Qatanngutigiittut asaqatigiinnikkut ineriartortuaritsi

“[Inuugitsi] asaqatigiillusi soorlu Kristusip asagaatigut.” — EFESOSIMIUT 5:2.

1. Jiisusip ajoqersukkaminut suna ilisarnaataasussaanerarpaa?

GUUTIP naalagaaffia pillugu nutaarsiassamik nuannersumik illumiit illumut oqaluussissutiginninneq Jehovap Nalunaajaasuisa ilisimaneqaatigaat. Taamaakkaluartorli Jiisusi naapertorlugu kristumiussutsimut tunngasoq alla ajoqersugaasa ilumoortut ilisarnaatigisussaavaat. Ima oqarpoq: “Inassummik nutaamik tunivassi: Asaqatigiissaasi. Soorlu uanga asagissi, taamattaaq ilissi asaqatigiissaasi. Asaqatigiikkussi tamatumuuna tamarmik paasissavaat ajoqersugarigissi.” — Johannesi 13:34, 35.

2, 3. Qatanngutigiittut asaqatigiinneq kristumiutut ataatsimiinnitsinnut najuuttunut qanoq sunniuteqartarpa?

² Qatanngutigiissuit kristumiut ilumoortut asaqatigiinnerattut asaqatigiittoqanngilaq. Soorlu saviup kajungerisaa saviminermut kajungertartoq, taamatuttaaq asanninneq nukiuvoq Jehovap kiffaanik ataasiussuseqartitsisoq allanillu pallorfiginninnermut ilumoortumut kajungilersitsisoq.  Assersuutigalugu eqqaasinnaavarput Marcelino Camerounimi najugalik. Taanna suliffimmini ajutoorluni tappingersimavoq. Ajutoornerata kingorna eqqunngitsumik oqallisigineqalersimavoq angakkuunerarneqarluni tappingersimasoq. Palasip oqaluffimmullu ilaasortaasut allat tuppallersarnagu ilagiinnit anisippaat. Marcelino Jehovap Nalunaajaasuisa ilaannit ataatsimiigiarnermut qaaqqusaagami nangaavoq. Ajattorneqaqqikkusunngilaq.

³ Marcelinop naalagaaffilersaarfimmi pisut tupaallaatigai. Ilassilluarneqarpoq, Biibilimilu ajoqersuutigineqartut tusakkani tuppallersaatigai. Ataatsimiinnernut tamanut najuuttalerpoq, Biibilimik atuaqqissaartarnermini siumukarluni 2006-imilu kuisilluni. Maanna ilaquttaminut saniliminullu oqaluussisarpoq arlalinnillu Biibilimik atuaqqissaaqateqartalersimalluni. Marcelinop kissaatigaa inuit Biibilimik atuaqqissaaqatigisartakkami asanninneq nammineq Guutip innuttaasa akornanni misigisimasani misigissagaat.

4. Sooq Paulusip ‘asaqatigiilluni inuunissamik’ kajumissaarutaa malillugu iliortariaqarpugut?

⁴ Qatanngutigiittut asaqatigiinneq kajungernangaarpoq, taamaattussaannartullu isigisassaanngilaq. Ikumatitamut kissassimaarnartumut unnuami nillertumi inunnit katersuuffigineqartumut assersuunneqarsinnaavoq. Ikumatitamut kissassimaariartortut ikumatitaq qisuttunngippassuk qamissaaq. Tamatumunnga assingusumik ilagiinnut ilaasortaasut asaqatigiingaarnerat sanngiillissaaq nakussatsinniarlugu tamatta immikkut suliniuteqanngikkutta. Nakussatsinniarlugu qanoq iliorsinnaavugut? Apustili Paulusi ima allappoq: “[Inuugitsi] asaqatigiillusi soorlu Kristusip asagaatigut uagullu pilluta imminut tunniulluni tunissutitut, Guutimullu pilliutitut, naamajuminartutut.” (Efesosimiut 5:2) Apeqqut misissugassarput imaappoq: Qanoq ililluta asaqatigiilluta inuujuarsinnaavugut?

“Ammarniaritsi”

5, 6. Sooq Paulusip kristumiut Korinthimiittut kajumissaarpai ‘ammaqqullugit’?

