Ilaqutariit kristumiut — Jiisusip maligassiaa malissiuk!

‘Kristusip maligassamik qimatsivigaasi, tumini atuarlugit malinnaaqqullusi.’ — 1 PETRUSI 2:21.

1. (a) Guutip ernera pinngortitsinermut tunngatillugu sumik suliassaqarpa? (b) Jiisusi inunnut qanoq isiginnittaaseqarpa?

GUUTI qilammik nunamillu pinngortitsimmat taassuma angajulliliaata ‘suliortutut’ (1900) najorpaa. Guutip ernerata Ataatani, Jehova, suleqatigaa taanna nunarsuarmi maani uumasunik naasunillu assigiinngitsorpassuarnik ilusilersuillunilu pinngortitsimmat. Aamma Jehova suleqatigaa paratiisimik inuit, Jehova assilillugu pinngortitat, najugassaannik piareersaammat. Guutip ernera, kingusinnerusukkut Jiisusitut ilisimaneqalersoq, inunnik asanningaarpoq. Taassuma ‘inuit nuannaarutigai’. — Ussatit 8:27-31; 1 Mosesi 1:26, 27.

2. (a) Jehova inuiaat naammalluinnanngitsut ikiorniarlugit qanoq iliorsimava? (b) Inuunermut tunngasut ilaat suna pillugu Biibilimi siunnersuuteqarpa?

² Inuit siulliit marluk ajortulioreermata inuiannik ajortiliusunik aniguisitsinissaq Jehovap siunertaanut ilaalerpoq pingaarutilik. Jehova taamatut aniguisitsisinnaajumalluni Kristusip utertitsissutitut pilliutaanik pilersitsivoq. (Romamiut 5:8) Aamma Jehovap oqaatsini, Biibili, naammalluinnanngissusermik kingornussisimagaluartut qanoq ajunngitsumik inuulersinnaanerannik inunnut siunnersuutitalik, pilersippaa. (Tussiaat 119:105) Jehova oqaatsimini siunnersuuteqarpoq ilaqutariittut nukittullutalu pilluarnissamut iluaqutissatsinnik. Aappariinnermut tunngatillugu Mosesimik allakkani siullerni allassimavoq angutip ‘nuliani attavigissagaa, uiniulissasullu ataaseq’. — 1 Mosesi 2:24.

3. (a) Jiisusi aappariinneq pillugu qanoq oqarpa? (b) Allaaserisami matumani suna sammineqassava?

³ Jiisusip nunarsuarmi kiffartornermini erseqqissarpaa aappariinnerup ataavartuunissaa siunertaasoq. Saqqummiuppai najoqqutassiat — maleruarneqarunik — ilaqutariinniittut aappariinnermik ilaqutariilluunniit pilluarnerannik  navianartorsiortitsisinnaasunik isiginnittaaseqarnaveersaarnissaminnut iliuuseqarnaveersaarnissaminnullu iluaqutigiumaagaat. (Matthæusi 5:27-37; 7:12) Allaaserisami matumani sammineqassaaq Jiisusip ajoqersuutai nunarsuarmiinnerminilu maligassiaa uiusut, nuliaasut, angajoqqaat qitornaasullu ilaqutariittut pilluarlutillu nalerisimaarnissaminnut qanoq iluaqutigisinnaaneraat.

Uiusoq kristumiu nuliaminik qanoq ataqqinnissinnaasoq

4. Jiisusip suliassaa uiusullu kristumiut suliassaat qanoq assigiissuteqarpat?

⁴ Guutip angut ilaqutariinnut niaquusussanngortippaa, soorluttaaq Jiisusi ilagiinnut niaquusoq. Apustili Paulusi ima allappoq: “Uiusoq nuliaminut [niaquuvoq] soorlu Kristusi ilagiinnut niaquusoq timiminullu annaassisuulluni. Angutit, nuliasi asassavasi soorlu Kristusip ilagiit asagai imminullu tunniulluni taakku pillugit.” (Efesosimiut 5:23, 25) Taamaattumik Jiisusip ajoqersukkaminik pinneriaasia uiusup kristumiup nuliaminik qanoq pinnittarnissaanut najoqqutassiaavoq. Jiisusip oqartussaassutsimik Guutimit pisaminik atueriaasii assigiinngitsut misissoriartigit.

