Jiisusi, Daavimit Salomomillu annerusoq, pingaartiguk

‘Takuat maaniippoq Salomomit annerusoq.’ — MATTHÆUSI 12:42.

1, 2. Samuelip Daavi kunngissatut taneqqullugu peqquneqarnera sooq inuit isiginnittaasiat naapertorlugu tupaallannarpa?

KUNNGITUT isikkoqanngilaq. Pruffiitip Samuelip savanik paarsisumut inuusuttuaqqamut assingutinneruaa. Aamma illoqarfik taassuma inunngorfia, Betlehemi, pingaaruteqarpianngilaq. ‘Judap eqqarleriissortaani mikisutut’ allaatigineqarpoq. (Mika 5:1) Taamaakkaluartorli pruffiitip Samuelip inuusuttuaraq pingaaruteqarpasinngitsoq taanna Israelip kunngissaatut taninnialerpaa.

² Samueli Isajip ernerisa ilaannik kunnginngortitsiniarluni takkuppoq. Daavili taassumunnga ilisaritinneqaqqaartuunngilaq. Aamma aappaattut pingajuattulluunniit ilisaritinneqanngilaq. Daavi, Isajip ernerisa arfineq-pingasut nukarlersaat, Samueli Isajikkunnut angutip aalajaatsup taassuma ernerisa ilaat nunami kunnginngortussatut taninniarlugu apuummat najuutinngilarluunniit.  Jehovalli Daavi qinerpaa, tamannalu pingaaruteqarnerpaavoq. — 1 Samueli 16:1-10.

3. (a) Jehovap inuk misissoraangamiuk suna pingaarnerpaatittarpaa? (b) Daavi taninneqarmat qanoq pisoqarpa?

³ Jehovap Samuelip takusinnaanngisai takusinnaavai. Daavip uummammiui takusinnaavai, takusinnaasanilu iluarai. Jehovamut inuup isikkua pingaaruteqarnerpaanani ilorlikkulli pissusii pingaaruteqarnerpaapput. (Atuaruk 1 Samueli 16:7). Samuelip paasigamiuk Jehova Isajip ernerisa angajulliit arfineq-marluk ilaannik qinersisimanngitsoq nukarlersaat nersutit mangiartarfiinit aaqquaa. Ima oqaluttuarineqarpoq: “Taava [Isajip Daavi] aasippaa. Inuusuttoq taanna sinngortuuvoq kusanartunik iseqarluni inugissuullunilu. [Jehovalu] oqarpoq: ‘Taninniaruk — tassa taanna!’ Taava Samuelip nassuk uuliamik imaqartoq tigullugu Daavi tanippaa qatanngutai isigitillugit; ullorlu taanna aallarnerfigalugu [Jehovap] anersaavata Daavi tikittalerpaa [Jehovap anersaava Daavimut sunniuteqartalerpoq, NV].” — 1 Samueli 16:11-13.

Daavi Kristusimut assersuutaavoq

4, 5. (a) Daavip Jiisusillu assigiissutaasa ilaat oqaluttuarikkit. (b) Sooq Jiisusi Daavimik annermik taaneqarsinnaava?

⁴ Jiisusi, Daavip pisimaneratut, Betlehemimi inunngorpoq, Daavip inunngorneranit ukiut 1100-t qaangiuttut. Inuppassuit isumaat naapertorlugit Jiisusi aamma kunngitut isikkoqanngilaq. Tassa Israelikkut ilarpassuisa kunngisut neriuutigisimasaattut inngilaq. Jehovamilli qinerneqarpoq soorlu Daavi Jehovamit qinerneqartoq. Aamma Jehovamit asaneqarpoq soorlu Daavi Jehovamit asaneqartoq. * (Lukasi 3:22) Aamma Jiisusimut tunngatillugu oqartoqarsinnaavoq ‘Jehovap anersaava taassumunnga sunniuteqartoq’.

⁵ Suli allanik assigiissuteqarput. Daavi siunnersuisartuminit Akitofelimit killuutigineqarpoq. Jiisusi apustilimit Judasi Iskariotimit killuutigineqarpoq. (Tussiaat 41:10; Johannesi 13:18) Daavillu Jiisusillu Jehovap illua misigissuseqarfigingaarpaat. (Tussiaat 27:4; 69:10; Johannesi 2:17) Aammattaaq Jiisusi Daavip kingoraartigaa. Jiisusi suli inunngunngitsoq inngili taassuma anaanaanut ima oqarpoq: “[Guutip Jehovap] tunissavaa ataataata Daavip issiavissaarsuanik.” (Lukasi 1:32; Matthæusi 1:1) Jiisusi, kunngi Missiarsiusoq sivisuumik utaqqisaq, Daavimit anneruvoq Missiarsi pillugu neriorsuutit tamarmik taassumunnga eqquummata. — Johannesi 7:42.

