Jiisusi Guutiua Ajugaqanngitsoq?
Jiisusi Guutiua Ajugaqanngitsoq?
Inuppassuit qanoq oqartartut:
▪ “Aap, Jiisusi Guutiuvoq Ajugaqanngitsoq.”
▪ “Jiisusi tassa Guuti takussaasoq.”
Jiisusi qanoq oqarpa?
▪ “Asagaluarussinga Ataatamukarnissara nuannaarutigissagaluarparsi, Ataatarmi uannit anneruvoq.” (Johannesi 14:28) Jiisusi oqarpoq Ataatani naliginagu.
▪ ‘Pavunnalerpunga uanga Ataatannut ilissilu Ataatassinnut, uanga Guutinnut ilissilu Guutissinnut.’ (Johannesi 20:17) Jiisusi oqanngilaq Guutiulluni, Guutili immikkut kinaassusilittut eqqartorpaa.
▪ “Nammininnit oqalunngilanga; Ataatamali uannik aallartitsisup nammineq inassutigaa qanoq oqassasunga qanorlu oqalussasunga.” (Johannesi 12:49) Jiisusip ajoqersuutini namminerminit pinnginnerarpai, kisianni Ataatameersuunerarpai.
JIISUSI oqarpoq Guutip ernerigaani, Guutiunani Ajugaqanngitsoq. Jiisusi Guutiuguni nunarsuarmiikkallarami kimut taava qinusimassava? (Matthæusi 14:23; 26:26-29) Jiisusip allamik oqaluussaqartuusaartarsimanissaa takorlooruminaappoq!
Jiisusip ajoqersukkami ilaat marluk naalagaaffimmini immikkut ittumik inissisimaffeqarumammata ima akivai: ‘Talerpimma tungaani saamimmalu tungaani issianissamik uanga aalajangiisussaatitaanngilanga; Ataatamali issiasussanngortitaasa pissavaat.’ (Matthæusi 20:23) Jiisusi ajoqersukkami qinnutaannik naammassinnissinnaatitaannginnerarami sallua? Naamerluinnaq! Maniguulluni akueraa Guuti tamakkuninnga aalajangiisinnaatitaasutuaasoq. Jiisusip nassuiarpaa allaat nammineq inngilillu ilisimanngisaminnik Ataataq kisimi ilisimasaqartoq. — Markusi 13:32.
Jiisusi taamaallaat inuttut nunarsuarmiikkallarami Guutimut naalatsigitippa? Naamik. Allaatigineqarpoq aamma toqunermi makititaanermilu kingorna Jiisusi Guutimut naalatsigitittoq. Apustilip Paulusip eqqaasippaatigut ‘Guuti Kristusimit qutsinnerusoq’. (1 Korinthimiut 11:3, Today’s English Version) Biibilimi allassimavoq siunissami ‘suut tamarmik Kristusimut naalatsigititaareerpata taava Erneq nammineq naalatsigitikkumaartoq tamanik imminut naalatsigititsisumut, Guuti tamani tamarsooqqullugu’. — 1 Korinthimiut 15:28.
Erseqqippoq Jiisusi tassaanngitsoq Guuti Ajugaqanngitsoq. Taamaattuminguna Ataatani pillugu ima oqartoq: ‘Uanga Guutiga’. — Saqqummersitat 3:2, 12; 2 Korinthimiut 1:3, 4. *
[Quppernerup ataani ilanngussaq]
^ imm. 12 Amerlanerusunik paasissutissaqarpoq atuakkami Hvad er det Bibelen virkelig lærer?-imi qupp. 201-204-mi. Jehovap Nalunaajaasuinit saqqummersinneqartoq.
[Qupp. 7-mi assiliartaq]
Jiisusi oqarpoq nammineq inngilillu ilisimanngisaminnik Ataataq kisimi ilisimasaqartoq