Silarsuarmi asannissuseqanngiffiusumi qanoq ikinngutigiittuartoqartartoq

“Ilissinnut inassutiga tassa asaqatigiissasusi.” — JOHANNESI 15:17.

1. Sooq ukiuni hundredelinni siullerni kristumiut qanimut ikinngutigiittuartariaqarpat?

JIISUSIP nunarsuarmi inuttut inuunermini unnummi kingullermi ajoqersukkani ilumoorfiginnittut kajumissaarpai ikinngutigiittuaqqullugit. Unnummi tamatumani siusinnerusukkut oqarsimavoq asaqatigiinnerat imminut ajoqersugaanerannut ilisarnaataassasoq. (Johannesi 13:35) Apustilit qanimut ikinngutigiittuartariaqarput siunissami misilinneqaatissatik naammagalugit atorsinnaaqqullugit aamma Jiisusip qanittukkut suliassiissutissaa naammassisinnaajumallugu. Ilumullumi ukiuni hundredelinni siullerni kristumiut ataavartussamik Guutimut tunniusimanertik imminnullu tunniusimaffigeqatigiinnertik ilisimaneqaatigaat.

2. (a) Sunissarput aalajangiusimavarput, aamma sooq? (b) Apeqqutit suut sammissavavut?

² Ullumikkut silarsuaq tamakkerlugu peqatigiissortanut ukiuni hundredelinni siullerni kristumiut maligassiaannik malinnittunik ilaasortalinnut ilaaneq nuannaarutaangaarpoq! Aalajangiusimavarput Jiisusip piviusumik asaqatigiinnissamik peqqussutaata naalannissaa. Inuilli amerlanersaat ulluni kingullerni makkunani ilumuunngitsuullutillu asanniuitsuupput. (2 Timotheusi 3:1-3) Ikinngutigiinnerat qalliinnarsiortuugajuppoq namminnerlu iluaqutigisinnaasaannik tunngaveqartarluni. Kristumiutut ilumoortutut kinaassuserput attakkumallugu isiginnittaaseq tamanna uagut isiginnittaaserissanngilarput. Taamaattumik apeqqutit uku sammeriartigit: Ikinngutigiilluarnermut suna tunngaviua? Qanoq ililluta pitsaasunik ikinngutitaarsinnaavugut? Qaqugukkut ikinngutitta ilaat ikinngutigiunnaartariaqarsinnaavavut? Qanorlu ililluta ikinngutit ineriartornartut ikinngutigiuarsinnaavavut?

Suut ikinngutigiilluarnermut tunngaviuppat?

3, 4. Ikinngutigiilluarnerit sumik tunngaveqarpat, aamma sooq?

³ Ikinngutigiilluarneq Jehovamik asanninnermik tunngaveqarpoq. Kunngi Salomo ima allappoq: “Kisimiittoq sapilerluni aqullaartitaasarpoq; marluusulli artorsartitaanatik akiuussinnaapput. Allunaasaq pingasulik kittorajaatsuuvoq.”  (Oqaluussisartup oqaasii 4:12) Jehova ikinngutigiinnermi pingajuuppat ikinngutigiinneq ataavassaaq.

⁴ Soorunami aamma Jehovamik asanninngitsut pisuunnguallaataasunik ikinnguteqarsinnaapput. Inuilli Guutimik asanneqatigiinnertik tunngavigalugu imminnut qanillippata ikinngutigiinnerat aalajaalluinnassaaq. Paatsuuisoqartillugu ilumoortumik ikinngutigiittut Jehovamut nuannaarutaasumik imminnut pisassapput. Aamma Guutimik akerlilersuisut avissaartuutsitsiniarsarigunik paasissavaat kristumiut ilumoortut ikinngutigiinnerat ataavartuusoq. Oqaluttuarisaanerup ingerlanerani Jehovamut kiffaasut uppernarsarsimavaat imminnut killuutiginissaminngarnit toqorusunnerullutik. — Atuaruk 1 Johannesi 3:16.