⁵ Apustilip Paulusip kristumiut Korinthimiittut ima allaffigai: “Ilissinnut qanerput ammarsimavarput, Korinthimiunaa, uummaterput ammarparput. Uatsinni ninniortitaanngilasi — ilissiuna uummatissinni ninniortitsisusi. Akilluta uatsinnut ammarniaritsi — qitornarisattut oqaluffigaassi.” (2 Korinthimiut 6:11-13) Sooq Paulusip Korinthimiut kajumissaarpai asannittuliornermut tunngatillugu ‘ammaqqullugit’?

⁶ Eqqarsaatigeriaruk ilagiit Korinthimiittut qanoq pilersinneqarsimasut. Paulusi Korinthimut pivoq ukiumi 50-imi ukiakkut. Aallaqqaammut akerlilersorneqangaatsiaraluarluni uniinnanngilaq. Sivitsunngitsoq illoqarfimmi tamatumaniittut nutaarsiassamik nuannersumik upperinnilersimapput. Paulusip “ukiup aappaa qiteqqullugu” ilagiinnik nutaanik taakkuninnga ilinniartitsillunilu nakussatsitsiniarluni nukini tamaasa atorpai. Erseqqippoq kristumiut Korinthimiittut asangaarai. (Apustilit Suliaat 18:5, 6, 9-11) Taakku taassuma akillugu asanissaanut ataqqinissaanullu pissutissaqarluarput. Ilagiinniittoqarporli taassumannga ungasillisunik. Immaqa toqqaannartumik siunnersuillunilu naqqiisarnera nuannarinngilaat. (1 Korinthimiut 5:1-5; 6:1-10) Allat immaqa ‘apustilissaarsuit’ mamarliissutaat tusarnaarsimavaat. (2 Korinthimiut 11:5, 6) Paulusip kissaatigaa qatanngutimi tamarmik asassagaanni. Taamaattumik kajumissaarpai ‘ammaqqullugit’ imminut uppeqatiminnullu allanut qaninnerusumik attaveqalernermikkut.

7. Qatanngutigiittut asaqatigiinnermut tunngatillugu qanoq ‘ammarsinnaavugut’?

⁷ Uagummi? Qatanngutigiittut asaqatigiinnermut tunngatillugu qanoq ililluta ‘ammarsinnaavugut’? Ukioqatigiit imaluunniit naggueqatigiissutsikkut assigiimmik tunuliaqutallit ilagiinnerusarnerat pissusissamisoorpoq. Aamma assigiinnik sukisaarsaateqartartut ilagiikkajupput. Kisianni qatanngutivullu aalajangersimasut soqutigisavut qatanngutitsinnit allanit avissaassutigigutsigit ‘ammartariaqarpugut’. Silatusaassaagut imminut ima aperigutta: ‘Qaqutiguinnaq qatanngutinik ilagisartagarinngisannik oqaluusseqateqartarlungalu ilagisaqartarpunga? Ilagiinni nutaajusut killilimmik attaveqarfigisarpakka isumaqarama uannut ikinngutaalerumalluni iliuuseqaqqaartariaqartoq? Ilagiinni utoqqaat inuusuttullu ilassisarpakka?’

8, 9. Paulusip Romamiut 15:7-imi siunnersuutaa qatanngutigiittut asaqatigiinnikkut ineriartortuarnissamut qanoq iluaqutigisinnaavarput?

 ⁸ Ilassisarneq eqqarsaatigalugu Paulusip Romamiunut allakkamini oqaasii uppeqatitsinnut eqqortumik isiginnittaaseqarnissamut iluaqutigisinnaavavut. (Atuaruk Romamiut 15:7). Grækerit oqaasiat matumani ‘ilasseqatigiinneq’-mik nutserneqarsimasoq “inussiarnisaarnermik imaluunniit inoroorsaarnermik, peqatigiinnermik ikinngutigiinnermillu” isumaqarpoq. Biibilip nalaani ikinngutit angerlarsimaffimmi inoroorsaarfigigaanni ilisimatinneqartarput taakkua takkunnerat qanoq nuannaarutigitigigitsik. Jiisusip taamatullusooq ilagiinni kristumiuni ilassivaatigut, uppeqatittalu taamatut ilassineratigut taassuminnga ilaarsinissatsinnut kajumissaarneqarpugut.

