Pinngortitat Jehovap ilisimassusianik ersersitsisut

‘Takussaanngitsuunera [Pissusii takussaanngitsut, NV] takussaagaluarput suliaasigullu ilisimaneqarlutik.’ — ROMAMIUT 1:20.

1. Silarsuarmi matumani ilisimassuseq ullumikkut inuppassuarnut qanoq sunniuteqarsimava?

SILARSUARMI inuit ilisimasarpassuaqalersimasut silatuutut isigineqartarput. Ilumulli silatuujuppat? Naagga, silatuutut isigineqartut taakku inunnik ikiuisinnaanatillu inuunerup siunertavianik qanoq paasinnittoqarsinnaanera pillugu tutsuiginartunik siunnersuuteqarsinnaanngillat. Taakkuali ilisimassusiannut sunnertittut naggataatigut ‘malinnit ajoqersuutit suulluunniit anoraannit tamanut tamaanga nassataritittarput’. — Efesosimiut 4:14.

2, 3. (a) Sooq Jehova ‘Guutiua ilisimasutuaasoq’? (b) Guutip ilisimassusiata silarsuarmi matumani ilisimassutsimit suna allaassutigaa?

² Ilisimassusermik piviusumik, Jehovamit Guutimeersumik, pigiliussisunut tunngatillugu taamaanngilluinnarpoq. Biibili naapertorlugu Jehova ‘Guutiuvoq ilisimasutuaasoq’. (Romamiut 16:27) Nunarsuaq avataarsualu pillugit ilisimaneqarsinnaasut tamaasa nalunngilai. Taakkua oqaluttuarisaanerat qanorlu sananeqarsimanerat nalunngilaa. Fysikkimi inatsisit — inuit ilisimatuussutsikkut misissuinerni pinngitsoorsinnaanngisaat — tamaasa Jehovap piliarai. Tamanna pissutigalugu inuit nassaarsiaat inuiaallu eqqarsartartorsuisa isumaliutersuutaat ajasoorutigineq ajorpai. “Silarsuup matuma ilisimassusia Guutimi sianiissusiinnaavoq.” — 1 Korinthimiut 3:19.

³ Biibilimi allassimavoq Jehova kiffaminik ‘ilisimassuseqalersitsisartoq’. (Ussatit 2:6) Ilisimassuseq Guutimeersoq inuit isumaliutersuutaasa paasiuminaannerattut paasiuminaanngilaq. Ilisimassuserli tamanna eqqorluartumik ilisimasaqarnermik paasinninnermillu tunngaveqartumik naliliilluarnissamut iluaqutigaarput. (Atuaruk Jaaku 3:17). Apustili Paulusi Jehovap ilisimassusianik tupigusuutiginningaarpoq. Ima allappoq: “Ilami Guutip pisuussusiata ilisimassusiatalu siuneqassusiatalu itissusiat! Ilami eqqartuussinerisa paasiniarneq ajornassusii aqqutaasalu siunersissaanngissusii!” (Romamiut 11:33) Aap, Jehova ilisimassuseqarnerpaavoq. Taamaattumik qularutiginngilarput taassuma inatsisaasa inooriaatsimut pitsaanerpaamut aqqutissiuisuunerat. Taanna pilluarumalluta qanoq iliortariaqarnerput pillugu ilisimasaqarnerpaavoq. — Ussatit 3:5, 6.

Jiisusi — ‘suliortoq’

4. Jehovap ilisimassusia pillugu sumi ilisimasaqalersinnaavugut?

⁴ Jehovap ilisimassusia pissusiilu immikkorluinnaq ittut allat pinngortitaani takuneqarsinnaapput. (Romamiut 1:20) Jehovap pinngortitai tamarmik, annerpaaniit minnerpaanut, pissusiinik assigiinngitsunik ersersitsipput. Sumulluunniit qiviaraluarutta ilisimassuseqarnerpaamik asannittumillu Pinngortitsisoqarneranut uppernarsaatissarpassuaqarpoq. Pinngortitaanik qimerluuinitsigut taanna pillugu paasisarpassuaqarsinnaavugut. — Tussiaat 19:2; Esaja 40:26.

5, 6. (a) Jehovap saniatigut kina pinngortitseqataava? (b) Maanna suna sammissavarput, aamma sooq?

