Jobi Jehovap aqqanik ataqqinartitsivoq

“[Jehovap] aqqa unnersiutigineqarli.” — JOBI 1:21.

1. Jobimik allakkat kia allassimagunarpai, aamma qanga?

MOSESI 40-t missaanni ukioqarpoq Egyptenimit Faraomillu kamattumit qimaagami Midjanimullu nuulluni. (Apustilit Suliaat 7:23, 29) Tassaniitilluni Jobip nunami qanittumiittumi Usimi misilinneqaatai pillugit tusagaqarsimasinnaavoq. Ukiorpassuit tamatuma kingorna Mosesip Israelikkullu inoqajuitsumi ingerlaarnermik naalernerani Usimut qanittumiitillutik, Mosesi immaqa ukiut Jobip inuuffii kingulliit pillugit tusagaqarsimavoq. Juutit oqaluttuatoqaat naapertorlugit Mosesip Jobimik allakkat allappai Jobip toqunerata kinguningaatsiaagut.

2. Jobimik allakkat ullumikkut Jehovap kiffaasa uppernerannut qanoq nakussatsissutaappat?

² Jobimik allakkat ullutsinni Guutip kiffaanut nakussatsissutaapput. Qanoq? Oqaluttuarineqartumi paasitinneqarpugut qilammi pisimasunik pingaaruteqangaartunik, aamma Guutip qilammi nunamilu kisimi oqartussaanera pillugu akerleriissut pingaarutilipilussuaq erseqqissarneqarpoq. Aamma oqaluttuarineqartoq inuup assuarnaattuarnissaata qanoq paasisariaqarneranik paasinninnerulissutigaarput. Aammattaaq sooq Jehovap kiffami naalliunnerannik ilaannikkut akuerinnittarneranik paasinninnissamut iluaqutigaarput. Ersersinneqarpoq Saatani Diaavulu tassaasoq Jehovamik akerlilersuisut pingaarnersaat inunnullu akeraanerpaasoq, aamma allakkanit erserpoq inuit Jobitut naammalluinnanngitsut sakkortuumik misilinneqaraluarlutik Jehovamik ilumoorfiginnittuarsinnaasut. Pisimasut Jobimik allakkani allaatigineqartut misissoriartigit.

Jobi Saatanimit misilinneqarpoq

3. Jobi pillugu suut nalunngilavut, aamma sooq Saatanimit saassunneqarpa?

³ Jobi inuusimavoq pigissaartuullunilu sunniuteqarluartoq, ataataanerpaaq ileqqorissaartoq. Siunnersuisartuusimagunarpoq ataqqisaangaartoq piitsunik ikiuisartoq. Pingaarnerpaamilli, Jobi Guutimik mianerinnippoq. Angutitut ‘assuarnaatsutut peqqusersuitsutullu Guutimik mianerinnittutut ajortumillu iliuuseqarnaveersaartuusutut’ oqaluttuarineqarpoq. Jobip Guutimut tunniusimanini — pisuussutini sunniuteqarluarninilu pinnagit — Saatanimit Diaavulumit saassunneqaatigaa. — Jobi 1:1; 29:7-16; 31:1.

4. Assuarnaassuseq qanoq paasisariaqarpa?

⁴ Jobimik allakkat aallarniutaanni inngilit Jehovap saani katersuunnerat allaatigineqarpoq. Saatani aamma najuuppoq, taassumalu Jobi unnerluutigaa. (Atuaruk Jobi 1:6-11). Ilumoorpoq Saatanip Jobip pigisai eqqaagai, taassumaliuna assuarnaassusia maluginiaraa. Oqaaseq assuarnaassuseq peqqusersuinnermik, naapertuilluartuunermillu isumaqarpoq. Biibilimi atorneqaraangat, inuup Jehovamut qamannga pisumik tunniusimalluinnarnera pineqartarpoq.

