Jiisusi ilaaruk — asannissuseqarlutit ilinniartitsigit

“Inummik taassumatut oqaluttoqarsimanngisaannarpoq.” — JOHANNESI 7:46.

1. Inuit Jiisusip ilinniartitseriaasia qanoq periarfigaat?

JIISUSI ilinniartitsisoq tusarnaarlugu qanoq pissanganartigisimassava! Taassuma inunnut naapitaminut qanoq sunniuteqartarsimanera pillugu Biibilimi paasisaqarpugut. Assersuutigalugu iivangkiiliumik allattup Lukasip allaatigaa Nazaretimiut ‘oqaatsit saamangaartut qarnanit anisut tupigusuutigigaat’. Matthæusip allaaseraa Jiisusip qaqqami oqaluusianik tusarnaartut taassuma “ajoqersueriaasia pillugu inuit [uissuummilluinnartut]” (NV). Aamma Johannesip eqqaavaa naalaffimmi nakkutilliisut Jiisusimik tigusarinnikkiartortinneqartut utertut imalu oqarlutik: “Inummik taassumatut oqaluttoqarsimanngisaannarpoq.” — Lukasi 4:22; Matthæusi 7:28; Johannesi 7:46.

2. Jiisusi qanoq ilinniartitseriaaseqarpa?

² Naalaffimmi nakkutilliisut oqaasii ilumoorput. Jiisusi qularnanngitsumik tassaavoq ilinniartitsisut inuusimasut pingaarnerpaartaat. Paasiuminartumik akerlilerneqarsinnaanngitsunillu tunngavilersuilluni ilinniartitsisarpoq. Assersuusiullaqqillunilu apeqquteqallaqqippoq. Ilinniartitsissutini tusarnaartuminut naleqqussartarpaa, aamma atorfikkaajunersut inuinnaanersulluunniit eqqarsaatigisarpaa. Aamma sallusuissutit itisuut paasiuminartumik saqqummiuttarpai. Periaatsilli taakku Jiisusip ilinniartitsillaqqissuuneranut pissutaasutuaanngillat.

Pissuserineqartussaq pingaarnerpaaq — asanninneq

3. Jiisusip ilinniartitsisutut itsaq upperisarsiornikkut siuttunit suna immikkoorutigaa?

³ Qularnanngitsumik allakkanik ilisimasut farisiiarillu ilisimasariaqakkaminnik ilisimannittunik allanillu ilinniartitsillaqqissunik ilaqarput. Jiisusip ilinniartitseriaasiata taakkua ilinniartitseriaasiannit suna allaassutigaa? Itsaq upperisarsiornikkut siuttut inuinnarnik soqutiginninngillat. Taakku asissorpaat ‘perloqqusatullu’ isigalugit. (Johannesi 7:49) Jiisusili taakkuninnga nalliginningaarpoq “naakkinarsisimangaarmata savatut paarsisoqanngitsutut”. (Matthæusi 9:36) Taanna asannillunilu misiginneqataasuullunilu inussiarnersuuvoq. Upperisarsiornikkut siuttut aamma Guutimut ilumoortumik asanninngillat. (Johannesi 5:42) Jiisusilli Ataatani asavaa taassumalu piumasaatut iliornissaq nuannarisarlugu. Upperisarsiornikkut siuttut namminneq iluaqutissaminnut Guutip oqaasiata isumaanik allanngortitsisarput, Jiisusili “Guutip oqaasianik” nuannarinnippoq  — tamatuminnga ilinniartitsissutiginnittarlunilu nassuiaasarlunilu illersuisarlunilu maleruaasarpoq. (Lukasi 11:28) Aap, taassuma asanninneq pissuserilluinnarpaa, ilinniartitseriaasialu allanillu pinneriaasia asanninnermit sunnerneqarluinnarsimapput.

4, 5. (a) Asannissuseqarluta ilinniartitsinissarput sooq pingaaruteqarpa? (b) Sooq ilisimasat ilinniartitsisinnaassuserlu ilinniartitsigaanni aamma pingaaruteqangaarpat?

⁴ Uagummi? Kristusimut ajoqersugaagatta taanna oqaluussinitsinni inooriaatsitsinnilu ilaarusupparput. (1 Petrusi 2:21) Taamaattumik anguniagarput tassaaginnanngilaq Biibilimi suut ajoqersuutigineqarnerannik allanik ilinniartitsinissaq, aammali tassaavoq Jehovap pissusiinik, ingammik asanninneranik, ersersitsinissaq. Ilisimasarpassuaqaraluarutta ilisimasakikkaluaruttaluunniit, ilinniartitsillaqqissuugaluarutta ilinniartitsillaqqippallaanngikkaluaruttaluunniit, asanninneq ersersitarput oqaluussiffigisatta uummataata killinnissaanut iluaqutigingaassavarput. Oqaluussinermi angusaqarluassagutta Jiisusi ilaartariaqarparput asannissuseqarluta ilinniartitsinitsigut.

