Kristusitut isiginnittaaseqarit

‘Ima isumaqaritsi soorlu Kristusi Jiisusi.’ — FILIPPIMIUT 2:5, 1936.

1. Sooq Jiisusitut Kristusitut isiginnittaaseqalerniartariaqarpugut?

JIISUSI KRISTUSI ima oqarpoq: “Ornissinga, . . . ilinniarfigisingalu qanilaarama [saamagama, NV] uummatikkullu makitajuikkama; taava qasuerfissarsiumaarpusi tarnissinnut.” (Matthæusi 11:28, 29) Jiisusip taamatut inussiarnersumik kajumissaarinera asannittumik isumaqarneranik, imaluunniit isiginnittaaseqarneranik, ersersitsivoq. Inummik allamik uagutsinnut pitsaanerusumik maligassiuisinnaasoqanngilaq. Guutimut ernerugaluarluni, pissaaneqangaaraluarluni oqartussaassuseqangaaraluarlunilu allanik misiginneqatiginnittarpoq, ingammik piitsunik annikilliortunillu.

2. Jiisusip isiginnittaasianut tunngasut suut sammissavavut?

² Allaaserisami matumani tulliuttunilu marlunni misissussavarput qanoq ililluta Jiisusitut isiginnittaaseqalersinnaallutalu isiginnittaaseqartuarsinnaasugut, tassa qanoq ililluta ‘Kristusip isumaanik’ ersersitsisinnaasugut. (1 Korinthimiut 2:16, 1936) Jiisusip isiginnittaasianut tunngasut tallimat uku samminerussavavut: taassuma saamallunilu makitajuinnera, inussiarnersuunera, Guutimut naalannera, sapiissusia asanninneralu soraanngisaannartoq.

Kristusip saamanera ilinniarfigisiuk

3. (a) Jiisusip toqunissaminut aqaguttoq unnukkut ajoqersukkani makitajuinnermik qanoq ilinniartippai? (b) Jiisusi qanoq periarpa ajoqersukkani sanngiilliormata?

³ Jiisusi, Guutip ernera naammalluinnartoq, kajumilluni nunarsuarmukarpoq inuit naammalluinnanngitsut ajortillillu akornanni kiffartorniarluni. Taakku ilaat kingusinnerusukkut taassuminnga toqutsisussaapput. Taamaakkaluartorli Jiisusi nuannaartuarpoq imminullu naalakkersinnaajuarluni. (1 Petrusi 2:21-23) Jiisusimik maligassatsitut ‘tunaarinninnerput’ allat kukkuneri naammalluinnanngissutaallu paamigigaangatsigit uagut taassumatut nuannaarlutalu imminut naalakkersinnaanissamut iluaqutigissavarput. (Hebræerit 12:2) Jiisusip ajoqersukkani kajumissaarpai nammaatani imminnut piseqqullugu taamaalillutillu ilinniarfigalugu. (Matthæusi 11:29) Suut ilinniarsinnaagamikkit? Ilaatigut paasissavaat taassuma saamanera ajoqersukkaminullu kukkusaraluartunut naammagittartarnera. Jiisusip toqunissaminut aqaguttoq unnukkut taakkua isigaat asappai taamaalillunilu puiunngisaannagassaannik maniguunnermik, imaluunniit makitajuinnermik, ilinniartillugit. (Atuakkit Johannesi 13:14-17). Kingusinnerusukkut Petrusi, Jaaku Johannesilu naatsiivimmi Getsemanemi eqqumasinnaanngimmata Jiisusi taakkua sanngiissusiannik paasinnilluinnarpoq. Ima aperaaq: “Siimuut, sinippit? . . . Eqqumagitsi, qinugitsilu usserneqaqqunasi. Anersaaq kajumikkaluarpoq, uinilli qajannarpoq.” — Markusi 14:32-38.