5. Sooq Ruthi No’omilu taama ikinngutigiilluartigaat?

⁵ Nalerisimaarnarnerpaamik ikinngutigisinnaasavut qularnanngitsumik tassaapput Jehovamik asannittut. Eqqarsaatigeriakkit Ruthi No’omilu. Arnat marluk taakku ikinngutigiinnerat Biibilimi oqaluttuarineqartut nersortariaqarnerpaartaasa ilagaat. Sooq taakku taama ikinngutigiilluartigaat? Tamanna Ruthip No’omimut oqaasiinit erserpoq: “Inuiaqatitit uangattaaq inuiaqatigissavakka, illillu Guutit uangattaaq Guutigissavara. . . . [Jehovap] pillaqattaartuarilinga ilinnit avissaassagaluaruma, toqummi kisimi avissaartissinnaavaatigut!” (Ruthi 1:16, 17) Erseqqippoq Ruthi No’omilu Guutimik asanningaartuusut, asanninnertillu tamanna imminnut iliorfigeriaatsiminnut sunniuteqartippaat. Tamatuma kingunerisaanik arnat taakku Jehovamit pilluaqqusaapput.

Qanoq ililluni pitsaasunik ikinngutitaartoqartartoq

6-8. (a) Qanimut ikinngutigiinnerit sumik tunngaveqarpat? (b) Ikinngutitaarniarlutit qanoq ilillutit siulliullutit iliuuseqarsinnaavit?

⁶ Ruthimik No’omimillu oqaluttuamit erserpoq nalaatsornerinnakkut ikinngutigiilluartoqalerneq ajortoq. Ikinngutigiilluarnerit Jehovamik asanneqatigiinnermik tunngaveqarput. Ikinngutigiinnerilli ataavassappata assut iliuuseqartariaqarlunilu imminut pilliutigeriaannaasariaqarpoq. Allaat qatanngutigiit ilaqutariinni kristumiuni peroriartortut Jehovamillu pallorfiginnittut qanimut ikinngutigiinnermik ineriartortitsiumallutik iliuuseqartariaqarput. Taavami pitsaasunik ikinngutitaarumallutit qanoq iliorsinnaavit?

⁷ Siulliullutit iliuuseqarit. Apustilip Paulusip ikinngutini Romami ilagiinniittut kajumissaarpai ‘inoroorsaartaqqullugit’. (Romamiut 12:13) Inoroorsaarnermut ilaavoq annikitsunnguamilluunniit aalajangersimasumik iliuuseqallattaasarneq. Allat illit sinnerlutit inoroorsaarsinnaanngillat. (Atuaruk Ussatit 3:27). Inoroorsaarsinnaavutit ilaatigut ilagiinniittunik assigiinngitsunik neriartoqqusilaartarnikkut. Illit akuttunngitsumik taamatut aalajangersimasumik inoroorsaartarsinnaavit?

⁸ Aamma ikinngutitaarniarlutit siulliullutit iliuuseqarniarsinnaavutit assigiinngitsunik oqaluussiartoqatiserinnittarnikkut. Angalaarfigisartakkanni oqaloqateqartillusi angalaaqativit uummammiuni oqaluuserigai Jehovamillu asanninnerminik ersersitsisoq tusarnaarukku qatanngutinnut qaninnerusutut misiginngitsoorsinnaanngilatit.

9, 10. Paulusi qanoq maligassaalluarpa, aamma qanoq ilaarsinnaavarput?

 ⁹ Tunniusimanikkut ‘ammarit’. (Atuakkit 2 Korinthimiut 6:12, 13). Ilagiinni ataasinnguamilluunniit qanimut ikinngutitaarsinnaanngitsutut misiginikuuit? Taamaappat imaassinnaava illit ikinngutigilersinnaasattut isigisatit killeqartikkitit? Apustili Paulusi ammarnermut inunnullu amerlanernut tunniusimanermut tunngatillugu maligassaalluarpoq. Siullermik juutiunngitsunik qanimut ikinnguteqalernissani eqqarsaatiginngilluinnarsimagaluarpaa. Taamaakkaluartorli ‘Guutimik nalusunut apustiliulerpoq’. — Romamiut 11:13.