⁵ Ilinniartitsillaqqissuujumalluta soorunami ilinniartitsissutiginiakkavut pillugit ilisimasaqartariaqarpugut, aamma ilisimasatsinnik ingerlatitseqqissinnaasariaqarpugut. Jiisusip ajoqersukkani ilisimasaqalernissaannut ilisimasaminnillu ingerlatitseqqinnissaannut ikiorpai, ullumikkullu Jehovap peqatigiissortani aqqutigalugit taamaaliornissatsinnut ikiortarpaatigut. (Atuakkit Esaja 54:13; Lukasi 12:42). Ilisimasatsinnik ingerlatitseqqittussaavugut, anguniagarisariaqarparpulli asannissuseqarluta taamaaliornissarput. Ilisimasat, ilinniartitsillaqqissuseq asanninnerlu tamaasa atorlugit ilinniartitsigaanni, tamanna kinguneqarluarsinnaavoq. Taavami ilinniartitsigaangatta qanoq ililluta asanninnermik ersersitsisarsinnaavugut? Jiisusi ajoqersugaalu qanoq iliortarpat? Misissoriartigu.

Jehova asasariaqarparput

6. Asasarput qanoq eqqartortarparput?

⁶ Nuannarisatsinnik eqqartugaqassalluta tamatta nuannaraarput. Pingaartitatsinnik eqqartugaqaraangatta angorniulertarpugut, inuillu takusinnaavaat ilumut pingaartikkivut. Ingammik asasatsinnik eqqartugaqaraangatta aamma taamaattarpugut. Amerlanertigut inuk taanna allanut oqaluttuarerusussuataartarparput. Nersorlugu eqqartortarparput illersortarlugulu. Taamaaliortarpugut allat taanna pillugu ilisimasaqarusulersikkusukkatsigit uagullu taassuminnga nuannarinninnitsitulli nuannarinnilersikkusukkatsigit.

7. Jiisusip Guutimik asanninnini sunissamut kajumississutigaa?

⁷ Allat Jehovamik asanninnerulernissaannut ikiunnginneranni uagut nammineq taanna ilisarisimalluarlugulu asasariaqarparput. Tassami pallorfiginninneq ilumoortoq Guutimik asanninnermik tunngaveqarpoq. (Matthæusi 22:36-38) Tamatumunnga tunngatillugu Jiisusi maligassaavoq naammalluinnartoq. Taassuma uummatikkut, isumakkut tarnikkullu iluunngarluni nukinilu tamakkerlugit Jehova asavaa. Jiisusip Ataatani ukiuni immaqa milliardilinni qilammeeqatigereerlugu ilisarisimalluarpaa. Tamanna qanoq kinguneqarpa? Jiisusi ima oqarpoq: ‘Ataataq asavara.’ (Johannesi 14:31) Asanninnera tamanna Jiisusip oqaasiini iliuusiinilu tamani malugineqarsinnaavoq. Asanninneq tamatigut Guutip iluarisaatut iliortarnissamut kajumississutigaa. (Johannesi 8:29) Upperisarsiornikkut siuttunik ilumoortuusaarlutik Guutimut kiffartornerartunik assuarinninnissamut kajumississutigaa. Aamma asanninneq kajumississutigalugu Jehova eqqartortarpaa allallu taassuminnga ilisarisimannilernissaannut asannilernissaannullu ikiortarlugit.

8. Jiisusip ajoqersugai Guutimik asanninnertik pissutigalugu suppat?

⁸ Ukiuni hundredelinni siullerni Jiisusip pisimaneratut Jiisusip ajoqersugai Jehovamik asannipput, asanninnertillu tamanna nutaarsiassamik nuannersumik sapiillutik aallussilluarlutillu oqaluussissutiginninnissamut kajumississutigaat. Ajoqersukkat upperisarsiornikkut siuttunit pissaaneqangaartunit akerlilersorneqaraluarlutik Jerusalemi ajoqersuutiminnik tamakkerpaat. Takusimasatik tusarsimasatillu eqqartunngitsoorsinnaanngilaat. (Apustilit Suliaat 4:20; 5:28) Nalunngilaat Jehovap najoraatik aamma pilluaqqujumaaraatik — taamaaliorporlumi! Ukiut 30-ngajaat Jiisusip toqunerata kingorna apustili Paulusi allassinnaasimavoq nutaarsiassaq nuannersoq “qilaap ataani pinngortitanut tamanut” oqaluussissutigineqarsimasoq. — Kolossemiut 1:23.

