Missiarsi! Guutip annaassissutissaa
Missiarsi! Guutip annaassissutissaa
“Soorlumi Adamimi tamarmik toqusartut, taamatuttaaq Kristusimi tamarmik uummartitaajumaarput.” — 1 KORINTHIMIUT 15:22.
1, 2. (a) Andreasi Filipilu Jiisusi naapikkamikku suna qularutiginngilaat? (b) Sooq uagut ukiuni hundredelinni siullerni kristumiuninngarnit Jiisusip Missiarsiuneranut uppernarsaatissaqarneruvugut?
“MISSIARSI naapipparput.” Andreasip qatanngutini Petrusi taama oqarfigaa, qularutiginagu Jiisusi Nazaretimioq tassaasoq Guutip tanitaa. Aamma Filipip qularunnaarsimasup ikinngutini Nathanaeli naapinniarpaa imalu oqarluni: “Mosesip inatsisaani pruffiitinilu eqqartorneqartoq naapipparput — tassa taanna Jiisusi Josefip ernera Nazaretimioq.” — Johannesi 1:40, 41, 45.
2 Illit qularutiginngilluinnarpiuk Jiisusi tassaasoq Missiarsi neriorsuutigisaq, ‘annannissamik aqqutissiuisoq’? (Hebræerit 2:10) Ullumikkut uagut ukiuni hundredelinni siullerni ajoqersukkaninngarnit Jiisusi neriorsuutigisatut Missiarsiuneranut uppernarsaatissaqarnerungaarpugut. Jiisusip inunngorneraniit makititaaneranut inuunerani pisimasut Guutip oqaasiani allanneqarsimasut taassuma Missiarsiuneranut uppernarsaataapput akerlilerneqarsinnaanngitsut. (Atuakkit Johannesi 20:30, 31). Aamma Biibilimi ersersinneqarpoq Jiisusi Missiarsitut suliassaminik qilammit naammassiniaajumaartoq. (Johannesi 6:40; atuaruk 1 Korinthimiut 15:22). Ullumikkuttaaq uagut oqarsinnaavugullusooq ‘Missiarsi naapissimallugu’, tassa anersaakkut ittumik. Siullermilli misissoriartigu Jiisusip ajoqersugai siulliit sooq pissutissaqarluarlutik isummersinnaasut Jiisusi Missiarsiusoq.
Missiarsi pillugu ‘anngigisaq’ — paasinarsisikkiartuaarneqartoq
3, 4. (a) Ukiuni hundredelinni siullerni ajoqersukkat Jiisusip Missiarsiunera qanoq ilillutik paasisinnaavaat? (b) Sooq oqartoqarsinnaava Jiisusi kisimi Missiarsi pillugu siulittuutinik tamanik eqquutsitsisinnaasoq?
3 Jiisusip ukiuni hundredelinni siullerni ajoqersugaasa taanna Missiarsiusoq qanoq ilillutik nalunngilaat? Jehovap pruffiitit aqqutigalugit paasinarsisikkiartuaarpaa Missiarsip tikiuttussap suut ilisarnaatigissanerai. Paasinarsisikkiartuaarneqarnera Biibili pillugu oqaaseqartartup assersuuppaa inuusaliap maarmoriminernit arlalinnit sanaajusup katiterneqarneranut. Takorlooriaruk anguterpassuit imminnut atassuteqarfigisimanngisaannartut tamarmik immikkut maarmoriminermik tigumiarlutik ineeqqamut isertut. Maarmorimerngit taakku inuusalianngorlugit katiterneqarsinnaappata, tunngavissaqarluartumik isummertoqarsinnaavoq inuup aalajangersimasup inuusaliaq taanna ilusilersorlugulu sanasimassagaa angutillu tamaasa immikkut inuusaliap ilaanik maarmoriusunik nassillugit. Soorlu maarmorimerngit tamarmik immikkut inuusaliap qanoq iluseqarnera paasinarsissappat pingaaruteqartut, taamatuttaaq Missiarsi pillugu siulittuutit tamarmik immikkut Missiarsi pillugu pingaarutilinnik paasissutissartaqarput.