5. Jiisusip oqartussaassutsini ajoqersukkaminut qanoq atortarpaa?

⁵ Jiisusi ‘qanilaarlunilu uummatikkut makitajuippoq’. (Matthæusi 11:29) Aamma eqeersimaartuuvoq. Akisussaaffimminik sumiginnaanngisaannarpoq. (Markusi 6:34; Johannesi 2:14-17) Ajoqersukkani inussiarnersumik, pisariaqaraangat arlaleriarluni, siunnersortarpai. (Matthæusi 20:21-28; Markusi 9:33-37; Lukasi 22:24-27) Jiisusilli taakku oqalorujuutinngisaannarlugillu nikassanngisaannarpai, aamma kissaatigineqanngitsutut unnersuussutiminilluunniit malinnissinnaanngitsutut misigilersittanngilai. Nersualaartarpaali kajumissaartarlugillu. (Lukasi 10:17-21) Tupinnanngilaq Jiisusip asannittuunini misiginneqataasuuninilu pillugit ajoqersukkaminit ataqqineqalernera!

6. (a) Uiusut Jiisusip ajoqersukkaminik pinneriaasia sumik ilinniarfigisinnaavaat? (b) Petrusip uiusut qanoq kajumissaarpai?

⁶ Jiisusip maligassiaanit paasivarput uiusut taassuma siulersuinera ilaassagunikku nuliatik sukannersumik naalakkersussanngikkaat, ataqqinnittumilli imminullu pilliutigeriaannaallutik asannittumik pissagaat. Apustilip Petrusip uiusut kajumissaarpai Jiisusip asannissusianik ilaarseqqullugit nuliaminnik paasinnittuunermikkut ‘ataqqinninnermikkullu’. (Atuaruk 1 Petrusi 3:7). Uiusulli qanoq ililluni nuliani ataqqineqartariaqartutut piitigalugu oqartussaassutsini atorsinnaavaa?

7. Uiusoq nuliaminik qanoq ililluni ataqqinnissinnaava? Assersuuteqarit.

⁷ Assersuutigalugu uiusup nuliani ataqqisinnaavaa ilaqutariinnut tunngasunik aalajangiinnginnermini nuliami isumaanik misigissusiinillu eqqarsaatiginneqqissaarnermigut. Immaqa nuunnissamut, suliffittaarnissamut ulluinnarniluunniit allanut tunngatillugu, soorlu sumut feeriarnissamut ilaqutariilluunniit aningaasartuutaasa inuuniarnerup akitsoriartuinnarneranut qanoq naleqqussarneqarsinnaanerannut tunngatillugu, aalajangigassaqarpoq. Tamakku ilaqutariinniittunik tamanik attuisussaammata pitsaassaaq uiusup nuliani aalajangeeqataatippagu,  tamannami oqimaaqatigiissumik ataqqinnittumillu aalajangiinissaminut iluaqutigissavaa, aamma tamanna pissutigalugu nuliaasup uiminik tapersersuinissani ajornannginnerutissavaa. (Ussatit 15:22) Uiusoq kristumiu nuliaminik ataqqinnittoq taassumannga asaneqarlunilu ataqqineqassaaq, pingaarnerusumilli aamma Jehovamit akuerineqassaaq. — Efesosimiut 5:28, 29.

Nuliaasoq uiminik qanoq ataqqinningaarsinnaasoq

8. Sooq Eva maligassaqqinngila?

⁸ Jiisusi oqartussaassutsimut naalatsigitinnermut tunngatillugu arnanut kristumiunut maligassaavoq naammalluinnartoq. Taassuma oqartussaassutsimut isiginnittaasiata arnallu siulliup isiginnittaasiata assigiinngissusii! Eva nuliaasunut maligassaalluanngilaq. Jehovap Adami taassumunnga niaquusussanngortippaa, aamma Jehova Adami aqqutigalugu ilitsersuisarpoq. Evalli aaqqissuussaq tamanna ataqqinngilaa. Ilitsersuussutinik Adamip imminut ingerlateqqitaanik akuerinninngilaq. (1 Mosesi 2:16, 17; 3:3; 1 Korinthimiut 11:3) Ilumoorpoq Eva salloqittarneqartoq, uinili siunersiorsimasariaqaraluarpaa paasiniarlugu ‘Guutip nalunngisaanik’ ilisimasaqarnerartoq upperisariaqarnerlugu. Uinili ilaqutariinnik siulersuinissamik akisussaaffianik arsaarpaalusooq. — 1 Mosesi 3:5, 6; 1 Timotheusi 2:14.