Kunngerput paarsisuusoq maliguk

6. Daavi qanoq ililluni paarsisuulluartuua?

⁶ Jiisusi aamma savanik paarsisuuvoq. Paarsisuulluartup suut ilisarnaatigai? Aalajaalluni sapiillunilu savaatini isumassortarpai paaralugillu ivigartorfissarsiuuttarlugillu. (Tussiaat 23:2-4) Daavi inuusuttuulluni savanik paarsisuuvoq, ataatamilu savaatai isumassorluarpai. Savaatit ulorianartorsioraangata sapiillisaartarpoq, aamma løvimik allarsuarmilluunniit takkuttoqaraangat savat sernissorniarlugit inuunini navianartorsiortittarpaa. — 1 Samueli 17:34, 35.

7. (a) Daavip kunngitut pisussaaffeqalernissaminut suna piareersaatigaa? (b) Jiisusip qanoq ililluni ersersippaa ‘savanik paarsisuulluni ajunngitsoq’?

⁷ Ukiut Daavip narsaatini qattunernilu savanik paarsiffini imaannaanngitsunik pisussaaffeqalernissaminut Israelikkunnillu paarsisuunermut tunngatillugu akisussaaffeqalernissaminut piareersaatigai. * (Tussiaat 78:70, 71) Aamma Jiisusip ersersissimavaa paarsisutut maligassaalluarluni. ‘Savarpannguanik’ ‘savanillu allanik’ paarsisutut kiffartornermini Jehovamut nakussatsissutissarsiortarlunilu siunnersortissarsiortarpoq. (Lukasi 12:32; Johannesi 10:16) Aap, Jiisusi ‘savanik paarsisuuvoq ajunngitsoq’. Savaatini ima ilisarisimalluartigai tamaasa immikkut atiisigut taasarlugit. Savaatini ima asatigai nunarsuarmiitilluni kajumilluni taakku pillugit imminut pilliutigaluni. (Johannesi 10:3, 11, 14, 15) Aammattaaq Jiisusi ‘savanik paarsisutut ajunngitsutut’ Daavip  naammassisinnaanngisaanik naammassisaqarpoq. Utertitsissutitut pilliutaa inuiaat toqumit aniguisinneqarsinnaanissaannut periarfissiivoq. ‘Savarpannguanik’ qilammi toqujuitsutut inuunermut siulersuinissaminik ‘savanillu allanik’ silarsuarmi nutaami naapertuilluarfiusumi ‘amaqqutut pissusilinnik kiisortoqanngitsumi’ naassaanngitsumik inuunissamut siulersuinissaminik sumilluunniit akornuserneqarsinnaanngilaq. — Atuaruk Johannesi 10:27-29.

Kunngi ajugaasoq maliguk

8. Daavi qanoq ililluni kunngiulerpa ajugaasoq?

⁸ Daavi kunngiugami sorsuttartuuvoq sapiitsoq Guutip innuttaasa nunaannik sernissuisoq, “[Jehovallu] Daavi ajugaatittarpaa sumulluunniit sorsukkiartoraangat”. Daavip naalakkersuinerata nalaani Israeli anginerulerpoq Egyptenip kuussuaniit kuussuarmut Eufratimut killeqarfeqalerluni. (2 Samueli 8:1-14) Daavi Jehovamit nakussatsinneqarluni naalakkersuisunngorpoq pissaaneqartorujussuaq. Biibilimi ima allassimavoq: “Daavi nunani tamani tusaamasaalerpoq, [Jehovallu] inuiannut tamanut qunugineqalersippaa.” — 1 Nalunaarsuutit 14:17.

9. Jiisusi kunngissatut qanoq ajugaanersoq nassuiaruk.

⁹ Jiisusi nunarsuarmiitilluni kunngitut Daavitut qunusuitsuuvoq. Kunngissatut anersaanut ajortunut oqartussaassuseqarnini ersersippaa anersaapilunnit naalliutsitaasut ilaat aniguisikkamigit. (Markusi 5:2, 6-13; Lukasi 4:36) Allaat imminut akeraanerpaasup, Saatanip Diaavulup, ‘Jiisusi susinnaanngilaa’. Jehovap ikiuineratigut Jiisusip silarsuaq “Ajortumut naalatsigitittoq” ajugaaffigaa. — Johannesi 14:30; 16:33; 1 Johannesi 5:19.

