Jehovap illit aniguisinniarlutit iliuuserisimasai qujamasuutigaagit?

“Unnersiutigineqarli [Jehova], Israelip Guutia, innuttani tikeraarmagit aniguisillugillu.” — LUKASI 1:68.

1, 2. Pissutsit maanna atukkatta ilungersunassusiat qanoq assersuusiarineqarsinnaava, apeqqutillu suut sammissavavut?

TAKORLOORIARUK napparsimmavimmi immikkoortortami aalajangersimasumi uninngallutit. Tassani uninngasut tamarmik nappaateqarput toqussutaasussamik qanoq katsorsarneqarsinnaaneranik naluneqartumik. Tusarpat nakorsaqartoq katsorsaariaatsimik nassaarniarluni iliuuseqartumik. Tamanna neriuuteqalissutigaat, nakorsallu paasisimasai pillugit tusagaqarnissat pissanngatigaat. Ullut ilaanni paasivat katsorsaariaatsimik nassaartoqarsimasoq! Nakorsaq taanna katsorsaariaatsimik nassaartoq katsorsaariaatsimik ineriartortitsiniarluni pilliuteqarujussuartariaqarsimavoq. Tamatuminnga paasinninnerit qanoq periarfigissagaluarpiuk? Qularnanngitsumik angut ilinnik allanillu annaanneqarsinnaanngortitsisoq taanna ataqqingaarlugulu qujamasuffigingaassavat.

² Tamanna pisimasuittut eqqarsaatigissallugu immaqa ilallattajaarpaluppoq, ilumoortumilli pissutsit atukkavut taamaapput. Tamatta pissutsit qulaani allaaserineqartunit ilungersunarnerusut atugaraavut. Annaanneqarnissarput pisariaqartivipparput. (Atuaruk Romamiut 7:24). Jehova uagutsinnik aniguisitsiniarluni iliuuseqangaarsimavoq. Aamma ernera annertuumik pilliuteqarsimavoq.  Tamatumunnga tunngatillugu apeqqutit tunngaviusut sisamat sammeriartigit. Sooq aniguisinneqarnissarput pisariaqartipparput? Jiisusi uagut aniguisinniarluta qanoq iliortariaqarsimava? Jehova susariaqarsimava? Aamma Jehovap aniguisinniarluta iliuuserisimasaanik qujamasuutiginninnerput qanoq ersersissinnaavarput?

Aniguisinneqarnissarput sooq pisariaqartikkipput

3. Ajorti nappaalanersuarmut qanoq sanilliunneqarsinnaava?

³ Qanittukkut naliliinerit naapertorlugit nappaalanersuit oqaluttuarisaanermi ajornersaat tassaavoq Spaniamiut nappaataat 1918-imi 1919-imilu nappaatigineqartoq. Taanna inuit millionillit toqqutigaat. Allanik nappaateqarpoq toqussutaanerusinnaasutut immaqa oqaatigineqarsinnaasunik. Immaqa inunnit amerlavallaanngitsunit nappaatigineqalertarput, taakkuali amerlanerpaartaat toqusarput. * Ajortimi nappaalanersuarmut sanilliukkutsigu? Romamiut 5:12-imi ima allassimavoq: “Inukkut ataasiinnakkut ajorti silarsuarmut [tikiuppoq] ajortikkullu toqu tikiulluni, taamatut toqu inunnut tamanut annguppoq tamarmik ajortuliormata.” Tassa inuit tamarmik ajorteqarput. Tamatta ajortuliunngitsoorsinnaanngilagut. (Atuaruk Romamiut 3:23). Inuit qanoq amerlatigisut ajorti toqqutigisarpaat? Paulusi allappoq ajorti “inunnut tamanut” annguttoq.

4. Jehovap inuup inuunerata maanna sivisussuserisartagaa qanoq isigaa, taassumalu isiginnittaasia inuppassuit ullumikkut isiginnittaaserisaannit qanoq allaanerua?

