Jiisusi ilaaruk — nakimaassuseqarlutit oqaluussigit

‘Nakimaassuseqalersitaavugut [Sapiillivugut, NV] iivangkiiliu ilissinnut tusarliussinnaanngorlugu.’ — 1 THESSALONIKAMIUT 2:2.

1. Guutip naalagaaffianik nutaarsiassaq nuannersoq sooq taama tusarluarnartigaa?

NUTAARSIASSANIK nuannersunik tusarluni nuannertaqaaq! Nutaarsiassallu nuannernerpaartaraat Guutip naalagaaffia pillugu nutaarsiassaq nuannersoq. Nutaarsiassami nuannersumi tamatumani uppernarsaavigineqarpugut naalliuutit, nappaatit, anniaatit, aliasunneq toqulu qaangiutingajalersut. Naassaanngitsumik inuunissamik neriuutissinneqarpugut, Guutip suna siunertarineraa paasinarsisinneqarpoq, aamma paasitinneqarpugut qanoq ililluta taassumunnga qanittumik attaveqalersinnaanersugut. Isumaqarnaraluarpoq nutaarsiassaq nuannersoq Jiisusip inunnut oqaluussissutigisaa tamanna tusarlugu kikkut tamarmik nuannaassasut. Ajoraluartumilli inuit ilaasa nuannarineq ajorpaat.

2. Jiisusip suna pivaa ima oqarami: “Tikiutinngilanga eqqissinissamik nassarlunga”?

² Jiisusip ajoqersukkani ima oqarfigai: “Isumaqassanngilasi tikiuttunga nunarsuarmi eqqissisitsiartorlunga; tikiutinngilanga eqqissinissamik nassarlunga, panamilli. Tikiuppunga akerleriilersinniarlugit angut ataataalu, panik anaanaalu, ukuaq sakialu arnaq; angutillu inoqutini akerarilissavai.” (Matthæusi 10:34-36)  Inuit amerlanersaat nutaarsiassamik nuannersumik ilassinninnatik itigartitsisarput. Ilaat tamatuminnga oqaluussissutiginnittunut — qanitarigaluaraangamikkilluunniit — imminut akeranngortittarput.

3. Nutaarsiassamik nuannersumik oqaluussissutiginnikkumalluni suut pisariaqarpat?

³ Sallusuissutit Jiisusip oqaluussissutigisai uaguttaaq oqaluussissutigisarpavut, inuillu taakku tusaraangamikkit inuppassuit Jiisusip nalaani periartarnerattut periartarput. Tamanna ilimagisariaqarparput. Jiisusip ajoqersukkani ima oqarfigai: “Kiffaq naalakkaminit annerunngilaq. Uanga qinugisimaguninnga ilississaaq qinugiumaarpaasi.” (Johannesi 15:20) Nunat ilarpassuini toqqaannartumik malersugaaneq ajorpugut, soqutiginninngitsoqarporli asissuisoqarlunilu. Taamaattumik upperlutalu sapiittariaqarpugut nutaarsiassamik nuannersumik nakimaassuseqarluta oqaluussissutiginnittuarumalluta. — Atuaruk 2 Petrusi 1:5-8.