⁵ Jehova ‘qilak nunalu pinngortikkamigit’ kisimiinngilaq. (1 Mosesi 1:1) Biibilimi oqaluttuarineqarpoq taanna takussaasunik pinngortitsinnginnermini ernituaminik, anersaamik, pinngortitsisoq, taannalu ikiortigalugu ‘suut tamaasa’ pinngortikkai. Anersaaq taanna —  “pinngortitaani tamani erniusut siullersaat” — kingusinnerusukkut inuttut Jiisusi Kristusiulluni nunarsuarmut pivoq. (Kolossemiut 1:15-17) Jiisusi Jehovatut ilisimassuseqangaarpoq. Ussatini kapitali 8-mi ilisimassutsitut kinaassusilikkatut allaatigineqarpoq. Kapitalimi tamatumani aamma Jiisusi Guutip ‘suliortuatut’ (1900) eqqartorneqarpoq. — Ussatit 8:12, 22-31.

⁶ Tassa pinngortitarsuarmi takussaasumi Jehovap suliortuatalu, Jiisusip, ilisimassusiat takusinnaavavut. Pinngortitarsuaq ilinniarfigingaarsinnaavarput.  Pinngortitat sisamat Ussatit 30:24-28-mi ‘sianiginagu silatuujusutut’ (NV) eqqartorneqartut sammeriartigit. *

Eqiasuinnermik ilinniutissaq

7, 8. Uniaaluup aalajangersimasup pissusii suut soqutiginartippigit?

⁷ Nunami minnersatut taaneqarsinnaagaluartunulluunniit tunngatillugu, taakkua sananeqaataannik suliaannillu misissueqqissaarneq ilinniarfigilluarneqarsinnaavoq. Assersuutigalugu uniaaluup sianiginagu ilisimassusia sammeriartigu. — Atuaruk Ussatit 30:25.

⁸ Kisissaanngitsunik uniaaloqarpoq nunap qaavani iluanilu eqiasuillutik sulisartunik. Misissueqqissaartartut ilaat isumaqarput inuk ataasiugaangat uniaaluit minnerpaamik 200.000-iusartut. Uniaaluit aaqqissuussaasunik katersuuffeqartarput, katersuuffiillu amerlanersaanni dronningeqarlunilu angutiviaqarlunilu sulisoqarpoq. Taakku tamarmik immikkut katersuuffimmiittut pisariaqartitaannik arlaatigut matussuseeqataasarput. Uniaaluk aalajangersimasoq Amerikami Kujallermi uumasoq naatsiivilerillaqqissutut taaneqarsinnaavoq. Pupinnik naatsiiveqarpoq, taakkuninngalu naggorissaasarlunilu killuisarpoq, pupiillu kippaat ikkussortarpai sapinngisamik amerlanerpaanik inerititaqarniassammata. Misissueqqissaartartut allaat paasisimavaat ‘naatsiivilerillammaap’ taassuma ilungersornini uniaaluit katersuuffimmiittut nerisassanik pisariaqartitsinerannut naleqqussartaraa. *

9, 10. Uniaaluit eqiasuissusiat qanoq ililluta ilaarsinnaavarput?

⁹ Uniaaluit taakku ilinniarfigisinnaavavut. Taakku qimerloornerisigut paasisinnaavarput angusaqarluarumagutta sulilluarnissaq pisariaqartoq. Biibilimi ima allassimavoq: “Eqiasuttutit, uniaaluk orniguk, iliuusai misissukkit ilisimassuseqalerlutillu. Siulersorteqanngikkaluarpoq, qullersaqarnani naalagaqarnaniluunniit, taamaattoq aasami nerisassarsiortarpoq nerisassaminillu eqqanaarsartarluni katersuiffiup nalaani.” (Ussatit 6:6-8) Jehova suliortualu, Jiisusi, eqiasuitsuupput. Jiisusi ima oqarpoq: “Ataataga suliuarmat uangattaaq sulivunga.” — Johannesi 5:17.

