Ilissi inuusuttut — siumukarnersi takuneqarsinnaatissiuk

“Tamakku eqqarsaatigeqqissaartakkit, itisilertakkit, siumukarnerit tamanit takuneqarsinnaaqqullugu.” — 1 TIMOTHEUSI 4:15, NV.

1. Guutip inuusuttut sumik kissaappai?

“QIIMASAARNIARIT, inuusuttuusutit, inuusutsillutit, uummatit nuannaarniarli inuusunnerpit ulluini.” (Oqaluussisartup oqaasii 11:9) Itsaq Israelimi kunngi Salomo silatooq taama allappoq. Qularnanngilaq Jehovap Guutip, tamatuminnga tusarliussisitsisup, kissaatigiinnanngikkaa ilissi inuusuttut inuusuttuunissinni nuannaarnissarsi aammali kissaatigigaa inuusuttuujunnaareerussi nuannaartuarnissarsi. Inuusuttuutillunili sianiilliorluni kukkusoqarsinnaavoq siunissami nuannaarnissaraluamik killiliisumik. Allaat Jobip aalajaatsup ‘inuusunnermini ajortuliami’ kinguneri aliasuutigai. (Jobi 13:26) Kristumiorpassuit inuusunnerminni ukiunilu tulliuttuni pingaarutilinnik aalajangigassarpaaloqartarput. Naliliilluarsinnaannginneq misigissutsikkut ikeqalernermik inuunerullu sinneranut sunniuteqartumik ajornartorsiuteqalernermik kinguneqarsinnaavoq. — Oqaluussisartup oqaasii 11:10.

2. Siunnersuut Biibilimiittoq suna inuusuttut kukkorujussuannginnissaminnut iluaqutigisinnaavaat?

 ² Inuusuttut naliliilluarsinnaasariaqarput. Maluginiariaruk apustilip Paulusip Korinthimiunut siunnersuutaa. Ima allappoq: “Silatussutsikkut meeqqat assiginiaqinasigit. . . . Silatussutsimili [inersimasuugitsi].” (1 Korinthimiut 14:20) Inuusuttut inersimasutut eqqarsarnissamik ilinniarnissamik siunnersuummik malinninnertik kukkorujussuannginnissaminnut illersuutigissavaat.

3. Inersimallualerniarlutit qanoq iliorsinnaavit?

³ Inuusuttuuguit eqqaamasariaqarpat inersimallualerniarlutit iliuuseqartariaqarlutit. Paulusip Timotheusi ima allaffigaa: “Inuusuttuunerit pissutigalugu ilinnik nikassaasoqanngikkili, uppertunulli maligassaatinniarit oqalunnikkut, inuuserisakkut, asanninnikkut, ilumoorsutsikkut minguissutsikkullu. . . . Isumagisassarissavatit allakkanik atuffassisarneq, oqaaqqissaarineq ajoqersuinerlu. . . . Tamakku tamaasa isumaginiakkit inuuseralugillu ineriartornerit tamanit takuneqarsinnaaqqullugu [eqqarsaatigeqqissaartakkit, itisilertakkit, siumukarnerit tamanit takuneqarsinnaaqqullugu, NV].” (1 Timotheusi 4:12-15) Tassa kristumiut inuusuttut anersaakkut ineriartortariaqarput siumukarnertik allanit takuneqarsinnaalluarniassammat.

Siumukarneq qanoq paasisariaqarpa?

4. Anersaakkut siumukarneq qanoq paasisariaqarpa?

⁴ Siumukarneq tassaavoq “pikkorissiartorneq, pitsanngoriarneq”. Paulusip Timotheusi kajumissaarpaa oqalunnikkut, inuuserisamigut, asanninnikkut, uppissutsikkut minguissutsikkullu siumukarnissaminik sulissutiginneqqullugu aamma kiffartornerminik naammassinneqqullugu. Maligassaalluartumik inuunissani noqqaassutigisussaavaa. Taamaattumik Timotheusi anersaakkut siumukartuartariaqarpoq.

5, 6. (a) Timotheusip siumukarnera qanga allanit malugineqartalerpa? (b) Ullumikkut inuusuttut siumukarnermut tunngatillugu Timotheusip maligassiaa qanoq malissinnaavaat?