⁴ Ullumikkut ajorti toqulu inuppassuarnit taamatut isigineqanngilaq. Taakkua ‘toqujaarpallaarnertut’ taasagartik isumakuluutigisarpaat, toquli utoqqaliartortilluta qanilliartortartoq pissusissamisoornerartarpaat. Pinngortitsisup isiginnittaasianik puiuinissaq inunnut ajornanngeqaaq. Inuunitta maanna sivisussuserisartagaa taassuma siunertarisaraluanut sanilliullugu suunngilaq. Jehovap isiginnittaasianit isigalugu inoqarsimanngisaannarpoq ‘ullormi ataasiinnarmiluunniit’ inuusimasumik. (2 Petrusi 3:8) Guutip oqaasiani allassimavoq inuunerput ivikkatut toquliujasutut imaluunniit “suiallannerinnartut” qaangiutiatigisoq. (Tussiaat 39:6; 1 Petrusi 1:24) Taamatut isiginnittaaseqarnissarput pingaaruteqarpoq. Sooq? “Nappaat” atugarput qanoq ilungersunartigisoq navianartigisorlu paasigutsigu “ajorunnaarsinneqarnerup” — aniguisinneqarnissatta — pingaaruteqassusianik paasinnissinnaanerullutalu qujamasuutiginninnerusinnaavugut.

5. Ajorteqarnerput pissutigalugu suna pigisimanngisaannarparput?

⁵ Ajortip tamatumalu sunniutaata qanoq ilungersunartiginerannik paasinnikkumalluta taakkua uagutsinnut qanoq sunniuteqarsimanerat paasiniarsarisariaqarparput. Immaqa aallaqqaammut paasiuminaassinnaavoq ajorteqarnerput pissutigalugu siuaasatta siulliit pigisimasaat pigisimanngisaannaratsigu. Adamip Evallu pileqqaarneranni inuttut naammalluinnartutut inuuneq nuannaarutigisinnaavaat. Naammalluinnartunik isumaqarlutillu timeqaramik eqqarsaatitik, misigissutsitik iliuutsitillu tamakkiisumik aqunniarlugit aalajangersinnaapput. Jehovamut kiffaasutut ineriartornissamut kiffaanngissuseqarput, periarfissarpassuatik inunnguuserisatik tamakkiisumik atorsinnaaniassagamikkit. Tunissutisiartilli erlinnartoq tamanna maangaannartippaat. Jehovamut ajortuliorniarlutik aalajangernermikkut inuuneq Guutip imminnut kinguaaminnullu siunertarisaa annaavaat. (1 Mosesi 3:16-19) Aammattaaq “nappaat” tataannartoq sammeriigarput imminerminnut uagutsinnullu atuutitilerpaat. Jehovap pissusissamisoortumik taakku assuarai. Uagulli aniguisitaanissamik neriuutissippaatigut. — Tussiaat 103:10.

Aniguisikkumalluta Jiisusi qanoq iliorsimasoq

6, 7. (a) Jehovap siullermik qanoq ersersippaa uagutsinnik aniguisitsiumalluni pilliuteqarujussuartoqartariaqartoq? (b) Abelip ataataanerpaallu Inatsisit tunniunneqarnerat sioqqullugu inuusut pilliutaat sumik ilinniarfigisinnaavavut?

⁶ Jehovap nalunngilaa Adamip Evallu kinguaavinik aniguisitsiumalluni iliuuseqangaatsiartariaqarluni. Siulittuummi 1 Mosesi 3:15-imiittumi aniguisitsinissamut pisariaqartut pillugit paasisaqarpugut. Jehovap Saatanimik suujunnaarsitsiumaartumik ‘kinguaassaqarnissaa’, annaassiniartoqarnissaa, isumagissavaa. Suujunnaarsitsiniarnerminili  annaassiniartoq naalliussaaq, assersuutaasumik kimmimmigut aserorterneqarluni. Nalunngilarput kimmikkut aserorterneqarneq anniarnassasoq sanngiillinassasorlu, siulittuulli tamanna qanoq paasisariaqarpa? Jehovap qinigaata suut naammagalugit atortariaqarpai?