4 Missiarsi pillugu siulittuutit tamarmik nalaatsornikkut inummut ataatsimut eqquussinnaanissaat qanoq ilimanartigaa? Misissueqqissaartartoq oqarsimavoq Missiarsi pillugu siulittuutinik tamanik nalaatsornikkut eqquutsitsisoqarsinnaanissaa ima ilimananngilluinnartigisoq pisinnaanngitsutut isigineqartariaqarluni. Isummerporlu “Jiisusip — oqaluttuarisaanerlu tamaat eqqarsaatigalugu taassuma kisimi — [siulittuutit taakku eqquutitissinnaagai]”.
5, 6. (a) Saatanimut eqqartuussut qanoq naammassineqarumaarpa? (b) Jehovap qanoq ililluni paasinarsisikkiartuaarpaa ‘kinguaassap’ neriorsuutigisap kinguaariinni sorlerni saqqummerumaarnera?
5 Missiarsi pillugu siulittuutini pingaarnersaq tassaavoq ‘anngigisaq’ qilammi nunamilu pingaaruteqartuartunut tunngasorpassualik. (Kolossemiut 1:26, 27; 1 Mosesi 3:15) Anngigisami tamatumaniippoq Saatanimut Diaavulumut, ‘pulateriaarsutoqqamut’ inuiannik ajortimut toqumullu igitsisumut, eqqartuussut. (Saqqummersitat 12:9) Eqqartuussut tamanna qanoq naammassineqarumaarpa? Jehova siulittuivoq ‘arnap’ ‘kinguaassaata’ Saatanip niaqua aserorterumaaraa. ‘Kinguaassap’ siulittuutigisaasup pulateriaarsuup niaqua aserorterumaarpaa taamaalillunilu nappaatinut toqumullu aamma Guutimut pikitsitsinermut pissutaasoq peerlugu. Tamannali pitinnagu Saatanip Guutimit akuerineqarluni arnap ‘kinguaassaa’ kimmiatigut assersuutaasumik ikilissavaa.
6 Jehova ‘kinguaassap’ kinaaneranik paasinarsisitsiartuaarpoq. Guutip Aaperaat ima uppernarsaavigaa: “[Illit] kinguaassakkut nunarsuarmi inuiaat tamarmik pilluaqqunarsissapput.” (1 Mosesi 22:18) Mosesi siulittuivoq kinguaassaq taanna ‘pruffiitiujumaartoq’, taannalu Mosesimit annerusussaavoq. (5 Mosesi 18:18, 19) Daavi pruffiitit kingusinnerusukkut uppernarsagaannik neriorsoqqissaarneqarpoq, tassa Missiarsi kinguaariumaaraa taassumalu Daavip issiavissaarsua naassaanngitsumut kingornukkumaaraa. — 2 Samueli 7:12, 16; Jeremia 23:5, 6.
Jiisusip Missiarsiuneranut uppernarsaatit
7. Jiisusi qanoq ililluni ‘arnamit’ Guutip pigisaaneerpa?
7 Guutip ernini — pinngortitami siullersaat — ‘kinguaassatut’ neriorsuutigisatut qilammi pinngortitanik anersaajusunik peqatigiissortaminit nuliatut ittunit aallartippaa. Taamaammat Guutip ernituata qilammi inuunini ‘iperartariaqarpaa’ inuttullu naammalluinnartutut inunngortariaqarluni. (Filippimiut 2:5-7; Johannesi 1:14) Mariap anersaamit illernartumit ulinneqarneratigut qulakkeerneqarpoq inunngortup ‘Illernartumik, Guutip erneranik taaneqarsinnaanissaa’. — Lukasi 1:35.
