Pisuussutit Guutimeersut

GUUTIMUT aalajaattuaruit taassuma pisuunngortissavaatit? Immaqa. Ilimananngilarli illit takorluukkattut pisuunngortitsinissaa. Maria, Jiisusip anaanaa, assersuutigeriartigu. Inngili Gabrieli taassumunnga saqqummerpoq oqarfigalugulu Guutimit ‘saammaassaasoq’ Guutillu erneranik ernertaassasoq. (Lukasi 1:28, 30-32) Maria pigissaartuunngilaq. Jiisusi ernertaarereerlugu ‘tuinik quluartartunik marlunnik imaluunniit tuinik piaqqanik marlunnik’, taamani piitsut Jehovamut pilliutigisartagaannik, pilliuteqarpoq. — Lukasi 2:24; 3 Mosesi 12:8.

Mariap piitsuunera taassuma Guutimit akuerisaannginneranut ersiutaava? Naamik, taassumami eqqarlini Elisabethi pulaaramiuk Elisabethi “Anersaamik Illernartumik ilumiulerneqarpoq nipituumillu nillerluni: ‘Arnat akornanni pilluaqqusaavutit [Maria], ilumiullu pilluaqqusaavoq!’” (Lukasi 1:41, 42) Mariap Guutip erneranut asasaanut anaananngorneq immikkut pisinnaatitaaffigaa.

Jiisusi aamma pisuujunngilaq. Pigissaarfiunngitsumi inunnguinnarnanilu peroriartuinnanngilaq, aammali nunarsuarmi inuunini tamaat piitsuuvoq. Ilaanni angut ajoqersukkaminut ilaalerumasoq ima oqarfigaa: “Terianniat siseqartarput qilaallu timmiai ulloqartarlutik, Inuulli Ernera niaqquminut iigarfissaqanngilarluunniit.” (Lukasi 9:57, 58) Jiisusilli nunarsuarmukarnermigut ajoqersukkami pisuussuteqangaalernissaat ajornarunnaarsippaa. Apustili Paulusi ima allappoq: “Ilissi pillusi [piitsunngorpoq] piitsuunermigut ilissi pisuunngoqqullusi.” (2 Korinthimiut 8:9) Jiisusip ajoqersukkani sunik pisuussuteqalersippai? Aamma pisuussutit suut ullumikkut pisinnaavavut?

Pisuussutit suut?

Pigissaarneq uppernermut akornutaagajuppoq, pisuummi aningaasaatini Guutiminngarnit tutsuigineroqqajaasinnaavai. Jiisusi ima oqarpoq: “Guutip naalagaaffianut isernissap pisuunut ila ajornassusia!” (Markusi 10:23) Taamaammat Jiisusip ajoqersukkani nunap piisigut pisuussutinik neriorsorsimanavianngilai.

Ukiuni hundredelinni siullerni kristumiut amerlanersaat piitsuupput. Angutip inunnguuserisaminik innarluutillip aningaasanik qinnuigimmani Petrusip taanna ima akivaa: “Sølvimik kuultimilluunniit peqanngilanga, pigisannilli tunissavakkit: Jiisusi-Kristusip  Nazaretimiup aqqani nikuigit pisullutillu!” — Apustilit Suliaat 3:6.

Aamma ajoqersukkap Jaakup allagaanit erserpoq ilagiinni kristumiuniittut amerlanersaat piitsuusut. Ima allappoq: “Tusariaritsi, qatanngutikka asanartut: Guutip silarsuarmi piitsut qinersimannginnerpai uppernikkut pisuujusussanngortillugit kingornussisussanngortillugillu naalagaaffimmik imminik asannittunut neriorsuutigisaminik?” (Jaaku 2:5) Aammattaaq apustili Paulusi allappoq ‘ilisimasuusut amerlanngitsut’, ‘pissaaneqartut amerlanngitsut’ ‘akimasullu amerlanngitsut’ ilagiinnut kristumiunut ilaaqqullugit qaaqqusaasut. — 1 Korinthimiut 1:26.

