Guutimut kiffaasutut pissuserissuugitsi

“Guuti maligassarisiuk.” — EFESOSIMIUT 5:1.

1, 2. (a) Sooq pissuserissuunissaq pingaaruteqarpa? (b) Allaaserisami matumani suna sammissavarput?

ATUAKKIORTOQ Sue Fox pissusilersuutissat naleqquttut pillugit atuakkiamini ima allappoq: “Pissuserissaartuartariaqarpugut. Inussiarnisaarneq sumi tamani sunniuteqarluartuaannarpoq.” Inuit inussiarnersuuneq ileqquliunniarunikku allanik ilaqarnerminni ajornartorsiuteqannginnerulissapput amerlasuutigullu ajornartorsiutaarutivissallutik. Tamatumali akerlianik aamma pisoqarsinnaavoq. Allanik inussiarniitsumik pinninneq saqitsaannermik, kamannermik isumalunnermillu kinguneqartarpoq.

² Ilagiit kristumiut amerlanerpaatigut pissuserissuuneq ilisarnaatigisarpaat. Mianersortariaqarpugulli pissusilunneq ullumikkut silarsuarmi nalinginnaasoq pissuserileqqunagu. Tamatumunnga tunngatillugu najoqqutassiat Biibilimiittut qanoq illersuutigisinnaanerivut inuillu pallorfiginninnermut ilumoortumut taakku qanoq kajungilissutigisinnaaneraat misissoriartigu. Pissuserissuuneq qanoq paasisariaqarnersoq paasiumallugu Jehovap Guutip erneratalu maligassiaat sammissavavut.

Jehova taassumalu ernera — pissuserissuunermut tunngatillugu maligassiuisut

3. Jehova inussiarnisaarneq pissuserissaarnerlu eqqarsaatigalugit qanoq maligassaalluarpa?

³ Jehova Guuti tamatumunnga tunngatillugu maligassaalluarnerpaavoq. Qilammi nunamilu Kisimi Oqartussaasuugaluarluni inunnik inussiarnisaarfiginningaarlunilu ataqqinningaarpoq. Oqaasinnguaq hebræerisooq, na’, Jehovap Aaperaamut atorpaa, tuluttut “please”-mik nutserneqarajuttoq, kalaallisut uiguummik “-riassasutit”-mik matumani nutserneqarsimasoq. (1 Mosesi 13:14) Kiffani kukkugaangata “[Guutiusarpoq] naakkinnittuullunilu saammaasoq, kamajaatsoq, ilumoorsusermik sallusuissummillu peqangaartoq”. (Tussiaat 86:15) Inuit ilaannit allat piumasaqaatiminnik eqqortitsinngikkaangata kammasertartunit allaanerulluinnarpoq.

4. Allat oqaluukkaangatigut Jehova qanoq ilaarsinnaavarput?

⁴ Guutip pissuserissuunera aamma taassuma inunnut tusarnaariaasianit erserpoq. Aaperaap Sodomami innuttaasunut tunngatillugu aperisaqattaarmani Jehovap taassuma apeqqutai tamaasa naammagittarluni akisaqattaarpai. (1 Mosesi 18:23-32) Aaperaamik isumakululluni apersortumik tusarnaarnini piffissaajaatitut isiginngilaa. Jehovap kiffami qinnutaat tusarnaartarpai ajortuliortullu peqqissimisut torlorfiginninneri tusartarlugit. (Atuakkit Tussiaat 51:13, 19). Uagut allat oqaluukkaangatigut tusarnaartarneratigut Jehova ilaartariaqarparput, ilaa?

5. Jiisusip inussiarnisaarneranik ilaarsineq qanoq allanut attaveqarluarnerulissutigisinnaavarput?

⁵ Jiisusip Kristusip Ataatani amerlasuunik ilinniarfigaa, ilaatigut inussiarnisaarnermik. Kiffartornini ilaannikkut piffissartornartartupilussuullunilu nukippassuarnik atuiffiusaraluartoq naammagittartuaannarlunilu inussiarnertuaannarpoq. Pupissut, qinusartut tappiitsut allallu ikiortariallit paasivaat Jiisusi ikiuinissaminut piareersimasartoq. Taassuma taakku sianiginngitsuusaarneq ajorpai, imminut immaqa piffissaalluanngikkaluartoq. Suliani unitsikkajuppai inuk pilluaatsoq ikiorumallugu. Jiisusi  imminik upperfiginnittunut soqutigittangaarpoq. (Markusi 5:30-34; Lukasi 18:35-41) Kristumiuugatta Jiisusip maligassiaa inussiarnisaartarnitsigut ikiuiumatunitsigullu malittarparput. Tamanna ilaquttatsinnit, eqqaamiutsinnit allanillu maluginiarneqassaaq. Aamma Jehovamut ataqqinaataassaaq uagutsinnullu nuannaarutaassalluni.