4. Sooq Paulusi oqaluussiumalluni ‘sapiittariaqarpa’?

⁴ Illit immaqa ilaannikkut oqaluusseqataasarnissat sapernartittarpat, immaqaluunniit oqaluusseriaatsit arlaat atorlugu oqaluussinissat annilaanganarivat. Taamaappat kisimiinngilatit. Apustili Paulusi oqaluussisartuuvoq sapiillunilu qunusuitsoq sallusuissummik paasinnilluarsimasoq, kisianni allaat taassuma oqaluussineq ilaannikkut ilungersornartittarpaa. Kristumiut Thessalonikamiittut ima allaffigai: “Soorlumi nalunngikkissi Filippimi erloqisinneqaqqammeraluarluta naalliutsitaaqqammeraluarlutalu Guutitsinni nakimaassuseqalersitaavugut [Guutitta ikiuineratigut sapiillivugut, NV] ilungersungaarluta iivangkiiliua ilissinnut tusarliussinnaanngorlugu.” (1 Thessalonikamiut 2:2) Filippimi oqartussaasut Paulusi Silasilu iperartortissimavaat, parnaarussimallugit kiggitsivimmiitissimallugillu. (Apustilit Suliaat 16:16-24) Paulusilli Silasillu ‘sapiillillutik’ oqaluussinertik ingerlatiinnarpaat. Uagut aamma qanoq ililluta sapiillisinnaavugut? Tamanna akissutissarsiumallugu Biibilip nalaani Guutip kiffaasa Jehova pillugu sallusuissummik suna nakimaassuseqarlutik saqqummiussisinnaannguutigineraat misissorsinnaavarput qanorlu taakku ilaarsinnaanerlugit paasiniarlugu.

Akerlilersorneqaraanni nakimaassuseqarnissaq pisariaqarpoq

5. Sooq Jehovamut kiffaasut aalajaatsut nakimaassuseqarnissaq pisariaqartittuaannarsimavaat?

⁵ Sapiinnermut nakimaannermullu tunngatillugu maligassaalluarnerpaaq soorunami tassaavoq Jiisusi Kristusi. Inuiaalli oqaluttuarisaanerata aallartinneraniilli Jehovamut kiffartortut aalajaatsut nakimaattariaqarsimapput. Sooq? Edenimi pikitsitsisoqarnerata kingorna Jehova siulittuivoq imminut kiffartortut Saatanimullu kiffartortut akornanni akerariittoqarumaartoq. (1 Mosesi 3:15) Taamatut akerariittoqarnera erseqqissippallappoq Abeli naapertuilluartoq qatanngutiminit toqutaammat. Kingusinnerusukkut Enoki, angut aalajaatsoq Ulersuaq sioqqullugu inuusoq alla, akeqqersimaarfigineqalerpoq. Taassuma siulittuutigaa Guuti illernartortaminit 10.000-ilippassuarnit iluneqarsimalluni aggerumaartoq guutiitsunut eqqartuussutini naammassiartorlugit. (Judasi 14, 15) Tusarliussaq tamanna nuannarineqanngilluinnarpoq. Inuit Enoki uumissorpaat, qularnanngitsumillu toqussimassagaluarpaat ullut taassuma inuuffii Jehovap ikilisissimanngitsuuppagit. Enoki assut nakimaassimavoq! — 1 Mosesi 5:21-24.

6. Mosesip Faraomut saaffiginnikkumalluni sooq nakimaassuseq pisariaqartippaa?

⁶ Eqqarsaatigiuk aamma Mosesip Farao, naalakkersuisoq guutit sinniisaattut isigineqaannarnani aammali guutitut, seqinermut guutigititamut Ramut ernerusutut, isigineqartoq, oqaluukkamiuk nakimaassusia. Faraop immaqa allaat imminik assililluni guutiliaq pallorfigaa, faraot allat pisarnerattut. Faraop oqaasii aalajangiisuusarput. Pissaaneqartorujussuullunilu makitallunilu uteriitsuuvoq, aamma qanoq iliornissani pillugu allanit oqarfigineqartarneq sungiusimanngilluinnarpaa. Mosesi, savanik paarsisoq qanilaartoq, angummut taassumunnga arlaleriarluni sassarpoq — qaaqquneqarsimanani tikilluaqqusaananilu. Aammattaaq Mosesip perluit qulit aseruisut nalliukkumaarnerat siulittuutigaa, aamma Faraop inussiaataasa millionillit nunamit aninissaasa akuerineqarnissaat piumasaraa! Mosesip nakimaassuseqarnissani pisariaqartippaa? Aap, pisariaqartilluinnarpaa! — 4 Mosesi 12:3; Hebræerit 11:27.