Jiisusip ajoqersukkani nunap piisigut pisuussutinik tunisimanngikkunigit, taava sunik tunisimassavai? Jiisusip ilagiit Smyrnamiittut ima oqarfigai: “Ilisimavakka annikilliortarnitit piitsuussutsillu — pisuujuvutilli!” (Saqqummersitat 2:8, 9) Kristumiut Smyrnamiittut piitsuugaluarlutik kuultimit sølvmillu naleqarnerungaartunik pisuussuteqarput. Pisuujupput Guutimut upperamik taassumunngalu qanittumik attaveqaramik. Upperneq immikkorluinnaq ittuuvoq, erlinnartuuvoq, “imaanngimmammi tamarmik upperneq pigigaat”. (2 Thessalonikamiut 3:2) Uppissuseqanngitsut Guutip isaani piitsuupput. — Saqqummersitat 3:17, 18.

Uppernertik pissutigalugu pisuut

Uppernerulli naleqangaarnera qanoq paasisariaqarami? Guutimut uppertut taassuma “ajunngitsuunera kamaginninneralu kamajuinneralu” iluaqutigisarpaat. (Romamiut 2:4) Aamma Jiisusip utertitsissutitut pilliutaa upperigamikku ‘ajortiminnik isumakkeerfigineqartarput’. (Efesosimiut 1:7) Aammattaaq uppertut ‘Kristusip oqaasia’ pissutigalugu ilisimassuseqalersarput. (Kolossemiut 3:16) Guutimut upperlutik qinugaangata “eqqissinerup  Guutimit pisup siuneqassusernit tamanit annerungaartup” taakku uummataat isumaallu sernigisarumaarpai, tamannalu pillualissutigalugulu nalerisimaalissutigissavaat. — Filippimiut 4:7.

Tamakkua tamarmik saniatigut Guutimut erneranullu, Jiisusimut Kristusimut, uppertut naassaanngitsumik inuunissamik nuanningaartumik neriuuteqarput. Jiisusip oqaasii uku ilisimaneqarluarput: “[Guutip] silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.” (Johannesi 3:16) Neriuut erlinnartoq tamanna sakkortunerulertarpoq Ataataq Ernerlu pillugit eqqorluartumik ilisimasaqaleraanni, Jiisusimi aamma ima oqarpoq: “[Inuuneq] naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.” — Johannesi 17:3.

Guutip pilluaqqussutigisartagai anersaakkut ittuunerusarput, aammali misigissutsikkut timikkullu iluaqutaasarput. Assersuutigeriartigu Dalídio Brasiliamiittoq. Guutip siunertaa pillugu eqqorluartumik ilisimasaqalinngikkallarami imigassamik ajornartorsiuteqarpoq. Tamanna ilaquttaminut attaveqarneranut ajortorujussuarmik sunniuteqarpoq. Aamma aningaasatigut atugarisai nalorninarput. Taava Jehovap Nalunaajaasuinit Biibilimik atuaqqissaaqatigineqartalerpoq, maluginiarnartunillu allannguivoq.

Dalídiop paasisani ileqqupilumminik taamaatitsissutigai, aamma anersaakkut siumukartupilussuuvoq. Ima oqarpoq: “Siornatigut imerniartarfimmiit imerniartarfimmut angalaartarpunga; maanna illumiit illumut angalaartarpunga.” Ullumikkut piffissaq tamaat oqaluussisartuuvoq. Taamatut allannguinini peqqissutsimigut iluaqutigiinnarnagu aammali aningaasatigut iluaqutigaa. Dalídio oqaluttuarpoq: “Aningaasat imigassamut atortarnikuusakka maanna annikilliortunik ikiuinermut namminerluunniit pisariaqartitannut atortarpakka.” Aamma anersaakkut ittunut immisut isiginnittaasilinnik peqateqartarnermigut pitsaasunik ikinngutitaartorpoq. Dalídio Guutimik ilisarisimannilerniarluni iliuuseqanngikkallarami takorloorsimanngisaannakkaminik maanna assut nalerisimaarlunilu qamuuna eqqissisimavoq.