¹⁰ Paulusip aamma ukioqatini kisiisa ikinngutigilinngilai. Assersuutigalugu taanna Timotheusilu qanimut ikinngutigiipput ukioqatigiinngikkaluarlutik assigiinngitsunillu tunuliaqutaqaraluarlutik. Ullumikkut inuusuttorpassuit ilagiinniittunik imminnit angajulliusunik ikinnguteqarnertik qujamasuutigaat. Vanessa 20-t sinnilaarlugit ukiulik ima oqaluttuarpoq: “Arnamik 50-it sinnerlugit ukiulimmik assut qanitannik ikinnguteqarpunga. Ikinngutinnut ukioqatigisannut oqaluttuarisinnaasakka tamaasa taassumunnga oqaluttuarisinnaavakka. Aamma isumagilluartaqaanga.” Qanoq ililluni taamatut ikinngutigiilertoqartarpa? Vanessa ima oqarpoq: “Taanna ikinngutigilerumallugu nammineq iliuuseqartariaqarpunga ikinngutigiilernissarput utaqqiinnarnagu.” Illit ukioqatiginngisannik ikinnguteqalernissannut kajumissuseqarpit? Jehovap iliuuseqarnerit pillugu qularnanngilluinnartumik akissarsisissavaatit.

11. Jonatanimik Daavimillu oqaluttuaq sumik ilinniarfigisinnaavarput?

¹¹ Ilumoorfiginnigit. Salomo ima allappoq: “Ikinngutaasup asannissutsi tamatigut takutittarpaa, qatanngutaasorlu erniusimavoq annikilliornermi ikiortissaalluni.” (Ussatit 17:17) Salomop oqaatsit taakku allakkamigit ataatami Daavip Jonatanillu ikinngutigiinnerat eqqarsaatigisimasinnaavaa. (1 Samueli 18:2) Kunngip Saulip kissaatigaa ernini Jonatani kunnginngussasoq. Jonatanilli Daavip tamatuminnga immikkut pisinnaatitaaffeqarnissamut Jehovamit toqqagaanera akueraa. Jonatanip Saulitut pinnani Daavi sinngaginngilaa. Taassuma Daavip Israelikkunnit unnersiutigineqarnera ajuallaatiginngilaa, aamma Saulip taassuminnga oqaatissuaatiginnissutai upperinngilai. (1 Samueli 20:24-34) Uagut Jonatanitut ippugut? Ikinngutivut ilagiinni suliassaqaleraangata nuannaaqatigisarpavut? Atugarlioraangata tuppallersarlugillu tapersersortarpavut? Ikinngutitsinnik ajortumik oqaatissuaatiginnittoqaraangat uppiasarpugut? Imaluunniit Jonatanip pisimaneratut ilumoorfiginnilluta ikinnguterput illersortarparput?

 Ikinngutit ikinngutigiunnaartariaqaraanni

12-14. Biibilimik atuaqqissaaqatigineqartartut sunik unamminiagassaqarpat, qanorlu ikiorsinnaavavut?

¹² Biibilimik atuaqqissaaqatigineqartartoq inuunermini allannguisaleruni ikinngutinut tunngatillugu imaannaanngitsunik unamminiagassaqalersinnaavoq. Immaqa nuannarisaminik, ileqqussatigulli najoqqutassiat Biibilimiittut naapertorlugit inuunngitsunik, ikinnguteqarpoq. Siornatigut immaqa akuttunngitsumik ilagisarsimavai. Maannali paasivaa ikinngutimi sammisartagaat imminut ajortumik sunniuteqarsinnaasut, misigivorlu taakkununnga attaveqartarnini killilertariaqarlugu. (1 Korinthimiut 15:33) Aammattaarli immaqa misigivoq taakku ilagisanngikkunigit taakku ilumoorfiginagit.

¹³ Biibilimik atuaqqissaartaruit tamatuminngalu unamminiagassaqaruit, taava eqqaamajuk ikinngutip ilumoortup inuuninnik pitsanngorsaaniarnerit nuannaarutigissagaa. Taanna immaqa allaat Jehova pillugu paasisaqarusulissaaq. Ikinngutilli ilumuunngitsut ‘mitaatigissavaatsit’ ‘inuunerloqatiginnginnakkit’. (1 Petrusi 4:3, 4) Taakkuuku ilumoorfiginninngitsut — illiunngitsoq.

¹⁴ Biibilimik atuaqqissaaqatigineqartartut ikinngutinit Guutimik asanninngitsunit alarneqaraangata ilagiinnut ilaasortaasut taassuma ikinnguteqarnissamik pisariaqartitsinera matussusersinnaavaat. (Galatiamiut 6:10) Illit ilagiinni Biibilimik atuaqqissaaqatigineqartartut ataatsimiinnernilu najuuttartut nalunngiligit? Katerisimaarnernut ineriartornartunut qaaqqunissaannut ilaannikkut periarfissaqartarpit?

