“Inuit tamaasa eqqisseqatiginiarsigit”
“Inuit tamaasa eqqisseqatiginiarsigit”
“Ajornanngippat — ilissi aalajangiisuusinnaagussi — inuit tamaasa eqqisseqatiginiarsigit.” — ROMAMIUT 12:18.
1, 2. (a) Jiisusip malitsini qanoq mianersoqquai? (b) Akerlilersorneqaraangatta qanoq periartarnissamut siunnersuutit sumi nanisinnaavavut?
JIISUSIP ajoqersukkani mianersoqquai silarsuarmi inuiannit akerlilersorneqarumaarnerat pillugu, toqunissaminullu aqaguttoq nassuiarpaa sooq taamaaliornerluni. Apustilini ima oqarfigai: “Silarsuarmit pisuugussi [Silarsuarmut ilaasuugussi, NV] silarsuup nammineq ilamisut asassagaluarpaasi; silarsuarmilli pisuunngilasi [silarsuarmulli ilaanngilasi, NV]. Uangali silarsuarmit qinerpassi, taamaattumik silarsuup uumissorpaasi.” — Johannesi 15:19.
2 Apustilip Paulusip Jiisusip oqaasiisa ilumoornerat misilittakkaminit nalunngilaa. Suleqatiminut inuusuttumut Timotheusimut allakkami aappaanni Paulusi ima allappoq: “[Illit] malitsigaakkit ajoqersuutikkut, inuutsikkut, ilungersornikkut, ilumoorsutsikkut, naammagittarnikkut, asanninnikkut, nikallujuissutsikkut, qinugineqarnikkut naalliunnikkullu.” Taava ima nangippoq: “Guuti mianeralugu Kristusi-Jiisusimi inuujumasut tamarmik qinugineqartarput.” (2 Timotheusi 3:10-12) Paulusi kristumiunut Romamiittunut allakkamini kapitali 12-imi taakkua akerlilersorneqaraangamik qanoq periartarnissaat pillugu pitsaasumik siunnersuuteqarpoq. Taassuma oqaasii maanna naggatissap nalaani najoqqutarisinnaavavut.
‘Inunnut tamanut ajunnginnerusoq eqqarsaatigisarsiuk’
3, 4. (a) Inoqutigiinni upperisaqaqatigiinngitsuni siunnersuut Romamiut 12:17-imiittoq qanoq malinneqarsinnaava? (b) Eqqaamiunut tunngatillugu siunnersuut tamanna qanoq malinneqarsinnaava?
3 Atuaruk Romamiut 12:17. Paulusi nassuiaavoq akeqqersimaarfigineqaraangatta taamaaqataanik akisisassanngitsugut. Taassuma oqaasiinik malinninnissaq ingammik pingaaruteqarpoq inoqutigiinni upperisaqaqatigiinngitsuni. Kristumiup aapparmi oqaatsimigut iliuutsimigulluunniit inussiarniinneranik akiniaanissaminut ussernartorsiornini akiortarpaa. ‘Ajortup ajortoqataanik akiliineq’ kinguneqarluarneq ajorpoq. Pissutsinik ajornerulersitsiinnartarpoq.
4 Paulusip periaaseq pitsaanerungaartoq manna kajumissaarutigaa: “[Inunnut] tamanut ajunnginnerusoq eqqarsaatigisarsiuk.” Nuliaasoq akerleriittoqalersitsinaveersaarsinnaavoq uini upperisaminik isornartorsiuerpalukkaangat inussiarnisaarfigisarlugu. (Ussatit 31:12) Carlos, maanna Betelimi kiffartortoq, oqaluttuarpoq anaanani ataataasup sakkortuumik akerlilersuineranik qanoq ajugaaffiginninnersoq inussiarnertuaannarnermigut peqqissaarlunilu illuleriuaannarnermigut. “Uagut meeqqat ataatatsinnik ataqqinnittuaqqusarpaatigut. Piumasaraa ataataga boules-eqatigisassagiga (franskit pinnguaataat) naak pinnguaat taanna nuannarivallaanngikkaluariga. Pinnguaalli taanna isumagississutigiuaannarpaa.” Carlosip ataataa Biibilimik atuaqqissaartalerpoq kuisillunilu. ‘Inunnut tamanut ajunnginnerusumik eqqarsaatiginninnermut’ tunngatillugu Jehovap Nalunaajaasuisa ajunaarnersuaqartillugu eqqaamiuminnik ikiuinerat pissutigalugu paqumisuttut paqumisukkunnaartarsimapput.