8. Missiarsi pillugu siulittuut Jiisusip imermi kuisinniarluni sassarami qanoq eqquutitippaa?
8 Missiarsi pillugu siulittuutinit erserpoq Jiisusi sumi qaqugulu inunngorumaartoq aamma qaqugu Missiarsitut saqqummerumaartoq. Siulittuutigineqartutut Betlehemimi inunngorpoq. (Mika 5:1) Ukiuni hundredelinni siullerni juutit ilimasuttupilussuupput. Missiarsip tikiunnissaa ilimagaat, ilaasalu “eqqarsaataannarmikkut apeqqutaatippat Johannesi [Kuisisoq] Kristusiunersoq”. Johannesili ima oqarpoq: “Uannit pissaanerusoq tikiukkumaarpoq.” (Lukasi 3:15, 16) Ukiumi 29-mi ukiakkut Jiisusi 30-nik ukioqarluni kuisikkiartorluni Johannesimukarami piffissaq eqqorlugu imminut Missiarsitut ilisaritippoq. (Danieli 9:25, 1900) Tamatuma kingorna kiffartornini pisoqarfioqisoq aallartippaa ima oqarluni: “Piffissaq nalliuppoq, Guutillu naalagaaffia qanillivoq.” — Markusi 1:14, 15.
9. Jiisusip ajoqersugaasa immikkuualuttut tamaasa ilisimanngikkaluarlugit suna qularutiginngilluinnarpaat?
9 Inuilli ilimagisaat kukkuvoq. Jiisusi kunngitut pissutissaqarluartumik nersorneqarpoq, siunissamili naalakkersuisussaanera qilammillu naalakkersuiumaarnera aatsaat kingusinnerusukkut paasilluinnarneqarumaarpoq. (Johannesi 12:12-16; 16:12, 13; Apustilit Suliaat 2:32-36) Jiisusili aperimmat: “Ilissimi uanga kinaatippisinga?” Petrusi ingerlaannaq ima akivoq: “Illit tassaavutit Kristusi Guutip uumasup ernera.” (Matthæusi 16:13-16) Petrusi tamatumunnga assingusumik akivoq ajoqersugarpassuit Jiisusip ajoqersuutaanik mamiatsaatiginnillutik taanna qimammassuk. — Atuakkit Johannesi 6:68, 69.
Missiarsi naalaguk
10. Sooq Jehovap erseqqissarpaa ernerminut naalannissap pisariaqarnera?
10 Guutip ernitua qilammi pinngortitaavoq anersaajusoq pissarsuaq. Nunarsuarmi ‘Ataatamit aallartitaavoq’. (Johannesi 20:21; 16:27, 28) Ima oqarpoq: “Ajoqersuutiga uanga nammineq piginngilara, aallartitsisimali pigaa.” (Johannesi 7:16) Jehovap qaqqami naalannarsisitsinermi Jiisusip Missiarsiunera uppernarsaramiuk ima peqqusivoq: “Taanna tusarsiuk.” (Lukasi 9:35) Aap, Guutip qinigaa tusaruk, imaluunniit naalaguk. Naalassagaanni uppertariaqarlunilu ajunngitsuliortariaqarpoq. Upperneq ajunngitsuliornerlu Guutimit iluarisaanissamut naassaanngitsumillu inuulernissamut pisariaqarluinnarput. — Johannesi 3:16, 35, 36.
11, 12. (a) Ukiuni hundredelinni siullerni juutit suut pissutigalugit Jiisusi Missiarsitut akuerinngilaat? (b) Jiisusimut uppertut kikkuuppat?
11 Jiisusip Missiarsiuneranut uppernarsaatissarpassuaqaraluartoq taanna ukiuni hundredelinni siullerni juutit amerlanersaannit Missiarsitut akuerineqanngilaq. Sooq? Juutit taakku namminneq Missiarsi pillugu aalajangiuteriikkaminnik isumaqaramik. Assersuutigalugu ilaat isumaqarput Missiarsiussasoq politikkimik suliaqartoq juutinik Romamiut naqisimanninnerannit aniguisitsisussaq. (Atuaruk Johannesi 12:34). Taamaattumik Missiarsi nikanartitaanissamik, inunnit narrugisaanissamik, anniaatiliunissamik nappaatinillu ilisimannittuunissamik naggataatigullu toqutaanissamik siulittuutinik eqquutsitsisoq akuerisinnaanngilaat. (Esaja 53:3, 5) Allaat Jiisusip ajoqersugaasa aalajaatsut ilaasa taassuma juutinik politikkikkut aniguisitsinnginnera pakatsissutigaat. Ilumoorfiginnittuarpulli, piffissallu ingerlanerani eqqorluarnerusumik paasinnilerput. — Lukasi 24:21.