7, 8. (a) Itsaq kiffat aalajaatsut suut misilinneqaatigaat? (b) Nalunaajaasut kristumiut sioqqullugit inuusut suut pallorfiginninnermik ilumoortumik aalajangiusimannillutillu siuarsaasinnaannguutigaat?

 ⁷ Ukiut hundredellit tulliuttut ingerlaneranni pruffiitit Guutimullu kiffaasut aalajaatsut allat pallorfiginninnermik ilumoortumik sapiillutik illersuiuarput. Saatanip silarsuaani inuuneq taakkununnga imaannaanngilaq. Paulusi ima allappoq: “Ujaqqanik milloorneqartarput, pilattugaallutik, panamik toqutaallutik angalaartariaqarlutilluunniit savat savaasallu amiinnaannik atisaqarlutik, ajorsartuullutillu annikilliortitaallutillu naalliutsitaallutillu.” (Hebræerit 11:37) Guutimut kiffaasut ilumoorfiginnittut taakku qanoq ilillutik aalajaattuarsinnaasimappat? Versip tamatuma siuliini apustilip eqqaavaa Abelip, Aaperaap, Sarap allallu pinertusaarnissamut suna nakussatsissutigineraat. Ima allappoq: “Toqupput neriorsuutit suli eqquutinngitsut. Eqquunnissaat kisiat ungasianit [uppernerup isaanik] takusinnaasimavaat ilassisimallugulu.” (Hebræerit 11:13) Qularnanngitsumik aamma pruffiitit soorlu Eliap, Jeremiap kristumiullu sioqqullugit inuusut aalajaatsut allat nakimaallutik pallorfiginninnermik ilumoortumik illersuisut Jehovap neriorsuutaasa eqquukkumaarnerannik eqqarsaatiginnittuarnertik pinertusaarnissamut iluaqutigaat. — Titusi 1:2.

⁸ Nalunaajaasut kristumiut sioqqullugit inuusut taakkua siunissaq nuanningaartoq qilanaaraat. Makititaagunik piffissap ingerlanerani naammalluinnartunngoriartuaassapput ‘nungujassusermilu inussiaataanermit aniguisitaajumaarlutik’ palasiunerup Jiisusip Kristusip palaseqataasalu 144.000-it kiffartornerata kingunerisaanik. (Romamiut 8:21) Aammattaaq Jeremiap Guutimullu kiffaasut kristumiut sioqqullugit inuusut allat Jehovap neriorsuutaa Jeremiamut oqaasiini ersertoq una sapiillissutigisinnaavaat: “‘Saassutissavaatsit artorsartissinnaanatilli, uanga najussagakkit annaatissallutillu,’ oqarpoq [Jehova].” (Jeremia 1:19) Ullumikkut Guutip siunissaq anersaakkullu uagutsinnik sernissuiumaarnini pillugit neriorsuutai eqqarsaatigigaangatsigit uaguttaaq nakussatsittarpugut. — Ussatit 2:7; atuaruk 2 Korinthimiut 4:17, 18.

Jiisusip asanninneq nakimaalluni oqaluussinissamut kajumississutigaa

9, 10. Jiisusi ukununnga qanoq sapiillisaarpa (a) upperisarsiornikkut siuttunut, (b) sakkutuunut, (c) palasiunermut, (d) Pilatusimut?

⁹ Maligassarput, Jiisusi, arlalitsigut nakimaappoq. Assersuutigalugu Jiisusi pissaanilinnit oqartussaassusilinnillu uumissorneqaraluarluni tusarliussamik Guutip inunnut tusartikkusutaanik kimikillisitsineq ajorpoq. Upperisarsiornikkut siuttut pissaaneqangaartut imminut iluartuutinnerannik ajoqersuutaannillu eqqunngitsunik qunusuilluni qulaarivoq. Angutit taakku iliuutsimikkut imminut eqqartuunneqaatississimapput, Jiisusillu isertuarnani taakku tamanna pillugu oqarfigai. Ilaanni ima oqarpoq: “Eqqanaq ilissi allakkanik ilisimasut farisiiarillu, ilumoortuusaartusi! Ilerrit kalkikkat assigaasi; taakkumi qaamikkut kusanaraluarput, ilumikkulli toqusut saarninik mingunnartunillu tamanik ulikkaarput. Taamatuttaaq ilissi inunnut qallikkut iluartutut isikkoqaraluarpusi, ilorlikkulli ilumoortuusaarniarnermik inatsisaassusermillu ulikkaarpusi.” — Matthæusi 23:27, 28.

