Inngilit — ‘anersaat kiffartortut’

‘Taakku tamarmik tassaannginnerpat anersaat kiffartortut annassummik kingornussisussat pillugit kiffartoqqullugit aallartitaasut?’ — HEBRÆERIT 1:14, 1936.

1. Matthæusi 18:10-mi aamma Hebræerit 1:14-imi allassimasut qanoq tuppallersaatigisinnaavavut?

JIISUSI KRISTUSI ajoqersukkaminut naakkiussutaasinnaasut suulluunniit pillugit ima mianersoqqusivoq: “Mianersoritsi, minninnguit ukua ilaat nikageqinasiuk! Oqarfigaassimi: Taakkua inngiliisa qilanniittut Ataatama qilanniittup kiinaa isigiuarpaat.” (Matthæusi 18:10) Apustili Paulusi inngilit aalajaatsut pillugit ima allappoq: ‘Taakku tamarmik tassaannginnerpat anersaat kiffartortut annassummik kingornussisussat pillugit kiffartoqqullugit aallartitaasut?’ (Hebræerit 1:14, 1936) Oqaatsit taakku Guutip pinngortitanik qilammiusunik taakkuninnga inunnik ikiuinermini atuisarneranut uppernarsaataapput tuppallernartut. Inngilit pillugit Biibilimi qanoq allassimasoqarpa? Taakkua qanoq ikiortarpaatigut? Taakkua maligassiaat sumik ilinniarfigisinnaavarput?

2, 3. Pinngortitat anersaajusut qilammiittut ilaatigut sunik suliassaqarpat?

² Qilammi inngileqarpoq millionilinnik aalajaatsunik, tamarmillu ‘pissarsuupput’, aamma Jehovap ‘peqqusaanik naammassisitsisarput’. (Tussiaat 103:20, 1990; atuaruk Saqqummersitat 5:11). Guutip erneri anersaajusut taakku kinaassusiliupput, Guutip pissusiisut ittunik pissuseqarlutik piumasamittullu iliorsinnaatitaallutik. Aaqqissuulluagaalluinnarput Guutillu aaqqissuussaani qaffasissunik inissisimaffeqarlutik. Taakkua nuimanerpaartaraat inngiliuneq Mikaeli (Jiisusip qilammi atia). (Danieli 10:13; Judasi 9) Inngili taanna, ‘pinngortitani tamani erniusut siullersaat’, tassaavoq “Oqaaseq”, imaluunniit Guutip oqaaseqartartua, allanillu tamanik pinngortitsinermi Jehovamit atorneqarluni. — Kolossemiut 1:15-17; Johannesi 1:1-3.

³ Inngiliunermit siulersorneqarput serafit, Jehovap illernassusianik oqaluussissutiginnittartut taassumalu innuttaanik minguitsuujuartitseqataasut. Aamma kerubeqarpoq, Jehovap qilammi nunamilu kisimi oqartussaassusianik assigiinngitsutigut qutsissisitsisartunik. (1 Mosesi 3:24; Esaja 6:1-3, 6, 7) Inngilit, imaluunniit aallartitat, allat Guutip piumasaanik naammassinninnermut tunngatillugu suliassaqartarput. — Hebræerit 12:22, 23.

4. Nunarsuaq tunngavilerneqarmat inngilit qanoq qisuariarpat, piumasatullu iliorsinnaatitaanermik eqqortumik atuineq inuiannut qanoq kinguneqarsinnaasimagaluarpa?

 ⁴ Inngilit tamarmik ‘nuna tunngavilerneqarmat’ tipaatsupput aamma nuannaarlutik suliassatik suliaraat, Jehovap erlinnartumik immikkorluinnaq ittumik avataarsuaniittumik inuit najugaqarfissaattut piareersaanerani. (Jobi 38:4, 7) Jehovap inuit pinngortippai ‘inngilinit nikanarnerulaartutut’ (NV) imminulli “assililluni”, inuillu taamaalillutik Pinngortitsisup pissusiinik nersornangaartunik ersersitsisinnaapput. (Hebræerit 2:7; 1 Mosesi 1:27) Adamip Evallu piumasamittut iliorsinnaatitaanertik eqqortumik atorsimasuugunikku, taakkua namminneq kinguaavisalu, Jehovap qilammi nunamilu ilaqutariissuinut pinngortitatut sianissusiliusunut ilaallutik, paratiisimi inuuneq nuannaarutigisinnaasimassagaluarpaat.