⁹ Qatanngutivut naalagaaffilersaarfimmi allamilu ilassioraangatsigit eqqumaniarfigisinnaavarput kikkut qanittukkut takunagillu oqaloqatigisimannginnerlugit. Soormi minutsialuit atorlugit taakku oqaloqatigilaarukkit? Ataatsimiinnermi tulliuttumi allat taamatut pisinnaavavut. Taamaalilluta piffissap sivikitsup ingerlanerani qatanngutivut tamangajaasa qiimmaallannartumik oqaloqatigereersimassavavut. Ataatsimiinnerup ataatsip ingerlanerani kikkut tamaasa oqaloqatigisimanngikkutsigit isumakulunnissamut pissutissaqanngilaq. Ataatsimiinnerit ilaanni arlaannit ilassineqanngitsoorneq mamiasuutigineqartariaqanngilaq.

10. Tamatta ilagiinni sumut periarfissaqarpugut, qanorlu ililluta periarfissaq tamanna atorluarsinnaavarput?

¹⁰ Ilassisaqarneq inoroorsaarfiginninnermi iliuusiuvoq siulleq. Ineriartornartumik oqaloqatigiinnermik ikinngutigiittualernermillu kinguneqarsinnaavoq. Assersuutigalugu ataatsimeersuarutta ilisarisimanngisatsinnillu ilassisaqarutta oqaloqatigilerlugillu, takoqqinnissaannut qilanaalissaagut. Naalagaaffilersaarfilioqataasartut ikiuiniaqataasartullu ikinngutigiillualerajupput suleqatigiinnermikkut suleqatimik nuannequtaat misigisaramikkit. Aap, Jehovap peqatigiissortaani ikinngutigiuarsinnaasanik ikinnguteqalernissamut periarfissarpassuaqaqaaq. ‘Ammarutta’ ikinngutivut amerliartussapput taamaalillunilu asanninneq pallorfiginninnermi ilumoortumi uagutsinnik ataasiulersitsisoq ineriartussalluni.

Allanut piffissaqartarit

11. Markusi 10:13-16-imi ersersinneqartutut Jiisusi qanoq maligassiuiva?

¹¹ Kristumiut tamarmik Jiisusip pisimaneratut ilassiorniartuusinnaapput. Maluginiaruk Jiisusi qanoq oqarnersoq angajoqqaat meeqqaminnik Jiisusimukaassisut ajoqersugaasa unitsinniarmatigit. “Meerannguit uannut qaaginnarlit, akornuseqinasigillu; taakkuami Guutip naalagaaffia pigaat.” Taava “pakkullugillu assamminik patippai pilluaqqullugillu”. (Markusi 10:13-16) Takorlooriaruk meeqqat Ajoqersuisorsuarmit soqutigineqarlutillu asannittuliorfigineqarnertik qanoq nuannaarutigitigisimassagaat!

12. Allanik oqaloqateqarnissamut suna akornutigisinnaavarput?

¹² Kristumiut tamarmik immikkut imminut ima aperisariaqarput: ‘Allat oqaloqatiginiaraangannga oqaloqatissaasarpunga, imaluunniit ulapippallaarpasittarpunga?’ Ileqqut imminni ajortuunngikkaluartut oqaloqatigiinnissamut akornutaasinnaapput. Assersuutigalugu  allat najuutsillugit mobilimi oqalukulagutta nipilersuutinilluunniit tusarnaarniarluta naalaaruteqartarutta allat eqqarsarsinnaapput ilagerusuppallaanngikkivut. Allat maluginiarrunikku qarasaasiaaraq nassartariaq tiguarteqqaffigigipput isummersinnaapput taakkua oqaloqatigerusuppallaanngikkivut. Soorunami “nipangersimaffissaqarpoq”, allanilli peqateqaraangatta amerlanertigut ‘oqaluffissaasarpoq’. (Oqaluussisartup oqaasii 3:7) Ilaat immaqa ima oqarlutilluunniit eqqarsartarput: “Kisimiikkusunnerusarpunga”, imaluunniit “Ullaakkut oqaloqateqarusunneq ajorpunga”. Kisianni oqaloqateqarusunngikkaluaraangattaluunniit allanik inussiarnersumik oqaloqateqarneq asanninnermut ‘namminissarsiortanngitsumut’ ersiutaasarpoq. — 1 Korinthimiut 13:5.

