Nunarsuarmi inuuneq naassaanngitsoq — Guutip neriuutissiissutaa

“[Pinngortitat] naalatsigititaapput piunngitsuussusermut . . . neriullutillu.” — ROMAMIUT 8:20.

1, 2. (a) Sooq naassaanngitsumik inuunissamik neriuut uagutsinnut pingaaruteqarpa? (b) Sooq inuppassuit nunarsuarmi naassaanngitsumik inuusinnaanermik eqqarsaat apeqqusertarpaat?

IMMAQA eqqaamavat illit nuannaarnerit paaseqqaarakku inuit qanittukkut utoqqalisarunnaarlutillu toqusarunnaarumaartut nunarsuarmilu naassaanngitsumik inuulerumaartut. (Johannesi 17:3; Saqqummersitat 21:3, 4) Qularnanngitsumik aamma neriuummik Biibilimeersumik tamatuminnga allanut oqaluttuartarneq nuannaraat. Naassaanngitsumimmi inuunissamik neriuut nutaarsiassamut nuannersumut oqaluussissutigisatsinnut ilaavoq pingaarutilik. Inuunermut isiginnittaatsitsinnut sunniuteqarpoq.

² Kristumiuunerartut oqaluffiisa amerlanersaanni nunarsuarmi naassaanngitsumik inuuneq eqqartorneqarneq ajorpoq. Biibilimi allassimagaluartoq inuuneq inuk toqugaangat kipisartoq, oqaluffiit amerlanersaanni inuup toqujuitsumik, inuup toqunerata kingorna anersaat silarsuaanni inuuinnartartumik, tarneqarneranik ajoqersuut Biibilimut naapertuutinngitsoq ajoqersuutigineqartarpoq. (Oqaluussisartup oqaasii 9:5) Tamanna pissutigalugu inuppassuit nunarsuarmi naassaanngitsumik inuusinnaanermik eqqarsaat apeqqusertarpaat. Taamaattumik ima aperisinnaavugut: Neriuut tamanna Biibilimi ilumut taperserneqarpa? Taamaappat Guutip neriuut tamanna inunnut qanga paasinarsisippaa?

‘Naalatsigititaapput piunngitsuussusermut neriullutillu’

3. Guutip inunnut siunertani inuiaat oqaluttuarisaanerata aallartinneraniilli qanoq ililluni paasinarsisippaa?

³ Inuiaat oqaluttuarisaanerata aallartinneraniilli Jehovap inunnut suna siunertarineraa paasinarsisinneqarpoq. Adami erseqqissumik paasitippaa naalattuaruni naassaanngitsumik inuujumaartoq. (1 Mosesi 2:9, 17; 3:22) Adamip kinguaavi siulliit qularnanngitsumik inuit qanoq ilillutik naammalluinnartuujunnaarsimanerat takussaasunik uppernarsaatissalik pillugu paasitinneqarput. Naatsiivimmut Edenimut isertarfik asserneqarpoq, inuillu utoqqalillutillu toqupput. (1 Mosesi 3:23, 24) Piffissap ingerlanerani ukiut inuit inuuffii ikiliartorput. Adami ukiuni 930-ni inuuvoq. Semi, Ulersuarmit aniguisoq, ukiuni 600-innarni inuuvoq, erneralu Arpakshadid ukiuni 438-ni. Aaperaap ataataa, Tera, ukiuni 205-ini inuuvoq. Aaperaap ukiut 175-it inuuffigai, ernera Iisaaq ukiuni 180-ini inuuvoq Jaakulu ukiuni 147-ni. (1 Mosesi 5:5; 11:10-13, 32; 25:7; 35:28; 47:28) Inuppassuit paasilersimavaat tamatuma qanoq paasisariaqarnera — tassa naassaanngitsumik inuusinnaajunnaarsimallutik! Taakku inuunermik naassaanngitsumik neriuuteqaqqilernissaminnut pissutissaqarpat?