⁷ Annaassiniartoq inuiannik ajortimit aniguisitsiumalluni saammaanneqaatissamik, ajortip sunniutaanik piiaanikkut inuit Guutillu saammaateqatigiissutissaannik, pissarsisariaqarpoq. Tamanna qanoq pisinnaagami? Oqaluttuarisaanermi siusissukkut erserpoq pilliuteqartoqartariaqartoq. Inuk aalajaatsoq siulleq, Abeli, Jehovamut uumasunik pilliuteqarmat Guutimit akuerisaavoq. Kingusinnerusukkut ataataanerpaat Guutimik mianerinnittut soorlu Noa, Aaperaat, Jaaku Jobilu assingusunik Jehovamut pilliuteqartarput taassuma iluarisaanik. (1 Mosesi 4:4; 8:20, 21; 22:13; 31:54; Jobi 1:5) Mosesip inatsisai tunniunneqarmata pilliuteqartarneq eqqumaffigineqarnerulerpoq.

8. Palasiuneq ukiumoortumik saammaannartitsivimmi susarpa?

⁸ Mosesip inatsisaani pilliutigeqquneqartut pingaaruteqarnerpaat ilaat tassaapput ukiumoortumik saammaannartitsivimmi pilliutigineqartartut. Ullormi tamatumani palasiuneq assersuutaasunik arlalinnik iliuuseqartarpoq. Ajortinut saammaassissutissamik Jehovamut pilliuteqartarpoq — siullermik palaseqatigiit pillugit taavalu naggueqatigiissortat palasiunngitsut pillugit. Palasiuneq toqqup naapeqatigiittarfiup imaluunniit naalaffiup ilaanut Illernarnerpaamik taaneqartartumut isertarpoq, tassungalu isersinnaavoq ukiumut ataasiaannarluni. Tassani pilliutit aavat angerutsip illerfiata saavani serpartaatigisarpaa. Illerfiup illernartup tamatuma qulaani nuissamik inngianartumik, Jehovap najuunneranut assersuutaasumik, ilaannikkut nuisoqartarpoq. — 2 Mosesi 25:22; 3 Mosesi 16:1-30.

9. (a) Ullormi saammaannartitsivimmi palasiuneq kimut assersuutaava, pilliutigisaalu sumut assersuutaappat? (b) Palasiunerup Illernarnerpaamut isertarnera sumut assersuutaava?

⁹ Apustili Paulusi iliuutsinik assersuutaasunik taakkuninnga nassuiaanissamut isumassarsisitaavoq. Nassuiaavoq palasiuneq Missiarsimut, Jiisusimut Kristusimut, assersuutaasoq, pilliutillu Kristusip pilliutitut toquneranut assersuutaasut. (Hebræerit 9:11-14) Pilliut naammalluinnartoq tamanna eqimattanik marlunnik — palaseqatigiinnik Jiisusip qatanngutaanik anersaamik taninneqarsimasunik 144.000-inik ilaasortalinnik ‘savanillu allanik’ — saammaannartitsilluinnassaaq. (Johannesi 10:16) Palasiunerup Illernarnerpaamut isertarnera Jiisusip utertitsissutitut pilliutip nalinganik Jehovamut Guutimut sassaassilluni qilammut iserneranut siumut assersuutaavoq. — Hebræerit 9:24, 25.

10. Siulittuutit Biibilimiittut naapertorlugit Missiarsip suut nalaatassarai?

¹⁰ Erseqqippoq Adamip Evallu kinguaavinik aniguisitsiumalluni pilliuteqarujussuartoqartariaqartoq. Missiarsip inuunini pilliutigisariaqarpaa! Pruffiitit Allakkanik Hebræerisuunik allaqataasut ilumoortoq tamanna takorlooruminartumik paasiuminartumillu allaatigaat. Assersuutigalugu pruffiiti Danieli allappoq ‘tanitaq’ ‘peersitaassasoq’, imaluunniit toqutaassasoq, ‘ajortuliornerit soraarsinniarlugit’. (Danieli 9:24-26) Esaja siulittuivoq Missiarsi ajattorneqarumaartoq, malersugaajumaartoq toqutaajumaartorlu, imaluunniit ikiligaajumaartoq, inuit naammalluinnanngitsut ajortaat nammanniarlugit. — Esaja 53:4, 5, 7.