4, 5. Qatanngutitta kukkunerinik naammalluinnanngissutaannillu siumugaqaraangatta Jiisusip maligassiaa qanoq iluaqutigisinnaavarput?

 ⁴ Uppeqaterput unammillerpalaaraangat, ajuallajagaangat imaluunniit utoqqaanertanit ‘inussiamilluunniit aalajaallunilu silatuumit’ (NV) siunnersuutinik malinninniaasaaraangat qanoq periartarpugut? (Matthæusi 24:45-47) Immaqa inuit Saatanip silarsuaaniittut pissusii nuanninngitsut naammagiinnariaasarpavut, qatanngutivulli naammalluinnanngissutaat pillugit isumakkeerfiginissaat sapernartittarlugu. Allat kukkussutaat paamitsaateqqajaasarutsigit imminut ima aperisariaqarpugut: “Qanoq ilillunga ‘Kristusip isumaanik’ ersersitsilluarnerusinnaavunga?” Eqqaamajuk Jiisusip ajoqersukkani paamitsaanneq ajorai, naak taakkua anersaakkut sanngiilaarnertik ersersittaraluaraat.

⁵ Maluginiaruk ilaanni Petrusimut qanoq pisoqarnersoq. Jiisusip Petrusi kajumissaarmagu umiatsiamit aqqarluni immap qaavatigut pisulluni orneqqulluni Petrusi immap qaavatigut pisuppoq. Petrusilli anorersuaq maluginialerpaa kiviartulerlunilu. Jiisusip taanna paamitsaappaa ima oqarfigalugu: “Illit nammineq pisuuvutit! Tassa illit anusinngorsaatissat”? Naamik! “Jiisusip erniinnaq assani isatsippaa, tigullugulu oqarfigaa: ‘Uppernikitsutit, sooq qulalerpit?’” (Matthæusi 14:28-31) Qatanngutitta arlaat uppernikippat, uagut assapput assersuutaasumik isaassinnaavarput upperluarnerulernissaanullu ikiorlugu? Jiisusip Petrusimik saamasumik pinninnera ilinniarfigilluarsinnaavarput!

6. Jiisusip apustilini nuimasumik inissisimaffeqarusunneq pillugu sumik ilinniartippai?

⁶ Aamma Petrusi apustilit kia arlamik annerunera pillugu assortuuttunut peqataasarpoq. Jaaku Johannesilu Jiisusip naalagaaffiani taassuma talerpiata saamiatalu tungaani issiarusupput. Petrusilli ajoqersukkallu allat tamanna tusaramikku kamalerput. Jiisusip, taakkua taamatut kissaateqarnerata innuttaaqatigiinnit peroriartorfiannit aallaaveqarneranik ilisimannittup, ajoqersukkat qaaqquai imalu oqarfigalugit: “Nalunngilarsi inuiaqatigiit naalagaanertaasa innuttatik naqisimasaraat, naalagartaasalu pissaanertik taakkununnga atornerluttaraat. Ilissinni taamaassanngilaq; akornassinnili angisuujumasoq ilissinnut kiffaassaaq, akornassinnilu nuimanerujumasoq ilissinnut inussiaataassaaq.” Namminerlu maligassiani uparuarlugu ima nangippoq: “Soorlu Inuup Ernera tikiutinngitsoq kiffartorfigeqqulluni, namminerli kiffartussalluni inuuninilu akissatut tunniutissallugu amerlasuut utertinneqaatissaattut.” — Matthæusi 20:20-28.