15, 16. (a) Ikinngut Jehovamut kiffartorunnaarpat qanoq periassaagut? (b) Guutimik asanninnerput qanoq ililluta uppernarsarsinnaavarput?

¹⁵ Taavami ikinngut ilagiinneersoq Jehovamik tunussiniarluni aalajangerpat, immaqalu allaat ilaajunnaarsitaasariaqarpat? Tamanna assut annikilliornarsinnaavoq. Qatanngutip arnap qanimut ikinngutimi Jehovamut kiffartorunnaarnerata imminut sunniutaa ima oqaluttuaraa: “Sequmiivippunga. Isumaqarlunga ikinngutiga sallusuissummi nukittusoq, taamaanngilarli. Eqqarsarpunga taanna Jehovamut kiffartorsimanersoq ilaquttani nuannaartinniaannarlugit. Tamanna pissutigalugu nammineq pissutiginiakkakka isumaliutigaakka. Eqqortunik pissuteqarlunga Jehovamut kiffartorpunga?” Qatanngut arnaq qanoq piva? Ima oqarpoq: “Nanertuutigisakka Jehovamut tunniuppakka. Jehovap peqatigiissortaani ikinngutitaarsinnaanera pissutigiinnarnagu Jehovamik asanninnerma taassumunnga ersersinnissaa aalajangiusimavara.”

¹⁶ Guutimut ikinngutaajuarnissarput naatsorsuutigissanngilarput silarsuarmut ikinngutaaniarlutik aalajangertunut ililiukkutta. Ajoqersugaq Jaaku ima allappoq: “Nalugassiuk silarsuarmut ikinngutaaneq tassaasoq Guutimik akerartuineq? Silarsuarmut ikinngutaajumasoq Guutimut akeranngortarpoq.” (Jaaku 4:4) Guutimik asanninnerput uppernarsarsinnaavarput ikinngummik annaasaqarnermik akuerinninnissamut ikiorumaaraatigut qularutiginagu ilumoorfiginnittuarutta. (Atuaruk Tussiaat 37:28). Qatanngut arnaq issuarneqartoq taanna ima eqikkaavoq: “Paasivara allat Jehovamik uagutsinnilluunniit asanninnissaannut pinngitsaalisinnaanngikkivut. Inuup nammineq aalajangigassaraa.” Ilagiinniiginnartulli ineriartornartumik ikinngutigiuarumallugit qanoq iliorsinnaavugut?

Qanoq ililluni ikinngutigiilluartuartoqartartoq

17. Ikinngutigiilluartut imminnut qanoq oqaluuttarpat?

¹⁷ Attaveqatigiilluarneq ikinngutigiinnermut pingaaruteqarluinnarpoq. Ruthi No’omilu, Daavi Jonatanilu aamma Paulusi Timotheusilu pillugit oqaluttuat Biibilimiittut atuaraangakkit qularnanngitsumik maluginiartarpat ikinngutigiilluartut ammasumik, ataqqinnittumilli, oqaloqatigiittartut. Attaveqatigeeriaaserisariaqagarput pillugu Paulusi ima allappoq: “Tamatigut oqaluttassaasi inussiarnersumik tarajulimmillu.” Paulusip matumani eqqartorpaa  ‘ilaginngisavut’, tassa kristumiutut qatanngutiginngisavut, qanoq oqaloqatigisassagivut. (Kolossemiut 4:5, 6) Upperisaqaqatiginngisavut ataqqinnittumik oqaluuttariaqarutsigit, uppeqativut ilagiinniittut ataqqinnittumik oqaluuttariaqarnerungaassavavut!

18, 19. Ikinngummit kristumiumit siunnersorneqarnerput qanoq periarfigisariaqarparput, aamma utoqqaanertat Efesosimiittut tamatumunnga tunngatillugu uagutsinnut qanoq maligassiuippat?

¹⁸ Ikinngutigiilluartut ikinngutimik isumaannik pingaartitsisarput, taamaattumillu inussiarnersumik isertuanngitsumillu attaveqatigiittariaqarput. Kunngi Salomo silatooq ima allappoq: ‘Uuliap tipigissaatillu uummat tipaatsutsittaraat, ikinngutaasulli alianaassusia taamaappoq siunnersuut tarnip pia pissutigalugu.’ (Ussatit 27:9, 1900) Ikinngutip ilinnut siunnersuutai taamatut isigisarpigit? (Atuaruk Tussiaat 141:5). * Ikinngutit illit iliuuserisannik isumakuluutiginninnerarpat qanoq periassavit? Ikinngutivit oqaasii ilumoorfiginnilluni tunniusimanermut ersiutitut isigisarpigit, imaluunniit ajuallattarpit?