¹⁰ Jiisusi Naatsiivimmi Getsemanemi sakkutuunit eqimattanit ujarneqarami sapiilluni sassarpoq. (Johannesi 18:3-8) Kingusinnerusukkut Killisiuisoqatigiinnut sassartinneqarpoq palasiunermillu killisiorneqarluni. Jiisusip nalunngikkaluarlugu palasiuneq imminik toqutsinissamik patsisissarsiortoq Missiarsiunini Guutimullu ernerunini sapiilluni uppernarsarpaa. Nangilluni oqarfigai ‘Ajugaqanngitsup talerpiata tungaani issiasuni qilaallu nuiaasigut aggertuni’ takussagaanni.  (Markusi 14:53, 57-65) Tamatuma kinguninngua Jiisusi qilersorneqarsimalluni Pilatusip, imminik iperagaatitsisinnaasimagaluartup, saavani nikorfavoq. Jiisusilli imminut unnerluussutaasut akinngilai. (Markusi 15:1-5) Tamakku tamaasa iliuuseriumallugit sapiingaartariaqarpoq.

11. Nakimaassuseq asanninnerlu imminnut qanoq attuumassuteqarpat?

¹¹ Pilatusimulli Jiisusi ima oqarpoq: “Taamaattumik inunngorpunga, taamaattumillu silarsuarmut pivunga sallusuissut nalunaajaassutigissallugu.” (Johannesi 18:37) Jehovap Jiisusi nutaarsiassamik nuannersumik oqaluussissutiginnittussanngortissimavaa, Jiisusillu taamaaliortarnini nuannaarutigisarpaa Ataatani qilammiusoq asagamiuk. (Lukasi 4:18, 19) Jiisusi aamma inunnik asannippoq. Nalunngilaa taakku atoruminaatsorsiortartut. Ullumikkuttaaq sapiilluta oqaluussinitsinnut pissutaasoq tassaavoq Guutimik tullitsinnillu asanninnerput. — Matthæusi 22:36-40.

Anersaaq illernartoq nakimaalluta oqaluussinissamut nakussatsissutigisarparput

12. Ajoqersukkat siulliit suna nuannaarutigisinnaavaat?

¹² Jiisusip toqunerata kingorna ajoqersukkat nuannaarnissamut pissutissaqalerput Jehova suli amerlanerusunik ajoqersuganngortitsimmat. Ullup ataasiinnaap ingerlanerani juutit juutillu upperisaannut ilanngussimasut 3000-it missaanniittut nunanit assigiinngitsorpassuarneersut piinsimik nalliuttorsiutiginnikkiartorlutik Jerusalemimiittut kuisipput! Illoqarfimmi juutiussutsimut qitiusumi tamanna oqallisigineqangaarsimassaaq! Biibilimi ima oqaluttuarineqarpoq: “Tamarluinnarmik ersinermik tikinneqarput, tupinnartuliarpassuillu nalunaaqutillu apustilitigut pipput.” — Apustilit Suliaat 2:41, 43.