5. Saatanip Jobi sunerarpaa?

⁵ Saatanip Jobip Guutimut pallorfiginninnera namminissarsiornermik pissuteqarnerarpaa. Oqarpoq Jobi akissarsisinneqartuarnini sernissorneqartuarninilu pissutigiinnarlugit Guutimik ilumoorfiginnittoq. Saatanip unnerluutiginnissutaanut akissutitut Jehovap Saatanip Jobimik aalajaatsumik saassussinissaa akueraa. Tamatuma kingunerisaanik Jobi ullup ataasiinnaap ingerlanerani nalunaarfigineqarpoq nersutaatini tillinneqarsimallutilluunniit suujunnaarsinneqarsimasut, kiffami amerlanersaat toqutaasimasut qitornanilu qulit toqusimasut. (Jobi 1:13-19) Saatanip saassussinera Jobip assuarnaakkunnaassutigaa? Biibilimi oqaluttuarineqarpoq Jobi, ajunaarnerit taakkua tusaramigit, ima oqartoq: “[Jehova] tunniussigami [Jehova] tigusivoq, [Jehovap] aqqa unnersiutigineqarli.” — Jobi 1:21.

6. (a) Kingusinnerusukkut inngilit qilammi katersuummata qanoq pisoqarpa? (b) Jobip Jehovamut assuarnaattuarnissaa apeqquseramiuk Saatanip kikkut eqqarsaatigai?

 ⁶ Kingusinnerusukkut inngilit Jehovap saani katersorsimatillugit Saatanip Jobi unnerluutigeqqippaa ima oqarluni: “Ameq amermik naleqararaaq! Inuummi pigisani tamaasa akigeriaannaasarpai inuunini annaajumanagu. Ataguli assat isatseriassagit uinnga saarngilu attorlugit, taava kiinnat toqqavillugu perloqqussagaluarpaatit!” Maluginiaruk Saatanip maanna aamma allat unnerluutigilerai. Ima oqarnermigut: “Inuummi pigisani tamaasa akigeriaannaasarpai inuunini annaajumanagu”, Jobip assuarnaassusia apeqqusiinnarnagu aammali inuup kialuunniit Jehovamik pallorfiginnittup assuarnaattuarnissaa apeqquserpaa. Taava Guutip akueraa Saatanip Jobimik naalliunnartumik nappaateqalersitsinissaa. (Jobi 2:1-8) Jobilli misilinneqaatai taakkuinnaanngillat.

Pissutsit Jobip atugai sumik ilinniarfigisinnaagivut

7. Jobi nuliaminit pulaartuminillu pingasunit qanoq tatineqangaarpa?

⁷ Aallaqqaammut Jobip nulia uimisut naalliuuteqarpoq. Qitornamik toqunerat nersutaatiminnillu annaasaqarnertik isumatsassutigisimassavai. Aamma uimi naalliunnartumik nappaateqarnera naalliuutigisimassavaa. Jobi ima nilliaffigaa: “Assuarnaassutsit suli aalajangiusimaniinnarniarpiuk? Guuti perloqquinnaruk toqullutillu!” Taava angutit pingasut — Elifazi, Bildadi Sofarilu — takkupput Jobimik tuppallersaaniannguatsiarlutik. Kukkusumilli isummerput, paasinarsivorlu ‘tuppallersaaneq naluissut’. Assersuutigalugu Bildadip Jobip qitornai ajortuliorsimassangatippai toqusariaqarsimasoralugillu. Elifazi oqamisaarpoq Jobip naalliuutai siusinnerusukkut ajortuliaanut pillaataasut. Allaat assuarnaattuartut Guutip isaani ilumut naleqarnersut apeqquserpaa! (Jobi 2:9, 11; 4:8; 8:4; 16:2; 22:2, 3) Jobi taamatut tatineqangaarnermini assuarnaattuarpoq. Ilumoorpoq Jobi kukkusoq ‘Guutiminngarnit iluartuunerutinniarami’. (Jobi 32:2) Misilinneqarnerminili tamani aalajaattuarpoq.