12 Inuit Jiisusimik Missiarsitut neriorsuutigisatut ajattuinerannut pissutaasut allat tassaapput taassuma ajoqersuutai, inuppassuarnit akueriuminaatsinneqartut. Guutip naalagaaffianut iserumalluni pisariaqarput ‘imminut isumakkeernissaq’, ‘silarsuarmut ilaannginnissaq’ (NV), Jiisusip neqaanik ‘nerinissaq’ aavanillu ‘imernissaq’ ‘ernioqqinnissarlu’. (Markusi 8:34; Johannesi 3:3; 6:53; 17:14, 16) Makitasut, pisuut ilumoortuusaartullu piumasaqaatit taakku eqqortikkuminaappallaarsoraat. Juutilli maniguuttorpassuit Jiisusi Missiarsitut akueraat, aamma Samariamiut ilaat ima oqarput: ‘Ilumut taanna tassaavoq silarsuup annaassisaa.’ — Johannesi 4:25, 26, 41, 42; 7:31.
13. Jiisusip kimmia assersuutaasumik qanoq aserorterneqarpa?
13 Jiisusi siulittuivoq palasiunernit assuarineqarumaarluni Guutimillu nalusunit nappakkamut kikiattorneqarumaarluni ullulli pingajuanni makititaajumaarluni. (Matthæusi 20:17-19) Killisiuisoqatigiinnut ‘Kristusiunerminik Guutimut ernerunerminik’ ilumoorneraanera Guutimik mitalliinertut isigineqarpoq. (Matthæusi 26:63-66) Pilatusip paasivaa ‘toqumik pillarneqaataasinnaasumik iliuuseqarsimanngitsoq’, juutilli Jiisusi pikitsitsinissamut kajumissaarisimasutut unnerluutigimmassuk ‘Jiisusi tunniuppaa piumasaannik peqqullugu’. (Lukasi 23:13-15, 25) Taamaalillutik ‘miserratigaat’, taassumalu Guutimit aallartitaaneranut naammattorsuarnik uppernarsaateqaraluartoq ‘inuunerup naalagaanera’ naggataatigut toquppaat. (Apustilit Suliaat 3:13-15) Siulittuutigineqartutut Missiarsi ‘peersitaavoq’ ukiumi 33-mi poorskip ulluani nappakkamut kikiattugaanermigut. (Danieli 9:26, 27; Apustilit Suliaat 2:22, 23) Taamatut naakkittaatsumik toqutaanermigut ‘kimmia’ aserorterneqarpoq, soorlu Mosesimik allakkani siullerni 3:15-imi siulittuutigineqartoq.
Sooq Missiarsi toqusariaqartoq
14, 15. (a) Jehova Jiisusip toqunissaanik akuerinninnissaminut sunik marlunnik pissutissaqarpa? (b) Jiisusi makititaareerami sua?
14 Jehovap Jiisusip toqunissaa akueraa pingaaruteqangaartut marluk pissutigalugit. Siullermik ‘anngigisamut’ tunngatillugu apeqqut pingaarutilipilussuaq Jiisusip toqumut allaat aalajaanneranit erseqqissarneqarpoq. Taassuma Saatanimit sakkortunerpaamik misilinneqaraluarluni qularnaalluinnartumik uppernarsarpaa inuk naammalluinnartoq ‘Guutimik mianerinnittuarsinnaasoq’ Guutillu kisimi oqartussaaneranik tapersersuisinnaasoq. (1 Timotheusi 3:16) Pissutaasut aappaat Jiisusip ima oqarluni ersersippaa: ‘Inuup Ernera tikiuppoq inuunini akissatut tunniutissallugu amerlasuut utertinneqaatissaattut.’ (Matthæusi 20:28) ‘Inuit tamarmik utertitaassutissaat’ taanna ajortip Adamip kinguaavisa kingornussaata sunniutaanik iluarsiisinnaavoq, aamma taanna iluaqutigalugu Jiisusimik Guutip annaassissutissaatut akuerinnittut tamarmik inuunermik naassaanngitsumik tunineqarsinnaanngorput. — 1 Timotheusi 2:5, 6.
