Ilagiinnik tapersersuineq immikkut pisinnaatitaaffittut isigiuk

“[Guutip] qangali piumasani malillugu avatit tamaasa immikkut timimi inissippai.” — 1 KORINTHIMIUT 12:18.

1, 2. (a) Sumit erserpa ilagiinniittut tamarmik ilagiinnik tapersersuinermik immikkut pisinnaatitaaffeqartut? (b) Apeqqutit suut allaaserisami matumani sammineqassappat?

ITSAQ Israelikkut nalaannili ilagiit aaqqissuussaasimapput Jehovap innuttaminik isumassuiffigisartagai anersaakkullu siunnersuiffigisartagai. Assersuutigalugu Israelikkut Aji tiguareermassuk Josvap “inatsisit tamaasa atuffassissutigai pilluaqqussutitaat perloqqussutitaallu ilanngullugit inatsisit allassimaffianni allassimasut tamaasa malilluaqqissaarlugit . . . Atuffassissutigai Israelikkunnut katersorsimasunut tamanut”. — Josva 8:34, 35.

² Ukiuni hundredelinni siullerni Kr.in.king. apustilip Paulusip Timotheusi, utoqqaanertaq kristumiuusoq, allaffigaa ilagiit kristumiut tassaasut ‘Guutip illua’ aamma ‘sallusuissutip sukaralugulu tunngavigisaat’. (1 Timotheusi 3:15) Ullumikkut Guutip ‘illua’ tassaavoq silarsuaq tamakkerlugu qatanngutigiissuit kristumiut ilumoortut. Korinthimiunut allakkamini isumassarsiarititaasumi siullermi kapitali 12-imi Paulusip ilagiit inuup timaanut assersuuppai. Allappoq inuup avatai tamarmik immikkut assigiinngitsunut atoraluarlutik tamarmik pisariaqartinneqartut. “[Guutip] qangali piumasani malillugu avatit tamaasa immikkut timimi inissippai.” Allaat erseqqissarpaa ‘avatit ataqqinnginnerusavut annerusumik ataqqinartittarivut’. (1 Korinthimiut 12:18, 23) Taamaattumik Guutip kiffaasa aalajaatsut arlaata Guutip illuanik tapersersuinera kristumiup aalajaatsup allap tapersersuineranit pitsaanerunanilu ajornerunngilaq. Assigiinngissuteqaannarput. Qanormi ililluta ilagiit tapersersorsinnaavavut? Suut ilagiinni tapersersuinissamut periarfissatsinnut sunniuteqarsinnaappat? Aamma qanoq ililluta siumukarsinnaavugut ‘ineriartornerput tamanit takuneqarsinnaatillugu’? — 1 Timotheusi 4:15.

Qanoq ililluta ilagiit tapersersorsinnaagivut

3. Ilagiinnik tapersersuinerput ilaatigut qanoq ersersissinnaavarput?

³ Ilagiinnik tapersersuinerput ilaatigut ersersissinnaavarput ‘inussiamik aalajaallunilu silatuumik’ (NV) taassumalu Siulersuisoqatigiivinik tamakkiisumik suleqatiginninnikkut. (Atuakkit Matthæusi 24:45-47). Inussiaqatigiit uagutsinnut siunnersuutaannut isiginnittaatsitsinnik misissuisariaqarpugut. Assersuutigalugu ukiut ingerlanerini atisalersoriaatsimut, isikkorissarnermut, aliikkutassanut internettimillu naleqqutinngitsumik atuinermut tunngatillugu toqqaannartumik siunnersorneqarsimavugut. Siunnersuutit pitsaasut taakku anersaakkut illersorneqaqqulluta malittarpavut? Ilaqutariittummi aalajangersimasumik Biibilimik atuaqqissaaqatigiittarnissamik kajumissaarut? Siunnersuut tamanna malipparput unnuillu ilaat siunertamut tamatumunnga immikkoortillugu? Kisimiittuuguit, taava aamma illit nammineq Biibilimik atuaqqissaartarnissat piffissaqarfigisarpiuk? Jehovap tamatta immikkut ilaqutariittullu pilluaqqussavaatigut inussiaqatigiit siunnersuutaat malittarutsigit.

