Guuti isumakkeerfiginneriaannaasoq
Guutimut palligunniarit
Guuti isumakkeerfiginneriaannaasoq
“[JEHOVA], illimmi ajunngitsuuvutit isumakkeerfiginnikkumasarlutillu.” (Tussiaat 86:5) Oqaatsinit taakkunannga qamuuna attortinnartunit Biibilimi Jehovap Guutip isumakkeerfiginneriaannaaneranik qularunnaasinneqarpugut. Apustilip Petrusip inuunerani pisimasumi erseqqippoq Jehova Guuti ‘isumakkeerfiginnittuartartoq’. — Esaja 55:7.
Petrusi Jiisusip qaninnerpaamik suleqataanut ilaavoq. Jiisusilli nunarsuarmi inuunerani unnummi kingullermi Petrusi siooralersimavoq ingasattumillu ajortuliorluni. Kaajaluisami, Jiisusip inatsisit unioqqutillugit killisiorneqarfigisaata silataani, Petrusip tamanit tusaaneqarsinnaasumik ataasiaannarani, pingasoriarlunili, Jiisusi ilisarisimannginnerarpaa. Petrusip malartitassaanani pingasoriarluni miserratigeqqammeraani, Jiisusip “Petrusi qiviarpaa”. (Lukasi 22:55-61) Jiisusip isigimmani Petrusi qanoq misigisimasimassanersoq takorloorsinnaaviuk? Petrusimmi paasivaa ajortuliami ilungersunassusia, “qissaserporlu”. (Markusi 14:72) Apustilip peqqissimisup Jiisusi pingasoriarluni miserratigereerlugu Guutimit isumakkeerfigineqarnissani immaqa qularutigisimassavaa.
Jiisusip makititaanermi kingorna Petrusi oqaloqatigaa qularnanngitsumik isumakkeerfigineqarsimanerminik qularunnaarutigisaanik. Jiisusip Petrusi sakkortuumik oqaluutinngilaa assuarinaguluunniit. Taassumali taanna ima aperaa: “Asavinga?” Petrusillu akivaa: “Aap, Naalagaq, nalunngilat asagikkit.” Jiisusip oqarfigaa: “Savaaraatikka paarikkit!” Taavalu Jiisusip apeqqut uteqqippaa, Petrusillu akissutini uteqqipaa immaqa pikkunarsaarluni. Jiisusilu nangilluni ima oqarpoq: “Savaatinnik paarsisuugit.” Jiisusillu taanna pingajussaanik apereqqippaa: “Asavinga?” Petrusilu aliasulerpoq oqarlunilu: “Naalagaq, tamanik nalusaqanngilatit, nalunngilat asagikkit.” Jiisusip oqarfigaa: “Savaatikka paarikkit.” — Johannesi 21:15-17.
Sooq akissut nalunngereerlugu Jiisusip apeqqutigaa? Jiisusip uummammiuvut nalunngilai, taamaattumik nalunngilaa Petrusip asagaani. (Markusi 2:8) Taamatut aperinermigut Jiisusip Petrusi periarfissippaa imminut asanninnerminik pingasoriarluni uppernarsaanissaanut. Jiisusip oqaasiinit, “Savaaraatikka paarikkit!. . . . Savaatinnik paarsisuugit. . . . Savaaraatikka paarikkit”, apustili peqqissimisoq qularunnaarsinneqarpoq suli tatigineqarneranik. Petrusimi Jiisusip suliassippaa pigisaminik erliginerpaasaminik paarseqqullugu — ajoqersukkaminik asasaminik, assersuutaasumik savaatiminik. (Johannesi 10:14, 15) Petrusi eqqissiallasimassaqaaq paasillugu Jiisusimit suli aalajaatsutut tatiginartutullu isigineqarluni.
Erseqqippoq Jiisusip ajoqersukkani peqqissimisoq isumakkeerfigigaa. Ataatami pissusii iliuusiilu Jiisusip maleqqissaarmagit, naatsorsuutigisinnaavarput aamma Jehovap Petrusi isumakkeerfigigaa. (Johannesi 5:19) Isumakkeerfiginninnissamut Jehova tunuarsimaartuunngilaq. Guutiuvoq naakkinnittoq ajortuliaminnik peqqissimissutiginnittunut ‘isumakkeerfiginnikkumasartoq’. Tuppallernangaarami, ilaa? (wp08 06/01-E)