6. Jiisusi inussiarnisaarnermut tunngatillugu qanoq maligassiuiva?

⁶ Jiisusi aamma allanik ataqqinnittarpoq aqqisigut taasisarnermigut. Juutit upperisarsiornikkut siuttui aamma taamatut allanik ataqqinnippat? Naamik. Taakkua juutit Inatsisinik ilisimanninngitsut ‘perloqqusatut’ isigaat perloqqusatullu pisarlugit. (Johannesi 7:49) Guutilli ernera taamaanngilaq. Martha, Maria, Zakæusi allarpassuillu atiisigut taasarpai. (Lukasi 10:41, 42; 19:5) Kulturikkut ileqqut pissutsillu ullumikkut inunnik saaffiginneriaatsitsinnut amerlanertigut aalajangiisuusaraluartut Jehovap kiffaasa inussiarnisaartarneq pingaartippaat. * Inuiaqatigiinni inissisimaffiit assigiinngitsut uppeqatiminnik allanillu ataqqinninnerminnut sunniuteqartinneq ajorpaat. — Atuakkit Jaaku 2:1-4.

7. Sumiikkaluaruttaluunniit pissuserissaarnissamut suna iluaqutigisinnaavarput?

⁷ Guutip erneratalu inunnik inuiannit naggueqatigiinnillu tamaneersunik inussiarnersumik pinnittarnerannit erserpoq taakkuninnga ataqqinnittuusut, tamannalu eqqortumik isumaqarfiginnittut sallusuissummut kajungilissutigissavaat. Soorunami pissuserissaarnertut isigineqartut sumiiffimmiit sumiiffimmut assigiinngillat. Taamaattumik ileqqorissaarnermut malittarisassanik sukannersunik malitaqanngilagut. Najoqqutassiat Biibilimiittut maleruarnerisigut pissutsinut naleqqussartuarsinnaallutalu inoqatitsinnik ataqqinnittuarsinnaavugut. Allanik inussiarnersumik pinninneq kristumiutut oqaluussinitsinni qanoq angusaqarluarnerutitsisinnaanersoq misissoriartigu.

Ilassiorneq oqaloqateqarnerlu

8, 9. (a) Ileqqoq suna inussiarniinnertut paasineqarsinnaava? (b) Sooq Jiisusip oqaasii Matthæusi 5:47-miittut allanut pissusilersornitsinnut sunniuteqartittariaqarpavut?

⁸ Ullumikkut inuppassuit ulapingaarfianni nalinginnaavoq inuit marluk ilassinatik imminnut sanioqquttarnerat. Soorunami piumaffigineqanngilagut aqqusinermi inunnik ulikkaartumi kikkut tamaasa ilassisassagivut. Pissutsinili allarpassuarni ilassisarneq naleqquttarlunilu pitsaasarpoq. Illit naapitatit ilassisarpigit? Imaluunniit qungujunnak inussiarnersumilluunniit oqaaseqarnak sanioqquttarpigit? Inuk ajortumik siunertaqanngikkaluarluni inussiarniitsumik ileqqoqaleriartuaarsinnaavoq.

⁹ Jiisusip tamanna pillugu eqqaasippaatigut ima oqarami: “Qatanngutisimi kisiisa inussiarnisaarfigigussigit, taava sumik immikkooruteqartumik iliuuseqarpisi? Guutimik nalusuttaaq taamaaliortarput.” (Matthæusi 5:47) Ilassinermut tunngatillugu siunnersuisartoq Donald Weiss ima allappoq: “Inuit isiginngitsuusaarneqarneq nuannarineq ajorpaat. Isiginngitsuusaarinissamut utoqqatsissutissaqanngilaq. Iliuuserineqartussaq ajornanngilaq: Ilassiortuugit. Oqaloqatigisakkit.” Tunuarsimaarnatalu inussiarniippalunngikkutta, tamanna allanut attaveqarnitsinnut akornutaanani kinguneqarluassaaq.

10. Inussiarnisaarneq oqaluussinermi angusaqarluarnissamut qanoq iluaqutigisinnaavarput? (Takuuk ungalusaq “Qungujullutit ilasseqqaartarit”).