5, 6. Qilammi qanoq pikitsitsisoqarpa, Guutillu tamanna qanoq periarfigaa?

⁵ Qularnanngilluinnarpoq inngilit illernartut tupassimassasut Guutip ilaqutariissuini qilammiusuni pikitsitsisoqalermat. Taakkua ilaata Jehovamik unnersiutiginninnissani naammagiunnaarsimavaa, namminerli pallorfigineqarusuppoq. Imminut Saataninngortippoq ( “akerlilersuisoq”-mik isumaqartoq) Jehovap kisimi oqartussaalluni naalakkersuisussaatitaaneranik apeqqusiinermigut, pissaaneqarumagamilu unammillerluni naalakkersuisunngorniarsarilerpoq. Saatanip silarsuup oqaluttuarisaanerani siullerpaamik sallulluni inuit aappariit siulliit peqqusersusaarluni Pinngortitsisiminnut asannittumut imminik pikitsitseqatiginninnissaannut nakutippai. — 1 Mosesi 3:4, 5; Johannesi 8:44.

⁶ Jehova Saatanimik eqqartuussipallappoq Biibilimi siulittuummi siullermi ima oqarluni: “Akerariissikkumaarpassi illit arnarlu, illit kinguaassat taassumalu kinguaassaa. Taassuma niaqqut aserortissavaa, illillu taassuma kimmia aserortissavat.” (1 Mosesi 3:15, NV) Saatani ‘arnarlu’ Guutip pigisaa akerariittuartussaapput. Aap, Jehovap qilammi peqatigiissortat pinngortitaasut anersaat aalajaatsut nuliamisut Uiminnut — tassa imminut — atalluartutut isigai. Siulittuut taanna neriunnissamut tunngavissaalluarpoq, naak ‘anngigisap’ illernartup immikkuualuttortai paasinarsisikkiartuaarneqartussaagaluartut. Guutip siunertaa tassaavoq peqatigiissortaminit qilammiittuneersup ataatsip pikitsitsisunik tamanik suujunnaarsitsinissaa, aamma “qilammiittut nunamiittullu” taanna aqqutigalugu kattunneqarnissaat. — Efesosimiut 1:8-10.

7. Noap nalaani inngilit ilaat suppat, tamannalu taakkununnga qanoq kinguneqarpa?

⁷ Noap nalaani inngilit arlallit “inigisassaraluaminnik” qimatsipput inuttullu timeqalerlutik nunarsuarmi namminissarsiorlutik inuulluataarniarlutik. (Judasi 6; 1 Mosesi 6:1-4) Jehovap pikitsitsisut taakku anersaakkut taggarissumut igippai, taakkulu Saatanilu taamaalillutik tassaalerput ‘ajussutsip anersaavi pissaasut’ Guutillu kiffaanut akeraasut ajortut. — Efesosimiut 6:11-13; 2 Petrusi 2:4.

Inngilit qanoq ikiortarpaatigut?

8, 9. Jehovap inngilit inunnik ikiuinermut qanoq atorsimavai?

⁸ Aaperaat, Jaaku, Mosesi, Josva, Esaja, Danieli, Jiisusi, Petrusi, Johannesi Paulusilu inngilinit ikiorneqartut ilagaat. Inngilit naapertuilluartut Guutip eqqartuussutaanik naammassinnipput siulittuutinillu ilitsersuussutinillu, ilaatigut Mosesip inatsisaanik, ingerlatitseqqillutik. (2 Kunngit 19:35; Danieli 10:5, 11, 14; Apustilit Suliaat 7:53; Saqqummersitat 1:1) Ullumikkut Guutip oqaasia tamaat pigigatsigu inngilit tusarliussanik Guutimeersunik tusarliiartortinneqartarnissaat ilimaginngilarput. (2 Timotheusi 3:16, 17) Silarsuarmili takussaanngitsumi inngilit Guutip piumasaatut iliornissaq kiffaanillu tapersersuillutillu ikiuinissaq suli ulapputigaat.