⁵ Paulusip siunnersuut taanna ukiup 61-ip ukiullu 64-ip akornanni allappaa, taamanikkullu Timotheusi utoqqaanertatut misilittagaqarlualereerpoq. Aatsaat anersaakkut ineriartulinngilaq. Ukiumi 49-mi 50-imiluunniit, Timotheusi inuusuttuaraajunnaalinngikkuni 20-t sinnilaarlugit ukioqarunartoq, “Lystrami Ikonionimilu qatanngutinit” taassuma anersaakkut siumukarneranik maluginiaasimasunit ‘ataqqisaavoq [tusaamasaalluarpoq, 1936]’. (Apustilit Suliaat 16:1-5) Tamatuma nalaani Paulusip Timotheusi ajoqersuiartortitatut angalaqasiuppaa. Timotheusip siumukarnera qaammatialuit ingerlaneranni maluginiareerlugu, Paulusip taanna Thessalonikamut aallartippaa kristumiunik tassaniittunik nakussatsitseqqullugu tuppallersaaqqullugulu. (Atuaruk 1 Thessalonikamiut 3:1-3, 6). Tassa Timotheusip inuusuttuullunili siumukarnini allanit takuneqarsinnaatippaa.

⁶ Ilissi inuusuttut ilagiinniittusi, anersaakkut pissuserineqartussanik pisariaqartunik maanna ineriartortitsinissarsi suliniutigisiuk, kristumiutut inuunermut sallusuissutit Biibilimiittut pillugit ilinniartitsinermut tunngatillugu siumukarnersi takuneqarsinnaaniassammat. Jiisusi aqqaneq-marlunnik ukioqarlunili ‘ilisimassuseqarnerujartorpoq’. (Lukasi 2:52) Taamaattumik sammissavarput qanoq ilillusi ilissi erseqqissumik siumukarsinnaanersusi pingasunut ukununnga tunngatillugu: (1) ajornartorsioraangassi, (2) aappassarsioraangassi, aamma (3) ‘Kristusi-Jiisusimut kiffaalluartuunissarsi’ noqqaassutigigaangassiuk. — 1 Timotheusi 4:6.

Ajornartorsiortillutit ‘silatusaarit’

7. Ajornartorsiuteqarneq inuusuttunut qanoq sunniuteqarsinnaava?

⁷ Niviarsiaraq kristumiu Carolimik atilik 17-inik ukioqartoq ima oqarpoq: “Ilaannikkut misigissutsikkut, timikkut eqqarsartaatsikkullu ima qasutigisarpunga allaat ullaakkut iterusunneq ajorlunga.” * Sooq taama nikallungatigaa? Carol qulinik ukioqartoq angajoqqaavi avipput, anaananilu Biibilimi ileqqussatigut najoqqutassianik malinninngitsoq najulerpaa. Immaqa Carolitut ajornartorsiuteqarputit anigoruminaappasissunik.

8. Timotheusi ajornartorsiutinik sunik akiugaqarpa?

⁸ Aamma Timotheusi anersaakkut siumukartilluni ajornartorsiutinik akiugaqarpoq. Assersuutigalugu ‘peqqiilliortarpoq’ nasserisarnini pissutigalugu. (1 Timotheusi 5:23) Paulusip Timotheusi  ajornartorsiutinik apustilit oqartussaassusianik apeqqusiisut pilersitaannik aaqqiiartortillugu Korinthimukartikkamiuk, ilagiit kajumissaarpai taanna suleqatigeqqullugu taakkua akornanni ‘toqqissisimaarniassammat’. (1 Korinthimiut 4:17; 16:10, 11) Tamatumannga erserpoq Timotheusi ittuutusimasoq imaluunniit imminut tatigisuusimanngitsoq.