4. Itsaq angutit uppertut sooq upperisinnaavaat Guuti Adamip annaasimasaanik pilersitseqqikkumaartoq?

⁴ Guutip oqaasiani ima allassimasoqarpoq: ‘Pinngortitat [inuit] naalatsigititaapput piunngitsuussusermut neriullutillu.’ (Romamiut 8:20) Sunaana neriuutigineqartoq? Biibilimi siulittuutit siullersaanni ‘kinguaassaq’ ‘pulateriaarsuup niaquanik aserorterisussaq’ uparuarneqarpoq. (Atuakkit 1 Mosesi 3:1-5, 15). * Uppertut Guutip inunnut siunertaminik isumakkeeriniannginnini pillugu ‘kinguaassamik’ tamatuminnga neriorsuutaa pissutigalugu neriuuteqarput. Tamanna  angutit, soorlu Abelip Noallu, Guutip Adamip annaasimasaanik pilersitseqqinnissaata upperinissaanut pissutissaqalissutigaat. Immaqa paasisimavaat ‘kinguaassap kimmiata aserorterneqarumaarnera’ pillugu siulittuut isumaqartoq aammik kuisisoqarumaartoq. — 1 Mosesi 4:4; 8:20; Hebræerit 11:4.

5. Sumit erserpa Aaperaap makititsisoqarumaarnera upperigaa?

⁵ Aamma Aaperaat eqqarsaatigeriaruk. Misilinneqarami “Iisaaq [ernituani] pilliutissatut sassaappaa”. (Hebræerit 11:17) Sooq taamaaliornissamut piumassuseqarpa? (Atuaruk Hebræerit 11:19). Makititsisoqarnissaa upperaa! Aaperaat makititsisoqarnissaanik upperinninnissamut tunngavissaqarpoq. Jehovammi Aaperaat kinguaassiorsinnaanngorteqqippaa taanna nulialu, Sara, utoqqaagaluartut ernertaarsinnaanngortillugit. (1 Mosesi 18:10-14; 21:1-3; Romamiut 4:19-21) Aaperaat aamma Jehovamit neriorsorneqarsimavoq. Jehovap ima oqarfigaa: “Iisaamuna kinguaavi illit kinguaannik taaneqartassasut.” (1 Mosesi 21:12) Taamaattumik Aaperaat Guutip Iisaamik makititsinissaata naatsorsuutiginissaanut pissutissaqarluarpoq.

6, 7. (a) Jehovap Aaperaat suna pillugu angerfigeqatigaa? (b) Jehovap Aaperaamut neriorsuutaa inunnut tamanut sumik neriuutissiiva?

⁶ Aaperaap uppernera maluginiarnartoq pissutigalugu Jehovap taanna taassuma ‘kinguaassaa’ pillugu angerfigeqatigaa. (Atuaruk 1 Mosesi 22:18). Paasinarsivoq kinguaassap tamatuma pingaarnerusortaa tassaasoq Jiisusi Kristusi. (Galatiamiut 3:16) Jehovap aamma Aaperaat oqarfigisimavaa taassuma ‘kinguaassai’ “qilaap ulloriaasut sioqqatullu sissamiittutut” amerlatigilerumaartut — qanoq amerlatigiumaarnersut Aaperaap naluaa. (1 Mosesi 22:17) Kingusinnerusukkulli Aaperaap kinguaassaata amerlassusiat paasinarsisinneqarpoq. Jiisusi Kristusi 144.000-illu naalagaaffimmi naalakkersueqatissai tassaapput ‘kinguaassaq’. (Galatiamiut 3:29; Saqqummersitat 7:4; 14:1) Naalagaaffik Missiarsikkoortoq atorlugu “inuiaat tamarmik pilluaqqunarsissapput”.

⁷ Aaperaap Jehovap imminut angerfigeqatiginnissutigisaata isumaa tamakkiisumik paasisimanavianngilaa. Taamaakkaluartorli “[utaqqivaa] illoqarfik aalajaatsunik toqqavilik”, soorlu Biibilimi taama allassimasoq. (Hebræerit 11:10) Illoqarfik taanna tassaavoq Guutip naalagaaffia. Naalagaaffimmi tamatumani pilluaqqussutit misigiumallugit Aaperaat uummaqqittariaqarpoq. Makititaanermigut nunarsuarmi naassaanngitsumik inuusinnaassaaq. Toqusunit makititaasut allat Harmagedonimilu aniguisut aamma naassaanngitsumik inuusinnaassapput. — Saqqummersitat 7:9, 14; 20:12-14.

