“Anersaakkut tamaviaaritsi”

“Ilungersoritsi nangaassuteqarnasi, anersaakkut tamaviaaritsi, [Jehova] kiffartorfigisiuk.” — ROMAMIUT 12:11.

1. Sooq Israelikkut uumasunik allanillu pilliuteqartarpat?

JEHOVAP kiffami imminik asanninnerminnut piumasaminullu naalatsigitinnerminnut ersiutitut kajumillutik pilliuteqartarnerat qujamasuutigisarpaa. Itsaq uumasunik pilliutit pilliutillu allat akuerisarpai. Israelikkut Mosesip inatsisaani pilliutigeqquneqartunik taakkuninnga pilliuteqartarput ajortiminnik isumakkeerfigineqaqqullutik qujamasunnertillu ersersinniarlugu. Maanna kristumiutut aaqqissuussaanermi inuuvugut, Jehovallu taamatut ileqqulersuutitigut pilliuteqartarnissarput piumasariunnaarnikuuaa. Paulusilli kristumiunut Romamiittunut allakkamini kapitali 12-imi ersersippaa Guutip imminut pilliuteqartarnissarput piumasarigaa. Qanoq taamaaliortarsinnaasugut sammeriartigu.

Pilliut uumasoq

2. Uagut kristumiutut qanoq inuuvugut, taamatullu inuusinnaajumalluta susariaqarpugut?

² Atuakkit Romamiut 12:1, 2. Paulusip siusinnerusukkut kristumiunut tanitanut allakkamini erseqqissarpaa, taakku juutiugunik juutiunngikkaluarunilluunniit, uppernikkut, iliuutsikkut pinnani, Guutip takkuani naapertuilluartuutitaasut. (Romamiut 1:16; 3:20-24) Paulusip kapitali 12-imi nassuiarpaa kristumiut imminut pilliutigeriaannaallutik inuunermikkut qujamasunnerminnik ersersitsisariaqartut. Taamaaliorsinnaajumalluta isumarput nutartertariaqarparput. Naammalluinnanngissutsip kingornussatta kingunerisaanik ‘ajortip toqullu inatsisaannut’ naalatsigititaavugut. (Romamiut 8:2) Taamaattuminguna eqqarsartaatsitsinnik allanngortitserujussuarnitsigut nutaanngortitaanissarput, ‘isumatsigut anersaatsigullu nutaanngortitaanissarput’, pisariaqartoq. (Efesosimiut 4:23) Taamatut allannguerujussuartoqarsinnaavoq taamaallaat Guutip taassumalu anersaavata ikiuineratigut. Uagulli aamma nammineq tamaviaartariaqarpugut silaqassutsitta atorneratigut. Tassa sapinngisarput tamaat iliuuseqartariaqarpugut naleqqussarumanata ‘silarsuarmut matumunnga’, tassanilu ileqqorlunnermut, aliikkusersuutinut aserorsaataasunut eqqarsartaatsimullu mumingasumut. — Efesosimiut 2:1-3.

3. Sooq kristumiutut sammisassat sammisarpavut?

³ Aamma Paulusip kajumissaarpaatigut silaqassuserput ‘Guutip piumasaata ajunngitsup, iluarinartup naammalluinnartullu’ suuneranik qulakkeerinissamut atoqqullugu. Sooq Biibili ullut tamaasa atuartarparput, atuakkavut eqqarsaatigisarlugit, qinusarluta, kristumiut ataatsimiinnerinut najuuttarluta Guutillu naalagaaffia pillugu nutaarsiassamik nuannersumik oqaluussissutiginnittarluta? Taamaaliortarpugut ilagiinni utoqqaanertat taamaalioqqulluta kajumissaartarmatigut? Ilumoorpoq taakkua uagutsinnut eqqaasitsissutaat qujamasuutigisarivut. Kristumiutulli sammisassanik sammisaqartarnitsinnut pissutaasorpiaq tassaavoq Jehovamik asanningaarnitsinnik ersersitsinissamut Guutip anersaavanit kajumissisinneqartarnerput. Aamma nammineq qularutigiunnaarsimavarput tamakkuninnga ulapputeqartarnissarput Guutip piumasarigaa. (Zakaria 4:6; Efesosimiut 5:10) Kristumiutut ilumoortutut inuugaangatta Guutimit iluarisaasinnaanitsinnik ilisimanninnerput nuannaarutigingaartarlugulu nalerisimaarutigingaartarparput.