“Aamarsuit aamaartut” atorlugit akerlilersuinermik ‘aatsitsineq’
5, 6. (a) ‘Aamarsuarnik aamaartunik’ akeraasup niaquanut katersuineq qanoq paasisariaqarpa? (b) Illit najukkani misigisamik oqaluttuarit Romamiut 12:20-mi siunnersuummik malinninnerup kinguneqarluartarneranik ersersitsisumik.
5 Atuaruk Romamiut 12:20. Oqaatsit versimi tamatumaniittut allakkamigit Paulusip qularnanngitsumik Ussatit 25:21, 22-mi allassimasut uku eqqarsaatigisimassavai: “Akeqqat kaappat nerleruk imerusuppallu immiguk, taamaalioruit aamarsuit aamaartut niaquanut katersorumaarpatit, tamannalu pillugu [Jehovap] akilerumaarpaatit.” Paulusip Romamiut kapitali 12-imi siunnersuutai eqqarsaatigalugit taassuma aamarsuit assersuutaasut akerlilersuisumik pillaanissamut kanngusutsitsinissamulluunniit atugassatut eqqarsaatigisimanavianngilai. Ussammi tamatumani — Paulusillu Romamiunut oqaasiini assingusuni — saviminernik aatsitseriaasitoqaq eqqarsaatigineqarunarpoq. Charles Bridges, 1800-kkunni Biibilimut tunngasunik oqaaseqartartoq tuluk, ima allappoq: “Savimineq suliariuminaatsoq innermut pisiinnarnagu aammali savimineq aamarsuit aamaartut akornannut ilineqartarpoq, morsutsilluinnarlugu. Uummatit ikittuinnaat ima manngertigipput asanningaarnerup naammagittarlunilu namminissarsiortup nukinganit sakkortuumit aatsinneqarsinnaanatik.”
6 Inussiarnisaarneq ‘aamarsuartut aamaartutut’ akerlilersuisumik qamuuna nuannaajallatsitsisinnaavoq immaqalu akeqqersimaarneranik ‘aatsitsisinnaalluni’. Inussiarnisaarneq pissutigalugu inuit Jehovap kiffaanut kiinneraarnerulersinnaapput, tusarliussarlu Biibilimeersoq taakkua oqaluussissutigisaat tusarnaarusunnerulersinnaavaat. Apustili Petrusi ima allappoq: “Guutimik nalusut akornanni ajunngitsumik inuugitsi, tamatumuunarpiaq taakkua ilissinnik pinerluttuuneraallutik mamarliisartut takusinnaaniassammatigit suliasi ajunngitsut taakkunuunatigullu Guuti unnersiutigisinnaaniassammassuk ullormi takusarneqarfissami.” — 1 Petrusi 2:12.
“Inuit tamaasa eqqisseqatiginiarsigit”
7. Eqqissineq Kristusip ajoqersukkaminut tunniussaa suua, sunissamullu kajumississutigisariaqarparput?
7 Atuaruk Romamiut 12:18. Jiisusip ajoqersukkani naggammik unnussioqatigigamigit ima oqarfigai: “Eqqissinermik qimatsivigaassi, eqqissinermik uanga pinnik tunivassi.” (Johannesi 14:27) Eqqissineq Kristusip ajoqersukkaminut tunniussaa tassaavoq qamuuna eqqissisimaneq taakkua Jehovamit erneranillu asaneqartutut akuerineqartutullu misigigaangamik misigisartagaat. Qamuuna eqqissisimaneq allat eqqisseqatigisarnissaannut kajumississutigisariaqarparput. Kristumiut ilumoortut eqqissinermik nuannarisaqarput eqqisseqatigiissitsisuullutillu. — Matthæusi 5:9.
