Aalajangernissamut piffissaavoq

“Guutip inuk pinngortippaa imminik assililluni; Guuti assilillugu pinngortippaa. Pinngortippai tassaatillugit angut arnarlu.” — 1 Mosesi 1:27.

OQAATSIT taakku Biibilip aallaqqaataani allassimasut Guutip ‘piffissaq eqqorlugu ajunngitsumik suliaasa’ misinnarnersaasa ilaannik — inuit aappariit, Adamip Evallu, naammalluinnartuusut pinngortitaanerannik — oqaluttuartuupput. (Oqaluussisartup oqaasii 3:11) Jehovap Guutip taakkuninnga Pinngortitsisuusutut ima oqarfigai: “Kinguaassiorlusi amerliartoritsi nunarsuaq tamakkerlugu ilissinnullu naalatsigitillugu; naalagaagitsilu aalisakkanut immamiittunut qilaallu timmiaanut nersutinullu nunami aalasunut tamanut.” — 1 Mosesi 1:28.

Taamatut oqarnermigut Guutip siunertani inunnut aappariinnut siullernut ilisimatippaa. Meeqqiortussaapput, nunarsuaq paarisussaavaat paratiisinngortillugulu imminnut kinguaaminnullu najugaqarfiusoq. Qanoq sivisutigisumik inuussanersut qaqugulu toqussanersut siumut aalajangeriigaanngillat. Nuanningaartumilli neriuutissinneqarput. Eqqortumik aalajangiigunik Guutillu piumasaanut naapertuuttumik inuugunik toqqissisimalluinnarlutik pilluarlutillu naassaanngitsumik inuusinnaapput.

 Kukkusumilli aalajangiipput, tamatumalu kingunerisaanik inuit tamarmik utoqqalisalerput toqusalerlutillu. Ataataanerpaap Jobip una misiutiginngilaa: “Inuk arnamit erniusoq inuunikittarpoq eqqissinaatsorsiortaqalunilu.” (Jobi 14:1) Sunaana pissutaasoq?

Biibilimi ima nassuiaateqarpoq: “Inukkut ataasiinnakkut ajorti silarsuarmut [tikiuppoq] ajortikkullu toqu tikiulluni.” (Romamiut 5:12) ‘Inuk ataasiinnaq’ taanna soorunami tassaavoq Adami, taanna piaaraluni aalajangerpoq Guutip peqqussutaa paasiuminartoq erseqqissorlu unioqqutinniarlugu. (1 Mosesi 2:17) Taamatut aalajangernermigut Adamip nunami paratiisiusumi naassaanngitsumik inuusinnaanerigaluani maangaannartippaa. Aammattaaq kinguaami kingornussassamik erlinnartumik pisinnaanerigaluat maangaannartippaa, aamma kinguaami ajortimik toqumillu perloqqussutaasunik atugaqalernerannut pisuuvoq. Suut tamarmik annaaneqarpasipput — ilumulli taamaappa?

‘Suut tamarmik nutaanngorfissaat’

Tamatuma kingorna ukiut tusindialuit qaangiuttut tussiaasiortoq ima allannissamut isumassarsisinneqarpoq: “Iluartut nuna kingornutissavaat najugaqassallutillu tassani naassaanngitsumik.” (Tussiaat 37:29) Guutip, Edenimi neriorsuutiminik eqquutitsiumaarneranik uppernarsaatitut, qanittukkut qanoq iliorumaarnera Biibilimi killitsinnartumik ima allaatigineqarpoq: ‘Qulliit tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.’ Taava Guuti nammineq ima oqarpoq: “Takuat, suut tamaasa nutaanngortippakka!” — Saqqummersitat 21:4, 5.

Suut tamarmik aalajangersimasumik piffissaligaammata ima apererusunnarpoq: Guutip sunik tamanik nutaanngortitsinissaanut neriorsuutigisaminillu nuanningaartunik eqquutitsinissaanut qaqugu piffissanngussava? Atuagassiamik matuminnga saqqummersitsisartut, Jehovap Nalunaajaasui, ilungersorlutik inunnut ilisimatitsissutiginiartarpaat Biibilimi ‘ullussanik kingullernik’ taaneqartuni inuusugut qanittukkullu Guutip ‘suut tamaasa nutaanngortikkumaarai’. (2 Timotheusi 3:1) Kajumissaarpatsigit Biibilimik misissueqqullutit siunissarlu nuanningaartoq illit aamma siunissarilersinnaasat pillugu ilinniaqqullutit. Aamma kajumissaarut una akuereqqunaraluaqaaq: “[Jehova] ujarsiuk nanisassaatillugu, torlorfigisiuk qanitsillugu.” (Esaja 55:6) Inuunerit naassaanngitsumillu inuusinnaanerit siumut aalajangeriigaanngillat — illit nammineq aalajangigassaraatit! (wp09 03/01-E)

[Qupp. 8-mi issuagaq]

“Takuat, suut tamaasa nutaanngortippakka!”