 Tunissutit assigiinngitsut

4, 5. Utoqqaanertat tunissutisiatik qanoq atortariaqarpaat?

⁴ Atuakkit Romamiut 12:6-8, 11. Paulusi nassuiaavoq ‘saammaannermit tunissutinik assigiinngitsunik pigisaqartugut’. Tunissutit eqqaasaasa ilaat — kajumissaarineq siuttuunerlu — ingammik kristumiunut utoqqaanertanut, ‘ilungersorlutik’ siuttooqqullugit oqaaqqissaarneqartunut, tunngassuteqarput.

⁵ Taamatut ilungersorneq Paulusi naapertorlugu nakkutilliisut ilinniartitsisutut ‘kiffartorneranni’ erseqqittariaqarpoq. Versit ataqatigiinnerini erserpoq Paulusip matumani ilagiinni, timimut assersuussamini, ‘kiffartorneq’ eqqarsaatigigaa. (Romamiut 12:4, 5) Taamatut kiffartorneq Apustilit Suliaat 6:4-mi eqqaaneqartumut assinguvoq, apustilit ima oqaramik: ‘Uagut nammineq pisarnitsitut qinoqatigiittarneq oqaaserlu kiffartuutigissavavut.’ Taamatut kiffartornermut suut ilaappat? Utoqqaanertat kristumiut tunissutit pisatik ilagiinnut ilaasortaasunut ineriartuutaaqataanissamut atortarpaat. Utoqqaanertat ilagiit Biibili tunngavigalugu pimoorussillutik siunnersortariaqarpaat. Taamaaliorsinnaajumallutik qinunikkut atuaqqissaartariaqarlutillu misissueqqissaartariaqarlutillu ilinniartitsisariaqarlutillu anersaakkut isumassuisariaqarput. Nakkutilliisut tamakkua tamaasa iliuuserisarunikkit ersersissavaat ‘kiffartornerminni’ eqiasuitsuullutik. — Romamiut 12:7, 8; 1 Petrusi 5:1-3.

6. Romamiut 12:11-mi kajumissaarutigineqartoq qanoq malissinnaavarput?

⁶ Paulusi ima nangippoq: “Ilungersoritsi nangaassuteqarnasi, anersaakkut tamaviaaritsi, [Jehova] kiffartorfigisiuk.” Malugilerutsigu kiffartornitsinni tamaviaarunnaarsimalluta immaqa atuaqqissaartarnerput eqqarsaatigeqqissaartariaqassavarput akulikinnerusumillu ilungersornerullutalu qinnutigisariaqartassallugu Jehovap anersaava — ilatsiinnarnermik akiuinissamut kajumissuseqaqqilernissamullu iluaqutigisinnaasarput. (Lukasi 11:9, 13; Saqqummersitat 2:4; 3:14, 15, 19) Ukiuni hundredelinni siullerni kristumiut anersaaq illernartoq “Guutip tupinnangaartuliai” pillugit oqalunnissamut nukissaqalissutigaat. (Apustilit Suliaat 2:4, 11) Tamatumunnga assingusumik taanna uagut kiffartornermi aallussilluartuunissamut, ‘anersaakkut tamaviaarnissamut’, kajumississutigisinnaavarput.

Maniguunneq

7. Sooq maniguulluta kiffartortariaqarpugut?

⁷ Atuaruk Romamiut 12:3. Tunissutit pisimasinnaasavut Jehovap ‘saammaanneranik’, imaluunniit ajunngisaarneranik pisassarinngisaraluamik, pissuteqarput. Paulusi allami ima allappoq: “Guutimuna pisinnaanngortikkaatigut.” (2 Korinthimiut 3:5)  Taamaattumik malugeqqusaassanngilagut. Maniguulluta nassuerutigisariaqarparput Guutimut kiffartornitsinni angusaqarluaraangatta tamanna tamatigut taassuma pilluaqqusineranik, uagut piginnaanitsinniunngitsoq, pissuteqartartoq. (1 Korinthimiut 3:6, 7) Paulusi tamatumunnga naapertuuttumik ima allappoq: “Tamassi immikkut ima oqarfiginiarpassi: Immissinnik pingaarteqinasi pisariaqartumit annerusumik.” Imminut nalilittut isiginissarput kiffartornitsinnilu nuannaarlutalu nalerisimaarnissarput pisariaqarpoq. Maniguukkuttali pisinnaasattalu killeqarnerat ilisimaarigutsigu, tamanna uteriitsuunnginnissamut malartaatsuunnginnissamullu iluaqutigissavarput. ‘Silaqassuserput sianisuumik atorusupparput’.