8. Elihu ullumikkut siunnersuiniartunut qanoq maligassaalluarpa?

⁸ Taava Elihu, aamma pulaartoq, oqaluttuarineqarpoq. Taassuma Jobip ikinngutaasalu pingasut oqaasii tusarnaaqqaarpai. Taakkunannga inuusunnerugaluarluni ilisimassuseqarnerunini ersersippaa. Jobi ataqqinnilluni saaffigaa, aqqa atorlugu. Elihup Jobi assuarnaassusia pillugu nersualaarpaa. Aammali Jobip pisuunnginnerminik uppernarsaaniarpallaarsimanera eqqaavaa. Taava Elihup Jobi uppernarsaavigaa aalajaalluni Guutimut kiffartornerup imminut akilersinnaajuaannarneranik. (Atuaruk Jobi 36:1, 11). Ullumikkut allanik siunnersuiniartunut maligassaalluassusia! Elihu utaqqisinnaassuseqarpoq, tusarnaaqqissaarpoq, periarfissaqartillugu nersualaarivoq ineriartornartunillu siunnersuuteqarluni. — Jobi 32:6; 33:32.

9. Jehovap Jobi qanoq ikiorpaa?

⁹ Naggataatigut Jobi mianernangaartumik pulaartoqarpoq! Ima allassimavoq: “Taava Guutip  anorersuarmit Jobi oqaluffigaa.” Apeqquterpaaluit atorlugit Jehovap inussiarnerluni aalajangersimallunili Jobi eqqarsaatiminik naqqiinissaanut ikiorpaa. Jobip naqqinneqarnini akueraa ima oqarluni: “Suunngippallaaqaanga. . . . [Peqqissiminera takutippara] issumi arsanilu issiallunga.” Jehovap Jobi oqaluffigereeramiuk ikinngutaanik pingasunik iluarinninnginnini ersersippaa ‘eqqunngitsumik oqaluuserinnissimammata’, Jobillu taakku qinnuttussaavai. Taava “Jobip ikinngutini qinnutereermagit atugarisai [Jehovap] allanngortippai. Pigisarisimasaasa marloriaataannik pigisaqalersippaa”. — Jobi 38:1; 40:4; 42:6-10.

Jehova qanoq asatigaarput?

10. Jehovap Saatanimik sumiginnaannginneranut piuneerutitsinnginneranullu suna pissutaava?

¹⁰ Jehova nunarsuarmik avataarsuanillu Pinngortitsisuuvoq, pinngortitanut tamanut Kisimi Oqartussaasoq qutsinnerpaaq. Sooq Diaavulup unnerluutiginnissutaa sumiginnaannanngilaa? Jehovap nalunngilaa apeqquserneqartoq akineqarnavianngitsoq Saatanimik sumiginnaanikkut taassuminngaluunniit piuneerutitsinikkut. Diaavulup Jobi, assuarnaalluarluni Jehovamut kiffartortoq, pisuussutiminik tamanik annaasaqaruni ilumoorfiginnittuarnaviannginnerarpaa. Jobi misilinneqaraluarluni ilumoorfiginnittuarpoq. Tamatuma kingorna Saatanip inuk kinaluunniit timikkut naalliutsinneqaruni Guutimik tunussissanerarpaa. Jobi naalliuppoq, assuarnaakkunnaanngilarli. Taamaalilluni Saatanip, angummut aalajaatsumut naammalluinnanngitsumulli tunngatillugu, sallutunera paasinarsivoq. Guutimimmi pallorfiginnittut allat?

11. Jiisusi Saatanip unnerluutiginnissutaanut inaarutaasumik qanoq akissutaava?

¹¹ Guutimut kiffartortut Saatanimit qanorluunniit pineqaraluarlutik assuarnaattuartut akeqqap naakkittaatsup unnerluutiginnissutai namminerminut tunngatillugit ilumuunnginnerat uppernarsartarpaat. Jiisusi nunarsuarmut pivoq Saatanillu unnerluutiginnissutaanut inaarutaasumik akissutaalluni. Jiisusi inuusimavoq naammalluinnartoq, soorluttaaq nagguipput, Adami, taamaattoq. Jiisusip toqumut allaat aalajaannera Saatanip sallutuneranut unnerluutiginnissutaasalu ilumuunnginnerannut qularnanngilluinnartumik uppernarsaataavoq. — Saqqummersitat 12:10.

