Taassuma eqqortoq nuannaraa
Guutimut palligunniarit
Taassuma eqqortoq nuannaraa
NAAPERTUILLUANNGITSUMIK imaluunniit naakkittaatsumik pineqarnikuuit, immaqalu taamaaliortoq pillarneqarpasinnani, iliuutsinilu peqqissimissutiginagu? Naapertuilluanngitsuliornerit ingasattut akueriuminaannerpaasarput, ingammik neriuutigigukku naapertuilluanngitsuliortup ilinnik asannittuunissaa ilinnillu isumassuisuunissaa. Immaqa ima eqqarsarputit: ‘Sooq Guutip taamatut pisoqarnera akueraa?’ * Ilumoortoq unaavoq Jehovap Guutip naapertuilluannginnerit tamaasa uumigigai. Taassuma oqaasiani, Biibilimi, neriorsorneqarpugut peqqissimissutiginagu ajortuliortartut Guutimit pillarneqassasut. Hebræerinut allakkani 10:26-31-mi apustilip Paulusip oqaasii misissoriartigit.
Paulusi ima allappoq: “[Sallusuissut] ilisimalereeraluarlugu piaaraluta ajortuliorutta taava pilliutissaqarunnaassaaq ajortit pillugit.” (Versi 26) Piaaralutik ajortuliortartut assuarnarnerpaapput. Sooq? Siullermik, taakku sanngiilliorallarnertik pissutigalugu ajortuliunnginnamik — naammalluinnanngitsuunerput pissutigalugu ilaanneeriarluta tamatta kukkusarpugut. Taakku ajortuliortarneq ileqquliuppaat. Aappassaanik, “piaaralutik” ajortuliorput. Uummataanni ajortoq sorlanissimaqaaq. Pingajussaanik, ilisimaatsuussusiat ajortuliornerannut pissutaanngilaq. Taakkua ‘sallusuissut ilisimalereerpaat’ nalunngilaallu Guuti sumik piumasaqartoq.
Guutip soqutigittaatsut ajortumik siunertaqarlutik ajortuliortut qanoq isigai? Paulusi ima allappoq: “Pilliutissaqarunnaassaaq ajortit pillugit.” Kristusip pilliutaa — Guutip inuiannut tunissutaa — naammalluinnanngissuserput pissutigalugu ajortuliatsinnik tamanik matoorivoq. (1 Johannesi 2:1, 2) Peqqissiminatilli ajortuliortartut takutippaat tunissummik tamatuminnga naleqangaartumik pingaartitsinatik. Taakkua Guutip isaani ernera ‘tullaaraat’ Jiisusillu aava ‘nalinginnaralugu’. (Versi 29) Iliuutsimikkut takutippaat Jiisusi suusupagalugu aavalu inuup naammalluinnanngitsup kialuunniit aavanit naleqarnerusutut isiginagu. Kristusip pilliutaa inunnut qujasuitsunut taakkununnga iluaqutaasinnaanngilaq.
Ajortut suna ilimagisinnaavaat? Naapertuilluarnerup Guutia ima neriorsuivoq: “Akiniut uanga pigaara, uangalu akiliiumaarpunga.” (Versi 30) Allanik ajoqusiillutik ajortuliortut tamarmik mianersortariaqarput. Guutip inatsisai naapertuilluartut kimilluunniit pillarneqarani unioqqutinneqarsinnaanngillat. Amerlanertigummi iliuuserisimasamik ajortut kinguneri atortarpaat. (Galatiamiut 6:7) Taakku ajortuliamik kinguneri maannakkut misiginngikkaluarlugit ungasinngitsukkut Guutimit pillarneqarumaarput taassuma ajussuseq nunamit piiagaatippagu. (Ussatit 2:21, 22) Paulusi ima mianersoqqusivoq: “Guutip uumasup assaanut tigusaritinnissaq amiilaarnaqaaq.” — Versi 31.
Tamanna tuppallernarlunilu eqqissiallannarpoq, ingammik pinerluttunit soqutigittaatsunit kanngunarsagaasimasunut, nalunagu Jehova Guuti piaaraluni ajortuliornernik isiginngitsuusaarinngitsoq. Tatiginnilluta akiniaaneq tamaat Guutimut naapertuilluannginnermik uumiginnittumut isumagisassanngortissinnaavarput. (wp08 11/01-E)
[Quppernerup ataani ilanngussaq]
^ imm. 1 Atuakkami Jehovap Nalunaajaasuisa saqqummersitaanni Biibilimi sorpiaat ajoqersuutigineqarpat?-imi quppernerni 106-114-imi paasisaqarnerusinnaavutit.