7. Tamatta immikkut ilagiinni ataasiussusermik qanoq ililluta siuarsaasinnaavugut?

⁷ Jiisusip makitajuinneranik eqqarsaatiginninneq qatanngutitta akornanni ‘minnertut iliornissamut’ (NV) iluaqutigissavarput. (Lukasi 9:46-48) Tamanna ataasiussutsitsinnut siuarsaataassaaq. Soorluttaaq ataataasup qitornarpassuallip ilaquttami ataasiussuseqarnissaat kissaatigigaa, taamatulli Jehovap qitornami nunamiusut ‘ataasioqatigiillutik najugaqatigiinnissaat’ kissaatigaa. (Tussiaat 133:1, NV) Jiisusip kristumiut ilumoortut tamaasa eqqarsaatigalugit Ataatani qilammiusoq ima qinnuigaa: “Uanga taakkunaniillunga illillu uanniillutit ataasioqatigiilluinnaqqullugit, silarsuarmut paaseqqullugu illit aallartikkimma taakkulu asagitit, soorlu uanga asagimma.” (Johannesi 17:23) Ataasiussutsitsigut taamaalilluni ersissaaq Kristusimut ajoqersugaasugut. Taamatut ataasiussuseqalerumalluta naammalluinnanngissutivut Jiisusip taakkuninnga isiginninneratut isigisariaqarpavut. Taanna isumakkeerfiginnikkumassuseqarpoq, aamma ilinniartitsissutigaa taamaallaat isumakkeerfiginninnikkut nammineq isumakkeerfigineqartoqarsinnaasoq. — Atuakkit Matthæusi 6:14, 15.

8. Ukiorpassuarni Guutimut kiffartorsimasut sumik ilinniarfigisinnaavavut?

⁸ Aamma ukiorpassuarni Kristusimik ilaarsisimasut uppernerannik ilaarsineq ilinniarfigingaarsinnaavarput. Jiisusip pisimaneratut taakku amerlanertigut allat naammalluinnanngissutaannik paasinnittarput. Paasisimavaat Kristusitut misiginneqataaneq ‘sanngiitsut sanngiissutaannik ersuinissamuinnaanngitsoq’ aammali ataasiussutsitsinnik siuarsaanissamut iluaqutaasoq. Aamma tamanna ilagiinniittut tamarmik Kristusip isiginnittaasianik ilaarsinissamut iluaqutigissavaat. Taakkua qatanngutitik Paulusip kristumiunut Romamiittunut kissaassineratut matuminnga kissaappaat: “Guutip nikallujuitsuutitsisup tuppallersaasullu tunilisi isummamik taannaasumik  ataasiusumik Kristusi-Jiisusip piumasaa malillugu isumaqatigiillusi qanermik ataasiusumik Guuti Naalakkatta Jiisusi-Kristusip Ataataa unnersiutigeqqullugu.” (Romamiut 15:1, 5, 6) Aap, ataasiussuseqarluta pallorfiginninnerput Jehovamut ataqqinaataallunilu nersornaataassaaq.

9. Jiisusi ilaarsinnaajumallugu sooq Guutip anersaava illernartoq pisariaqartipparput?

⁹ Jiisusip ‘uummatikkut makitajuinneq’ saamanermut, Guutip anersaavata inerititaanut ilaasumut, atassuserpaa. Taamaattumik Jiisusi ilaarsinnaajumallugu Jiisusip maligassiaanik qimerluuinitta saniatigut Jehovap anersaava illernartoq pisariaqartipparput. Guutip anersaava illernartoq qinnutigisariaqarparput tamatumalu inerititaanut ilaasut —  “asanninneq, nuannaarneq, eqqissineq, kamaginninneq, inussiarnissuseq, ajunngissuseq, upperneq, saamaneq, imminut naalakkersinnaaneq” — ineriartortinniartariaqarlugit. (Galatiamiut 5:22, 23, NV) Taamaalilluta Jiisusip makitajuinneranik saamaneranillu ilaarsinitsigut Ataatatsinnit qilammiusumit iluarisaassaagut.