4. Nammineq aalajangigaqarniaraangatta suut eqqarsaatigisassavavut?

⁴ Ilaat immaqa eqqarsarput aliikkutassat, atisalersoriaaseq isikkorissarnerlu inuup nammineq susassarigai. Kristumiulli tunniulluinnarsimasup ilagiinnik tapersersuisup nammineq nuannarinerusani kisiisa aalajangikkaminut tunngaviutinnavianngilai. Kristumiup ingammik  eqqumaffigissavaa Jehovap isiginnittaasia taassuma oqaasiani, Biibilimi, ersersinneqartoq. Tamatumani tusarliunneqartoq ‘naneruarisariaqarparput isikkatsinnut, qaammaqqutigisariaqarlugulu aqqutitsinni’. (Tussiaat 119:105) Aamma silatusaassaagut eqqarsaatigigutsigu nammineq aalajangikkavut kiffartornitsinnut aamma inoqatitsinnut ilagiinniittunut ilagiillu avataanniittunut qanoq sunniuteqassanersut. — Atuakkit 2 Korinthimiut 6:3, 4.

5. Sooq siulersorneqarumanngissutsip anersaava mianersorfigisariaqarparput?

⁵ Anersaaq ‘naalasseriitsut qitornaannut sunniuteqartuartoq’ ima nalinginnaatigaaq silaannarmut najuussortakkatsinnut assersuunneqarsinnaalluni. (Efesosimiut 2:2) Anersaap tamatuma isumaqalersissinnaavaatigut Jehovap peqatigiissortaanit siunnersorneqartariaqanngitsugut. Diotrefesitulli, apustilimut Johannesimut ‘akuersaanngitsutut’, ikkusunngilluinnarpugut. (3 Johannesi 9, 10) Siulersorneqarumanngissutsip anersaavanik ineriartortitsinaveersaartariaqarpugut. Qanortoq Jehovap ullumikkut tusarliisartuinut oqaatsitsigut iliuutsitsigulluunniit ataqqinninngitsuliunngisaannarisa! (4 Mosesi 16:1-3) Inussiaqatigiinnilli suleqateqarnermik immikkut pisinnaatitaaffik nuannaarutigisariaqarparput. Aamma ilagiitsinni siuttuusunut naalatsigitinnissarput ilungersuutigisariaqarparput, ilaa? — Atuakkit Hebræerit 13:7, 17.

6. Sooq pissutsit nammineq atukkavut eqqarsaatigisariaqarpavut?

⁶ Aamma ilagiinnik tapersersuinerput ersersissinnaavarput pissutsit nammineq atukkatta eqqarsaatigeqqissaarnerisigut aamma ‘kiffartuutitsinnik pingaartitsiniarluta’ Jehovalu ataqqinartinniarlugu sapinngisarput tamaat iliuuseqarnitsigut. (Romamiut 11:13) Ilaat pioneriusinnaapput. Allat ajoqersuiartortitatut, nakkutilliisutut angalasartutut silarsuarlu tamakkerlugu Betelimi suleqataasutut kiffartortarput. Qatannguterpassuit naalagaaffilersaarfiliornerni ikiuutaasarput. Aap, Jehovap kiffai tamarmik sapinngisartik tamaat iliuuseqartarput ilaquttamik anersaakkut pisariaqartitaannik isumaginninniarlutik sapaatillu akunneri tamaasa tamakkiisumik kiffartoqataajumallutik. (Atuakkit Kolossemiut 3:23, 24). Qularutiginngilluinnarsinnaavarput Jehovamut kiffartornitsinni kajumilluta iliuuseqartarutta uummatikkullu iluunngarluta taassumunnga kiffartorniarluta sapinngisarput tamaat iliuuseqarutta taassuma ilagiissaani atorfissaqartinneqartuaannassasugut.