13. Paulusip Timotheusi ilagiinniittunut allanut qanoq isiginnittaaseqaqqullugu kajumissaarpaa?

¹³ Paulusip Timotheusi inuusuttoq kajumissaarpaa ilagiinnut ilaasortaasunik tamanik ataqqinnittooqqullugu. (Atuakkit 1 Timotheusi 5:1, 2). Uaguttaaq ataqqinnittuusariaqarpugut. Utoqqaat anaanagisutut ataatagisutullu, inuusunnerusullu qatanngutitsitut pisariaqarpavut. Taamatut isiginnittaaseqarutta qatanngutivut uagutsinnut takornartaasutut misiginavianngillat.

14. Allanik ineriartornartumik oqaloqateqarneq qanoq iluaqutaasinnaava?

¹⁴ Ilagiinniittut allat ineriartornartumik oqaloqatigigaangatsigit taakkua anersaakkut misigissutsikkullu nalerisimaarnerannut siuarsaaqataasarpugut. Qatanngutip angutip immikkoortortaqarfimmi sulisup nuannersumik eqqaamavai Betelimi suleqataasut utoqqaat arlallit Betelimiileqqaarami oqaloqatiginninnissaminnut piffissaqartartut. Oqaasii kajumissaataasut Betelimi ilaqutariinnut ilaasortavittut misigilissutigai. Maanna taakkunatut iliorniarsarisarpoq Betelimi najugalinnik allanik oqaloqateqarniartarluni.

Maniguunneq eqqissinermik siuarsaanissamut iluaqutaasarpoq

15. Sumit erserpa isumaqatigiinngissuteqalersinnaasugut?

¹⁵ Filippimi arnat kristumiut marluk, Euodia Syntykilu, isumaqatigiinngissuteqarsimagunarput. (Filippimiut 4:2, 3) Aamma Paulusi Barnabalu tusaamaneqalersumik assortuupput avissaarallarnerminnik kinguneqartumik. (Apustilit Suliaat 15:37-39) Oqaluttuanit taakkunannga erserpoq allaat kristumiut ilumoortut isumaqatigiinngissuteqalersinnaasut. Jehovalli isumaqatigiinngissutinik aaqqiinissamut ikinngutigiileqqinnissamullu iluaqutissanik tunisimavaatigut. Piumasaqarfigaatigulli.

16, 17. (a) Sooq isumaqatigiinngissuteqartilluni maniguunnissaq pingaaruteqarpa? (b) Jaakumik Esauimillu oqaluttuaq tamatuma pingaaruteqarneranut qanoq erseqqissaataava?

¹⁶ Takorlooriaruk illit ikinngutivillu arlaat biileqatigiinniartusi. Biilili aallarteqqaartariaqarpat matuersaammik aallartittaammik. Aamma isumaqatigiinngissutinik aaqqiiniarneq ‘matuersaammik’ aallartinneqartarporlusooq. ‘Matuersaat’ taanna tassaavoq maniguunneq. (Atuaruk Jaaku 4:10). Soorlu oqaluttuamit Biibilimeersumit tulliuttumit ersertoq ‘matuersaammik’ tamatuminnga atuinerup kingunerisaanik isumaqatigiinngissuteqartut najoqqutassianik Biibilimiittunik atuilissapput.

¹⁷ Esauip angajulliussutsip marluliaminut Jaakumut tunniunneqarsimaneranik narrutsassimassutiginninneranit taamaattumillu nukkaminik toqutsinialersaarneranit ukiut 20-t qaangiupput. Piffissap sivisuup tamatuma kingorna maanna marlulissat naapeqqittussanngorput, ‘Jaakulu siooratsangaarpoq’. Misigaaq Esauimit saassunneqarnissani ilimanarluinnartoq. Naapeqqinnerminnili Jaaku Esauip naatsorsuutiginngisaanik iliuuseqarpoq. Taanna qatanngutiminut qanilliartornermini ‘nunamut pallortarpoq’. Taava qanoq pisoqarpa? “[Esauip] arpalluni parsiarlugu tikikkamiuk pakkutaarpaa qungasiagullu eqillugu kunillugulu, marluullutillu qiapput.” Akiuuttoqarnissaa ilimanaateqarunnaarpoq. Jaakup maniguunnini Esauip uumissuineranik ajugaaffiginninnissamut iluaqutigaa. — 1 Mosesi 27:41; 32:4-9; 33:3, 4.

18, 19. (a) Sooq isumaqatigiinngissuteqartilluta siunnersuutinik Biibilimiittunik malinninniarluta siulliulluta iliuuseqarnissarput pingaaruteqarpa? (b) Isumaqatiginngisaq aallaqqaammut ajunngitsumik perianngippat sooq uniinnassanngilagut?