Jiisusip allat inussiarnisaarfigisarpai

10. Jiisusi qanoq inussiarnisaartarpa?

¹⁰ Aamma inussiarnissuseq Guutip anersaavata inerititaanut ilaavoq. Jiisusi allanut tamatigut inussiarnisaartarpoq. Jiisusimut ilumoorlutik saaffiginnittut tamarmik taassumannga ‘ilassineqartarput’. (Atuaruk Lukasi 9:11). Jiisusip inussiarnernera sumik ilinniarfigisinnaavarput? Inuk inussiarnersoq paasinnittuullunilu innimittartuullunilu ilakkuminartuullunilu allanik misiginneqatiginnittarpoq. Jiisusi taamaappoq. Taassuma inuppassuit nalligingaarpai “paarinerlugaallutillu naakkinarsisimangaarmata savatut paarsisoqanngitsutut”. — Matthæusi 9:35, 36.

11, 12. (a) Jiisusip iliuutsitigut qanoq misiginneqataasimaneranik eqqaasaqarit. (b) Oqaluttuaq tamanna qanoq ilinniarfigisinnaavarput?

¹¹ Aamma Jiisusip misiginneqataanini iliuutsimigut ersersittarpaa. Oqaluttuaq ataaseq immikkut maluginiarnarpoq. Arnaq ukiuni aqqaneq-marlunni nalinginnaanngilluinnartumik aaqartuarsimavoq. Nalunngilaa Mosesip inatsisai naapertorlugit ileqqulersuutitigut pallorfiginninnissamut minguttuuallaarluni aamma imminik attuisoq kinaluunniit minguttuunngorumaartoq. (3 Mosesi 15:25-27) Taassumali Jiisusip tusaamasaalluarnera allanillu iliorfiginneriaasia imminik ajorunnaarsitsisinnaallunilu ajorunnaarsitsiumaarneranik qularunnaassutigisimassavai. Imminut ima oqarfigisaqattaarpoq: “Atisaaluunniit attuinnarukkit annaanneqassaanga [ajorunnaassaanga, 1936].” Taamaattumik sapiillisaarluni attorpaa, ingerlaannarlu malugaa ajorunnaarluni.

¹² Jiisusip nalunngilaa attorneqarsimalluni, qinerporlu kinaanersoq takuniarlugu. Arnaq, Mosesip inatsisaanik unioqqutitsisimanini pillugu naveersinnissaminik ilimaginnikkunartoq, sajulluni taassuma isigaasa saannut pallorpoq suullu tamaasa oqaluttuaralugit. Jiisusip arnannguakkuluk naalliuttoq taanna naveerpaa? Naamerluinnaq. Ima eqqissisarpaa: “Panik, uppernerpit annaappaatit. Eqqissillutit qimagunniarit.” (Markusi 5:25-34) Taamatut inussiarnisaarfigineqarnini qanoq tuppallersaatigitigisimassavaa!

13. (a) Jiisusip isiginnittaasia farisiiarillu isiginnittaasiat qanoq assigiinngissuteqarpat? (b) Jiisusip meeqqat qanoq pisarpai?

¹³ Farisiiarit naakkittaatsut pisimanerattut Jiisusip oqartussaassutsini inunnut suli nanertuutissiinerunissamut atunngisaannarpaa. (Matthæusi 23:4) Inunnilli inussiarnissuseqarluni naammagittarlunilu Jehovap oqaasii iliuusiilu pillugit ilinniartitsisarpoq. Jiisusi tamatigut ajoqersukkaminut asannillunilu inussiarnisaartarpoq. Ikinngutaavoq ilumoortoq. (Ussatit 17:17; Johannesi 15:11-15) Allaat meeqqat Jiisusi ilagalugu nuannarisarpaat, aamma erseqqippoq Jiisusip taakkua ilaginissaat nuannarigaa. Meeqqat piffissaqarfigiumallugit suliariniakkaminik unitsitsinissaminut ulapippallaarneq ajorpoq. Ilaanni inuit meeqqatik Jiisusimukaappaat attoqqullugit. Jiisusilli ajoqersugaasa, upperisarsiornikkut siuttut pisarnerattut  namminneq pingaaruteqassutsiminnik suli eqqarsaatiginnittut, unitsinniarsarilermatigit taassuma taakku ima oqarfigai: “Meerannguit uannut qaaginnarlit, akornuseqinasigillu; taakkuami Guutip naalagaaffia pigaat.” Meerarlu atorlugu ilinniutissippai ima nangilluni: “Ilumut oqarfigaassi: Kialuunniit Guutip naalagaaffia meerannguatut pinngikkuniuk iserfiginngilluinnassavaa.” — Markusi 10:13-15.

