Guuti ateqarpa?

Inuppassuit qanoq oqartartut:

▪ “Aqqa tassa Guuti imaluunniit Naalagaq.”

▪ “Namminerisaminik ateqanngilaq.”

Jiisusi qanoq oqarpa?

▪ “Taamaattumik ilissi ima qinussaasi: Ataatarput qilanniittutit! Aqqit illernartitaali.” (Matthæusi 6:9) Jiisusip upperaa Guuti ateqartoq.

▪ ‘Aqqit taakkununnga ilisimalersippara ilisimalersikkumaarlugulu, asannissuseq uannut asannissuserisat taakkunaneeqqullugu uangalu taakkunaneeqqullunga.’ (Johannesi 17:26) Jiisusi Guutip aqqanik ilisimalersitsivoq.

▪ “Takussaassavassinga ulloq ima oqarfissarsi nalliutserlugu: Pilluaqqusaali Naalakkap [Jehovap, NV] aqqani tikiuttoq!” (Lukasi 13:35; Tussiaat 118:26) Jiisusip Guutip aqqa atortarpaa.

GUUTIP nammineq oqaluttuuppaatigut qanoq ateqarluni. Biibilimi oqaluttuarineqarpoq Guuti ima oqartoq: ‘Uanga Jehovaavunga.’ * (1 Mosesi 15:7; Otto Fabriciusip 1822-mi kalaallisuunngortitaa). Ateq hebræerisooq Guutip imminut aterititaa kalaallisut Jehovamik nalinginnaasumik taaneqartarpoq. Tupaallaatigissagunarpat ateq immikkut ittoq hebræerisooq taanna Biibilimik assiliilluni assammik allagatoqqani tusindilippassuariarluni atorneqarmat. Allaat Biibilimi atinit allanit atorneqarneruvoq.

Inuit ilaat aperigaanni: “Guuti qanoq ateqarpa?” immaqa ima akissapput: “Naalagaq.” Apeqqummulli akissut paasissutissartaqarpianngilaq, assigiinnarpaami kina qineqqusaarnermi ajugaanersoq apeqqutigineqarpat ima akigaanni: “Qineqqusaartoq.” Akissutit taakku naammanngillat, oqaasermi “Naalagaq” oqaaserluunniit “qineqqusaartoq” atiunngillat.

Sooq Guutip atini uatsinnut nalujunnaarsippaa? Ilisarisimallualerniassagatsinni. Tamanna assersuunneqarsinnaavoq angummut sumiinnera apeqqutaalluni assigiinngitsunik taagorneqartumut — soorlu pisortaq, ataata imaluunniit aataa. Taaguutini taakkunani tamani taanna pillugu paasisaqarpugut. Angutilli namminerisaminik atia tusaraangatsigu taassuma inuttut qanoq ittuunera pillugu ilisimasavut tamaasa eqqaasarpavut. Taamatuttaaq taaguutit soorlu Naalagaq, Ajugaqanngitsoq, Ataataq Pinngortitsisorlu Guutip assigiinngitsunik iliuuseqartarneranik ersersitsipput. Taamaallaalli nammineq atia, Jehova, uagutsinnik eqqaasitsisarpoq taassuma qanoq ittuunera pillugu ilisimasatsinnik tamanik. Guutip aqqa nalugaanni qanoq ililluni taassuminnga ilisarisimannillualertoqarsinnaagami?

Guutip aqqa nalunngiinnarnagu aammali atiata atornissaa pingaaruteqarpoq. Sooq? Biibilimi ima allassimasoqarmat: “Kinaluunniimmi Naalakkap [Jehovap, NV] aqqanik torlorfiginnittoq annaanneqassaaq.” — Romamiut 10:13; Joeli 3:5.

[Quppernerup ataani ilanngussaq]

[Qupp. 6-mi issuagaq]

Angut pisortatut, ataatatut imaluunniit aataatut taaneqarsinnaavoq. Namminerisaminilli atia uagutsinnik eqqaasitsisarpoq taassuma inuttut qanoq ittuuneranik