“Anersaap ilunniittup kaammattorpaanga”

8, 9. Sooq Jobimik allakkat inuup ataasiinnaap misilinneqarneranik oqaluttuaannaanngillat?

⁸ Aaperaap ernutaqqiutaata Josefip toqunerata kingorna Mosesillu pruffiitinngunnginnerani inuusimavoq angut Jobimik atilik. Jobimik allakkani Biibilimiittuni Mosesimit allagaagunartuni oqaluttuarineqarpoq Jobip naalliunnera sooq Jehovap akuerineraa aamma taanna naggataatigut qanoq innersoq. Jobimilli allakkat inuup ataatsip misilinneqarneranik oqaluttuaannaanngillat; akerleriissut pingaarutilik inunnut pinngortitanullu anersaanut tamanut tunngavoq. Allakkani paasitinneqarpugut Jehova naapertuilluartumik kisimi oqartussaalluni naalakkersuisoq, aamma paasinarsisinneqarpoq Guutip kiffaasa nunamiusut tamarmik assuarnaassusiat naassaanngitsumillu inuulernissamik neriuutaat akerleriissummut Naatsivimmi Edenimi pilersinneqartumut akuliunneqarsimasut. Jobip akerleriissut tamanna paasinngikkaluarlugu ikinngutimi pingasut assuarnaattuarsimannginnerminik nassuertitsiniaanerannut Jobi nakkaannanngisaannarpoq. (Jobi 27:5, 1900) Tamanna uppernitsinnut tunngavilersuutaasussaavoq uaguttaarlu assuarnaattuarsinnaanitsinnik Jehovallu kisimi oqartussaassusianik tapersersuisinnaanitsinnik paasinninnissamut iluaqutaasussaalluni.

⁹ Jobimik tuppallersaaniaraluartut pingasut oqalukkunnaareermata “Elihu Barak’elip Buzimiup ernera” oqalulerpoq. Suna oqalunnissaminut kajumississutigaa? Ima oqarpoq: “[Oqaasissanik] ulikkaarpunga, anersaap ilunniittup kaammattorpaanga.” (Jobi 32:5, 6, 18) Elihup isumassarsisitaalluni oqaasii Jobip naalliuutai qaangiummata eqquukkaluartut aamma allanut pingaaruteqarput. Assuarnaattuartunut tamanut neriuutissaqartitsipput.

10. Assersuuteqarlutit ersersiguk inummut ataatsimut tusarliussaq Guutimeersoq ilaannikkut inuiannut tamanut tunngasartoq.

 ¹⁰ Jehova ilaannikkut inunnut ataasiakkaanut tusarliussaqartarpoq aamma inuiannut tamanut atuuttunik. Assersuutigalugu tamanna erserpoq pruffiitip Danielip, Babylonimi kunngip Nebukadnesarip orperujussuaq pillugu sinnatuanik nassuiaagami, siulittuutaanut tunngatillugu. (Danieli 4:7-24) Sinnattoq Nebukadnesarimut namminermut eqquutitinneqaraluartoq pingaaruteqarnerungaartunut tikkuussivoq. Tassani erserpoq Guutip nunarsuarmut kisimi oqartussaassusia naalagaaffik kunngimit Daavimut kinguaajusumit naalakkersuisuuffigineqartoq aqqutigalugu atuutilerseqqinneqaqqikkumaartoq, tamannalu piumaartoq ukiumit 607-imiit Kr.in.si. ukiut 2520-t qaangiutereerpata. * Guutip nunarsuatsinnut kisimi oqartussaassusia atuuteqqilerpoq Jiisusi Kristusi 1914-imi kunnginngortinneqarmat. Tassa Guutip naalagaaffia inuit naalattut neriuutaannik qanittukkut piviusunngortitsiumaarpoq!

“Ilivermut aqqarnissaa pinngitsoortiguk!”