¹⁰ Guutimik Jiisusimillu ilaarsiumagatta aamma eqiasuitsuusariaqarpugut. Jehovap peqatigiissortaani sumik suliassaqarnerput imaluunniit sumik akisussaaffeqarnerput apeqqutaanani tamatta ‘tamaviaarluta Naalagaq kiffartuuttariaqarparput’. (1 Korinthimiut 15:58) Taamaattumik silatusaassaagut Paulusip kristumiunut Romamiittunut oqaaqqissaarutaa una malillugu iliorutta: “Ilungersoritsi nangaassuteqarnasi, anersaakkut tamaviaaritsi, [Jehova] kiffartorfigisiuk.” (Romamiut 12:11) Jehovap piumasaatut iliorniarluta ilungersuutivut asuliinnarnavianngillat. Biibilimimi ima neriorsoqqissaarneqarpugut: “[Guutip] iluaatsuunnginnami puiorsimanngilai suliasi asanninnersilu aqqanut takutissimasarsi illernartunik kiffartuussisimanissigut kiffartuussiuarnissigullu.” — Hebræerit 6:10.

 Anersaakkut ajoqusinnginnissamut illersorneqarneq

11. Qappiup qaarsulimmiup ilisarnaataasa ilaat oqaluttuarikkit.

¹¹ Uumasoq angivallaanngitsoq alla pingaarutilimmik ilinniarfigisinnaasarput tassaavoq qappik qaarsulimmioq. (Atuaruk Ussatit 30:26). Kaniinarujussuartut isikkoqarpoq, naatsunilli nioqarpoq siuteeraqarlunilu. Uumasoq mikisoq taanna qaarsortarasaartumiittarpoq. Qappiup qaarsulimmiup tappinnini iluaqutigisupilussuuaa, aamma itersanut quppanullu maniitsumiittunut nersutinit qaasuttunit qimaaffissarsisinnaavoq. Qappik pinngortitaavoq qappeqatinilu ikittunnguakkuutaarlutik ataqatigiilluinnarlutik uumasussatut. Tamanna illersuutigisarpaa ukiukkullu uunnassimaarnissamut iluaqutigisarlugu. *

12, 13. Qappik qaarsulimmioq sumik ilinniarfigisinnaavarput?

¹² Qappik qaarsulimmioq sumik ilinniarfigisinnaavarput? Maluginiarnarpoq saassunneqariaannaaffimminiinnaveersaartarnera. Tappissuunini nersutinik qaasuttunik ungasianniit takunninnissamut iluaqutigisarpaa itersanullu quppanullu, uumaannarumalluni qimaaffigisinnaasaminut, qanittumiittarluni. Uaguttaaq tamatumunnga assingusumik anersaakkut eqqumasariaqarpugut navianartut Saatanip silarsuaaniittut arajutsinnginniassagatsigit. Apustilip Petrusip kristumiut ima mianersoqquai: “Eqiingagitsi silatusaarlusilu! Akerartortersi Diaavulu løvitut uiannisaartutut angalasarpoq iisassarsiorluni.” (1 Petrusi 5:8) Jiisusip nunarsuarmiitilluni Saatanip imminik assuarnaakkunnaarsitseriaraluarneri tamaasa eqqumaffigiuaannarpai. (Matthæusi 4:1-11) Jiisusi ajoqersukkaminut maligassaalluaqaaq!

¹³ Eqqumaniarsinnaavugut Jehovap uagutsinnik anersaakkut sernissuineranik iluaqutiginninnitsigut. Guutip oqaasianik atuaqqissaanngitsoornaveersaartariaqarlutalu kristumiut ataatsimiinnerinut najuutinngitsoornaveersaartariaqarpugut. (Lukasi 4:4; Hebræerit 10:24, 25) Tamatuma saniatigut qappiup qaarsulimmiup, qappeqatinilu ataqatigiilluarnerminnik iluaqutiginnittartup, pisarneratut uppeqatitsinnut qanittumik attaveqartariaqarpugut “upperisaqaqatigiinnitsigut . . . kajumissaaqatigiissinnaaqqulluta”. (Romamiut 1:12) Jehovamit sernissorneqarumalluta iliuuserisariaqakkatsinnik iliuuseqarnitsigut ersersissavarput tussiaasiortoq Daavi ima allattoq isumaqatigalugu: “[Jehova] tassa qaarsora, pallittaalisara, aniguisitsisiga, Guutiga, qaqqara qimarnguffiga.” — Tussiaat 18:3.