¹⁸ Biibilimi pitsassuarnik siunnersuuteqarpoq  isumaqatigiinngissutinik aaqqiineq pillugu. (Matthæusi 5:23, 24; 18:15-17; Efesosimiut 4:26, 27) * Siunnersuutilli taakku maniguulluta malinngikkutsigit eqqisseqatigiinnissaq ajornakusoorsinnaavoq. Isumaqatiginngisap maniguunnermik ersersitsinissaata utaqqinissaa aaqqiissutaanngilaq nammineq ‘matuersaateqaraanni’.

¹⁹ Eqqisseqatigiinniarluni misiliinerit siulliit iluatsinngippata neriuutaarutissanngilagut. Isumaqatiginngisap immaqa misigissutsiminik inissiinissani pisariaqartippaa. Josefip qatanngutai Josefimik killuussipput. Piffissaq sivisooq qaangiummat aatsaat naapeqqippaat Egyptenimi ministeriunerusoq. Naggataatigulli allamik isumataarput qinnuigalugulu isumakkeerfigeqqullutik. Josefip isumakkeerfigai, Jaakullu erneri inuianngorput Jehovap aqqanik taaguuteqarnermik ataqqinaateqalersut. (1 Mosesi 50:15-21) Qatanngutitsinnik eqqisseqateqarnitsigut ilagiinni ataasiussusermik nuannaarnermillu siuarsaasarpugut. — Atuakkit Kolossemiut 3:12-14.

‘Suliatsigut sallusuinnikkullu asannittuuniarta’

20, 21. Jiisusip apustilit isigaannik asaanera sumik ilinniarfigisinnaavarput?

²⁰ Jiisusip toqunngitsiarluni apustilini ima oqarfigai: “Maligassippassi uanga ilissinnut iliornittut ilioqqullusi.” (Johannesi 13:15) Ajoqersukkami isigaat asaqqammerpai. Jiisusip iliuuserisaa ileqqulersuutaananilu inussiarnisaarnerinnaanngilaq. Johannesi isikkanik asaanera tamanna eqqartunngitsiarlugu ima allappoq: “[Jiisusip] pigisani silarsuarmiittut asajuarsimavai, naggatissamullu allaat asavai.” (Johannesi 13:1) Jiisusip ajoqersukkaminik asanninnini nalinginnaasumik inussiap suliarisartagaanik suliaqarnissamut kajumississutigaa. Maanna taakku maniguullutik asannillutillu imminnut sullittariaqarput. Aap, qatanngutigiittut asaqatigiinneq ilumoortoq qatanngutitsinnik kristumiunik tamanik isumassuillutalu soqutiginninnissamut kajumississutigisariaqarparput.

²¹ Apustili Petrusi, isigai Guutip erneranit asanneqartut, Jiisusip iliuusiata qanoq paasisariaqarneranik paasinnippoq, imami allappoq: “Ilissi sallusuissummut naalannikkut tarnisi minguiarsimagassigit qatanngutigiittut ilumoortumik asaqatigiissinnaalerlusi, taava uummammik minguitsumik asaqatigiissaasi.” (1 Petrusi 1:22) Apustili Johannesi, isigai Jiisusimit aamma asanneqartut, ima allappoq: “Qitornaasusi, oqaasiinnartigut oqaannakkulluunniit pinnata suliatsigulli sallusuinnikkullu asannittuuniarta!” (1 Johannesi 3:18) Qanortoq tamatta iliuutsitsigut qatanngutigiittut asaqatigiinnermik ersersitsinissamut killinneqarisa!

[Quppernerup ataani ilanngussaq]

Eqqaamavigit?

• Immitsinnut asannittuliorfigeqatigiinnermut tunngatillugu qanoq ‘ammarsinnaavugut’?

• Allat piffissaqarfiginissaannut suna iluaqutigisinnaavarput?

• Isumaqatigiinngissutinik aaqqiiniaraanni maniguunneq qanoq pingaaruteqarpa?

• Uppeqatitsinnik isumassuinissamut suna kajumississutigissavarput?

[Atuaqqissaarnermi apeqqutit]

[Qupp. 25-mi assiliartaq]

Uppeqatitit asannittumik ilassisakkit

[Qupp. 27-mi assiliartaq]

Uppeqatinnik oqaloqateqarnissamut periarfissatit maangaannarteqinagit