15 Kristusi ulluni pingasuni ilivermeereerluni makititaavoq, ullullu 40-t tulliuttut ingerlaneranni arlaleriarluni ajoqersukkaminut saqqummerpoq. Taamaalilluni taakkununnga takutippaa uumalluni, aamma suli allanik siunnersorpai. (Apustilit Suliaat 1:3-5) Taava qilaliarpoq pilliutimi erlinnartup nalinga sassaanniarlugu tamatumalu kingorna piffissap kunngitut Missiarsitut najuutilernissaminut aalajangikkap nalliunnissaa utaqqiniarlugu. Tamannali nalliutinngikkallartillugu suliassaqaqaaq.
Missiarsitut suliassani naammassissavaa
16, 17. Jiisusip qilaliarami Missiarsitut suliassaa oqaluttuariuk.
16 Jiisusi makititaanermi kingorna ukiut hundredellit ingerlaneranni ilagiinni kristumiuni, kunngitut oqartussaaffigilikkamini, suliarineqartunik nakkutilliivoq. (Kolossemiut 1:13) Piffissaq aalajangigaq eqqorlugu Guutip naalagaaffiani kunngisut pissaanerminik atuilerpoq. Siulittuutit Biibilimiittut silarsuarmilu pisut kunngitut najuunnerata ‘pissutsillu aaqqissuussaanerata naggataatungaata’ (NV) 1914-imi aallartinnerannut uppernarsaataapput. (Matthæusi 24:3; Saqqummersitat 11:15) Tamatuma kinguninngua inngilinut illernartunut Saatanimik anersaapiluinillu qilammit igitsisunut siuttuuvoq. — Saqqummersitat 12:7-10.
17 Oqaluussinerup ilinniartitsinerullu Jiisusip ukiumi 29-mi aallarnigaasa naammassineqarfissaat qanillilluinnarpoq. Taassuma qanittukkut inuusut tamaasa eqqartuutissavai. Tamatuma nalaani inuit maniguuttut naalattullu imminillu Jehovap annaassissutissaatut akuerinnittut ima oqarfigissavai: “Naalagaaffik silarsuup tunngavilerneqarneraniit ilissinnut pisassarititaasoq kingornussarisiuk.” (Matthæusi 25:31-34, 41) Jiisusip kunngiuneranik akuerinninngitsut taassuma sakkutuunik qilammiusunik ajussusermik tamarmik akiuisunik siulersuinerani piuneerussaassapput. Taava Jiisusip Saatani qilersussavaa taannalu taassumalu anersaapilui “itinersuarmut” igillugit. — Saqqummersitat 19:11-14; 20:1-3.
18, 19. Jiisusip Missiarsitut suliassani naammassiguniuk suut suliarisimassavai, tamannalu inuiannut naalattunut qanoq kinguneqassava?