9. Guutimik asanninnerput qanoq ililluta nakussatsissinnaavarput?

 ⁹ Ilinniartitsillaqqissuujumagutta uaguttaaq Guutimik asanninnerput nakussatsinniartuartariaqarparput. Qanoq ililluta taamaaliorsinnaavugut? Qinunikkut Guutip oqaluutikulaneratigut. Aamma taassuminnga asanninnerput nakussatsittarparput oqaasianik atuaqqissaartarnitsigut, atuakkanik atuagassianillu Biibililersaarutinik atuartarnitsigut kristumiullu ataatsimiinnerinut najuuttarnitsigut. Guuti pillugu ilisimasaqarnerujartuinnarnitsigut taanna asanerujartuinnassavarput. Asanninnerpullu tamanna oqaatsitsigut iliuutsitsigullu ersersikkaangatsigu, tamanna allat maluginiartassavaat immaqalu Jehovamut qanillissutigalugu. — Atuaruk Tussiaat 104:33, 34.

Allanut ilinniartitsissutigisavut pingaartittariaqarpavut

10. Ilinniartitsillaqqissup suut ilisarnaatigai?

¹⁰ Inuup ilinniartitsillaqqissunnguutigisartagaa tassaavoq ilinniartitsissutigisaminik pingaartitsinini. Ilinniartitsissutigisami ilumoortuunerat pingaaruteqangaarnerallu upperisariaqarpaa. Ilinniartitsisup ilinniartitsissutigisani soqutigigunigit angorniornera ilinniartunut sunniuteqangaassaaq. Ilinniartitsisulli ilinniartitsissutigisani pingaartippianngikkunigit, taava qanoq ililluni naatsorsuutigisinnaavaa ilinniartitami taakkuninnga pingaartitsinissaat? Guutip oqaasia pillugu ilinniartitsisutut maligassiuinitta pingaaruteqassusia suusupaginngisaannartariaqarparput. Soorlu Jiisusi oqartoq: “Kinaluunniit ajoqersorluagaasoq ajoqersortimisut ikkumaarpoq.” — Lukasi 6:40, The New Berkeley Version in Modern English.

11. Sooq Jiisusip allanut ilinniartitsissutigisani pingaartippai?

¹¹ Jiisusip allanut ilinniartitsissutigisani pingaartippai. Nalunngilaa erlinnartumik ingerlateqqitassaqarluni — tassa Ataatani qilammiusoq, ‘Guutip oqaasii’ aamma ‘oqaatsit naassaanngitsumik inuussutaasut’ pillugit sallusuissut. (Johannesi 3:34; 6:68) Sallusuissutit Jiisusip allanut ilinniartitsissutigisai suut ajortuunerannik suullu ajunngitsuunerannik qulaaripput — qaamanertut sakkortuutut. Inunnut maniguuttunut Diaavulumit naqisimaneqartunut upperisarsiornikkullu siuttunit ilumuunngitsunit salloqittarneqartunut neriuutissiillutillu tuppallersaataapput. (Apustilit Suliaat 10:38) Jiisusip ilumoortunik pingaartitsinera taamaallaat ajoqersuutaanit ersersinneqanngilaq, aammali iliuuserisaanit tamanit erserpoq.

12. Paulusip nutaarsiassaq nuannersoq qanoq isumaqarfigaa?

¹² Jiisusip ilinniartitsissutigisaminik pingaartitsineratut taassuma ajoqersugaasa Jehova Kristusilu pillugit sallusuissut ima nuannaritigalugulu pingaartitsigaat akerlilersuisunit tamatuminnga eqqartuiunnaarsinneqarsinnaanatik. Paulusip uppeqatini Romamiittut ima allaffigai: “Pilerivunga . . . iivangkiiliu nalunaajaatigiumallugu. Tassami iivangkiiliu kanngusuutiginngilara, tassaammat Guutip pissaanera uppertut kikkulluunniit annassutissaat.” (Romamiut 1:15, 16) Paulusip sallusuissummik oqaluussissutiginninneq ataqqinaatitut isigaa. Ima allappoq: “Saammaanneq manna pivara Kristusip peqangaassusia siunersissaanngitsoq Guutimik nalusunut nalunaajaatigeqqullugu.” (Efesosimiut 3:8) Paulusip allat Jehova taassumalu siunertai pillugit ilinniartikkaangamigit qanoq angorniortarsimatiginera takorlooruminarpoq.