13. Sooq qatanngutit nakimaassuseqarnissartik qinnutigaat, qanorlu kinguneqarpa?

¹³ Upperisarsiornikkut siuttut kamallutik Petrusi Johannesilu tigusaraat. Aqagussamut parnaarukkallarpaat peqqullugillu Jiisusi pillugu oqaloqqunagit. Apustilit marluk taakku iperagaagamik qatanngutit oqaluttuuppaat qanoq pisoqarsimaneranik, malersorneqarnertillu pillugu qinoqatigiipput ima qinullutik: “[Jehova], . . . [kiffatit] pisinnaatikkit oqaatsit siooranngivillutik [nakimanngivillutik, NV] oqaatigeqqullugu.” Tamanna qanoq kinguneqarpa? “Tamarmillu Anersaamik Illernartumik ilumioqangaalerput, Guutillu oqaasia nalunaajaatigaat siooranatik [nakimaallutik, NV].” — Apustilit Suliaat 4:24-31.

14. Anersaaq illernartoq oqaluussinermi qanoq iluaqutigisarparput?

¹⁴ Maluginiaruk Jehovap anersaava illernartoq sunniinertooq ajoqersukkat Guutip oqaasianik nakimaassuseqarlutik oqaluussissutiginninnissamut iluaqutigigaat. Sallusuissummik allanut, pingaartumik tusarliussatsinnik akerlilersuisunut, sapiilluta oqaluussissutiginnissagutta Jehovamit nakussatsinneqartariaqarpugut. Jehovap qinnuigigutsinni anersaaminik illernartumik tunisinnaallutalu tuniumaarpaatigut. Jehovap ikiuineratigut uaguttaaq akerlilersorneqarnerit suulluunniit naammagalugit atornissaannut pisariaqartumik nakimaassuseqarsinnaavugut. — Atuaruk Tussiaat 138:3, 1900. *

Ullumikkut kristumiut nakimaassuseqarlutik oqaluussisarput

15. Sallusuissut ullumikkut qanoq avissaartuussutaasarpa?

¹⁵ Ullutsinni sallusuissut suli avissaartuussutaasarpoq. Ilaat sallusuissummut ajunngitsumik periartarput, allalli Guutimik pallorfiginneriaatsitsinnik paasinninnatillu ataqqinninneq ajorput. Sulilu allat isornartorsiorlutalu mitaatigisarpaatigut, imaluunniit allaat uumissortarpaatigut, soorlu Jiisusi taama siulittuisimasoq. (Matthæusi 10:22) Ilaannikkut tusagassiuutini uagutsinnik oqaatiginerluisoqartarlunilu ajortitsiniaasoqartarpoq. (Tussiaat 109:1-3) Taamaakkaluartorli Jehovap innuttai nunarsuarmiittut nutaarsiassamik nuannersumik nakimaassuseqarlutik oqaluussissutiginnittuarput.

16. Nakimaassuserput pissutigalugu oqaluussiffigisatta isummaminnik allannguisinnaanerat misigisalikkersaarummi qanoq ersersinneqarpa?

¹⁶ Nakimaassuserput inuit tusarliussaq pillugu isummaminnik allannguissutigisinnaavaat. Qatanngut arnaq Kirgisistanimiittoq ima oqaluttuarpoq: “Ullut ilaanni oqaluussillunga angalaartillunga angutip ima oqarfigaanga: ‘Uanga Guuti upperaara, kristumiut Guutiat upperinngilara. Maanngaqqikkuit  qimminnut upatsissavakkit!’ Tunuaniippoq bulldoggerujussuaq kalunnernik qilersorsimasoq. Naalagaaffimmilli Nutaarsiassat-mik nr. 37-mik, Upperisarsiorneq eqqunngitsoq qanittukkut peerutissaaq!-mik, immikkut suliniuteqartilluta aalajangerpunga illu taanna kasuttorfigeqqinniarlugu inoqutigiinniittup allap naapinnissaa neriuutigalugu. Angutilli taassumarpiaap matu mapperpaa. Jehovamut qinupallariarlunga ima oqarpunga: ‘Aluu, ullut pingasut qaangiuttut oqaatsitit eqqaamavakka, aamma qimmit puiunngilara. Illilli illut saneqqutiinnarsinnaanngilara ilittulli Guuti ilumoortutuaq upperigakku. Guutip upperisarsioqatigiit imminik nikanarsaasut qanittukkut pillassavai. Uani tamanna pillugu paasisaqarnerusinnaavutit.’ Tupaallaatigeqisannik angutip naqitaaraq tiguaa. Taava illumut allamut ingerlaqqippunga. Minutsialuit qaangiummata angutip Naalagaaffimmik Nutaarsiassat tigummillugu arpalluni ornippaanga. Ima oqarpoq: ‘Atuareerpara. Guutip kamanneranit eqqugaaqqunanga qanoq iliussaanga?’” Angut taanna atuaqqissaaqatigineqartalerpoq, kristumiullu ataatsimiinnerinut najuuttalerpoq.