⁹ Biibilimi ima neriorsoqqissaarneqarpugut: “[Jehovap] inngilia taassuminnga mianerinnittut eqqaanni inississaaq, aniguisissavaalu.” (Tussiaat 34:8; 91:11) Inuit assuarnaassusiata apeqquserneqarnera pissutigalugu Saatanip uagutsinnik assigiinngitsorpassuartigut misiliisarnissaa Jehovap akueraa. (Lukasi 21:16-19) Guutilli nalunngilaa kiffami misilinneqaatit suut naammagalugit atorsinnaaneraat aamma suut assuarnaassusiannik uppernarsaasinnaanersut. Aamma naluneq ajorpaa misilinneqarnerat naammaleraangat.  (Atuaruk 1 Korinthimiut 10:13). Inngilit Guutip piumasaanut naapertuuttumik akuliunnissamut piareersimajuaannarput. Shadraki, Meshaki, Abed-Nego, Danieli Petrusilu ikiorpaat Stefanusili Jaakulu akerlilersuisunit toqunneqarnissaannit annaannagit. (Danieli 3:17, 18, 28; 6:23; Apustilit Suliaat 7:59, 60; 12:1-3, 7, 11) Pissutsit ajornartorsiutillu atugaat assigiinngillat. Tamatumunnga assingusumik qatanngutitta ilaat nazistit tigusanut inissiarsuini toqutaapput, ilaat Jehovamit inuuinnarnissamut ikiorneqartut.

10. Inngilit ikiuinerata saniatigut qanoq ikiorneqarsinnaavugut?

¹⁰ Biibilimi ajoqersuutigineqanngilaq inuit nunarsuarmiittut tamarmik immikkut inngilimik sernissorteqarnerat. Jehova saaffigisarparput qularutiginagu “piumasaminut naapertuuttumik qinnuigigutsinni tusarumaaraatigut”. (1 Johannesi 5:14) Soorunami Jehova inngilimik aallartitsisinnaavoq ikiorniarluta, aammali imaassinnaavoq allatut ikiorneqartugut. Kristumiut allat immaqa ikiuinissaminnut tuppallersaanissaminnullu kajumissisinneqarput. ‘Kapinartup timimut kapputtup’, ‘Saatanip inngilianit’ anaalerneqarnertut annernartigisinnaasup, naammagalugu atornissaanut Guutip pisariaqartumik ilisimassuseqalersissinnaallutalu qamuuna nakussatsissinnaavaatigut. — 2 Korinthimiut 12:7-10; 1 Thessalonikamiut 5:14.

Jiisusi ilaaruk

11. Inngilit Jiisusimik ikiuinermut qanoq atorneqarpat, taannalu Guutimut aalajaattuarnermigut sumik naammassisaqarpa?

¹¹ Jehovap Jiisusimut tunngatillugu inngilinik qanoq atuinera eqqarsaatigeriaruk. Taakkua taassuma inunngornera makititaaneralu nalunaarutigaat nunarsuarmiinneranilu ikiortarlugu. Inngilit Jiisusi tigusaritinngitsoortissinnaagaluarlugulu peqqarniitsumik toqutaatinngitsoorsinnaagaluarpaat. Guutili inngilimik aallartitsivoq taanna nakussatsinniarlugu. (Matthæusi 28:5, 6; Lukasi 2:8-11; 22:43) Jehovap siunertaanut naapertuuttumik Jiisusi pilliutitut toquvoq uppernarsarlugulu inuk naammalluinnartoq sakkortunerpaamik misilinneqaraluarluni Guutimut assuarnaattuarsinnaasoq. Taamaattumik Jehovap Jiisusi qilammi toqujuitsutut makitippaa, ‘pissaaneq tamaat’ taassumunnga tunniullugu inngilinullu naalagaatilerlugu. (Matthæusi 28:18; Apustilit Suliaat 2:32; 1 Petrusi 3:22) Taamaalilluni paasinarsivoq Jiisusi arnap Guutip pigisaata ‘kinguaassaata’ pingaarnerusortarigaa. — 1 Mosesi 3:15; Galatiamiut 3:16.