13. Nutaarsiassap nuannersup pingaartinnissaanut sunik pissutissaqarpugut?

¹³ Nutaarsiassaq nuannersoq Guutip oqaasianiittoq pissutigalugu Pinngortitsisoq ilisarisimalluarsinnaanngorlugulu qanittumik attaveqarfigisinnaanngorparput. Nutaarsiassaq nuannersoq iluaqutigalugu inuunermi apeqqutit pingaarutillit naammaginartunik akissutissarsisarpavut, aamma inuunitsinnik allannguisinnaanngortarpugut, neriuuteqalertarluta atugarlioraangattalu nakussatsinneqartarluta. Aammattaaq inuunermut siunertaqarluartumut soraanngisaannartussamut uagutsinnik aqqutissiuussivoq. Nutaarsiassaq nuannersoq ilisimaneqarsinnaasut pingaaruteqarnerpaartaralugulu erlinnarnerpaartaraat. Tunissutisiaraarput nalissaqanngitsoq. Uagutsinnut nuannaarutaangaarpoq, allallu tunissutisiamik tamatuminnga aveqatigigaangatsigit nuannaarnerulertarpugut. — Apustilit Suliaat 20:35.

14. Nutaarsiassaq nuannersoq qanoq ililluta pingaartinnerulersinnaavarput?

¹⁴ Nutaarsiassaq nuannersoq pingaartinnerulerumallugu qanoq iliorsinnaavit? Guutip oqaasia atuaraangakku ilaannikkut unikaallallutit atuakkatit eqqarsaatigisarsinnaavatit. Assersuutigalugu  takorlooriaruk Jiisusi nunarsuarmiitillugu ingiaqatigigit, imaluunniit apustili Paulusi angalaqatigigit. Silarsuassami nutaami inuullutit inuunerullu qanoq allaanerutigiumaarnera takorlooruk. Nutaarsiassamut nuannersumut naalannerit pissutigalugu pilluaqqussutisiarisimasatit eqqarsaatigikkit. Nutaarsiassaq nuannersoq pingaartingaartuarukku, ilinniartitsigaangavit pingaartitsinerit malunnartassaaq. Taamaattumik ilikkakkatta eqqarsaatigeqqissaarnissaannut ilinniartitsissutigisattalu eqqumaffiginissaannut pissutissarpassuaqarpoq. — 1 Timotheusi 4:16; atuaruk Tussiaat 77:13.

Inunnik asannittariaqarpugut

15. Sooq ilinniartitsisup ilinniartitani asasariaqarpai?

¹⁵ Ilinniartitsillaqqissoq ilinniartitaminik ilorrisimaartitsisarpoq, malinnaalluartilerlugit oqaaseqarusulersillugillu. Ilinniartitsisup asannittup kajumississutigisaa tassaavoq ilinniartitaminik ilumoortumik isumassuinini. Ilinniartitsissutini taakkua pisariaqartitaannut paasisinnaasaannullu naleqqussartarpai. Aamma ilinniartitami piginnaasaannik pissutsinillu atugaannik maluginiaasarpoq. Ilinniartut malugisinnaasarpaat ilinniartitsisut taamatut asannikkaangata, taamaalillunilu ilinniartitsineq ilinniartinneqarnerlu nuannersisarput.

16. Jiisusi qanoq asannittuliorpa?

¹⁶ Jiisusi taamatut asannittuliorpoq. Asannittuliaasa pingaarnerpaartaat tassa inuunerminik naammalluinnartumik allat annaanneqarsinnaaqqullugit pilliutiginninnera. (Johannesi 15:13) Jiisusi kiffartornermini inuit timikkut anersaakkullu pisariaqartitaannik qasusuilluni isumaginnippoq. Inuit imminut ornigunnissaat naatsorsuutiginngilaa, kilometerilli hundredelippassuit pisulluni angalavoq nutaarsiassaq nuannersoq taakkununnga oqaluussissutiginiarlugu. (Matthæusi 4:23-25; Lukasi 8:1) Naammagittartuullunilu paasinnittuuvoq. Ajoqersukkani naqqittariaqaleraangata asannittumik naqqittarpai. (Markusi 9:33-37) Taakkua nutaarsiassamik nuannersumik oqaluussissutiginnillaqqissunngornissaannik qularutiginninnginnerminik ersersitsinermigut kajumissaarpai. Ilinniartitsisoqarsimanngilaq Jiisusimit asanninnerusumik. Ajoqersukkaminik asanninnini taakkunannga asaneqaatigaa, aamma taakkua taassuma inassutaanik maleruaanissaminnut kajumississutigaat. — Atuaruk Johannesi 14:15.