10, 11. Jiisusi kunngitut sorsuttartutut qilammi sunik naammassisaqarsimava, qanittukkullu sujumaarpa?

¹⁰ Jiisusip toquneranit qilammilu inuunermut makititaaneranit ukiut 60-it missiliorlugit qaangiuttut apustilip Johannesip Jiisusi qilammi kunngitut sorsuttartutut siulittuutaasumik takorroorpaa. Johannesi ima allappoq: “Takuaralu hesti qaqortoq, tassanilu hestersoq pisisseqarpoq. Taanna niaqoruserneqarpoq, aallarporlu ajugaajuarlunilu [aallarporlu ajugaalluni ajugaalluinnassallunilu, NV].” (Saqqummersitat 6:2) Hestimik qaqortumik hestersoq tassaavoq Jiisusi. 1914-imi qilammi kunnginngortinneqarami “niaqoruserneqarpoq”. Tamatuma kingorna ‘aallarpoq ajugaalluni’. Aap, Jiisusi kunngiuvoq ajugaasoq, soorlu Daavi aamma taamaassimasoq. Guutip naalagaaffiani kunnginngortinneqarnermi kinguninngua Saatani ajugaaffigaa anersaapiluilu ilanngullugit nunarsuarmut igillugit. (Saqqummersitat 12:7-9) Saatanip pissutsinik aaqqissuussineranik ajortumik suujunnaarsitsinermigut ‘ajugaalluinnarnissami’ tungaanut hesterluni angalanermini ajugaajuassaaq. — Atuaruk Saqqummersitat 19:11, 19-21.

¹¹ Jiisusi Daavitut kunngiuvoq misiginneqataasoq, ‘amerlangaartullu’ Harmagedonimi sernissussavai. (Saqqummersitat 7:9, 14) Aammattaaq Jiisusip kingornusseqatissaasalu 144.000-it naalakkersuineranni ‘toqusut makikkumaarput — iluartut iluaatsullu’. (Apustilit Suliaat 24:15) Nunarsuarmi makititaasut naassaanngitsumik inuunissamik neriuuteqarsinnaassapput. Taakku siunissaat nuanningaarami! Qanortoq tamatta ‘ajunngitsuliortuarnissarput’ aalajangiusimatigu, nunarsuaq Daavip annerup innuttaanik nuannaarlutillu naapertuilluartunik ulikkaarpat inuusinnaaniassagatta. — Tussiaat 37:27-29.

Salomop ilisimassusermik qinnutaa akineqarpoq

12. Salomop suna qinnutigaa?

¹² Daavip ernera Salomo aamma Jiisusimut siumut assersuutaavoq. * Salomo kunnginngormat Jehova taassumunnga sinnattukkut saqqummerpoq oqarlunilu qinnutaanik sumilluunniit tuniumaarlugu. Salomop pisuussuteqarnerulernissaq, pissaaneqarnerulernissaq sivisunerusumillu inuunissaq qinnutigisinnaagaluarpai. Namminissarsiornanili Jehovamut ima qinuvoq: “Tuninnga ilisimassusermik silaqassusermillu illit innuttannut siulersuisuusinnaaqqullunga. Kinami innuttannut taama amerlatigisunut naalagaasinnaava?” (2 Nalunaarsuutit 1:7-10) Jehovap Salomop qinnutaa piviusunngortippaa. — Atuaruk 2 Nalunaarsuutit 1:11, 12.

13. Sooq oqartoqarsinnaava Salomop ilisimassusia sanilliunneqarsinnaanngitsoq, ilisimassusianullu kina pilerfiua?

 ¹³ Salomop Jehovamut aalajaattuartilluni oqaasii ilisimassutaasut nalimini inuusut oqaasiinut ilisimassutaasunut sanilliunneqarsinnaasimanngillat. Salomo “ussatiliorpoq 3.000-inik”. (1 Kunngit 5:10, 12, 14) Taakku ilarpassui allanneqarput inunnillu ilisimassuseqalerumasunit suli pingaartinneqaqalutik. Sabap dronningia 2400 kilometerisut isorartutigisukkut angalavoq Salomop ilisimassusia “nalorsitsaarutinik misilinniarlugu”. Salomop oqaasii naalagaaffiatalu pigissaarlunilu siumukarnera ajasoorutigai. (1 Kunngit 10:1-9) Salomop ilisimassusiata pilerfia Biibilimi ima paasinarsisinneqarpoq: “Silarsuarmit tamarmit pisut Salomo ornittarpaat ilisimassusia Guutip uummammiugititaa tusarumallugu.” — 1 Kunngit 10:24.