Ilagiinnik tapersersuinissamut periarfissatsinnut sunniuteqartartut

7. Nassuiaruk pissutsit atukkavut ilagiinnik tapersersuinissamut periarfissatsinnut qanoq sunniuteqarsinnaasut.

⁷ Pingaaruteqarpoq pissutsit atukkatta eqqarsaatiginissaat, sapinngisavummi iliuuserisinnaasavullu ilagiinnik tapersersuinissamut periarfissatsinnut ilaatigut aalajangiisuusarput. Assersuutigalugu qatanngutip angutip ilagiinnik tapersersuinissamut periarfissai qatanngutip arnap tapersersuinissamut periarfissaanit allaanerupput. Aamma qanoq utoqqaatigineq, peqqissuseq allallu Jehovamut kiffartornermi iliuuserisinnaasatsinnut  sunniuteqartarput. Ussatit 20:29-mi ima allassimavoq: “Angutit inuusuttut nukitik pinnersaatigaat, utoqqaallu qiitik ataqqinaatigaat.” Ilagiinni inuusunnerusut immaqa timikkut iliuuseqarnerusinnaapput inuusunnertik nukissaqarnertillu pissutigalugit, utoqqaat iluaqutaangaarsinnaasut ilisimassusertik misilittagaqarnertillu pissutigalugit. Aamma eqqaamasariaqarparput Jehovap saammaannera, imaluunniit ajunngissusia pisassarinngisaraluaq, taassuma peqatigiissortaani iliuuserisinnaasatsinnut tamanut aalajangiisuusoq. — Apustilit Suliaat 14:26; Romamiut 12:6-8.

8. Kissaatigisavut ilagiinni naammassisatsinnut qanoq sunniuteqartarpat?

⁸ Nukariinnik inuusuttunik assersuusiaq ilagiinnik tapersersuinissamut periarfissatsinnut sunniuteqaqataasinnaasunik suli allanik erseqqissaataasinnaavoq. Nukariit atuarunnaarput. Pissutsit atugaat assigiipput. Niviarsissat taakku angajoqqaavi sapinngisartik tamaat iliuuseqarput atuarunnaareerunik pionerinngornissaannut kajumissaarniarlugit. Misilitsereeramik aappaa pionerinngorpoq, aappaa piffissaq tamaat suliffittaartoq. Aalajangiussaannut suna aalajangiisuua? Kissaataat. Tamarmik immikkut iliuusererusutarpiatik naggataatigut iliuuseraat. Amerlanersavummi taamaaliortarput, ilaa? Taamaattumik Jehovamut kiffartornermi sunik naammassisaqarusunnerluta eqqarsaatigeqqissaartariaqarparput. Kiffartornermi iliuuseqarnerusinnaavugut, pissutsinik maanna atukkatsinnik allannguisariaqaleraluaruttaluunniit? — 2 Korinthimiut 9:7.

9, 10. Jehovamut kiffartornermi iliuuseqarnerunissamut kajumissuseqanngikkutta qanoq iliussaagut?

⁹ Taavami Jehovamut kiffartornermi iliuuseqarnerunissamut kajumissuseqanngikkutta ilagiinnilu sapinngisamik minnerpaamik iliuuseqarniaqqajaasarluta? Paulusi Filippimiunut ima allappoq: “[Guuti] tassaavoq ilissinni sunniisoq piumassuseqartittarlusi naammassisaqartittarlusilu piumasani ajunngitsoq naapertorlugu.” Aap, Jehova uagutsinni sunniisinnaavoq piumassutsitsinnillu, imaluunniit kissaatigisatsinnik, sunniisinnaalluni. — Filippimiut 2:13; 4:13.

¹⁰ Taava Jehova qinnuigisariaqarparput taassuma piumasaatut iliorusussuseqalerseqqulluta, ilaa? Itsaq Israelimi kunngi Daavi taamaaliorpoq. Ima qinuvoq: “Ingerlavigeqqusannik ilinniartinnga, [Jehova], aqqutigeqqusannik ajoqersunnga! Sallusuissutsikkut ilitsersunnga ajoqersunngalu, illit tassaagavit Guuti annatsitsisiga, neriuffigiuaannarpakkit.” (Tussiaat 25:4, 5) Uaguttaaq taamaaliorsinnaavugut Jehova qinnuigalugu taassuma iluarisaanik iliuuseqarusussuseqalernissamut ikioqqulluta. Jehovap taassumalu ernerata soqutigisaannik pingaarnerpaatitsiniarluta iliuuserisatsinnik taakkua namminneq takunnittarnerat eqqarsaatigigaangatsigu qujamasungaalertarpugut. (Matthæusi 26:6-10; Lukasi 21:1-4) Qujamasunnerput Jehovap anersaakkut siumukarusussuseqalerseqqulluta qinnuiginissaanut kajumississutigisinnaavarput. Isiginnittaaseq ineriartortittariaqagarput pruffiitip Esajap maligassiamigut ersersippaa. Jehova ima aperisoq tusaramiuk: “Kina aallartissavara, kia oqariartuukkumavaatigut?” Esaja ima akivoq: “Piareersimavunga, aallartinnga!” — Esaja 6:8.