Renatop misigisimasai Jehovamut uppernerup inuunermut qanoq pisuunnguallaataasartigineranut takussutissaapput. Ullumikkut kiinaa nuannaarpasillunilu qungujulaartoq takugaanni taassuma inuunermini atugarliorsimasutut misiginissamut pissutissaqarluarnera upperiuminaappoq. Inunngoqqammersoq anaanaata taanna pooqattap iluaniitillugu issiaartarfiup ataanut qimappaa. Assut peqqarniitsumik pineqarsimavoq, aamma qalasia kipineqarsimanngilaq. Arnat marluk saneqquttut pooqattaq issiaartarfiup ataaniittoq aalariartoq takuaat. Siullermik eqqarsarput qitsuaqqamik tassunga qimatsisoqarsimasoq. Paasigamikku naalungiaasoq inoorlaaq napparsimmavimmut qanittumiittumukaatipallappaat nakorsamit ikiorneqarsinnaaniassammat.

Arnap aappaa Jehovamut nalunaajaasuuvoq, taassumalu Rita, uppeqatini, naalungiaq pillugu oqaluttuuppaa. Rita arlaleriarluni toqungasunik ernisarsimavoq ataasiinnarmillu paneqarluni. Ernertaarusuttupilussuuvoq, taamaammat aalajangerpoq Renato qitornavissiartaariniarlugu.

Renato suli mikisuusorli Ritap oqaluttuuppaa anaanaviginngikkaani. Asannittumilli isumassorpaa najoqqutassianillu Biibilimeersunik  ilinniartinniarlugu iliuuseqarsuataarluni. Renato alliartortilluni Biibilimik soqutiginninnerujartuinnarpoq. Aamma tupinnartumik annaanneqarnerminik qujamasuutiginninnerujartuinnarpoq. Tussiaasiortup Daavip oqaasii uku atuaraangamigit tamatigut assut killitsittarpoq: “Ataatama anaanamalu qimappaannga [Jehovalli] imminut pisippaanga.” — Tussiaat 27:10.

Renato Jehovap imminut iliuuserisimasaanik qujamasuutiginninnini ersersinniarlugu 2002-mi kuisippoq aappaaguanilu piffissaq tamaat kiffartortunngorluni. Suli naluaa kikkut angajoqqaaviginerlugit, aamma paasinngisaannassagunarpaa. Renatoli misigivoq tunissutisiarisimasani naleqarnerpaaq tassaasoq Jehovamik ilisarisimannilerlunilu upperfiginnilersimanini, Ataatamisut asannittutut isumassuisutullu isigalugu.

Immaqa inuuninnut pisuunnguallaataasumik Guutimut qanittumik asannittumillu attaveqalerusungaarputit. Jehovamut Guutimut taassumalu erneranut, Jiisusimut Kristusimut, taamatut attaveqalernissamut kikkut tamarmik — pisuut piitsullu — periarfissaqarput. Ilumoorpoq tamanna pigisatigut pisuunnguutaanavianngitsoq, pisiarineqarsinnaanngitsumilli nalerisimaarutaallunilu qamuuna eqqissinassaaq. Aap, Ussatit 10:22-mi allassimasoq una ilumoorpoq: “[Jehovap] pilluaqqusinera pisuunngortitsisaraaq, erloqinartumillu ilasarinngilaa.” (1900)

Jehovap imminik ilisarisimannilerusuttut assut soqutigai, soorlu matumani ersertoq: “Ilumulli inassutikka tusaaniarsimagaluarukkit taava eqqississutissat ilissagaluarpoq kuussuartut, iluassutsillu immap malingisut.” (Esaja 48:18) Aamma neriorsuivoq eqqortumik pissutiginiagaqarlutillu isiginnittaaseqarlutik imminut qanillisut akissarsisinneqangaarumaartut: “Qanilaarnerup Guutimillu mianerinninnerup akissarsiarititaat tassaapput pisuussutit ataqqinaallu inuunerlu.” — Ussatit 22:4.

[Qupp. 6-mi issuagaq]

Guutimut upperneq eqqissinarlunilu pilluarnarlunilu nalerisimaarnarpoq

[Qupp. 5-mi assiliartaq]

Jiisusip ilaqutai nunarsuarmiittut piitsuupput, Guutimilli pilluaqqusaangaarput