¹⁰ Aappariit kristumiut, Tom Carolilu, illoqarfissuarmi USA-p avannaaniittumi najugallit inuit oqaluussinerminni naapitatik torrutiinnarlugu nuannersumik oqaloqatigisalersimavaat. Qanoq iliorsimagamik? Jaaku 3:18 eqqarsaatigalugu Tom ima oqaluttuarpoq: “Illumik silataanniittut tamaanilu sulisut inussiarnisaarfiginiartarpavut oqaloqatigalugit. Qungujulluta ilassisarpavut. Soqutigisaat — meeraat, qimmiat, illuat suliffialluunniit — pillugit oqaloqatiginiartarpavut. Taava ikinngutimissut isigileriartuaartarpaatigut.” Carol aamma ima oqarpoq: “Kingusinnerusukkut qanoq ateqarnerluta oqaluttuuttarpavut  taakkualu aqqi apeqqutigisarlutigit. Paasitittarpavut tamaani sulerinerluta, oqaloqatigiinnerpulli sivikitsunnguutittarparput. Naggataatigut nalunaajaaffigisinnaasarpavut.” Tom Carolilu tamaani najugallit ilarpassuinit tatigisaalersimapput. Ilarpassui atuakkanik atuagassianillu Biibililersaarutinik pisimapput, ilaallu soqutiginninnerusimapput sallusuissullu Biibilimeersoq pillugu paasisaqarnerorusullutik.

Pissutsini unamminiarnartuni inussiarnisaarneq

11, 12. Sooq nutaarsiassamik nuannersumik oqaluussissutiginnikkaangatta ajortumik pineqartarnerput tupigisassanngilarput, qanorlu periartariaqarpugut?

¹¹ Nutaarsiassaq nuannersoq oqaluussissutigigaangatsigu ilaannikkut inussiarniitsumik pineqartarpugut. Tamanna tupiginngilarput, Jiisusimmi ajoqersukkani ima mianersoqquai: “Uanga qinugisimaguninnga ilississaaq qinugiumaarpaasi.” (Johannesi 15:20) Nikassaarpaluttumilli pinnittunik akiniaaneq kinguneqarluarneq ajorpoq. Qanoq iliortassaagut? Apustili Petrusi ima allappoq: “[Naalagaq] Kristusi uummatissinni illernartissiuk, piareersimajuaritsilu neriuutigisaq ilissinniittoq pillugu isumarsi illersorsinnaaqqullugu nassuiaaqqusisumut kimulluunniit.” (1 Petrusi 3:15) Inussiarnisaartarnerput — saamasumik ataqqinnittumillu akisarnerput — ajuallatsitsisitta killinneqaatigisinnaavaat. — Titusi 2:7, 8.

¹² Tusangiasaarisut Guutip akuerisinnaasaanik akinissaannut piareersarsinnaavugut? Aap. Paulusi ima kajumissaarivoq: “Tamatigut oqaluttassaasi inussiarnersumik tarajulimmillu, ilisimaqqullugu kikkut tamaasa qanoq akisariaqartassagisi.” (Kolossemiut 4:6) Ilaquttatsinnut, ilagiinniittunut, eqqaamiutsinnut, atuaqatinut suleqatinullu tamanut inussiarnisaartarneq ileqquliukkutsigu mitallerneqarnernut ajuallatsinneqarnernullu kristumiumut naleqquttumik periarnissamut piareersimanerussaagut. — Atuakkit Romamiut 12:17-21.

13. Akerlilersuisup qanoq killinneqarsinnaaneranik assersuuteqarit.

¹³ Pissutsini unamminiarnartuni inussiarnisaarneq kinguneqarluartarpoq. Japanimi oqaluussisartoq kasuttorfigisaminit taassumalu pulaavanit mitaatigineqarpoq. Oqaluussisartoq inussiarnersumik pissuseqarluni ingerlaqqippoq. Taassuma tamaani suli angalaartilluni malugaa pulaartup ungasianiit alaatsinaakkaani.  Taanna qatanngutip angutip ornimmani ima oqarpoq: “Aatsaannguaq pisoq pillugu utoqqatserpunga. Inussiarniitsupilussuarmik pigaluaritsigit maluginiarpara qungujulaannartutit. Ilittut ikkumallunga qanoq iliussaanga?” Angut taanna qanittukkut suliffeerussimavoq, aamma anaanaa toqoqqammerpoq, nuannaaleqqinnissaminullu neriuutaarussimavoq. Oqaluussisartup Biibilimik atuaqqissaaqatigisalerumammani akuersivoq. Sivitsunngitsoq sapaatip-akunneranut marloriarluni atuaqqissaartalerpoq.