8. Ilaqutariinni ilagiinnilu qanoq ililluta eqqisseqatigiissitsisuusinnaavugut?
8 Ilaatigut ilaqutariinni eqqisseqatigiissitsisoqarsinnaavoq isumaqatigiinngissutit ingasatsikkaluttuinnartinnagit isumaqatigiinngissutinik sukkanerpaamik aaqqiisarnikkut. (Ussatit 15:18; Efesosimiut 4:26) Ilagiinni kristumiuni aamma taamaattussaavoq. Apustilip Petrusip eqqissinermik noqqaassuteqarneq oqqamik naalatsitsinermut atassuserpaa. (1 Petrusi 3:10, 11) Oqqamik atuineq pillugu aamma sinnganaveersaarnissaq akerleriinnaveersaarnissarlu pillugit siunnersuereerluni Jaaku aamma ima allappoq: “[Ilisimassuseq] pavannga pisoq pingaarnerpaamik minguitsuuvoq, tamatumalu saniatigut eqqissinermik nuannarisaqartuuvoq, saamasuulluni, ilakkuminartuullunilu, nallittuingaartuulluni, ajunngitsunik inerititaqarluni, kinaassusersiortuunani unneqqarissuullunilu. Iluarneq eqqissinermi siaruartikkat inerititaraat, eqqissisitsisullu pisassaraat.” — Jaaku 3:17, 18.
9. ‘Inuit tamaasa eqqisseqatiginiarsarineranni’ suna eqqaamasassavarput?
9 Paulusip Romamiut 12:18-imi allakkamini uparuarpaa ilaqutariinni ilagiinnilu eqqisseqatigiissitsisuunissaq naammanngitsoq. Allappoq ‘inuit tamaasa eqqisseqatiginiassagivut’. Taakkua ilaat tassaapput sanilit, suleqatit, atuaqatit tamanullu oqaluussinitsinni naapittakkavut. Apustilili aamma ima allappoq: “Ajornanngippat — ilissi aalajangiisuusinnaagussi.” Tassa imaappoq, ‘inuit tamaasa eqqisseqatiginiarlugit’ sapinngisatsinnik iliuuseqassaagut, imali iliuuseqarniartigissanngilagut Guutip najoqqutassiai naapertuilluartut unioqqutillugit.
Akiniut Jehovap pigaa
10, 11. Paulusi Romamiut 12:19-imi qanoq siunnersuiva, aamma sooq tamanna naleqquppa?
10 Atuaruk Romamiut 12:19. Suliatsinnik tusarliussamillu oqaluussissutigisatsinnik ‘assortuisuugaluartunulluunniit’, aamma uagutsinnik toqqaannartumik akerlilersuisunut, tunngatillugu ‘atukkavut ajortut naammagissavavut’ saamallutalu. (2 Timotheusi 2:23-25) Paulusip kristumiut siunnersorpai akiniaaqqunagit, ‘Guutilli kamaassineranik periarfisseeqqullugit’. Kristumiuugatta nalunngilarput uagut akiniaasinnaatitaanata. Tussiaasiortoq ima allappoq: “Kamannaveersaarniarit uumitsattarunnaarlutillu, narrutsannaveerit tamanna ajunaarutaaginnartussaammat.” (Tussiaat 37:8) Aamma Salomo ima siunnersuivoq: “Ima oqaqinak: ‘Ajortoq ajortoqataanik akiniassavara,’ [Jehovali] neriuffigiuk, taava ikiorumaarpaatit.” — Ussatit 20:22.
11 Akerlilersuisut ajortumeerpatigut Jehova taakkuninnga nammineq pillaatikkutsigu silatusaassaagut — taassuma taamaaliornissaq naleqqussorippagu. Erseqqippoq Paulusip tamanna eqqarsaatigigaa ima nangikkami: “Allassimasoqarmat: ‘Akiniut pigaara, uanga akiliiumaarpunga,’ oqarpoq [Jehova].” (Naleqqiuguk 5 Mosesi 32:35). Akiniaaniarsarigutta anneruniassaagut Jehovallu kisimi pisinnaatitaaffia, tassa kisimi iliuuseqarfigisinnaasaa, iliuuseqarfiginiarsaralugu. Aamma taamaaliornerput Jehovap akiniaajumaarnerminik neriorsuutaanik upperinnippiannginnitsinnut ersiutaassaaq.