11. Jehovap ernerata qanoq ililluni ersersippaa uagutsinnik aniguisitsiumalluni imminut pilliutiginissamut piumassuseqarluni?

¹¹ Guutip ernituata nunarsuarmukanngikkallaramili nalunngilaa inuiannik aniguisitsiumalluni  susariaqarnerluni. Naalliutsitaangaartussaavoq kingornalu toqutaasussaalluni. Ataatami tamanna pillugu oqaluttuummani qanoq periarpa? Tamakku pinngitsoorniarsarai pikitsitsivaluunniit? Naamerluinnaq! Ataatami peqqusineratut kajumilluni iliorpoq. (Esaja 50:4-6) Taamatuttaaq Jiisusi nunarsuarmiitilluni naalalluni Ataatami piumasaatut iliorpoq. Sooq? Apeqqut tamanna nammineq ima akivaa: ‘Ataataq asavara.’ Aamma apeqqut akivaa ima oqarluni: “Annerusumik asanninneqanngilaq ikinngutini pillugit inuunerminik akiginnittup asanninneranit.” (Johannesi 14:31; 15:13) Tassa aniguisitaanitsinnut annerusumik pissutaasoq tassaavoq Jehovap ernerata asannittuliornera. Inuttut naammalluinnartutut inuunini pilliutigisariaqaraluarlugu uagutsinnik aniguisitsisinnaajumalluni taamaaliornini nuannaarutigaa.

Aniguisikkumalluta Jehova qanoq iliorsimasoq

12. Utertitsissut kia piumasaanut ersiutaava, aamma sooq pilliut tamanna pilersippaa?

¹² Utertitsissutitut pilliuteqartoqarnissaanik tamatumalu qanoq pilliutigineqarnissaanik aalajangiisoq tassaanngilaq Jiisusi. Tassaavorli Jehova. Utertitsissutitut pilliuteqartoqarnissaa taassuma piumasaanut ilaavoq pingaarutilik. Apustilip Paulusip ersersippaa naalaffimmi pilliivik Guutip piumasaanut assersuutaasoq. (Hebræerit 10:10) Tassa Kristusip pilliuteqarneratigut aniguisitaanerput pingaarnerpaamik Jehovamut qujassutissaraarput. (Lukasi 1:68) Kristusip pilliutaa Jehovap piumasaanut naammalluinnartumut inunnillu asanningaarneranut ersiutaavoq. — Atuaruk Johannesi 3:16.

13, 14. Aaperaap maligassiaa Jehovap uagut pilluta iliuuserisimasaanik paasinnillutalu qujamasuutiginninnissamut qanoq iluaqutigisinnaavarput?