9. Silatussuseqarnermut suut ilaappat, tamannalu ‘qununermit’ qanoq allaanerua?

⁹ Paulusip Timotheusi ikiorniarlugu kingusinnerusukkut eqqaasippaa Guutip “[tuninngikkaatigut] anersaamik qunutuumik, kisianni tunivaatigut anersaamik nakuussuseqartumik asannissuseqartumillu silatussuseqartumillu”. (2 Timotheusi 1:7) ‘Silatussuseqaraanni’ silatusaartumik eqqarsartoqarsinnaavoq. Aamma pissutsinut piviusorsiortumik isiginnittaaseqartoqarsinnaavoq — pissutsit allatut innissaat takorloorusaaginnarnagu. Inuusuttut inersimalluanngitsut ilaat ‘qunusarput’, imaluunniit merserusuttarput, ajornartorsiutinillu eqqarsartaatsikkut qimaaniarsarisarlutik fjernsynernermikkut siniinnavinnermikkulluunniit, imigassartornermikkut ikiaroornartutornermikkulluunniit, festerajunnermikkut kinguaassiuutitigulluunniit inuunerlunnermikkut. Kristumiulli kajumissaarneqarput ‘naaggaaqqullugit iluaatsuussusermut silarsuarmiullu kajungerisaannut, silatusaarlutik peqqusersuillutillu Guutimillu mianerinnittuullutik silarsuarmi matumani inuusinnaaqqullutik’. — Titusi 2:12.

10, 11. Silatusaarneq anersaakkut qanoq nakussatsissutigisinnaavarput?

¹⁰ Biibilimi “angutit inuusuttut” siunnersorneqarput “silatusaartaqqullugit”. (Titusi 2:6) Siunnersuummik tamatuminnga malinninneq tassaavoq ajornartorsiutigisanik qinunikkut eqqarsaatiginninneq Guutimillu nakussatsinneqarnissamik qularutiginninnginneq. (Atuaruk 1 Petrusi 4:7). Taamaalilluni ‘pissaanermik Guutip tunniussaanik’ tutsuiginnilluinnarneq ineriartortinneqassaaq. — 1 Petrusi 4:11.

¹¹ Qinuneq silatusaarnerlu Carolip iluaqutigai. Ima oqarpoq: “Anaanama kinguaassiuutitigut inuunerlunneratut inuunaveersaarnissaq uannut artornarnerpaasimavoq. Qinunerli iluaqutigisaqaara. Nalunnginnakku Jehovap najoraanga annilaangajunnaarpunga.” Eqqaamajuk ajornartorsiorneq nakussatsissutigisinnaagit inuttullu pitsaanerulissutigisinnaagit. (Tussiaat 105:17-19, 1990; Upputit 3:27) Sunilluunniit atugaqalissagaluaruit Jehovap imminiinngisaannassavaatit. Ikiorumaarpaatit. — Esaja 41:10.

Aappartaarnissamut piareersarneq

12. Sooq inuusuttut katinnissaminnik eqqarsaateqartut najoqqutassiaq Ussatit 20:25-miittoq malikkunikku silatusaassappat?

¹² Inuusuttut ilaat katipallattarput pilluarnatillu kiserlioramik, pikkunaallioramik imaluunniit angerlarsimaffimminni ajornartorsiuteqaramik. Katinnermili neriorsuut pimoorussassaavoq. Biibilip nalaani inoqarsimavoq neriorsuutertik qanoq paasisariaqarnersoq eqqarsaatigeqqaarnagu tuaviorpallaarlutik illernartumik neriorsuuteqarsimasunik. (Atuaruk Ussatit 20:25). Ilaannikkut inuusuttut aappariinnermi imminnut suut piumasaqaatigineqarnersut eqqarsaatiginngitsoortarpaat. Kingusinnerusukkulli paasilertarpaat takorluukkaminnit imaannaannginnipilussuusoq.

13. Aappassiartaarnissaminnik eqqarsaatiginnittut apeqqutit suut eqqarsaatigeqqaartariaqarpaat, sumilu pitsaasunik siunnersuuteqarpa?

 ¹³ Taamaattumik aappassiartaannginninni imminut ima aperisariaqarputit: ‘Sooq aappaqalerusuppunga? Aappariinnermut tunngatillugu suut naatsorsuutigaakka? Aappassiarerusutara uannut tulluartuua? Aappariittut akisussaaffinnik naammassinninnissamut ilumut piareersimavunga?’ Apeqqutinik taakkuninnga eqqarsaatiginninnissamut iluaqutissatut “inussiaq aalajaallunilu silatooq” (NV) atuakkanik allaaserisanillu tamakkununngarpiaq tunngasunik saqqummersitsisimavoq. * (Matthæusi 24:45-47) Tamakku Jehovap ilinnut siunnersuutaatut pitsaasutut isigikkit. Maluginiaqqissaaruk qanoq allassimasoqarnersoq, maleruakkillu. ‘Hestitut siutitoorsuartulluunniit siuneqanngitsunngunngisaannarit’. (Tussiaat 32:8, 9) Aappariinnermi piumasaqaatinik paasinninnermut tunngatillugu inersimalluartunngorit. Aappassiaqalernissannullu piareersimasutut misigiguit, taava eqqaamajuaruk ‘minguissutsikkut maligassaajuarnissat’. — 1 Timotheusi 4:12.