Qanoq siumukartoqarsinnaasoq

11. (a) Sooq qatanngutit angutit peqatigiissortani akisussaaffeqarumasut pisariaqartinneqarpat? (b) Qatanngutip angutip ilagiinnut iluaqutaajumanini qanoq ersersittarpaa?

¹¹ Ukiumi kiffartorfiusumi 2008-mi 289.678-it  kuisittoqarsimammat erseqqippoq qatanngutinik angutinik siuttuusinnaasunik pisariaqartitsisoqangaartoq. Tamanna qatanngutip angutip sunissaminut kajumississutigisariaqarpaa? Oqaatigilluaannarlugu: Ilagiinni kiffartortunut utoqqaanertanullu piumasaqaatinik Biibilimiittunik eqqortitsiniarluni ilungersornissamut. (1 Timotheusi 3:1-10, 12, 13; Titusi 1:5-9) Qatanngut angut piumasaqaatit Biibilimiittut eqqortinniarlugit qanoq ilungersorsinnaava? Oqaluusseqataasarnermigut, ilagiinni suliassaminik eqiasuilluni suliarinninnermigut, kristumiut ataatsimiinnerini akissutiminik pitsaanerulersitsinermigut uppeqatiminillu inuttut soqutiginninnermigut. Taamaalilluni ersersissavaa ilagiinnik tapersersuineq immikkut pisinnaatitaaffittut isigalugu.

12. Inuusuttut sallusuissummik nuannarinninnertik qanoq ersersissinnaavaat?

¹² Qatanngutit angutit inuusuttut, ingammik inuusuttuaqqat, ilagiinni qanoq siumukarsinnaappat? ‘Ilisimassuseqarnermikkut anersaakkullu paasisimasaqassutsimikkut’ ineriartornissartik ilungersuutigisinnaavaat Biibili pillugu ilisimasaqarnermik pigiliussinermikkut. (Kolossemiut 1:9) Eqiasuillutik Biibilimik atuaqqissaartarnertik ilagiillu ataatsimiinnerini peqataasarnertik inersimallualernissaminnut iluaqutigissavaat. Aamma angutit inuusuttut ‘sulilluarnissamut ammaanneqarnissamut’ piukkunnarsarsinnaapput piffissaq tamaat kiffartoriaatsinut assigiinngitsunut peqataanermikkut. (1 Korinthimiut 16:9) Jehovamut kiffartornermik inooriaaseqalerniarneq nalerisimaarnangaartarpoq pilluaqqusaanangaartarlunilu. — Atuaruk Oqaluussisartup oqaasii 12:1.

13, 14. Qatanngutit arnat ilagiinnik tapersersuinerminnik nuannaarutiginninnertik qanoq ilillutik ersersissinnaavaat?

¹³ Aamma qatanngutit arnat pingaartitsinertik ersersissinnaavaat Tussiaat 68:12-imik eqquutsitseqataanermikkut. Tassani ima allassimavoq: “[Jehovap] oqaaseq tutsiutitippaa, arnallu amerlaqaat tipaatsunnartumik nalunaariartortut.” Qatanngutit arnat ilagiinnik tapersersuinermik immikkut pisinnaatitaaffeqarnerminnik qujamasuutiginninnerminnik ersersitseriaaserisinnaasaasa pingaaruteqarnerpaat ilaat tassa ajoqersuganngortitsiortoqataaneq. (Matthæusi 28:19, 20) Tassa qatanngutit arnat kiffartornermik ulapputiginninnermikkut kiffartornerminnilu kajumillutik pilliuteqartarnermikkut ersersittarpaat ilagiinnik tapersersuineq immikkut pisinnaatitaaffittut isigalugu.

¹⁴ Paulusip Titusi ima allaffigaa: “Taamatuttaarlu arnat utoqqaat illernartut ileqqussaat eqqorlugu [ileqqoqassapput]. . . . [Ajunngitsuliornermik] ajoqersuussisuussapput arnat inuusuttut perorsarsinnaassallugit uiminnik qitornaminnillu asanninnissamut, silatusaarnissamut piitaajuinnissamullu, ningiuulluarnissamut, ajunngissusermut uiminnullu naalatsigitinnissamut, Guutip oqaasia mitannarsisitaaqqunagu.” (Titusi 2:3-5) Tassa qatanngutit arnat inersimalluartut ilagiinnut sunniuteqarluartupilussuusinnaapput! Qatanngutinik angutinik siuttuusunik ataqqinninnermikkut atisalersoriaatsimullu isikkorissarnermullu aliikkusersornermullu tunngatillugu isumatusaartumik aalajangertarnermikkut allanut maligassiuilluarput ersersittarlugulu ilagiinnik tapersersuinerminnik nuannaarutiginninnertik.