17. Qatanngutip arnap nakimaassusia qanoq ililluni arnamik qunusumik nakussatsitseqataava?

¹⁷ Nakimaassuserput aamma allat sapiillissutigisinnaavaat. Ruslandimi qatanngutip arnap bussertup ilaasoq alla atuagassiamik neqeroorfigaa. Taamaalisorlu angut issiavimminit nikueriataarpoq qatanngut arnaq atuagassiamik arsaarlugu, atuagassiarlu eqiteriarlugu natermut igillugu. Taassuma qatanngut arnaq suujunnaarsivillugu oqalorujuuppaa, adressia piumallugu nunaqarfimmilu oqaluusseqqunagu. Qatanngutip arnap Jehova ikioqqulluni qinnuigaa Jiisusillu oqaasii uku eqqarsaatigalugit: “Ersigeqinasigit timimik toqutsisut.” (Matthæusi 10:28) Eqqissisimalluni nikuippoq angullu ima oqarfigalugu: “Adressera tunniunnavianngilara, aamma nunaqarfimmi oqaluussiuarniarpunga.” Taava bussimit niuvoq. Qatanngutip arnap naluaa arnaq Biibilimik atuaqqissaaqatigisartakkani bussimi tassani ilaasoq. Arnaq taanna inunnut qunuvoq taamaattumillu kristumiut ataatsimiinnerinut najuuttarnani, qatanngutittali arnap nakimaassusia takugamiuk aalajangerpoq ataatsimiigiartalerniarluni.

18. Jiisusip pisimaneratut nakimaassuseqarlutit oqaluussinissamut suna iluaqutigisinnaaviuk?

¹⁸ Silarsuarmi matumani Guutimit avissaarsimasumi Jiisusip oqaluussisimaneratut oqaluussiumalluni nakimaassuseqarnissaq pisariaqarpoq. Taamaaliornissannut suna iluaqutigisinnaaviuk? Siunissaq eqqarsaatigiuk. Guutimik tullinnillu asanningaartuarit. Jehova qinnuigiuk sapiissuseqalerseqqullutit. Aamma eqqaamajuaruk kisimiinngisaannartutit Jiisusip najormatit. (Matthæusi 28:20) Anersaaq illernartoq nakussatsissutigissavat. Aamma Jehovap pilluaqqujumaarlutillu napatikkumaarpaatit. Taamaattumik nakimanata ima oqarsinnaavugut: “[Jehova] ikiortigaara, sioorassanngilanga, inuup qanoq iliorfigisinnaagaminga?” — Hebræerit 13:6. (w09 07/15-E)

[Quppernerup ataani ilanngussaq]

Qanoq akissavit?

• Sooq Guutip kiffaasa nakimaassuseq pisariaqartippaat?

• Uku nakimaassuseq pillugu sumik ilinniarfigisinnaavavut?

Nalunaajaasut aalajaatsut Kristusi sioqqullugu inuusut

Jiisusi Kristusi

Kristumiut siulliit

Ullumikkut uppeqativut

[Atuaqqissaarnermi apeqqutit]

[Qupp. 29-mi assiliartaq]

Jiisusi upperisarsiornikkut siuttunik qunusuilluni qulaarivoq

[Qupp. 31-mi assiliartaq]

Jehovap oqaluussinissamut sapiissuseqalersittarpaatigut