12. Jehovap kamannera qaqugu aamma qanoq saqqummersinneqassava?
12 Paulusi Romamiunut allakkami aallaqqaataatungaani ima allappoq: “[Guutip] kamannera qilammit saqqummersitaasarpoq inuit soqqusaassusiinut iluaassusiinullu tamanut sallusuissut iluaassutsimikkut saqqummitsaaligaangassuk.” (Romamiut 1:18) ‘Annikilliortitaangaarnissaq’ nalliuppat Jehovap kamannera taassuma ernera aqqutigalugu qilammit saqqummersinneqassaaq. (Saqqummersitat 7:14) Tamanna ‘ilimasaarutaassaaq’, imaluunniit uppernarsaataassaaq, “Guutip eqqartuussutaanut naapertuilluartumut”, Paulusip allakkamini isumassarsiarititaasuni allani ima nassuiagaanut: “Guutimmi naapertuilluarnertut isigaa ilissinnik annikilliortitsisut annikilliortitaanermik akilissallugit ilissilu annikilliortitaasusi uagutsinnut ilagitillusi akilissallusi atoruminarsisitsinermik Naalagaq Jiisusi inngilini pissaasut ilagalugit qilammit saqqummersitaappat innermi ikualasorsuarmi, aggiullugu pillaatissaq Guutimik ilisimasaqanngitsunut Naalakkamillu Jiisusimik iivangkiiliumut naalakkumanngitsunut.” — 2 Thessalonikamiut 1:5-8.
Ajortoq ajugaaffigiuk ajunngitsoq atorlugu
13, 14. (a) Sooq akerlilersorneqaraangatta tupaallanneq ajorpugut? (b) Uagutsinnik malersuisut qanoq ililluta pilluaqqusinnaavavut?
13 Atuakkit Romamiut 12:14, 21. Jehovap siunertaminik naammassinninnissaa qularutiginngilluinnarlugu taassuma uagutsinnut suliassiissutaanik suliarinninnermut — ‘Naalagaaffimmik iivangkiiliumik silarsuarmi tamarmi oqaluussissutiginninnermut’ — nukivut tamaasa toqqissisimalluta atorsinnaavavut. (Matthæusi 24:14) Nalunngilarput kristumiutut taamatut kiffartorneq akeraasut kamaatigissagaat, Jiisusimmi ima mianersoqquaatigut: “[Atera] pillugu inuiannit tamanit uumissorneqassaasi.” (Matthæusi 24:9) Taamaattumik akerlilersorneqaraangatta tupaallanneq ajorlutalu nikallorneq ajorpugut. Apustili Petrusi ima allappoq: “Asasakka, innikkut misilinneqarneq atugarsi tupigusuutigissanngilarsi pineqarnersi immikkuuissutut isumaqarfigalugu. Tipaatsugitsili Kristusi anniarnerani peqatigigassiuk.” — 1 Petrusi 4:12, 13.
14 Akerlilersortitsinnut akeqqersimaarnata taakku qaammarsaaviginiarsarisarpavut, nalunnginnatsigu taakkua ilaat paasisimasaqannginnertik pissutigalugu uagutsinnik malersuisut. (2 Korinthimiut 4:4) Paulusip siunnersuutaa una malinniarsaraarput: “Ilissinnik qinuginnittut pilluaqqusigit, pilluaqqusigitsi perloqqusinasi.” (Romamiut 12:14) Akerlilersuisunik pilluaqqusisoqarsinnaavoq taakkua qinnunnerisigut. Jiisusi qaqqami oqaluutsimini ima oqarpoq: “Akeqqasi asasigit, ilissinnillu uumissuisut ajunngitsuliorfigisigit. Ilissinnik perloqqusisut pilluaqqusigit, ilissinnik naalliutsitsisut qinnussigit.” (Lukasi 6:27, 28) Apustilip Paulusip nammineq misigisimasaminit nalunngilaa kristumiunik malersuisut Kristusimut ajoqersuganngorsinnaasut aalajaatsut Jehovamullu kiffanngorsinnaasut aallussilluartut. (Galatiamiut 1:13-16, 23) Paulusi allakkamini allami ima allappoq: “Oqalorujuffigineqaraangatta pilluaqqusisarpugut, qinugineqaraangatta naammagittartarpugut, ajortumik oqaluuserineqartaraangatta inussiarnersumik akisarpugut.” — 1 Korinthimiut 4:12, 13.