14. Meeqqat ilagiinniittunit ilumoorluni namminissarsiornanilu soqutigineqarnertik qanoq iluaqutigisinnaavaat?

¹⁴ Eqqarsaatigeriaruk meeqqat taakku ilaat ukiorpassuit tamatuma kingorna inersimasunngoreerlutik Jiisusimit ‘pakkunneqarlutillu pilluaqquneqarnertik’ eqqaagaangamikku qanoq misigisarsimassanersut. (Markusi 10:16) Ullumikkuttaaq meeqqat utoqqaanertat allallu ilumoorlutik namminissarsioratillu imminnik soqutiginnissimasut nuannersumik eqqaamajumaarpaat. Sulilu pingaaruteqarnerusumik: Meeqqat ilagiinni taamatut ilumoorluni soqutigineqartut mikinerminniilli misigissavaat Jehovap anersaavata innuttaanik najuinera.

Silarsuarmi inussiarniiffiusumi inussiarnisaarit

15. Sooq ullumikkut taama inussiarniitsoqartiginera tupigissanngilarput?

¹⁵ Ullumikkut inuppassuit misigipput allanut inussiarnisaarnissaminnut piffissaqaratik. Taamaattumik Jehovap innuttaasa inussiarniiffigineqartarnertik ulluinnarsiutigaat — atuarfimmi, suliffimminni, angalagaangamik oqaluussigaangamilluunniit. Taamatut inussiarniiffigineqartarneq immaqa pakatsinartarpoq, tupigisussaanngilarpulli. Jehovap Paulusi isumassarsisillugu kristumiunik mianersoqqusitippaa ulluni kingullerni ernumanartorsiorfiusuni makkunani inunnik ’namminissarsiortunik asanniuitsunillu’ naapitaqarnissaat pillugu. — 2 Timotheusi 3:1-3.

16. Ilagiinni qanoq ililluta kristumiutut inussiarnisaarsinnaavugut?

¹⁶ Taamaattoq kristumiut ilumoortut ilagiivini pissutsit silarsuarmi pissutsinit inussiarniiffiusunit allaanerulluinnarlutik inuummarissaataapput. Jiisusimik ilaarsinitsigut ilagiit nuannerlutillu ineriartornartuunissaannik tamatta immikkut siuarsaaqataasinnaavugut. Qanoq ililluta? Ilagiinniittoqarpoq peqqiilliornertik allanilluunniit ajornartorsiuteqarnertik pissutigalugu ikiorneqartariaqartunik qiimmassarneqartariaqartunillu. ‘Ulluni kingullerni’ makkunani ajornartorsiutit taamaattut amerligaluttuinnarput, aatsaalli taamaattoqalinngilaq. Biibilip nalaani kristumiut taakkununnga assingusunik ajornartorsiuteqarput. Taamaattumik taamanikkutut ikiuinissaq pissusissamisuussaaq. Assersuutigalugu Paulusip kristumiut kajumissaarpai ‘ernumasunik tuppallersaaqqullugit, sanngiitsunik isumaginneqqullugit, tamaasa nikallujuisaarfigeqqullugit’. (1 Thessalonikamiut 5:14) Tamatumunnga ilaatigut ilaavoq Kristusip pisimaneratut inussiarnisaarnissaq.