12. Jiisusip ‘silatusaarnera’ qanoq ilaarsinnaavarput?

¹² Jiisusip nalunngilaa Jehova misilikkuniuk aamma sapiiserpallaassagaluaruni inngilit imminik annaassiartornissaat naatsorsuutigiguniuk eqqunngitsuliussalluni. (Atuaruk Matthæusi 4:5-7). Jiisusip maligassiaa malitsigu ‘silatusaarluta’ inuulluta pisariaqanngitsumillu imminut navianartorsiortinnata, Jehovalu tatigalugu malersorneqarnerit naammagalugit atorlugit. — Titusi 2:12.

Inngilit aalajaatsut sumik ilinniarfigisinnaagivut

13. Inngilit naapertuilluartut 2 Petrusi 2:9-11-mi eqqaaneqartut maligassiaat sumik ilinniarfigisinnaavarput?

¹³ Apustilip Petrusip Jehovap kiffaanik  tanitanik ‘mitaatiginnittut’ naveerpai inngilit naapertuilluartut maligassiuilluarnerat innersuussutigalugu. Inngilit pissaaneqangaaraluarlutik maniguupput Jehovamillu ataqqinnillutik imminnut eqqartuussisunngortinnaveersaarlutik. (Atuaruk 2 Petrusi 2:9-11). Eqqunngitsumik eqqartuussinaveersaarta, ilagiinnilu akisussaaffilerneqarsimasut ataqqitigit ajornartorsiutillu Jehovamut, Eqqartuussisumut qutsinnerpaamut, isumagisassanngortillugit. — Romamiut 12:18, 19; Hebræerit 13:17.

14. Inngilit maniguullutik Jehovamut kiffartornerat sumik ilinniarfigisinnaavarput?

¹⁴ Inngilit maniguulluni Jehovamut kiffartorneq eqqarsaatigalugu uagutsinnut maligassaalluarput. Inngilit ilaasa atitik inunnut oqaatigiumanngilaat. (1 Mosesi 32:30; Eqqartuussisut 13:17, 18) Biibilimi atit Mikaeli Gabrielilu paasinarsisinneqaraluartut, qilammi inngilit millionillit allat aqqi paasitinneqanngillat. Tamanna inngilinik naleqqutinngitsumik ataqqinnilinnginnissamut iluaqutigisinnaavarput. (Lukasi 1:26; Saqqummersitat 12:7) Apustili Johannesi inngilimik pallorfiginninniarluni sikikkami mianersoqquneqarpoq. Inngili ima oqarpoq: “Taamaalioqinak! Uanga kiffaannaavunga ilittut illillu qatanngutittut.” (Saqqummersitat 22:8, 9) Guuti kisiat pallorfigisariaqarlugulu qinnuigisariaqarparput. — Atuaruk Matthæusi 4:8-10.

15. Utaqqisinnaassuseqarnermut tunngatillugu inngilit uagutsinnut qanoq maligassaalluarpat?

¹⁵ Inngilit aamma utaqqisinnaassuseqarnermut tunngatillugu maligassaalluarput. Guutip anngigisaanik illernartunik paasinninnissartik soqutigingaaraluarpaat, ilaannaalli pillugit paasitinneqarsimapput. Biibilimi ima allassimavoq: “Tassaappullu inngilit paaserusungaaraluagaat.” (1 Petrusi 1:12) Taava qanoq pippat? Piffissap Guutip ‘ilisimassutsiminik tamatigooqisumik’ “ilagiit aqqutigalugit” ilisimannilersitsinissaminut aalajangigaata nalliunnissaa utaqqisinnaassuseqarlutik utaqqivaat. — Efesosimiut 3:10, 11.