8. Qanoq ililluta ‘imminut silatuujusorinaveersaarsinnaavugut’?

⁸ Naammassisimasavut oqarataarutigigutsigit sianiilliussaagut. Tassami Guuti ‘naajartortitsisuuvoq’. (1 Korinthimiut 3:7) Paulusi allappoq Guutip ilagiinniittunut tamanut immikkut ‘upperneq agguutisiaritikkaa’. Allanit pingaarnerusutut misiginata allat uppernermik agguutisiaminnik naammassisimasaat pillugit nersortariaqarpavut. Paulusi ima nangippoq: “Imminut eqqarsaatigisarnissitut allat eqqarsaatigiuarsigit; makitaqinasi, nikagineqartulli noqqaassutigisigit. Imminut silatuusoreqinasi.” (Romamiut 12:16, NV) Allakkamini allani apustilip qinnuigaatigut ‘namminissarsiorneq imminulluunniit angisuutinneq tunngavigalugit iliuuseqartaqqunata, makitajuitsuunitsigulli allat immitsinnit anneruteqqullugit’. (Filippimiut 2:3) Qatanngutitta tamarmik immikkut aalajangersimasutigut uagutsinnit pikkorunnerunerannik nassuerutiginnissagutta maniguuttariaqarlutalu iliuuseqartariaqarpugut. Taamaattumik maniguunnerput ‘imminut silatuujusorinaveersaassutigissavarput’. Ilumoorpoq kiffartornermi immikkut pisinnaatitaaffeqarneq ilaasa malugineqaatigisaraat, tamattali nuannaarutigingaartassavarput ‘nikagineqartunik noqqaassutiginninneq’, malugineqartuaannanngitsunik suliaqarneq. — 1 Petrusi 5:5.

Kristumiutut ataasiussuserput

9. Sooq Paulusip kristumiut anersaakkut kinguaassiarititaasut timimi avatinut assersuuppai?

⁹ Atuakkit Romamiut 12:4, 5, 9, 10. Paulusip kristumiut tanitat timimi avatinut taakkununnga niaquusumit, Kristusimit, siulersorneqarlutik kiffartoqatigiittunut assersuuppai. (Kolossemiut 1:18) Kristumiut kinguaassiarititaasut eqqaasippai timi avateqartoq assigiinngitsorpassuarnut atorsinnaasunik, aamma amerlagaluarlutik ‘tamarmik Kristusimi timiusut ataaseq’. Paulusi tamatumunnga assingusumik kristumiunut Efesosimiittunut ima allappoq: “Asanninnermi tamatigut alliartussaagut taassumunnga niaquusumut, tassa Kristusimut. Taanna tunngavigalugu timi tamarmi katitigaavoq ataqatigiissinneqarlunilu ataasiakkaat katiterutaasut tamarmik nakuussut imminnut pissarsiarititaasoq nukigalugu ikioqatigiinnerisigut; taamaalilluni timi alliartorpoq ineriartortinneqarlunilu asanninnermi.” — Efesosimiut 4:15, 16.

10. Kikkut oqartussaanerat ‘savat allat’ akuerisariaqarpaat?

¹⁰ ‘Savat allat’ Kristusip timaanut katitikkamut ilaanngikkaluarlutik assersuut taanna ilinniarfigilluarsinnaavaat. (Johannesi 10:16) Paulusi allappoq Jehovap ‘[Kristusip] isigaasa ataannut pisikkai suusut tamaasa, taamalu sunut tamanut niaquusoq ilagiinnuttaaq niaquulersillugu’. (Efesosimiut 1:22) Ullumikkut savat allat “sunut tamanut” Kristusip niaquuffigisaanut ilaapput. Aamma ‘pigisaanut’ taassuma ‘inussiamut aalajaallunilu silatuumut’ (NV) paarititaanut ilaapput. (Matthæusi 24:45-47) Taamaattumik nunarsuarmi inuunissamik neriugisallit Kristusi imminnut niaquusutut akuerisariaqarpaat inussiamullu aalajaallunilu silatuumut taassumalu Siulersuisoqatigiivinut angutinullu ilagiinni nakkutilliisussatut toqqarneqartunut naalatsigitittariaqarlutik. (Hebræerit 13:7, 17) Taamaaliornerat kristumiutut ataasiussusermik siuarsaassaaq.