 Akerlilersorneqaraluarluni pinertusaarneq

14. Pillertaq ataasiinnaq suunngippasissinnaavoq, pillertarpassuimmi?

¹⁴ Aamma pillertaq ilinniarfigisinnaavarput. Pillertaq ataasiinnaq, 5 centimeterit missaannaannik takissuseqartoq, immaqa suunngippasittarpoq. Pillertarpassuilli merserineqartarput. (Atuaruk Ussatit 30:27). Pillertarpassuit qasusuitsut, nerrersoorsuartut ilisimaneqartut, narsaatit katersuiffigeriaannaagaluartut nungupallassinnaavaat. Biibilimi sullinerpassuit — aamma pillertarpassuit — qanilliartorpalunnerat qamutit sorsuutit ikkulunnerannut ikualanerillu ivikkanik panertunik nungutitsisut nutaraalunnerannut assersuunneqarpoq. (Joeli 2:3, 5) Inuit ilaat ikuallaasarsimapput pillertarpassuarnik qanilliartorunnaarsitsiniaraluarlutik, tamannali amerlanertigut sunniuteqarneq ajorpoq. Tassa pillertat ikuallagussaasut inneq qamittarpaat, taava pillertarpassuit allat akornuserneqaratik ingerlaqqittarput. Pillertarpassuit kunngeqaratillu siulersorteqanngillat, taamaakkaluartorli sakkutoorpassuartut aaqqissuulluakkatut qanilliartortarput akornutaasinnaasullu tamarluinnangajaasa ajugaaffigisarlugit. * — Joeli 2:25.

15, 16. Ullumikkut Guutip naalagaaffianik oqaluussissutiginnittut qanoq pillertatut issimappat?

¹⁵ Pruffiitip Joelip Guutip kiffaasa sulinerat pillertat iliuuserisartagaannut assersuuppaa. Ima allappoq: “Sakkutoorpassuit taakku pissarsuartut arpapput, sorsuttartutut qarmat pitoraaffigaat; tamarmik siumuinnavik ingerlapput aqqutigisartik nigussanagu. Imminnut sakattaatinngillat, sammivimminnit sangussanatik; naaligaatit eqqaminni torartuaraluartut [naalikkamillu eqqortittoqaraluaraangat, NV] pitoraatiinnarput unitsitassaanatik.” — Joeli 2:7, 8.

¹⁶ Ullumikkut Guutip naalagaaffianik oqaluussissutiginnittartut siulittuummi tamatumani torrattumik oqaluttuarineqarput. Akerlilersuinerit ‘qarmatut’ ittut oqaluussinerannik unitsitsisinnaasimanngillat. Taakkua Jiisusi, inuppassuarnit narrugineqaraluarluni Guutip piumasaatut iliortuartoq, ilaarpaat. (Esaja 53:3) Ilumoorpoq kristumiut ilaat uppernertik pillugu toqusariaqarsimasut. ‘Naalikkamik eqqortissimapput’. Oqaluussisoqartuarporli, oqaluussisartullu amerliartortuarput. Malersorneqarnerli  nutaarsiassap nuannersup inunnut, Guutip naalagaaffia pillugu tusarliussamik allat aqqutigalugit tusarsimanavianngikkaluartunut, anngunneqarneranik amerlanertigut kinguneqartarpoq. (Apustilit Suliaat 8:1, 4) Soqutiginnittoqanngikkaluartoq imaluunniit akerlilersuisoqaraluartoq illit oqaluussininni pillertatut pinertusaarsimavit? — Hebræerit 10:39.

“Ajunngitsoq aalajangerfigisiuk”

17. Sooq gekkop isigai manissortanut pujattunut nippussinnaappat?

¹⁷ Gekkoaqqap nunap nutsuineranik inatsit malippasinngilaa. (Atuaruk Ussatit 30:28). * Misissueqqissaartartut paarngortuaqqap taassuma iikkat pujattut aqqutigalugit qummukarsinnaanera allaallu qilaat pujattut aqqutigalugit nakkarnani angalaarsinnaanera tupigusuutigaat. Gekko qanoq iliortarami? Isigai millugutitaqarnatilluunniit nipinneqqutitaqanngillat. Isigaatali inuai tamarmik kakkersaatitaqarput tattaasalinnik, taakkualu tamarmik immikkut nujaaqqatut isikkulinnik tusindilinnik anillanganertaqarput. Anillanganerit taakku tamarmik immikkut hundredelinnik amitsunik allunaasaasartaqarput, nuui tiitorfiup alliatut ilusillit. Nukiit intermolekylæriusut (van der Waalip nukiinik taaneqartartut) gekkop timaata oqimaassusianit oqimaannerusunik nammataqarsinnaapput — gekko sukkasuumik qilaakkut igalaaminiusukkooraluarpalluunniit! Misissueqqissaartartut, gekkop piginnaaneranik tamatuminnga tupigusuutiginnittut, oqartarput gekkop isigaanik ilaarsinissamut inuit atortussiassaliaannik atuinikkut nippunnertuumik nipinnequsiortoqarsinnaassasoq. *