¹³ Jehova asanninnini taamatut ersersinniarlugu qanoq pilliuteqartigaa? Tamanna paasilluinnarsinnaagunanngilarput. Biibilimili oqaluttuaqarpoq apeqqummik tamatuminnga paasinninnerunissamut iluaqutigisinnaasatsinnik. Jehovap Aaperaat aalajaatsoq iliuuserissallugu sapernartorujussuarmik iliuuseqaqquaa. Taassuma ernera Iisaaq pilliutigeqquaa. Qularnanngitsumik Aaperaat ataataavoq asannittoq. Jehovap Iisaaq Aaperaamut eqqartoramiuk taassuma ‘erneratut, ernituatut asasaatut’ eqqartorpaa. (1 Mosesi 22:2) Taamaakkaluartorli Aaperaap Jehovap piumasaatut iliornissaq Iisaamut asanninnerminit pingaaruteqarnerusutut isigaa. Aaperaat Guutip kissaatigisaatut iliorniarluni piareersarpoq. Jehovalli Aaperaat ullut ilaanni nammineq iliuuseriumaakkaminik iliortinngilaa. Inngili aallartippaa, inngilillu Aaperaat ernerminik pilliuteqanngitsiartoq unitsippaa. Aaperaap misilinneqarnerminut ilungersunartumut tamatumunnga tunngatillugu Guutiminut naalannissani aalajangiusimalluinnarpaa. Qularutiginngilaa makititaasoqarnissaa ernini inuutillugu takoqqinnissaanut neriuutissatuaralugu, aamma qularutiginngilluinnarpaa Guuti taamatut makititsiumaartoq. Paulusi allappoq Aaperaap Iisaaq makititsinikkut “assersuutikkut” kingumut pigaa. — Hebræerit 11:19.

¹⁴ Aaperaat ernerminik pilliuteqarnissaminut piareersarnermini qanoq naalliutsigisimassanersoq takorloorsinnaaviuk? Oqartoqarsinnaavoq Aaperaap misigisai Jehovap ‘ernerminik asasaminik’ taasani pilliutigigamiuk qanoq misigisimassaneranik takorlooruminarnerulersitsisut. (Matthæusi 3:17) Eqqaamasariaqarparpulli Jehova qularnanngitsumik sakkortunerungaartumik naalliussimassasoq. Taassuma erneratalu ukiuni millionilinni, immaqa allaat milliardilinni, kisissaanngitsuni qilammeeqatigiinnertik nuannaarutigisinnaasimavaat. Ernerup Ataataminik taassuma ‘suliortuatut’ (1936) asasaatut oqaaseqartartuatullu   “Oqaaseq”-tut suleqateqarnini nuannaarutigisimavaa. (Ussatit 8:22, 30, 31; Johannesi 1:1) Jehova ernermi anniartitaanerani, mittataanerani tamatumalu kingorna pinerluttutut toqutaanerani takorloorsinnaasatsinnit annikilliornerungaarpoq. Jehova uagut aniguisitaasikkumalluta pilliuteqangaarsimavoq! Qanormi ililluta aniguisitaasimanitsinnik qujamasuutiginninnerput ersersissinnaavarput?

Illit aniguisitaaninnik qujamasuutiginninnerit qanoq ersersissinnaaviuk?

15. Jiisusip inuiannik utertitsinersuaq qanoq naammassivaa, tamatumuunalu suut ajornarunnaarpat?

¹⁵ Jiisusip qilammi inuunermut makititaanermi kingorna inuiannik utertitsinermut tunngatillugu suliani naammassivaa. Ataatani asasani najoqqileramiuk pilliutimi nalinga taassumunnga sassaappaa. Tamanna pilluaqqussuterpassuarnik kinguneqarpoq. Maanna ajortit tamakkiisumik isumakkeerfigineqarsinnaanngorput, siullermik Kristusip qatanngutaasa tanitat ajortaat, taavalu ‘silarsuup ajortai tamarmik’. Pilliut tamanna pissutigalugu ajortiminnik ilumoorlutik peqqissimissutiginnillutillu Kristusimut ajoqersuganngortut ilumoortut tamarmik akuerisaasumik Jehovamut Guutimut attaveqarsinnaapput. (1 Johannesi 2:2) Tamanna ilinnut qanoq attuumassuteqarami?

16. Assersuut suna Jehovap uagutsinnik aniguisitsisinnaanngortitsineranik sooq qujamasuutiginnittariaqarnitsinnut erseqqissaatigisinnaavarput?