11. Ataasiussuserput sumik tunngaveqarpa, Paulusilu sumik allamik siunnersuuteqarpa?

 ¹¹ Taamatut ataasiussuseqarneq asanninnermik, ‘ataasiussutsip qilerutaanik naammalluinnartumik’, tunngaveqarpoq. (Kolossemiut 3:14, NV) Tamanna Paulusip Romamiut kapitali 12-imi erseqqissarpaa, tassani allakkami asanninnerput ‘pisuusaarnerussanngitsoq’, aamma ‘qatanngutigiittut asaqatigiilluta ungageqatigiittariaqartugut’. Tamanna ataqqeqatigiinnermik kinguneqartarpoq. Apustili ima allappoq: ‘Ataqqeqatigiigitsi immissinnut akimorniullusi.’ Soorunami asanninneq kukkusumik ilumoorfiginninnermut paarlaatissanngilarput. Ilagiit minguitsuutikkumallugit sapinngisarput tamaat iliorusuppugut. Paulusi asanninneq pillugu siunnersuilluni ima nangippoq: “Ajussuseq maajugisiuk, ajunngitsoq aalajangerfigisiuk.”

Inoroorsaarneq

12. Kristumiut itsaq Makedoniamiittut allanik ikiuinermut tunngatillugu sumik ilinniarfigisinnaavavut?

¹² Atuaruk Romamiut 12:13. Qatanngutitsinnut asanninnerput ‘illernartut ikiortariaqaraangata’ sapinngisarpullu naapertorlugu ‘ikiortarnissaannut’ kajumississutigissavarput. Aamma pigisaqarpianngikkaluaruttaluunniit pigisatsinnik allanut tunniussisinnaavugut. Paulusi kristumiut Makedoniamiittut pillugit ima allappoq: “Naak annikilliornartorsuarnik misilinneqaraluartut tipaatsungaarnerata piitsuungaarneratalu tukkusoorsuanngortissimavai. Tassami sapinngisartik naapertorlugu, allaammi akimorlugu, tunniussipput — tamanna uppernarsarsinnaavara. Namminneq kajumissutsiminnit ilungersungaarlutik qinnuigaatigut illernartunut [Judæamiittunut] ikiuutissanik tuniseqataajumallutik.” (2 Korinthimiut 8:2-4) Kristumiut Makedoniamiittut piitsuugaluarlutik assut tukkortuusimapput. Pigisaminnik qatanngutiminnut annikilliortunut Judæamiittunut tunniussisinnaanertik immikkut pisinnaatitaaffittut isigaat.

13. ‘Inoroorsaarnissamik pingaartitsineq’ qanoq paasisariaqarpa?

¹³ Oqariartaaseq grækerisooq “inoroorsaarnissaq pingaartissiuk”-mik nutserneqarsimasoq iliuuseqarusussusermik isumaqarpoq. The New Jerusalem Bible-imi oqariartaaseq taanna “inoroorsaarnissamut periarfissarsioritsi”-mik nutserneqarsimavoq. Ilaannikkut inoroorsaartoqartarpoq neriartoqqusinikkut, asanninnerlu  kajumississutigalugu taamaaliortut nersortariaqarput. Iliuuseqarusussuseqaruttali paasissavarput assigiinngitsorpassuartigut inoroorsaartoqarsinnaasoq. Assersuutigalugu aningaasatigut atukkavut peqqiilliornerpulluunniit pissutigalugu neriartoqqusinissamut periarfissaqanngikkutta immaqa inoroorsaarsinnaavugut kaffisoriartoqqusillutaluunniit tiitoriartoqqusinitsigut allamilluunniit sutoriartoqqusinitsigut.

14. (a) Oqaatsit suut oqaatsip grækerisuup “inoroorsaarnissaq”-mik nutserneqarsimasup nagguigai? (b) Oqaluussinermi nunami allamiunik qanoq isumassuisinnaavugut?