Kunngi silatooq maliguk

14. Nassuiaruk sooq Jiisusi ‘Salomomit annerusoq’.

¹⁴ Inuk ataasiinnaq Salomop ilisimassusianik akimuisimavoq. Tassa Jiisusi Kristusi, taannalu imminut pilluni ima oqarpoq: “Maaniippoq Salomomit annerusoq.” (Matthæusi 12:42) Jiisusi ‘naassaanngitsumik inuussutaasunik oqaaseqarpoq’. (Johannesi 6:68) Assersuutigalugu qaqqami oqaluutsimini najoqqutassiat Salomop ussataasa ilaanniittut annertunerusumik nassuiarpai. Salomop inummik pillualersitsisinnaasut arlallit eqqartorpai. (Ussatit 3:13; 8:32, 33; 14:21; 16:20) Jiisusip erseqqissarpaa pilluarneq piviusoq Jehovamik pallorfiginninnermut taassumalu neriorsuutaasa eqquunnissaannut tunngassuteqartunit tamanit aallaaveqartoq. Ima oqarpoq: “Pilluarput anersaakkut pisariaqartitaqarnerminnik miserratiginninngitsut qilammiup naalagaaffia pigigamikku.” (Matthæusi 5:3, NV) Najoqqutassianik Jiisusip ajoqersuutaaniittunik atuisut Jehovamut, ‘inuunerup puilaffianut’, qanillisarput. (Tussiaat 36:10; Ussatit 22:11; Matthæusi 5:8) Kristusi ‘Guutip ilisimassusianut’ sinniisuuvoq. (1 Korinthimiut 1:24, 30) Jiisusip Kristusip kunngiugami Missiarsiusoq ‘anersaaq ilisimanartoq paasisimasaqarnartorlu’ pigaa. — Esaja 11:2.

15. Guutip ilisimassusia qanoq ililluta iluaqutigisinnaavarput?

¹⁵ Salomomut annermut ajoqersugaagatta Guutip ilisimassusia qanoq ililluta iluaqutigisinnaavarput? Guutip ilisimassusia oqaasiani saqqummersinneqartarmat tamatuma ujarnissaa ilungersuutigisariaqarparput Biibilimik, pingaartumik Jiisusip oqaaserisimasaanik, peqqissaartumik atuaqqissaarnitsigut atuakkattalu eqqarsaatigeqqissaarnerisigut. (Ussatit 2:1-5) Aamma Guuti ilisimassusermik tuneqqulluta qinnuigiuartariaqarparput. Guutip oqaasiani neriorsorneqarpugut ikioqqulluni ilumoorluni qinnutit akineqarumaartut. (Jaaku 1:5) Anersaap illernartup ikiuineratigut ilisimassuseq naleqangaartoq, ajornartorsiutitsinnik aaqqiinissamut isumatusaartumillu aalajangiinissamut iluaqutigisinnaasarput, Guutip oqaasiani nanisinnaassavarput. (Lukasi 11:13) Salomo aamma “Oqaluussisartoq”-mik ‘ilisimasassanillu inunnik ilinniartitsisartumik’ taaneqarpoq. (Oqaluussisartup oqaasii 12:9, 10) Jiisusi aamma ilagiinnut kristumiunut niaquugami innuttaminik ilinniartitsisarpoq. (Johannesi 10:16; Kolossemiut 1:18) Taamaattumik silatusaassaagut ilagiit ataatsimiinnerinut ‘ilisimasassanik ilinniartinneqarfigisakkatsinnut’ najuuttarutta.

16. Salomop Jiisusillu suna assigiissutigaat?

¹⁶ Salomo kunngiuvoq suliumatulluinnartoq. Nuna tamakkerlugu sanaartornermik pilersaarummik aaqqissuussivoq, aamma aqqusinniorneq illussaarsualiornerillu, imeqarfiliornerit, peqqumaasivinnik illoqarfiliornerit, qamutinut illoqarfiliornerit hestinullu ineqarfiliornerit nakkutilliisuuffigai. (1 Kunngit 9:17-19) Sanaartornera naalagaaffiup tamarmi iluaqutigaa. Jiisusi aamma ‘sanaartortitsisuuvoq’. Ilagiissini ‘qaarsumut’  tunngavilersimavai. (Matthæusi 16:18) Aamma silarsuassami nutaami sanaartorneq nakkutilliisuuffigissavaa. — Esaja 65:21, 22.