15. Qatanngut arnaq kiserliornini ajugaaffiginiarlugu qanoq iliorsinnaava?

¹⁵ Ilaannikkut qatanngummut arnamut aappaqanngitsumut ilagiinnik tapersersuinissaq ajornakusoortarsinnaavoq. Qatanngut arnaq tamatuminnga misigisaqarsimasoq ima oqarpoq: “Aappaqarnani inuuneq ilaannikkut kiserliornarsinnaasarpoq.” Aperineqarami qanoq ililluni pissutsit naammagalugit atornerini ima akivoq: “Qinuneq atuaqqissaarnerlu iluaqutigisarpakka ilagiinnik  qanoq tapersersuisinnaaninnik Jehovallu uannik qanoq isiginninneranik paasinninnissamut. Taava aamma ilagiinniittunik allanik ikiuiniartarpunga. Tamanna imminuinnaq eqqarsaatiginnginnissannut iluaqutigisarpara.” Tussiaat 32:8 naapertorlugu Jehovap Daavi ima oqarfigaa: “Siunnersussavakkit, isigiuassavakkillu.” Aap, Jehovap kiffani tamaasa immikkut, aamma qatanngutit arnat kisimiittut, inuttut soqutigai, aamma ilagiinniittut tamaasa ikiorumaarpai ilagiinnik qanoq tapersersuisinnaanerminnik paasinninnissaannut.

Ilagiit tapersersortuakkit!

16, 17. (a) Sooq Jehovap peqatigiissortaanut ilaaniarluni aalajangerneq pitsaanerpaava? (b) Qanoq ililluta Jehovap ilagiissaanik tapersersuiuarsinnaavugut?

¹⁶ Jehovap kiffani tamaasa immikkut asannilluni imminut kajungilersissimavai imminut qanittumik attaveqartilerlugit. Jiisusi ima oqarpoq: “Kinaluunniit uannut ornigussinnaanngilaq Ataatap uannik aallartitsisup kajungilersinngippani.” (Johannesi 6:44) Nunarsuup inuisa milliardillit tamarmik akornannit Jehovap ullumikkut ilagiissiminut ilaalernissamut kajungilersissimavaatigut. Qaaqqusissummut tamatumunnga akuersisimanerput aalajangikkatta pitsaanerpaartaraat. Inuunitsinnik siunertaqalersitsillunilu isumaqarlualersitsivoq. Aamma nuannaarneq nalerisimaarnerlu ilagiinnik tapersersuinerput pissutigalugu misigisartakkavut eqqarsaatigeriakkit!

¹⁷ Tussiaasiortoq ima allappoq: “[Jehova], nuannaraara ineqarfiit . . . Aalajaappoq maanna isikkama tummisaat. Katersorsimasuni unnersiutigissavara [Jehova].” (Tussiaat 26:8, 12) Guutip ilumoortup tamatta immikkut peqatigiissortaminik tapersersuinissamut periarfissaqartippaatigut. Teokratii tunngavigalugu siulersorneqarnerput naapertorlugu iliortuarnitsigut Guutimullu kiffartornermi ulapputeqartuarnitsigut Jehovap ilagiissaanik tapersersuinerput immikkut pisinnaatitaaffigiuarsinnaavarput.

Eqqaamavigit?

• Sooq tunngavissaqarluarpugut isummissalluta kristumiut tamarmik ilagiinnik tapersersuisinnaasut?

• Qanoq ersersissinnaavarput Guutip peqatigiissortaanik tapersersuineq immikkut pisinnaatitaaffittut isigalugu?

• Suut ilagiinnik tapersersuinissamut periarfissatsinnut sunniuteqarsinnaappat?

• Inuusuttut utoqqaallu ilagiinnik tapersersuinertik nuannaralugu qanoq ilillutik ersersissinnaavaat?

[Atuaqqissaarnermi apeqqutit]

[Qupp. 20-mi assiliartaq]

Qatanngutit angutit ilagiinni akisussaaffeqalerumallutik susinnaappat?

[Qupp. 21-mi assiliartaq]

Qatanngutit arnat ilagiinnik tapersersuinertik qanoq ilillutik ersersissinnaavaat?