16. Inuunerput inngilinut qanoq sunniuteqarsinnaava?

¹⁶ Kristumiut misilinneqartut ‘inngilinut isiginnaagassiaapput’. (1 Korinthimiut 4:9) Inngilit aalajaannerput takullugu tipaatsuttarput, aamma ajortuliortup allamik isumataarnera nuannaarutigingaartarpaat. (Lukasi 15:10) Arnat kristumiut Guutimik mianerinnillutik inuunerat inngilit maluginiartarpaat. Biibilimi ersersinneqarpoq “arnaq inngilit pillugit niaqqumigut [uleqassasoq]  piginnaanermut nalunaaqutaasumik”. (1 Korinthimiut 11:3, 10) Aap, arnat kristumiut Guutillu kiffai nunamiittut allat tamarmik teokratiimik aaqqissuussinermut naalatsigitinnerat teokratiilu tunngavigalugu siulersortikkumanerat takullugu inngilit nuannaartarput. Taakkua taamatut naalannerat Guutip ernerinut qilammiusunut taakkununnga naalannissamik eqqaasitsissutaavoq naleqquttoq.

Inngilit oqaluussinermik tapersersuipput

17, 18. Sooq oqarsinnaavugut inngilit oqaluussinitsinnik tapersersuisut?

¹⁷ Inngilit “Naalakkap ulluani” pisimasunut pingaarutilinnut peqataatinneqarput. Pisimasut tamakkua tassaapput Guutip naalagaaffiata 1914-imi pilersinneqarnera aamma Saatanip anersaapiluisalu ‘Mikaelimit inngiliinillu’ qilammit igitaanerat. (Saqqummersitat 1:10; 11:15; 12:5-9) Apustilip Johannesip takuaa “inngili . . . pavani qilaap ataani timmisoq. Nalunaarutigiartorpaa iivangkiiliu atajuartussaq nunarsuarmi najugaqartunut”. Inngili ima oqarpoq: “Guuti mianerisiuk naalannartillugulu, eqqartuussinissaa nalliummat. Pallorfigisiuk taanna qilammik nunamillu immamillu ermullu puilaffiinik pinngortitsisoq.” (Saqqummersitat 14:6, 7) Taamaalillutik Jehovap kiffai Diaavulumit akerlilersorneqangaaraluarlutik naalagaaffik pilersinneqarsimasoq pillugu nutaarsiassamik nuannersumik oqaluussissutiginninnerminni inngilinit najorneqarnerminnik uppernarsaavigineqarput. — Saqqummersitat 12:13, 17.

¹⁸ Inngilip taamanikkut Filipimut oqaluttup taassuminngalu kunngip atorfilittaanut siulersuisup pisimaneratut, ullumikkut inngilit oqaluulluta eqqortuliorusuttunut siulersorneq ajorpaatigut. (Apustilit Suliaat 8:26-29) Misigisarpassuarnilli erserpoq inngilit oqaluussinitsinnik takussaanatik tapersersuisut ‘inuunermillu naassaanngitsumik eqqortumik isumaqarfiginnittunut’ uagutsinnik siulersuisartut. * (Apustilit Suliaat 13:48, NV) Oqaluusseqataajuarnissarput pingaaruteqarluinnarpoq ‘Ataatamik anersaakkut ilumoornikkullu pallorfiginnikkusuttut’ naniniarlugit iliuuseqaqataasinnaaniassagatta! — Johannesi 4:23, 24.

19, 20. Pisimasut pisussallu ‘silarsuup naggatissaanut’ nalunaaqutaasut inngilit qanoq peqataaffigaat?