18 Jiisusi ukiuni tusindini naalakkersuinissamini taaguutiminut tamanut naapertuulluinnartumik iliussaaq, taaguutaalu ukuupput: “Siunnersuisoq Nalissaqanngitsoq, Guuti Pissarsuaq, Naassaanngitsumik Ataataq, Eqqissinermut Naalagaaneq”. (Esaja 9:5, 6) Taassuma naalakkersuinerata kingunerisaanik inuit aamma toqusimasut makititaasut naammalluinnartunngoriartuaassapput. (Johannesi 5:26-29) Missiarsip inuit piumasut ‘puilasunut inuussutaasunut’ siulersussavai, taamaalillunilu inuiaat naalattut Jehovamik eqqisseqateqarnissamut periarfississavai. (Atuakkit Saqqummersitat 7:16, 17). Naggammik misilinneqarnermik kingorna pikitsitsisimasut tamarmik, aamma Saatani anersaapiluilu, ‘tatsimut innerusumut ikuallassaataasumullu igitaassapput’, tamannalu ‘pulateriaarsuup’ niaquata aserorterneqarneranik kinguneqassaaq. — Saqqummersitat 20:10.
19 Jiisusip Missiarsitut suliassani nuannerluinnartumik kukkuneqanngilluinnartumillu naammassissavaa. Nunarsuaq paratiisiusoq inunnik utertitaasimasunik, peqqilluinnarlutik pilluarlutillu naassaanngitsumik inuujumaartussanik, ulikkaassaaq. Jehovap aqqa illernartoq mitaatigineqarsimanermit minguiarluinnarneqassaaq, aamma qilammi nunamilu eqqortumik kisimi oqartussaanera qutsissisinneqarluinnassaaq. Guutip tanitaanut naalattut tamarmik qanittukkut nuanningaartumik kingornussaqassapput!
Illit Missiarsi upperaajuk?
20, 21. Illit allat Missiarsi pillugu oqaluttuunnissaannut sunik pissutissaqarpit?
20 1914-imiilli Kristusip najuunnerani, imaluunniit parousiʹa-ani inuuvugut. Guutip naalagaaffiani kunngitut najuunnera takussaanngilaq, najuunnerali siulittuutit eqquunnerannit erseqqippoq. (Saqqummersitat 6:2-8) Ullumikkulli inuit amerlanersaasa Missiarsip najuunneranut takussutissaasut isiginngitsuusaarpaat, soorluttaaq ukiuni hundredelinni siullerni juutit Missiarsip akunnerminniinneranut uppernarsaatit sumiginnaraat. Taakkuattaaq politikkimik suliaqartumik nunarsuarmiluunniit politikkikkut naalakkersuisut aqqutigalugit sulerusuttumik Missiarseqarusupput. Illilli nalunngilat Jiisusi maanna Guutip naalagaaffiani kunngisut naalakkersuisoq. Tamanna paasigakku killinneqaatigaat, ilaa? Ukiuni hundredelinni siullerni ajoqersukkat pisimanerattut upperaarput Jiisusi Missiarsiusoq.
21 Inuit allat sallusuissut pillugu oqaloqatigigaangakkit Jiisusip Missiarsitut suliaa erseqqissartarpiuk? Taamaaliortarnikkut taassuma illit pillutit iliuuserisimasaanik, maanna suliaanik siunissamilu iliuuseriumaagaanik pingaartitsinerulissaatit. Andreasip Filipillu pisimanerattut qularnanngitsumik ilaquttatit ikinngutitillu Missiarsi pillugu oqaluttuussimavatit. Soormi maanna attaveqarfigeqqikkukkit angorniorlutillu oqaluttuullugit Jiisusi Kristusi ilumut tassaasoq Missiarsi, Guutip annaassissutissaa, neriorsuutigisaq?
Uku nassuiarsinnaavigit?
• Kristumiut siulliit qanoq ilillutik paasivaat Missiarsi kinaanersoq?
• Pingaarutillit marluk suut pissutigalugit Jiisusi toqusariaqarpa?
• Jiisusip Missiarsitut suliassaminik naammassinninniarnermini suut suli naammassinngilai?
[Atuaqqissaarnermi apeqqutit]
[Qupp. 21-mi assiliartat]
Ukiuni hundredelinni siullerni inuit qanoq ilillutik paasisinnaagamikku Jiisusi Missiarsiusoq neriorsuutigisaq?
[Qupp. 23-mi assiliartat]
Illit allat oqaloqatigigaangakkit Jiisusip Missiarsitut suliaa erseqqissartarpiuk?