17. Jiisusip ajoqersugai allanut qanoq asannittuliorpat?

¹⁷ Jiisusip ajoqersugaasa taanna ilaarpaat oqaluussiffigisaminnut asannittuliorlutillu tunniusimanermikkut. Malersorneqarneq naammagalugu atorpaat allanillu ikiuiniarlutik nutaarsiassamillu nuannersumik oqaluussissutiginninniarlutik inuunertik navianartorsiortillugu. Anersaakkut ikiukkatik tunniusimaffigingaarpaat! Apustilip Paulusip allagai killitsinnartut uku maluginiariakkit: “Saamalluta akornassinni inuuvugut. Soorlu anaanap qitornani paaqqisarai taamatut asallusi kissaatigisimavarput Guutip iivangkiiliuanik tuniinnarasi aammattaaq inuunerput tunniutissallugu, nuannarisarilersimagassimi.” — 1 Thessalonikamiut 2:7, 8.

18, 19. (a) Sooq oqaluusseqataajumalluta pilliuteqarumasarpugut? (b) Asannittuliornitta allanit qanoq maluginiarneqartarnerannik assersuuteqarit.

 ¹⁸ Tamatumunnga assingusumik silarsuaq tamakkerlugu Jehovap Nalunaajaasui Guutimik ilisarisimannilerumasunik taassumunngalu kiffartorumasunik ujaasisarput. Aap, ukiuni 17-ini kingullerni nalunaaquttap-akunneri 1 milliardit sinnerlugit oqaluussinermut ajoqersuganngortitsiortornermullu atorpavut — sulilu piffissarput taakkununnga atortarparput. Nammineq piumassutsitsinnit taamaaliortarpugut, oqaluussineq piffissamik, nukinnik aningaasanillu atuinaraluartoq. Jiisusip pisimaneratut paasivarput Ataatatta qilammiusup asannittup kissaatigigaa inuit inuunermik naassaanngitsumik kinguneqartumik ilisimasaqalernissaat. (Johannesi 17:3; 1 Timotheusi 2:3, 4) Asanninneq kajumississutigalugu eqqortuliorusuttut Jehovamik uagutsitut ilisarisimannilernissaanut asannilernissaannullu ikiortarpavut.

¹⁹ Asannittuliornerput allanit maluginiarneqartarpoq. Assersuutigalugu USA-mi qatanngut arnaq pionereq asasaminnik annaasaqarsimasunut allattarpoq. Angutip allagarsiani ima akivaa: “Siullermik tupaallappunga inoqarmat ilisarisimanngisani ilungersunartorsiornerani ikiorniarlugu allaffigalugu piffissaajarumasumik. Isummiinnarpunga illit inoqatinnik Guutimillu inunnik inuunerup aqqutaatigut siulersuisumik asannittuusutit.”

20. Asannissuseqarluta ilinniartitsinissarput qanoq pingaaruteqartigaa?

²⁰ Oqartoqarsimavoq asanninneq pikkorissuserlu tamaasa atorlugit suliaqaraanni suliaq sanalluagaasartoq. Ilinniartitsigaangatta ilinniartut siuneqassusertik atorlugu Jehovamik ilisarisimannilernissaannut qamanngalu pisumik asannilernissaannut ikiornissaat anguniagarisarparput. Aap, ilumut ilinniartitsillaqqissuujumalluta Guutimik asannittuusariaqarlutalu sallusuissummik pingaartitsisariaqarlutalu inunnik asannittariaqarpugut. Asanninneq pingaartitsinerlu ineriartortikkutsigit kiffartornitsinnilu ersersikkutsigit tunisinerup nuannersua misigiinnarnagu aammali Jiisusimik ilaarsinitsinnik Jehovamillu iluarisaanitsinnik ilisimanninnerput nalerisimaassutigissavarput.

Qanoq akissavit?

• Nutaarsiassaq nuannersoq oqaluussissutigigaangatsigu sooq pingaaruteqarpa . . .

Guutimik asanninnissarput?

nutaarsiassamik nuannersumik pingaartitsinissarput?

ilinniartitatsinnik asanninnis- sarput?

[Atuaqqissaarnermi apeqqutit]

[Qupp. 23-mi assiliartaq]

Jiisusip ilinniartitseriaasiata allakkanik ilisimasut farisiiarillu ilinniartitseriaasiannit suna allaassutigaa?

[Qupp. 26-mi assiliartaq]

Ilinniartitsilluassagaanni ilisimasaqarnissaq, pikkorinnissaq, pingaarnerpaamillu asanninnissaq pisariaqarput