¹⁴ Inoroorsaarneq allanut isiginnittaatsitsinnut tunngassuteqarpoq. Grækerit oqaasiat “inoroorsaarnissaq”-mik nutserneqarsimasoq oqaatsinit marlunnit “asanninneq”-mik aamma “takornartaq”-mik isumaqartumit naggueqarpoq. Takornartat, imaluunniit nunami allamiut, qanoq misigissuseqarfigaavut? Kristumiut nutaarsiassaq nuannersoq nunami allamiunut ilagiit angalaarfigisartagaannut nuussimasunut oqaluussissutigisinnaaniassagamikku oqaatsinik allanik ilinniarniarlutik iliuuseqangaatsiartut ilumut inoroorsaarnissamik pingaartitsipput. Soorunami ilarpassuavut pissutsit atukkatik pissutigalugit oqaatsinik allanik ilinniarnissamut periarfissaqanngillat. Taamaakkaluartorli tamatta siunertaqarluartumik nunami allamiunik ikiueqataasinnaavugut atuagassiaaraq Godt nyt til folk af alle nationer tusarliussamik Biibilimeersumik oqaatsinut assigiinngitsorpassuarnut nutserneqarsimasumik imalik atorluarlugu. Illit atuagassiaaraq taanna oqaluussinermi atorlugu angusaqarluarsimavit?

Misiginneqataasinnaaneq

15. Kajumissaarut Romamiut 12:15-imiittoq malillugu iliornermut tunngatillugu Jiisusi qanoq maligassiuiva?

¹⁵ Atuaruk Romamiut 12:15. Paulusip versimi tamatumani siunnersuutaa ima eqikkarneqarsinnaavoq: Misiginneqataagit. Allat qanoq misiginerannik paasinninnissaq, allaallu allat misigissusiinik qamuuna misigisaqarsinnaaneq, ilinniartariaqarparput, taakku nuannaaraluarpata aliasukkaluarpataluunniit. Allanik nuannaaqatiginnissinnaanerput misigeqatiginnissinnaanerpulluunniit anersaakkut tamaviaarnitsinnut uppernarsaataassaaq. Jiisusip ajoqersugai ‘70-it’ (1936) oqaluussereerlutik nuannaarlutik utermata angusimasaminnillu nuannersunik oqaluttuarmata Jiisusi “Anersaamit Illernartumit sunnigaalluni qiimmattarpoq”. (Lukasi 10:17-21) Taakku nuannaaqatigai. Ikinngutinili Lazarusi toqummat ‘qiasut qiaqatigai’. — Johannesi 11:32-35.

16. Misigeqatiginnissinnaanerput qanoq atorsinnaavarput, ingammillu kikkut misiginneqataasariaqarpat?

¹⁶ Jiisusip misigeqatiginninnermut tunngatillugu maligassiaa malikkusupparput. Qatanngutitta kristumiut arlaat nuannaaraangat nuannaaqatigerusuttarparput. Taamatuttaaq qatanngutitta naalliuutaat aliasuutaallu pillugit malussajasuuniartariaqarpugut. Uppeqativut qamuuna anniaateqartut nanertuutaannik oqilisaassinnaavavut ilumoorluta misiginneqatigalugit paasinnillutalu tusarnaarnissaannut piffissaqarnitsigut. Ilaannikkullu uagutsinnut oqaluttuarisaat ima attorneqaatigitigisarpavut misiginneqataangaaratta qullilisarluta. (1 Petrusi 1:22) Ingammik utoqqaanertat Paulusip misigeqatiginninnissamik siunnersuutaa malittariaqarpaat.

17. Romamiut 12 maannamut sumik ilinniarfigaarput, allaaserisamilu tulliuttumi suna sammineqassava?

¹⁷ Versit Romamiut kapitali 12-imiittut maannamut sammeriikkavut siunnersuutinik kristumiutut inuunitsinni qatanngutitsinnullu attaveqarnitsinni atorsinnaasatsinnik imaqarput. Allaaserisami tulliuttumi kapitalimi tamatumani versit sinneruttut, ilagiit avataanniittunik — ilaatigut uagutsinnik akerlilersuillutillu malersuisunik — qanoq isiginnittariaqarlutalu pinnittariaqarnitsinnut tunngasut, sammissavavut.

Uteqqiineq

• ‘Anersaakkut tamaviaarnerput’ qanoq ersersissinnaavarput?

• Sooq maniguulluta Guutimut kiffartortariaqarpugut?

• Uppeqatitsinnik qanoq misigeqatiginnissinnaavugut?

[Atuaqqissaarnermi apeqqutit]

[Qupp. 11-mi assiliartat]

Sooq kristumiutut sammisassat makku sammisarpavut?

[Qupp. 13-mi assiliartaq]

Nunami allamiut Guutip naalagaaffia pillugu ilinniarnissaannut tamatta immikkut qanoq ikiorsinnaavavut?