12. Jehovamut kiffartortut tamarmik suna periarfissaralugulu pisussaaffigaat?

¹² Taamaakkaluartorli Saatanip Jehovamik pallorfiginnittut misilittuarpai. Tamatta immikkut assuarnaattuarnitsigut asanninneq kajumississutigalugu — namminissarsiorata — Jehovamut kiffartornitta uppernarsarnissaanut periarfissaqarlutalu uppernarsarnissaa pisussaaffigaarput. Pisussaaffik tamanna qanoq isigaarput? Jehovamik ilumoorfiginnittuarneq immikkut pisinnaatitaaffittut isigaarput. Aamma tuppallersaataavoq nalunagu Jehovap pinertusaarnissamut nakussatsittaraatigut aamma misilinneqarnivut killilertarai, soorlu Jobimut tunngatillugu taamaaliorsimasoq. — 1 Korinthimiut 10:13.

Saatani — akerlilersuisoq innimiitsoq tunussisorlu

13. Jobimik allakkani Saatani pillugu sunik paasissutissaqarpa?

¹³ Jobimik allakkat eqqaassanngikkaanni, Allakkani Hebræerisuuni Saatanip kannguttaalluni Jehovamut unammillersimanera inunnillu tammartitsinera pillugit ikittuinnarnik paasissutissaqarpoq. Kristumiut Allagaataanni Grækerisuuni, pingaartumik Saqqummersitani, taassuma Jehovamik akerlilersuinera pillugu Jehovallu kisimi oqartussaassusiata qutsissisinneqarnera  Saatanillu suujunnaarsinneqarnera pillugit amerlanerusunik paasissutissaqarpoq. Jobimilli allakkani Saatanip pikitsitsinera pillugu paasisaqarneruvugut. Inngilit qilammi katersuunneranni Saatani najuukkami Jehova unnersiutiginiarnagu najuuppoq. Diaavulu ajoqusiiumatuujuvoq, pilersaarutipiloqarporlu. Saatani Jobimik unnerluutiginnereerami taassuminngalu misiliinissaminut akuerineqareerami “[Jehovamit] qimaguppoq”. — Jobi 1:12; 2:7.

14. Saatani Jobimut qanoq isiginnittaaseqarpa?

¹⁴ Tassa Jobimik allakkani Saatani inunnut akeraasutut naakkittaatsutut qulaarneqarpoq. Qilammi katersuunnerup Jobi 1:6-imi allaatigineqartup pisullu Jobi 2:1-imi allaatigineqartup akornanni Jobi naluneqartumik sivisussusilimmik naakkittaatsumik misilinneqarpoq. Jobi aalajaammat Jehovap Saatani ima oqarfigisinnaasimavaa: “[Jobip] assuarnaassutsi aalajangiusimajuarpaa. Perlussiortinnissaanut pissutissaqarnak kaammattorsimavarma.” Saatanilli unnerluutimi eqqunngitsuunerata uppernarsarneqarnera nassuerutiginngilaa. Jobilli ingasattumik misileqqinneqarnissaa piumasaraa. Taamaalilluni Jobi misilinneqarpoq pigissaartilluni piitsuutillunilu. Saatani piitsunik naalliuttunilluunniit naakkinnittuunngilaq. Assuarnaatsut uumigai. (Jobi 2:3-5) Taamaakkaluartorli Jobi aalajaammat Saatanip sallutunera erserpoq.

15. Ullumikkut tunussisut Saatanillu suna assigiissutigaat?

¹⁵ Saatani pinngortitani tunussisuuvoq siulleq. Ullumikkut tunussisut Diaavulup ilisarnaatigisai ilisarnaatigaat. Isumaat ajorsisimasinnaapput ilagiinniittunik, utoqqaanertanik kristumiunik Siulersuisoqatigiinnilluunniit isornartorsiueqqajaasarlutik. Tunussisut ilaasa Guutip aqqanik, Jehovamik, atuisarneq akerleraat. Jehovamik ilisarisimannilerniarnissamik taassumunngaluunniit kiffartornissamik soqutiginninngillat. Ataatamik, Diaavulup, pisarneratut assuarnaattuarumasut saassuttarpaat. (Johannesi 8:44) Taamaattumik Jehovap kiffaasa taakku attaveqarfigiumanngilluinnarpaat. — 2 Johannesi 10, 11.