Inussiarnisaarnermik ilinniariaaseq pitsaanerpaaq

14, 15. Biibilip nalaani meeqqat Jehovap kiffaanit qanoq perorsarneqartarpat?

¹⁴ Biibilip nalaani angajoqqaat Guutimik mianerinnittut meeqqatik inussiarnisaarnermik ilinniartittarpaat. Malugiuk Josefi angajoqqaaminit perorsarluagaasimasoq. Parnaarussaaqqagaluarluni parnaarussaaqatiminut assut inussiarnerpoq. (1 Mosesi 40:8, 14) Aammattaaq Faraomut oqaasiinit erserpoq inunnut akimasunut qanoq saaffiginninnissaq ilikkarsimagaa. — 1 Mosesi 41:16, 33, 34.

¹⁵ Israelikkunnut Inatsisit Qulit ilaat imaappoq: “Ataatallu anaanallu ataqqikkit inuummersoqqullutit nunami [Jehovap] Guutivit ilinnut tunniukkumasaani.” (2 Mosesi 20:12) Meeqqat angajoqqaaminnik ataqqinnissinnaapput ilaatigut angerlarsimaffimmi pissuserissuunermikkut. Jeftap pania maluginiarnartumik ataataminik ataqqinnippoq taassuma pisimasumi misilinneqaataasumi neriorsuutigisimasaa malillugu iliornermigut. — Eqqartuussisut 11:35-40.

16-18. (a) Meeqqat pissuserissaarneq qanoq ilinniartarpaat? (b) Meeqqanik pissuserissaarnermik ilinniartitsineq sunik iluaqutissartaqarpa?

¹⁶ Meeqqat ileqqorissaarnermik ilinniartinnissaat pingaaruteqarluinnarpoq. Meeqqat inersimasutut ingerlalluarumallutik pulaartunik qanoq ilassinninnissaq, sianertunik qanoq akisarnissaq neritillunilu qanoq issianissaq ilinniartariaqarpaat. Allat inginniassammata sooq nikuittarnissamik, utoqqarnut napparsimasunullu sooq inussiarnisaartarnissamik oqimaatsunillu sooq tigummiussisarnissamik paasinninnissaannut ikiorneqartariaqarput. Ima oqartarnissap pingaaruteqassusia paasisariaqarpaat: “Qujanaq”, “takanna”, “pilaarsinnaavunga?”, “illillu”, “ikiortariaqarpit?” aamma “utoqqatserpunga!”

 ¹⁷ Meeqqat inussiarnisaarnermik ilinniartinnissaat ajornakusoortariaqanngilaq. Nammineq maligassiuineq pitsaanerpaavoq. Kurt, 25-nik ukiulik, oqaluttuarpoq nammineq qatanngutimilu pingasut inussiarnisaarneq qanoq ilinniarnerlugu: “Anaanap ataatallu imminnut ikinngutinnersumik oqaluuttarnerat, allanut naammagittartarnerat soqutigittarnerallu ilinniarfigaarput. Naalagaaffilersaarfimmi ataatama ataatsimiinnerup siorna kingornalu ilagalunga qatanngutit utoqqaat ilassiortarpai. Tusaasarpara qanoq ilassisarnerai, aamma taakkuninnga ataqqinninnera malugisarpara.” Kurt ima nangippoq: “Piffissap ingerlanerani ataatattut iliortalerpunga. Inussiarnisaarneq uannut pissusissamisuuginnarpoq. Pisussaaffittut isiginagu inussiarnisaarnissaq kissaatigisariaqarpoq.”

¹⁸ Angajoqqaat meeqqatik pissuserissaarnermik ilinniartippatigit qanoq pisoqassava? Meeqqat ikinngutitaartussapput allanillu eqqisseqateqarsinnaassallutik. Suliffittaarunik sulisitsisuminnik suleqatiminnillu suleqateqarluarsinnaassapput. Aammattaaq meeqqat inussiarnerlutillu perorsarluagaallutillu unneqqarissut angajoqqaaminnut nuannaarutaassapput. — Atuakkit Ussatit 23:24, 25.

Pissuserissaarneq silarsuarmit allaassutigaarput

19, 20. Sooq Guutitta soqutigittarlunilu inussiarnersup erneratalu ilaarnissaat aalajangiusimasariaqarparput?