14. Aappartaassaguit anersaakkut inersimalluassuseq qanoq iluaqutigisinnaaviuk?

¹⁴ Aamma anersaakkut inersimalluassuseq katinnerup kingorna ingerlalluartitsisarpoq. Kristumiup inersimalluartup ‘Kristusip peqangaassusianut ineqarfiunissaminut naammaattunngorluni alliartornissani’ noqqaassutigisarpaa. (Efesosimiut 4:11-14) Kristusitut pissuseqalerumalluni ilungersorluni suliniuteqartarpoq. Maligassarput, Kristusi, “imminut eqqarsaatiginngilaq”. (Romamiut 15:3) Uiusup nuliaasullu tamarmik immikkut imminut pitsaanerpaaq pinnagu aapparminnut pitsaanerpaaq noqqaassutigisarunikku, angerlarsimaffik qimarnguiussaaq eqqissisimanartoq. (1 Korinthimiut 10:24) Uiusoq imminut pilliutigeriaannaalluni asanninnermik ersersitsissaaq, nuliaasullu Jiisusip ‘niaqquminut’ naalatsigitinneratut uiminut naalatsigitinnissani aalajangiusimassavaa. — 1 Korinthimiut 11:3; Efesosimiut 5:25.

‘Kiffartuutit naammassiuk’

15, 16. Siumukarnerit oqaluussinermi qanoq ilillutit takuneqarsinnaalersissinnaaviuk?

¹⁵ Paulusi Timotheusimut suliassiissutigineqartoq pingaarutilik eqqaasitsissutigalugu ima allappoq: “Guutip kiinaata saani Kristusi-Jiisusillu . . . saani . . . oqaanniarpakkit: Oqaaseq oqaluussissutiguuk, qanoq ilisukkulluunniit sassartarit.” Imalu nangippoq: “Iivangkiiliulersaartutut suliat ingerlanniaruk kiffartuutillu naammassillugu.” (2 Timotheusi 4:1, 2, 5) Timotheusip suliassaq tamanna naammassiumallugu ‘uppernerup oqaasertai pissatsissutigisariaqarpai’. — Atuaruk 1 Timotheusi 4:6.

¹⁶ Illit ‘uppernerup oqaasertai’ qanoq ilillutit  ‘pissatsissutigisinnaavigit’? Paulusi ima allappoq: “Eqiasuillutit atuffassiuartarit, kajumissaariuartarit ilinniartitsiuartarillu. Tamakku eqqarsaatigeqqissaartakkit, itisilertakkit.” (1 Timotheusi 4:13, 15, NV) Siumukassagaanni eqiasuilluni nammineq atuaqqissaarnissaq pisariaqarpoq. Oqaaseq “itisilertakkit” ilaatigut isumaqarpoq arlaannut tiguartinnermik. Illit atuaqqissaartarnerit qanoq ingerlava? ‘Guutip itissusii’ tiguartilluinnarfigisarpigit? (1 Korinthimiut 2:10) Imaluunniit tamatumunnga tunngatillugu immannguaannaq iliuuseqartarpit? Atuaqqissaakkannik eqqarsaatiginneqqissaartarnerit kajumissaatigissavat. — Atuaruk Ussatit 2:1-5.

17, 18. (a) Ilissi inuusuttut suut pikkoriffiginiartariaqarpisigit? (b) Ilissi inuusuttut oqaluussinermi Timotheusitut isiginnittaaseqarnersi qanoq iluaqutigisinnaavisiuk?

¹⁷ Qatanngut arnaq inuusuttoq pioneriusoq Michellemik atilik ima oqarpoq: “Sunniuteqarluartumik oqaluussisinnaajumallunga nammineq atuaqqissaarnissamut pitsaasumik pilersaaruteqarpunga, aamma tamatigut ataatsimiigiartarpunga. Tamatuma kingunerisaanik anersaakkut ineriartortuarpunga.” Pioneriuneq oqaluussinermi Biibilimik atuillaqqinnerulernissamut anersaakkullu siumukarnissamut iluaqutigissavat. Atuffarissinissat sulissutigiuk kristumiullu ataatsimiinnerini isumaqarluartunik akissuteqartarit. Aamma inuusuttut anersaakkut inersimalluartut saqqummiuteqquneqartut malillugit Teokratiimik Ilinniarfimmi ilikkagaqarfiulluarsinnaasunik saqqummiussaqarusuttassapput.

