4 Qularnerit ajugaaffigiuk

“Uppernikitsutit, sooq qulalerpit?” — Matthæusi 14:31.

SOOQ TAMANNA SAPERNARPA? Allaat Jiisusip ajoqersugai ilaannikkut qulalertarput. (Matthæusi 14:30; Lukasi 24:36-39; Johannesi 20:24, 25) Uppernikinneq Biibilimi ‘ajortitut uagutsinnik tigumminninniartutut’ allaatigineqarpoq. (Hebræerit 12:1) Aamma Paulusi ima allappoq: ‘Imaanngilaq tamarmik upperneq pigigaat.’ (2 Thessalonikamiut 3:2) Tamanna ima paasisariaqanngilaq inoqartoq uppilersinnaanngitsunik. Pineqartorli tassaavoq inuit ilaasa uppilerumallutik iliuuseqartannginnerat. Uppilerumallutik iliuuseqartut Guutip pilluaqqujumaarpai.

QANOQ ILILLUTIT AJUGAAFFIGISINNAAVIUK? Suna qularinerlugu paasiniaruk. Assersuutigalugu ajoqersukkap Tuumap Jiisusip makititaasimanera qularaa, naak ajoqersukkat allat taanna takusimaneraraluaraat. Tuuma tamatumunnga uppernarsaatinik  takusaqarusuppoq, taamaammat Jiisusip uppernarsaatinik upperlualernissaanut pisariaqartunik takutippaa. — Johannesi 20:24-29.

Jehovap Guutip qularnitta ajugaaffiginissaanut pisariaqartitatsinnik Biibili aqqutigalugu akisarpaatigut. Assersuutigalugu inuppassuit upperunnaartarput isumaqartaramik Guutip sorsunnerit, nakuusernerit alianartullu inuiaat naalliuutigisaat toqqaannartumik toqqaannanngitsumilluunniit pisuussutigigai. Tamanna pillugu Biibilimi qanoq allassimasoqarpa?

Guuti silarsuarmi matumani naalagaanngilaq, aamma inuit naalakkersueriaasii aqunngilai. Jiisusip pinngortitaq anersaajusoq takussaanngitsoq Saatanimik atilik ‘silarsuup naalagaaneratut’ eqqartorpaa. (Johannesi 14:30) Saatanip naalagaaffinnut nunarsuarmiittunut tamanut oqartussaassuseq Jiisusimut neqeroorutigaa ataasiaannarluni pallorfigerusuppani. Ima oqarpoq: “Pissaaneq tamanna tamaat alutornassuserlu ilinnut tunniukkumavakka, uannummi pigititaammata kimulluunniit piumasara malillugu tunniussinnaavakka.” Saatanip taamatut oqartussaassuseqarnera Jiisusip apeqqusinngilaa, imali oqarpoq: “Allassimavoq: ‘[Jehova] Guutit pallorfigissavat taannalu kisiat kiffartuullugu.’” (Lukasi 4:5-8) Saataniuna naalakkersueriaatsillu inuit pilersitaat, Guutiunngitsoq, silarsuarmi naalliunnartunut pisuusut. — Saqqummersitat 12:9, 12.

Jehovap qanittukkut naalliunnartunut pissutaasut tamaasa piissavai. Naalagaaffimmik, ernerminit Jiisusimit Kristusimit aqunneqartumik, inunnut naalakkersuisussamik pilersitsereerpoq. (Matthæusi 6:9, 10; 1 Korinthimiut 15:20-28) Naalagaaffik tamanna pillugu nutaarsiassaq nuannersoq maanna nunarsuaq tamakkerlugu oqaluussissutigineqarpoq Biibilimi siulittuut eqquutitillugu. (Matthæusi 24:14) Naalagaaffiup tamatuma akerlilersuisut tamaasa, aammattaaq inuit naalliuutaannut pissutaasut, qanittukkut piiassavai. — Danieli 2:44; Matthæusi 25:31-33, 46; Saqqummersitat 21:3, 4.

QANOQ ILUAQUTAASSAVA? Qulalersut assigaat mallit “ajoqersuutit suulluunniit anoraannit” nassataritittut. (Efesosimiut 4:14; 2 Petrusi 2:1) Apeqqutiminnulli naammaginartunik akissutisisut ‘uppernerminni aalajaassinnaapput’. — 1 Korinthimiut 16:13.

Jehovap Nalunaajaasuisa, atuagassiamik matuminnga saqqummersitsisartut, apeqqutit qulalissutigisavit akissutissarsinissaannut ikiorusuppaatsit. Taakkua kajumissaarpaatsit Biibilimik atuaqatigeqqullutik aamma illit taakkua ajoqersuutaannik nammineq misissueqqullutit. Taamaalioruit Guutimut upperlualissaatit. (wp09 05/01-E)

Paasisaqarnerorusukkuit takukkit kapitali 8, “Hvad er Guds rige?”, aamma kapitali 11, “Hvorfor tillader Gud lidelser?”, atuakkami Hvad er det Bibelen virkelig lærer?-imi *

[Quppernerup ataani ilanngussaq]

[Qupp. 9-mi assiliartaq]

Apeqqutiminnut naammaginartumik akissutissarsisimasut uppernerminnut tunngavissaqarluarput