9. Jiisusi naalatsigitinnermut tunngatillugu qanoq maligassiuiva?

⁹ Jiisusili naalatsigitinnermut tunngatillugu maligassaavoq naammalluinnartoq. Isiginnittaasianit inuuneranillu erserpoq ‘arsaarinissaq, tassa Guutip naliginissaa, eqqarsaatiginngilluinnaraa’. “Imminut imaarpoq inussiatullu isikkoqalerluni”. (Filippimiut 2:5-7, NV) Jiisusi maanna kunngisut naalakkersuigaluarluni suli taamatut isiginnittaaseqarpoq. Maniguulluni Ataataminut sutigut tamatigut naalatsigitippoq siulersuineranillu tapersersuilluni. — Matthæusi 20:23; Johannesi 5:30; 1 Korinthimiut 15:28.

10. Nuliaasoq uimi siulersuineranik qanoq tapersersuisinnaava?

¹⁰ Pitsaassaaq nuliaasoq kristumiu uimi siulersuineranik tapersersuinermigut Jiisusimik ilaarsippat. (Atuaruk 1 Petrusi 2:21; 3:1, 2). Qaqugukkut taamaaliorsinnaanersoq eqqarsaatigeriartigu. Ernera arlaannik iliorumavoq anaanaasup ataataasullu akuereqqaartariaqagaannik. Ernerusup iliuuseriumasaa anaanaasup uinilu siornatigut oqaluuserinikuunnginnamikku pissusissamisuussaaq anaanaasoq ima aperippat: “Ataatat aperereerpiuk?” Erneq aperisimanngippat anaanaasup uini pineqartoq pillugu oqaloqatigisariaqarpaa aalajanginnginnerminni. Aamma nuliaasup kristumiup meeqqat tusaatillugit soorunami uini akerlilernaveersaassavaa. Uini isumaqatiginngikkuniuk marluinnaatillutik oqaloqatigisinnaavaa. — Efesosimiut 6:4.

Jiisusi angajoqqaanut maligassaavoq

11. Jiisusi angajoqqaanut qanoq maligassaava?

¹¹ Jiisusi aappaninnanilu meerartaanngikkaluarluni angajoqqaanut kristumiunut maligassaalluarpoq. Qanoq? Aap, ajoqersukkani asannilluni naammagittarlunilu ilinniartippai oqaatsimigut  maligassiuinermigullu. Taakkununnga suliassiissutigisani qanoq suliarissaneraat takutippai. (Lukasi 8:1) Jiisusip ajoqersukkanut isiginnittaasia taakkuninngalu pinneriaasia ajoqersugaasa imminnut qanoq pisarnissartik pillugu ilinniarfigaat. — Atuaruk Johannesi 13:14-17.

12, 13. Angajoqqaat meeqqatik Guutimik mianerinnittunngornissaannut perorsarumallugit susariaqarpat?

¹² Meeqqat amerlanertigut angajoqqaamik maligassiaat malittarpaat, taakku maligassiuilluaraluarpata maligassiuilluanngikkaluarpataluunniit. Taamaattumik angajoqqaat imminnut ima aperisinnaapput: ‘Fjernsynernermut aliikkusersornermullu aamma Biibilimik atuaqqissaarnermut oqaluussinermullu piffissamik qanoq atsigisumik atuisarnitsinnut tunngatillugu meeqqavut qanoq maligassiorpavut? Ilaqutariinni uagut suna pingaarnerpaatipparput? Inuunitta aalajangikkattalu pallorfiginninnermik ilumoortumik tunngaveqartinneratigut maligassiuilluarpugut?’ Angajoqqaat meeqqatik Guutimik mianerinnittuunissaannut perorsarsinnaassagunikkit, pingaarnerpaamik namminneq Guutip inatsisai aalajangiuttariaqarpaat. — 5 Mosesi 6:6.