¹⁹ Paulusi ima allappoq: “Guuti maligassarisiuk taassumunnga qitornaasutut asasaasutut.” (Efesosimiut 5:1) Jehovamik Guutimik erneranillu ilaarsissagutta najoqqutassiat Biibilimiittut, ilaatigut allaaserisami matumani sammineqartut, atortariaqarpavut. Taamaalilluta qullersaasumit iluarisaanissaq aningaasaqarnikkulluunniit iluaqutissat piinnarlugit inussiarnisaarnissaq pinaveersaassavarput. — Judasi 16.

²⁰ Ulluni kingullerni makkunani silarsuarmik matuminnga naalakkersuiffimmini Saatanip aalajangiusimavaa inussiarnisaarneq ataqqinninnerlu pillugit Jehovap najoqqutassiaanik tamanik nungutitsinissani. Kristumiunilli ilumoortunik pissuserissaarunnaarsitsiniaanermini iluatsitsinavianngilaq. Qanortoq tamatta Guutitta soqutigittarlunilu inussiarnersup taassumalu ernerata maligassiaannik pitsaasunik malinninnissarput aalajangiusimatigu. Tamanna aalajangiusimagutsigu oqaatsitsigut pissusilersornitsigullu silarsuarmit matumannga inussiarniiffiusumit immikkooruteqassaagut, aamma Guutitsinnut Jehovamut — pissuserissaarnermi maligassaalluarnerpaasumut — nersornaataallutalu ataqqinaataassaagut, taamaalillutalu eqqortuliorusuttut taassumunnga kajungilersillugit.

[Quppernerup ataani ilanngussaq]

Eqqaamavigit?

• Jehova erneralu inussiarnisaarnermut tunngatillugu sumik ilinniarfigaavut?

• Sooq ilassiortuuneq kristumiutut takutitsilluarnerua?

• Sooq inussiarnisaarneq kinguneqarluassava?

• Sooq pingaaruteqarpa angajoqqaat meeqqaminnik ileqqorissaarnermik ilinniartitsinissaat?

[Atuaqqissaarnermi apeqqutit]

[Qupp. 31-mi ungalusaq]

Qungujullutit ilasseqqaartarit

Inuppassuit ilisarisimanngisaminnik oqaloqateqarnissaminnut tunuarsimaartarput, Jehovalli Nalunaajaasui qanoq oqaloqatigiinnermik aallarniinissartik ilinniarniarlugu ilumoorlutik ilungersorput. Tamatumunnga kajumississutaasoq tassaavoq Guutimik tullermillu asanninneq, siunertaavorlu allat tusarliussamik nuannersumik Biibilimiittumik ilangiisinnissaat. Uagut oqaluussisartutut allanik oqaloqateqarnissamut allallu uagutsinnik oqaloqateqarusulersinnissaannut suna iluaqutigisinnaavarput?

Najoqqutassiaq pingaaruteqangaartoq Filippimiut 2:4-miippoq. Tassani kajumissaarneqarpugut ‘tamatta immikkut nammineq iluaqutissarput pinnagu inoqatittattaaq iluaqutissaat isumageqqullugu’. Inuup naapissimanngisaannarunitit soorunami taassuma takornartatut isigissavaatit. Qanoq ilillutit toqqissisimalersissinnaaviuk? Qungujulluni ilassineq iluaqutaasarpoq. Sulili allanik eqqarsaatigisassaqarpoq.

Immaqa arlaannik eqqarsaateqaruttortoq akornuserpat. Taanna arlaannik eqqarsaateqarnersoq soqutiginagu illit nammineq eqqarsaatigisatit pillugit oqaloqatiginiarsarigukku ajunngitsumik periarnaviarunanngilaq. Taamaattumik taanna sunik soqutigisaqarnersoq eqqoriamisaarsinnaagukku, soormi oqaloqatiginiarnerani taakku aallaavigigukkit? Jiisusip Samariami arnaq imertartoq naapikkamiuk iliuusia ilinniarfigisinnaavarput. (Johannesi 4:7-26) Arnap taassuma imertarnini eqqarsaatigaa. Jiisusillu tamanna oqaloqatiginissaanut aallaavittut atorpaa, erniinnarlu oqaloqatigiissutigisartik Guutimik pallorfiginninnermut saatsippaa. (w09 11/15-E)

[Qupp. 30-mi assiliartaq]

Inussiarnisaarneq nalunaajaalluarnermik kinguneqarsinnaavoq

[Qupp. 32-mi assiliartaq]

Ileqqorissaarneq naleqquttuaannarpoq