11. Guuti pillugu Elihup oqaasiini sumik paasisaqarpugut?

¹¹ Elihup Jobimut akissutimini eqqartorpaa ‘inngili [aallartitaq, NV] inuup qanoq iliornissaanik ajoqersuilluni illersuisoq’. Inuk Guutimit iluarisaalerumaarpoq: “‘Ilivermut aqqarnissaa pinngitsoortiguk utertitaanissaanut akiliutissanik uanga pissarsissukkakku!’ taava timaa inuusukkallarneranisut nukittorumaarpoq inuusunnermi ulluinisut ileqqilluni.” (Jobi 33:23-26) Taamatut Guutip peqqissimillutillu saattut ‘ajunngitsuliorfigissavai’ taakkua ‘utertitaanissaannut akiliutissamik’ kajumilluni akuersinermigut. — Jobi 33:24, 26.

12. Elihup oqaasii inunnik sumik neriuutissiippat?

¹² Soorlu pruffiitit allakkatik tamakkiisumik paasinngikkaat ilimanarpoq aamma Elihup utertitsissut pillugu oqaatsini tamakkiisumik paasisimassanngikkai. (Danieli 12:8; 1 Petrusi 1:10-12) Taamaakkaluartorli Elihup oqaasiini Guutip ullut ilaanni utertitsissumik akuerinnikkumaarneranik inunnillu utoqqalinerup kingunerinit toqumillu aniguisitsiumaarneranik neriuut ersersinneqarpoq. Elihup oqaasii naassaanngitsumik inuunissamik nuanningaartumik neriuutissiipput. Jobimik allakkani aamma ersersinneqarpoq makititaasoqarumaartoq. — Jobi 14:14, 15, NV.

13. Elihup oqaasii ullumikkut kristumiunut qanoq pingaaruteqarpat?

¹³ Ullumikkut Elihup oqaasii kristumiunut millionilinnut pissutsit aaqqissuussaanerata maanna atuuttup piuneerunneqarneranit aniguinissamik neriuuteqartunut suli pingaaruteqarput.  Aniguisut utoqqalisimasut inuusukkallarnermissut nukittorumaarput. (Saqqummersitat 7:9, 10, 14-17) Aammattaaq makititaasimasut inuususseqqittut takunissaannik neriuut inunnut aalajaatsunut suli nuannaarutaavoq. Kisianni soorunami Kristusip utertitsissutitut pilliutaanik upperinninneq tanitat qilammi toqujuissuseqalernissaannut Jiisusillu ‘savaataasa allat’ nunarsuarmi naassaanngitsumik inuulernissaannut aalajangiisuuvoq. — Johannesi 10:16; Romamiut 6:23.

Toqu nungutinneqassaaq piujunnaarsivillugu

14. Sumit erserpa Israelikkut inuunermik naassaanngitsumik neriuuteqalersinnaanissaannut Mosesip inatsisai naammanngitsut?

¹⁴ Aaperaap kinguaavi inuiaqatigiittut namminersortunngorput Inatsisit Mosesi aqqutigalugu tunniunneqartut iluaqutigalugit angeruseq tunngavigalugu Guutimut attaveqaleramik. Inatsisit taakkununnga tunniukkamigit Jehova ima oqarpoq: “Inatsisikka malittarisassiakkalu maleruassavasi. Maleruaasoq taakkunuunatigut inuussaaq.” (3 Mosesi 18:5) Inatsisinili najoqqutassianik naammalluinnartunik eqqortitsisinnaannginnamik Inatsisinit pillagassaatinneqarput pillagassaatinneqarnerminnillu utertitaallutik akiliunneqartariaqarlutik. — Galatiamiut 3:13.

15. Siunissami pilluaqqussutissap suup allannissaanut Daavi isumassarsisitaava?

¹⁵ Mosesip kingornatigut Jehovap Biibilimik allattut allat inuunermik naassaanngitsumik neriuummik eqqaasaqarnissaannut isumassarsisippai. (Tussiaat 21:5; 37:29) Assersuutigalugu tussiaasiortup Daavip pallorfiginnittut ilumoortut Zionip qaqqaani ataasiussusiat pillugu tussiaat ima naggaserpaa: “Tassanimi [Jehovap] tunniuppaa pilluaqqussut, inuussutissaq soraajuitsoq.” — Tussiaat 133:3.

