Atuartartutta apeqqutaat

Jehovap Nalunaajaasui kisimik annaanneqarsinnaasorippat?

Jehovap Nalunaajaasui isumaqarput upperisaq ilumoortoq nanisimallugu. Taama isumaqanngikkaluarunik upperisartik allanngortissimassagaluarpaat. Upperisarsioqatigiinnut allarpassuarnut tapersersuisut annaanneqarnissamik neriuuteqarnerattulli Jehovap Nalunaajaasuisa annaanneqarnissartik neriuutigaat. Isumaqanngillalli kikkut annaanneqassanersut namminneq aalajangersinnaallugu. Eqqartuussisussaviusoq tassaavoq Guuti. Taanna aalajangiisussaavoq. — Esaja 33:22.

Guutip oqaasiani ersersinneqarpoq annaanneqartussat annaanneqarnissartik kisiat kissaatigissanngikkaat; aammali Annaassisoq suleqatigisariaqaraat. Ima assersuusiortoqarsinnaavoq: Pisuttuarluni angalaartoq asimi tammarpoq. Sukkuussanerluni paaserusungaarpaa. Aniguissava ajunaassavaluunniit? Annaassiniartumut periarnera aalajangiisuussaaq. Makitasuujuneq pissutigalugu immaqa annaassiniartumit ikiorneqarumanngilaq, aammali qujamasulluni ikiortissinnaavoq aniguillunilu.

Taamatuttaaq inuiaat annaassisuannik, Jehovamik Guutimik, suleqatiginninniarlutik aalajangertut annaanneqassapput. Annaanneqarnissaq Guutimit tunissutaavoq, inuilli tamakkeratik annaanneqassapput. Guutip ernera Jiisusi ima oqarpoq: “Imaanngilaq kinaluunniit uannut oqartoq: Naalagaq, Naalagaq! Qilaap Naalagaaffianut isissasoq, Ataatamali qilanniittup piumasaanik iliortoq kisimi.” — Matthæusi 7:21.

Jehovap Nalunaajaasui isumaqarput Kristusip utertitsissutitut pilliutaanik upperinninnermik ersersitsisut Jiisusillu ajoqersuutaanik maleruaaqqissaartut kisiisa Guutip annaakkumaarai. (Apustilit Suliaat 4:10-12) Annaanneqarumalluni piumasaqaatit Guutip oqaasiani saqqummiunneqartut naammassineqartariaqartut pingaaruteqartut pingasut misissoriartigik.

(1)  “Asaqatigiikkussi tamatumuuna tamarmik paasissavaat ajoqersugarigissi,” Jiisusi ajoqersukkaminut oqarpoq. (Johannesi 13:35) Jiisusip allat pillugit inuunerminik pilliutiginninneratigut asanninnerup pingaaruteqassusia erseqqissarneqarpoq. Tullermut asanninnermik ersersitsisut pissuserineqartussaq annaanneqarnissamut aalajangiisuusoq ersersippaat.

(2) ‘Aqqit taakkununnga ilisimalersippara,’ Jiisusi Ataataminut qinnummini oqarpoq. (Johannesi 17:26) Jiisusip nalunngilaa Guutip nammineq aqqa, Jehova, Ataataminut qanoq pingaaruteqartigisoq. Ateq taanna pillugu Jiisusi ima qinuvoq: “Illernartitaali.” (Matthæusi 6:9) Guutip aqqata illernarsisinneranut ilaavoq atermik tamatumannga ilisimanninneq tamatumanngalu pingaarutilittut illernartutullu isiginninneq. Annaanneqarusuttut Guutip aqqanik Jiisusip atuisimaneratulli Guutip aqqa atortariaqarpaat. Aamma Guutip aqqa pillugu taassumalu pissusii pillugit inuit allat ilinniartittariaqarpaat. (Matthæusi 28:19, 20) Guutip aqqanik torlorfiginnittut kisimik annaanneqassapput. — Romamiut 10:13.

(3)  “Uanga naalagaaffiga silarsuarmit matumannga pinngilaq,” Jiisusi Pontiusi Pilatusimut oqarpoq. (Johannesi 18:36) Ullumikkut inuit ikittuinnaat ersersippaat Guutip naalagaaffia, naalagaaffik Jiisusimik kunngilik, upperalugu. Amerlanerit naalakkersuisunik aaqqissuussinernilluunniit inuit pilersitaannik tatiginnipput. Annaanneqartussat taakkunannga allaanerulluinnarlutik Guutip naalagaaffianik ilumoorfiginnillutik tapersersuillutillu naalagaaffiup tamatuma inuit uppertut tamaasa qanoq aniguisikkumaarai allanut ilinniartitsissutigaat. — Matthæusi 4:17.

Annaanneqarumalluni piumasaqaatit naammassineqartariaqartut ilaat tusareerlugit, Jiisusip ajoqersugai ima oqarput: “Taavami kina annassinnaava?” Jiisusi ima akivoq: “Inummut ajornartut Guutimut ajornanngillat.” (Lukasi 18:18-30) Annaanneqarumalluni piumasaqaatit Jehovap Nalunaajaasuisa peqqissaarlutik naammassiniarsaraat. Aamma ilungersorput allat annaanneqarnissaannut ikiorniarlugit. (wp08 11/01-E)