Eqqissinermut kunngi maliguk

17. (a) Ukiut Salomop naalakkersuiffiisa pingaartumik suna ilisarnaatigaat? (b) Taamaakkaluartoq Salomop suna iliuuserisinnaanngilaa?

¹⁷ Ateq Salomo “eqqissineq”-mik isumalimmit naggueqarpoq. Kunngi Salomo Jerusalemimit naalakkersuivoq, “Jerusalemi”-lu “marloriaammik eqqissineqarfiusoq”-mik isumaqarpoq. Ukiut 40-t Israelimi naalakkersuiffiisa eqqissineq, nunami tamatumani siornatigut misigineqarsimanngitsoq, ilisarnaatigisimavaat. Piffissaq taanna pillugu Biibilimi ima allassimasoqarpoq: “Salomo inuutillugu Juda Israelilu aarleqquteqarnatik nuna Danimiit Be’ershebamut najugaraat tamarmik immikkut viinnequtaatimik figenequtaatimillu ataanni issiallutik.” (1 Kunngit 5:5) Salomolli, ilisimassuseqaraluaqaluni, innuttani ajortimut, nappaatinut toqumullu inussiaanermit aniguisissinnaanngilai. Salomolli annerup innuttani tamakkunannga tamanit aniguisissinnaavai. — Atuaruk Romamiut 8:19-21.

18. Ilagiinni kristumiuni pissutsit qanoq ittut nuannaarutigisinnaavavut?

¹⁸ Maannangaaq ilagiinni kristumiuni eqqissineqarpoq. Anersaakkut paratiisiviusumiinnerput nuannaarutigisinnaavarput. Guutilu tullerpullu eqqisseqatigaavut. Maluginiaruk pilluaqqussut maanna misigisarput Esajap qanoq allaatigineraa: “Saffiussavaat panatik assallatserummut savissaliaralugit, qalugiusatillu saviliaralugit viinnequtilerissutit. Inuiaat panamik imminnut silugutissaassapput, sorsunnissamut sungiusarunnaassallutik.” (Esaja 2:3, 4) Guutip anersaavanit siulersortikkaangatta anersaakkut paratiisimi eqqissinermik tamatuminnga siuarsaaqataasarpugut.

19, 20. Nuannaarnissamut sunik pissutissaqarpugut?

¹⁹ Siunissarli suli nuannernerussaaq. Inuit naalattut Jiisusip naalakkersuinerani eqqissinermik aatsaat taama annertutigisumik nuannaarutiginnitsillugit ‘nungujassusermi inussiaataanermit aniguisitaajartuaassapput’ inuttut naammalluinnartunngornissartik tikillugu. (Romamiut 8:21) “Qanilaartut” Kristusip ukiuni tusindini naalakkersuinerata naalernerani naggammik misilinneqareerunik, “nuna kingornutissavaat pilluangaarnertillu nuannaarutigissallugu”. (Tussiaat 37:11; Saqqummersitat 20:7-10) Aap, Jiisusip Kristusip naalakkersuinera ilumut Salomop naalakkersuineranik takorloorsinnaanngisatsinnik akimuissaaq!

²⁰ Israelikkut Mosesimit, Daavimit Salomomillu nakkutigineqartillutik nuannaarput. Uagut Kristusip naalakkersuinerani suli nuannaarnerusinnaassaagut. (1 Kunngit 8:66) Jehova qutsavigisassaraarput ernituani — Mosesimit, Daavimit Salomomillu annerusoq — uatsinnut aallartissimammagu! (w09 04/15-E)

[Quppernerup ataani ilanngussat]

Uku nassuiarsinnaavigit?

• Jiisusi qanoq ililluni Daavimit annerua?

• Jiisusi qanoq ililluni Salomomit annerua?

• Daavimit Salomomillu annerusoq sooq illit pingaartippiuk?

[Atuaqqissaarnermi apeqqutit]

[Qupp. 31-mi assiliartaq]

Salomop ilisimassusia Guutimeersoq Salomop annerup ilisimassusianut siumut assersuutaavoq

[Qupp. 32-mi assiliartaq]

Jiisusip naalakkersuinera Salomop Daavillu aqutsinerannik takorloorsinnaanngisatsinnik akimuissaaq!