¹⁹ Jiisusi nalerput eqqarsaatigalugu oqarpoq inngilit “silarsuup naggatissaani” ‘ajortut iluartut akornannit avissaartikkiartorumaaraat’. (Matthæusi 13:37-43, 49) Aamma inngilit inaarutaasumik tanitanik katersuinermi naqissusiinermilu peqataassapput. (Atuaruk Matthæusi 24:31; Saqqummersitat 7:1-3) Aammattaaq inngilit Jiisusi ilagissavaat taassuma ‘savat savaasanit avissaartippagit’. — Matthæusi 25:31-33, 46.

²⁰ “Jiisusi inngilini pissaasut ilagalugit qilammit saqqummersitaappat” ‘Guutimik ilisimasaqanngitsut Naalakkamillu Jiisusimik iivangkiiliumut naalakkumanngitsut’ tamarmik suujunnaarsinneqassapput. (2 Thessalonikamiut 1:6-10) Johannesip pisimasoq tamanna takorruuisinneqarluni takugamiuk, Jiisusi inngilerpassuillu qilammiusut sorsunnerminni naapertuilluartumik iliorniarlutik hestinik qaqortunik hesterlutik takkuttutut allaatigai. — Saqqummersitat 19:11-14.

21. Inngilip ‘itinersuarmut matuersaammik nassarlunilu kalunnersuarnik tigumiartup’ Saatani anersaapiluilu qanoq pissavai?

²¹ Johannesip aamma takuaa “inngili qilammit aqqartoq itinersuarmut matuersaat nassarlugu kalunnersuillu tigumiarlugit”. Taanna tassaavoq inngiliuneq Mikaeli Diaavulumik qilersuiumaartoq itinersuarmullu — taassuma  anersaapilui ilanngullugiugunartoq — nakkartillugu. Taakku Kristusip ukiuni tusindini naalakkersuinerata naalernerani inuiaat naammalluinnartut inaarutaasumik misilinneqarpata sivikitsumik iperagaassapput. Tamatuma kingorna Saatani pikitsitsisullu allat tamarmik suujunnaarsinneqassapput. (Saqqummersitat 20:1-3, 7-10; 1 Johannesi 3:8) Guutimut pikitsitsinerit suulluunniit peerneqassapput.

22. Inngilit pisussanut nalliutilivissunut qanoq akuuppat, inngilillu suliaat pillugit qanoq misigisariaqarpugut?

²² Saatanip pissutsinik aaqqissuussineranit ajortumit aniguisitaanissarsuaq nalliutilivippoq. Inngilit pisussani Jehovap qilammi nunamilu kisimi oqartussaaneranik qutsissisitsiffiusussani taassumalu nunarsuarmut inuiannullu siunertaanik tamakkiisumik naammassinniffiusussani pingaarutilinni tamakkunani pingaaruteqassapput. Inngilit naapertuilluartut ilumut tassaapput “anersaat kiffartortut annassummik kingornussisussat pillugit kiffartoqqullugit aallartitaasut”. Taamaattumik Jehovap Guutip piumasamisut iliornissatsinnut naassaanngitsumillu inuulernissatsinnut ikiorniarluta inngilinik atuinera qujamasuutigisigu.

[Quppernerup ataani ilanngussaq]

Qanoq akissavit?

• Pinngortitat anersaajusut qilammiusut qanoq aaqqissuussaappat?

• Noap nalaani inngilit ilaat suppat?

• Guutip kiffaminik ikiuiniarluni inngilit qanoq atortarsimavai?

• Nalitsinni suliat inngilit naapertuilluartut peqataaffigisaat suuppat?

[Atuaqqissaarnermi apeqqutit]

[Qupp. 23-mi assiliartaq]

Inngilit Guutip piumasaanik naammassinnittarnertik nuannaarutigaat

[Qupp. 25-mi assiliartaq]

Inngilit Guutip piumasaanut naapertuuttumik akuliunissamut piareersimajuaannarput, soorlu Danielimut tunngatillugu taamaassimasut

[Qupp. 26-mi assiliartaq]

Sapiitsuugit — inngilit oqaluussinermik tapersersuinerat ilisimaaralugu

[Suminngaanneernera]

Nunarsuaq: Asseq NASA-​meersoq