18. ‘Ajunngitsumik aalajangerfiginnittuarnissarput’ qanoq ililluta qulakkeersinnaavarput?

¹⁸ Gekko sumik ilinniarfigisinnaavarput? Biibilimi ima kajumissaarneqarpugut: “Ajussuseq maajugisiuk, ajunngitsoq aalajangerfigisiuk.” (Romamiut 12:9) * Saatanip silarsuaata ajortumik sunniinera pissutigalugu Guutip najoqqutassiai aalajangiusimajunnaarsinnaavavut. Inunnik Guutip inatsisaanik maleruaanngitsunik peqateqartarneq — atuarfimmiugaluarpat, suliffimmiugaluarpat imaluunniit najoqqutassianut Biibilimiittunut akerliusumik aliikkutaqarnikkuugaluarpat — eqqortumik iliortuaannarnissamik aalajangiusimannikkunnaassutigisinnaavarput. Illit taamatut piniaqinak! Guutip oqaasiani ima mianersoqqussuteqarpoq: “Ilisimasutut imminut isigeqinak.” (Ussatit 3:7) Itsaq Mosesip Guutip innuttaanut siunnersuutaa pitsaasoq una maliguk: “[Jehova] Guutit mianerissavat. Taanna kiffartuutissavat attavigittuinnassallugulu.” (5 Mosesi 10:20) Jehovamut attaveqartuarnitsigut Jiisusi ima oqarfigineqartoq ilaassavarput: “Eqqortumik iliorneq nuannaraat eqqunngitsuliornerlu uumigalugu.” — Hebræerit 1:9.

Pinngortitat sumik ilinniarfigisinnaagivut

19. (a) Illit Jehovap pissusii sorliit pinngortitaani maluginiartarpigit? (b) Guutip ilisimassusia qanoq iluaqutigisinnaavarput?

¹⁹ Soorlu sammereeripput, Jehovap pissusii pinngortitaani erseqqaripput, pinngortitaalu ilinniarfigingaarsinnaavavut. Taakkuninnga misissuinerujartortilluta taassuma ilisimassusia tupigusuutiginerujartuinnartarparput. Guutip ilisimassusia eqqumaffigiuarutsigu maanna inuunitsinni nuannaarnerussaagut siunissamilu illersorneqassalluta. (Oqaluussisartup oqaasii 7:12) Aap, neriorsuutip Ussatit 3:13, 18-imiittup matuma ilumuussusia nammineq misigissavarput: “Pilluarpoq inuk ilisimassusermik pissarsisoq, inuk siuneqarluartunngorsimasoq. Aalajangiussisiminut tamanut orpiuvoq inuunartoq, pilluarput taassuminnga iperaanaveersaartut.” (w09 04/15-E)

[Quppernerup ataani ilanngussat]

Eqqaamavigit?

Uku sumik ilinniarfigaavut?

• uniaaluk

• qappik qaarsulimmioq

• pillertaq

• gekko

[Atuaqqissaarnermi apeqqutit]

[Qupp. 19-mi assiliartaq]

Uniaaluit eqiasuinnerattut eqiasuippit?

[Qupp. 20-mi assiliartaq]

Qappiup qaarsulimmiup allanut atalluarnini illersuutigisarpaa. Aamma illit allanut atalluarpit?

[Qupp. 21-mi assiliartaq]

Oqaluussisartut kristumiut pillertat pinertusaarnerattut pinertusaarput

[Qupp. 21-mi assiliartaq]

Gekkop manissortanut angalaarfigisaminut nipputtarneratut ajunngitsoq aalajangiusimavarput

[Qupp. 21-mi suminngaanneernera]

Stockbyte/​Getty Images