Jobi Jehovap aqqanik ataqqinartitsivoq

16. Jobip Jehova qanoq isiginnittaaseqarfigaa?

¹⁶ Jobip Jehovap aqqa atortarpaa unnersiutigisarlugulu. Qitornami toqunerannik aliasunnermik artorsangaaraluarluni Guuti assuarliuteqarfiginngilaa. Guuti annaasaqarnerminut kukkulluni pisuutikkaluarlugu Jehovap aqqa ataqqinartippaa. Kingusinnerusukkut Jobi ima oqarpoq: “Ilisimassuseq tassa [Jehovamik] mianerinninneq, paasisimasaqassuseq tassa ajortumik iliornaveersaarneq.” — Jobi 28:28.

17. Jobip assuarnaattuarnissaminut suna iluaqutigaa?

¹⁷ Jobip assuarnaattuarnissaminut suna iluaqutigaa? Erseqqippoq alianartunit nalaanneqanngikkallaramili Jehovamut qanittumik attaveqarnera. Saatanip Jehovamut unnerluutiginnissutaa pillugu ilisimasaqarneranut takussutissaqanngikkaluartoq Jobi ilumoorfiginnittuarnissaminik aalajangiusimannippoq. Ima oqarpoq: “Toqussara tikillugu assuarnaattuassaanga!”  (Jobi 27:5, NV) Jobi qanoq ililluni Jehovamut taamatut qanittumik attaveqalersimava? Qularnanngitsumik eqqarlini Aaperaat, Iisaaq Jaakulu pillugit tusagaqartarsimavoq Guutillu taakkuninnga pinneriaasia eqqaamallugu. Aamma Jobip Jehovap pissusiisa ilarpassui takusinnaavai pinngortitarsuup qimerloorneratigut. — Atuaruk Jobi 12:7-9, 13, 16.

18. (a) Jobip qanoq ililluni ersersippaa Jehovamit iluarisaarusulluni? (b) Jobip maligassiuilluarnera qanoq malissinnaavarput?

¹⁸ Jobip takusimasani tusarsimasanilu Jehovamit iluarisaarusulissutigai. Qitornami Guutip iluarinngisaanik ilioriataarnissaat ‘uummatimikkulluunniit Guutimik perloqquseriataarnissaat’ eqqarsaatigalugu ikikkagassanik Guutimut pilliuteqartuarpoq. (Jobi 1:5) Sakkortuumik misilinneqaraluaramiluunniit Jehova ajunngitsumik oqaluuseriuarpaa. (Jobi 10:12) Maligassaalluangaarami! Uaguttaaq Jehova taassumalu siunertai pillugit eqqorluartumik ilisimasaqarnermik pigiliussisariaqarpugut. Anersaakkut ajunngitsunik ileqqoqartariaqarpugut, atuaqqissaartarluta, ataatsimiigiartarluta, qinusarluta Guutillu naalagaaffianik oqaluussissutiginneqataasarluta. Aamma Jehovap aqqa ilisimaneqalersinniarlugu sapinngisarput tamaat iliuuseqassaagut. Aamma soorlu Jobip assuarnaassusia Jehovap iluarigaa, taamatuttaaq ullumikkut Guutip kiffaasa assuarnaassusiat Jehovap uummataanik nuannaartitsissaaq. Allaaserisami tulliuttumi tamanna sammissavarput.

Eqqaamavigit?

• Sooq Jobi Saatanimit Diaavulumit saassunneqarpa?

• Jobi qanoq misilinneqarpa, qanorlu periarpa?

• Jobip pisimaneratut assuarnaattuarnissamut suna iluaqutigisinnaavarput?

• Jobimik allakkanit Saatani pillugu sunik paasisaqarpugut?

[Atuaqqissaarnermi apeqqutit]

[Qupp. 10-mi assiliartaq]

Jobimik oqaluttuami Guutip qilammi nunamilu kisimi oqartussaanera pillugu akerleriissut erseqqissarneqarpoq

[Qupp. 12-mi assiliartaq]

Pissutsini qanoq ittuni assuarnaassutsit misilinneqarsinnaava?