Biibilimik paasinnittoqarsinnaava?

“Uagut ilaqutariiulluta Biibili sapaatit tamaasa atuartarnikuuarput. Imatorsuaq nuannarinngilara. Upperaara Biibili Guutip oqaaserigaa, taassumali annersaa paasiuminaatsorujussuuvoq.” — Steven, Tuluit Nunaanneersoq.

“17-inik ukioqarlunga Biibili atuarniarsarilerpara. Paasiuminaatsippallaarakkuli unitsiinnarpara.” — Valvanera, Spaniameersoq.

“Biibili atuartarnikuuara isumaqarama katuuliusutut atuartariaqarlugu. Ukiut pingasorsuit aatsaat qaangiummata naavara! Atuakkamali ilaannamininngui paasivakka.” — Jo-Anne, Australiameersoq.

BIIBILI suli silarsuarmi pigiumaneqarnerpaavoq. Suli tunineqarnerpaavoq, inuillu amerlanersaannit atuarneqarsinnaavoq, aamma aatsaat taama oqaatsit amerlatigisut atorlugit atuarneqarsinnaavoq aatsaallu taama periaatsit assigiinngitsigisut atorlugit saqqummersinneqartarpoq, soorlu internettikkut CD-nngorlugulu. Inuppassuilli Biibilillit isumaqarput paasiuminaatsuusoq. Aamma illit paasiuminaatsittarpiuk?

Atuakkiortuata oqaatsiminik paasinninnissarput kissaatigaa?

Biibilimi ima allassimavoq: “Allakkat Illernartut tamarmik Guutimit isumassarsiarititaapput.” (2 Timotheusi 3:16, NV) Aap, Jehova Guuti Biibilimik atuakkiortuuvoq. Taassuma oqaatsiminik paasinninnissarput kissaatigaa? Imaluunniit Biibilip kikkunnut tamanut paasiuminaalluinnarnissaa — ikittuinnarnullu, soorlu palasinut Biibilimillu ilisimatuunut paasiuminarnissaa — piaaraluni isumagisimavaa?

Eqqarsaatigiuk versini Biibilimiittuni tulliuttuni qanoq allassimasoqarnersoq:

“[Ullumi] ilinnut peqqussutigisakka paasiuminaatsorsuunngillat ungasissorsuunatilluunniit.” — 5 Mosesi 30:11.

“Oqaatsitit nassuiarneqarunik qaammaqqutaassapput misilittagakitsumillu siuneqalersitsissallutik.” — Tussiaat 119:130.

“Taamaalinerani Jiisusi Anersaamit Illernartumit sunnigaalluni qiimmattarpoq oqarlunilu: ‘Unnersiutigaakkit Ataataq qilaap nunallu Naalagaat, ilisimasunut sianisuunullu tamanna isertorakku saqqummersilluguli meerannguanut.’” — Lukasi 10:21.

Biibilimik atuakkiortup illit oqaatsiminik paasinninnissat ilumut kissaatigaa! Taamaakkaluartorli inuit eqqortuliorusuttorpassuit tamanna ajornakusoortittarpaat. Allaaserisani tulliuttuni siunnersuuteqarpoq pingasunik Biibilimik paasinninnissannut iluaqutigisinnaasannik.