16. Jehovap Esaja aqqutigalugu ‘nunarsuup tamarmi’ siunissaanut tunngatillugu suna neriorsuutigaa?

¹⁶ Jehovap Esaja nunarsuarmi naassaanngitsumik inuuneq pillugu siulittuinissaanut isumassarsisippaa. (Atuakkit Esaja 25:7, 8). Ajorti toqulu ‘ulittut’ oqimaattutut ipianngunartutullu inunnut nanertuutaasimapput. Jehovap innuttani neriorsoqqissaarpai toqu ajortilu piujunnaavikkumaartut ‘nunarsuarmi tamarmi’.

17. Assersuummi siulittuutaasumi sumi erserpa Missiarsi inuunermut naassaanngitsumut aqqutissiuussiumaartoq?

¹⁷ Aamma Mosesip inatsisai naapertorlugit savaasamut angutivissamut Azazelimut pigititaasumut pisussat innersuussutigisinnaavavut. Palasiunerup ukiumut ataasiarluni, ullormi saammaannartitsivimmi, ‘assani illuttut savaasap angutivissap  niaquanut tutsittartussaavai, qulangerlugulu Israelikkut iluaatsuliorneri anngiiaatigisartussaavai; savaasallu niaquanut ilisassavai inoqajuitsumullu aallartissallugu’. (3 Mosesi 16:7-10, 21, 22) Pruffiiti Esaja naapertorlugu taamatuttaaq Missiarsip “nappaativut” “anniaativullu” imminut pisillugit ‘amerlasuullu ajortuliaat’ ersullugit aallarutissavai taamaalillunilu inuunermut naassaanngitsumut aqqutissiuussilluni. — Atuakkit Esaja 53:4-6, 12.

18, 19. Neriuut suna Esaja 26:19-imi aamma Danieli 12:13-imi erseqqissarneqarpa?

¹⁸ Jehovap innuttani, Israelikkut, Esaja aqqutigalugu ima oqarfigai: “Toqusortatit uummassapput, timaat makissapput; issumi sinippaartusi itissaasi qiimmattassallusilu. Isugutanerimmi qaamarngup isugutaneraa, nunallu toqungasut inuunermut utertissavai.” (Esaja 26:19) Nunarsuarmi inuunermut makititaanissamik neriuut Allakkani Hebræerisuuni erseqqippoq. Pruffiiti Danieli 100-ngajannik ukioqartoq Jehovap ima neriorsoqqissaarpaa: “Nallarlutit qasuersaarniarit. Makikkumaarputit ullut naggatissaanni pissarsiassat pissarsiarissallugu!” — Danieli 12:13.

¹⁹ Makititaanissamik neriuut tamanna pissutigalugu Martha qatanngutini toqusimasoq pillugu Jiisusimut ima oqarsinnaavoq: “[Nalunngilara] ullut naggatissaanni toqusut makiffissaanni makikkumaartoq.” (Johannesi 11:24) Jiisusip ajoqersuutaa taassumalu ajoqersugaasa allagaat neriuummik tamatuminnga allannguippat? Nunarsuarmi inuuneq naassaanngitsoq Jehovap inunnut suli neriuutissiissutigaa? Allaaserisami tulliuttumi apeqqutit taakku akissutissarsissavavut.

[Quppernerup ataani ilanngussaq]

Uku nassuiarsinnaavigit?

• Neriuut suna tunngavigalugu pinngortitat inuit ‘piunngitsuussusermut naalatsigititaappat’?

• Sumit erserpa Aaperaap makititaanissaq upperigaa?

• Elihup oqaasii inunnut sumik neriuutissiippat?

• Allakkani Hebræerisuuni qanoq ersersinneqarpa nunarsuarmi naassaanngitsumik inuunermut makititaanissamik neriuuteqartoq?

[Atuaqqissaarnermi apeqqutit]

[Qupp. 13-mi assiliartaq]

Elihup Jobimut oqaasii inuit utoqqalinermit toqumillu aniguisitaanissaannik neriuutissiipput

[Qupp. 14-mi assiliartaq]

Danieli neriorsoqqissaarneqarpoq ‘makikkumaartoq ullut naggatissaanni pissarsiassani pissarsiarissallugu’