¹⁸ ‘Iivangkiiliulersaartutut suliamik ingerlatsinermut’ ilaavoq sunniuteqarluartumik oqaluussisarneq allanillu annaanneqarsinnaalernissaannut ikiuineq. Taakku iliuuserissagaanni ilinniartitsinissaq ilinniarneqartariaqarpoq. (2 Timotheusi 4:2) Oqaluussisartunik misilittagaqarluartunik angalaaqateqarniarlutit isumaqateqaruit, tamanna taakkua ilinniartitseriaasiannik ilinniarfigisinnaavat, soorluttaaq Timotheusip Paulusimik suleqateqarnini ilinniarfigigaa. (1 Korinthimiut 4:17) Paulusi ikiukkani pillugit oqarpoq Guutip iivangkiiliuanik ilangiisiinnarnagit aammali ‘inuunini’ tamaat taakkuninnga ikiuinermut tunniullugu, nuannarigamigit. (1 Thessalonikamiut 2:8) Paulusip oqaluussinermi maligassiaa malissagukku Timotheusip pisimaneratut allanik ilumoorlutit isumassuisariaqarlutillu ‘iivangkiiliumut kiffartortariaqarputit’. (Atuaruk Filippimiut 2:19-23). Illit oqaluussininni tamatumunnga assingusumik imminut pilliutigeriaannaavit?

Siumukarneq piviusumik nuannaarnarpoq

19, 20. Sooq anersaakkut siumukarneq piviusumik nuannaarnarpa?

¹⁹ Anersaakkut siumukarumalluni iliuuseqarnissaq pisariaqarpoq. Naammagittarlutilli ilinniartitsisinnaassutsit sungiusarukku piffissap ingerlanerani anersaakkut ittutigut ‘amerlasuunik pisuunngortitsineq’ immikkut pisinnaatitaaffigilissavat, taakkualu illit ‘tipaatsuutigilissavatit’. (2 Korinthimiut 6:10; 1 Thessalonikamiut 2:19) Fred piffissaq tamaat kiffartortoq ima oqaluttuarpoq: “Piffissara allanut ikiuinermut aatsaat taama atortigaara. Tunisinerup tigusinermit pilluarnarnerunera ilumoorluinnarpoq.”

²⁰ Qatanngutip arnap inuusuttup pioneriusup Daphnemik atillip anersaakkut ineriartornerminik nuannaarutiginninnini nalerisimaarutiginninninilu ima oqaluttuaraa: “Jehova kinaassusilittut ilisarisimalerakku taassumunnga qaninnerujussuarmik attaveqalerpunga. Jehovamut iluarisaaniarluni sapinngisaq tamaat iliuuseqarneq ilorrisimaarnartarpoq — ilumut nalerisimaarnartarpoq!” Anersaakkut siumukarneq inuit immaqa tamatiguunngitsoq malugisarpaat, Jehovalli takusinnaajuarlugulu pingaartittuarpaa. (Hebræerit 4:13) Qularutissaanngilluinnarpoq ilissi inuusuttut Ataatatsinnik qilammiusumik nersuillusilu ataqqinnissinnaanersi. Taassuma uummataa nuannaartittuarsiuk siumukarnersi takuneqarsinnaatillugu. — Ussatit 27:11. (w09 05/15-E)

[Quppernerup ataani ilanngussat]

Suna ilikkarpiuk?

• Anersaakkut siumukarnermut suut ilaappat?

• Siumukarnerit qanoq takuneqarsinnaava

ajornartorsioraangavit?

aappassiartaarnissat eqqarsaatigi- gaangakku?

oqaluussinermi?

[Atuaqqissaarnermi apeqqutit]

[Qupp. 19-mi assiliartaq]

Qinuneq ajornartorsiutit naammagalugit atornissaannut iluaqutigisinnaavat

[Qupp. 20-mi assiliartaq]

Sunniuteqarluartumik ilinniartitsineq inuusuttut qanoq ilinniarsinnaavaat?