnissaanik qularutiginninnginnerulissutigaarput. Makititaasimasut asasaminnut takummaalerpata qanoq nuannaartoqartigissava! Aap, Saatanip silarsuaata naggatissaa qanillivoq, silarsuassarlu nutaaq, Guutip pilersikkumaagaa, piviusunngungajalerpoq! Taamaattumik eqiinganissarput pingaaruteqarpoq.

Eqqaamavigit?

• Jiisusip oqaluussinerani suna pingaarnersaava?

• Guutip naalagaaffianik tusarliussaq qanoq siaruarsimatigaa?

• Eqqumanissaq sooq pingaaruteqarpa?

• Apustilit Suliaat 24:15-imi allassimasut ilinnut qanoq sunniuteqarpat?

[Atuaqqissaarnermi apeqqutit]

[Qupp. 16, 17-mi ungalusaq/​assiliartaq]

PIFFISSAQ UIVERFIUSOQ

Professorip tusaamasap Alan Greenspanip atuakkiaata 2007-imi saqqummersup qulequtaraa “I en turbulent tid — Muligheder i en ny verdensorden” (2008-mi qallunaatuunngortinneqartoq). Alan Greenspan ukiuni 20-ngajanni USA-mi aningaaseriviit pingaarnersaanni pisortaavoq. 1914 sioqqullugu 1914-illu kingorna silarsuarmi pissutsit assigiinngilluinnassusiat atuakkiamini ima erseqqissarpaa:

“Taamanikkut allaaserisat tamaasa naapertorlugit silarsuaq 1914 sioqqullugu assortorneqarsinnaanngitsumik atugartuussuseqaleriartuinnarpasippoq; inuttaaqatigiit tamarmik ajunngilluinnartunngortinneqarsinnaarpasipput. 1800-kkunni inussianik nioqquteqarnipalaaq unitsinneqarpoq. Nakuuserneq inuppalaarunnaarsaataasoq nungujartorpasippoq. . . . 1800-kkut ingerlaneranni teknikkikkut nassaarsiorneq annertusarneqarsimavoq, qimuttuitsunut aqquteqalerluni, oqarasuaateqalerluni, innaallagiartortunik qulleqalerluni, filmertarfeqalerluni, motoorilinnik qamuteqalerluni illumilu atortunik taagornissaannut amerlavallaartunik peqalerluni. Nakorsaanermik ilisimatusarneq, inuussutissat pitsaanerulernerat imissamillu minguitsumik pisoqariaannaanera pissutigalugit ullut inuuffissatut ilimagineqartartut amerlisimapput . . . Taamatut siumukartuartoqassasorinninneq nalinginnaavoq.”

Kisiannili . . . “sorsunnersuaq siulleq sorsunnersuit aappaannit tigussaasunik aseruiffiunerungaartumit atugartuussusermut aserorsaataaneruvoq: Akerleriissuteqarfik siulleq takorluukkamik aseruivoq. Eqqaamaqqissaarpara sorsunnersuaq siulleq sioqqullugu ukiut qanoq isigineqartarnerat. Inuiaat siunissaat alianartoqarpasiganilu killeqanngippasippoq. Ullumikkut silarsuarmut isiginnittaaserput ukiut 100-t qaangiuttut isiginnittaaserineqartumit allaanerulluinnarpoq, immaqali piviusunut naapertuunnerulaarpoq. Peqqarniisaarniat, nunarsuup silaannaata kissakkiartornera inuinnaallu sunniuteqarsinnaanerulernerat sorsunnersuup siulliup taamanikkut isumalluarnermut sunniuteqarneratut nunarsuarmioqatigiilernissamut neriulluarnartumut sunniuteqassava? Tamanna qularnaatsumik akineqarsinnaanngilaq.” — Qupp. 334 (Jyllands-Postens Forlag, 2008).

Aningaasaqarnermi professorip Benjamin M. Andersonip (1886-1949) oqaaseqaataa una Greenspanip ilinniarnermi nalaanit eqqaamavaa: “Silarsuarmi pissutsinik sorsunnersuaq siulleq sioqqullugu atuuttunik inersimasutut eqqaamannillutillu paasinnittut piffissaq tamanna kipitsavigingaartarpaat. Taamanikkut toqqissisimasoqarpoq taamanimiilli misigineqaqqinngisaannartumik.” — Economics and the Public Welfare.

Atuakkiortoq G.J. Meyer atuakkiamini A World Undone-imi (Silarsuaq aseroriartortoq), 2006-imi saqqummersumi assingusumik isummerpoq. Ima allappoq: “Oqaluttuarisaanermi pisimasut ‘sunik tamanik allannguisutut’ eqqartorneqarajupput. Taamaallaat Sorsunnersuaq [1914-1918] taamatut eqqartorneqaraangat tamanna ilumoortarpoq. Sorsunneq taanna sunik tamanik — killeqarfinniinnaanngitsoq, naalakkersuisut inuiaallu atugaanniinnaanngitsoq, kisianni taamanimiilli silarsuarmut aamma imminut isiginnittaaserineqalersumik — allannguivoq. Piffissamik alittuivorlusooq, silarsuaq silarsuartut toqqissisimanartutut sorsunnerup siorna atuuttutut ileqqinngisaannarluni.”

[Qupp. 18-mi assiliartaq]

Jehovap sakkutuui qilammiusut Harmagedonimi pitoraatissapput