17, 18. Ilaatigut qanoq ililluta Jiisusip inussiarnisaarnera ilaarsinnaavarput?

¹⁷ Kristumiuugatta qatanngutitta ‘ilassinissaat’, Jiisusip taakkuninnga inussiarnisaarfiginnissimassagaluarneratut inussiarnisaarfiginninnissarput, akisussaaffigaarput, ukiorpassuarni ilisarisimasimasavut immaqalu aamma aatsaat naapitavut ilumoorluta soqutigalugit.  (3 Johannesi 5-8) Jiisusip allanik misiginneqatiginninniarluni siulliulluni iliuuseqartarneratut uaguttaaq taamaaliortariaqarpugut tamatigut allanik tuppallersaasarlutalu qiimmassaasarlutalu nakussatsitsisarluta. — Esaja 32:2; Matthæusi 11:28-30.

¹⁸ Tamatta immikkut inussiarnisaarsinnaavugut allat qanoq innerat iliuuseqarluta soqutigalugu. Iliuusissarsiorit periarfissarsiorlutillu! Siulliullutit iliuuseqartarit! Paulusi ima kajumissaarivoq: “Qatanngutigiittut asaqatigiillusi ungageqatigiigitsi, ataqqeqatigiigitsilu immissinnut akimorniullusi.” (Romamiut 12:10) Tassa Kristusip maligassiaanik malinnittariaqarpugut, allat inussiarnisaarfigalugit ‘asanninnerup piviusup’ ersersinnissaa ilinniarlutigu. (2 Korinthimiut 6:6) Paulusip kristumiutut asanninneq ima allaatigaa: “Asanninneq kamagittartuuvoq, asanninneq saamasuuvoq [inussiarnersuuvoq, NV], asanninneq sinngasarinngilaq; pingaakujuttarnanilu perroortarinngilaq.” (1 Korinthimiut 13:4) Qanortoq qatanngutitsinnik iluarinninnginnata oqaaqqissaarut una malillugu iliorisa: “[Immissinnut] ajunngitsuliorfigigitsi [inussiarnisaarfigisaritsi, NV] nallittuillusilu, isumakkeerfigeqatigiittaritsilu soorlu Guutip Kristusimi isumakkeerfigigaasi.” — Efesosimiut 4:32.

19. Jiisusitut Kristusitut inussiarnisaarneq qanoq kinguneqartarpa?

¹⁹ Tamatigut pissutsinilu qanorluunniit ikkaluartuni Jiisusitut Kristusitut inussiarnisaarniartarutta tamatuminngalu ineriartortitsiniartarutta ajunngitsumik kinguneqassaaq. Jehovap anersaava ilagiinni sunniuteqarluarsinnaassaaq, aamma anersaap inerititaanik ajunngitsumik ineriartortitsisinnaassaaq. Jiisusip maligassiaa malittarutsigu allallu taamaaliornissaannut ikiortarutsigit pilluarluta ataasiussuseqarlutalu pallorfiginninnerput Guutimut nuannaarutaassaaq. Taamaattumik allanik peqateqaraangatta Jiisusitut saamallutalu inussiarnersuunissarput ilungersuutigiuartigu.

Uku nassuiarsinnaavigit?

• Jiisusip ‘saamallunilu uummatikkut makitajuinnini’ qanoq ililluni ersersippaa?

• Jiisusi qanoq inussiarnisaartarpa?

• Silarsuarmi naammalluinnanngitsumi matumani qanoq ililluta Jiisusitut saamallutalu inussiarnisaarsinnaavugut?

[Atuaqqissaarnermi apeqqutit]

[Qupp. 10-mi assiliartaq]

Qatanngut, Petrusip pisimaneratut, uppernikilliorpat assapput isaallugulusooq ikiussavarput?

[Qupp. 13-mi assiliartaq]

Qanoq ililluta ilagiinnik inussiarnisaarfinngortitseqataasinnaavugut?