15. Ajunngitsoq atorlugu ajortoq pitsaanerpaamik qanoq ajugaaffigineqarsinnaava?
15 Taamaattumik kristumiu ilumoortoq Romamiut kapitali 12-imi versimi kingullermi kajumissaarut una malillugu iliuussaaq: “Ajortumut ajugaaffigitinnaveerit, ajortorli ajugaaffiginiaruk ajunngitsoq atorlugu.” Ajortut tamarmik Saatanimit Diaavulumeersuupput. (Johannesi 8:44; 1 Johannesi 5:19) Apustilimut Johannesimut saqqummersinneqartumi Jiisusip paasinarsisippaa qatanngutimi tanitat ‘[Saatani] ajugaaffigigaat Savaaqqap aavatigut oqaatsitigullu nalunaajaassutigisamikkut’. (Saqqummersitat 12:11) Tamatumannga erserpoq Saatani taassumalu pissutsit aaqqissuussaanerannut maanna atuuttumut sunniipilunnera ajugaaffigissagaanni pitsaanerpaasoq ajunngitsuliorutta nalunaajaanitsigut, aap, Guutip naalagaaffia pillugu nutaarsiassamik nuannersumik oqaluussissutiginninnitsigut.
Neriunninni tipaatsugit
16, 17. Romamiut kapitali 12 sumik ilinniarfigaarput (a) inuunitsinnik qanoq atuinissaq pillugu? (b) ilagiinni qanoq pissusilersornissaq pillugu? (c) upperisatsinnik akerlilersuisunik qanoq pinnittarnissarput pillugu?
16 Paulusip kristumiunut Romamiittunut allagaani kapitali 12-ip samminerani amerlasuunik eqqaasinneqarpugut. Paasivarput Jehovamut kiffaasutut tunniulluinnarsimasutut tamatta immikkut pilliuteqariaannaasariaqarluta. Pilliuteqariaannaanissatsinnullu kajumissisitsisartoq tassaavoq Guutip anersaava silaqassuserpullu iluaqutigalugu Guutip tamatuminnga piumasaqarneranik qularutiginninnginnerput. Anersaakkut tamaviaarpugut tunissutisiavullu assigiinngitsut kajumeqaluta atorlugit. Aamma kristumiutut ataasiussuseqartuarniarluta sapinngisatsinnik iliuuseqartarpugut maniguuttariaqarnitsitut maniguulluta. Inoroorsaarnissaq pingaartipparput ilumoorlutalu misiginneqataasarluta.
17 Romamiut kapitali 12-imi aamma siunnersuuterpassuaqarpoq akerlilersorneqaraangatta qanoq periartarnissarput pillugu. Taamaaqataanik akiniaasariaqanngilagut. Inussiarnersuunitsigulli akerlilersorneqarnerput ajugaaffigissavarput. Sapinngisarpullu tamaat, najoqqutassianik Biibilimiittunik unioqqutitsinata, inuit tamaasa eqqisseqatiginiartariaqarpavut, soorlu ilaqutariinni, ilagiinni, eqqaamiut eqqarsaatigalugit, suliffimmi, atuarfimmi tamanullu oqaluussinitsinni. Akeqqersimaarfigineqaraluarluta sapinngisarput tamaat ajortoq ajugaaffiniartarparput ajunngitsoq atorlugu, eqqaamallugu akiniut Jehovap pigigaa.
18. Pingasut suut Romamiut 12:12-imi kajumissaarutigineqarpat?
18 Atuaruk Romamiut 12:12. Siunnersuutit pitsaasut atoriaannaasullu taakkua tamarmik saniatigut Paulusi ilungersorluni pingasunik kajumissaaruteqarpoq. Jehovamit ikiorneqarnata taakkua iliuuserisinnaanngisaannassagatsigit apustilip siunnersorpaatigut ‘qinunitsinni qasusueqqulluta’. ‘Qinunitsinni qasusuikkutta’ ‘naalliunnitsinni nikallujuinnissamik’ siunnersuutaa malissinnaassavarput. Kiisalu, eqqarsaativut siunissamut Jehovap uagutsinnut neriuutissiissutaanut sammitittariaqarpavut naassaanngitsumillu inuunissamik ‘neriuut’ qilammiugaluarpat nunamiugaluarpalluunniit ‘tipaatsuutigalutigu’.
Uteqqiineq
• Akerlilersorneqarnermut qanoq periassaagut?
• Sutigut eqqisseqatigiissitsisuuniarsarisariaqarpugut, aamma qanoq?
• Sooq akiniaaniassanngilagut?
[Atuaqqissaarnermi apeqqutit]
[Qupp. 16-mi assiliartaq]
Sanilitsinnik ikiuineq paqumisunnermik ajugaaffiginninnissamut iluaqutaasinnaavoq
[Qupp. 17-mi assiliartaq]
Ilagiinni eqqisseqatigiissitsisuuniarlutit iliuuseqartarpit?