¹³ Angajoqqaat ulluinnarni najoqqutassianik Biibilimiittunik atuinissartik ilungersuutigippassuk, meeraasa tamanna malugissavaat. Angajoqqaat oqaasii ilinniartitsinerallu meeraannut sunniuteqassapput. Meeqqalli takugunikku angajoqqaatik imminnut naapertuutinngitsunik najoqqutassiaqartut imaassinnaavoq isummertut najoqqutassiat Biibilimeersut pingaaruteqarnatillu maleruaruminaatsuusut. Tamanna immaqa meeqqat silarsuarmit tatineqarunik nakkaannarnerannik kinguneqarsinnaavoq.

14, 15. Angajoqqaat meeqqatik sunik pingaartitsinissamut perorsartariaqarpaat, qanorlu ilillutik taamaaliorsinnaappat?

¹⁴ Angajoqqaat kristumiut nalunngilaat meeqqanik perorsaaneq tassaaginnanngitsoq meeqqat timikkut pisariaqartitaannik isumaginninneq. Taamaattumik uungaannaq isiginerussaaq qitornat kajumissaaraanni anguniagaqaqqullugit taamaallaat pigisatigut iluaqutaasunik. (Oqaluussisartup oqaasii 7:12) Jiisusip ajoqersukkani anersaakkut nalilinnik pingaarnerpaatitsinissamik ilinniartippai. (Matthæusi 6:33) Angajoqqaat kristumiut Jiisusi ilaarlugu meeqqaminnik anersaakkut ittunik anguniagaqarusussuseqalersitsinissartik ilungersuutigisariaqarpaat.

¹⁵ Ilaatigut taamaaliorsinnaapput meeqqamik piffissaq tamaat kiffartortunik ilaqarnissaannut periarfissanik atorluaanermikkut. Eqqarsaatigiuk inuusuttuaqqanut pionerinik imaluunniit ilagiinnik nakkutilliisumik nulianillu ilisarisimannillualerneq qanoq qiimmassaataatigisinnaasoq. Ajoqersuiartortitat tikeraartut, Betelimi suleqataasut nunanilu allani sanaartoqataasartut Jehovamut kiffartornerup misigisimasamillu soqutiginartut nuannersui angorniorlutik oqaluttuarisinnaavaat. Imminut pilliutigeriaannaallutik kiffartornermikkut maligassiuilluarnerat meeqqat silatusaartumik aalajangiinissaminnut, pitsaasunik anguniagaqarnissaminnut piffissarlu tamaat kiffartornerminni imminut pilersorsinnaaqqullutik ilinniagaqarluarnissaminnut iluaqutigingaarsinnaavaat.

 Ilissi meeqqat — Jiisusip maligassiaanik malinninnissamut suna iluaqutigisinnaavisiuk?

16. Jiisusip angajoqqaani nunamiusut Ataatanilu qilammiusoq qanoq ataqqivai?

¹⁶ Jiisusi aamma meeqqanut maligassaalluarpoq. Jiisusi meeraalluni Josefimit Mariamillu paarineqarpoq, taakkulu naalappai. (Atuaruk Lukasi 2:51). Naalappai paasigamiuk taakku naammalluinnanngitsuugaluarlutik imminik isumassuinissamik Guutimit akisussaaffilerneqarsimasut. Taamaattumik ataqqineqartariaqarput. (5 Mosesi 5:16; Matthæusi 15:4) Jiisusi inersimasunngorami Ataatami qilammiusup nuannarisaanik iliortuaannarpoq. Ilaatigut ussernartunik akiuivoq. (Matthæusi 4:1-10) Ilissi meeqqat inuusuttuaqqallu angajoqqaassinnut naalannginnissamut immaqa ilaannikkut ussernartorsiortinneqartarpusi. Jiisusip maligassiaanik malinninnissamut suna iluaqutigisinnaavisiuk?

17, 18. (a) Meeqqat inuusuttuaqqallu atuarfimmi qanoq tatineqartarpat? (b) Misilinneqarnerit tamakku naammagalugit atornissaannut suna iluaqutigisinnaavaat?