¹⁹ Apustilip Paulusip ilagiinni Efesosimiittuni utoqqaanertanut qanimut attaveqarnini nuannaarutigaa. Qularnanngitsumik angutit taakkua ilaat uppertunngormatali ilisarisimavai. Naggammilli naapeqatigigamigit toqqarlugit siunnersorpai. Taakku qanoq periarpat? Paulusip ikinngutai ajuallanngillat. Imminnik soqutiginninnera qujamasuutigaat, allaallu qiapput taassuma takoqqinnginnissaa eqqarsaatigiinnarlugu. — Apustilit Suliaat 20:17, 29, 30, 36-38.

20. Ikinngut asannittoq qanoq iliussava?

²⁰ Ikinngutaalluartut pitsaasunik siunnersortiinnaratik aamma namminneq siunnersuisarput. Soorunami nalunngittariaqarparput qaqugukkut uagut ‘nammineq pisassavut aallutarissanerlugit’. (1 Thessalonikamiut 4:11) Aamma paasisariaqarparput tamatta immikkut ‘Guutimut nassuertussaalluta’. (Romamiut 14:12) Pisariaqaraangalli ikinngutip asannittup qatanngutini Jehovap najoqqutassiai pillugit eqqaasittassavaa. (1 Korinthimiut 7:39) Assersuutigalugu illit qanoq iliussagaluarpit ikinngutivit aappaqanngitsut ilaata uppinngitsumik sammisaqalernera malugigukku? Ikinngutigiinnissi ajoqusernissaa annilaangagalugu isumakulunnerit oqaatiginngiinnassaviuk? Imaluunniit qanoq iliussagaluarpit siunnersuutit ikinngutivit sumiginnarpagu? Ikinngutaalluartoq unioqqutitsisumik ikiuiniarnermini paarsisunut asannittunut ikioqqulluni saaffiginnissaaq. Taamaaliussagaanni sapiitsuusariaqarpoq. Ikinngutigiinnerli Jehovamik asanninnermik tunngavilik ataavartumik ajoquserneqarnavianngilaq.

21. Tamatta ilaannikkut susarumaarpugut, kisianni sooq ilagiinni ikinngutigiilluartuarnissaq pingaaruteqarpa?

²¹ Atuakkit Kolossemiut 3:13, 14. Ilaannikkut ikinngutivut uagutsinnut ‘assuarliutissaqartinngitsoorsinnaaneq’ ajorpavut, aamma taakku uagut paamitsaatigisatsinnik iliuuseqartarumaarput. Jaaku ima allappoq: “Tamatta amerlasuunik kukkussuteqartarpugut.” (Jaaku 3:2) Qanorli ikinngutigiilluartiginermut aalajangiisuusoq tassaanngilaq immitsinnut qanoq ajortuliorfigikulatiginerput, tassaavorli ajortumik pineqarsimasutut misiginitsinnut pissutaasunik qanoq isumakkeerfiginnilluinnartigisarnerput. Ammasumik attaveqatigiinnikkut isumakkeerfiginneriaannaanikkullu ikinngutigiilluarnermik ineriartortitsinissaq pingaaruteqaqaaq! Taamatut asannittuliortarutta, tamanna tassaassaaq “ataasiussutsip qilerutaa naammalluinnartoq”(NV). (w09 10/15-E)

[Quppernerup ataani ilanngussaq]

Qanoq akissavit?

• Qanoq ililluta pitsaasunik ikinngutitaarsinnaavugut?

• Ikinngut qaqugukkut ikinngutigiunnaartariaqarpa?

• Ikinngutigiilluartuarumalluni qanoq iliortariaqarpa?

[Atuaqqissaarnermi apeqqutit]

[Qupp. 25-mi assiliartaq]

Ruthip No’omillu ikinngutigiilluarnerat sumik tunngaveqarpa?

[Qupp. 26-mi assiliartaq]

Illit akuttunngitsumik inoroorsaartarpit?