¹⁶ Allaaserisap matuma aallaqqaataatungaani assersuut uterfigeriartigu. Oqariarta nakorsap nappaammut katsorsaariaatsimik nassaarsimasup immikkoortortami illit uninngavigisanniittut matuminnga neqeroorfigigai: Napparsimasut katsorsartinnissaminnut akuersisut peqqissaatigeqquneqartunillu malinnittut tamarmik pinngitsoqaratik ajorunnaassapput. Taavami uninngaqatitit amerlanerit nakorsaatissiissutigineqartunik pisarnissartik nakorsallu peqqissaatigeqqusaanik malinninnissartik ajornakusoorpallaassasoralugu nakorsap unnersuussutigisaanik malinnikkumanngippata? Katsorsaatip ilinnik ajorunnaarsitsisinnaaneranut qularunnaarnartunik uppernarsaatissaqaruit taakkununnga ilaliutiinnassagaluarpit? Soorunami naamik. Qularnanngitsumik qujamasullutit nakorsap unnersuussutai malissagaluarpatit. Immaqa allaat illit aalajangiussat pillugu allat oqaluttuutissagaluarpatit. Jehovap ernermi utertitsissutitut pilliutaa aqqutigalugu aniguisitaanissamut periarfissippaatigut. Tamatuminnga qujamasuutiginninnitsinnik ersersitsinissamut piumassuseqarnerungaartariaqarpugut! — Atuakkit Romamiut 6:17, 18.

17. Jehovap illit aniguisinniarlutit iliuuserisimasaanik qujamasuutiginninnerit qanoq ersersissinnaaviuk?

¹⁷ Jehovap Jiisusillu ajortimit toqumillu aniguisinniarluta iliuuserisimasaat pingaartikkutsigit tamanna iliuutsitsigut ersersissavarput. (1 Johannesi 5:3) Ajortulioqqajaasarnerput akiussavarput. Piaaraluta ajortuliunngisaannassaagut tamatumalu malitsigigajutaanik ilumoortuusaarluta marloqiusamik inooriaaseqanngisaannassalluta. Taamatut inuugaluarutta ersersissavarput utertitsissummik pingaartitsinngivilluta qujamasuutiginninngivillutalu. Guutimulli attaveqarluartuarnissatta ilungersorluta sulissutigineratigut qujamasuutiginninnerput ersersissavarput. (2 Petrusi 3:14) Taamaaliorsinnaavugut allat aniguisitaanissamik neriuummik nuannersumik oqaluttuunnerisigut, taakkuttaaq akuerisaasumik Jehovamut attaveqalersinnaaniassammata naassaanngitsumillu siunissaqarnissamik neriuuteqalersinnaaniassammata. (1 Timotheusi 4:16) Jehova taassumalu ernera pillugit piffissarput nukivullu sapinngisamik annerpaamik taakkuninnga unnersiutiginninnermut atortariaqarpavut. (Markusi 12:28-30) Eqqarsaatigeriaruk! Piffissaq ajortimit ajorunnaarsinneqarluinnarfigisassarput qilanaarisinnaavarput. Guutip aallaqqaammulli siunertarisimasaatut naammalluinnartuulluta naassaanngitsumik inuusinnaassaagut — tamakku tamaasa misigisinnaassavavut Jehovap aniguisinniarluta iliuuserisimasaasa kingunerisaannik! — Romamiut 8:21. (w09 09/15-E)

[Quppernerup ataani ilanngussaq]

Qanoq akissavit?

• Sooq aniguisinneqartariaqavippit?

• Jiisusip imminut pilliutigeriaannaalluni iliuusia ilinnut qanoq sunniuteqarpa?

• Jehovap tunissutaa utertitsissut illit qanoq isumaqarfigaajuk?

• Jehovap aniguisitaanissannik isumaginnissimanera pissutigalugu illit sunissamut kajumissuseqarpit?

[Atuaqqissaarnermi apeqqutit]

[Qupp. 30-mi assiliartaq]

Ullormi saammaannartitsivimmi Israelimi palasiuneq Missiarsimik takorlooruminarsaavoq

[Qupp. 31-mi assiliartaq]

Aaperaap ernerminik pilliutiginneriaannaanera Jehovap pilliutaa anginerungaartoq pillugu ilinniarfigisinnaavarput