¹⁷ Qularnanngitsumik atuaqativit amerlanersaat najoqqutassianik Biibilimiittunik ataqqinnilaaginnarput ataqqinninngilluinnarlutilluunniit. Immaqa eqqunngitsumik iliortinniarsarissavaatsit piumanngikkaangavillu mitaatigisassallutit. Atuaqativit qinngasaartarpaatsit arlaannik aalajangersimasumik iliuuseqaqatigerusunnginnakkit? Taava illit susarpit? Qunulerlutit allat iliornerattut iliuinnaruit nalunngilat angajoqqaatit Jehovalu pakatsisissallugit. Atuaqatitit maliinnarlugit ilioruit, tamanna ilinnut qanoq sunniuteqassava? Immaqa anguniagaqarputit, soorlu pionerinngornissannik imaluunniit ilagiinni kiffartortunngornissamik, oqaluussisartunik pisariaqartitsiffiunerusumut nuunnissannik Betelimiluunniit suleqataalernissannik. Atuaqatinnik peqateqartarnerit anguniakkat tamakkua angunissaannut iluaqutigissaviuk?

¹⁸ Ilissi inuusuttuaqqat ilagiinni kristumiuniittut uppernissinnut misilinneqaataasunik misigisaqartarpisi? Taamaappat qanoq periartarpisi? Maligassarsi Jiisusi eqqarsaatigisiuk. Taanna ussernartunut nakkaannarumananilu Guutip isaani eqqortunik aalajangiusimannippoq. Ilissi tamanna eqqarsaatissinniitittuarussiuk, ajornannginnerutissavarsi atuaqatissi erseqqissumik oqarfiginissaat iliuuseriniagaat eqqunngitsuliornerusut nalunnginnassiuk peqataaffigerusunnagit. Jiisusi ilaarsiuk Jehovamut kiffartornerup naalannerullu nuannersuinik eqqarsaatiginninnissigut. — Hebræerit 12:2.

Ilaqutariittut pilluarnissamut ‘matuersaat’

19. Inooriaaseq suna piviusumik pillualernarpa?

¹⁹ Jehovap Guutip Jiisusillu Kristusip inuit ajunnginnerpaamik kissaappaat. Naammalluinnanngitsuugaluarluta pilluarnermik misigisaqarnissamut periarfissaqarpugut. (Esaja 48:17, 18; Matthæusi 5:3) Jiisusip sallusuissutit inuit pilluarnerannut tunngaviliisut ilinniartitsissutigai, sulili allamik iliuuseqarpoq. Aamma inooriaaseq pitsaanerpaaq ajoqersukkanut ilinniartitsissutigaa. Aammattaaq inuunermigut ersersippaa oqimaaqatigiissumik qanoq inuusoqartartoq aamma qanoq oqimaaqatigiissaariuartoqarsinnaasoq. Ilaqutariinni qanorluunniit inissisimaffeqaraluarutta taassuma maligassiaa tamatta iluaqutigisinnaavarput. Uiusut, nuliaasut, angajoqqaat meeqqallu: Jiisusip maligassiaa malissiuk! Jiisusip ajoqersuutaanik akuerinninneq maligassiaanillu malinninneq ilaqutariittut pilluarnissamut ‘matuersaataapput’. (w09 07/15-E)

Qanoq akissavit?

• Uiusut oqartussaassuseq Guutimit pisartik qanoq atortariaqarpaat?

• Nuliaasup Jiisusi qanoq ilaarsinnaavaa?

• Angajoqqaat Jiisusip ajoqersukkaminik pinneriaasia sumik ilinniarfigisinnaavaat?

• Meeqqat inuusuttuaqqallu Jiisusip maligassiaa sumik ilinniarfigisinnaavaat?

[Atuaqqissaarnermi apeqqutit]

[Qupp. 16-mi assiliartaq]

Uiusoq asannittoq ilaqutariinniittunik tamanik attuisunik aalajangiinnginnermini qanoq iliussava?

[Qupp. 17-mi assiliartaq]

Qanoq pisoqartillugu nuliaasoq uimi siulersuineranik tapersersuinissamut periarfissaqartarpa?

[Qupp. 18-mi assiliartaq]

Meeqqat angajoqqaamik ileqquinik pitsaasunik ilaarsisarput